tvati

გაეროში საქართველოს ახალგაზრდობის ყოფილი წარმომადგენლები რუსულ კანონთან დაკავშირებით საკუთარ მოსაზრებას განცხადების სახით ავრცელებენ, რომლითაც უერთდებიან სამოქალაქო პროტესტს და მოუწოდებენ ხელისუფლებას, გაიწვიოს პირველი მოსმენით მიღებული კანონი. “მიგვაჩნია, რომ აღნიშნული კანონის საბოლოო მიღება უკიდურესად დააზიანებს საქართველოს გრძელვადიან ინტერესებს, შეაფერხებს მის დემოკრატიულ განვითარებასა და ევროპული ინტეგრაციის პროცესს. ამასთანავე, ეს გადაწყვეტილება კიდევ უფრო დააშორებს ჩვენს ქვეყანას მის ერთგულ მეგობრებსა და პარტნიორებს და უარყოფითად აისახება საქართველოს საერთაშორისო პოზიციებსა და რეპუტაციაზე, მათ შორის, გაეროში. აქვე, გვსურს, გავუსვათ ხაზი, რომ საქართველოში მოქმედი სამოქალაქო და მედიის ორგანიზაციები ფასდაუდებელ საქმეს აკეთებენ ქვეყნისთვის და მისი მოქალაქეებისთვის, მათ შორის, ჩვენი ახალგაზრდობისთვის. ეს ყოველივე კი სწორედ დასავლური ქვეყნებისა და საერთაშორისო ორგანიზაციების მხარდაჭერით ხორციელდება. ამიტომ, დაუშვებლად და მიუღებლად მიგვაჩნია სამოქალაქო საზოგადოებისა და დონორი ორგანიზაციების ნებისმიერი სახით სტიგმატიზება, დისკრედიტაცია და მათთვის გაუმართლებელი შეზღუდვების დაწესება. გასათვალისწინებელია ისიც, რომ კანონის მიღება უარყოფითად იმოქმედებს საქართველოში მოქმედი ახალგაზრდული ორგანიზაციებისა და საინიციატივო ჯგუფების საქმიანობაზე, რომლებიც სწორედ საერთაშორისო ფონდების მხარდაჭერით ახორციელებენ ქვეყნისათვის მნიშვნელოვან უამრავ საქმეს, მათ შორის, საქართველოს ათასობით მოქალაქეს აძლევენ პროფესიული და აკადემიური განვითარების შესაძლებლობას. ამ ყველაფრის გათვალისწინებით, ვგმობთ მმართველი პარტიის გადაწყვეტილებას, ვუერთდებით ქვეყანაში მიმდინარე სამოქალაქო პროტესტს და მოვუწოდებთ ხელისუფლებას, დაუყოვნებლივ გაიწვიოს პირველი მოსმენით მიღებული კანონი ე.წ. „უცხოური ძალის ინტერესების გამტარებლის “ შესახებ”, – წერია გავრცელებულ განცხადებაში. ხელს აწერენ 2012 წლიდან მოყოლებული სხვადასხვა წლებში საქართველოს ახალგაზრდების წარმომადგენლები გაეროში: გიორგი ჭეხანი თორნიკე ზურაბაშვილი ლაშა შაყულაშვილი მარიამ სიხარულიძე თათია დოლიძე გიორგი ტუმასიანი ლიკა ტორიკაშვილი ესმა გუმბერიძე ნინო გოგოხია ნეტგაზეთი

რუსეთის საგარეო საქმეთა მინისტრმა სერგეი ლავროვმა რუსულ რადიოსადგურებთან (“სპუტნიკი”, “გავარიტ მასკვა” და “კომსომოლსკაია პრავდა”) ინტერვიუში განაცხადა, რომ საქართველოში ინიციირებული და პირველი მოსმენით მიღებული კანონპროექტი “უცხოელი აგენტების” შესახებ (ასე მოიხსენიებს ამ კანონპროექტს რუსული მედია და ლავროვი) ბევრად უფრო რბილია, ვიდრე ბევრ სხვა ქვეყანაში, მათ შორის შეერთებულ შტატებში, საფრანგეთსა და პოლონეთში მოქმედი კანონმდებლობა. “საქართველოში ყველა ამ დემონსტრაციამ სალომე ზურაბიშვილი აქცია სიტყვის თავისუფლებისთვის მებრძოლად, თუმცა კანონი საკმაოდ ლმობიერია. თავად აშშ-ში, საფრანგეთში, პოლონეთში, ბევრ სხვა ქვეყანაში არსებობს კანონები ჯარიმებით და სისხლისსამართლებრივი პასუხისმგებლობით. თუ ფულს იღებ და ამის შესახებ არ ამბობ, ამ ფულით რაღაცას არასწორად აკეთებ”, – განაცხადა ლავროვმა. ლავროვმა ხაზი გაუსვა, რომ “ქართული კანონპროექტი უცხოური აგენტების შესახებ” მხოლოდ თანხების დეკლარაციის აუცილებლობას მოითხოვს, თუ ორგანიზაცია დაფინანსების 20%-ზე მეტს საზღვარგარეთიდან იღებს. ლავროვამდე „ქართული ოცნების“ „რუსული კანონი“ დაიცვეს კრემლის პრესსპიკერმა დიმიტრი პესკოვმა, რუსეთის უშიშროების საბჭოს თავმჯდომარის მოადგილე დიმიტრი მედვედევმა და პუტინის იდეოლოგმა ალექსანდრე დუგინმა, რომელმაც თქვა, რომ „საქართველო სწორ გზაზეა“. რეალურად იმ კანონის ანალოგი, რომელიც რუსეთში მოქმედებს, არ არსებობს არც აშშ-ში და არც სხვა იმ დემოკრატიულ ქვეყანაში. მაგალითად, ამერიკული FARA-ს მთავარი სამიზნე ლობისტური და საკონსულტაციო კომპანიებია და არა ყველა სახის არასამთავრობო ორგანიზაცია ან მედია, რომელიც გრანტს უცხოეთიდან იღებს. იმისთვის, რომ სუბიექტი აშშ-ში აგენტად რეგისტრაციას დაექვემდებაროს, ნათლად უნდა ჩანდეს მის მიერ სხვა სახელმწიფოს ან უცხო ქვეყანაში არსებული რომელიმე სუბიექტის ინტერესების ლობირება. ამისგან განსხვავებით, რუსულ კანონში უცხოეთიდან მხოლოდ დაფინანსების მიღება უკვე საკმარისი საფუძველია იმისათვის, რომ სუბიექტი რეესტრში მოხვდეს. მაგალითად, FARA-ში რეგისტრირებულია რუსული სამთავრობო-პროპაგანდისტული „სპუტნიკი” და „რაშა თუდეი”, მაგრამ არ არის რეგისტრირებული სხვა ქვეყნებში დაფუძნებული არაპროპაგანდისტული მედიასაშუალებები, როგორიცაა BBC, გარდიანი და სხვა. ამავდროულად, რუსეთია ის ქვეყანა, რომელმაც “უცხოელი აგენტების” შესახებ კანონი ავტორიტარული რეჟიმის გასამყარებლად გამოიყენა — განავრცო ყველა კრიტიკულ აზრზე, სრულად გააქრო დამოუკიდებელი სამოქალაქო ორგანიზაციები და მედიასაშუალებები. 17 აპრილს „ქართულმა ოცნებამ“ რუსული კანონი პირველი მოსმენით მიიღო. კანონპროექტის განხილვა რამდენიმე დღეა მასობრივი საპროტესტო აქციების ფონზე მიმდინარეობს. მსგავსი კანონის მიღებამ რუსეთში, 2012 წლიდან დღემდე, ეტაპობრივად გააქრო ყველა დამოუკიდებელი მედიასაშუალება და სამოქალაქო ორგანიზაცია. ამავე თემაზე: „კრემლისგან შთაგონებული კანონმდებლობა“ — ვაშინგტონმა რიტორიკა დაამძიმა ევროპარლამენტარი: ამ კანონს ქვეყანა რუსეთში მიჰყავს და არა ევროკავშირში სრული სოლიდარობა საქართველოს მოქალაქეებს – ბუნდესტაგის საგარეო საქმეთა კომიტეტის თავმდჯომარე ნეტგაზეთი

