tvati

გერმანიის სოციალურ–დემოკრატიული (SPD) პარტიის განცხადებით, რუსული კანონის გამო, როგორც პარტია ამბობს, ე.წ აგენტების კანონის გამო, შესაძლოა, საქართველომ უსაფრთხო ქვეყნის სტატუსი დაკარგოს. SPD-ის თანახმად, ეს საკამათო კანონია და საქართველომ შესაძლოა კვლავ დაკარგოს „უსაფრთხო წარმოშობის ქვეყნის“ სტატუსი”. ცნობისთვის, საქართველომ უსაფრთხო ქვეყნის სტატუსი გასული წლის ბოლოს მოლდოვასთან ერთად აღიდგინა. „გერმანიის მთავრობა ყურადღებით აკვირდება საქართველოში არსებულ პოლიტიკური სიტუაციის განვითარებას და ამოწმებს, თუ რამდენად არის უსაფრთხო ქვეყნის პირობები დაკმაყოფილებული”, – თქვა SPD-ის დეპუტატმა ჰელგე ლინდმა. მისი თქმით, თუ საქართველოს მოსახლეობა პოლიტიკური დევნის საშიშროების წინაშე დგას, ამას „შესაბამისი შედეგებიც მოჰყვება”. გამოცემა Stern წერს, რომ საქართველო მიზნად ისახავს ევროკავშირში გაწევრიანებას და ქვეყანა დეკემბრიდან არის ევროკავშირის წევრობის ოფიციალური კანდიდატი. „თუმცა, თბილისის მთავრობის მიერ საკამათო შემოთავაზებული კანონი კვირების განმავლობაში იწვევს დაძაბულობას. ეგრეთ წოდებული აგენტების აქტი ადგენს, რომ ორგანიზაციები, რომლებიც იღებენ დაფინანსების მინიმუმ 20 პროცენტს საზღვარგარეთიდან, უნდა დარეგისტრირდნენ”. სტატიაში საუბარია იმაზეც, რომ კრიტიკოსები პარალელებს ხედავენ რუსეთში „უცხოური აგენტების“ წინააღმდეგ კანონთან, რომელიც საშუალებას აძლევს იქაურ ხელისუფლებას განახორციელოს მასიური ზომები კრიტიკული მედიისა და ორგანიზაციების წინააღმდეგ. ნათქვამია ისიც, რომ ევროკავშირმა მოუწოდა საქართველოს მთავრობას გაეწვია კანონი. პუბლიკა

„ქართულმა ოცნებამ” რუსული კანონის საწინააღმდეგო აქციების კონტრაქციის ჩატარება დააანონსა. ამის შესახებ საუბარია მმართველი პარტიის მიერ გავრცელებულ ვრცელ პოსტში, სადაც „ოცნება” კვლავ ამტკიცებს, რომ კანონის მოწინააღმდეგე მოქალაქეების რაოდენობა „მცირეა” და ისინი „რადიკალური ოპოზიციის” მიერ არიან შეცდომაში შეყვანილი.

ამერიკის შეერთებული შტატების „დემოკრატი“ სენატორი, რიჩარდ ბლუმენტალი წარმომადგენელთა პალატის მიერ უკრაინის, ისრაელისა და ტაივანისთვის საგარეო დახმარების დამტკიცებას მიესალმება და აცხადებს, რომ ეს არის გზავნილი მსოფლიო დიქტატორებისთვის. „ვფიქრობ, ამერიკა კვლავ შეტევაზეა და ეს იმის ნიშანია, რომ ჩვენ შეგვიძლია გავერთიანდეთ ორპარტიულად ჩვენი ეროვნული უსაფრთხოებისთვის და გავუგზავნოთ გზავნილი ვლადიმერ პუტინს, სი ძინპინს, მსოფლიოს დიქტატორებს - ჯერ ადრეა შამპანურის გახსნა, ამერიკა დემოკრატიის დაცვას აპირებს“, - აღნიშნა სენატორმა. მისი თქმით, შეერთებულ შტატებს შეუძლია თავისი მოკავშირეების დაცვა. "ჩვენ შეგვიძლია ვაწარმოოთ საჭირო საარტილერიო ჭურვები, შორ მანძილზე მოქმედი არტილერია, დარტყმის იარაღი. ჩვენ ასევე შეგვიძლია გამოვიყენოთ სანქციები, მოვახდინოთ რუსული აქტივების კონფისკაცია, რათა მეტი რესურსი მივაწოდოთ უკრაინას", - განაცხადა სენატორმა. შეგახსენებთ, შეერთებული შტატების წარმომადგენელთა პალატამ საკანონმდებლო პაკეტი მიიღო, რომელიც უკრაინის, ისრაელისა და ტაივანის უსაფრთხოების მხარდასაჭერად 95 მილიარდი აშშ დოლარის გამოყოფას ითვალისწინებს. იპნ

