tvati

ეს კანონი ევროპელი პოლიტიკოსებოსთვის არის ის, რასაც რეალურად წარმოადგენს. საუბარი გამჭირვალობაზე და იმაზე, რომ ფინანასების გასაჯაროება მოხდეს არის ზღაპარი, ამის სხვა ძალიან ბევრი მეთოდი არსებობს. ეს არის თავისუფლბის, დემოკრატიის წახალისების წინააღმდეგ მიმართული კანონმდებლობა და რეალურად, დასავლეთის გავლენის შეზღუდვა ლეგალური გზით. ყველა ქვეყანაში, სადაც მსგავსი კანონმდებლობა მიიღეს, სწორედ ამ მიზანს ემსახურებოდა. ნატალია საბანაძე, გიორგი გახარიას საერთაშორისო მრჩეველი. ვიდეო: https://www.facebook.com/ForGeoGe/videos/778431314391861/

„აგენტი“ ითქვა, თუ არ ითქვა არანაირი მნიშვნელობა არ აქვს, რას მიედ - მოედებიან? მნიშვნელობა აქვს იმას, რომ გერმანიისკანცლერმა, რომელიც არის ერთ-ერთი მთავარი ლიდერებიდან, თქვა, რომ არ შეიძლება ამის დაბრუნება, ეს არ არის ევროპული კანონი, - ამის შესახებ საქართველოს პრეზიდენტმა სალომე ზურაბიშვილმა „ტვ პირველის“ ეთერში განაცხადა, რითაც გერმანიის კანცლერის, ოლაფ შოლცისა და საქართველოს პრემიერ-მინისტრის ირაკლი კობახიძის ერთობლივ პრესკონფერენციაზე გაკეთებულ განცხადებებს ეხმაურება. ამასთან, სალომე ზურაბიშვილის განცხადებით, პრემიერ-მინისტრმა დაარღვია დიპლომატიური წესი, როდესაც გერმანიის კანცლერთან ერთად პრესკონფერენციისას გერმანულ ენაზე ისაუბრა. „საზღვარგარეთ, ყველამ თქვა სხვადასხვა ფორმით და სხვადასხვა დროს, უფრო და უფრო მკაფიოდ, რომ არ შეიძლება ამ ძველი კანონის უკან დაბრუნება. იქ „აგენტი“ ითქვა თუ არ ითქვა არანაირი მნიშვნელობა არ აქვს, რას მიედ - მოედებიან? მნიშვნელობა აქვს იმას, რომ გერმანიის პრემიერმა, რომელიც არის ერთ-ერთი მთავარი ლიდერებიდან, თქვა, რომ არ შეიძლება ამის დაბრუნება, ეს არ არის ევროპული კანონი, ასეთი კანონი არსად არ არის. კი ცდილობენ, რომ დაგვარწმუნონ, ვიღაც ფრანგულად კითხულობს თურმე და გაიგო კარგად და ა.შ. სხვათა შორის უნდა ითქვას, რომ სრულიად დარღვევაა ყველა დიპლომატიური წესის, რომ შენ როცა ოფიციალურ ვიზიტზე ხარ, არ უნდა ისაუბრო იმ ქვეყნის ენაზე. რას აჩვენებს, რომ იცის გერმანული? მაკრონთან ჩემი პირველი ვიზიტის დროს, მაკრონმა მომისმინა ქართულად. ეს არის ისეთი ჩვეულებრივი წესი, რომ ცოტა უნდა ისწავლონ რაღაცები, სანამ დაიწყებენ იქით-აქეთ სიარულს. არ გამიკვირდა შოლცის პოზიცია, ეს არის საწყისი იმისა, რასაც გაგვიმეორებენ არაერთხელ ამ პერიოდში. ამიტომაა ეს კანონი საბოტაჟი ჩვენი ევროპული გზის და არა მხოლოდ ეს კანონი. ჩვენ ვხედავთ მთელ რიგ, კორიანტელს გადაწყვეტილებების, რომელიც ყველა არის ერთი რგოლი იმისა, თუ რა გადაწყვეტილებებს იღებენ იმისათვის, რომ ჩაიშალოს ევროპული კანდიდატურა“, - განაცხადა სალომე ზურაბიშვილმა. იპნ

საქართველოს პრეზიდენტის, სალომე ზურაბიშვილის განცხადებით, მარტის აქციებზე პოლიციელების ჯანმრთელობის ხელყოფის და სახელმწიფო ქონების განადგურების ბრალდებით დაკავებული ლაზარე გრიგორიადისს შეიწყალებს. ამის შესახებ სალომე ზურაბიშვილმა "ტვ პირველთან" ინტერვიუში განაცხადა. მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული 21 წლის ლაზარე გრიგორიადისი სასამართლომ დამნაშავედ ცნო. თბილისის საქალაქო სასამართლოს მოსამართლის, ზვიად შარაძის გადაწყვეტილებით, ლაზარე გრიგორიადისს თავისუფლების 9 წლით აღკვეთა მიესაჯა. იპნ

რუსული კანონის ფონზე, "ოცნება" და "ნაც.მოძრაობა" იცლიან ფარული გარიგებებისთვის, ზუგდიდის მოსახლეობის არჩევანს ბოიკოტს უცხადებენ და ერთობლივი შეთანხმებით აპირებენ საკრებულოს თანამდებობის პირების გადაყენებას, მათ შორის, თავმჯდომარის იმპიჩმენტს. გიგა ფარულავა, ზუგდიდის საკრებულოს თავმჯდომარე. ვიდეო: https://www.facebook.com/ForGeoGe/videos/418239190939153/

როგორც არ უნდა დასრულდეს ეს პროცესი, ნებისმიერ შემთვევაში "ოცნება", რომელმაც გაბედა და შეურაცხყოფა მიაყენა საქართველოს მოქალაქეებს, ვერ გაექცევა პასუხისმგებლობას. ჩვენ კონკრეტული გამოსავალი შევთავაზეთ, ორი ალტერნატიული კანონპროექტის სახით "ოცნებას", მაგრამ რა თქმა უნდა, ამაზე სდუმან, რადგან მათ პროპაგანდისტულ ნარატივს გამჭირვალობაზე სრულად ანგრევს. გიორგი შარაშიძე, ფრაქცია "თბილისი საქართველოსთვის" წევრი. ვიდეო: https://www.facebook.com/ForGeoGe/videos/955308322988809/