მთავარი საკითხი, რაც ამ არჩევნებზე დაისმება არის ის, რა გვინდა ჩვენ - ევროპა თუ რუსეთი? დარწმუნებული ვარ რა იქნება ქართული მოსახლეობის პასუხი ამ კითხვაზე - მე [„უცხოური გავლენის გამჭვირვალობის შესახებ] კანონპროექტს ვეტოს დავადებ! - ამის შესახებ საქართველოს პრეზიდენტმა, სალომე ზურაბიშვილმა, Sky News-თან ინტერვიუში განაცხადა. მისივე თქმით, დღეს ნათელია, რომ მოსახლეობის უმრავლესობას არ სურს საკანონმდებლო ორგანოს უმრავლესობა, თუ ისინი რუსეთისკენ მიემართებიან. „მე მას ვეტოს დავადებ, როგორც კი კანონპროექტის მესამე მოსმენა დასრულდება. სავარაუდოდ, ვეტოს დაძლევენ. მაგრამ, ეს [ვეტო] ძალიან მნიშვნელოვანია, რადგან მე ვარ იმ ხალხის ხმა, რომელიც ამ [კანონპროექტს] აპროტესტებს. ვეტო ძალიან სიმბოლურია და აჩვენებს რა არ შეიძლება გახდეს საქართველოს დანიშნულების პუნქტი, იმ კანონების კოპირებით, რასაც პუტინი და რუსეთი იღებს. შარლ მიშელმა, ისევე როგორც სხვა ევროპელმა პარტნიორებმა და [თბილისში მყოფმა] ელჩებმა ამის შესახებ გააკეთეს განცხადება, აშშ-ს სახელმწიფო დეპარტამენტიც მხარს უჭერს ევროკავშირის მიერ გაკეთებულ განცხადებებს. ასე რომ, ყველა ჩვენი პარტნიორი და მეგობარი ამბობს - „არ მიიღოთ ეს კანონი“. ერთადერთი, რომელიც ამ კანონს დადებითად აფასებს და საქართველოს ხელისუფლებას კომპლიმენტს ეუბნება რუსეთის წარმომადგენლები არიან (დუმა, დიმიტრი პესკოვი - სპიკერი). ამიტომ ძალიან ნათელია რა არის ეს [კანონი], საიდან მოდის და რა არის ის, რაც ქართველ ხალხს არ სურს. რაც შეეხება თქვენს ნათქვამს, რომ ქვეყნის პოლიტიკურ ლიდერებს არა ევროკავშირისკენ, არამედ ვლადიმერ პუტინისკენ მივყავართ და ბევრი არაფრის გაკეთება შეგვიძლია - ჩვენ შეგვიძლია! ჩვენ შეგვიძლია, რადგან ქართული საზოგადოების 80% მხარს უჭერს ევროინტეგრაციის გზას. შარშან, როდესაც კანდიდატის სტატუსი მოგვენიჭა ჩვენ ვნახეთ ერთსულოვნება და ენთუზიაზმი საზოგადოებაში - მე ამის იმედი მაქვს და [საზოგადოებასაც] შეუძლია ჩემი იმედი ჰქონდეს. ჩვენი ვუახლოვდებით არჩევნებს და ამ პერიოდში აქციებიც იქნება. ვიცით, რომ ამჟამად (ანუ ახლა, ამ კონკრეტულ მომენტში, სანამ არჩევნები არ იქნება) ვერ შევცვლით იმ უმრავლესობას, რომელიც დღეს პარლამენტშია, თუმცა ეს არ ნიშნავს, იმას რომ არ შეიძლება ხალხმა ნება გამოხატოს, რაც ამ ეტაპზე მნიშვნელოვანია. დღეს ნათელია, რომ მოსახლეობის უმრავლესობას არ სურს საკანონმდებლო ორგანოს უმრავლესობა, თუ ისინი რუსეთისკენ მიემართებიან. მთავარი საკითხი, რაც ამ არჩევნებზე დაისმება არის ის, რა გვინდა ჩვენ - ევროპა თუ რუსეთი? დარწმუნებული ვარ რა იქნება ქართული მოსახლეობის პასუხი ამ კითხვაზე. [აქციები] ქართველი ხალხის სპონტანური რეაქციაა, განსაკუთრებით, კი მოსახლეობის უფრო ახალგაზრდა ნაწილის, რომელიც ამ დრომდე არ იყო პოლიტიკაში აქტიურად ჩართული. ახლა კი, ჩვენ ვხედავთ ახალგაზრდებით გავსებულ ქუჩებს. ეს სწორედ იმიტომ ხდება, რომ ისინი გრძნობენ რომ ვიღაც მათ ევროპულ მომავალს ართმევს, რომ მათ ევროპულ მომავალს მოსკოვის ზეწოლის ქვეშ ართმევენ, რომელიც რეგიონში, კავკასიაში გეოპოლიტიკურ თამაშს ღიად თამაშობს”, - განაცხადა სალომე ზურაბიშვილმა ინტერვიუში. იპნ

"ქვეყანა უნდა დაუბრუნდეს დემოკრატიული განვითარების გზას და ქვეყანა უნდა დაუბრუნდეს ევროპული მომავლის გზას, რისთვისაც ამ ხელისუფლებას ფაქტი და შემდგარი მოცემულობაა, რომ რესურსი არ გააჩნია. ის არის გადამგდები, უნდობი ხელისუფალი, რომელსაც პარტნიორი აღარ შემორჩა ჩვენს მეგობრებს შორის და მათ აღარავინ აღარ ენდობა. ამიტომ, ამა წლის 26 ოქტომბერს, ეს საკუთარ ხალხთან დამარცხებული ხელისუფლება, ჩვენ, საკუთარ ხალხთან ერთად უნდა გავაფორმოთ საბოლოოდ დამარცხებულად." ბექა ლილუაშვილი, საპარლამენტო პოლიტიკური ჯგუფი "საქართველოსთვის" თავმჯდომარე. ვიდეო: https://www.facebook.com/ForGeoGe/videos/1475482096716377/

„ნაციონალური მოძრაობა“ ღია თანამშრომლობას იწყებს რუსული კანონის ავტორ „ოცნებასთან“. იმ დროს, როდესაც საქართველოს მოქალაქეები, მთელი ქვეყანა ერთად იბრძვის „რუსული კანონის“ წინააღმდეგ, „ოცნებამ“, „ნაციონალური მოძრაობის“ მხარდაჭერითა და დახმარებით, ზუგდიდის და რუსთავის საკრებულოებში დააინიცირა ჩვენი გუნდის წევრების, ზუგდიდისა და რუსთავის საკრებულოების თავმჯდომარეების - გიგა ფარულავასა და ნოდარ შეროზიას თანამდებობიდან გადაყენების საკითხი. "გახარია საქართველოსთვის" ვიდეო: https://www.facebook.com/ForGeoGe/videos/1624470238365634

„ოცნებამ“ და „ნაციონალურმა მოძრაობამ“ შეთანხმებით, ზუგდიდის და რუსთავის საკრებულოებში ერთად დააინიცირა თავმჯდომარეების თანამდებობიდან გადაყენების საკითხი. ამ საკრებულოებში თავმჯდომარეები არიან ჩვენი გუნდის წევრები - გიგა ფარულავა და ნოდარ შეროზია, - ამის შესახებ ინფორმაციას პარტია „გახარია საქართველოსთვის“ ავრცელებს. პარტიის მიერ გავრცელებული ინფორმაციით, „ერთიანმა ნაციონალურმა მოძრაობამ“ და „ქართულმა ოცნებამ“ ზუგდიდსა და რუსთავის საკრებულოს თავმჯდომარის გადაყენების შესახებ განცხადება ერთდროულად დააინიცირეს, რომელიც მათი შეფასებით, ღია თანამშრომლობაა. „ნაციონალური მოძრაობა“ უკვე ღია თანამშრომლობას იწყებს რუსული კანონის ავტორ „ოცნებასთან“. იმ დროს, როდესაც საქართველოს მოქალაქეები, მთელი ქვეყანა ერთად იბრძვის „რუსული კანონის“ წინააღმდეგ, „ოცნებამ“ და „ნაციონალურმა მოძრაობამ“ შეთანხმებით, ზუგდიდის და რუსთავის საკრებულოებში ერთად დააინიცირა თავმჯდომარეების თანამდებობიდან გადაყენების საკითხი. ამ საკრებულოებში თავმჯდომარეები არიან ჩვენი გუნდის წევრები - გიგა ფარულავა და ნოდარ შეროზია. საკრებულოს თავმჯდომარის თანამდებობიდან გადაყენებისთვის ოცნებას სჭირდება „ნაციონალური მოძრაობის“ მხარდაჭერა. ეს გარიგება უკვე შემდგარია რუსული კანონის ავტორ „ოცნებასა“ და „ნაცმოძრაობას“ შორის. ამ გადაწყვეტილებებით, საბოლოოდ გაშიშვლდება „ოცნებისა“ და „ნაციონალური მოძრაობის“ მრავალწლიანი თანამშრომლობა, რაზეც უკვე დიდი ხანია ვსაუბრობთ. ქოცებო, თქვე ნაცებო შეწყვიტეთ ეს მორიგი უსუსური გადაწყვეტილება, რომელიც 26 ოქტომბერს საპარლამენტო არჩევნებში თქვენი მარცხის შიშს ეფუძნება. თქვენი ეს ერთობლივი მოქმედება კარგად აჩვენებს როგორ გაწყობთ ერთმანეთი ამ ორ რადიკალურ ძალას და როგორ ხართ მზად ერთმანეთს გაურიგდეთ მომავალ პარლამენტშიც, რაზეც უკვე დიდი ხანია ჩვენ ვსაუბრობთ. მოვუწოდებთ მოქალაქეებს, 26 ოქტომბერს არც ერთ რადიკალურ ძალას, არც „ოცნებას“ და არც „ნაცმოძრაობას“ არ დაუჭირონ მხარი. ეს არის ერთადერთი გარანტია,რომ ქვეყანა თავს დააღწევს ამ ორი წარსული ძალის ტყვეობას და თავიდან ავიცილებთ მათ სამომავლო კოალიციას.“-წერია პარტიის მიერ გავრცელებულ განცხადებაში. ipn

