Jump to content
Planeta.Ge

tvati

სტუმარი
 View Profile  მათი აქტივობის ნახვა

  • პოსტები

    13.345

  • შემოუერთდა

  • ბოლო ვიზიტი

 Content Type 

ბლოგ პოსტები დაპოსტილი tvati -ს მიერ

  1. tvati
    ევროპული საპარლამენტო ჯგუფის „მწვანეები/ევროპული თავისუფალი ალიანსის” წევრი მარკეტა გრეგოროვა ევროკავშირს მოუწოდებს, საქართველოს ოკუპაციაზეც იგივე რეაგირება ჰქონდეს, რაც უკრაინაზე.
    გრეგოროვა თანაავტორია ევროპარლამენტის რეზოლუციის რუსეთის საოკუპაციო ძალების მიერ საქართველოს მოქალაქეების — თამაზ გინტურის მკვლელობისა და ლევან დოთიაშვილის გატაცების შესახებ.
    საქართველოს გამო რუსეთისთვის სანქციების დაწესების, კერძოდ, ოთხოზორია-ტატუნაშვილის ქართული სიის მსგავსი ევროკავშირის სიის მიღების მოწოდებით გამოვიდა ევროპარლამენტარი ანა ფოტიგაც.
    ევროპარლამენტის რუსეთის საოკუპაციო ძალების მიერ საქართველოს მოქალაქეების — თამაზ გინტურის მკვლელობისა და ლევან დოთიაშვილის გატაცების შესახებ რეზოლუციის პროექტით, საბჭოს მოუწოდებს, შექმნას ევროკავშირის სანქციების სია, ოთხოზორია-ტატუნაშვილის სიის გათვალისწინებით და დააწესოს მიზანმიმართული სანქციები საქართველოს სუვერენიტეტის, ტერიტორიული მთლიანობისა და ადამიანის უფლებების დარღვევაზე პასუხისმგებელ პირებზე.

    netgazeti
  2. tvati
    საქართველოს პარლამენტის ეროვნული ბიბლიოთეკისა და აფხაზეთის ავტონომიური რესპუბლიკის მთავრობის წარმომადგენლები ესპანეთში იმყოფებიან.
    ეროვნული ბიბლიოთეკის მიერ გავრცელებული ინფორმაციით, ვიზიტის მიზანია აფხაზი თავადების, ჩხოტუების ესპანეთში დაცული უნიკალური არქივის საქართველოში ჩამოტანა.
    მათივე ცნობით, არქივი ეროვნული ბიბლიოთეკის ემიგრაციის დარბაზში დაიდებს ბინას.
    ვიზიტის შესახებ ეროვნული ბიბლიოთეკის დირექტორი გიორგი კეკელიძე წერს: „გილოცავთ ეპოქალური საქმის დასაწყისს! აფხაზი თავადების არქივები საქართველოში ბრუნდება! ეს ჰელენ ჩხოტუაა, უჭკვიანესი და ულამაზესი ქალი. ჩვენი მასპინძელი და უკვე მეგობარი. ჩხოტუების - დიდი აფხაზების, მალტის ორდენის კავალერების და მსოფლიო პოლიტიკის მონაწილეების მემკვიდრე. მან საქართველოს უდიდესი, ისტორიული არქივი გადასცა: საერთაშორისო მნიშვნელობის დოკუმენტები, ხელნაწერები, მიმოწერა, ფოტოები, წიგნები, ნივთები, ორდენები, რუკები - მოკლედ, საოცარი საგანძური, მალე საქართველოს ეროვნული ბიბლიოთეკის ემიგრაციის მუზეუმში დაიდებს ბინას. სამი დღეა, არქივების გადარჩევის ურთულესი პროცესი მიმდინარეობს, რომელსაც ეროვნული ბიბლიოთეკიდან თქვენი მონა-მორჩილი, ლევან თაქთაქიშვილი, ბექა ღაჟონია, აფხაზეთის ავტონომიური რესპუბლიკის მთავრობიდან მანანა ქვაჩახია, ნატო მარშანია და საზოგადოებრივი მაუწყებლიდან ნინო ჩუტკერაშვილი ვუძღვებით. მასალა ათობით ყუთს მოიცავს, დღესაც ვიმუშავებთ, ხვალ ჯგუფი მადრიდში გაემგზავრება, მე კი სამშობლოში დავბრუნდები. პროექტი აფხაზეთის ა/რ მთავრობის მიერ არის ინიცირებული და პერსონალური მადლობა რუსლან აბაშიძეს, რომელთან ერთადაც ამ დიდ არქივს გავხსნით და გამოვფენთ საქართველოში ძალიან მალე. მალევე ერთობლივ მემორანდუმს გავაფორმებთ და სხვა არქივებზე დავიწყებთ მუშაობას. ესპანეთი. ანდალუსია. მალაგა. მარბელია”, - წერს გიორგი კეკელიძე სოციალურ ქსელში.
    ეროვნული ბიბლიოთეკის ცნობით, ემიგრაციის დარბაზის მხარდამჭერია კომპანია „სარაჯიშვილი“.

    ipn
  3. tvati
    ევროპარლამენტში რუსეთის საოკუპაციო ძალების მიერ საქართველოს მოქალაქის თამაზ გინტურის მკვლელობასთან დაკავშირებით გამართულ დებატებზე სიტყვით ევროპარლამენტარი, მირიამ ლექსმანი გამოვიდა.
    ევროპარლამენტარმა, მირიამ ლექსმანმა სიტყვით გამოსვლისას რუსეთის საოკუპაციო ძალების მიერ თამაზ გინტურის მკვლელობა დაგმო და საქართველოს ტერიტორიული მთლიანობის მხარდაჭერა დააფიქსირა.
    „ნება მომეცით დავიწყო იმით, რომ მადლობა გადავუხადო ჩემს ძვირფას მეგობარს, ანა, ფოტიგას და ჩემს ყველა კოლეგას, აღნიშნული რეზოლუციის მომზადების დროს თანამშრომლობისთვის. მჯერა, რომ რეზოლუციის ტექსტი საქართველოს სუვერენიტეტის, ტერიტორიული მთლიანობისა და ადამიანის უფლებების დაცვის მიმართ ჩვენ ურყევ მხარდაჭერას მოწმობს. მე ფუნდამენტურად ვგმობ თამაზ გინტურის სასტიკ მკვლელობას და ნება მომეცით ნათლად განვაცხადო, რომ ეს შემზარავი აქტი, ისევე როგორც ყველა სხვა მკვლელობა, საქართველოს მოქალაქეების უკანონო გატაცება და წამება, რუსეთის საოკუპაციო ძალების პირდაპირ პასუხისმგებლობას წარმოადგენს. ეს არ მოხდებოდა, რომ არა მათ მიერ საქართველოს სუვერენული ტერიტორიის ოკუპაცია. ამიტომ, ყველა პასუხისმგებელი პირი უნდა დაისაჯოს, მათ შორის, მიზანმიმართული სანქციების გზით. მაგრამ უპირველეს ყოვლისა, რუსეთმა უკანონო ოკუპაცია უნდა შეაჩეროს. ჩვენ საქართველოს გვერდით ვდგავართ, მხარს ვუჭერთ ქართველი ხალხის ევროატლანტიკურ მისწრაფებებს და ვგმობთ რუსეთისა და მისი მარიონეტების მცდელობებს, რომლითაც ისინი ცდილობენ, რომ ამ მიზნებს ძირი გამოუთხარონ“, - განაცხადა მირიამ ლექსმანმა.
    რეზოლუციის ტექსტში ევროპარლამენტარები საქართველოს მოქალაქის, თამაზ გინტურის მკვლელობას გმობენ და საქმის საფუძვლიან გამოძიებას, დამნაშავეების დასჯას და საოკუპაციო ძალების ტყვეობაში მყოფი მოქალაქეების გათავისუფლებას მოითხოვენ. ევროპარლამენტარები ასევე გამოხატავენ მხარდაჭერას ქვეყნის ტერიტორიული მთლიანობისა და სუვერენიტეტის მიმართ.
    რეზოლუციის შესახებ კენჭისყრა ევროპარლამენტში დღეს გაიმართება.