ევროკავშირს არ აქვს მსგავსი კანონმდებლობა, - ასე უპასუხა გერმანიის კანცლერმა ოლაფ შორცმა საქართველოს პრემიერ-მინისტრ ირაკლი კობახიძესთან ერთობლივ ბრიფინგზე კითხვას იმის შესახებ, „რატომ არიან ევროპელი პარტნიორები შეშფოთებული „უცხოური გავლენის გამჭვირვალობის შესახებ“ კანონპროექტთან დაკავშირებით, როცა „ძალიან ბევრ ქვეყანას აქვს მიღებული იგივე ან მსგავსი კანონი“. როგორც გერმანიის კანცლერმა აღნიშნა, ტრანსფარენტულობა „სრულიად სხვა კონცეფციაა“. „ევროკავშირს არ აქვს მსგავსი კანონმდებლობა. არსებობს დისკუსია იმის შესახებ, რომ ტრანსფარენტურობა დამყარდეს სხვადასხვა სფეროში, მაგრამ ეს სრულიად სხვა კონცეფცია გახლავთ, ჯერ არც არის გადაწყვეტილი და დიდი ალბათობით, არც იქნება გადაწყვეტილი“, - განაცხადა შოლცმა. იპნ

გერმანიის კანცლერის, ოლაფ შოლცის განცხადებით, ძალიან მნიშვნელოვანია, რომ 2024 წლის არჩევნები თავისუფლად და სამართლიანად ჩატარდეს. როგორც მან პრემიერ-მინისტრ ირაკლი კობახიძესთან შეხვედრის შემდეგ გამართულ ერთობლივ ბრიფინგზე აღნიშნა, ეს არის საფუძველი კანდიდატის სტატუსის შემდეგი პროცესის განვითარებისთვის. “მომავალი საპარლამენტო არჩევნები ძალიან მნიშვნელოვანი გახლავთ. ძალიან მნიშვნელოვანია, რომ არჩევნები თავისუფლად და სამართლიანად ჩატარდეს. ეს გახლავთ საფუძველი კანდიდატის სტატუსის შემდეგი პროცესის განვითარებისთვის. გერმანია საქართველოს სანდო პარტნიორი რჩება. ჩვენ საქართველოს გზას ევროკავშირის მიმართულებით მომავალშიც მხარს დავუჭერთ“,-განაცხადა შოლცმა. იპნ

ჩვენ, მთელი ევროკავშირი ძალიან კრიტიკულად ვუყურებთ ე.წ. აგენტების შესახებ კანონს, - ამის შესახებ განცხადება გერმანიის კანცლერმა ოლაფ შოლცმა საქართველოს პრემიერ-მინისტრთან ერთად გამართულ პრესონფერენციაზე განაცხადა. მისივე თქმით, „მას შემდეგ რაც ეს კანონი შეჩერდა, ძალიან დიდი იმედი ჰქონდა, რომ ის აღარ დადგებოდა დღის წესრიგში“. „ახალი კანონპროექტი, ფაქტობრივად, არ შეცვლილა და ის თითქმის იგივეა, რაც შარშან. ძალიან დიდი იმედი გვაქვს, რომ ამ კანონს არ მიიღებს საქართველო და პარლამენტი გაითვალისწინებს ჩვენი და საქართველოს მოსახლეობის კრიტიკულ პოზიციას. ამიტომ ჩვენს საუბარში კიდევ ერთხელ გავუსვი ხაზი სამოქალაქო საზოგადოების მნიშვნელობას, ოპოზიციისა და მთავრობის თანამშრომლობას, რომელიც ძალიან მნიშვნელოვანია საზოგადოებრივი განვითარებისთვის“, - აღნიშნა გერმანიის კანცლერმა. იპნ

„ქართული ოცნების“ ადმინისტრაცია, გასული წლის მარტში, იძულებული გახდა გაეწვია „უცხოური გავლენის გამჭვირვალობის შესახებ" კანონპროექტი ქუჩის საპროტესტო აქციების შემდეგ, ახლა, წინადადებების „უპირობოდ“ გატანის დაპირებიდან ერთი წლის შემდეგ, მთავრობამ კვლავ აღადგინა ისინი, - ამის შესახებ აღნიშნულია POLITICO-ს სტატიაში სათაურით: „ბრიუსელი შიშობს, რომ საქართველოს მთავრობა ქვეყნის ევროკავშირში გაწევრიანების დივერსიას აწყობს“. გამოცემა წერს, რომ ამ ნაბიჯებს ბრიუსელში მკაცრი შეფასებები მოჰყვა. „შარშან გააფრთხილეს რა, რომ საქართველოს მთავრობის წინადადებები „შეუსაბამო იყო ევროკავშირის ღირებულებებთან და სტანდარტებთან“, ოფიციალურ პირებს ახლა ყველა მიზეზი აქვთ, რომ „უცხოური აგენტების“ კანონპროექტი ურთიერთობებში განხეთქილების შეტანის მიზანმიმართულ მცდელობად აღიქვან“, - აღნიშნულია სტატიაში. POLITICO ციტირებს ევროკომისიის პრესსპიკერის სიტყვებს, რომელმაც გამოცემასთან ანონიმურობის დაცვის პირობით ისაუბრა. „საქართველოში მმართველი პარტიის განცხადება კანონპროექტის ხელახლა შეტანის შესახებ სერიოზულად შემაშფოთებელი მოვლენაა და მოვუწოდებთ საქართველოს, გაიწვიოს ეს კანონპროექტი, მთავრობისა და მმართველი პარტიის საჯარო ვალდებულებების შესაბამისად. ევროპულმა საბჭომ საქართველოს მიანიჭა კანდიდატის სტატუსი იმ პირობით, რომ გადაიდგას მთელი რიგი ნაბიჯები, მათ შორის, შეკრების და გამოხატვის თავისუფლების უზრუნველყოფა და სამოქალაქო საზოგადოებასთან კონსულტაციებისა და ჩართულობის უზრუნველყოფა“. მისი თქმით, კომისია გაფართოების მომავალ ანგარიშში, რომლის წარდგენაც შემოდგომაზე იგეგმება, შეაფასებს წარდგენილი კანონპროექტის გავლენას და საქართველოში არსებულ მდგომარეობას. იპნ

