tvati

"ივანიშვილი, პირადი კეთილდღეობისთვის კიდევ ერთხელ ეუბნება საქართველოს ევროპულ მომავალს უარს და შესაბამისად, მეორედ ერთი და იგივე შეცდომას უშვებს, როდესაც ხელმეორედ აინიცირებს "რუსულ კანონს". დღეს, ივანიშვილის არასწორი პოლიტიკის გამოა, რომ ჩინჩალაძე-მურუსიძეს შეუძლიათ დააშანტაჟონ ის." ზაზა თავაძე, პარტია "საქართველოსთვის" თბილისის საკრებულოს წევრი. ვიდეო: https://www.facebook.com/ForGeoGe/videos/3686024935012585/

"სამარცხვინოა, რაც დღეს ვნახეთ საქართველოს პარლამენტის სხდომათა დარბაზში. რა ფასეულობებზე, ღირებულებებზე ან საერთოდ რაზე უნდა ისაუბრო იმ ადამიანებთან, რომლებიც ქალების მიმართ ასეთ შეურაცხმყოფელ, დამამცირებელ ლანძღვას და გინებას ავლენენ… მერე ასეთი ხალხი, ოჯახურ ფასეულობებზე, მორალზე და ქართულ ტრადიციებზე დაიწყებს საუბარს." საპარლამენტო პოლიტიკური ჯგუფი “საქართველოსთვის” თავმჯდომარე.

"ამ საკითხებს სჭირდება მხოლოდ პოლიტიკური ნება, რომელიც სამწუხაროდ არ არსებობს. აი ეს არის რეალური პრობლემა, რატომაც არ ხდება სინათლის გარეშე დარჩენილი სოფლების განათების პროექტების განხორციელება." პარტია "საქართველოსთვის" წევრი, დეპუტატი. ვიდეო: https://www.facebook.com/ForGeoGe/videos/938528994409965/

„ეს ის ბიჭია, რომელიც გერმანულ ორგანიზაცია GIZ-ს წლების განმავლობაში ჰყავდა დასაქმებული საქართველოში კანონის უზენაესობასთან დაკავშირებულ პროექტებზე. როგორ შეიძლება დასავლელი დონორები ასე შედიოდნენ შეცდომაში ისეთი ადამიანების დაქირავებით, რომლებიც ყველაფერს აკეთებენ კანონის უზენაესობის პატივისცემის გარდა, არღვევენ პარლამენტში დეპუტატების უფლებებს და იცავენ რუსეთის ინტერესებს? სირცხვილია!“,- ამის შესახებ გერმანელი ევროპარლამენტარი, ვიოლა ფონ კრამონი სოციალურ ქსელ X-ზე წერს, რითიც ეხმაურება „ქართული ოცნების“ გადაწყვეტილებას, უკან დააბრუნოს ე.წ. „უცხოეთის აგენტების“ შესახებ რუსული კანონი და ის საგაზაფხულო სესიის ბოლომდე სამივე მოსმენით მიიღოს. ანალოგიური კანონპროექტი „ქართულმა ოცნებამ“ შარშანაც დაინიციირა, თუმცა მარტში მასობრივი საპროტესტო გამოსვლების შემდეგ უკან გაიწვია. „ქართული ოცნების“ ლიდერები მთელი წლის განმავლობაში ამტკიცებდნენ, რომ ამ კანონპროექტს არცერთი ფორმით აღარ დააბრუნებდნენ. პუბლიკა

პასუხი ამ უზრდელობაზე, ამ უხეშობაზე და ამ ძალიან დიდ შეურაცხყოფაზე საქართველოს მიმართ, რასაც ჰქვია რუსული კანონი და რუსული მიმართულება, არის მხოლოდ და მხოლოდ ერთი - ეს არის არჩევნებით ჩვენი ევროპული სათქმელის თქმა, -ამის შესახებ პრეზიდენტმა, სალომე ზურაბიშვილმა დღევანდელ ბრიფინგზე განაცხადა. როგორც მან აღნიშნა, საჭიროა 2024 წლის არჩევნებზე გაერთიანება საერთო მიზნისკენ, რასაც ევროპული დროშის ქვეშ გაერთიანება ჰქვია. „არჩევნები მოდის ცოტა ხანში, ხელისუფლებამ ყველაზე კარგად იცის, თუ რა არის რეალური ციფრები, ძალიან კარგად იცის, რომ არც კონსტიტუციური უმრავლესობა, არც მიშას დაბრუნება, ეს ყველაფერი უკვე მითები არის, რითაც უნდათ, რომ შეაშინონ საზოგადოება. რეალობა არის, რომ არსებობს ქვეყანაში დიდი უმრავლესობა, რომელმაც იცის, რა უნდა, უნდა ამ ქვეყნისთვის დამოუკიდებელი და ევროპული მომავალი. ჩვენ უნდა გავიდეთ არჩევნებზე, ამისთვის უდიდესი მობილიზაცია არის საჭირო. არც უიმედობა, არც დეპრესია, არც პესიმიზმი, არც დიდად არეულობა, აქ საჭიროა მომზადება იმისთვის, რომ ყველანი გავიდეთ ამ არჩევნებზე ერთი ევროპული დროშის ქვეშ. ალბათ, რამდენიმე პარტიით, მაგრამ ერთი დროშის ქვეშ და ეს არის ევროპული დროშა. ევროპული სამოქმედო გეგმა, რომელზეც ვმუშაობთ და გავერთიანდებით. რაც არ ნიშნავს პარტიების მაინც და მაინც გაერთიანებას, მაგრამ ნიშნავს მათ გამსხვილებას და რაც მთავარია, ეს ნიშნავს საზოგადოების გაერთიანებას, ეროვნულ თანხმობა ევროპაზე. ამ დროშას ბოლომდე დავიჭერ და ვიქნები თქვენთან ერთად ბოლომდე, რომ ჩვენ გავიმარჯვოთ, ევროპამ და ევროპულმა საქართველომ გაიმარჯვოს მომავალ არჩევნებზე. ვერაფერი უზამს ამ გეგმებს თუ ხრიკებს, რასაც დღეს „ოცნება“ ატრიალებს“, - განაცხადა სალომე ზურაბიშვილმა. იპნ

„ოცნებამ“ ევროპას უთხრა, არა - „ოცნება“ არის დაკავებული ჩვენი ევროპული გზის და ჩვენი მომავლის საბოტაჟით, - ამის შესახებ საქართველოს პრეზიდენტმა, სალომე ზურაბიშვილმა ბრიფინგზე განაცხადა, რითაც „უცხოური გავლენის გამჭვირვალობის შესახებ“ კანონპროექტის პარლამენტში კვლავ დაინიცირებას გამოეხმაურება. მისივე თქმით, „ქართულმა ოცნებამ“ თავისი განაცხადი ძალიან მკაფიოდ გააკეთა. „[ქართულმა ოცნებამ“] ევროპას უთხრა არა, ყველა მიმართულებით, რაც წინა რეკომენდაციებში ეწერა, რაც დღევანდელ 9 რეკომენდაციაში წერია, ყველა შესაძლო საკითხზე, რაც განაპირობებს ჩვენს ხვალინდელ დღეს და გაწევრიანების მოლაპარაკებების გახსნას. ყველა ამ მიმართულებით უთხრა მკაფიო უარი. ევროპიდან მივიღეთ ერთგვარი ავანსი და დღეს „ოცნება“ არის დაკავებული ჩვენი გზის და ჩვენი მომავლის საბოტაჟით. საბოტაჟი არის ერთადერთ სიტყვა, რაც მომაფიქრდა.“არა” - იუსტიციის რეფორმას. „მე არ შევალ ვეტინგით“ თუ სხვა ფორმით, მაგრამ მთავარი ის არის, რომ „მურუსიძეს და ჩინჩალაძეს არ გავწირავთ საქართველოს ევროპული მომავლის ნაცვლადაც კიო“. „არა“ - სანქციებთან შეერთებას, ან ევროკავშირის საგარეო პოლიტიკასთან დაახლოებას, რაზედაც გვეუბნებიან, რომ ეს აუცილებელია თუ გინდათ რომ ჩვენთან შემოხვიდეთ თანამეგობრობაში...“, - განაცხადა ზურაბიშვილმა. იპნ