    ipn
  4. tvati
    დიდი ბრიტანეთის საგარეო საქმეთა მინისტრი, დევიდ კამერონი ისრაელში ჩავიდა. ამის შესახებ ინფორმაციას BBC-ი ავრცელებს.
    დევიდ კამერონი ისრაელის სამხრეთით მდებარე კიბუც ბეერში ჩავიდა, სადაც 7 ოქტომბერს „ჰამასმა“ სასტიკი თავდასხმა განახორციელა.
    ბრიტანეთის საგარეო საქმეთა სამინისტროს ცნობით, დევიდ კამერონი ახლო აღმოსავლეთში ვიზიტის ფარგლებში ისრაელისა და პალესტინის ლიდერებს შეხვდება.
    გუშინ, ლონდონში, დევიდ კამერონმა არაბული და ისლამური ქვეყნების წარმომადგენლებთან ისრაელ-„ჰამასის“ კონფლიქტი განიხილა.

    ipn
  5. tvati
    მართლმადიდებელი ეკლესია დღეს წმინდა გიორგის ბორბალზე წამების დღეს აღნიშნავს. ამასთან დაკავშირებით ტაძრებში სადღესასწაულო წირვა-ლოცვა შესრულდება.
    წმინდა საკვირველთმოქმედი და ძლევაშემოსილი გიორგი ქართველი ერის მფარველად მიიჩნევა. წმინდანი მესამე საუკუნის მეორე ნახევარში, კაბადოკიაში, მდიდარი ქრისტიანის ოჯახში დაიბადა. მოგვიანებით, წმინდა გიორგი რომის იმპერატორ დიოკლიტიანეს მმართველობის დროს მხედართმთავარი გახდა. ქრისტიანებზე დევნის დაწყების შემდეგ იგი იმპერატორს განუდგა. კერპთაყვანისმცემელმა რომის იმპერატორმა წმინდა გიორგის ქრისტეს უარყოფა მოსთხოვა. მან მრავალი სატანჯველი დაითმინა, მათ შორის - ბორბალზე გაკვრა.
    მისი თხოვნით უფალმა მიცვალებული მკვდრეთით აღადგინა. 303 წელს წმინდანს თავი მოკვეთეს. წმიდა გიორგი 30 წლის ასაკში ეწამა. იგი ეკლესიის ისტორიაში შევიდა, როგორც ძლევაშემოსილი და უძლეველი ზეციური მხედარი.
    ეკლესია წმინდა გიორგის ხსენებას ორჯერ დღესასწაულობს. 6 მაისი წმიდანის აღსრულების დღეა.

    IPN
  6. tvati
    დღეს, 22 ნოემბერს პრეზიდენტმა ორბელიანების სასახლეში ახალგაზრდული ორგანიზაციების წარმომადგენლებსა და სტუდენტებს უმასპინძლა, რომლებიც შეუერთდნენ ხელმოწერების კამპანიას „ჩვენი ხმა ევროპას“.
    პრეზიდენტმა ასევე თქვა, რომ კანდიდატის სტატუსის მიღებით არ მთავრდება გზა ევროკავშირისკენ – მისი თქმით, პირიქით, ამის შემდეგ უფრო მნიშვნელოვანი ეტაპი იწყება.
    პრეზიდენტმა ასევე ხაზი გაუსვა, რომ მართალია, უკრაინა ბევრად უფრო მძიმე მდგომარეობაშია, ვიდრე საქართველო ან მოლდოვა, საქართველოს ოკუპირებულ ტერიტორიებზეც მძიმე მდგომრეობაა.
    8 ნოემბერს ევროკომისიამ საქართველოს ევროკავშირის წევრობის კანდიდატის სტატუსის მიღებაზე რეკომენდაცია გაუწია.
    მიენიჭება თუ არა საქართველოს კანდიდატის სტატუსი – საბოლოო გადაწყვეტილება 14-15 დეკემბერს, სამიტზე გამოცხადდება.

    პუბლიკა
  7. tvati
    მოხევე მარტია პაპიაშვილი, რომელიც „კამარა ჰესის“ პროექტს აპროტესტებს, ყაზბეგის მერთან შელაპარაკებას ადასტურებს, თუმცა ფიზიკურ შეურაცხყოფაზე არ საუბრობს.
    „იქ არ იყო პროვოკაციები, რაღაც პროვოცირება… რაღაცნაირად შევხვდით ერთმანეთს და მოხდა ერთმანეთში დალაპარაკება, შელაპარაკება და ასე მოხდა, რა…“, — განუცხადა მარტია პაპიაშვილმა ტელეკომპანია „ფორმულას“.
    მანამდე ახალგაზრდულმა კოალიციამ „ხევის თვითმმართველობისთვის“ გაავრცელა ინფორმაცია, რომ ყაზბეგის მერმა ბაკურ ავსაჯანიშვილმა მოქალაქეს სოციალურ ქსელში გამოქვეყნებული კრიტიკული პოსტის გამო სცემა. კოალიციის ცნობით, შემთხვევა 21 ნოემბერს სოფელ არშაში, დაკრძალვაზე მოხდა.
    „დიახ, ხალხის მიერ არჩეულმა მერმა მიცვალებულის დაკრძალვაზე, ხალხის თვალწინ ჯერ საქმის გარჩევა მოინდომა (Facebook-ზე „კამარა ჰესის“ წინააღმდეგ დაწერილი პოსტის გამო), ხოლო შემდეგ ჩაიდინა ეს სამარცხვინო საქციელი“, — დაწერა კოალიციამ „ხევის თვითმმართველობისთვის“ Facebook-ზე, თუმცა „ნეტგაზეთთან“ დამატებითი განმარტებების გაკეთება არ ისურვა.

    ბრალდებებს სოციალურ ქსელშივე გამოეხმაურა ყაზბეგის მერი ბაკურ ავსაჯანიშვილი.
    „გავრცელებული ინფორმაცია იმის შესახებ, რომ დაკრძალვაზე ხელით შევეხე მოქალაქეს, არის ტყუილი და ყოველგვარ საფუძველს მოკლებული. აღნიშნული მხოლოდ და მხოლოდ ჩემი საქმიანობისა და სახელის შელახვას ისახავს მიზნად“, — განაცხადა ავსაჯანიშვილმა.
    პოსტი, რომელიც მარტია პაპიაშვილმა 20 ნოემბერს გამოაქვეყნა, „კამარა ჰესის“ პროექტის მოწინააღმდეგეებზე ზეწოლას ეხებოდა.
    მოსახლეობის ნაწილი ეწინააღმდეგება მდინარე თერგზე 16.62 მგვ-იანი „კამარა ჰესის“ აშენებას.
    „კამარა ენერჯის“ მანამდე ორჯერ ეთქვა უარი ჰესის მშენებლობაზე, თუმცა პროექტის საჯარო განხილვა გარემოს დაცვის სამინისტრომ 27-28 ნოემბერს დააანონსა.
    „ვინც ხევის მიწა-წყლის დაყიდვას არ ეთანხმება და „კამარა ჰესის“ პროექტს მხარს არ უჭერს, სამსახურებიდან გაშვებით ემუქრებიან ეს უტვინოები. ამათი დანდობა და გათვალისწინება აღარ შეიძლება, სულ ყველა გამყიდველი ნაძირალა მხილებული უნდა იქნას!“ — ნათქვამია პოსტში.