ეპიზოდი #12 - გახარია: „ოცნების“ წევრები დღეს ფილიპე მახარაძის და სერგო ორჯონიკიძის როლს ასრულებენ

311 ხმა 112-ის წინააღმდეგ – რამდენიმე თვიანი განხილვისა და დებატების შემდეგ წარმომადგენელთა პალატამ მხარი დაუჭირა უკრაინისთვის 61 მილიარდი დოლარის სამხედრო დახმარების გამოყოფას. პალატაში გადაწყვეტილებას აპლოდისმენტებით შეხვდნენ, ზოგიერთმა მათგანმა უკრაინის დროშები ააფრიალა. უკრაინის პრეზიდენტმა მადლობა გადაუხადა აშშ-ის წარმომადგენელთა პალატას და აღნიშნა: „დემოკრატიას და თავისუფლებას ყოველთვის ექნება გლობალური მნიშვნელობა და არასოდეს დამარცხდება, სანამ ამერიკა მის დაცვაში დაეხმარება. აშშ-ს სასიცოცხლო მნიშვნელობის კანონპროექტი, რომელიც დღეს მიიღო პალატამ, ხელს შეუშლის ომის გაფართოებას, გადაარჩენს ათასობით სიცოცხლეს და დაეხმარება ჩვენს ორივე ერს გაძლიერებაში“, – განაცხადა ზელენსკიმ. უკრაინისთვის ამ დახმარების გამოყოფა რამდენიმე თვით გაჭიანურდა რესპუბლიკური პარტიის მოსაზრებების გამო. BBC-ის ცნობით, უკრაინელ ჯარისკაცებს საბრძოლო მასალის დეფიციტის გამო ჭურვების გამოზოგვა უწევთ 1200 კილომეტრზე მეტი სიგრძის ფრონტის ხაზზე. იპნ