პარლამენტს დაჩქარებული წესით განსახილველად წარედგინა კანონის პროექტი, რომელიც ფიზიკური პირებისთვის 2021 წლის 1-ელ იანვრამდე დარიცხული საგადასახადო დავალიანებების და შესაბამისი საურავების ჩამოწერას ითვალისწინებს. ამავე პროექტით, საგადასახადო შეღავათები წესდება ე.წ. ოფშორში რეგისტრირებული უცხოური საწარმოს ყველა აქტივზე საკუთრების უფლების საქართველოს საწარმოსთვის გადაცემის ოპერაციებზე, რომლებიც 2028 წლის 1-ელ იანვრამდე განხორციელდება. ამ მიმართულებით “საგადასახადო კოდექსში“ დაგეგმილი ცვლილებები “ქართული ოცნების“ დეპუტატებმა მოამზადეს და ის პარლამენტის ბიუროს უახლოეს სხდომაზე წარედგინება. ინიციატორთა ინფორმაციით, დღეის მდგომარეობით, 145 842 ფიზიკურ პირს ერიცხება საგადასახადო დავალიანება, რომელიც წარმოშობილია 2021 წლის 1-ელ იანვრამდე. აღნიშნული საგადასახადო დავალიანება ჯამურად, დაახლოებით, 591 458 571 ლარს შეადგენს, მათ შორისაა, გადასახადი - 225 746 111 ლარი; ჯარიმა - 138 611 457 ლარი და საურავი - 227 101 003 ლარი. „ფიზიკური პირები, რომლებსაც საგადასახადო დავალიანება ერიცხებათ, მათ მიმართ მიმდინარე საგადასახადო ვალდებულების უზრუნველყოფის ღონისძიებების გამო პრაქტიკულად ვეღარ საქმიანობენ. წლების განმავლობაში დაგროვილი საგადასახადო დავალიანების ჩამოწერით მათ შესაძლებლობა ეძლევათ ხელახლა, საგადასახადო ვალდებულების გარეშე განაახლონ საქმიანობა“, - აღნიშნულია კანონის პროექტის განმარტებით ბარათში. რაც შეეხება ე.წ. ოფშორული კომპანიების მიერ აქტივების საქართველოში გადმოტანის ხელშეწყობისთვის მომზადებულ საგადასახადო ინიციატივას, პროექტის თანახმად, შესაბამისი ოპერაციები გათავისუფლდება მოგების გადასახადისგან, საშემოსავლო გადასახადისა და ქონების გადასახადისგან. ასევე, ამ ოპერაციის ფარგლებში, აქტივის/საქონლის საქართველოში შემოტანა/იმპორტი გათავისუფლდება იმპორტის გადასახდელებისგან. საგადასახადო შეღავათებით სარგებლობის აუცილებელი პირობაა, რომ შეღავათიანი დაბეგვრის მქონე ქვეყანაში რეგისტრირებული უცხოური საწარმოსა და საქართველოს საწარმოში წილის/აქციების 100 პროცენტს ერთი და იგივე ფიზიკური პირი (პირთა ჯგუფი) ფლობდეს. “საქართველოში ინვესტიციის დაბანდება ხშირად შეღავათიანი დაბეგვრის მქონე ქვეყანაში (ოფშორში) რეგისტრირებული უცხოური საწარმოების მიერ ხორციელდება, რომლებიც საქართველოში შვილობილი საწარმოების მეშვეობით საქმიანობენ, რაც მოიცავს გადასახადისგან თავის არიდების რისკს და ეფექტურ საგადასახადო ადმინისტრირებას უშლის ხელს. აღნიშნულის გათვალისწინებით, გადასახადისგან თავის არიდების პრევენციის, საქმიანობის გამჭვირვალობის უზრუნველყოფის და გადასახადის ადმინისტრირების გამარტივებისთვის მნიშვნელოვანია ხელი შეეწყოს შეღავათიანი დაბეგვრის მქონე ქვეყანაში რეგისტრირებული კომპანიებიდან აქტივების საქართველოში გადმოტანის პროცესს“, - ვკითხულობთ კანონპროექტში. “საგადასახადო კოდექსში“ ცვლილებები პარლამენტის წევრებმა: - პაატა კვიჟინაძემ, ანტონ ობოლაშვილმა, ირაკლი კირცხალიამ, ბეჟან წაქაძემ, ზაალ მიქელაძემ, ირაკლი ზარქუამ და გოგი მეშველიანმა წარადგინეს. იპნ