“უცხოური გავლენის გამჭვირვალობის შესახებ“ კანონის პროექტი პარლამენტში ოფიციალურად ინიცირებულია. “უცხოური გავლენის გამჭვირვალობის შესახებ“ კანონის პროექტი “გამჭვირვალობის უზრუნველყოფის მიზნით“, უცხოური ძალის ინტერესების გამტარებელ ორგანიზაციად ისეთი არასამეწარმეო (არაკომერციული) იურიდიული პირებისა და მედიასაშუალებების რეგისტრაციას ითვალისწინებს, რომელთა შემოსავლის გარკვეული მოცულობა - კერძოდ კი, 20%-ზე მეტი - უცხოეთიდან არის მიღებული. კანონპროექტი თავისი შინაარსით გასულ წელს ინიცირებული და შემდგომში “ჩაგდებული“ პროექტის ანალოგიურია. პროექტის მიხედვით, ყველა, ვინც “უცხოური ძალის ინტერესების გამტარებელ ორგანიზაციად“ მოიაზრება, საჯარო რეესტრში სავალდებულო წესით ამავე სახელწოდების ბაზაში უნდა დარეგისტრირდეს. რეგისტრაციის დროს აუცილებელი იქნება მიღებული შემოსავლების ასახვა. ამავდროულად, ორგანიზაციებს საფინანსო დეკლარაციის ყოველწლიურად შევსების ვალდებულება ექნებათ. კანონპროექტი “უცხოური ძალის ინტერესების გამტარებელ ორგანიზაციის გამოსავლენად“ იუსტიციის სამინისტროს უფლებამოსილებას ანიჭებს ნებისმიერ დროს კვლევა ჩაატაროს და საკითხის შესწავლა-მონიტორინგი განახორციელოს. ამავე პროექტით, მონიტორინგის დაწყების საფუძველი იქნება იუსტიციის სამინისტროს შესაბამისი უფლებამოსილი პირის გადაწყვეტილება და იუსტიციის სამინისტროსთვის წარდგენილი წერილობითი განცხადება, რომელიც “უცხოური ძალის ინტერესების გამტარებელ კონკრეტულ ორგანიზაციასთან დაკავშირებულ სათანადო მინიშნებას შეიცავს“. “უცხოური ძალის ინტერესების გამტარებელ ორგანიზაციად რეგისტრაციისთვის თავის არიდება ან დეკლარაციის არშევსება გამოიწვევს ორგანიზაციის დაჯარიმებას 25 ათასი ლარის ოდენობით. პროექტით ასევე გათვალისწინებულია შემდეგი სახის ჯარიმები: - იუსტიციის სამინისტროს ვებ-გვერდზე დაშვებიდან 10 სამუშაო დღის ვადაში, თუ ორგანიზაცია არ შეავსებს განაცხადის ფორმას - 10 ათასი ლარი; დოკუმენტებში ხარვეზების განსაზღვრულ ვადაში არგამოსწორების შემთხვევაში - 10 ათასი ლარი; კანონით გათვალისწინებული სამართალდარღვევის ერთი თვის შემდეგ ჩადენა - 20 ათასი ლარი. ipn

როგორც ჩანს, საქართველოს მმართველი პარტია ევრაზიული ტირანიისკენ ტრიალდება , - ასე ეხმაურება ევროპარლამენტარი პეტრას აუსტრევიჩუსი “ქართული ოცნების” მიერ “უცხოური გავლენის გამჭვირვალობის შესახებ“ კანონპროექტის ხელახლა დაინიცირებას. “როგორც ჩანს, საქართველოს მმართველი პარტია ევრაზიული ტირანიისკენ ტრიალდება. ევროკავშირსა და ამ უკანასკნელს შორის კომპრომისი არ არსებობს, ვინაიდან, დემოკრატიული კრიტერიუმები მოლაპარაკებების საგანი არ შეიძლება იყოს”, - წერს აუსტრევიჩუსი. ცნობისთვის, საპარლამენტო უმრავლესობამ „უცხოური გავლენის გამჭვირვალობის შესახებ“ კანონპროექტს პარლამენტში კვლავ დააინიცირა. საპარლამენტო უმრავლესობის ლიდერმა მამუკა მდინარაძემ პარტიის ოფისში გამართულ ბრიფინგზე განაცხადა, რომ "საპარლამენტო უმრავლესობამ, პარტიის პოლიტიკურ საბჭოსთან კონსულტაციის შემდეგ, მიიღო გადაწყვეტილება, პარლამენტში ხელახლა წარადგინოს კანონპროექტი „უცხოური გავლენის გამჭვირვალობის შესახებ“. იპნ

ეს არის ახალი პოლიტიკური ინსტრუმენტის შექმნა „ქართული ოცნების“ ხელში, რომელიც იმდენად შეშინებულია მოახლოებული არჩევნებით, თავის შიშებზე ყოველდღიურად ჭრის და კერავს, ახალ-ახალ გავლენის ბერკეტებს ქმნის საკუთარ პოლიტიკურ არსენალში, - ამის შესახებ პარტია “საქართველოსთვის” წევრმა, ბექა ლილუაშვილმა, ჟურნალისტებთან განაცხადა. ლილუაშვილის თქმით, როდესაც პირველად მოხვდა "რუსული" კანონის დაინიცირება, მათ მიერ ინიცირებული ალტერნატიული კანონპროექტი რუსეთის, ოკუპანტი სახელმწიფოს გავლენის გამოაშკარავების და შეზღუდვის შესახებ, “ქართულმა ოცნებამ” უგულებელყო. "ჩვენ გვყავს ოკუპანტი სახელმწიფო, რომელიც პირდაპირ ჰიბრიდული მეთოდებით იბრძვის, პროპაგანდას აღვივებს ქვეყანაში. როდესაც პირველად მოხდა "რუსული" კანონის ინიცირება, ჩვენს მიერ ინიცირებული ალტერნატიული კანონპროექტი რუსეთის, ოკუპანტი სახელმწიფოს გავლენის გამოაშკარავების და შეზღუდვის შესახებ მათ უგულებელყვეს. რატომ? - იმიტომ, რომ მათ კანონპროექტს არაფერი საერთო არ აქვს რეალურად, მტრულად განწყობილი სახელმწიფოების, პირველ რიგში რუსეთის, გავლენების შეზღუდვასთან. მას აქვს სხვა დანიშნულება და ეს არის ახალი პოლიტიკური ინსტრუმენტის შექმნა “ოცნების” ხელში, რომელიც იმდენად შეშინებულია მოახლოებული არჩევნებით, თავის შიშებზე ყოველდღიურად ჭრის და კერავს, ახალ-ახალ გავლენის ბერკეტებს ქმნის საკუთარ პოლიტიკურ არსენალში, მაგრამ ავიწყდებათ, რომ საზოგადოებამ პირველ ჯერზე ეს არ გაუტარა და ახლა მით უმეტეს ჩვენი ქვეყნის საზოგადოების პირველი მობილიზება იქნება მოახლოებულ არჩევნებზე, სადაც “ქართულ ოცნებას” შესაბამის პასუხს გასცემენ”, - აღნიშნა ბექა ლილუაშვილმა. ცნობისთვის, საპარლამენტო უმრავლესობა „უცხოური გავლენის გამჭვირვალობის შესახებ“ კანონპროექტს პარლამენტში კვლავ დააინიცირებს. ამის შესახებ საპარლამენტო უმრავლესობის ლიდერმა მამუკა მდინარაძემ პარტიის ოფისში გამართულ ბრიფინგზე განაცხადა. ipn