ირაკლი კობახიძის მიერ ჩვენი ქვეყნის სახელის დამამცირებელ კონტექსტში გამოყენება ქართულ-უკრაინულ ურთიერთობებს დამატებით ავნებს, რუსიფიკაცია და არა მითიური “უკრაინიზაცია” არის საქართველოს რეალური საფრთხე. ამის შესახებ უკრაინის საგარეო საქმეთა სამინისტრომ მიერ გავრცელებულ განცხადებაში წერია, რომლითაც უწყება საქართველოში მიმდინარე მოვლენებს ეხმაურება. “ყველა დაინტერესებულ მხარეს მოვუწოდებთ, პატივი სცენ საქართველოს მოქალაქეების მშვიდობიანი პროტესტის უფლებას და ვითარებიდან გამოსავალი კონსტრუქტიული დიალოგის მეშვეობით ეძებონ. მოქალაქეების უფლებებისა და თავისუფლებების დაცვა, ასევე, სამოქალაქო საზოგადოების საზოგადოებრივად მნიშვნელოვანი საკითხების მოგვარებაში ჩართულობა არის აუცილებელი პირობა ქვეყნის პროევროპული მომავლის ასაშენებლად”, - ნათქვამია განცხადებაში. უკრაინის საგარეო უწყება ასევე აღნიშნავს, რომ საქართველოს პრემიერ-მინისტრის ირაკლი კობახიძის განცხადებები “უკრაინიზაციის” შესახებ, რომლის წინააღმდეგაც არის ვითომდა მიმართული “უცხოური გავლენების შესახებ“ კანონპროექტი, აღშფოთებას იწვევს. “ჩვენი ქვეყნის სახელის ასეთ დამამცირებელ კონტექსტში გამოყენება დამატებით ზიანს აყენებს უკრაინულ-ქართულ ურთიერთობებს. რუსიფიკაცია და არა მითიური “უკრაინიზაციაა”საქართველოს რეალური საფრთხე. უკრაინა დაინტერესებულია საქართველოში მშვიდობიანი და მეგობრული გარემოთი, ყოველთვის მყარად უჭერდა მხარს და აგრძელებს საქართველოს სუვერენიტეტისა და საერთშორისოდ აღიარებულ საზღვრებში ტერიტორიული მთლიანობის მხარდაჭერას”, - ნათქვამია განცხადებაში. ინფორმაციისთვის, საქართველოს პრემიერ - მინისტრმა ირაკლი კობახიძემ განაცხადა, რომ კანონპროექტი „უცხოური გავლენის გამჭვირვალობის შესახებ“ პირველ რიგში, საქართველოს უკრაინიზაციისგან დაცვას, სუვერენიტეტის განმტკიცებას და სტაბილურ განვითარებას ისახავს მიზნად. „უკრაინიზაციის თავიდან აცილება არის საქართველოს ევროკავშირში ინტეგრაციის აუცილებელი პირობა და ეს არის ამ კანონპროექტის უმთავრესი მიზანი. შესაბამისად, ეს კანონპროექტი არათუ ვერ დააშორებს საქართველოს ევროპას არამედ თვისებრივად დაგვაახლოებს ჩვენი უმთავრესი საგარეო პოლიტიკური მიზნის ევროკავშირში ინტეგრაციის მიღწევასთან ეს არის ძალიან მნიშვნელოვანი პირობა ევროკავშირში ინტეგრაციისთვის“, - განაცხადა კობახიძემ პრესკონფერენციაზე 17 აპრილს. იპნ

ავტორთა საინიციატივო ჯგუფი (გია მაჭარაშვილი, დათო ევგენიძე, კახა ცაბაძე და სხვები... ) საქართველოს ხელოვანთა სახელით ღია წერილს აქვეყნებს და საზოგადოებას მიმართავს: გვსურს გამოვეხმაუროთ ბოლო დღეების განმავლობაში ჩვენს ქვეყანაში განვითარებულ მოვლენებს, რომელმაც ჩვენი საზოგადოება კიდევ ერთხელ დააყენა გახლეჩისა და დაქსაქსვის წინაშე. საქართველოს ისტორია გვასწავლის, რომ როდესაც ქართველები ერთმანეთს ვუპირისპირდებოდით, ერთმანეთან ბრძოლებით საკუთარ ერთობას ძირს ვუთხრიდით, ჩვენი ქვეყნის მტრებს სწორედ მაშინ უმარტივდებოდათ გათითოკაცებულ საქართველოში მიზნების მიღწევა და ჩვენი დასუსტება. დღეს ამის დრო არ არის! თვალნათლივ ვხედავთ, რომ ჩვენი ქვეყანა საკუთარი ისტორიის ერთ-ერთ გარდამტეხ ეტაპზეა, რომლის საბოლოო შედეგი განსაზღვრავს საქართველოს, ჩვენი და ჩვენი მომავალი თაობების განვითარებას, კეთილდღეობასა და მომავალს, მხოლოდ ემოციების აყოლა და რაციონალურობის დაკარგვამ კი, შესაძლოა, დიდი განსაცდელის წინაშე დაგვაყენოს. დღეს სწორედ ჩვენი თაობაა ამ ისტორიული პროცესის მონაწილე და თუკი არ გვურს ჩვენი წინაპრების ნაშენები კედელი ჩამოიშალოს და მომავალ თაობებეს თვალი ვერ გავუსწუროთ, უნდა გავიაზროთ, რომ ერთიანობა ერთადერთი გამოსავალია. ღრმად გვწამს, რომ მხოლოდ ერთიან, მტკიცედ მდგარ ქართველ ერს შეუძლია საკუთარი სუვერენიტეტის დაცვა და მათთვის ღირსეული პასუხის გაცემა, ვინც მის ხელყოფას შეეცდება. მხოლოდ ქართველი ხალხის ერთიანობით შეგვიძლია მოვიპოვოთ სიმშვიდე და მშვიდობა, რაც კეთილდღეობის, განვითარების, ფეხზე მყარად დგომის, ნათელი მომავლისა და გაერთიანებული საქართველოს საწინდარია. დღეს, თუკი გვსურს საკუთარი ბედი და მომავალი თავად განვსაზღვროთ, საკუთარი სუვერენიტეტი დავიცვათ და გავამყაროთ, მალე დავიბრუნოთ დიდი ხნის კუთვნილი ადგილი ევროპულ ოჯახში არა საკუთარი ინტერესების დაზიანების, დაპირისპირებისა და არეულობის, არამედ განვითარების, ერთიანობისა და მშვიდობის დროა! (R)

გვაქვს პერსპექტივა, რომ ამ წლის ბოლოს დავიწყოთ ევროკავშირში გაწევრიანების მოლაპარაკებები და სწორედ ამას ებრძვის დღეს ეს კანონი, - ამის შესახებ საქართველოს პრეზიდენტმა, სალომე ზურაბიშვილმა TV 5 Monde-სთან ინტერვიუში „უცხოური გავლენის გამჭვირვალობის შესახებ“ კანონპროექტზე საუბრისას განაცხადა. სალომე ზურაბიშვილის მტკიცებით, „უცხოური გავლენის გამჭვირვალობის შესახებ“ კანონის ინიცირება მოსკოვის ინტერესებს შეესაბამება. „მე შეშფოთებული ვარ ამ კანონის შემობრუნებით, რომელიც უკუაგდო სრულიად საქართველოს მოსახლეობამ, რამაც მოგვცა საშუალება, რომ მიგვეღო გასული წლის ბოლოს ევროკავშირის კანდიდატობის სტატუსი. ჩვენ ამ გზაზე ვდგავართ. გვაქვს პერსპექტივა, რომ ამ წლის ბოლოს დავიწყოთ ევროკავშირში გაწევრიანების მოლაპარაკებები და სწორედ ამას ებრძვის დღეს ეს კანონი, და არა მხოლოდ ეს, არამედ კანონების მთელი სერია, რომელიც ეწინააღმდეგება ევროპისაკენ მიმავალ გზას. ეს გადაწყვეტილება შეესაბამება მოსკოვის ინტერესებს“, - განაცხადა სალომე ზურაბიშვილმა. პრეზიდენტის განმარტებით, აღნიშნული კანონი ეწინააღმდეგება ყველას, ვინც წლების განმავლობაში იბრძოდა საქართველოს დამოუკიდებლობისთვის და ამავე დროს რუსეთის პრეზიდენტ ვლადიმერ პუტინის მიერ მიღებული კანონების ასლია. „ეს არა პრორუსული არამედ რუსული კანონია. პრეზიდენტ პუტინის მიერ მიღებული კანონების ასლია, რომლებსაც მიზნად ჰქონდათ საბოლოოდ შეებოჭათ არასამთავრობო ორგანიზაციები, ხელი შეეშალათ მათი საქმიანობისთვის და ასევე მედიისათვის. აქ ჩვენ ამის ასლი გვაქვს. ჩვენ ვემზადებით 26 ოქტომბრის საპარლამენტო არჩევნებისთვის, რაც გადამწყვეტი იქნება ჩვენი ევროპული მომავლისთვის. არასამთავრობო ორგანიზაციებს მოქმედების არეალის შემცირების წინასწარი მცდელობა, ისევე როგორც საერთაშორისო დამკვირვებლების ნიშნავს ასევე ჩვენი დასავლელი პარტნიორების მოქმედების შეზღუდვას. ეს კანონი ეწინააღმდეგება ყველას, ვინც წლების განმავლობაში იბრძოდა საქართველოს დამოუკიდებლობისთვის, ინსტიტუციების გაძლიერებისთვის, დემოკრატიზაციისათვის და არის მიმართული ჩვენი ევროპელი და ამერიკელი პარტნიორების წინააღმდეგ“, - განაცხადა სალომე ზურაბიშვილმა. ამასთან, როგორც პრეზიდენტმა TV 5 Monde-თან ინტერვიუში აღნიშნა, ადგილი აქვს ჰიბრიდულ ომს საქართველოს წინააღმდეგ საპირისპიროდ იმ სამხედრო ომისა, რომელიც უკრაინაში მიმდინარეობს. „ჩვენ გასული წლის 15 დეკემბერს მივიღეთ კანდიდატის სტატუსი, რაც მთელი საქართველოს მოსახლეობის მიერ აღინიშნა როგორც დიდი გამარჯვება, ჩვენ გვაქვს პერსპექტივა, რომ გაიხსნას ევროკავშირში გაწევრიანების მოლაპარაკებები წლის ბოლოს. მოსახლეობა ითხოვს, რომ არავინ, განსაკუთრებით მთავრობამ, რომელიც სხვა ინტერესებს ემსახურება, არ შეძლოს ამ მოლაპარაკებების გახსნისთვის ხელის შეშლა, რადგან ისინი იღებენ კანონებს, რომლებიც პირდაპირ ეწინააღმდეგება ევროკავშირის მოთხოვნებს. მე უკვე 5 ვეტოს უფლება გამოვიყენე და მალე მეექვსედ გამოვიყენებ ვეტოს, რადგან მე ვთქვი, რომ ამას გავაკეთებ ყოველ ჯერზე, როდესაც კანონის შინაარსი ან ტექსტი შეეწინააღმდეგება იმ რეკომენდაციებს, რომლებიც მოგვცეს ევროპელმა პარტნიორებმა გაწევრიანების მოლაპარაკებების დასაწყებად. ეს არის მიზანი, მიზანი არ არის დაჩქარება, არამედ ხელის შეშლის თავიდან აცილება. ხელის შეშლა მხოლოდ მოსკოვის ინტერესშია“, - განაცხადა სალომე ზურაბიშვილმა. იპნ