საგარეო საქმეთა ყოფილი მინისტრი (2015-2018 წწ) მიხეილ ჯანელიძე „ქართული ოცნების“ ამომრჩევლის და საჯარო სექტორის საყურადღებოდ აქვეყნებს ვრცელ ხედვას მიმდინარე პოლიტიკური პროცესის შესახებ. „ნეტგაზეთი“ უცვლელად გთავაზობთ ჯანელიძის პოსტს. „ყოველგვარი პოლიტიკური თუ სხვა ინტერესის გარეშე (კერძო სექტორში წარმატებით ვსაქმიანობ ქვეყნის გარეთ უკვე რამდენიმე წელია), გარდა ერთისა, ჩვენი ქვეყნის კეთილდღეობისა და ევროპული მომავლისა, მინდა ცოტა ვრცლად დავწერო ჩემი, ერთი მოქალაქის, ხედვა მიმდინარე პოლიტიკური პროცესის შესახებ, პირველ რიგში „ქართული ოცნების“ ამომრჩევლის და იმ ადამიანების საყურადღებოდ, “ქართულ ოცნებაში” და საჯარო სამსახურში, ვისთან ერთადაც მიბრძოლია საქართველოს ევროპული მომავლისთვის და საჭიროების შემთხვევაში, „ცალ-ფეხზეც დავმდგარვარ“ (ჩემი აზრით, როცა ორი ფეხით ვერ მიდიხარ მიზნამდე, საცალფეხო გზაზე გავლაც საჭიროა, განსაკუთრებით მაშინ როცა უკან დათვი მოგდევს). ყველამ კარგად იცის, რომ დღეს, გეოპოლიტიკური მოცემულობის გამო, საქართველოს აქვს ისტორიული მიზნის მისაღწევად გახსნილი შესაძლებლობის ფანჯარა. ეს გეოპოლიტიკური მოცემულობა და ფანჯარა არ არსებობდა, როცა მე, თქვენთან ერთად, ვმუშაობდი საქართველოს ევროინტეგრაციის საკითხებზე და არათუ კანდიდატის სტატუსი და მოლაპარაკებების გახსნის შესაძლებლობა, არამედ ჩვენი რეგიონის ევროპული პერსპექტივაც კი არ იყო აღიარებული; იმედი მქონდა, რომ ეს შესაძლებლობა პოლიტიკურ სპექტრს საერთო ეროვნული მიზნის გარშემო კონსენსუსის მიღწევის შესაძლებლობას მისცემდა, ევროკავშირში გაწევრიანების საკითხი შიდა პოლიტიკურ პროცესებზე მაღლა დადგებოდა, თუმცა „ქართული ოცნების” მიერ წამოწყებული პოლიტიკური პროცესი და შესაბამისი პროპაგანდა ძირს უთხრის ამ შესაძლებლობას. ფაქტია, რომ ევროკავშირში ინტეგრაციის საწინააღმდეგო, საზოგადოების გამხლეჩი საკითხი დღის წესრიგში ქართულმა ოცნებამ დააბრუნა, მაშინ, როცა ამის არანაირი წინაპირობა თუ საჭიროება არ არსებობდა; „ქართული ოცნება” ღიად აცხადებს, რომ ეს პოლიტიკური პროცესი მათ საარჩევნო ხმების მობილიზებაში დაეხმარება და კონსტიტუციურ უმრავლესობას უზრუნველყოფს, რადგან ეს თითქოს ხალხის ინტერესშია. ჩემი აზრით, ეს მხოლოდ ჩვენი ღია მტრის, ოკუპანტი რუსეთის ფედერაციის ინტერესშია, რადგან ის გვაცილებს სტრატეგიულ პარტნიორებს და მიზანს, და შესაბამისად, ასუსტებს ჩვენს საერთაშორისო პოზიციებს; დაუშვებლად მიმაჩნია, პასუხისმგებლობიანი პოლიტიკური ძალის მხრიდან საკუთარი პარტიული ინტერესის კონსტიტუციით გამყარებულ ეროვნულ ინტერესებზე წინ დაყენება და მოსახლეობის მართვა პოპულისტური პროპაგანდით. დღეს, სოციალურ ქსელებში ვრცელდება ბანერი (წინა დღეების პროპაგანდაში აღარ შევალ), რომელიც ამბობს შემდეგს: “საქართველო იმსახურებს ევროპას! საქართველო იმსახურებს დამოუკიდებლობას! #ღირსებით ევროპაში”, რასაც მინდა ვუპასუხო: ევროპაში ვართ, მაგრამ არ ვართ ევროკავშირში. ჩვენი კონსტიტუციური მიზანია გავხდეთ ევროკავშირის წევრი, რადგან ევროკავშირი არის ის გაერთიანება, რომელმაც უზრუნველყო: გრძელვადიანი მშვიდობა, ადამიანის უფლებების დაცვა, ეკონომიკური განვითარება, სოციალური თანასწორობა, კულტურული თვითმყოფადობა, რელიგიური მრწამსის პატივისცემა. ეს შედეგები მიღწეულ იქნა ევროკავშირის წევრ ქვეყნებში დემოკრატიული პროცესის დამკვიდრების, ევროკავშირის საერთო კანონმდებლობის განვითარებისა და ეროვნულ დონეზე დანერგვის გზით. ამიტომ, პროპაგანდაა ის, რომ თითქოს ერთი ბატონი მოვიშორეთ და მეორეს არ დავემონებით. თუ გვინდა ევროკავშირში, — ხაზი უნდა გავუსვა, რომ ჩვენ გვინდა და არა მათ — უნდა ვიყოთ დემოკრატიული სახელმწიფო და გავიზიაროთ მათი კანონმდებლობა (იმისთვის, რომ ის შედეგები მივიღოთ რაც სხვა ევროკავშირის წევრმა ქვეყნებმა) და არა პირიქით, ვიაროთ საწინააღმდეგო გზით. ეს არ გულისხმობს ღირსების შელახვას. ვინც ჩემთან ერთად იყო ჩართული ევროინტეგრაციის მოლაპარაკებებში, დამეთანხმება, რომ საქართველოს ინტერესებიდან გამომდინარე წერტილ-მძიმეც კი არ დაგვითმია ევროკავშირთან მოლაპარაკებებისას, ასოცირების შეთანხმება იქნებოდა ეს თუ ვიზალიბერალიზაცია. ევროკავშირი ყოველთვის აფასებდა ასეთ საგნობრივ მოლაპარაკებებს და ითვალისწინებდა საქართველოს პოზიციას. ევროკავშირში ინტეგრაციის პროცესი არ არის მხოლოდ ტექნიკური, ის არის ასევე პოლიტიკურიც. პროპაგანდაა ის, რომ თითქოს რაღაც „გლობალური ომის პარტიაა“, რომელიც წყვეტს მთელი მსოფლიოს ბედს, და ამ შემთხვევაში, საქართველოს ევროკავშირში ინტეგრაციის საკითხს. ევროკავშირი არის დამოუკიდებელი, დემოკრატიული სახელმწიფოების ერთობა, რომელთაც გააჩნიათ თავიანთი სუვერენული ინტერესები და შესაბამისი პოლიტიკური პროცესი. არავინ იფიქროს, რომ საქართველოზე ფიქრით იძინებენ და იღვიძებენ ევროპის მოქალაქეები და შესაბამისად, პოლიტიკოსები. ეს კარგად დავინახეთ ვიზალიბერალიზაციის პროცესში, რომელიც წარმატებით დავასრულეთ 2016 წლის საპარლამენტო არჩევნებამდე, და რამაც დიდი სიკეთე მოუტანა ჩვენს მოქალაქეებს და წარმატება „ქართულ ოცნებას“. აქაც დამეთანხმებიან ის ადამიანები, ვინც ჩართულები იყვნენ ვიზალიბერალიზაციის მოლაპარაკებებში, რომ საქართველოს ტექნიკური მზაობის დადასტურების შემდეგ, ძალიან რთული პოლიტიკური პროცესის გავლა მოუწია იმისთვის, რომ საქართველოს მოქალაქეებს მიეღოთ ევროკავშირში/შენგენის ზონაში თავისუფალი გადაადგილების შესაძლებლობა. ჩვენ მოგვიწია ცალ-ცალკე მოლაპარაკებების წარმოება ევროკავშირის წევრ ქვეყნებთან მთავრობის ხელმძღვანელების, საგარეო საქმეთა და შინაგან საქმეთა მინისტრების, პარლამენტების, ეროვნული პოლიტიკური პარტიების და ასევე, ევროკავშირის ინსტიტუტების, საბჭო და პარლამენტი, ევროკავშირის საპარლამენტო ჯგუფების დონეზე და ინდივიდუალური თუ საერთო, პარტიული თუ ინსტიტუციური ინტერესების თანხვედრის შეჯერება, მათ შორის, ხან პოლიტიკური „ბრძოლით“ და ხან „ცალ-ფეხზე დგომით“. დემოკრატიული პოლიტიკური პროცესი რთულია, თუმცა ის საუკეთესოდ გამოხატავს ხალხის ინტერესს, რადგან პარტიები, და შესაბამისად მთავრობები, მოქმედებენ ამომრჩევლის და არა ერთპიროვნული მმართველების ინტერესების შესაბამისად. ჩემი აზრით, დღეს ხალხის ინტერესი და საზოგადოებრივი დაკვეთა არის ქვეყნის მშვიდობიანი და სტაბილური განვითარება, რაც მიიღწევა ევროპული ინტეგრაციითა და პოზიტიური პოლიტიკური დღის წესრიგით. ჯერ კიდევ არის მცირეოდენი შანსი იმისა, რომ ხალხის რეალურ ინტერესს მოემსახუროს პოლიტიკური პროცესი. ჩემი, საქართველოს ერთი მოქალაქის, თხოვნაა, გამოიყენოთ ეს შანსი და საარჩევნო პროცესი მშვიდ და პოზიტიური რელსებზე დააბრუნოთ. ამით ყველა მოიგებს, და რაც მთავარია, ჩვენი ქვეყანა და საქართველოს თითოეული მოქალაქე, მიუხედავად პოლიტიკური განწყობებისა“. ნეტგაზეთი