„ქართული ოცნება“ იმდენად შეშინებულია მოახლოებული არჩევნებით, ახალ-ახალ კანონპროექტებს, გავლენის ბერკეტებს ქმნის, – ამის შესახებ პარტია „საქართველოსთვის“ წევრმა, ბექა ლილუაშვილმა განაცხადა. ლილუაშვილს უცხოური დაფინანსების გამჭვირვალობასთან დაკავშირებით „ქართული ოცნების“ საკანონმდებლო ინიციატივაზე დაუსვეს კითხვა. „საქართველოს მდგომარეობის შედარება იმ ქვეყნებთან წარმოუდგენელია. ჩვენ გვყავს ოკუპანტი სახელმწიფო, რომელიც პირდაპირ ჰიბრიდული მეთოდებით იბრძვის, პროპაგანდას აღვივებს ქვეყანაში. პირველად როცა მოხდა „რუსული კანონის“ ინიცირება, უგულებელყვეს ჩვენ მიერ ინიცირებული ალტერნატიული კანონპროექტი რუსეთის, ოკუპანტი სახელმწიფოს გავლენის გამოაშკარავებისა და შეზღუდვის შესახებ. რატომ? ვინაიდან მათ კანონპროექტს, რეალურად, არაფერი აქვს საერთო მტრულად განწყობილი სახელმწიფოების, პირველ რიგში, რუსეთის გავლენების შეზღუდვასთან. მას აქვს სხვა დანიშნულება და ეს არის ახალი პოლიტიკური ინსტრუმენტის შექმნა „ოცნების“ ხელში, რომელიც იმდენად შეშინებულია მოახლოებული არჩევნებით, თავის შიშებზე ყოველდღიურად ჭრის და კერავს, ახალ-ახალ კანონპროექტებს, გავლენის ბერკეტებს ქმნის საკუთარ პოლიტიკურ არსენალში. მათ ავიწყდებათ, რომ საზოგადოებამ პირველ ჯერზე ეს არ „გაუტარა“ და ახლა მით უმეტეს. ჩვენი ქვეყნის საზოგადოების პირველი მობილიზება იქნება მოახლოებულ არჩევნებზე, სადაც „ქართულ ოცნებას“ შესაბამის პასუხს გასცემენ“, – განაცხადა ბექა ლილუაშვილმა. ლილუაშვილის თქმით, აღნიშნულ კანონპროექტს არანაირი კავშირი არ აქვს დაფინანსების გამჭვირვალობასთან. „ძალიან კარგად ვხედავ, რომ დაფინანსება არის გამჭვირვალე. ხელისუფლებას რამემ შეუქმნა დაბრკოლებები, გამოეტანათ ის შემთხვევები, რომლებიც სიმართლეს შეესაბამებოდა ან – არა? რამე დაბრკოლება იყო, რომ გამოეტანათ კონკრეტული საკითხები, რომლებზეც, საფუძვლიანად თუ უსაფუძვლოდ, მათ სურდათ ყურადღების გამახვილება? არ დაუბრკოლებიათ. ყველაფერი ნათელია, ამას არანაირი კავშირი არ აქვს გამჭვირვალობასთან. ამ თვალსაზრისით, ხელისუფლების მიზანი, მისია არის ძალაუფლების გახანგრძლივება და არა ქვეყნის განვითარება, გაჯანსაღება. რა თქმა უნდა, ეს არის რუსული შინაარსის და მიზნების მატარებელი კანონპროექტი. ისტორიამ განსაზღვრა ჩვენ მიმართ მტრული სახელმწიფოები. მზად ვარ, მხარი დავუჭირო ჩვენს ალტერნატიულ პროექტს, რომელიც საქართველოში რუსული გავლენების შეზღუდვას ითვალისწინებს. ამით დავიწყოთ და ეტაპობრივად თუ გამოჩნდება ზედაპირზე მტრულად განწყობილი სახელმწიფოების ინტერესები, ეს წრე შემდეგ გავაფართოოთ. ამას არანაირი კავშირი არ აქვს გამჭვირვალობასთან. ეს არის პროპაგანდა, რომელსაც „ოცნება“ იყენებს. სასაცილოა ის შიშები, რაც ამის უკან დგას. ამის უკან დგას მოახლოებულ არჩევნებთან დაკავშირებით უზარმაზარი შიშები, ეს ჩანს ამ გადაწყვეტილებებში – ლგბტ საკითხთან დაკავშირებით, ცესკო-ს დაქვემდებარებაში, გენდერული კვოტების გაუქმებაში და ყველა მათ ბოლო გადაწყვეტილებებში“, – განაცხადა ბექა ლილუაშვილმა. „ქართული ოცნება“ უცხოური გავლენის გამჭვირვალობის შესახებ კანონპროექტს ხელახლა წარადგენს. საპარლამენტო უმრავლესობის ლიდერმა, მამუკა მდინარაძემ „ქართული ოცნების“ ცენტრალურ ოფისში გამართულ ბრიფინგზე განაცხადა, რომ კანონპროექტი პარლამენტში დაინიცირდება ზუსტად იმავე ტექსტით, როგორც შარშან იყო დაინიცირებული, ერთადერთი განსხვავებით – კანონპროექტში ტერმინი „უცხოური აგენტი“ შეიცვლება და წარდგენილი იქნება შემდეგი ვარიანტი: „უცხოური ძალის ინტერესების გამტარებელი ორგანიზაცია“. ავტორი - ანი ქაჯაია

შუახევის მუნიციპალიტეტში მკვლელობა მოხდა. არსებული ინფორმაციით, შუახნის კაცმა ცოლი მოკლა. როგორც ადგილობრივები აცხადებენ, მამაკაცმა ქალს ცივი იარაღით ყელი გამოჭრა, რის გამოც, ქალი შემთხვევის ადგილზე გარდაიცვალა. გავრცელებული ინფორმაციით, ცოლის მკვლელობის შემდეგ შუა ხნის მამაკაცმა სხეულზე თვითდაზიანება მიიყენა, რის გამოც, კლინიკაშია მოთავსებული. რა გახდა ინციდენტის მიზეზი უცნობია. შემთხვევის ადგილზე მობილიზებულია სამართალდამცავები და საგამოძიებო მოქმედებები მიმდინარეობს. ipn

„ქართულმა ოცნებამ“ მიცემული პირობა ისევ გადათქვა და ე.წ. რუსულ კანონის ჩაგდებიდან 1 წლის შემდეგ, კანონპროექტს ისევ აბრუნებს. ამის შესახებ საპარლამენტო უმრავლესობის ლიდერმა და „ქართული ოცნების“ აღმასრულებელმა მდივანმა მამუკა მდინარაძემ, დღეს, 3 აპრილს, განაცხადა. მდინარაძის თქმით, აღნიშნული გადაწყვეტილება 2 აპრილს გამართულ უმრავლესობის სხდომაზე მიიღეს. როგორც მდინარაძემ განაცხადა, კანონპროექტი პარლამენტში დაინიცირდება ზუსტად იგივე ტექსტით, როგორც შარშან იყო ინიცირებული. მისი თქმით, ერთადერთი განსხვავება იქნება, რომ ტერმინი „უცხოური გავლენის აგენტი“ ტერმინით „უცხოური ძალის ინტერესების გამტარებელი ორგანიზაცია“ ჩანაცვლდება. მდინარაძის თქმით, შარშანდელი კანონპროექტის ყველა სხვა ჩანაწერი უცვლელია. „რადიკალურმა ოპოზიციამ, „ენჯეოებმა“ და მათმა ლობისტებმა შარშან შეცდომაში შეიყვანეს ქართული საზოგადოების მნიშვნელოვანი ნაწილი, რომელსაც საკუთარი ხელით ათქმევინეს უარი კანონზე, რომელიც მათ წინაშე „ენჯეოების“ ანგარიშვალდებულებასა და გამჭვირვალობას ითვალისწინებდა. ჩვენ ვართ ქართველი ხალხის მიერ არჩეული ხელისუფლება და ქართული საზოგადოების ღირსების დაცვა ჩვენი უმთავრესი პასუხისმგებლობაა. საზოგადოების მოტყუება არავის უნდა შერჩეს. აქედან გამომდინარე, საპარლამენტო უმრავლესობამ, პარტიის პოლიტიკურ საბჭოსთან კონსულტაციის შემდეგ, მიიღო გადაწყვეტილება, პარლამენტში ხელახლა წარადგინოს კანონპროექტი „უცხოური გავლენის გამჭვირვალობის შესახებ“, – განაცხადა მდინარაძემ. მდინარაძის თქმით, კანონს მიმდინარე სესიის ბოლომდე მიიღებენ. საქართველოს საპარლამენტო უმრავლესობამ უცხოური გავლენის აგენტების” შესახებ რუსული კანონი პირველი მოსმენით გასული წლის 7 მარტს მიიღო. კანონის მიზანი ქვეყანაში მედიისა და სამოქალაქო სექტორის დისკრედიტაცია და შეზღუდვაა. კანონს საქართველოს დასავლური ინტეგრაციის შემაფერხებლად მიიჩნევენ საქართველოს დასავლელი პარტნიორები, მათ შორის, აშშ და ევროკავშირი. მმართველი გუნდის ამ ნაბიჯს საქართველოს მრავალი მოქალაქის პროტესტი და მასშტაბური დემონსტრაციები მოჰყვა. 7-8 მარტს, მშვიდობიანი აქციის მონაწილეთა წინააღმდეგ ხელისუფლებამ გამოიყენა ფიზიკური ძალა, წიწაკის სპრეი, ცრემლსადენი გაზი, წყლის ჭავლი. დარბევებისას პოლიციის მიმართულებით სხვადასხვა საგანს ისროდა აქციის მხარეს მყოფი ადამიანების ნაწილი. დაზიანდა პოლიციის ავტომობილები, დაშავდნენ როგორც პოლიციელები, ისე – აქციის მონაწილეები. 8-9 მარტის ღამეს, რუსთაველზე აქციის დაშლის შემდეგ, სპეცრაზმმა აქციის მონაწილეებს მიმდებარე ქუჩებზე დილამდე სდია და აკავებდა მათ. ორდღიანი საპროტესტო აქციებისა და წინააღმდეგობის შემდეგ ხელისუფლებამ პირველი მოსმენით მიღებული კანონპროექტის მეორე მოსმენით ჩააგდო. კანონის ჩაგდების შემდეგ „ქართული ოცნების“ ლიდერები პირობას დებდნენ, რომ მას მომავალში აღარ მიუბრუნდებოდნენ. ნეტგაზეთი