დამოუკიდებელი პროფკავშირები კულტურისა და მედიის სფეროში, „გილდია“, აქვეყნებს დეტალურ განმარტებას იმის შესახებ, თუ რატომ არის გამჭვირვალობის საფარქვეშ, ოცნების მიერ ინიციირებული კანონპროექტი რუსული. ნეტგაზეთი „გილდიის“ ანალიზს გთავაზობთ უცვლელად: კანონპროექტის ანალიზამდე, პირველ რიგში, უნდა გავიხსენოთ, რას ნიშნავს არასამთავრობო ორგანიზაცია. არასამთავრობო ორგანიზაცია სამართლებრივი ფორმით არის ა(ა)იპ ე.ი. არაკომერციული, არასამეწარმეო იურიდიული პირი. არაკომერციული, არასამეწარმეო იურიდიული პირი შესაძლებელია, დაფუძნდეს საქართველოს ნებისმიერი მოქალაქის მიერ და ეს ორგანიზაცია შეიძლება, იყოს უფლებადაცვითი, პროფკავშირული, კულტურის, სპორტის, კვლევითი, საგანმანათლებლო, მედია ან სხვა არაერთი მიმართულების. მოქალაქეები ამგვარ ორგანიზაციას აფუძნებენ მაშინ, როდესაც მათ სურთ, იმუშავონ კონკრეტულ საკითხზე თავად ამ საკითხის მიმართ ალტრუისტული, ჰუმანისტური მიზნით. როდესაც ადამიანებს სურთ, საზოგადოებისთვის რაიმე სიკეთე შექმნან, ისინი ორგანიზაციულ ფორმად ირჩევენ, ე.წ. NGO-ს. საქართველოში 30 000-მდე ამგვარი ორგანიზაციაა რეგისტრირებული, რომელთაგანაც, სავარაუდოდ, მხოლოდ ნახევარია პრაქტიკულად აქტიური. ამ აქტიური ორგანიზაციების სრული უმრავლესობა მუშაობს რიგითი მოქალაქეების უფლებებისა და ცხოვრების გაუმჯობესებისთვის. მუხლი 1 — კანონის მიზანი კანონპროექტის 1-ელ მუხლში აღნიშნულია, რომ კანონის მიზანი დაფინანსების გამჭვირვალეობაა, რაც თავისთავად მანიპულაციურია. სინამდვილეში საქართველოში უკვე არსებობს კანონმდებლობა, რომელიც გრანტების განკარგვის წესს, ხარჯვისა და ფინანსების გამჭვირვალობას ემსახურება. მაგალითისთვის: საქართველოს კანონი „გრანტების შესახებ“ და საქართველოს საგადასახადო კოდექსი, ასევე, არსებობს კანონი „ლობისტური საქმიანობის შესახებ“. ეს კანონები საქართველოში უკვე მოქმედებს, ორგანიზაციები ისედაც აღრიცხავენ მათ ხარჯვას და ავსებენ დეკლარაციებს, გრანტების გამოცხადებისა და გაცემის წესი საჯაროა და ექვემდებარება ხელშეკრულებას. ფინანსური დეკლარაციები კი არის თუ არა შესაბამისობაში რეალურ შემოსავლებსა და ხარჯებთან, ამის გადამოწმების უფლებამოსილება შემოსავლების სამსახურსა და ფინანსურ პოლიციას აქვთ. „ქართული ოცნების“ რეალური მიზანი რომ გამჭვირვალობა იყოს, ის სწორედ ზემოთ აღნიშნულ კანონებში შეიტანდა შეუმჩნეველ ცვლილებებს და ამით შექმნიდა დამატებითი დეკლარირების ვალდებულებას. მუხლი 2 — „უცხოური ძალის ინტერესების გამტარებელი ორგანიზაციის“ განმარტება კანონპროექტის მე-2 მუხლი „უცხოური ძალის ინტერესების გამტარებელ ორგანიზაციად“ განსაზღვრავს ნებისმიერ მედიასაშუალებას და არასამეწარმეო იურიდიულ პირს, რომელთა მიერ კალენდარული წლის განმავლობაში მიღებული მთლიანი შემოსავლის 20%-ზე მეტის წყარო უცხოური ძალაა. ქვეყანაში მოქმედი, ფაქტობრივად, ყველა არასამთავრობო ორგანიზაცია, რომელთა ბიუჯეტის 20%-ზე მეტი შედგება საერთაშორისო დაფინანსებისგან, უნდა დარეგისტრირდეს ერთგვარ “ახალ რეესტრში”. რეგისტრაციის საფუძველზე მათ მიენიჭებათ იარლიყი “უცხოური ძალის ინტერესების გამტარებელი ორგანიზაცია”. ორგანიზაციების ამგვარი „დანიშვნა“ რამდენიმე მიზეზის გამო არის საზიანო საზოგადოებისთვის: „უცხოური ძალის ინტერესების გამტარებელი ორგანიზაცია“ არის ტერმინი, რომელიც უარყოფითად წარმოაჩენს ისეთ საქმიანობებს, როგორებიცაა: მშრომელთა უფლებების, ქართული ბუნების, კულტურული მემკვიდრეობის დაცვა და სხვ. ამცირებს მათ ნდობას და აკნიბებს მათ ლეგიტიმაციას. სწორედ ნდობაა ის ერთადერთი რამ, რაც ამ ორგანიზაციებს აქვთ. მაგალითად, ავიღოთ დამოუკიდებელი პროფესიული კავშირები, რომლებიც ცდილობენ, დასაქმებულების უფლებები დაიცვან. ამ ორგანიზაციების მიმართ როგორც კერძო ბიზნესი, ისე სახელმწიფო, როგორც წესი, გამოირჩევა დისკრედიტაციით, გაშავების მცდელობებით. მშრომელთა ორგანიზაციები ისედაც მუდმივად იბრძვიან აღიარებისთვის, მათი გამოცხადება „უცხოური ძალის ინტერესების გამტარებად“, გამოიწვევს მშრომელთა წინააღმდეგობის დასუსტებას. რუსეთის გამოცდილება აჩვენებს, რომ ამგვარი ტერმინი თავიდან მხოლოდ მცირე ჯგუფსა და მცირე კატეგორიაზე ვრცელდებოდა, დროთა განმვალობაში კი გაფართოვდა და გავრცელდა ყველაზე, მათ შორის, ფიზიკურ პირებზე ისევე, როგორც გამკაცრდა ამ სტატუსის მქონე სუბიექტების მიმართ მოპყრობა, დაწესდა სისხლის სამართლის პასუხისმგებლობაც სახელმწიფოს მიმართ „ძირგამომთხრელი საქმიანობისთვის“. კანონი ეხება ყველა ორგანიზაციას და არ აქვს არანაირი ჩამკეტი, ე.ი., არ აქვს მნიშვნელობა აქონდროპლაზიით დაავადებული ბავშვებისთვის წამლის მოპოვებაზე მუშაობ, გელათის ტაძრის რესტავრაციაზე თუ არჩევნებს უწევ მონიტორინგს, კანონი უპირობოდ, მოგანიჭებს უცხოური ძალის ინტერესების გამტარებელი ორგანიზაციის სტატუსს. მუხლი 3 — უცხოური ძალის განმარტება კანონპროექტი ერთ სიბრტყეში აქცევს ქვეყნის მტრისა და სტრატეგიული პარტნიორებისგან შემოსულ დაფინანსებას. ამასთანავე, რუსეთიდან შემოსული დაფინანსება, როგორც წესი, არ არის ლეგალური და ის ამ კანონის დაფარვის სივრცეში ვერ მოხვდება. შესაბამისად, კანონი, ძირითადად, მხოლოდ დასავლურ დაფინანსებას მოიხსენიებს “უცხოური ძალის ინტერესების” ტერმინით. მუხლი 4 — რეგისტრაცია და ვალდებულები მე-4 მუხლში ვკითხულობთ, „იუსტიციის სამინისტროს შესაბამის უფლებამოსილ პირს უფლება აქვს, კანონის შესაბამისად, მოიძიოს საჭირო ინფორმაცია, მათ შორის, პერსონალური მონაცემი.“ პერსონალური მონაცემების გადაცემის ვალდებულება, განსაკუთრებით, დააზიანებს პროფესიულ კავშირებს, რადგან პროფკავშირების წევრობისას დასაქმებულები ხშირად მალავენ წევრობის ფაქტს იმისათვის, რომ დამსაქმებელმა მის მიმართ არ გაატაროს დისკრიმინაციული ზომები. ამ შიშზე მიუთითებს „პერსონალურ მონაცემთა დაცვის შესახებ“ კანონიც, პროფკავშირის წევრობა განსაკუთრებულ პერსონალურ მონაცემად მიიჩნევა, ე.ი. გამოირჩევა სენსიტიურობით და მისი გამჟღავნების შედეგად ფიზიკური პირისთვის მიყენებული ზიანის სიმძიმით. პროფკავშირულ ორგანიზაციაში დასაქმებულ პირთა ან ორგანიზაციის წევრთა პერსონალური მონაცემების გადაცემა აზიანებს კონსტიტუციით გარანტირებულ გაერთიანების თავისუფლების, პროფკავშირის შექმნისა და მასში გაწევრიანების ფუნდამენტურ უფლებებს. „ქართული ოცნება“ ხშირად აღნიშნავს, რომ კანონპროექტი არ გულისხმობს „უცხოური ძალის ინტერესების გამტარ ორგანიზაციად“ რეგისტრირებული პირის საქმიანობის გაუქმებას. საქმეც ისაა, რომ ამ დამამცირებელი, შეურაცხმყოფელი, ადამიანის დეჰუმანიზებისკენ მიმართული იარლიყის მიწებებას თავმოყვარე ადამიანი არ დათანხმდება. არასამთავრობო ორგანიზაციების ხელმძღვანელებმა პარლამენტის იურიდიულ საკითხთა კომიტეტში კანონპროექტის განხილვისას უკვე გააკეთეს განცხადებები, რომ ისინი უარს იტყვიან რეგისტრაციაზე. ნებაყოფლობით რეგისტრაციაზე უარის შემთხვევაში კი კანონპროექტი ითვალისწინებს იძულებით რეგისტრაციას. ეს იმას ნიშნავს, რომ ასეთმა არასამთავრობო ორგანიზაციებმა ან უნდა შეწყვიტონ ფუნქციონირება ან გააგრძელონ მუშაობა ამ იარლიყის ქვეშ. უკვე გაკეთებული განცხადებები კი გვაფიქრებინებს, რომ ისინი შეწყვეტენ მუშაობას და არ მიიწებებენ იარლიყს. ე.ი. კანონი ირიბად, თითქოსდა გაუცხადებელი მიზნის გარეშე არათუ ზღუდავს, არამედ აუქმებს გაერთიანების თავისუფლებას იმ ორგანიზაციებისთვის, რომლებიც კონსტიტუციაში გაცხადებული მიზნების მისაღწევად თანამოქალაქეების ცხოვრების გასაუმჯობესებლად მუხლჩაუხრელად შრომობენ. მუხლი 6 — ყოველწლიური ფინანსური დეკლარაცია ამ მუხლის მიერ შემოტანილ ვალდებულებას არასამთავრობო ორგანიზაციები ისედაც იცავენ, მაგრამ თუ მაინცდამაინც, ეს სწორედ ის მუხლია, რომელიც პირდაპირ შეიძლებოდა, გაჩენილიყო საქართველოს კანონში „გრანტების შესახებ“. მუხლი 8 — დასმენა ნებისმიერ ადამიანის, იუსტიციის სამინისტროსთვის წარდგენილი წერილობითი განცხადება, რომელიც შეიცავს უცხოური ძალის ინტერესების გამტარებელ კონკრეტულ ორგანიზაციასთან სათანადო მინიშნებას, კლასიფიცირდება დასმენად, რის საფუძველზეც ორგანიზაციას გამოაცხადებენ აგენტად. დასმენის ინსტიტუტი არის როგორც რუსეთში მიღებულ კანონში, ისე ჩენთან ინიცირებულ კანონპროექტში. კანონპროექტი ასევე ითვალისწინებს ნებისმიერი პირის მიერ, იუსტიციის სამინისტროსთვის მიწოდებული ინფორმაციის საფუძველით, შეამოწმონ “ურჩი” ორგანიზაცია. ეს ეწინააღმდეგება საკუთრების და სამართლიანი ადმინისტრაციული წარმოების კონსტიტუციურ უფლებებს, აგრეთვე, კნონის უზენაესობისა და სამართლებრივი სახელმწიფოს პრინციპებს. საქართველოს კანონმდებლობით აკრძალულია კერძო პირის საკუთრებაში შესვლა სასამართლო ორდერის ან დასაბუთებული ვარაუდის სტანდარტით (რაც მტკიცებულებების არსებობას გულისხმობს) გადაუდებელი აუცილებლობის გარეშე. გადაუდებელი აუცილებლობით შესვლის კანონიერებაც კი სასამართლომ უნდა ცნოს 48 საათში. კანონპროექტი კი იუსტიციის სამინისტროს აძლევს უფლებამოსილებას, ყოველგვარი სასამართლო ორდერის, მტკიცებულების გარეშე, ნებისმიერი პირის “შეტყობინების” საფუძველზე ფაქტობრივი ჩხრეკა და რეიდი ჩაატაროს ამ კანონპროექტით მიჩნეული “უცხოური ძალის ინტერესების გამტარებელ კერძო ორგანიზაციაში” წინააღმდეგობა კონსტიტუციასთან და რაც ყველაზე მთავარია, აღნიშნული კანონპროექტი წინააღმდეგობაში მოდის საქართველოს კონსტიტუციის 78-ე მუხლთან “კონსტიტუციურმა ორგანოებმა თავიანთი უფლებამოსილების ფარგლებში მიიღონ ყველა ზომა, ევროპის კავშირისა და ჩრდილოატლანტიკური ხელშეკრულების ორგანიზაციაში საქართვრლოს სრული ინტეგრაციის უზრუნველსაყოფად”. დასკვნა საგანგაშო გარემოებაა, რომ მსგავსი კანონპროექტი ერთდროულად არის ინიცირებული აფხაზეთში, საქართველოში და ყირგიზეთში, პროცესს მიესალმებიან პესკოვი და დუგინი. ჩნდება გონივრული ეჭვი, რომ პროცესი რუსეთიდან იმართება. რუსეთში ამგვარი კანონი 2012 წელს მიიღეს, ის შემდეგ გაფართოვდა და მთლიანად გააქრო განსხვავებული აზრი და თავისუფალი მედია. ცხადია, რომ მხოლოდ რუსეთის ინტერესია, შეფერხდეს საქართველოს ევროინტეგრაციის პროცესი. ბოლო დღეებში რუსეთის არაერთმა მოქალაქემ გაგვიზიარა გამოცდილება, რომ ამ კანონპროექტისთვის წარმოებული პროპაგანდაც კი რუსეთში 2012 წელს მიმდინარე პროცესების ასლია. მაშასადამე, ეს კანონი არის რუსული და ხელს უშლის ქვეყნის სვლას ევროპისკენ!!! „გილდია“ მოუწოდებს პარლამენტს, მეორე მოსმენით კენჭისყრისას არ დაუჭიროს მხარი „უცხოური გავლენის გამჭვირვალობის შესახებ“ მეორედ ინიცირებულ კანონპროექტს!!! ნეტგაზეთი