    პაპიაშილი არ გამორიცხავს, რომ ყაზბეგის მერის გაღიზიანება ზემოაღნიშნულმა პოსტმა გამოიწვია, თუმცა ამბობს, რომ „ჰესის“ საკითხზე წინააღმდეგობები მანამდეც არსებობდა.
    „რაც ეს ჰესების თემები არსებობს, არსებობს დაპირისპირებები ადამიანებს შორის… არ ვიცი, აღარ მახსოვს კარგად [დაპირისპირების მიზეზი]. აქამდეც ვაქტიურობთ მოსახლეობის გარკვეული ნაწილი“, — თქვა მან.
    ყაზბეგის მერი ცილისწამებას უწოდებს ინფორმაციას, თითქოს კერძო კომპანიებს ლობირებს და თანამშრომლებს აიძულებს, კონკრეტული პროექტების განხორციელებას დაუჭირონ მხარი, წინააღმდეგ შემთხვევაში — სამსახურიდან გათავისუფლებით, მოქალაქეებს კი სოციალური დახმარების მიღების შეწყვეტით ემუქრება.
    ავსაჯანიშვილის თქმით, ამ ბრალდებების დამადასტურებელი არცერთი მტკიცებულება არ არსებობს.
    „სამწუხაროდ, ოპოზიციურად განწყობილი ჯგუფების წევრები საზოგადოების განზრახ შეცდომაში შეყვანას ცდილობენ და ამ მიზნით არც პროვოკაციულ ქმედებებზე იხევენ უკან“, — აცხადებს ყაზბეგის მერი.
    შინაგან საქმეთა სამინისტროში არ აქვთ პასუხი, დაიწყო თუ არა გამოძიება ძალადობის შესახებ საჯარო წყაროებით გავრცელებულ ინფორმაციაზე. სისხლის სამართლის საპროცესო კოდექსით, გამოძიების დაწყების საფუძველია დანაშაულის შესახებ ინფორმაცია, რომელიც გამომძიებელს ან პროკურორს მიაწოდეს, გამოვლინდა სისხლის სამართლის პროცესის დროს ან გამოქვეყნდა მასმედიაში.

    ნეტგაზეთი
  8. tvati
    ჭიათურის მუნიციპალიტეტის სოფელ რგანში სარემონტო სამუშაოებისას ერთი ადამიანი დაიღუპა, მეორე დაშავდა.
    წინასწარი ინფორმაციით, შემთხვევა კერძო შენობაში კედლის ჩამონგრევას მოჰყვა.
    როგორც „ნეტგაზეთს“ შინაგან საქმეთა სამინისტროში განუცხადეს,  გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

    ნეტგაზეთი
  9. tvati
    ოკუპირებული აფხაზეთის ე.წ. პრეზიდენტი ასლან ბჟანია რუსეთში ჩავიდა.
    მარიონეტული რეჟიმის ე.წ. ადმინისტრაციის ინფორმაციით, ვიზიტის ფარგლებში ასლან ბჟანია შეხვედრებს გამართავს რუსეთის სხვადასხვა სამთავრობო უწყებაში.
    ოკუპირებული აფხაზეთის სეპარატისტული რეჟიმის წარმომადგენლები აცხადებენ, რომ ასლან ბჟანიასთან ერთად რუსეთში იმყოფება ე.წ. სახელმწიფო უსაფრთხოების სამსახურის თავმჯდომარე თემურ ახიბა.
     

    ავტორი - გივი ბარამიძე
  10. tvati
    ჩვენ გავედით ომების მიღმა, ეს არ არის ომი, ეს არის ტერორიზმი, – ამის შესახებ რომის პაპმა ფრანცისკემ, ისრაელსა და „ჰამასს“ შორის ომზე საუბრისას განაცხადა.
    კათოლიკური ეკლესიის ხელმძღვანელის თქმით, ის შეხვდა დელეგაციას ისრაელიდან, რომელთა ნათესავებიც მძევლად ჰყავთ ღაზის სექტორში და პალესტინელების დელეგაციას, რომლებსაც ნათესავები ჰყავთ ისრაელის ციხეში.
    „ისინი ძალიან იტანჯებიან და გავიგე, როგორ იტანჯება ორივე მხარე. ეს არის ის, რასაც ომები აკეთებენ, მაგრამ აქ ჩვენ გავედით ომების ფარგლებს გარეთ. ეს არ არის ომი. ეს არის ტერორიზმი. გთხოვთ, მოდით, წავიდეთ წინ მშვიდობისთვის. ილოცეთ მშვიდობისთვის“, – განაცხადა რომის პაპმა.
     

    ავტორი - გივი ბარამიძე
  11. tvati
    ჯანდაცვის სამინისტრომ პირდაპირი შესყიდვის გზით, ინოვაციური ონკოლოგიური მედიკამენტების შესყიდვის პროცესი დაიწყო. ამის შესახებ ინფორმაციას ჯანდაცვის სამინისტრო ავრცელებს.
    მათივე ცნობით, აღნიშნული წესით, სახელმწიფო ძვირადღირებულ მედიკამენტებს სპეციალურ, მნიშვნელოვნად დაბალ ფასად შეიძენს და ონკოლოგიურ პაციენტთა სრულ საჭიროებებს დაფარავს.
    ინფორმაციის თანახმად, ჯანდაცვის სამინისტროსა და მედიკამენტების მწარმოებელ კომპანია „როშეს“ შორის ხელშეკრულება დღეს გაფორმდა. დოკუმენტის თანახმად, სახელმწიფო, შვეიცარიული კომპანიისგან სხვადასხვა დასახელების პრეპარატს პირდაპირი წესით, მართული შესვლის შეთანხმების (MEA) პრინციპების გათვალისწინებით განხორციელდა.
    ჯანდაცვის მინისტრის, ზურაბ აზარაშვილის განცხადებით, მომავალი წლიდან სახელმწიფო ონკოლოგიურ პაციენტს მკურნალობის კურსს სრულად დაუფინანსებს.
    „მედიკამენტების, უშუალოდ მწარმოებლებისგან შესყიდვის შედეგად, სახელმწიფოს ეძლევა შესაძლებლობა მეტ პაციენტს დაუფინანსოს მკურნალობა და მკურნალობის კურსის გათვალისწინებით, გაუზარდოს დაფინანსებული წამლების რაოდენობა.
    ჯანდაცვის სამინისტრო, მსოფლიოს იმ წამყვან ფარმაცევტულ კომპანიებთან აწარმოებს მოლაპარაკებებს, რომელთა წარმოებული მედიკამენტებიც საქართველოში ფართოდ გამოიყენება და სახელმწიფო დანახარჯების ყველაზე დიდი წილი მოდის. ცვლილების მიზანი, მოსახლეობისთვის მაღალხარისხიან მედიკამენტებზე საყოველთაო ხელმისაწვდომობის უზრუნველყოფაა.
    მედიკამენტების უშუალოდ მწარმოებლისგან შესყიდვა, წამლებზე ხელმისაწვდომობის გაზრდის მიზნით, ჯანდაცვის სამინისტროს მიერ განხორციელებული რეფორმების ნაწილია. მედიკამენტებზე ჯიბიდან გადახდების შემცირების მიზნით, საქართველოს მთავრობის გადაწყვეტილებით, 2022 წელს თურქული ფარმაცევტული ბაზარი გაიხსნა, დაინერგა ელექტრონული რეცეპტების სისტემა, 3200-ზე მეტ მედიკამენტზე კი ფასის ზედა ზღვარი დაწესდა. შედეგად მედიკამენტების ფასი საშუალოდ 60%-ით შემცირდა“, - აღნიშნულია ინფორმაციაში.