ლიეტუველი ევროპარლამენტარი, ანდრიუს კუბილიუსი აცხადებს, რომ “ქართული ოცნება” ცდილობს რუსული სტილის კანონის მიღებას, მაშინ როცა ქართველი ხალხი პროევროპულადაა განწყობილი და რუსულ კანონს დემონსტრაციებით უპირისპირდება. ასე გამოეხმაურა ევროპარლამენტარი მმართველი პარტიის თავმჯდომარის, ირაკლი ღარიბაშვილის განცხადებას იმის შესახებ, რომ საქართველო, ამ ეტაპზე, არ არის მზად ევროინტეგრაციისთვის. “დეკემბერში ღარიბაშვილმა იზეიმა ევროკავშირის წევრობის კანდიდატის სტატუსის მიღება და ამას გამარჯვება უწოდა. 4 თვის შემდეგ ის ამბობს, რომ საქართველო არ არის მზად [ევროკავშირის წევრობისთვის]. კონკრეტულად ვინ არ არის მზად, ქართველი ხალხი თუ პარტია “ქართული ოცნება”? პასუხი ნათელია: “ქართული ოცნება” ცდილობს რუსული სტილის კანონების მიღებას მაშინ, როცა პროევროპელი ხალხი ამას ქუჩაში აპროტესტებს”, – დაწერა კუბილიუსმა პლატფორმა X-ზე. ყოფილმა პრემიერ-მინისტრმა, ირაკლი ღარიბაშვილმა გუშინ, 20 აპრილს, განაცხადა რომ საქართველო ევროკავშირში გაწევრიანებისთვის ჯერ მზად არ არის. ასე უპასუხა მან კითხვას, ხომ არ უშლის ხელს ქვეყნის ევროინტეგრაციას მმართველი პარტიის მიერ რუსული კანონის მიღების მცდელობა. ღარიბაშვილის ამბობს, რომ როცა ქვეყანა მზად იქნება ევროინტეგრაციისთვის “ძალიან მარტივად, შეიძლება ამ კანონის გაუქმებაც, გადახედვა, შეცვლა, ახლის მიღება”. “საუბარია იმაზე, რომ ამ [რუსული კანონის] მიღებით, რაღაც შეიძლება შეიცვალოს და იქნება შემაფერხებელი ბარიერი [ევროინტეგრაციისთვის]. ჯერ საერთოდ, ვთქვათ ისიც, რომ ქვეყანამ მიაღწია მაქსიმუმს. პიკი იყო შარშანდელი დეკემბერი. დეკემბერში ჩვენ გავხდით კანდიდატი ქვეყანა. შემდეგი ეტაპი, ეს არის უკვე გაწევრიანება. დღეს ქვეყანა ვერ გახდება … დღეს არ ვართ მზად, რომ გავხდეთ წევრი ქვეყანა. ხომ ასეა? ხომ მეთანხმებით? არ არის დღეს კონსენსუსი ამაზე, რომ დღესვე შეიძლება გახდეს ქვეყანა ევროკავშირის წევრი. მით უმეტეს, ამდენი პრობლემებია და იცით, რომ დრო დასჭირდება ამას. დღეს არ არის ევროკავშირი მზად გაფართოებისთვის და ამას დრო დასჭირდება. ბევრ ფაქტორზეა დამოკიდებული შემდეგი ნაბიჯები. იმ დროისთვის, როცა ქვეყანა იქნება მზად და გვეტყვიან, რომ ხვალვე გახდებით ევროკავშირის წევრი ქვეყანა, ძალიან მარტივად, შეიძლება ამ კანონის გაუქმებაც, გადახედვა, შეცვლა, ახლის მიღება … ასე რომ, ნუ ნერვიულობთ”, – განაცხადა ღარიბაშვილმა. 2023 წლის 7-9 მარტის მოვლენების შემდეგ, როცა ფართომასშტაბიანი საპროტესტო აქციების გამო “ქართულმა ოცნებამ” თავისივე მხარდაჭერილი კანონპროექტი ჩააგდო, პირობაც დადო, რომ რუსულ კანონი დღის წესრიგში აღარასდროს დაბრუნდებოდა. მმართველმა პარტიამ ეს პირობა ერთ წელში დაარღვია და 2024 წლის აპრილში იგივე კანონი, განსხვავებული სახელწოდებით, კვლავ დააინიციირა. ყველა საერთაშორისო პარტნიორის კრიტიკისა და ქვეყნის შიგნით, მოქალაქეთა პროტესტის მიუხედავად, 17 აპრილს, საპარლამენტო უმრავლესობამ კანონი პირველი მოსმენით მიიღო. ერთ კვირაზე მეტია მოქალაქეები პარლამენტის შენობასთან რუსული კანონის გასაპროტესტებლად იკრიბებიან და მრავალათასიან აქციებს აწყობენ. აქცია დაგეგმილია დღესაც, 21 აპრილსაც, 19:00 საათზე. რუსული კანონი გრანტის მიმღებ ორგანიზაციებს — “უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, “უცხოური ძალის” სტატუსებს მიანიჭებს. მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლეთისგან. ნეტგაზეთი

სახელმწიფო უსაფრთხოების სამსახური „ტელეგრამში“ ტერორიზმთან დაკავშირებული ინფორმაციის გავრცელების საქმეზე განცხადებას ავრცელებს. როგორც სუს-ის მიერ გავრცელებულ განცხადებაშია ნათქვამი, სახელმწიფო უსაფრთხოების სამსახურის კონტრტერორისტული დანაყოფების მიერ მთელი ღამის განმავლობაში მიმდინარეობდა შესაბამისი ოპერატიულ-საგამოძიებო მოქმედებები. სპეციალური კონტრტერორისტული ღონისძიებების შედეგად რაიმე სახის ასაფეთქებელი ნივთიერება ან მოწყობილობა აღმოჩენილი არ ყოფილა. „მიმდინარე წლის 21 აპრილს, სოციალურ ქსელებში, კერძოდ ინტერნეტ აპლიკაცია „ტელეგრამში“ გავრცელებულ ინფორმაციასთან დაკავშირებით, თბილისის მასშტაბით საგანმანათლებლო დაწესებულებებსა და სავაჭრო ცენტრებში შესაძლო ასაფეთქებელი მოწყობილობების განთავსებისა და მოსალოდნელი თავდასხმების შესახებ მუქარის ფაქტებზე, სახელმწიფო უსაფრთხოების სამსახურის კონტრტერორისტული დანაყოფების მიერ მთელი ღამის განმავლობაში მიმდინარეობდა შესაბამისი ოპერატიულ-საგამოძიებო მოქმედებები. სპეციალური კონტრტერორისტული ღონისძიებების შედეგად რაიმე სახის ასაფეთქებელი ნივთიერება ან მოწყობილობა აღმოჩენილი არ ყოფილა“, - ნათქვამია განცხადებაში. იპნ