26 არასამთავრობო ორგანიზაცია თბილისის მერის, კახა კალაძის გუშინდელ განცხადებას ეხმაურება და აღნიშნავს, რომ ხელისუფლების ანტიევროპული განცხადებები ქართველი ხალხის ნებას და საქართველოს კონსტიტუციას ეწინააღმდეგება. საუბარია გუშინ, 11 აპრილს, „ქართული ოცნების” მიერ გამოქვეყნებულ ფრაზაზე, სადაც კალაძე ამბობს, რომ „არც ერთი გაერთიანება არ მიღირს ჩემი ქვეყნისა და ხალხის ინტერესების დასათმობად”. ცნობისთვის, კალაძემ მსგავსი განცხადება დღესაც გაიმეორა. განცხადებას ხელს აწერენ: ადამიანის უფლებათა ცენტრი; დემოკრატიის კვლევის ინსტიტუტი; დემოკრატიის მცველები; ევროპის ფონდი; ეკონომიკური პოლიტიკის კვლევის ცენტრი; მიშგოვ ლარდა (ზემო სვანეთი); პარტნიორობა ადამიანის უფლებებისთვის; პლატფორმა სალამ; რეფორმებისა და კვლევის ჯგუფი (RRG); საბჭოთა წარსულის კვლევის ლაბორატორია; საერთაშორისო გამჭვირვალობა-საქართველო; სამოქალაქო იდეა; სამოქალაქო საზოგადოების ფონდი; სამოქალაქო ჩართულობისა და აქტივიზმის ცენტრი (CEAC); სასამართლოს გუშაგი; საფარი; საქართველოს დემოკრატიული ინიციატივა; საქართველოს მომავლის აკადემია; ქალთა ინიციატივების მხარდამჭერი ჯგუფი; ქალთა ფონდი საქართველოში; ყვარლის ევროკლუბი; წამების მსხვერპლთა ფსიქოსოციალური და სამედიცინო რეაბილიტაციის ცენტრი; იორმუღანლოს სათემო ცენტრი; თაობათა გაძლიერების ქსელი (GEN); წერტილი; Tbilisi Pride. პუბლიკა

“რა თქმა უნდა, არა! რუსულ კანონს არა! რუსეთისკენ არა!” – ამბობს ნეტგაზეთთან მთამსვლელი და სამთო გიდი ბიძინა გუჯაბიძე, როდესაც მას რუსულ კანონთან დაკავშირებით პოზიცია ვკითხეთ. “ამ წუთში რუსთან ურთიერთობაც კი წარმოუდგენელია ჩემთვის. მიუხედავად იმისა, რომ უამრავი მეგობარი მყავს, მათთანაც კი არ შემიძლია ახლა კონტაქტი. ასე [მსგავსი კანონპროექტით] დაიწყო რუსეთშიც და რა დღეშია ახლა რუსეთი, იცის ყველამ. იმედია, რომ იცის. ყოველ შემთხვევაში, ვისაც უნდა გაგება, მან იცის. ეს [რუსული კანონი] არის იარაღი, რომელსაც ჩვენი მთავრობა ისე მოიხმარს, როგორც უნდა. მთავრობა, რომელიც არის მატყუარა, არასანდო. მაგათგან გამოსული კარგი საქმე მე ჯერ, მართალი გითხრათ, არც მინახავს, თორემ ძალიან კმაყოფილი ვიქნებოდი, რაღაც კარგს რომ ვხედავდე”, – ამბობს ბიძინა გუჯაბიძე. ქართულმა ოცნებამ“ მიცემული პირობა ისევ დაარღვია და ე.წ. რუსულ კანონის ჩაგდებიდან ერთი წლის შემდეგ კანონპროექტი კვლავ დააბრუნა. კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის” სტატუსებს მიანიჭებს. კანონპროექტი ფრაქცია „ქართულმა ოცნებამ” 3 აპრილს დაარეგისტრირა და როგორც განმარტა, გასულ წელს „ხალხი ძალის“ მიერ ინიციირებული პროექტისგან განსხვავდება იმით, რომ ტერმინი „უცხოური გავლენის აგენტის“ ჩანაცვლებულია „უცხოური ძალის ინტერესების გამტარებლით“. ანალოგიური კანონის მიღებამ რუსეთში, ფაქტობრივად, გააქრო სამოქალაქო ორგანიზაციები და დამოუკიდებელი მედიასაშუალებები. რუსული კანონის ისევ დაინიციირებას უარყოფითად აფასებს საქართველოს ყველა საერთაშორისო პარტნიორი – აშშ, გაერო, ევროკავშირი, ცალკეული ევროპარლამენტარები, პარტნიორი ქვეყნების ლიდერები და ა.შ. კანონის მიღების საწინააღმდეგო მარში გაიმართა 9 აპრილს, რესპუბლიკის მოედნიდან პარლამენტის შენობამდე. ამავე თემაზე: რატომ დააბრუნა “ოცნებამ” “რუსული კანონი?” – შეფასებები ევროკავშირის ელჩი: ეს კანონი არც ევროპულია და არც ამერიკული „არ მინდა, ჩემს წიგნებს ეწეროს, რომ აგენტის დაწერილია“ – არჩილ ქიქოძე ვარლამ გოლეთიანი: მათი მიზანია, ყველას, ვინც ხმას იღებს, იარლიყი დაჰკიდონ და აგენტად მონიშნონ ნეტგაზეთი

პრეზიდენტს ლაზარე გრიგორიადისის შეწყალების თხოვნით მიმართეს – ოჯახის წევრებმა და ადვოკატებმა წერილი პრეზიდენტის ადმინისტრაციაში ცოტა ხნის წინ შეიტანეს. ადვოკატის ცნობით, პრეზიდენტის მრჩეველმა თავად ჩაიბარა განცხადება. დღეს რუსული კანონის გასაპროტესტებლად გამართული მარტის აქციების შემდეგ დაკავებული ლაზარე გრიგორიადისი ორივე მუხლში დამნაშავედ ცნეს და 9 წლით პატიმრობა მიუსაჯეს. ლაზარეს პატიმრობის ათვლა მისი დაკავების დღიდან დაიწყო. ის ერთი წლის წინ, 29 მარტს დააკავეს და ციხეში 8 წელს გაატარებს. ლაზარე გრიგორიადისის ოჯახმა შეწყალების თხოვნით პრეზიდენტს უნდა მიმართოს – გრიგორიადისი ორ სხვადასხვა საქმეზეა მსჯავრდებული, კერძოდ, 2023 წლის 25 სექტემბერს მას 1.5 წლით პატიმრობა მიესაჯა მამის დაჭრის საქმეზე. „ადამიანის უფლებათა სახლის“ იურისტი ალეკო ცქიტიშვილი „პუბლიკასთან“ საუბარში განმარტავს, რომ პრეზიდენტს შეუძლია, თავისი დისკრეციული უფლებამოსილების ფარგლებში გრიგორიადისი შეიწყალოს ორივე საქმეზე, ერთ-ერთზე ან მისჯილი წლები გაუნახევროს. პუბლიკა