    იპნ
  12. tvati
    8 ნოემბერს ევროკომისიამ საქართველოსთვის კანდიდატის სტატუსის მინიჭების რეკომენდაცია გასცა გარკვეული პირობებით. ევროკავშირში გაწევრიანებისთვის საქართველომ შემდეგი ეტაპები წარმატებით უნდა გაიაროს: კანდიდატის სტატუსის მინიჭება, გაწევრიანების მოლაპარაკება და შეთანხმებაზე ხელის მოწერა.
    tbc კაპიტალმა გამოაქვეყნა პუბლიკაცია, თუ რა ეკონომიკურ სარგებელს იძლევა ევროკავშირის წევრობის კანდიდატის სტატუსი სხვადასხვა ქვეყნების მაგალითზე.
    პუბლიკაციაში ნათქვამია, რომ ევროკავშირში გაწევრიანებისთვის, წევრობის კანდიდატის სტატუსის მიღებიდან, საშუალოდ 6 წელი დასჭირდათ ჩეხეთს, ესტონეთს, უნგრეთს, ლატვიას, ლიეტუვას, პოლონეთს, სლოვაკეთს, სლოვენიას, მალტას, კვიპროსს, ბულგარეთს, რუმინეთს, ხორვატიას.
      ისტორიულად, მოლაპარაკების პროცესი ყველაზე ხანგრძლივია და ის სახელმწიფოს ისეთ სფეროებსა და ასპექტებს ეხება, როგორებიცაა: ქვეყნის ფუნდამენტური საკითხები, ადგილობრივი ბაზარი, კონკურენცია და ინკლუზიური ზრდა, მწვანე პოლიტიკის დღის წესრიგი და მდგრადი განვითარება, სოფლის მეურნეობა და საგარეო ურთიერთობები.
    წევრობის კანდიდატობის პერიოდში, ევროკავშირის წევრი ქვეყნებისა და კანდიდატი ქვეყნის ეკონომიკებს შორის განსხვავება მცირდება. გაწევრიანების შემდეგ კი, ეფექტი კიდევ უფრო თვალშისაცემია.
    თიბისი კაპიტალის პუბლიკაციაში განხილულია ბულგარეთის და სხვა ქვეყნების მაგალითი:
    ევროკავშირის წევრობის კანდიდატის სტატუსის მიღების შემდეგ, ბულგარეთის ექსპორტი ევროკავშირში მნიშვნელოვნად გაიზარდა და 2000-2006 წლებში წლიურმა ზრდამ 23% შეადგინა.
    წევრობის კანდიდატის სტატუსის მიღების შემდეგ, 2000-2006 წლებში, პირდაპირი უცხოური ინვესტიციების შემოდინება ბულგარეთში თითქმის 8-ჯერ გაიზარდა, ასევე, გაუმჯობესდა ქვეყნის საკრედიტო რეიტინგიც.
    ევროკავშირი გაწევრიანების პროცესში, გაწევრიანებამდელი მხარდაჭერის ინსტრუმენტს სთავაზობს დასავლეთ ბალკანეთის ქვეყნებს, რაც 14 მილიარდი ევროთი ისეთი სტრატეგიული მიმართულებების დაფინანსებას გულისხმობს, როგორებიცაა: კანონის უზენაესობა, კარგი მმართველობა, მწვანე დღის წესრიგი, კონკურენცია და ინკლუზიური ზრდა, ტერიტორიული და ტრანსსასაზღვრო თანამშრომლობა. ასევე, არსებობს ეკონომიკური და საინვესტიციო გეგმა, რომლითაც 9 მილიარდი ევროა გამოყოფილი ტრანსპორტის და ენერგეტიკის სექტორების, ასევე მწვანე და ციფრული განვითარებისთვის. კიდევ ერთი მნიშვნელოვანი პროგრამაა დასავლეთ ბალკანეთის ქვეყნების საგარანტიო პლატფორმა, რამაც რეგიონში 20 მილიარდამდე ევროს ინვესტიციები უნდა მოიზიდოს.
    რაც შეეხება კანდიდატობის პერიოდში სხვადასხვა ქვეყნისთვის გაწეული მხარდაჭერისა და დახმარების შედეგებს: ბოსნია და ჰერცოგოვინაში ინვესტიციები სოფლის მეურნეობის პროდუქტებისა და ხის გადამამუშავებელ მრეწველობაში, ასევე მეტალურგიაში ჩაიდო.
    ჩრდილოეთ მაკედონიაში ევროკავშირმა ინვესტიცია 6 რეგიონული სამედიცინო ცენტრის აღჭურვისთვის განახორციელა. ასევე, სერბეთთან სასაზღვრო ინფრასტრუქტურის მოდერნიზების შედეგად, გამტარუნარიანობა 30%-ით გაიზარდა.
    დასავლეთ ბალკანეთსა და თურქეთში ათასობით ფერმა და აგროსასურსათო გადამამუშავებელი საწარმო გადაიარაღდა.
    ალბანეთში შეიქმნა სტრატეგიული სატრანსპორტო ინფრასტრუქტურა, ასევე - მცირე და საშუალო მასშტაბის საგზაო ინფრასტრუქტურა. შედეგად, სოფლები ცენტრალურ მაგისტრალებს დაუკავშირდა, რამაც ტურიზმის განვითარებას შეუწყო ხელი, ასევე, სოფლის მეურნეობას საექსპორტო ბაზრებისკენ გაუხსნა გზა.
    საქართველოსთვის ევროკავშირი მნიშვნელოვანი ეკონომიკური პარტნიორია. სხვადასხვა ქვეყნის გამოცდილება ადასტურებს, რომ კანდიდატობის სტატუსი ევროკავშირთან ეკონომიკური ურთიერთობების გაღრმავებას უწყობს ხელს.
     
      ავტორი: თამარ მუკბანიანი

    BPN.GE
  13. tvati
    23 ნოემბერს დღის მეორე ნახევრიდან გვიან საღამომდე დასავლეთ საქართველოში მოსალოდნელია წვიმა, მაღალმთიან რეგიონებში თოვლი, ზოგან ძლიერი, შესაძლებელია თოვლის ზვავები.
    ამის შესახებ ინფორმაციას გარემოს ეროვნული სააგენტო ავრცელებს.
    მოსალოდნელმა ნალექებმა დასავლეთ საქართველოს მდინარეებზე შესაძლებელია წყლის დონეების მნიშვნელოვანი მატება, ხოლო გორაკ-ბორცვიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს.
    „საქართველოს მთიან და მაღალმთიან რეგიონებში მოსალოდნელი დიდთოვლობის, ზვავსაშიშროების და ხილვადობის გაუარესების გამო, საავტომობილო გზების ცალკეულ მონაკვეთებზე შესაძლებელია შეიზღუდოს ტრანსპორტის მოძრაობა“, - ნათქვამია გავრცელებულ ინფორმაციაში.

    იპნ
  14. tvati
    დედაქალაქის მერის, კახა კალაძის განცხადებით, 12-მეტრიანი ავტობუსები 18-მეტრიანი ახალი ავტობუსებით N301, N302, N308, N314 მარშრუტებზე ჩანაცვლდება.
    როგორც კალაძემ აღნიშნა, 18- მეტრიან ავტობუსებს ქალაქში გადაადგილების პრობლემა არ ექნებათ.
    „ბევრი კომენტარი იწერებოდა ამასთან დაკავშირებით, „რა 18- მეტრიანი ავტობუსები თბილისის ქუჩებში, როგორ შეიძლება 18 მეტრიანი ავტობუსი გადაადგილდებოდეს თავისი გაბარიტებიდან გამომდინარე, შეუძლებელი იქნებაო“. ყველა იმ მარშრუტზე, რომელზეც იქნება დანიშნული აღნიშნული ავტობუსები, რა თქმა უნდა, არ იქნება პრობლემა. სხვათა შორის შეიძლება ვიღაცამ რაღაც არ იცოდეს, ესეც ჩვეულებრივია, არც მე ვიცი ყველაფერი, მაგრამ როცა არ ვიცი, ვეკითხები ადამიანს, ვინც იცის და ვინც რაღაცას მეტყვის, გამაგებინებს. თქვენც რომ იკითხოთ, არანაირი პრობლემა არ იქნება.
    18-მეტრიანი ავტობუსები წლების წინ თბილისში გადაადგილდებოდა, დადიოდა. ასევე, მინდა გითხრათ, რომ ტრამვაიც დადიოდა თბილისში, თუმცა მავნებლებმა, ბოროტებმა ქალაქს წაართვეს ძალიან მნიშვნელოვანი საზოგადოებრივი ტრანსპორტი, რომელიც იყო ტრამვაის სახით. დღეს რომ ქალაქს ტრამვაი ჰყავდეს, რა თქმა უნდა, ეს კიდევ უფრო მეტი ადამიანის გადაყვანის შესაძლებლობას მოგვცემდა და ნაწილობრივ შეამსუბუქებდა იმ ვითარებას, რაც ზოგადად სატრანსპორტო მიმართულებით ქალაქში გვაქვს.
    18-მეტრიანი ახალი ავტობუსებით ჩანაცვლდება 12-მეტრიანი ავტობუსები შემდეგ მარშრუტებზე, ეს არის N301, 302, 308, 314 ავტობუსები. ამ მარშრუტებზე დღიურად 55 ათასი მგზავრობა ფიქსირდება, ეს ძალიან დიდი ციფრია. აღნიშნული ცვლილებებით ახალი ავტობუსის მაღალი ტევადობის გათვალისწინებით მარშრუტის გამტარუნარიანობა 50%-ით გაიზრდება, გამოთავისუფლებული 12 მეტრიანი ავტობუსები კი დაემატება სხვადასხვა მარშრუტებს“, - განაცხადა კალაძემ.