საქართველოს განათლების, მეცნიერებისა და ახალგაზრდობის სამინისტროს განცხადებით, უწყებას „ტელეგრამში“ გავრცელებულ ინფორმაციასთან დაკავშირებით სწავლის შეწყვეტის გადაწყვეტილება არ მიუღია. როგორც სამინისტროში „ინტერპრესნიუსს“ განუცხადეს, სკოლებში ყველა საჭირო ღონისძიება ტარდება. „სწავლა ოფიციალურად არ შეწყვეტილა, სკოლებში ყველა საჭირო ღონისძიება ტარდება“,- აცხადებენ უწყებაში. ცნობისთვის, სოციალურ ქსელებში გავრცელებული ინფორმაციით, ახლადშექმნილ რუსულენოვან „ტელეგრამ“ არხზე თბილისის სკოლებზე ტერაქტების თაობაზე მუქარის შემცველი ინფორმაცია გავრცელდა. ამასთან, სახელმწიფო უსაფრთხოების სამსახურის ინფორმაციით, სახელმწიფო უსაფრთხოების სამსახურის კონტრტერორისტული დანაყოფების მიერ მთელი ღამის განმავლობაში მიმდინარეობდა შესაბამისი ოპერატიულ-საგამოძიებო მოქმედებები. სპეციალური კონტრტერორისტული ღონისძიებების შედეგად რაიმე სახის ასაფეთქებელი ნივთიერება ან მოწყობილობა აღმოჩენილი არ ყოფილა. იპნ

ესტონეთის დედაქალაქ ტალინში მცხოვრებმა ქართველებმა რუსული კანონის წინააღმდეგ 20 აპრილს საპროტესტო აქცია გამართეს. როგორც ისინი მიიჩნევენ, აღნიშნული კანონის მიღება საფრთხეს შეუქმნის საქართველოს ევროპულ მომავალს. მსგავსი საპროტესტო აქციები ემიგრანტებმა და სტუდენტებმა მსოფლიოს არაერთ ქალაქში გამართეს, მათ შორის, ლონდონში, ბერლინში, დუბლინში, აშშ-ის შტატ ფლორიდაში და ა.შ. ნეტგაზეთი

ქალთა ორგანიზაცია “საქართველოსთვის" თბილისში, ქუთაისში და ახმეტაში ქალების მოძრაობის მიერ ორგანიზებულ ქალების მარშს შეუერთდა: |

ვინც ამ ქვეყანაში ევროპულ გზას უშლის ხელს, ისინი არიან რუსები, რუსულ საქმეს აკეთებენ და ამ ქვეყანაში რუსული საქმის კეთება არის დასჯადი, პერსონალურ პასუხისმგებლობას ვერავინ გაექცევა. ლევან გოგიჩაიშვილი, პარტია “საქართველოსთვის” წევრი. ვიდეო: https://www.facebook.com/ForGeoGe/videos/798651692211095/

საქართველოს ხელისუფლება, მისი მმართველი პარტია „ქართული ოცნება“ და მათი ნათლია ივანიშვილი ნამდვილად არასწორ გზაზე დგანან, - ამის შესახებ ევროპარლამენტარი, მაიკლ გალერი სოციალურ ქსელ X-ში წერს. ევროპარლამენტარის თქმით, საზოგადოებას მომავალ არჩევნებზე შანსი აქვს. „საკმაოდ დარწმუნებული ვარ, რომ საზოგადოებას, რომელიც საპროტესტო აქციებს მართავს, აქვს შანსი, გააერთიანოს ძალები და მოაწყოს სანდო პროევროპული ალტერნატივა მომავალი არჩევნებისთვის!“, - წერს ევროპარლამენტარი გალერი. იპნ