13 და 14 აპრილს საქართველოს ეროვნულ ბოტანიკურ ბაღში საკურას ყვავილობის დღეები გაიმართება. აღნიშნულ ღონისძიებაზე გელოდებათ იაპონური ტრადიციული სამოსის ჩვენება, ორიგამის, შოდოს - იაპუნური კალიგრაფიის, კინცუგის - დამსხვრეული ჭურჭლის ოქროს მავთულხლართით შეკეთების მასტერკლასი და სხვა თემატური აქტივობები. ღონისძიება გაიხსნება იაპონური ტრადიციული ჩაის ცერემონიალით, რომელიც იაპონური კულტურის ცენტრის მხარდაჭერით გაიმართება. დამთვალიერებელი იაპონური კულტურის თემატიკაზე რუსუდან ფეტვიაშვილის შთამბეჭდავ ნამუშევრებს იხილავს. ასევე, საგამოფენო სივრცეში მერი შენგელიას ხელოვნების სტუდიის ახალგაზრდა მხატვრების თემატური გამოფენაც გაიმართება. ადგილზე შეგეძლებათ შეიძინოთ სუში, იაპონური ჩაი და სხვა გემრიელობები. ღონისძიების მხარდამჭერია ქალაქ თბილისის მერია და იაპონიის საელჩო საქართველოში. ინფორმაციას საქართველოს ეროვნული ბოტანიკური ბაღი ავრცელებს.

დღევანდელ პარლამენტში ვხედავთ, რომელი პარტია, რომელ პარტიასთან შედის კოალიციაში. დღეს, “ოცნებისთვის” ყველაზე დიდი პოლიტიკური გამოწვევა არის გაყალბებული არჩევნების ლეგიტიმაციის საკითხი. ამიტომ, ყველა ნაბიჯი, რომელსაც ის გადადგამს, თავისი კონტროლის გასამყარებლად, მას უნდა აჩვენოს, რომ თითქოს ეს გადაიდგა ან მრავალპარტიული ან არამხოლოდ მისი გადაწტვეტილებით. შესაბამისად, დღეს ძალიან მკაფიო მოცემულობაა, რომ სინამდვილეში ეს არის უბრალო, ჩვეულებრივი, იაფასიანი ვაჭრობის შედეგი. ბექა ლილუაშვილი, საპარლამენტო პოლიტიკური ჯგუფი “საქართველოსთვის” თავმჯდომარე. ვიდეო: https://www.facebook.com/ForGeoGe/videos/944285460722194/

თბილისში, წერეთლის გამზირზე მდებარე საშაურმე OK-ს საწარმოო პროცესი შეუჩერდა - მიზეზი სალმონელოზის დადასტურებული შემთხვევაა. ინფორმაციას სურსათის ეროვნული სააგენტო ავრცელებს. „სურსათის ეროვნულმა სააგენტომ თბილისის გადამდებ დაავადებათა ეპიდზედამხედველობისა და კონტროლის მუნიციპალური ცენტრიდან მიიღო შეტყობინება სალმონელოზის დადასტურებული შემთხვევის შესახებ. ეპიდანამნეზის თანახმად, პაციენტს საკვებად მიღებული აქვს შაურმა, რომელიც შეიძინა საშაურმე „OK“-ში (წერეთლის გამზირი 22). ინფორმაციის მიღებისთანავე, სურსათის ეროვნული სააგენტოს თბილისის საქალაქო სამსახურის უფლებამოსილმა პირებმა საშაურმეში (შპს „მადლი“ - საშაურმე “OK”, ს/კ 404581877) სახელმწიფო კონტროლი - არაგეგმური ინსპექტირება განახორციელეს და აიღეს სურსათის ნიმუშები (შაურმა ღორის ხორცით, შაურმისთვის განკუთვნილი შემწვარი ღორის ხორცი, სალათის ფოთოლი, ქათმის ბარკალი და გაყინული ღორის ხორცი). ლაბორატორიული კვლევის შედეგად შაურმასა და შაურმისთვის განკუთვნილ შემწვარ ღორის ხორცში აღმოჩენილია პათოგენური მიკროორგანიზმი - Salmonella, ასევე Proteus spp (პროტეუსის ბაქტერია), კოლიფორმები, აერობული მიკროორგანიზმები და ობის სოკოები. შპს „მადლს“ კრიტიკული შეუსაბამობების გამო შეუჩერდა საწარმოო პროცესი და დაჯარიმდა კანონმდებლობის შესაბამისად; ასევე დაევალა გენერალური რეცხვა-დეზინფექციის ჩატარება, ინვენტარის ზედაპირებიდან ნიმუშების აღება და მომსახურე პერსონალის ჯანმრთელობის მდგომარეობის გამოკვლევა“,- ნათქვამია ინფორმაციაში. IPN

ძალაუფლების გახანგრძლივებისთვის „ოცნება“ საკუთარ მიღწევებსაც კი ანადგურებს, - ამის შესახებ პარტია „საქართველოსთვის“ დეპუტატმა, ანა ბუჩუკურმა ბრიფინგზე განაცხადა, რითაც საარჩევნო სიაში გენდერული კვოტირების გაუქმების თაობაზე „გირჩსა“ და „ქართულ ოცნებას“ შორის მიღწეულ შეთანხმებას გამოეხმაურა. მისივე თქმით, „ოცნებამ“, კიდევ ერთხელ დაგვიდასტურა, რომ არც მის სიტყვას და არც მის დაპირებას ფასი არ აქვს. „დღეს ძალაუფლების გახანგრძლივებისთვის „ოცნება“ საკუთარ მიღწევებსაც კი ანადგურებს. აქ იმაზეც კი არ არის საუბარი, ვიღაც ეთანხმება თუ არ ეთანხმება გენდერული კვოტირების პრინციპს. გენდერული კვოტების გაუქმების გადაწყვეტილება, ისევე როგორც სრულად პროპორციულ საარჩევნო სისტემაში დელეგატების შემოღება და მინი-ფეოდალებისთვის საპარლამენტო მანდატების მიყიდვის შესაძლებლობის შექმნა, ცესკოს ლოიალური თავმჯდომარის არჩევა რამდენიმე წლით, არის ერთი ჯაჭვის შემადგენელი ნაწილები. „ოცნების“ თითოეული ამ გადაწყვეტილების მიღმა რეალურად დგას არჩევნების მოპარვის სურვილი. „ოცნება“ ისევ სხვისი ხელით ცდილობს საკუთარი მიზნის მიღწევას - ცესკოს სრულად დაქვემდებარებას და ძალაუფლების გახანგრძლივებას. რაც ერთხელ უკვე გააკეთა „ნაცმოძრაობასთან“ ერთად იუსტიციის უმაღლესი საბჭოს მურუსიძე-ჩინჩალაძისთვის სრულად ჩაბარებით. სინამდვილეში, ამ გადაწყვეტილებით „ოცნებამ“, კიდევ ერთხელ, დაგვიდასტურა, რომ არც მის სიტყვას და არც მის დაპირებას ფასი საერთოდ არ აქვს. დაგვიდასტურა, რომ „ოცნება“ უკვე დამარცხებული პარტიაა, თუმცა მის ყველა წევრს ჯერ ეს გააზრებული არ აქვს. „ოცნება“ კიდევ ბევრჯერ მოახდენს კოლექტიური „ოცნების“ ლუსტრაციას - არჩევნებამდე კიდევ ბევრ რამეს დაერქმევა თავისი სახელი და საზოგადოებისთვის ნათელი გახდება კოლექტიური „ოცნებისა“ და კოლექტიური „ნაცების“ რეალური სახეები და რეალური შემადგენლობა. ზუსტად ამიტომ ვამბობთ, რომ გახარიას გუნდისთვის, პარტია „საქართველოსთვის“ მოცემული ხმა არ დაიკარგება - იმიტომ, რომ ჩვენ არ ვვაჭრობთ ხალხის მიერ მონიჭებული ნდობით და ვიბრძვით ჩვენი ღირებულებებისთვის“,- აღნიშნა ბუჩუკურმა. ცნობისთვის, უმრავლესობა საარჩევნო სიაში გენდერული კვოტირების გაუქმების თაობაზე „გირჩის“ ინიციატივას მხარს დაუჭერს, „გირჩი“ კი, ცესკოს თავმჯდომარის არჩევისას „პროფესიონალიზმზე იქნება ორიენტირებული და საკითხს პირადი თემებისთვის არ გამოიყენებს“. იპნ