    იპნ
  15. tvati
    “რეალობა არის ასეთი, ჩვენ არავის არაფერს არ ვეხვეწებით, მით უმეტეს ბარიერის შემცირებას. პირიქით, მეტსაც გეტყვით, ბარიერი შეამცირონ კი არა, დაუბრუნონ ისტორიულ 7%-ს , ეს ჩვენი პარტიისთვის დაბრკოლებას არ წარმოადგენს. დღეს ყველაზე სწორი პოზიცია არის ის, რომ ბრძოლისთვის უნდა ვიყოთ მზად და არსებული სტატუს-ქვო შევცვალოთ.”

    მიშა დაუშვილი, საპარლამენტო პოლიტიკური ჯგუფი “საქართველოსთვის” წევრი. 402662845_280732781629049_6025557352438495780_n.mp4
  16. tvati
    “ოცნებას” კი არ უნდა ეხვეწებოდეს ოპოზიციური სპექტრი ბარიერის დაწევას, პირიქით სტრატეგია უნდა იყოს შემდეგი: უნდა გავძლიერდეთ, მეტი ნდობა მივიღოთ საზოგადოებისგან და არც 7%-იანი ბარიერის გადალახვის პრობლემა არ უნდა იყოს. ეს არის ყველაზე მნიშვნელოვანი. სხვაგვარად სტატუს-ქვოს ვერ შევცვლით.”