„უცხოური გავლენის გამჭვირვალობის შესახებ“ კანონპროექტის წინააღმდეგ პროტესტი გრძელდება. ახალგაზრდები საპროტესტო აქციას დღესაც გეგმავენ, ისინი პარლამენტის შენობასთან კვლავ 19:00 საათზე შეიკრიბებიან. აქციის მონაწილეების ინფორმაციით, ასევე იგეგმება მსვლელობა, თუმცა მომიტინგეები ლოკაციებს წინასწარ არ ასახელებენ. თბილისში, „ქართული ოცნების“ ინიცირებული „უცხოური გავლენის გამჭვირვალობის შესახებ“ კანონპროექტის წინააღმდეგ აქციები - „არა რუსულ კანონს“ 15 აპრილიდან დაიწყო, მას შემდეგ, რაც პარლამენტის იურიდიულ საკითხთა კომიტეტმა კანონპროექტის განხილვა დაიწყო. კანონპროექტი საქართველოს პარლამენტმა პროტესტისა და კრიტიკის ფონზე პირველი მოსმენით 17 აპრილს მიიღო. იპნ

თბილისის ივანე ჯავახიშვილის სახელმწიფო უნივერსიტეტის სტუდენტ ნიკო მანაგაძეს ფიზიკურად გაუსწორდნენ მას შემდეგ, რაც პრემიერ-მინისტრ ირაკლი კობახიძეს „რუსეთის მონა“ დაუძახა. დღეს, 20 აპრილს, მაშინ, როცა ირაკლი კობახიძე უნივერსიტეტის შენობას დაცვის თანხლებით ტოვებდა, მას მიუახლოვდა ნიკო მანაგაძე და მიმართა: „ბატონო რუსეთის მონავ, შეგვხვდებით სტუდენტებს?“ ტელეარხების კადრებში ჩანს, რომ კობახიძის დაცვა სტუდნეტს მიახლოების საშუალებას არ აძლევს და გვერდით გაჰყავთ, მის მიმართულებით კი ახალგაზრდების ჯგუფი მოძრაობას, კობახიძე კი მანქანის მიმართულებით მიდის. ამ დროს ფონად ისმის ხმაური. როგორც სტუდენტი ნიკო მანაგაძე „მთავარ არხთან“ იხსენებს, სწორედ ამ დროს სცემეს, რასაც თავად კობახიძეც უყურებდა. „როცა კობახიძე უნივერსიტეტიდან გამოდიოდა, მასთან მივედი და ვუსვამდი კითხვას, შეგვხვდებოდა თუ არა სტუდენტებს. შემდეგ მომვარდა 10-15-კაციანი ჯგუფი, რომელიც მუდმივად დაყვება კობახიძეს, რათა ფიზიკურად გაუსწორდეს ნებისმიერ ადამიანს, ვინც მასთან ახლოს მივა და რაიმე კრიტიკულ შეკითხვას დაუსვამს. იმის მიუხედავად, რომ კობახიძემ ეს დაინახა საკუთარი თვალით, არანაირი რეაგირება არ ჰქონია — გაიღიმა, დააქნია ხელი, ჩაჯდა მანქანაში და წავიდა,“ — ამბობს მანაგაძე. მას დაზიანება თვალის არეში ეტყობა. ნეტგაზეთი

საქართველოს წიგნის გამომცემელთა და გამავრცელებელთა ასოციაცია ეხმიანება საქართველოში მიმდინარე მასშტაბურ სამოქალაქო პროტესტს რუსული კანონის წინააღმდეგ. „მოვუწოდებთ საქართველოს ხელისუფლების წარმომადგენლებს, საკანონმდებლო ინიციატივების განხილვისას დაეყრდნონ ევროინტეგრაციის გაცხადებულ კურსს და საერთაშორისო ვალდებულებებს. დაუშვებლად მიგვაჩნია იმ კანონის მიღება, რომლის გაწვევისკენ მოგვიწოდებენ თავისუფალი, ცივილიზებული სამყაროს წევრი ქვეყნები და დემოკრატიული საერთაშორისო ორგანიზაციები, ანუ სწორედ ის სახელმწიფოები და ინსტიტუტები, ვისაც საქართველოს მოსახლეობის უდიდესი უმრავლესობა თავის მომავალს უკავშირებს. მოვითხოვთ, რომ მთავრობამ ზედმიწევნით დაიცვას გამოხატვის თავისუფლება და უზრუნველყოს დემონსტრანტების უსაფრთხოება“, – აღნიშნულია განცხადებაში. ასოციაციის განცხადებით, შექმნილ დაძაბულ ვითარებაში, როცა დედაქალაქის მთავარ გამზირზე ყოველდღიურად იკრიბება ათიათასობით ადამიანი, არ უნდა დავუშვათ სიტუაციის ესკალაცია. „წარსულის გამოცდილების გათვალისწინებით უნდა გვახსოვდეს, რომ საზოგადოების კონსოლიდაცია რუსეთის დამპყრობლურ პოლიტიკასთან ეფექტიანი ბრძოლის აუცილებელი პირობაა“. „ჩვენი მიზანია, საქართველო ცივილიზებული მსოფლიოს განუყოფელი ნაწილი გახდეს. დღესაც და მომავალშიც, ნებისმიერი ხელისუფლება მხოლოდ ამ მიზნის შესაბამისად უნდა მოქმედებდეს“, – ვკითხულობთ განცხადებაში. პუბლიკა