რუსული კანონის გასაპროტესტებლად გამართული მარტის აქციების შემდეგ დაკავებული ლაზარე გრიგორიადისი ორივე მუხლში დამნაშავედ ცნეს და 9 წლით პატიმრობა მიუსაჯეს. რამდენიმეთვიანი სასამართლო პროცესის შემდეგ დასკვნითი სხდომა დღეს გაიმართა. მოსამართლე ზვიად შარაძემ გადაწყვეტილება რამდენიმე წუთის წინ გამოაცხადა. ლაზარეს პატიმრობის ათვლა მისი დაკავების დღიდან დაიწყო. ის ერთი წლის წინ, 29 მარტს დააკავეს. ის ციხეში 8 წელს გაატარებს. ლაზარე გრიგორიადისი 2023 წლის 29 მარტს დააკავეს. ის მარტში რუსული კანონის წინააღმდეგ აქციების დროს პოლიციელზე თავდასხმასა და პოლიციის მანქანის დაწვაში იყო ბრალდებული. მას 2023 წლის 25 სექტემბერს 1.5 წლით პატიმრობა მიუსაჯეს მამის დაჭრის საქმეზე, რომლის განხილვა სასამართლომ დაწყებიდან 2 წლის შემდეგ განაახლა. მარტის აქციების საქმეზე ლაზარეს დაკავებას წინ უძღოდა პრემიერ-მინისტრ ირაკლი ღარიბაშვილის ინტერვიუ, რომელშიც მან მარტის აქციებში მონაწილე ახალგაზრდებს „სატანისტები“ უწოდა. მოგვიანებით, მან ლაზარეს მიმართ გამოიყენა სიტყვა „ბინძური“ და განაცხადა, რომ მას „ვერავინ ვერ გამოიყვანს ციხიდან“. ხელისუფლების ლიდერებმა ლაზარეს არაერთხელ უწოდეს „ორიენტაციაარეული“. ირაკლი კობახიძე აცხადებდა, რომ მას „ყველანაირი ორიენტაცია აქვს არეული“. მარტის აქციების საქმეზე, ლაზარეს გარდა, დაკავებული იყო თორნიკე აკოფაშვილი, რომელსაც 19 ოქტომბერს 3 000 ლარის ოდენობით ჯარიმა და 2-წლიანი პირობითი მსჯავრი დაეკისრა. პუბლიკა

ახლა, ზუგდიდში “ნაც-მოძრაობა” და “ოცნება” ჩუმად მოლაპარაკებებს აწარმოებენ, რომ ჩვენი გუნდის წევრი, საკრებულოს თავმჯდომარე- გიგა ფარულავა გადაყენებული იქნას თანამდებობიდან. ანა ბუჩუკური, საპარლამენტო პოლიტიკური ჯგუფი “საქართველოსთვის” წევრი. ვიდეო: https://www.facebook.com/ForGeoGe/videos/774443551329804/

რას გულისხმობს ორი კანონპროექტი, რომლებიც აგენტების კანონის ალტერნატივად გახარიას გუნდმა წარადგინა

პრესისა და მედიის თავისუფლების ევროპული ცენტრი (ECPMF) თბილისში 8 აპრილს პარლამენტში ჟურნალისტების დაბლოკვის შესახებ წერს. რუსული კანონის განხილვისას ჟურნალისტების ნაწილი საკანონმდებლო ორგანოს შენობაში არ შეუშვეს, რაც საერთაშორისო ორგანიზაციამ მედიის თავისუფლების წინააღმდეგ მიმართულ ქმედებებს შორის შეყვანა. ECPMF ქართველ ჟურნალისტებზე დაყრდნობით წერს, რომ შესაბამისი საშვებისა და აკრედიტაციის მიუხედავად, პარლამენტის პრესსამსახურმა მათ ყოველგვარი ახსნის გარეშე უთხრა უარი შენობაში შესვლასა და იქ მუშაობაზე. საერთაშორისო ორგანიზაცია „პუბლიკის“ რედაქტორის, ლიკა ზაკაშვილის კომენტარს ციტირებს, რომ იმ მომენტში პარლამენტში განიხილებოდა „რუსული კანონი“, რომელიც მათ სერიოზულ შეშფოთებას იწვევს და გავლენას მოახდენს ქვეყნის მომავალზე. ECPMF ასევე წერს, მედიაომბუდსმენისა და მედიაკოალიციის მოწოდებებზე, რომ ჟურნალისტებს თავისუფლად მუშაობის საშუალება მიეცეთ და არ დაირღვეს მათი უფლებები. პუბლიკა

“ოცნების” ინიციატივა ზუგდიდის საკრებულოში, რომელიც არის მიმართული ზუგდიდის და ზუგდიდელების წინააღმდეგ საბოტაჟის განსახორციელებლად, როდესაც “ოცნება” “ნაციონალურ მოძრაობასთან” ერთად აპირებს ჩვენი პარტიის წარმომაგდენლის, საკრებულოს თავდჯდომარის იმპიჩმენტის პროცედურას, მათ ერთად დაიწყეს ამის განხორციელება. ჩვენი პოზიციონირება რეგიონებში, “ოცნებას” და “ნაციონალურ მოძრაობას” ყელში აქვთ გაჩხერილი. დღეს, ეს ორი პარტია არის ჩვენი ქვეყნის პრობლემა და მთავარი ამოცანა 2024 წლის არჩევნებზე უნდა იყოს, რომ ამ ორმა პარტიამ ერთად ვერ უნდა აიღონ 50%. ლევან გოგიჩაიშვილი, პარტია “ გახარია საქართველოსთვის” წევრი. ვიდეო: https://www.facebook.com/ForGeoGe/videos/1676329783110956/