     მიშა დაუშვილი, საპარლამენტო პოლიტიკური ჯგუფი “საქართველოსთვის” წევრი. 404709110_1253676515305188_8449929186682426465_n.mp4
  17. tvati
    “საერთაშორისო გამჭვირვალობა - საქართველომ” მიმოიხილა იმ კომპანიების ჩართულობა სახელმწიფო შესყიდვების პროცესში და პოლიტიკური პარტიების მხარდაჭერა, რომლებმაც წიაღის მოპოვების ლიცენზია იმერეთის რეგიონში 2019-2021 წლებში მიიღეს. ეს კომპანიები მოიპოვებენ როგორც ქვიშა-ხრეშს, ასევე გრანიტს, ტეშენიტს, კირქვას, ბაზალტს და სხვა სასარგებლო წიაღისეულს.
    ორგანიზაციის ცნობით, იმერეთის რეგიონში სასარგებლო წიაღისეულის მოპოვების 140 ლიცენზიანტიდან (იურიდიული და ფიზიკური პირები) 56 პოლიტიკური შემწირველია ან/და სახელმწიფო შესყიდვების პროცესშია ჩართული.
    მათ შორის, როგორც „საერთაშორისო გამჭვირვალობა - საქართველოს“ კვლევაშია აღნიშნული, ლიცენზიები მიიღეს მოქმედ ან/და ყოფილ თანამდებობის პირებთან დაკავშირებულმა კომპანიებმაც.
            -0:08       „37 სხვადასხვა ლიცენზიის მქონე 25-მა კომპანიამ და მათთან დაკავშირებულმა პირებმა 2 485 931 ლარის ოდენობის შემოწირულება გაიღო, რომელთა უმეტესი ნაწილის მიმღები მმართველი პარტია “ქართული ოცნება-დემოკრატული საქართველოა”.
    წიაღის ლიცენზიის მოპოვების მქონე 26 კომპანია სახელმწიფო შესყიდვების პროცესში არის ჩართული და მათ ჯამში, 757 566 585 ლარის ღირებულების ხელშეკრულებები აქვთ მიღებული,“ - აღნიშნულია ორგანიზაციის კვლევაში.
    „საერთაშორისო გამჭვირვალობა - საქართველოს“ კვლევაში საუბარია ასევე, იმ მოქმედ და ყოფილ თანამდებობის პირებზე, ვინც ლიცენზიანტ კომპანიებთან არიან დაკავშირებული:
    ბიჭიკო პაიკიძე, ვანის საკრებულოს წევრია პარტია “ქართული ოცნებიდან”. იგი ფლობს შპს B.P.TRANS-ის 100% წილს. ბიჭიკო პაიკიძემ პირადად 2016 წელს 12,000 ლარი გაიღო მმართველი პარტიის სასარგებლოდ, მისმა კომპანიამ, შპს B.P.TRANS-მა კი 2019-2021 წლებში 26 226 116 ლარის ოდენობის ხელშეკრულებები მიიღო სახელმწიფო შესყიდვებიდან. ბიჭიკო პაიკიძეს ახლო კავშირები აქვს სახელმწიფო უსაფრთხოების სამსახურის უფროსთან, გრიგოლ ლილუაშვილთან (იგი პაიკიძის შვილის ნათლიაა) და ეს აღწერილია ჟურნალისტურ გამოძიებებში;
    2014-2023 წლებში 31 562 630 ლარის ღირებულების სახელმწიფო შესყიდვები აქვს მიღებული კიდევ ერთ ლიცენზიანტ კომპანიას - შპს “ჯორჯიან ენერჯის”, რომლის 100%-ს დღეს ფლობს ზვიად ჩხობაძე, თუმცა ვიდრე ამ კომპანიას ის სრულად განკარგავდა, მანამდე მისი პარტნიორი ამავე კომპანიაში ბიჭიკო პაიკიძე იყო; ზვიად ჩხობაძემ 60 000 ლარი შეწირა “ქართულ ოცნებას” 2016 წელს;
    ერთ-ერთი მსხვილი შემყიდველი კომპანია გახლავთ ა(ა)იპ “ასოციაცია ატუ”, რომლის დირექტორმა და გამგეობის წევრებმა - როსტომ ჩაბრაძემ, ეთერ დემინაშვილმა და ბიჭია დემეტრაშვილმა ჯამურად 168 000 ლარი შესწირეს “ქართულ ოცნებას” და სალომე ზურაბიშვილის კამპანიას. ასოციაცია “ატუ” ბიძინა ივანიშვილთან დაკავშირებული კომპანიაა. ამ კომპანიის გამგეობის წევრი ეთერ დემინაშვილი 2017 წლის სექტემბრამდე ფონდი “ქართუს” გამგეობის წევრი იყო, დღემდე კი სს “ქართუ ჯგუფის” სამეთვალყურეო საბჭოს წევრია. “ატუს” 2013-2021 წლებში მიღებული აქვს 3 613 464 ლარის სახელმწიფო შესყიდვები;
    ტეშენიტის მოპოვების ლიცენზია აქვს შპს “როუდ ქონსტრაქშენს”. ამ კომპანიას 2017-2023 წლებში სახელმწიფო შესყიდვების სახით მიღებული აქვს 38 586 588 ლარი. კომპანიას სამი მფლობელი ჰყავს. მათგან მხოლოდ ერთი - 34% წილის მფლობელი გიორგი გოგიბერიძეა პოლიტიკური პარტიის შემწირველი. მან 2012 წელს 60 000 ლარი შესწირა მაშინდელ მმართველ პოლიტიკურ ძალას - “ერთიან ნაციონალურ მოძრაობას”. მნიშვნელოვანია ის გარემოება, რომ ამავე კომპანიის 33% წილის მფლობელი, ვაჟა ფანჩულიძე 2014-2015 წლებში საავტომობილო გზების დეპარტამენტის თავმჯდომარე იყო;
    მსხვილ სახელმწიფო შესყიდვებში მონაწილეობს შპს “კომპანია ბლექ სი გრუპი”, რომლის ამ გზით მიღებული შემოსავალი არის 446 673 239 ლარი. კომპანიის მეწილე, გიორგი კალანდაძე (25%) ამავდროულად არის პარლამენტარ ბექა ოდიშარიას პარტნიორი შპს-ში “ძველი დედაქალაქი”;
    ქვიშა-ხრეშის მოპოვების ლიცენზია აქვს შპს “კავკასენერგოს”, რომლის 100% წილის მფლობელს, გიორგი მოლაშხიას 100 000 ლარი შეუწირავს მმართველი პოლიტიკური პარტიებისთვის და 28 226 116 ლარის ოდენობის ხელშეკრულებები აქვს მიღებული სახელმწიფო შესყიდვებიდან. გიორგი მოლაშხიას ბიზნეს-პარტნიორი სხვა კომპანიაში (შპს “ტრანს სერვის”) არის პარლამენტის თავმჯდომარის მოადგილე, ავთანდილ ენუქიძე. იგი “პატრიოტთა ალიანსის” სიით გახდა დეპუტატი.
      ავტორი: თაია არდოტელი
  18. tvati
    მაღალი დონის კორუფცია ქვეყანაში მთლიანად მიშვებულია, არანაირი ინსტიტუციური მექანიზმები, რამაც ეს უნდა შეაკავოს, არ მუშაობს, - ამის შესახებ „საერთაშორისო გამჭვირვალობა-საქართველოს“ ანტიკორუფციული გუნდის ხელმძღვანელმა სანდრო ქევხიშვილმა „ინტერპრესნიუსთან“ ინტერვიუში განაცხადა.
    როგორც ორგანიზაციის წარმომადგენელი აცხადებს, ქვეყანაში დაბალი დონის კორუფცია არ არის, თუმცა, „ელიტური კორუფციის“ პრობლემა აქტუალურად დგას.
    „ქვეყანაში დაბალი დონის კორუფცია არ არის, ამ მხრივ, ასე თუ ისე, პრობლემა მოგვარებულია. მექრთამეობა დაბალ დონეზეა, სხვადასხვა სახელმწიფო სერვისის მისაღებად მოქალაქეს ქრთამის გადახდა არ სჭირდება, რაც ადრე იყო. ეს დიდი მიღწევაა, ეს რომ ნარჩუნდება, კარგი ამბავია. მთავრობის განცხადებებს რომ გადახედოთ, ხშირად ამბობენ, რომ ამ და ამ ინდექსში კარგი ქულა გვაქვს, წინ ვართო, რაც მართლაც ასეა, გლობალურ დონეზე ასე ჩანს, იმის გამო, რომ სახელმწიფო სერვისების მიწოდებაში კორუფცია აღმოფხვრილია. თუმცა, ეს ინდექსები არ ზომავს უფრო კომპლექსურ კორუფციას, სხვადასხვა ტერმინებია - მაგალითად „ელიტური კორუფცია“, ჩვენ მაღალი დონის კორუფციას ვეძახით. ასეთი პრობლემის გაზომვა ციფრებით უფრო რთულია, ამიტომ ინდექსებში ნაკლებად ჩანს ხოლმე, ჩვენ საქართველოში ელიტური კორუფციის პრობლემა გვაქვს. კონტრაქტები, ლიცენზიები თუ სხვადასხვა ტიპის გადაწყვეტილებები, როცა მიიღება, კორუფციული რისკი და ფაქტორებია მუდმივად, ამის მაგალითებს სულ ვპოულობთ და მექანიზმი, ეს რომ შეაჩეროს, არ არსებობს.
    მაგალითად, ყოველ ორშაბათს, მთავრობა იკრიბება, რომლის დღის წესრიგიც რომ ნახოთ, 3-4 პუნქტი სულ არის, სადაც წერია, რომ კონკრეტულ კომპანიას პირდაპირი წესით ქონებას აძლევენ და განკარგულებებს არ აქვეყნებენ, სადაც ეწერება საიდენტიფიკაციო კოდი და ის, თუ რა ქონებას აძლევენ. იმას არავინ ამბობს, რომ პრივატიზაცია არ უნდა მოხდეს, მაგრამ ეს უნდა იყოს ღია და საჯარო, მხოლოდ კომპანიის სახელს წერენ, განკარგულებებს კი, უკვე 3 წელია, არ აქვეყნებენ. თუ კომპანიას უნიკალური სახელი აქვს და ბევრ კომპანიას არ ჰქვია ის სახელი, დეტალებს მაინც ვიგებთ. ხშირ შემთხვევაში ასეთი კომპანიები მმართველი პარტიის შემომწირველები არიან, ან მისი დირექტორი, მეწილეები დაკავშირებული არიან სხვადასხვა გზით ამ გადაწყვეტილების მიმღებ პირებთან. ეს არის ელიტური კორუფცია, როცა სხვადასხვა ტიპის კავშირი განსაზღვრავს, ვისთან მიდის ფული, სახელმწიფო ქონება და არა ის, რა არის ეკონომიკისთვის, ქვეყნისთვის კარგი, ეს გვერდზე გადადის და პირადი კავშირები გადმოდის პირველ პლანზე, კორუფციის განმარტებაც სწორედ ეს არის. ეს პრობლემა ქვეყანაში გვაქვს”, - აცხადებს ქევხიშვილი.
    მისივე განმარტებით, მსგავსი ფაქტების აღმოჩენას შესაბამისი რეაგირება არ მოჰყვება.
    „რამდენიმე წლის წინ, „მაღალი დონის სავარაუდო კორუფციის შემთხვევებზე“ დავიწყეთ ერთგვარი სიის, კატალოგის მსგავსის გაკეთება. დღეის მდგომარეობით 151 შემთხვევა გვაქვს გამოძიებული, რომელშიც მაღალი რანგის 162 თანამდებობის პირი ფიგურირებს, მათ შორის, 13 მოსამართლე, პარლამენტის 28 წევრი, მთავრობის 28 წევრი, ან მისი მოადგილე და მუნიციპალური დონის 54 თანამდებობის პირი. აქედან ნახევარი, დღესაც მოქმედია, ნაწილი წინა წლებში იყო. ამ შემთხვევებზე მუდმივად ვაგზავნით პროკურატურაში, სუს-ში, აუდიტის სამსახურში წერილებს. როგორც წესი, მათგან არაფერი ხდება, ძალიან იშვიათ შემთხვევაში შეიძლება იყოს რეაგირება. პროკურატურა არც კი გვეუბნება, გამოძიება დაიწყო თუ არა. ვთქვათ, რომელიმე ჟურნალისტურ გამოძიებას არ ვენდობით, უამრავი წყაროა, 151 სკანდალური შემთხვევაა, ვთქვათ, 20 მაინც რეალურია, გამოძიება არ უნდა დაწყებულიყო? ეს საფუძველს გვაძლევს დავასკვნათ, რომ მაღალი დონის კორუფცია ქვეყანაში მთლიანად მიშვებულია, არანაირი ინსტიტუციური მექანიზმები, ფორმალური, რამაც ეს უნდა შეაკავოს, არ მუშაობს, ან რეალურად, ისინი პოლიტიკურად დამორჩილებული არიან და ვერ, არ ასრულებენ მათ ფუნქციას, პროკურატურა თავის საქმეს არ, ვერ აკეთებს, რადგან ის პოლიტიკურ მიზნებს ემსახურება”, - აცხადებს ქევხიშვილი.
    ინტერვიუს სრული ვერსია იხილეთ ბმულზე.

    იპნ
  19. tvati
    დეოლიგარქიზაციის სამოქმედო გეგმით, პოლიტიკური პარტიების დაფინანსების კუთხით ცვლილებები იგეგმება.
    კერძოდ, დოკუმენტში სამომავლოდ განსახორციელებელ ნაბიჯებს შორის დასახელებულია: იურიდიული პირების საარჩევნო შემოწირულების აკრძალვა, თითოეული მხარისთვის ხარჯების ზედა ზღვარის კიდევ უფრო შემცირება, პოლიტიკური პარტიების ხარჯების ანგარიშების გამოქვეყნება.
    „ეს ღონისძიებები უზრუნველყოფს გადაჭარბებულ ინტერესებზე დამოკიდებულების და მისი უარყოფით ზეგავლენის შემდგომ შემცირებას, გააძლიერებს კონკურენციას, შექმნის უფრო თანაბარ პირობებს გაფართოებული მონაწილეობისათვის და გაზრდის გამჭვირვალობას“, - აღნიშნულია დოკუმენტში.