სტამბოლში, ღამის კლუბში გაჩენილ ხანძარს 27 ადამიანი ემსხვერპლა, - ამის შესახებ ინფორმაციას სააგენტო Reuters სტამბოლის მერზე, ექრემ იმამოღლუზე დაყრდნობით ავრცელებს. სტამბოლის მერის ექრემ იმამოღლუს ცნობით, ქალაქის ცენტრში მდებარე ღამის კლუბში ხანძარი სარემონტო სამუშაოების დროს გაჩნდა. იმამოღლუმ აღნიშნა, რომ ხანძრის შედეგად, რვა ადამიანი დაშავდა, რომელთაგან შვიდის მდგომარეობა მძიმეა. ამ დროისთვის ხანძარი ლიკვიდირებულია და მომხდარზე გამოძიება დაიწყო. იპნ

მინდა ჩვენს ემიგრანტებზე და მათ მიმართ „ოცნების“ დამოკიდებულებაზე ვისაუბრო. მსურს რამდენიმე ციფრი მოგიყვანოთ: 2023 წელს 4.1 მილიარდი აშშ დოლარი, 2022 წელს 4.3 მილიარდი აშშ დოლარი, 2021 წელს 2.3 მილიარდი აშშ დოლარი, მეტს არ გავაგრძელებ. მეგობრებო თუ იცით ეს რა რიცხვებია? ეს ის თანხებია რასაც ბოლო წლებია ჩვენი ემიგრანტები ყოველწლიურად რიცხავენ საქართველოში. რომ იცოდეთ ამ ძალიან დიდ რიცხვებს ასევე ყოველწლიურად რამდენიმე ასეული მილიონი დოლარი ემატება როგორც ფულადი გზავნილები, რომლებიც არ ირიცხება ელექტრონულად, არამედ იგზავნება სხვადასხვამეთოდებით და არ ხვდება ოფიციალურ სტატისტიკაში. ეს იცით რას ნიშნავს? ამ ქვეყნის ეკონომიკის, მათ შორის საბანკო, უძრავი ქონების, ვაჭრობის და კიდევ ბევრი სხვა სექტორის მნიშვნელოვანი ნაწილი ქვეყნიდან იძულებით, ოჯახის სარჩენად და ხშირად სესხით გაქცეული მოქალაქეების კისერზეა ჩამოკიდებული. ეს მწარე რეალობაა, რომ ეს ჩვედნი ემიგრანტები გვარჩენენ ჩვენ ყველას, თუ სწორად შევხედავთ ფაქტებს, ეს არის ჩვენი მძიმე რეალობა! მაინტერესებს, მართლა ფიქრობთ, რომ ამ ადამიანებს იმის უფლებაც კი არ აქვთ, რომ საკუთარი გადაწყვეტილება, საკუთარი აზრი დააფიქსირონ, რომ ხვალ როგორ ქვეყანაში უნდათ დაბრუნდნენ და იცხოვრონ? როდესაც ამ ხალხს უარს ეუბნებით უბნების დამატებაზე და დასცინით, რომ შეუძლიათ გადმოფრინდნენ, ჩარტერი დაიქირაონ და ისე მისცენ ხმა, შესაბამისად უცხადებთ, რომ მათი მოვალეობაა ბევრი იშრომონ, იმისათვის რომ გვარჩინონ, მაგრამ მათი საქმე არაა მათსავე ქვეყანაში როგორი მომავალი იქნება, დაბრუნებას საერთოდ შეძლებენ თუ ვერ შეძლებენ, მთავარია, ფული გადმორიცხონ. ანუ, მათი ფული გვინდა, მათი მძიმე შრომით ნაშოვნი ფული გვინდა, მაგრამ მათი შეხედულებები, მათი გადაწყვეტილება და არჩევანი არ გვაინტერესებს. რეალურად, ჩვენს ემიგრანტებს აქვთ ლეგიტიმური უფლება გაიზარდოს მათი ხელმისაწვდომობა არჩევნებზე, ხოლო თქვენ ვალდებული ხართ ეს შეასრულოთ, გაზარდოთ ხელმისაწვდომობა არჩევნებზე. მაგრამ არ ასრულებთ იმიტომ რომ ზუსტად იცით თუ ემიგრანტებს ექნებათ არჩევნებში მონაწილეობაზე გაზრდილი შესაძლებლობა, ეს გამოიწვევს თქვენი ძალაუფლების დაკარგვას. თუმცა, ერთ ფაქტორს არ ითვალისწინებთ, მათ აქვთ ძალიან დიდი რესურსი დაარწმუნონ აქ მცხოვრები თავიანთი ოჯახის წევრები რომ არსებული რეალობა შესაცვლელია. კიდევ უფრო მძიმე რეალობა რა არის იცით?! რომ ჩვენი ქვეყნიდან იძლებით სამუშაოდ წასული ჩვენი მოქალაქეების უმძიმესი შრომით შექმნილი ეკონომიკით თქვენ ამაყობთ და მათი შეგროვებული და მნიშვნელოვანწილად მათი შექმნილი ბიუჯეტიდან კი პოლიტიკურ კორუფციას უწყობთ ხელს და აფინანსებთ, რაც იგივე ფულის მოპარვაა! ეს არის ჩვენი მწარე რეალობა და მე გირჩევთ, მოგიწოდებთ: შეასრულეთ თქვენი პასუხისმგებლობა და ამ ადამიანებს გაუზარდეთ ხელმისაწვდომობა არჩევნებზე! მიშა დაუშვილი, საპარლამენტო პოლიტიკური ჯგუფი "საქართველოსთის" წევრი.

აფხაზური მედიის ინფორმაციით, დღეს, 2 აპრილს, აფხაზეთის დე ფაქტო თავდაცვის სამინისტროს კუთვნილი ვერტმფრენი МИ-24 ავარიულად დაეშვა, რის შემდეგაც მთლიანად დაიწვა. ეკიკპაჟის სამივე წევრი გადარჩა და ისინი აგუძერის სამხედრო ჰოსპიტალში გადაიყვანეს. ჯერჯერობით უცნობია ვერტმფრენის ჩამოვარდნის მიზეზები. აფხაზეთის დე ფაქტო საგამოძიებო უწყებებმა გამოძიება უკვე დაიწყეს. ნეტგაზეთი