ზუგდიდის საკრებულოში „ოცნება“ და „ნაციონალური მოძრაობა“ ერთად ცდილობენ, ზუგდიდის მოქალაქეებს საბოტაჟი მოუწყონ, საკრებულოს თავმჯდომარის, ჩვენი პარტიის წევრის იმპიჩმენტის ერთად გამოცხადებით - ეს არის კიდევ ერთი ფარული შეთანხმება ჩვენი და მოქალაქეების წინააღმდეგ, - ამის შესახებ პარტიის „გახარია საქართველოსთვის“ დეპუტატმა, ბექა ლილუაშვილმა ბრიფინგზე განაცხადა. მისივე თქმით, ეს პირდაპირ მიანიშნებს, რომ 2024 წლის საპარლამენტო არჩევნების შემდეგ, „ქართული ოცნება“ და „ერთიანი ნაციონალური მოძრაობა“ კოალიციას ერთმანეთსაც შეუკრავენ და ამიტომ ორივე 50%-ს ქვემოთ უნდა დარჩეს. გარდა ამისა, მან ბრიფინგზე „უცხოური გავლენის გამჭვირვალობის შესახებ“ კანონპროექტზე ისაუბრა და განაცხადა, რომ მისი გუნდის მიერ წარდგენილი კანონპროექტები რუსული გავლენების გამოაშკარავებას და რეალური მტრის აგენტების პასუხისგებაში მიცემას ახდენს და ასევე, გამჭვირვალობასაც უზრუნველყოფს, „თუმცა როგორც ჩანს, „ქართული ოცნება“ ამ ქვეყნის რეალურ მტრებს უფრთხილდება, ხოლო მეგობრებს გვამტერებს“. როგორც ლილუაშვილმა განაცხადა, საზოგადოება ამ დაპირისპირების გაღვივებას ივანიშვილს არ აპატიებს და ისეთივე განაჩენს გამოუტანს არჩევნებზე, როგორც სააკაშვილს გამოუტანა. „დღეს ჩვენ გვინდა ორ საკითხზე გავაკეთოთ განცხადება, ერთი შეეხება „ნაცების“ და „ქოცების“ მორიგ ფარულ შეთანხმებას, მეორე კი „რუსული კანონის“ თავიდან აცილების შესაძლებლობას. გუშინ საზოგადოებამ ნათლად დაინახა, თავის დროზე ბელადი სააკაშვილის, ახლა კი ბელადი ივანიშვილის პრომომუშაკის კალაძის სამარცხვინო საქციელი, რომ ყველაფერი დაიყვანოს „ნაცობამდე“ და „ქოცობამდე“. ივანიშვილის სურვილი და მიზანი ეს არის, რომ მოქალაქეებს ააკრას იარლიყები და ამით ერთმანეთთან დააპირისპიროს. ამის პარალელურად კი, ამ წამს ზუგდიდის საკრებულოში „ოცნება“ და „ნაციონალური მოძრაობა“ ერთად ცდილობენ მოუწყონ საბოტაჟი ზუგდიდის მოქალაქეებს - საკრებულოს თავმჯდომარის, ჩვენი პარტიის წევრის იმპიჩმენტის ერთად გამოცხადებით. ეს არის კიდევ ერთი ფარული შეთანხმება ჩვენი და მოქალაქეების წინააღმდეგ. შეგახსენებთ, „ნაციონალურმა მოძრაობამ“ და „ოცნებამ“ ერთად აირჩიეს მოსამართლეები იუსტიციის უმაღლეს საბჭოში. ერთად აკეთებდნენ კორუფციულ ფულს ქოლცენტრებში და ერთად არ დაუჭირეს მხარი საგამოძიებო კომისიის შექმნას. ეს პირდაპირ მიანიშნებს, რომ 2024 წლის საპარლამენტო არჩევნების შემდეგ ისინი ერთმანეთსაც შეუკრავენ კოალიციას - ამიტომ უნდა დარჩნენ ორივე 50%-ს ქვემოთ. რაც შეეხება „რუსულ კანონს“, ჩვენს გუნდს წარდგენილი აქვს ალტერნატიული კანონების პაკეტი. ჩვენი ალტერნატივა ახდენს რუსული გავლენების გამოაშკარავებას და რეალური მტრის აგენტების პასუხისგებაში მიცემას, ხოლო თუ გამჭვირვალობაზეა საუბარი, როგორც დღეს ევროკავშირის ელჩმა განაცხადა „ეს არ უნდა განხორციელდეს იმ ძალიან კარგი, ძალიან მნიშვნელოვანი და აუცილებელი სამუშაოს შეზღუდვის ხარჯზე, რომელსაც სამოქალაქო საზოგადოების ორგანიზაციები საქართველოს მოსახლეობის საკეთილდღეოდ ასრულებენ.“ რასაც ასევე უზრუნველყოფს სწორედ ჩვენი ალტერნატივა, მაგრამ, როგორც ჩანს „ოცნება“ ამ ქვეყნის რეალურ მტრებს უფრთხილდება, ხოლო მეგობრებს გვამტერებს. ამით, კლავს ქვეყნის ევროკავშირში გაწევრიანების შესაძლებლობას და აპირისპირებს მოქალაქეებს. საზოგადოება კი ამ დაპირისპირების გაღვივებას ივანიშვილს არ აპატიებს და ისეთივე განაჩენს გამოუტანს არჩევნებზე, როგორც სააკაშვილს გამოუტანა. არჩევნებამდე 7 თვეზე ნაკლები დარჩა!,“ - განაცხადა ლილუაშვილმა. იპნ

ერთი მხრივ “ოცნება” გამოდის და უღირსად, უტიფრად ეუბნება საკუთარ მოქალაქეებს, რომ თითქოს ისინი არიან ოჯახური ღირებულებების და ბავშვების დამცველები. საზოგადოებას გავახსენებ გუშინ როგორი უღირსი საქციელით გამოირჩეოდა სააკაშვილის და შემდეგ ივანიშვილის პრომო ბიჭუნა - კალაძე. ბავშვის ფოტო ვერ გაუტარეს და ვერ აპატიეს ნაკრების ერთ-ერთ მთავარ გმირს - ქოჩორაშვილს და მამამისს მიაყენეს შეურაცხყოფა, მხოლოდ იმიტომ, რომ ჩვენს გუნდშია. ამ ყველაფერ უღირსობას აქვს ერთი მიზანი - ადამიანების დაპირისპირება, “ნაცებად” და “ქოცებად” მათი დაყოფა და ასე გასვლა არჩევნებზე. ანა ბუჩუკური, საპარლამენტო პოლიტიკური ჯგუფი “საქართველოსთვის” წევრი. ვიდეო: https://www.facebook.com/ForGeoGe/videos/1163871388357454/

თბილისი ყოველთვის იქნება თავისუფალი, ხელოვნება ყოველთვის იქნება თავისუფალი, საქართველო ყოველთვის ევროპული იქნება, - ამის შესახებ საქართველოს პრეზიდენტმა, სალომე ზურაბიშვილმა თბილისის თანამედროვე ხელოვნების ბაზრობის გახსნაზე სიტყვით გამოსვლისას განაცხადა. მისივე თქმით, არ არსებობს ხელოვნება და კულტურა იქ, სადაც თავისუფლება არ არის. „ვიტყოდი, რომ დღევანდელი საქართველოსთვის ეს თავისუფლების ნიავი, რომელიც აქ სუფევს, არის ძალიან მნიშვნელოვანი. კულტურა არის სხვა არაფერი, თუ არა დიდი თავისუფლება. არ არსებობს ხელოვნება, კულტურა იქ, სადაც თავისუფლება არ არსებობს. მინდა ყველას მოგილოცოთ დღევანდელი დღე, დღევანდელი თავისუფლება და მე ვიცი, რომ თბილისი ყოველთვის იქნება მასპინძელი ასეთი არაჩვეულებრივი ღონისძიებების. იმიტომ, რომ თბილისი ყოველთვის იქნება თავისუფალი, ხელოვნება ყოველთვის იქნება თავისუფალი და საქართველო ყოველთვის იქნება ევროპული”, - განაცხადა პრეზიდენტმა. იპნ