    იპნ
  20. tvati
    პრეზიდენტი სალომე ზურაბიშვილი მოქალაქეობის შესახებ კანონში შესულ ცვლილებებს აკრიტიკებს და აცხადებს, რომ ახალი კანონი რეალურად მოქალაქეობის მიღებას არ ამარტივებს.
    ამის შესახებ სალომე ზურაბიშვილმა დღეს, 21 ნოემბერს, ორბელიანების სასახლეში სამოქალაქო პლატფორმის „შინ მომავლისთვის“ პროექტების პრეზენტაციაზე სიტყვით გამოსვლისას განაცხადა.
    „ამ დღეებში მიღებულ იქნა პარლამენტში ახალი ცვლილებები მოქალაქეობის ორგანულ კანონში, რომელიც რეალურად, არცერთ ცვლილებას და გამარტივებას არ წარმოადგენს. მე ამას წინსწრებით ვამბობ იმიტომ, რომ ალბათ, ამაზე დიდი პროპაგანდა იქნება, რომ ჩვენ მოვახდინეთ ამ ცვლილებებით პროცედურების დიდი გამარტივება, არც არაფერი [გამარტივებულა]. ჩვენი თანამემამულეების მთავარი მოთხოვნები, რომ გამარტივდეს ტესტირება, მით უმეტეს, ახალგაზრდებისთვის, ვინც საზღვარგარეთ არიან დაბადებული, თუნდაც ენის ტესტირება იყოს გამარტივებული, რომ ეს ყველაფერი ძალიან სწრაფად და მარტივად მოხდეს, საფასურიც იყოს განულებული იმიტომ, რომ ჩვენ ამ ადამიანებს მოქალაქეობას ვუბრუნებთ – ეს ყველაფერი მხედველობაში არ მიიღეს მხედველობაში. მხოლოდ ერთი სერიოზული რამ შეიცვალა, ეს არის ის, რომ ტესტირება რამდენჯერაც გინდათ, შეგიძლიათ ჩააბაროთ და ნებისმიერ დროს გადაიხადოთ საფასური. ეს არის მთავარი ცვლილება“, – განაცხადა სალომე ზურაბიშვილმა.
    სალომე ზურაბიშვილის თქმით, საქართველოს ოკუპირებულ ტერიტორიებზე დაბადებულ ადამიანებს საქართველოს მოქალაქეობა ავტომატურად უნდა მიენიჭოს.
    „ასევე, მეორე კუთხით, რომელიც შეიძლება კიდევ უფრო მნიშვნელოვანი იყოს ქვეყნისთვის დღევანდელ დღეს, ის გეოპოლიტიკური გარემოება, რის გამოც ადამიანები, რომლებიც ჩვენს ოკუპირებულ ტერიტირიებზე ან საზღვრებს გარეთ ცხოვრობენ სხვა ქვეყანაში, მათი მოლოდინი და მოთხოვნა საქართველოს მოქალაქეობის მიღების მიმართ არის ძალიან გაზრდილი. ჩვენ თუ რამე ოდნავ სტრატეგია და ხედვა გაგვაჩნია იმის, თუ როგორი უნდა იყოს ჩვენი ხვალინდელი ურთიერთობა ოკუპირებულ ტერიტორიებთან, ჩვენ უნდა გამოგვეცხადებინა, რომ ავტომატურად ვუბრუნებთ მოქალაქეობას ყველა იმ ადამიანს, რომელიც დაბადებული არის საქართველოს ტერიტორიაზე, ყველაფრის მიუხედავად და არანაირი პროცედურების გათვალისწინებით. ეს იყო მოთხოვნა, რომელიც, მე მგონი, სახელმწიფოს უნდა დაეკმაყოფილებინა.
    მე ამ ცვლილებებზე ვეტოც არ დავადე, რადგან ეს არ არის სავეტოო ცვლილებები. მთავარია ის, რომ ჩვენ უნდა ვიზრუნოთ იმაზე, რომ ეს ნამდვილი ცვლილებები, არსებითი ცვლილებები მიყვანილი იყოს ბოლომდე“, – განაცხადა სალომე ზურაბიშვილმა.
    სალომე ზურაბიშვილი პოლიტიკურ პარტიებს მოუწოდებს, რომ პარლამენტში შესაბამისი საკანონმდებლო ინიციატივა შეიტანონ, რომელიც საქართველოს მოქალაქეობის მიღების კუთხით პროცედურებს გაამარტივებს.
    პარლამენტმა პირველ ნოემბერს მიიღო „საქართველოს მოქალაქეობის შესახებ“ კანონში ცვლილება, რომელიც მთავრობის განცხადებით, მიზნად ისახავს მოქალაქეობის პროცედურის დახვეწასა და გამარტივებას.
    ცვლილების თანახმად, საქართველოში სტატუსის მქონე მოქალაქეობის არმქონე პირებს, რომლებიც ქვეყნის ტერიტორიაზე ცხოვრობენ 5 და მეტი წლის განმავლობაში, მიეცემათ შესაძლებლობა, საამისოდ დადგენილი სხვა პირობების დაკმაყოფილების შემთხვევაში, მოიპოვონ საქართველოს მოქალაქეობა.
    დაინტერესებულ პირთა მიერ საქართველოს სახელმწიფო ენის, საქართველოს ისტორიისა და სამართლის ძირითადი საფუძვლების ცოდნის დონის შემოწმებას უზრუნველყოფს სააგენტო.  ახალი კანონით, წარუმატებლობის შემთხვევაში, მოქალაქეობის მსურველ პირს უფლება ექნება, შეუზღუდავად სცადოს წარმატების მიღწევა და დადებითი შედეგის დადგომისას სახელმწიფო დაიწყებს შესაბამის პროცედურას.
    თუ სახელმწიფო დღეს აპლიკანტს ეტყვის უარს მოქალაქეობის მინიჭებაზე, მას ერთი წლის განმავლობაში აღარ შეუძლია ხელმეორედ მიმართვა. ცვლილებების შედეგად აღნიშნული ვადა მცირდება 6 თვემდე.



    ნეტგაზეთი
  21. tvati
    2024 წლიდან, თბილისში, სასკოლო ტრანსპორტს ავტობუსის ზოლში მოძრაობის უფლება ექნება. დედაქალაქის მერმა კახა კალაძემ ამის საჭიროება საცობებით ახსნა.
    „ვინაიდან ამ ქალაქში, კერძო ავტომობილების სიჭარბის გამო საცობების პრობლემა ჯერ კიდევ დაუძლეველია და ვითვალისწინებთ რა, პიკის საათებში სკოლის მოსწავლეების სწრაფი და უსაფრთხო გადაადგილების საჭიროებას, გადავწყვიტეთ, M2 და M3 კატეგორიის სასკოლო ტრანსპორტსაც მივცეთ საავტობუსე ზოლში გარკვეული პირობებით გადაადგილების უფლება“, — განაცხადა კალაძემ მერიაში გამართულ ბრიფინგზე.
    რაც შეეხება პირობებს:
    ავტობუსის ზოლში გადაადგილების უფლება ექნება ტექნიკურად გამართულ სასკოლო ტრანსპორტს, რომელსაც გავლილი აქვს სპეციალური ტექდათვალიერება; ტრანსპორტს უნდა ჰქონდეს ვიზუალური ნიშანი, რომ გადაჰყავს სკოლის მოსწავლეები. ეს ნიშანი წინასწარ უნდა იყოს შეთანხმებული მერიასთან; მოძრაობა შესაძლებელი იქნება მხოლოდ წინასწარ შეთანხმებულ მარშრუტზე, სამუშაო საათების კონკრეტულ მონაკვეთში – დილის 6-დან 9-მდე და დღის 2-დან 6-მდე; არასამუშაო დღეებში, ოფიციალურ უქმე დღეებზე და სამუშაო დღის სხვა მონაკვეთში ავტობუსის ზოლით სარგებლობის შემთხვევაში, სასკოლო ტრანსპორტი დაჯარიმდება; სასკოლო ტრანსპორტს შეეძლება გააჩეროს ავტობუსის გაჩერებაზე, მაქსიმუმ 1 წუთით ისე, როგორც ეს საზოგადოებრივ ტრანსპორტს აქვს განსაზღვრული; როგორ უნდა მიიღოს სკოლის ტრანსპორტმა ავტობუსის ზოლში მოძრაობის უფლება?
    კახა კალაძის განმარტებით, ამ უფლების მისაღებად სკოლამ მუნიციპალიტეტის ტრანსპორტისა და ურბანული განვითარების სააგენტოს უნდა წარუდგინოს კონკრეტული დოკუმენტაცია: ავტობუსების რაოდენობა შესაბამისის ახელმწიფო ნომრის და მარშრუტის მითითებით, ასევე, კონკრეტული სკოლის ავტობუსების ვიზუალური მხარის ამსახველი მასალა.
    ცვლილება ეხება როგორც საჯარო, ისე კერძო სკოლებს. კალაძის ინფორმაციით, თბილისში ამ ეტაპზე მოძრაობს სკოლების მიერ მოსწავლეებისთვის დაქირვებული 19 ავტობუსი, 164 მიკროავტობუსი და 82 მინივენი.
    რეგულაცია სატესტო რეჟიმში იმუშავებს 2024 წლის 1-ლი იანვრიდან, 2024 წლის 1-ელ ივლისამდე.