ევროპარლამენტარი ვიოლა ფონ კრამონი სოციალურ პლატფორმა X-ზე საგადასახადო კოდექსში შესატან ცვლილებებს ეხმაურება და წერს, რომ ბიძინა ივანიშვილი სიფრთხილის ზომებს იღებს – სანქციების შემთხვევაში მან საკუთარი ფული საქართველოში უნდა დააბრუნოს. ამ შეფასებით მან გერმანელი ჟურნალისტის, სილვია სტოებერის პოსტი გადააზიარა, რომელშიც ჟურნალისტი წერს, რომ „უცხოური გავლენის“ კანონპროექტის პარალელურად პარლამენტმა პირველი მოსმენით მიიღო კანონპროექტი, რომელიც გაამარტივებს იმ ოფშორული კომპანიების საქართველოში გადმოსვლას, რასაც ბიძინა ივანიშვილი იყენებს. პარლამენტი კანონპროექტს დაჩქარებულად განიხილავს. კანონპროექტის მიხედვით, გარდამავალ დებულებებს ემატება ახალი ნაწილი, რომელიც ითვალისწინებს იმას, რომ – შეღავათიანი დაბეგვრის მქონე ქვეყნებში (ე.წ. ოფშორი) რეგისტრირებულ აქტივები, საქართველოში რეგისტირებულ კომპანიაზე გადმოფორმების შემთხვევაში, გათავისუფლებული იყოს მოგების/საშემოსავლო და იმპორტის გადასახადისგან. პუბლიკა

ევროპარლამენტარებმა, დევიდ მაკალისტერმა, სვენ მიქსერმა და მარინა კალიურანდმა საქართველოში „უცხოური გავლენის გამჭვირვალობის შესახებ“ კანონპროექტის თავიდან დაინიცირების საკითხზე ერთობლივი განცხადება გაავრცელეს. „ჩვენ საქართველოში მმართველი პარტიის მიერ „უცხოური გავლენის გამჭვირვალობის შესახებ“ კანონპროექტის თავიდან შემოტანით ღრმად შეშფოთებულები ვართ. ეს კანონი, რომელიც გუშინ პარლამენტში პირველი მოსმენით მიიღეს, დამოუკიდებელ მედიასა და სამოქალაქო ორგანიზაციებზე თავდასხმას წარმოადგენს. ეს კანონი ევროკავშირის ღირებულებებთან და დემოკრატიულ პრინციპებთან შეუთავსებელია. იგი საქართველოს ევროკავშირში გაწევრიანების ამბიციებს ეწინააღმდეგება და ქვეყნის ევროატლანტიკურ ინტეგრაციას საფრთხეს უქმნის. ჩვენ საქართველოს მთავრობასა და პარლამენტს მოვუწოდებთ, რომ ქართველი ხალხის უმრავლესობის მისწრაფებებს არ უღალატონ და სამოქალაქო საზოგადოების ორგანიზაციებისთვის ხელსაყრელი სამუშაო გარემოს უზრუნველსაყოფად საერთაშორისო პარტნიორებთან ითანამშრომლონ. ჩვენ საკამათო კანონპროექტის წინააღმდეგ გამოსული დემონსტრანტების დასაშლელად სპეცრაზმის მიერ ძალის გამოყენებით შეშფოთებულები ვართ. მშვიდობიანი პროტესტის უფლება ფუნდამენტური უფლებაა და მკაცრად უნდა იქნას დაცული, განსაკუთრებით ქვეყანაში, რომელსაც ევროკავშირის წევრობა სურს. მშვიდობიანი მომიტინგეების მიმართ ძალის განურჩევლად გამოყენების გამართლება არ შეიძლება. მოვუწოდებთ საქართველოს ხელმძღვანელობას, უზრუნველყოს გამოხატვისა და შეკრების თავისუფლება და ძალადობის ესკალაცია თავიდან აიცილოს. ჩვენ ქართველი ხალხის ლეგიტიმური ევროპული მისწრაფებების მიმართ ჩვენს ურყევ მხარდაჭერას კიდევ ერთხელ ვადასტურებთ და შეგახსენებთ, რომ ევროკომისიის მიერ განსაზღვრული შესაბამისი ნაბიჯები ჯერ კიდევ უნდა განხორციელდეს“, - ნათქვამია ევროპარლამენტარების ერთობლივ განცხადებაში. იპნ