საქართველოს სახალხო დამცველმა 2023 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ წლიური საპარლამენტო ანგარიში გამოაქვეყნა. 386-გვერდიანი ანგარიშში წარმოდგენილია კონსტიტუციით გარანტირებული ადამიანის უფლებების დაცვის მხრივ არსებული გამოწვევები და პროგრესი, ასევე, მიმოხილულია გაცემული რეკომენდაციების შესრულების მდგომარეობა. ანგარიშში განსაკუთრებული ყურადღება ეთმობა ოკუპაციას და მასთან დაკავშირებულ პრობლემებს – კონფლიქტის ზონაში მცხოვრები ქართველი, ოსი და აფხაზი მოსახლეობის უფლებრივ მდგომარეობას; საოკუპაციო რეჟიმის მიერ თამაზ გინტურის მკვლელობასა და დავით ბაშარულის, გიგა ოთხოზორიას, არჩილ ტატუნაშვილის და ირაკლი კვარაცხელიას მკვლელობის უშუალო მონაწილეთა დაუსჯელობას, რაზეც პასუხისმგებლობა რუსეთის ფედერაციას ეკისრება. გრძელდება ოკუპირებულ ტერიტორიებზე მოქალაქეთა უკანონო დაკავებებისა და არასათანადო მოპყრობის პრაქტიკა. ეთნიკურად ქართველ მოსახლეობას არ ეძლევა მშობლიურ ენაზე განათლების მიღების შესაძლებლობა. სახელმწიფოს მხრიდან უფრო მეტი ძალისხმევაა საჭირო ოკუპაციის შედეგად საკუთარ ქვეყანაში დევნილად ქცეული მოსახლეობის უფლებების დასაცავად. მძიმე გამოწვევად რჩება საოკუპაციო ხაზზე უკანონო დაკავებები და არასათანადო მოპყრობის ფაქტები, უკანონო პატიმრობის შემთხვევები, საკუთრების უფლების დარღვევა და თითქმის უწყვეტი უკანონო „ბორდერიზაცია.“ ურთულესია საოკუპაციო ხაზთან მცხოვრები ქალების უსაფრთხოებისა და ჯანმრთელობის მდგომარეობა, ქალთა მიმართ ძალადობა და ოჯახში ძალადობა; საბაზისო სერვისების შესახებ ინფორმაციის არქონა. საანგარიშო პერიოდში განსაკუთრებით სამწუხარო იყო შოვში მომხდარი ტრაგედია, რომელსაც 32 ადამიანი ემსხვერპლა. სახალხო დამცველის პოზიციით, მოცემულ საქმეზე აუცილებელია ეფექტიანი გამოძიების განხორციელება ინსტიტუციური დამოუკიდებლობისა და მიუკერძოებლობის დაცვით, ზედმიწევნით, კომპეტენტურად, გონივრულ ვადაში და გარდაცვლილთა ოჯახის წევრების ჩართულობით. აღსანიშნავია, რომ სახალხო დამცველს საგამონაკლისო წესით მიეცა შოვის ტრაგედიის საგამოძიებო მასალებზე წვდომის შესაძლებლობა, რაც აპარატს კატასტროფის წინაპირობებისა და ლიკვიდაციის პროცესში უფლებრივი მდგომარეობის საკითხების სიღრმისეულად შესწავლის და საგამოძიებო პროცესზე ეფექტური დაკვირვების საშუალებას მისცემს. შოვისა და გურიის შემთხვევების კონტექსტში ანგარიშში საუბარია ადამიანის ფუნდამენტურ უფლებაზე – იცხოვროს უსაფრთხო გარემოში და მოსალოდნელი კატასტროფის შესახებ წინასწარ მიიღოს გაფრთხილება. სიცოცხლის უფლების ხელყოფის თვალსაზრისით შემზარავი იყო 14 წლის აითაჯ შახმიროვას გენდერული ნიშნით ჩადენილი განზრახ მკვლელობა. აითაჯის მკვლელობის ფაქტი არ არის განყენებული შემთხვევა და ძალადობის პრევენციის, აღკვეთის, მსხვერპლთა დაცვის და დახმარების მიმართულებით არსებული ხარვეზების შედეგია. მომხდარი კიდევ ერთხელ ადასტურებს მუშაობის გაძლიერების საჭიროებას გენდერულ სტერეოტიპებზე დაფუძნებული ტრადიციებისა და მავნე პრაქტიკების აღმოსაფხვრელად, როგორც ქალთა მიმართ ძალადობის, ასევე არასრულწლოვანთა მიმართ ძალადობისა და ბავშვის ქორწინებისგან დასაცავად. ბავშვთა მიერ სწავლის მიტოვების და ბავშვთა მიმართ ძალადობის აღმოსაფხვრელად საგულისხმოა თავად ბავშვებისა თუ ფართო საზოგადოების ინფორმირებულობის დონის ამაღლებას ბავშვთა უფლებებისა და დაცვის მექანიზმების შესახებ. ანგარიშში მნიშვნელოვანი ადგილი ეთმობა პენიტენციური და სამოქალაქო ფსიქიატრიული დაწესებულებების, ასევე, ფსიქიკური ჯანმრთელობის მქონე პირთა თავშესაფრებისა და საცხოვრისების მონიტორინგის შედეგებს. ფსიქიატრიულ დაწესებულებებში არ შეინიშნება მნიშვნელოვანი გაუმჯობესება, პაციენტები კვლავ ხდებიან ძალადობის მსხვერპლები და უგულებელყოფილია მათი სამართლებრივი დაცვის გარანტიები; ბენეფიციარებისთვის დაწესებული მთელი რიგი შეზღუდვები შესაძლოა, არასათანადო მოპყრობას გაუტოლდეს. გამოწვევაა ანტიფსიქოზური მედიკამენტების გამოყენება და გვერდითი ეფექტების მართვა; გარდაცვლილი პაციენტების შესახებ ერთიანი სტატისტიკის წარმოება. წლების განმავლობაში, უმნიშვნელოვანესი გამოწვევაა პენიტენციურ დაწესებულებების გადატვირთულობა, არასათანადო მოპყრობისა და არაფორმალური მეთოდებით მმართველობის ცალკეული შემთხვევები. აუცილებელია პატიმართა პირობით ვადაზე ადრე გათავისუფლების მოქმედი პრაქტიკისა და საკანონმდებლო ჩარჩოს დახვეწა, რათა დადგინდეს ერთიანი, განჭვრეტადი და მკაფიო საფუძვლები იმისა, თუ ვის ეკუთვნის საკანონმდებლო შეღავათით სარგებლობის შესაძლებლობა. სასჯელის გადასინჯვის მექანიზმის ეფექტიანი ფუნქციონირება განსაკუთრებით მნიშვნელოვანია უვადო თავისუფლებააღკვეთილი მსჯავრდებულებისთვის. მისასალმებელია, რომ სახელმწიფოს პოზიტიური ვალდებულებიდან გამომდინარე, უვადო თავისუფლებააღკვეთილ მსჯავრდებულებს სათანადო პროგრამის გავლის, შეფასების და შესაბამისი პირობების დათქმით, უვადო პატიმრებს რეაბილიტაციის, სასჯელის შემსუბუქების, ან რიგ შემთხვევებში გათავისუფლების შესაძლებლობა მიეცათ. თუმცა, სამწუხაროდ, პროგრამა არ არის კონკრეტული შედეგის მომცემი და პროგრამის გავლის შემდეგ, პატიმართა უმეტესობას (მიუხედავად დადებითი რეკომენდაციებისა), სასამართლომ სასჯელის შემსუბუქების, ან პირობით ვადამდე გათავისუფლების მოთხოვნაზე უარი უთხრა. სახალხო დამცველი მიიჩნევს, რომ ასეთი მიდგომა სრულიად სპობს ამ ადამიანებში ნებისმიერ მოტივაციას. რაც შეეხება სამართლიანი სასამართლოს უფლებას, პირველ რიგში, საგულისხმოა, რომ მართლმსაჯულების სისტემის რეფორმირების არაერთი მცდელობის მიუხედავად, საქართველოში სასამართლოს სისტემაში, როგორც საკანონმდებლო, ისე ინსტიტუციურ დონეზე, კვლავ შენარჩუნებულია ხარვეზები, რომელთა აღმოფხვრაც აუცილებელ პირობას წარმოადგენს საქართველოსთვის ევროკავშირის წევრობის გზაზე. 2023 წელს არანაკლებ აქტუალური იყო შეკრების თავისუფლების საკითხი. რადიკალური ჯგუფების შეკრებების ფონზე, აშკარად გამოჩნდა მშვიდობიანი შეკრების უფლებით სარგებლობის გამოწვევები, შეკრების ფორმისა და შინაარსის შემზღუდავი საკანონმდებლო ინიციატივები, შეკრების დაშლის მიზნით განხორციელებული არაპროპორციული და, ზოგიერთ შემთხვევაში, არალეგიტიმური ღონისძიებები. კვლავ გამოიყენებოდა შეკრების მონაწილეთა ადმინისტრაციული დაკავების პრაქტიკა. გამოწვევას წარმოადგენს გამოხატვისა და მედიის თავისუფლების საკითხები და ჟურნალისტების საქმიანობისთვის შესაბამისი უსაფრთხო გარემოს არსებობა. ამავე დროს, ჟურნალისტების საქმიანობას აფერხებს ინფორმაციის ხელმისაწვდომობის მარეგულირებელი მოძველებული კანონმდებლობა, რომელიც არ უზრუნველყოფს უფლების ეფექტიანად დაცვის შესაძლებლობას. 2024 წელს პირველად, ქვეყანაში საპარლამენტო არჩევნები სრულად პროპორციული სისტემით ჩატარდება. ამასთანავე, კენჭისყრის პროცესში მასშტაბურად დაინერგება ელექტრონული ტექნოლოგიები. მომავალი საპარლამენტო არჩევნების თავისუფალ, სამართლიან და მშვიდობიან გარემოში ჩატარებას განსაკუთრებული მნიშვნელობა აქვს ქვეყნის დემოკრატიული განვითარებისა და ევროპული ინტეგრაციისთვის. სახალხო დამცველი იმედოვნებს, რომ წარსული სამწუხარო გამოცდილებისგან განსხვავებით, როგორც წინასაარჩევნო პერიოდი, ასევე, კენჭისყრის დღე ადამიანის უფლებების ხელყოფის გარეშე წარიმართება და საარჩევნო პროცესებს მაღალი საზოგადოებრივი ნდობა ექნება. გამოწვევად რჩება სოციალურ საცხოვრისებში არსებული არასათანადო გარემო, უსახლკარო პირებისთვის განკუთვნილი სოციალური საცხოვრებლის მოწყობის მინიმალური სტანდარტების არარსებობა. გრძელვადიანი განსახლების მიზნებისთვის საბინაო ფონდისა თუ სოციალური საცხოვრისის უქონლობა და გადატვირთულობა. განსაკუთრებულად ყურადსაღებია ოზურგეთის ქუთაისის, გორის, თბილისის (ორხევის) საცხოვრისებში არსებული პირობები. რაც შეეხება ქვეყანაში თანასწორობის უფლებისა და დისკრიმინაციასთან ბრძოლის მიმართულებით არსებულ გამოწვევებს, საგულისხმოა, რომ ქმედითი ნაბიჯები არ გადადგმულა არც პოლიტიკის დოკუმენტებისა და არც საკანონმდებლო რეგულირების თვალსაზრისით. სახალხო დამცველის ანგარიშში დეტალური ინფორმაციაა შესული საზოგადოების ყველა ჯგუფის, მათ შორის, რელიგიური, ეთიკური, ლგბტიქ+, შშმ პირთა, ხანდაზმულთა, არასრულწლოვანთა, დევნილთა, ლტოლვილთა და სხვათა უფლებრივი მდგომარეობის შესახებ. საანგარიშო პერიოდში სახალხო დამცველის აპარატში ადამიანის უფლებათა დარღვევის ფაქტების შესახებ 4849 განცხადება შევიდა; ცხელი ხაზზე დაფიქსირდა 17567 ზარი. გაიმართა დახურული დაწესებულებების ათეულობით მონიტორინგი, საგანმანათლებლო და საინფორმაციო შეხვედრები რეგიონის მოსახლეობასთან, თვითმმართველობის ორგანოების წარმომადგენლებსა და თემატურ ჯგუფებთან. ანგარიშში გამოვლენილი უფლებადარღვევების აღმოსაფხვრელად შესაბამის უწყებებს გაეგზავნა 79 რეკომენდაცია/წინადადება; მომზადდა 10 სპეციალური ანგარიში და 3 ალტერნატიული ანგარიში საერთაშორისო ორგანოებში წარსადგენად, 3 კონსტიტუციური სარჩელი, 23 სასამართლო მეგობრის მოსაზრება, 3 კომუნიკაცია ევროპის საბჭოს მინისტრთა კომიტეტისთვის. იხილეთ სახალხო დამცველის წლიური საპარლამენტო ანგარიშის სრული ვერსია. პუბლიკა