დღეს საქართველოს 9 ქალაქში ანტირუსული საპროტესტო აქციები გაიმართება. თბილისში, ქუთაისში, გორში, მარნეულში, ახმეტაში, ბოლნისში, ბათუმში, ოზურგეთსა და წნორში 17:00 საათზე ქალთა მარში დაიწყება რუსული კანონის წინააღმდეგ. 19:00 საათზე კი თბილისში ასევე დაგეგმილია ახალგაზრდების მორიგი აქცია. ახალგაზრდები რუსთაველის გამზირზე გუშინაც შეიკრიბნენ, მათ მსვლელობა გამართეს და გმირთა მოედანთან ფიცი დადეს. მსვლელობის დროს პარალეიზებული იყო თბილისის ცენტრალური ქუჩები. პუბლიკა

სომხეთი და აზერბაიჯანი ქვეყნებს შორის სახელმწიფო საზღვრის დემარკაციაზე შეთანხმდნენ. მედიის ინფორმაციით, ოფიციალური ერევანი ბაქოს ოთხ სოფელს დაუბრუნებს, რომლებსაც სომხეთი 1990-იანი წლების კონფლიქტის შემდეგ აკონტროლებდა. საუბარია სოფლებზე - ბაღანის აირუმი, აშაღი-ასქიფარა, ხეირიმლი და ყიზილჰაჯილი, რომლებიც ქვეყნებს შორის კონფლიქტის გამო ბოლო წლებში მიტოვებული იყო. აზერბაიჯანის საგარეო საქმეთა სამინისტროში აღნიშნულ ფაქტს ისტორიულ მოვლენად აფასებენ. მედიის ცნობით, მხარეები ასევე შეთანხმდნენ, უახლოეს მომავალში აღნიშნული მონაკვეთებიდან სამხედროები გაიყვანონ და იქ სასაზღვრო სამსახური განათავსონ. იპნ

ნიუ-იორკის სასამართლოსთან, სადაც დონალდ ტრამპის სასამართლო პროცესი მიმდინარეობს, მამაკაცმა თავი დაიწვა. ამის შესახებ ინფორმაციას სააგენტო Reuters-ი ავრცელებს. ნიუ-იორკის პოლიციის დეპარტამენტმა განაცხადა, რომ მამაკაცი, რომელმაც სასამართლოს შენობის წინ თავი დაიწვა, იდენტიფიცირებულია, როგორც მაქს აზარელო და იგი ფლორიდის შტატიდან არის. აზარელო საავადმყოფოში გადაყვანიდან რამდენიმე საათში გარდაიცვალა. პოლიციის ცნობით, მამაკაცის სამიზნეს აშშ-ის ყოფილი პრეზიდენტი, დონალდ ტრამპი ან სასამართლო პროცესში მონაწილე სხვა პირები არ წარმოადგენდნენ. პოლიციის დეპარტამენტის კომისრის მოადგილემ, ტარიკ შეპარდმა აღნიშნა, რომ პოლიცია მამაკაცს შეთქმულების თეორიების მომხრედ განიხილავს. მამაკაცმა ინტერნეტში მანიფესტი დატოვა, რომელშიც მეგობრებს ბოდიში მოუხადა. გამოქვეყნებულ პოსტში აზარელო „აპოკალიფსური ფაშისტური გადატრიალების“ შესახებ საუბრობს, კრიპტოვალუტას და ამერიკელ პოლიტიკოსებს აკრიტიკებს, თუმცა კონკრეტულად დონალდ ტრამპს არ გამოყოფს. იპნ