ნათელია ის, რომ საქართველოს მოსახლეობა არასდროს მისცემს საშუალებას მთავრობას, რომელიც აშკარად პრორუსულია, კვლავ მის მთავრობად დარჩეს, რადგან ეს ეწინააღმდეგება მის ძირითად ეგზისტენციალურ არჩევანს, რომელსაც საქართველო მრავალსაუკუნოვანი ისტორიის განმავლობაში ყოველთვის აკეთებს და რომელიც არ შეიცვლება, - ამის შესახებ საქართველოს პრეზიდენტმა, სალომე ზურაბიშვილმა CNN-თან ინტერვიუში განაცხადა. მისი თქმით, საქართველოს მოსახლეობის დიდი უმრავლესობა მხარს უჭერს ქვეყნის ევროატლანტიკურ საზოგადოებაში გაწევრიანებას და ეს არჩევანი არასდროს შეცვლილა. „ჩვენ ვართ ევროკავშირის კანდიდატი ქვეყანა და ძალიან ახლოს ვართ მოლაპარაკებების დაწყების პროცესთან, რომელიც უკრაინამ და მოლდოვამ უკვე დაიწყეს. ყველა ქართველი თავს ევროპელად გრძნობს, საქართველოს მოსახლეობის 80 პროცენტი, გასული 30 წლის განმავლობაში მუდმივად, აცხადებს, რომ სურს ევროკავშირსა და ატლანტიკურ საზოგადოებაში გაწევრიანება. ეს არის ის, რაც ვერაფერმა შეცვალა, ვერც ომმა, ვერც ტერიტორიის ოკუპაციამ - მოსახლეობის სიმტკიცე ურღვევია და არ შეიცვლება და სწორედ ეს სიმტკიცე მიგვიყვანს არჩევნებზე წელს ოქტომბერში და დარწმუნებული ვარ, რომ გასული წლის მსგავსად, როდესაც ჩვენ კანდიდატის სტატუსი მივიღეთ, წელს მივიღებთ გაწევრიანების მოლაპარაკებების დაწყების შესახებ გადაწყვეტილებას“, - აღნიშნა პრეზიდენტმა. იპნ

რუსეთის სახელმწიფო სათათბიროს თავმჯდომარე, ვიაჩესლავ ვოლოდინი „უცხოური გავლენის გამჭვირვალობის" შესახებ კანონპროექტთან დაკავშირებით საქართველოში მიმდინარე საპროტესტო აქციებს ეხმაურება და აცხადებს, რომ ამ კანონის მოწინააღმდეგეები „სხვა სახელმწიფოს ინტერესებიდან გამომდინარე მოქმედებენ“. „ნებისმიერი ქვეყანა, თუ მას სურს გახდეს სუვერენული სახელმწიფო, სადაც ხალხს აქვს უფლება დამოუკიდებლად განსაზღვროს თავისი მომავალი, ვალდებულია მიიღოს კანონი უცხოური აგენტების შესახებ, რომლის არსი მდგომარეობს იმაში, რომ აიკრძალოს გარე ჩარევა შიდა საქმეებში. ისინი, ვინც ეწინააღმდეგებიან კანონის მიღებას, ცალსახად სხვა სახელმწიფოს ინტერესებიდან და არა საკუთარი ქვეყნის ინტერესებიდან გამომდინარე მოქმედებენ“, - წერს ვოლოდინი „ტელეგრამ“ არხზე. ipn

შინაგან საქმეთა სამინისტროს ინფორმაციით, მთავრობის კანცელარიასთან მიმდინარე რუსული კანონის საწინააღმდეგო აქციაზე დაკავებულია 2 პირი, ხოლო სამართალდამცველემა ერთ-ერთი დაკავებული პირისგან ცივი იარაღი ამოიღეს. publika

ერთ მხარეს ქართველი ხალხი, მეორე მხარეს 83 დეპუტატი, რომლებმაც ხმა ჩვენი ევროპული მომავლის წინააღმდეგ მისცეს. ხალხი ყოველთვის იმარჯვებს!, - ამის შესახებ საქართველოს პრეზიდენტი სალომე ზურაბიშვილი სოციალურ ქსელში წერს. „რუსული კანონის მიღების წინააღმდეგ ღირსეული პროტესტის მესამე ღამე! ერთ მხარეს ქართველი ხალხი, მეორე მხარეს 83 დეპუტატი, რომლებმაც ხმა ჩვენი ევროპული მომავლის წინააღმდეგ მისცეს. ხალხი ყოველთვის იმარჯვებს!“, - წერს „ტვიტერზე“ პრეზიდენტი. იპნ

საქართველოს მთავრობას მოვუწოდებთ, ყურადღება მიაქციონ გაფრთხილებებს, რომ ეს კანონპროექტი არ შეესაბამება ევროკავშირის ნორმებსა და ღირებულებებს, და, რა თქმა უნდა, უარყოფითად იმოქმედებს ევროკავშირისკენ გზაზე საქართველოს პროგრესზე, - ამის შესახებ აშშ-ის სახელმწიფო დეპარტამენტის სპიკერის მოადგილემ, ვედანტ პატელმა "უცხოური გავლენის გამჭვირვალობის შესახებ" კანონპროექტთან დაკავშირებით ბრიფინგზე განაცხადა. მისი თქმით, კანონპროქტი უარყოფითად იმოქმედებს საქართველოს პროგრესზე ევროკავშირისკენ გზაზე. “ღრმად შეშფოთებულები ვრჩებით, რომ ამ კანონპროექტს, თუ ის ძალაში შევა, სტიგმატიზაცია შეუძლია სამოქალაქო საზოგადოების ორგანიზაციების, რომლებიც საქართველოს რიგითი მოქალაქეების ცხოვრების გაუმჯობესებისთვის მუშაობენ. ასევე, შეუძლია მედია ორგანიზაციების სტიგმატიზაცია, რომლებიც საქართველოში მოქმედებენ, რათა საქართველოს მოქალაქეებს მიაწოდონ ინფორმაციას. ვფიქრობთ, რომ სამოქალაქო საზოგადოება, ჟურნალიზმი, მედია ორგანიზაციები ნებისმიერი დემოკრატიული საზოგადოების ქვაკუთხედია, საქართველოს მთავრობას მოვუწოდებთ, ყურადღება მიაქციონ გაფრთხილებებს, რომ ეს კანონპროექტი არ შეესაბამება ევროკავშირის ნორმებსა და ღირებულებებს, და, რა თქმა უნდა, უარყოფითად იმოქმედებს ევროკავშირისკენ გზაზე საქართველოს პროგრესზე”, - განაცხადა პატელმა. იპნ