სახალხო დამცველის 2023 წლის საქართველოში ადამიანის უფლებათა და თავისუფლებათა დაცვის მდგომარეობის შესახებ წლიურ საპარლამენტო ანგარიშში გაანალიზებულია მოსწავლის სტატუსის შეჩერების სტატისტიკა. ომბუდსმენი ეყრდნობა განათლებისა და მეცნიერების სამინისტროს მიერ მათთვის მიწოდებულ ინფორმაციას, რომლის თანახმადაც 2023 წელს სტატუსი შეუჩერდა 10430 მოსწავლეს. აქედან 1598 მოსწავლეს სტატუსი შეუჩერდა პროფესიულ საგანმანათლებლო დაწესებულებაში სწავლის გაგრძელების საფუძვლით. როგორც ანგარიშში ვკითხულობთ, სწავლის მიტოვებისა და მოსწავლის სტატუსის შეჩერების მაჩვენებელი, ყველაზე მაღალია თბილისში, აჭარაში, იმერეთსა და კახეთში. როგორც ანგარიშში მონატილი სტატისტიკური მონაცემებიდან ირკვევა, მოსწავლის სტსტუსის შეჩერებისა თუ შეწყვეტის საფუძველი უმეტეს შემთხვევაში საზღვარგარეთ ოჯახთან ერთად გამგზავრებაა – 5604 მოსწავლეე. როგორც ანგარიშში ვკითხულობთ, 2023 წელს დამატებით, სკოლებიდან ამოირიცხა 2944 მოსწავლე, აქედან 233 მოსწავლე დონის დაძლევის საფუძვლით; სკოლებიდან ამორიცხულ ბავშვებს შორის, ჯამში უცხო ქვეყნის მოქალაქე იყო – 165. გარდა ამისა, მოწოდებული ინფორმაციით, 27 მოსწავლე გარიცხეს სკოლიდან, რომელთაგან 14 იყო გოგო, ხოლო 13 ბიჭი. როგორც ანგარიშში ვკითხულობთ, მიუხედავად, სწავლის შეჩერების/მიტოვების რეალური საფუძვლების გამოკვეთისა და აღრიცხვისა, სტატისტიკა კვლავ მნიშვნელოვან დაზუსტებას საჭიროებს. კერძოდ, ომბუსდმენის აპარატის შეფასებით, მოსწავლის სტატუსის შეჩერების/შეწყვეტის შემთხვევების ისეთი საფუძვლები, როგორიცაა „მშობლის განცხადება“, „გაცდენების ზღვრული რაოდენობა“ ან „სხვა“, ბავშვის საგანმანათლებლო პროცესიდან ჩამოშორების თუ დროებით ჩამოშორების მიზეზების თაობაზე რეალურ ინფორმაციას არ იძლევა. პუბლიკა

სამტრედიაში მკვლელობა მოხდა. არსებული ინფორმაციით, საშუალო ასაკის მამაკაცი მეუღლემ მოკლა. მკვლელობის სხვა დეტალები უცნობია. შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 11 პრიმა 109-ე მუხლით დაიწყო. იპნ