    netgazeti
  22. tvati
    ხვალ, 22 ნოემბერს, ევროპარლამენტში კენჭს უყრიან  რეზოლუციას რუსი ოკუპანტების მიერ თამაზ გინტურის მკვლელობასთან დაკავშირებით.
    თამაზ გინტურის მკვლელობასთან დაკავშირებით ევროპარლამენტში დებატები  და რეზოლუციის მიღება ევროპარლამენტარმა ანა ფოტიგამ მოითხოვა.
    „საქართველოს მოქალაქის თამაზ გინტურის მკვლელობა რუსეთის საოკუპაციო ძალების მიერ საქართველოში“ – ასე ჰქვია რეზოლუციის პროექტს, რომელიც უკვე ასახულია ევროპარლამენის პლენარული სხდომის დღის წესრიგში.
    ევროპარლამენტარი მირიამ ლექსმანი აცხადებს, რომ ევროპის სახალხო პარტიის ჯგუფის სახელით დღეს მოლაპარაკებებს გამართავს თამაზ გინტურის მკვლელობასთან დაკავშირებით რეზოლუციაზე.
    „ეს სასტიკი მკვლელობა რუსეთის მიერ საქართველოს ტერიტორიის ოკუპაციის პირდაპირი შედეგია. ევროკავშირი მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას“, – წერს მირიამ ლექსმანი პლატფორმა X-ზე (ყოფილი ტვიტერი).
    6 ნოემბერს რუსეთის საოკუპაციო ძალებმა გორის მუნიციპალიტეტის სოფელ კირბალში მცხოვრები თამაზ გუნტური მოკლეს, მისი თანხმხლები ლევან დოთიაშვილი კი გაიტაცეს. შემთხვევა ლომისის ეკლესიასთან მოხდა. გინტური და დოთიაშვილი თანასოფლელებთან ერთად ჯერ სოფლის სასაფლაოზე იყვნენ, შემდეგ კი ლომისის ეკლესიაში, სანთლის დასანთებად მივიდნენ. მათ ოკუპანტების მიერ აჭედილი ლომისის ეკლესიის კარი შეამტვრიეს. ამის შემდეგ, მათ რუსი სამხედროები დაესხნენ თავს, გინტური მოკლეს, დოთიაშვილი კი გაიტაცეს.
    ლევან დოთიაშვილი 9 ნოემბერს გაათავისუფლეს

    netgazeti
  23. tvati
    ჯანდაცვის სამინისტროს ინფორმაციით, საყოველთაო ჯანდაცვის პროგრამის ფარგლებში, მშობიარობა და საკეისრო კვეთა სრულად დაფინანსდება. უწყების ცნობით, დაფინანსება მოიცავს არჩევით ექიმის აყვანის, გაუტკივარების საფასურს, მედიკამენტების, კვების, პალატის, სხვა ხარჯებს.
    სახელმწიფო არ დააფინანსებს იმ შემთხვევებს, თუ პაციენტი საკეისრო კვეთის გაკეთებას სამედიცინო ჩვენების გარეშე მოინდომებს. ასევე, არ დაფინანსდება ე.წ. VIP პალატის მომსახურება.
    ცვლილება DRG (DIAGNOSIS RELATED GROUP) დაფინანსების მოდელის ამოქმედების შედეგია. DRG მოდელი გულისხმობს დიაგნოზთან შეჭიდულ მომსახურების დაფინანსებას, რომლის საშუალებითაც „ავტომატურად გამოითვლება ის სამართლიანი ფასი, რასაც სამინისტრო მოქალაქეების ხარისხიანი მკურნალობისთვის გადაიხდის“.
    უფრო კონკრეტულად, სტაციონარული შემთხვევები, დიაგნოზის შესაბამისად, დაჯგუფდება გარკვეულ კატეგორიებად და თოთოეული კატეგორიისთვის გამოითვლება “სამართლიანი ფასი”. სამინისტროს ცნობით, ამ მოდელით, სამედიცინო მომსახურების მიღებისას, პაციენტს დამატებითი ხარჯების გაწევა აღარ მოუწევს და მხოლოდ იმ თანხას გადაიხდის, რასაც საყოველთაო ჯანდაცვის პროგრამის ფარგლებში თანაგადახდის წილი ითვალისწინებს.
    “DRG მოდელით მშობიარობისა და საკეისრო კვეთის მომსახურების ტარიფები, საყოველთაო ჯანდაცვის პროგრამაში ჩართულ ყველა სამედიცინო დაწესებულებაში, 1 222 ლარით განსაზღვრა”, – აცხადებენ უწყებაში.
    აღსანიშნავია, რომ DRG მოდელით მშობიარობისა და საკეისრო კვეთის ხარჯები გათანაბრდა – აქამდე, საკეისრო კვეთის გაკეთება უფრო ძვირი ღირდა. ჯანდაცვის სამინისტროს განმარტებით, ამის მიზეზი საკეისრო კვეთის მაღალი მაჩვენებელია. უწყებაში ფიქრობენ, რომ ფასის გათანაბრებით, შემცირდება სამედიცინო პერსონალის მოტივაცია, გააკეთონ საკეისრო.

    ნეტგაზეთი
  24. tvati
    მოლდოვის პრეზიდენტი, მაია სანდუ კიევში ჩავიდა. ამის შესახებ ინფორმაციას უკრაინის პრეზიდენტის ადმინისტრაციის პრესსამსახური ავრცელებს.
    „დღის წესრიგს მოლდოვასა და უკრაინის ევროკავშირში გაწევრიანების შემდგომი ნაბიჯები, რეგიონული უსაფრთხოების გაძლიერება, ასევე ევროკავშირის მიერ ჩვენს ქვეყნებში რეფორმებისა და განვითარების მხარდაჭერის განხილვა წარმოადგენს“, - წერს მაია სანდუ „ტვიტერის“ გვერდზე.
    მოლდოვის პრეზიდენტმა აღნიშნა, რომ კიევში პრეზიდენტ ზელენსკისთან და ევროპული საბჭოს პრეზიდენტთან, შარლ მიშელთან შეხვედრებზე დასასწრებად ჩავიდა. შარლ მიშელის კიევში ვიზიტი ოფიციალურად ჯერ არ დადასტურებულა.
    მაია სანდუმ, უკრაინის პრეზიდენტთან, ვოლოდიმირ ზელენსკისთან და უკრაინის პირველ ლედისთან, ოლენა ზელენსკასთან ერთად 10 წლის წინ, ღირსების რევოლუციის დროს დაღუპული აქტივისტების ხსოვნას პატივი მიაგო.

    იპნ
  25. tvati
    თბილისში, გორგასლისა და კალანდაძის ქუჩების კვეთაზე ტრაილერის დაჯახების შედეგად ქვეითი გარდაიცვალა.
    არსებული ინფორმაციით, გარდაცვლილი ახალგაზრდა მამაკაცია.
    მომხდარის დეტალებს „ინტერპრესნიუსი“ შინაგან საქმეთა სამინისტროში არკვევს.

    იპნ
×
×
  • შექმენი...