საქართველოს სახალხო დამცველი ეხმიანება 2024 წლის 16-17 აპრილის ღამეს პარლამენტის მიმდებარე ტერიტორიაზე სამართალდამცავთა მხრიდან ძალისა და სპეციალური საშუალებების გამოყენების ფაქტებს და ასაჯაროვებს მონიტორინგის პირველად შედეგებს: შეკრების თავისუფლების დარღვევა ომბუდმსენი აცხადებს, რომ ჩატარებული მონიტორინგის საფუძველზე გამოვლინდა მშვიდობიანი შეკრების თავისუფლებაში უსაფუძვლო ჩარევის შემთხვევები: 16 აპრილს საღამოს საათებში მას შემდეგ, რაც სამართალდამცავებმა სპეციალური გასასვლელის მოწყობით უზრუნველყვეს პარლამენტის წევრთა ტერიტორიიდან გაყვანა, აქციის მონაწილეებს ეზღუდებოდათ უკანა შესასვლელთან მიახლოებისა და ამგვარი ფორმით პროტესტის გამოხატვის შესაძლებლობა; სახალხო დამცველი განმარტავს, რომ შეკრების თავისუფლების ერთ–ერთი უმნიშვნელოვანესი ელემენტი შეკრების ადგილმდებარეობის არჩევის თავისუფლებაა, რასაც განსაკუთრებული დატვირთვა ენიჭება იმ შემთხვევაში, თუ კონკრეტული ადგილი/დაწესებულება პროტესტის ობიექტია ან კონკრეტულ ლოკაციაზე შეხედულებების გამოხატვა ყველაზე ეფექტიანი საშუალებაა აზრისა თუ პროტესტის ადრესატამდე მისაღწევად. აღნიშნული სტანდარტი დაცული უნდა იყოს ყველა შემთხვევაში, თუ სახეზე არ არის კონკრეტული შეზღუდვის დაწესების დაუძლეველი მიზეზი. 16 აპრილის საღამოს საათებში აქციის მიმდინარეობისას სიტუაცია რამდენჯერმე დაიძაბა, რა დროსაც სამართალდამცავების მხრიდან მომიტინგეთა არაძალადობრივი მიახლოების შემთხვევაშიც ხდებოდა ე.წ. წიწაკის სპრეის გამოყენება. ასევე გამოიკვეთა მშვიდობიან მონაწილეებზე დადევნების შემთხვევები, ტერიტორიის დატოვების იძულების მიზნით. სახალხო დამცველი აღნიშნავს, რომ ამგვარი ქმედებები ცალსახად წარმოადგენს შეკრების თავისუფლებაში გაუმართლებელ ჩარევას; ე.წ. წიწაკის სპრეის გამოყენების შემდეგ, აქციის მონაწილეთა მისამართით გაისმა გამაფრთხილებელი სიგნალი და შინაგან საქმეთა სამინისტრომ აქციის მონაწილეებს დაშლისკენ მოუწოდა. სამინისტროს მხრიდან გაფრთხილების გაჟღერების მომენტისთვის, აქციას ჰქონდა მშვიდობიანი ხასიათი და არ არსებობდა მონაწილეთა დაშლისკენ მოწოდების საფუძველი. სახალხო დამცველი საგანგებოდ აღნიშნავს, რომ შესაძლო ძალადობის იზოლირებული ინციდენტები არ არის საკმარისი მთლიანი შეკრების ძალადობრივად მიჩნევისთვის. ამგვარ გაფრთხილებას აქვს „მსუსხავი ეფექტი“ შეკრების თავისუფლებით სარგებლობაზე, მას შეუძლია შეაკავოს საერთო იდეებისა და ინტერესების მხარდამჭერი ადამიანები თავიანთი აზრის ღიად გამოხატვისაგან. ამასთან, აღსანიშნავია, რომ ძალის გამოყენების გაუმართლებელი შემთხვევები იწვევს სიტუაციის ხელოვნურ ესკალაციას. სავარაუდო არასათანადო მოპყრობა და დაკავებულების უფლებები ომბუდსმენის თქმით, მასობრივი ინფორმაციის საშუალებებით გავრცელებულ კადრებში აშკარად იკვეთება სპეციალური დანიშნულების რაზმის მხრიდან მოქალაქეების მიმართ არაპროპორციული ძალის გამოყენება. სახალხო დამცველი ხაზს უსვამს, რომ სამართალდამცავების უფლებამოსილება, გამოიყენონ პროპორციული ძალა სამართალდარღვევის აღსაკვეთად, არ უნდა იყოს გამოყენებული ბოროტად, აქციის მონაწილეთა დასჯისა თუ შეშინების მიზნით და არ უნდა მიიღოს ძალადობრივი ხასიათი. აღნიშნულის საწინააღმდეგოდ, გავრცელებულ რამდენიმე კადრში ჩანს სამართალდამცავების მხრიდან მოქალაქეებზე აქტიური ძალადობა, რასაც აუცილებლად უნდა მოჰყვეს დროული და ეფექტიანი გამოძიება. ომბუდმსენის განცხადებით, სახალხო დამცველი და მისი წარმომადგენლები 16 აპრილის ღამისა და 17 აპრილის დღის განმავლობაში აქტიურად ხვდებოდნენ დროებითი მოთავსების იზოლატორებში მოთავსებულ დაკავებულებს და მოინახულეს 16 აპრილის აქციაზე დაკავებული ყველა პირი. კერძოდ, სახალხო დამცველის რწმუნებულებმა მოინახულეს 16 პირი (მათგან ორი მონახულების მომენტისათვის იმყოფებოდა კლინიკაში და აპარატის ინფორმაციით, იყვნენ ხელწერილით გათავისუფლებული). დამატებით, პირადად სახალხო დამცველმა 17 აპრილს მოინახულა 18 დაკავებული პირი, მათ შორის 15 აპრილის აქციაზე დაკავებულები. 16-დან 11 პირი მიუთითებდა არასათანადო მოპყრობაზე, არაპროპორციული ძალის გამოყენებაზე და ითხოვდნენ რეაგირებას. ყველა შემთხვევის შესახებ სახალხო დამცველის აპარატმა დაუყოვნებლივ აცნობა სპეციალურ საგამოძიებო სამსახურს და აპარატი განახორციელებს გამოძიების ეფექტიანობის მონიტორინგს. გარდა ამისა, 3 პირი მიუთითებდა არასათანადო მოპყრობის გარემოებებზე, თუმცა ითხოვდნენ ინფორმაციის კონფიდენციალურად დაცვას და რეაგირებაზე უარს აცხადებდნენ. ჟურნალისტებზე ძალადობის ფაქტები შემაშფოთებელია აქციაზე ცალკეული ჟურნალისტების მიმართ განხორციელებული ფიზიკური ძალადობის ფაქტები, ასევე ტელეკომპანია „იმედის“ ჟურნალისტებისთვის საქმიანობის ხელშეშლის ფაქტი. გავრცელებული ინფორმაციით, სპეციალური დანიშნულების რაზმის თანამშრომლები ფიზიკურად გაუსწორდნენ გამოცემა „პუბლიკას“ ჟურნალისტს ალექსანდრე ქეშელავას და წაართვეს ტელეფონიც, რომელიც მოგვიანებით დაუბრუნეს. გავრცელებულ ვიდეო კადრში ნათლად ჩანს როგორ ურტყამენ ჟურნალისტს. ასევე, ვრცელდება ინფორმაცია „ტაბულას” ჟურნალისტ გიორგი ბადრიძეზე ფიზიკური ძალადობის და ტელეფონის წართმევის და „აპრილი მედიის“ ჟურნალისტის გიორგი ბასხაჯაურის ცემისა და სიტყვიერი შეურაცხყოფის თაობაზე. ხაზგასმით უნდა აღინიშნოს, აბობს ობბუდსმენი, რომ ჟურნალისტებს უნდა მიეცეთ საკუთარი საქმიანობის შეუფერხებლად განხორციელების შესაძლებლობა, მათ შორის შეკრების მონაწილეების მხრიდან. საქართველოს სისხლის სამართლის კოდექსის 154-ე მუხლით დასჯადია ჟურნალისტისთვის პროფესიულ საქმიანობაში უკანონო ხელშეშლა. კიდევ უფრო მძიმეა დანაშაული, როდესაც ხდება ჟურნალისტებზე ფიზიკური ანგარიშსწორება მათი საქმიანობიდან გამომდინარე. მსგავსი ფაქტები არსებით საფრთხეს უქმნის ქვეყანაში მედიის თავისუფლების ხარისხს, შეიცავს საშიშ გზავნილს, რომ მედიის წარმომადგენლები, მათი საქმიანობის გამო, შესაძლოა, ანგარიშსწორებას დაექვემდებარონ და ამდენად, მსუსხავი ეფექტის მატარებელია მათ მიერ გამოხატვის თავისუფლების რეალიზებაზე. სახალხო დამცველი მოუწოდებს სპეციალურ საგამოძიებო სამსახურს, მოახდინოს დროული და მკაცრი რეაგირება ყველა ზემოაღნიშნულ ფაქტზე და უზრუნველყოს საზოგადოების ინფორმირება გამოძიების მიმდინარეობის შესახებ. პუბლიკა

გიორგი ანწუხელიძის ცოლი, მაკა ჩიკვილაძე რუსული კანონს და მის საწინააღმდეგო აქციებს ეხმაურება. დღეს, 17 აპრილს „ქართული ოცნების“ და „ხალხის ძალის“ 82-მა დეპუტატმა და „ევროპელი სოციალისტების“ ერთმა დეპუტატმა I მოსმენით მხარი დაუჭირა რუსულ კანონს, რომელიც არასამთავრობო ორგანიზაციებისა და მედიების უცხოური ინტერესების სუბიექტებად დარეგისტრირებას ითვალისწინებს. მმართველმა გუნდმა ეს მაინც გააკეთა, მიუხედავად მოქალაქეების პროტესტის, ადგილობრივი და საერთაშორისო ორგანიზაციების და დასავლური ქვეყნების ლიდერების კრიტიკის პარალელურად. ანალოგიური რეპრესიული კანონი არსებობს რუსეთშიც. სწორედ მის საფუძველზე დევნიან იქ თავისუფალი აზრის მქონე ორგანიზაციებს და ადამიანებს. საქართველოში რუსული კანონის საპარლამენტო მოსმენების პარალელურად მიმდინარეობს საპროტესტო აქციები. 15 და 16 აპრილის ღამეს ხელისუფლებამ მოქალაქეების წინააღმდეგ სპეცრაზმი გამოიყვანა. 16 აპრილს ისინი ფიზიკურად გაუსწორდნენ მოქალაქეებს და ჟურნალისტებს. რამდენიმე მათგანი მოტეხილობებით საავადმყოფოშიც მოათავსეს. პუბლიკა