როგორც კანდიდატი ქვეყანა, საქართველო ისეთ ნაბიჯებზე უნდა ფოკუსირდეს, რომლებიც ევროკავშირთან დააახლოებს და არა დააშორებს, - ამის შესახებ ესტონეთის პრემიერ-მინისტრი კაია კალასი „ტვიტერის“ პირად გვერდზე წერს. „მივესალმე საქართველოს ახალ ელჩს ზურაბ ხამაშურიძეს. შევთანხმდით, რომ უკრაინის მხარდაჭერა მნიშვნელოვანია ორივე ჩვენი ქვეყნისთვის. ესტონეთი მხარს უჭერს საქართველოს ევროატლანტიკურ გზას. როგორც ევროკავშირის კანდიდატი ქვეყანა, ფოკუსი ისეთ ნაბიჯებზე უნდა იყოს, რომლებიც საქართველოს ევროკავშირთან დააახლოებს, და არა დააშორებს“, - წერს კალასი. იპნ

ჩოხატაურის #1 საჯარო სკოლის მოსწავლე მარიამ ხუხუნაიშვილი ბრიტანულ-ქართულ აკადემიაში 100%-იანი გრანტით ისწავლის. ამის შესახებ შეტყობინება მარიამის მშობლებმა რამდენიმე დღის წინ მიიღეს. “ძვირფასო მშობლებო! სიამოვნებით გაცნობებთ, რომ თქვენმა შვილმა წარმატებით გაიარა ბრიტანულ-ქართული აკადემიის შესარჩევი კონკურსის სამივე ეტაპი დამფუძნებლის გრანტის მოსაპოვებლად. ბრიტანულ-ქართული აკადემიის მმართველი გუნდის წევრებისგან შემდგარმა კომიტეტმა შერჩევისას გაითვალისწინა ტესტირებისა და გასაუბრების შედეგები. თქვენი შვილი საგრანტო კონკურსში მონაწილე მაღალი აკადემიური მოსწრებისა და მოტივაციის მქონე აპლიკანტებს შორის შეირჩა, როგორც ერთ-ერთი გამორცეული მოსწავლე. მოხარულები ვართ, გაცნობოთ, რომ თქვენმა შვილმა მოიპოვა 100%-იანი გრანტი 2024-2025 სასწავლო წლიდან ბრიტანულ-ქართულ აკადემიაში სწავლისთვის.სასწავლო გრანტი განკუთვნილიააკადემიაში სწავლის მთელ პერიოდზე და ყოველწლიურად განახლდება მოსწავლის აკადემიური მოსწრების, პოზიტიური ქცევისა და სასკოლო პროექტებში ცართულობისსაფუძველზე. სასწავლო გრანტის პირობები: საგანმანათლებლო მომსახურების წლიური საფასური XI-XII კლასებში: $11,500; სასწავლო გრანტის ოდენობა: $11,500.” _ ვკითხულობთ წერილში. ვულოცავთ ჭკვიან, მიზანდასახულ, შრომისმოყვარე მარიამს ამ წარმატებას და ახალ-ახალ გამარჯვებებს ვუსურვებთ. მარიამ ხუხუნეიშვილი გურიანიუსი

პარლამენტთან ახალგაზრდების აქცია, სახელწოდებით „არა რუსულ კანონს” დღესაც გაიმართება. აქცია საკანონმდებლო ორგანოსთან კვლავ 19:00 საათზეა დაანონსებული. როგორც ახალგაზრდებმა გუშინ განაცხადეს, პროტესტს არ შეწყვეტენ იქამდე, ვიდრე ხელისუფლება უკან არ გაიწვევს კანონპროექტს „უცხოური გავლენის გამჭვირვალობის შესახებ“. ცნობისთვის ახალგაზრდები გუშინ, თავდაპირველად პარლამენტის შენობასთან შეიკრიბნენ, ამის შემდგომ კი, მსვლელობით იუსტიციის სახლთან გადაინაცვლეს, რის შემდეგაც ასევე მსვლელობით გაემართნენ გმირთა მოედანზე. მათ გმირთა მოედანზე ფიცი დადეს, რაც მათივე თქმით, არის პირობა იმისა, რომ “უცხოური გავლენის გამჭვირვალობის შესახებ” კანონპროექტს ხელისუფლება ვერ მიიღებს. გმირთა მოედნის შემდეგ აქცია პარლამენტთან დაასრულეს. იპნ