დღეს დილიდან, კიდევ ერთხელ ვაკვირდებით „ქართული ოცნების“ მავნებლობას, ნებისმიერი გზებით, ნებისმიერი საშუალებებით გაიხანგრძლივოს საკუთარი ძალაუფლება,- ამის შესახებ „გახარია საქართველოსთვის “საპარლამენტო პოლიტიკური ჯგუფის თავმჯდომარე ბექა ლილუაშვილმა განაცხადა. მისივე თქმით, ძალიან კარგად ჩანს, რომ „ოცნების“ მთავარი მოტივი და მიზანი, ქვეყნის განვითარება კი არა, პოლიტიკური თვითგადარჩენაა. „დღეს დილიდან, კიდევ ერთხელ ვაკვირდებით „ქართული ოცნების“ მავნებლობას, ნებისმიერი გზებით, ნებისმიერი საშუალებებით გაიხანგრძლივოს საკუთარი ძალაუფლება. სამწუხაროდ, ხშირად ეს ხდება ქვეყნის მნიშვნელოვანი მიღწევების, პროგრესის ფასადაც კი. ძალიან კარგად ჩანს, რომ „ოცნების“ მთავარი მოტივი და მიზანი, ქვეყნის განვითარება კი არა, პოლიტიკური თვითგადარჩენაა. პარტია, რომელიც ამბობს, რომ აქვს 60%-იანი მხარდაჭერა, ჯერ მისი წინამორბედის მსგავსად, საკუთარ საარჩევნო ისტერიულ შიშებზე არგებს კანონებს და იქვემდებარებს ცენტრალურ საარჩევნო კომისიას, შემდეგ კი უპრინციპო პოლიტიკური გარიგებებით აპირებს დანიშნოს სრულად კონტროლირებადი ადამიანები ამ ინსტიტუტის ხელმძღვანელებად. მე მაინტერესებს, დღეს რა შეფასებებით მოძრაობენ ის ადამიანები, რომელთა მხრიდანაც, გენდერული კვოტების მნიშვნელობა, ამ მიღწევის დაცვაზე არაერთი გამოსვლა - ჩემი ყურით მომისმენია აი ამ დარბაზიდან, აი ამ ტრიბუნიდან? თავს ნუ იტყუებთ რაღაც გამოგონილი, ვითომ პოლიტიკური კომპრომისებით თქვენს ვითომ ოპონენტებთან. თქვენს ამ ფარულ გარიგებებს ვერ შეფუთავთ! როგორც ვერ შეფუთეთ „ნაც მოძრაობასთან“ გარიგება და იუსტიციის უმაღლესი საბჭოს წევრების დანიშვნა, როგორც ალაგებდით ახალ გარიგებას, მაგრამ წყალში ჩაგიყარეთ პრეზიდენტის იმპიჩმენტის დროს. ახლა, გგონიათ რომ ამ ახალი შეფუთვით ამომრჩეველს რამეს მოატყუებთ? ვერ მოატყუებთ! დიდი ხანია უკვე საზოგადოება ძალიან კარგად არჩევს რეალურად სად გადის კოლექტიური „ქართული ოცნების“ კონტურები, ამიტომ ეს თამაშობანა ვერ გიშველით. ვერც ის გიშველით, რომ ვითომ 60%-იანი პარტია. გამოდიხართ და მუნიციპალიტეტებში არსებულ 40% - იან ბარიერს აუქმებთ, იმიტომ რომ დღევანდელი კვლევებით 30%-ის გადალახვის პრობლემა გაფრთხობთ. ვერც რაღაც ახალი ველოსიპედების ე.წ. დელეგატების სისტემის და ადგილობრივი ფეოდალებისთვის საპარლამენტო მანდატების მიყიდვის შესაძლებლობების შექმნა გიშველით. თქვენ რომ გგონიათ, რომ ხელში ტუზი გიჭირავთ და რომ ბოლო-ბოლო ჩვენი მოქალაქეებისთვის არჩევნების მოპარვით, ძალადობით დაშინებით თუ მოსყიდვით გახვალთ სამშვიდობოს ეგ ტუზიც ხელში შეგრჩებათ. არ გჯერათ? აგერ „ნაცმოძრაობას“ ჰკითხეთ 2012 წელს როგორ იყო, გაგიზიარებენ. გუშინ, რომ ღარიბაშვილმა ჩვენს ემიგრანტებს მოუწოდა, ჩამოდით და აქ მიეცით ხმაო, ასეთი უპატივცემულობა რომ გამოავლინა, თითქოს მისსავით ამ ხალხს ჩარტერი ელოდებოდეს აეროპორტში - მარტო ღარიბაშვილს კი არა, ბუმერანგივით თქვენც დაგიბრუნდებათ ამ ემიგრანტებისგან და მათი ოჯახის წევრებისგან მომავალ არჩევნებზე. სულ რომ ერთ უბანიც არ გახსნათ საზღვარგარეთ - ესეც არ გიშველით. ამიტომ. ბევრჯერ გვითქვამს და კიდევ ერთხელ ვიტყვით, შეეშვით პოლიტიკურ თაღლითობას და არჩევნების მოპარვის პერსპექტივით ტკბობას. დაიტევოთ იმის მინიმალური შესაძლებლობა მაინც, რომ ადამიანებს, ამომრჩევლებს შერჩეთ ელემენტარული პატივისცემა და დაგიფასოთ ის ბევრი კარგი საქმე, რომელიც თქვენ, ჩვენ ერთად გვიკეთებია“,- აღნიშნა ლილუაშვილმა. IPN

29-31 მარტს პარტიის „გახარია საქართველოსთვის“ ლიდერმა გიორგი გახარიამ გუნდთან ერთად სამეგრელოში შეხვედრები გამართა. პარტიის პრესსამსახურის ინფორმაციით, ჯგალში, კირცხში, ხაბუმეში, სენაკსა და ზუგდიდში მოსახლეობასთან შეხვედრების დროს გამოიკვეთა ძალიან ბევრი პრობლემა, მათ შორის, გაზიფიცირების, წყლით მომარაგების, დასაქმების პრობლემები, მოსახლეობა განსაკუთრებით წუხს, რომ ახალგაზრდები ტოვებენ სოფლებს, ტოვებენ რეგიონს და მიდიან ევროპაში, ან აშშ-ში, რადგან საკუთარი უნარების და შესაძლებლობების რეალიზების საშუალება საკუთარ ქვეყანაში არ აქვთ. "ჩვენ, ჩვენი გუნდი, ვიბრძოლებთ იმისთვის, რომ ამ ქვეყანაში უსამართლობამ და კორუფციამ ვერ გაიხაროს. არ უნდა ჰქონდეს მნიშვნელობა, ბავშვი რომელ და როგორ ოჯახში დაიბადა. ყველა ბავშვისთვის თანაბრად ხელმისაწვდომი უნდა იყოს სკოლა, განათლება, ჯანმრთელობა, ელემენტარული კვება! რაც ახლა ხდება, უსამართლობაა, ეკონომიკა მართლაც იზრდება, მაგრამ მხოლოდ 25 ოჯახი მდიდრება. ჩვენ არავის მტრები არ ვართ, მაგრამ ყველამ, ვინც ხალხის ფული მოიპარა, ეს ფული უკან უნდა დააბრუნოს. როდესაც ღარიბ და ღატაკ ქვეყანაში, როცა მშობლები იმას ფიქრობენ, შვილებს რა აჭამონ, ან მშობლების ნაწილი უცხოეთშია გადახვეწილი, რომ შვილები შეინახოს, და ასეთ ქვეყანაში ხალხის ფულს ხელს კიდებ, ეს დანაშაულზე მეტია, ეს არის ღალატი! ასე ნორმალურ ქვეყანას ვერ ავაშენებთ. ჩვენ არავის ვემტერებით, არ ვამბობთ, რომ ვიღაცას გავუსწორდეთ, არა, მაგრამ ხალხის ნაშრომი ვიღაც ნაძირალამ არ უნდა მოიპაროს და სახლში არ უნდა წაიღოს. ეს ხომ უნდა დავასრულოთ ერთხელ და სამუდამოდ. ამას კი სჭირდება, სწორი, კარგი ადამიანები პირველ რიგში პარლამენტში!“ - განაცხადა გახარიამ. გიორგი გახარიამ წალენჯიხის საკრებულოს დეპუტატის გელა აბულაძის საქმეც გაიხსენა: ყველამ კარგად იცის, როგორ მოექცნენ გელა აბულაძეს. რაღაც საქმე შეუთითხნეს, რადგან სწორ ადგილას - ჩვენთან ერთად იდგა. ადამიანი ერთი წელი გამოკეტეს ციხეში ცრუ ბრალდებით. რით განსხვავდებიან ნაცებისგან, ნაცები იგივეს არ აკეთებდნენ?! მთავრობა ამბობს, რომ თითქოს ანტიკორუფციულ ნაბიჯებს დგამს და კვლევებს ატარებს, ევროპაში მესამე ადგილზე ვართო, სამარცხვინოდ ტყუიან და არაფერზე ფიქრობენ გარდა კორუფციისა, რაც შეიძლება მეტი ფულის მოპარვისა და ამ მოპარულის გადარჩენისა, რომ როგორმე ევროპაში გაიქცნენ და გაიპარონ!“, - განაცხადა გახარიამ. სამეგრელოში მოსახლეობასთან შეხვედრებს ესწრებოდნენ პარტიის აღმასრულებელი მდივანი ბერდია სიჭინავა, პარლამენტის დეპუტატები ანა ბუჩუკური და შალვა კერესელიძე, პოლიტსაბჭოს წევრი გიორგი ჭანტურია, პარტიის წევრი ლევან გოგიჩაიშვილი, ზუგდიდის საკრებულოს თავმჯდომარე გიგა ფარულავა, ზუგდიდის საკრებულოს თავმჯდომარის მოადგილე მალხაზ თორია, წალენჯიხის საკრებულოს თავმჯდომარე კორნელი სალია, წალენჯიხის საკრებულოს წევრი გია აბულაძე, ჩხოროწყუს საკრებულოს თავმჯდომარე შოთა წურწუმია და პარტიის სხვა წევრები. FRONTNEWS.GE

ზუსტად ეს არის, რატომაც ვამბობთ, რომ ჩვენთვის, გახარიას გუნდისთვის, პარტია “საქართველოსთვის” მოცემული ხმა არ დაიკარგება, იმიტომ, რომ ჩვენ არ ვვაჭრობთ. ანა ბუჩუკური, საპარლამენტო პოლიტიკური ჯგუფი “საქართველოსთვის” წევრი. ვიდეო: https://www.facebook.com/ForGeoGe/videos/1469469860621090/