„ქართული ოცნების” რამდენიმე წევრმა, პარლამენტში რუსული კანონის განხილვის პარალელურად, საგადასახადო კოდექსში ცვლილებისთვის კანონპროექტი დააინიციირა. კანონპროექტის მიხედვით, გარდამავალ დებულებებს ემატება ახალი ნაწილი, რომელიც ითვალისწინებს იმას, რომ – შეღავათიანი დაბეგვრის მქონე ქვეყნებში (ე.წ. ოფშორი) რეგისტრირებულ აქტივები, საქართველოში რეგისტირებულ კომპანიაზე გადმოფორმების შემთხვევაში, გათავისუფლებული იყოს მოგების/საშემოსავლო და იმპორტის გადასახადისგან. როგორც „პუბლიკასთან” საუბრისას ლევან ალაფიშვილი განმარტავს, საუბარია ისეთ საგადასახადო შეღავათებზე, რომელიც გავრცელდება აქტივებზე, რომელიც „დღეს ოფშორულ კომპანიაშია თავმოყრილი და გადმოეცემა იმავე ოფშორის მფლობელი ფიზიკური პირის კონტროლქვეშ არსებულ ქართულ კომპანიას”. თვალსაჩინოებისთვის, იურისტი განმარტავს, რომ: აღნიშნულ კანონპროექტზე პარლამენტის დეპუტატი რომან გოცირიძე წერს, რომ: კანონპროექტთან დაკავშირებით იურისტი, სამოქალაქო აქტივისტი ვახტანგ ნაცვლიშვილიც წერს, რომ: პროექტის ინიციატორები არიან: პაატა კვიჟინაძე, ანტონ ობოლაშვილი, ირაკლი კირცხალია, ბეჟან წაქაძე, ზაალ მიქელაძე, ირაკლი ზარქუა, გოგი მეშველიანი. პუბლიკა ასევე იხილეთ ივანიშვილის ოფშორული კომპანიები Pandora papers-ის გაჟონილ ფაილებში მოხვდა 04 ოქტომბერი, 2021

მასწავლებლის ეროვნული ჯილდოს ათეულთა კლუბის წევრი მასწავლებლები რუსულ კანონთან დაკავშირებით განცხადებას ავრცელებენ. მასწავლებლები მიიჩნევენ, რომ რომ კანონპროექტი არ ემსახურება საქართველოს მოსახლეობის საჭიროებასა და ზიანს მოუტანს მის უმრავლესობას. მასწავლებლები მოუწოდებენ საქართველოს პარლამენტის დეპუტატებს არ დაუჭირონ მხარი აღნიშნულ კანონპროექტს. მასწავლებლები მოუწოდებენ კოლეგებს, გამოხატონ თავიანთი პოზიცია რათა არ დაუშვან აღნიშნული კანონპროექტის მიღება.

პრეზიდენტმა სალომე ზურაბიშვილმა BBC-თან ინტერვიუში განაცხადა, რომ რუსულ კანონს ვეტოს დაადებს. მისი თქმით, მისი ვეტო იქნება ხალხის ხმა, რომელსაც აუცილებლად გაიგებენ. რუსული კანონი პარლამენტმა პირველი მოსმენით მიიღო. კანონპროექტს მხარი 83-მა დეპუტატმა დაუჭირა. რეგისტრაცია 83-მა დეპუტატმა გაიარა. დარბაზში არ იყო ოპოზიცია. პუბლიკა

პარლამენტმა „რუსული კანონი“ პირველი მოსმენით, 83 ხმით მიიღო. კანონპროექტს მხარი დაუჭირა საპარლამენტო უმრავლესობიდან „ქართული ოცნების“ 72 დეპუტატმა და „ხალხის ძალის“ 9 წევრმა, ასევე, „ევროპელი სოციალისტებიდან“ ავთანდილ ენუქიძემ. კანონპროექტს მხარი დაუჭირეს დეპუტატებმა: გიორგი ბარვენაშვილი გია ბენაშვილი ირაკლი (დაჩი) ბერაია რიმა ბერაძე მაია ბითაძე ანზორ ბოლქვაძე ელისო ბოლქვაძე მაკა ბოჭორიშვილი ელგუჯა გოცირიძე ბექა დავითულიანი ალექსანდრე დალაქიშვილი ზაურ დარგალი ისკო დასენი ზაალ დუგლაძე ავთანდილ ენუქიძე გოჩა ენუქიძე გიორგი ვოლსკი ირმა ზავრადაშვილი ირაკლი ზარქუა არჩილ თალაკვაძე ედიშერ თოლორაია რატი იონათამიშვილი დავით კაჭარავა ლადო კახაძე გიორგი კახიანი კახა კახიშვილი პაატა კვიჟინაძე ბაია კვიციანი ირაკლი კირცხალია სუმბატ კიურეღიანი ლევან კობიაშვილი რესან კონცელიძე მარიამ ლაშხი გოდერძი ჩანქსელიანი ქეთევან ჩარკვიანი ვასილ ჩიგოგიძე გიორგი ცაგარეიშვილი ბეჟან წაქაძე ნინო წილოსანი ხატია წილოსანი გრეტა წიწავა შოთა ხაბარელი გიორგი ხახუბია დიმიტრი ხუნდაძე ვიქტორ ჯაფარიძე სალომე ჯინჯოლავა ზაზა ლომინაძე დავით მათიკაშვილი სამველ მანუკიანი ლევან მაჭავარიანი გურამ მაჭარაშვილი ლევან მგალობლიშვილი მამუკა მდინარაძე ირაკლი მეზურნიშვილი გოგი მეშველიშვილი ირაკლი მეძმარიაშილი სავალან მირზოევი გივი მიქანაძე ზაალ მიქელაძე იმედა ნიკურაძე ანტონ ობოლაშვილი ბექა ოდიშარია ანრი ოხანაშვილი შალვა პაპუაშვილი გელა სამხარაული დიმიტრი სამხარაძე ნიკოლოზ სამხარაძე ვიქტორ სანიკიძე ეკა სეფაშვილი დავიტ სონღულაშვილი გიორგი სოსიაშვილი სოზარ სუბარი ალექსანდრე ტაბატაძე ნოდარ ტურძელაძე ირაკლი ქადაგიშვილი ლევან ქარუმიძე მერაბ ქვარაია სალომე ქურასბედიანი ალუდა ღუდუშაური მიხეილ ყაველაშვილი თენგიზ შარმანაშვილი ირაკლი შატაკიშვილი გიორგი ჩაკვეტაძე „ქართული ოცნებიდან“ სხდომას არ ესწრებოდა გივი ჭიჭინაძე. „ქართული ოცნების” მიერ 3 აპრილს დარეგისტრირებულ კანონპროექტში “უცხოური გავლენის გამჭვირვალობის შესახებ”, გასულ წელს “ხალხის ძალის” მიერ ინიციირებული და საპარლამენტო უმრავლესობის მხარდაჭერილი კანონისგან განსხვავებით, ტერმინი „უცხოური გავლენის აგენტი” ჩანაცვლებულია „უცხოური ძალის ინტერესების გამტარებლით”. კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის” სტატუსებს მიანიჭებს. მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლეთისგან. ნეტგაზეთი

საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი ჯოზეფ ბორელი და სამეზობლო პოლიტიკისა და გაფართოების საკითხებში ოლივერ ვარჰეი „მიუხედავად ევროკავშირის არაერთგზის მოწოდებისა მსგავსი კანონმდებლობის გაუქმების შესახებ და მიუხედავად მასობრივი პროტესტისა, დღეს საქართველოს პარლამენტმა პირველი მოსმენით მიიღო კანონი „უცხოური გავლენის გამჭვირვალობის“ შესახებ. ეს ძალიან შემაშფოთებელი მოვლენაა და ამ კანონმდებლობის საბოლოო მიღება უარყოფითად იმოქმედებს საქართველოს პროგრესზე ევროკავშირის გზაზე. ეს კანონი არ შეესაბამება ევროკავშირის ძირითად ნორმებსა და ღირებულებებს. საქართველოს ჰყავს აქტიური სამოქალაქო საზოგადოება, რომელიც ხელს უწყობს ქვეყნის წარმატებულ პროგრესს ევროკავშირში გაწევრიანებისკენ. შემოთავაზებული კანონმდებლობა შეზღუდავს სამოქალაქო საზოგადოებისა და მედია ორგანიზაციების თავისუფლად მოქმედების შესაძლებლობებს, შეიძლება შეზღუდოს გამოხატვის თავისუფლება და უსამართლოდ სტიგმატიზაცია მოახდინოს ორგანიზაციების, რომლებიც სარგებელს აძლევენ საქართველოს მოქალაქეებს“, — ნათქვამია განცხადებაში. ევროკავშირი მოუწოდებს საქართველოს, თავი შეიკავოს კანონმდებლობის მიღებისგან, რომელიც შეიძლება საქართველოს ევროკავშირის გზის კომპრომენტირება მოახდინოს — გზის, რომელსაც მხარს უჭერს საქართველოს მოქალაქეების აბსოლუტური უმრავლესობა. „ქართულმა ოცნებამ“ „რუსული კანონი“ პირველი მოსმენით, 83 ხმით მიიღო. კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის” სტატუსებს მიანიჭებს. მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლეთისგან. ნეტგაზეთი

თვითმხილველების ინფორმაციით, თბილისში, ტაბიძის ქუჩაზე სროლა იყო. გავრცელებული ცნობით, დაჭრილია 3 ადამიანი. როგორც თვითმხილველები განმარტავენ, ჭრილობები ერთს თავის არეში აქვს მიყენებული, ორს კი მხარში. შემთხვევა დღეს, 12:00 საათისთვის მოხდა. “სროლის ხმა მომესმა. 5-6 გასროლის ხმა იყო. მეზობელმა როგორც მითხრა, ის, ვინც ისროდა, თავში არის დაჭრილი, დანარჩენი 2, ვინც თავს იცავდა, მხარშია დაჭრილი. სამივე საავადმყოფოში გადაიყვანეს”, - აღნიშნავს თვითმხილველი. მომხდართან დაკავშირებით დეტალებს “ინტერპრესნიუსი” შინაგან საქმეთა სამინისტროში არკვევს. იპნ gasrola-525459.mp4