ჩვენ 8, 9, 10 მარტს, გასაგები ენით, ყველანაირად, ლეგიტიმურად და რითიც შეგვეძლო, ჩვენი მორალის ჩარჩოებში, გავაგებინეთ და გავეცით პასუხი ამ უკვე შემოტანილ კანონს და ეს პასუხი მემგონი ვერ გაიგო ხელისუფლებამ, ზოგადად ჩვენი ახალგარზდების, სუფთა სულის მქონე ადამიანების სიტყვა არ ესმის ამ ხალხს. აქ ვისაც ვუყურებ არიან გულანთებული ახალგაზრდები, ეს არის ჩვენი მორალური უპირატესობა! კოკა კობალაძე, პარტია "გახარია საქართველოსთვის" წევრი. ვიდეო: https://www.facebook.com/ForGeoGe/videos/1007214081135944/

აქ ყველანი ვართ სუფთა ხელებით მოსული, ერთი იდეის გარშემო შეკრებილი, ერთი აზრი გვაქვს, რომ არ გვჭირდება ხვალ გავიღვიძოთ რუსეთში და შვილები, შვილიშვილები გავზარდოთ რუსულ ქვეყანაში. ნათლად დაინახა მთავრობამ და ყველამ, რომ ჩვენ შეგვიძლია ვიყოთ სუფთა, ნათელ მომავალში, ამ მომავალს ჩვენ ვიმსახირებთ და ამ დამსახურების გამო აქ ვართ. კოკა კობალაძე, პარტია "გახარია საქართველოსთვის" წევრი. ვიდეო: https://www.facebook.com/ForGeoGe/videos/387368520929004/

"ოცნების" საგარეო ვექტორის შესახებ კითხვის ნიშნები აღარ არსებობს" - ყოფილი პრემიერი გიორგი გახარია "ტვ პირველის" ეთერში ამბობს, რომ ივანიშვილის გუნდი "რუსეთის ინტერესებში მოქმედებს". გიორგი გახარიამ "პოლიტიკური ამბების" ეთერში თქვა, რომ რუსული კანონის მიღებით საქართველოს მთავრობა ქვეყანას ევროკავშირს აშორებს. "ხელისუფლება მთელ მსოფლიოს ეუბნება, რომ ჩვენი ადგილი არის ავტორიტარული რეჟიმების გვერდით", - ამბობს გახარია და იქვე დასძენს, რომ კანონპროექტის ხელახლა დაინიცირებით ივანიშვილის გუნდმა მთელ მსოფლიოს მკაფიო მესიჯი გაუგზავნა. ექსპემიერმა თქვა ისიც, რომ საქართველოს "გაურკვეველი ორიენტაციის პოლიტიკური ხელისუფლება" ჰყავს. "ოცნება" ყველაფერს აკეთებს იმისთვის, რომ წინაღობა გახდეს ქვეყნის ევროპულ მომავალთან", - ამბობს გახარია "დიანა ტრაპაიძის პოლიტიკურ ამბებთან". წამყვანის დამაზუსტებელ კითხვაზე - არის თუ არა "ქართული ოცნება" პრორუსული, საქართველოს ყოფილი პრემიერი ამბობს: ""ოცნება" რუსეთის ინტერესებში მოქმედებს" ტვ პირველი ჩართვა ბერლინიდან. სრული ვიდეო: https://www.facebook.com/watch/?v=289239484126749 ტვ პირველი

"ოცნება" სტრატეგიულად უკვე დამარცხებულია - ამის შესახებ საქართველოს ექსპრემიერმა "ტვ პირველის" ეთერში განაცხადა. "ხელისუფლებას აქვს ილუზიური სურვილი, რომ 2024 წლის არჩევნების შემდეგ ძალაუფლება შეინარჩუნოს" - თქვა გიოგი გახარიამ. პარტია "საქართველოსთვის" თავმჯდომარე დარწმუნებულია, რომ "ოცნება" საპარლამენტო არჩევნების შემდეგ ძალაუფლებას დაკარგავს. ამასთანავე, პარტია "საქართველოსთვის" ლიდერი ღიად განმარტავს, რომ ოლიგარქის გუნდის მიერ გადადგმული ნაბიჯები მხოლოდ ერთს, არჩევნების გაყალბების მცდელობას ემსახურება.