ტყუილებში ჩაკარგული "ოცნება" მიზანმიმართულად და პრიმიტიულად ცდილობს საზოგადოების დაყოფას "ნაცებად" და "ქოცებად" ყველა სფეროში - სპორტი, კულტურა, განათლება და ა.შ. ბექა ლილუაშვილი, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/835501178594272/

USAID-ის ხელმძღვანელის, სამანტა პაუერის განცხადებით, "უცხოელი აგენტის" შესახებ კანონის ადგილი, ევროპაში არ არის და გამოცდილება აჩვენებს, რომ ამგვარ კანონებს გავლენა აქვს კორუფციისადმი ანგარიშვალდებულებასა და სიტყვის თავისუფლებაზე. სენატის წინაშე სააგენტოს წლიური ბიუჯეტსა და პრიორიტეტებზე საუბრისას სამანტა პაუერს სენატის საგარეო ურთიერთობათა კომიტეტის წევრმა, სენატორმა ჯინ შაჰინმა ჰკითხა: რა გავლენა შეიძლება ჰქონდეს საქართველოში შეერთებული შტატების მიერ დაფინანსებული სამოქალაქო ორგანიზაციების მომავალზე ე.წ. "უცხოეთის აგენტის" შესახებ კანონს, თუკი მას პარლამენტი დაამტკიცებს. "ჩვენ ვიხილეთ, რომ რუსეთის უცხოეთის აგენტის კანონის კოპირებული ვერსიები მრავალ ადგილზე ჩნდება და მის შედეგები არის ნაკლები ანგარიშვალდებულება კორუფციაზე და სიტყვის თავისუფლების შეზღუდვა. რა თქმა უნდა, საქართველო ახლა დგას, ან ჩანს თითქოს დგას ევროპისკენ მიმავალ გზაზე და ამ ამბიციების გარკვეული აღიარება ცოტა ხნის წინ მიიღო. ფუნდამენტურად, უცხოური აგენტის მსგავსი კანონის ადგილი ევროპაში არ არის. ადამიანის უფლებები და დემოკრატიული პრინციპები უნდა იყოს არა მხოლოდ აღიარებული, არამედ ასევე - დაცულიც", - განაცხადა სამანტა პაუერმა სენატორ შაჰინის კითხვაზე პასუხად, რომლის განცხადების თარგმანსაც "ამერიკის ხმის" ქართული რედაქცია ავრცელებს. იპნ

ახლა ცხრა ნაბიჯის შესრულებისა და იმ გადაწყვეტილებებისთვის თავის არიდების დროა, რომელთაც ევროკავშირისკენ გზაზე ხელის შეშლა შეუძლიათ, - ამის შესახებ ევროკავშირის პოლიტიკისა და უსაფრთხოების საბჭოს (PSC) დელეგაციის განცხადებაშია ნათქვამი. განცხადებაში PSC-ის წევრები აღნიშნავენ, რომ ევროკავშირში გაწევრიანება დამსახურებაზე დაფუძნებული პროცესია და საქართველოს ოფიციალური პირებს ამ მიზნის მისაღწევად საჭირო ნაბიჯების შესრულებისთვის იწვევენ. ამასთან, განცხადებაში ნათქვამია, რომ ევროკომისიის 2023 წლის 8 ნოემბრის რეკომენდაციები არის მკაფიო სახელმძღვანელო. „საჭირო რეფორმები და პროგრესი დაყოვნების გარეშე და მთლიანი საზოგადოების ჩართულობით უნდა იქნას შესრულებული - მთავრობის, ყველა პოლიტიკური პარტიისა და სამოქალაქო საზოგადოების ჩართულობით. ბევრი დრო არ არის. ახლა ცხრა ნაბიჯის შესრულებისა და იმ გადაწყვეტილებებისთვის თავის არიდების დროა, რომლებსაც ევროკავშირისკენ გზაზე ხელის შეშლა შეუძლიათ. შეშფოთებები, რომლებიც ბოლო დროის ზოგიერთ ინიციატივასთან დაკავშირებით არსებობს, მათ შორის "უცხოური გავლენის გამჭვირვალობაზე" კანონპროექტთან, საქართველოს ოფიციალურ პირებთან იქნა განხილული, ევროკავშირის უმაღლესი წარმომადგენლის სპიკერის 2024 წლის 4 აპრილის განცხადებაზე დაყრდნობით. ევროკავშირმა ხაზი გაუსვა მის ღირებულებებს, რომლებიც ქარტიაშია ასახული”, - ნათქვამია განცხადებაში. განცხადების თანახმად, PSC-ის წევრებმა საქართველოს ოფიციალურ პირებს მოუწოდეს, მომენტით ისარგებლონ, მათ შორის 2024 წლის 26 ოქტომბერს მომავალი საპარლამენტო არჩევნების ფონზე. ამ კონტექსტში, ევროკავშირი მიესალმება საქართველოს მთავრობის გადაწყვეტილებას მოიწვიოს ODIHR-ის დამკვირვებლები. ასევე ევროკავშირი აღნიშნავს თავისუფალი და სამართლიანი არჩევნების მნიშვნელობას და საუბრობს ODIHR-ისა და ვენეციის კომისიის მიერ საარჩევნო კოდექსთან დაკავშირებული შესწორებების განხორციელების მნიშვნელობაზე. როგორც ცნობილია, ევროკავშირის პოლიტიკისა და უსაფრთხოების საბჭოს (PSC) წევრები სამუშაო ვიზიტით საქართველოში იმყოფებიან. დელეგაცია, რომელსაც PSC-ის თავმჯდომარე ელჩი დელფინე პრონკი ხელმძღვანელობს, შეხვდა პრეზიდენტ სალომე ზურაბიშვილს, პრემიერ-მინისტრ ირაკლი კობახიძეს, საგარეო საქმეთა მინისტრ ილია დარჩიაშვილს, თავდაცვის მინისტრ ირაკლი ჩიქოვანს, საპარლამენტო უმრავლესობისა და ოპოზიციის წარმომადგენლებს, ისევე როგორც სამოქალაქო საზოგადოების წარმომადგენლებს. IPN