tvati

ცნობილმა ჟურნალისტმა და უეფას მედიაოფიცერმა, მამუკა კვარაცხელიამ გამოსცა წიგნი „მოვლენა სახელად გუცაევი“, რომლის პრეზენტაციაც „მიცუბიშის“ ცენტრში დღეს გაიმართა. ღონისძიების პარტნიორი იყო სპორტის, ტურიზმისა და ახალგაზრდობის საერთაშორისო ფონდი და სპორტულ ჟურნალისტთა ასოციაცია. წიგნის პრეზენტაცია უკავშირდება თბილისის „დინამოს“ ლეგენდარული თავდამსხმელის, საქართველოს პირველი არხის გადაცემა „საფეხბურო ტაიმაუტის“ წამყვანის, ვლადიმერ გუცაევის 70 წლის იუბილეს. „ნებისმიერი ადამიანი, ვისაც რაღაც გაუკეთებია ცხოვრებაში, ცდილობს, მემუარები დაწეროს ან ავტობიოგრაფიული წიგნი გამოსცეს. გვიან, მაგრამ ეს მაინც მოვახერხე მამუკა კვარაცხელიასთან ერთად, რომელსაც დიდი მადლობა მინდა, გადავუხადო ყველა იმ ადამიანთან ერთად, ვინც ეს ინიციატივა გაიზიარა. ვფიქრობ, რომ საკმაოდ კარგი და საინტერესოდ საკითხავი წიგნი გამოვიდა“, – ამბობს ვლადიმერ გუცაევი. მამუკა კვარაცხელია, წიგნის ავტორი, უეფას მედიაოფიცერი: „ბავშვობაში კარგად იმიტომ ვსწავლობდი, რომ მამაჩემი მხოლოდ ასეთ შემთხვევაში ყიდულობდა „დინამოს“ თამაშებზე დასასწრებ აბონიმენტს. მაშინ კი ბილეთის ყიდვა ურთულესი ამბავი იყო. მერე გავხდი ჟურნალისტი და ყოველთვის მსურდა, რომ ჩვენი ფეხბურთის ვარსკვლავებზე წიგნი დამეწერა. მიხარია, რომ ერთიანი ძალებით ეს მოვახერხეთ“. ტარიელ ხეჩიკაშვილი, სპორტის, ტურიზმისა და ახალგაზრდობის საერთაშორისო ფონდის პრეზიდენტი: „ამ წიგნის გამოცემით ქართული ფეხბურთის პოპულარიზაციას ვუწყობთ ხელს – მომავალმა თაობებმა უნდა იცოდნენ, რამხელა საგანძურის პატრონები ვართ. ფეხბურთი კი ის სფეროა, რომელიც სულ მავიწყებს ბიზნესსაც და ყველაფერს, რადგან ჩვენთვის ბატონ ვოვას და მისი თაობის ლეგენდარულ „დინამოს“ უდიდესი სიხარული აქვს მონიჭებული. მიმაჩნია, რომ ჩვენი ვალი ამის დაფასებაა. ამიტომ ჩვენი ფონდი მსგავსი წიგნების გამოცემას მომავალშიც ხელს შეუწყობს“. ავტორი - მერაბ მამულაშვილი

ყოფილი პრემიერ-მინისტრის, ბიძინა ივანიშვილის ადვოკატი ლაშა კალანდაძე ბიძინა ივანიშვილის Credit Swiss საქმეებთან დაკავშირებით განახლებულ ინფორმაციას ავრცელებს. როგორც ადვოკატი აღნიშნავს, ბიძინა ივანიშვილი, მიუხედავად იმისა, რომ სასამართლოს გადაწყვეტილება გამოცხადებული აქვს, 2023 წლის 20 მარტიდან დღემდე ვერ ახერხებს აქტივებზე წვდომას. „უნდა აღინიშნოს, რომ ბანკი, აგრეთვე, ბანკის მიერ დაარსებული ტრასტები აცნობიერებენ, რომ მათმა უკანონო და დანაშაულებრივი ქმედებებმა გამოიწვიეს ზიანი, მოსარჩელეთა კანონიერი ინტერესების დარღვევა და მაქსიმალურად ცდილობენ შექმნან ხელოვნული დაბრკოლებები, რომ დროში გაჭიანურდეს მათი მხრიდან ვალდებულებების შესრულება. საზოგადოების ყურადღებას გავამახვილებთ უკანონო, მათ შორის, დანაშაულებრივ ქმედებებს გადარჩენილი ფულადი სახსრებისა და აქტივების განკარგვასთან დაკავშირებით შექმნილი ხელოვნური დაბრკოლებების თაობაზე. როგორც საზოგადოებისთვის ცნობილი არის, ბიძინა ივანიშვილმა დანაშაულს გადარჩენილი თანხების დიდი ნაწილი გადაიტანა სხვა შვეიცარიულ ბანკში. Credit Suisse-ს აღნიშნული თანხებთან მიმართებით რაიმე ინტერესი ვეღარ ექნებოდა, რადგან თანხები, როგორც ითქვა, აღარ ირიცხებოდა Credit Suisse-ში, ის გადატანილი/განთავსებული იყო სხვა ბანკში. სხვა ბანკში გადატანილი აქტივების მმართველად კი დარჩა Credit Suisse-ის ტრასტი, დაფუძნებული გენზის კუნძულზე. ტრასტის ფუნქცია ბენეფიციარების ინტერესების სასარგებლოდ მოქმედება რომ არის, დამატებით აღარ გავამახვილებთ ყურადღებას. უნდა ითქვას, რომ ტრასტი თავის ვალდებულებებს მეტ-ნაკლები წარმატებით თავს ართმევდა 2022 წლის მარტამდე. შემდეგ ეტაპობრივად შეიცვალა ტრასტის დამოკიდებულება თავისი ვალდებულების შესრულების მიმართულებით. ტრასტი სხვადასხვა უსაფუძვლო/გამოგონილი/ხელოვნური მიზეზებით შეეცადა, მინიმუმ, თავისი პასუხისმგებლობის შესრულების დროში გაჭიანურებას და, მაქსიმუმ, მის თავიდან არიდებას. აღნიშნული კი გამოიხატა შემდეგში: ტრასტმა, თავდაპირველად, თანხების გადმორიცხის შეფერხების საფუძვლად მიუთითა „აღმოსავლეთ ევროპაში მიმდინარე გეოპოლიტიკური მოვლენები“. ტრასტი ორი თვის განმავლობაში აღნიშნული მიზეზით უარს ამბობდა თანხების გადმორიცხვაზე. შემდეგ ტრასტმა, თანხა რომ არ გადმოერიცხა, ახალი საბაბი, ევროპარლამენტის 2022 წლის ივნისის რეზოლუცია, მოიმიზეზა, მიუხედავად იმისა, რომ მისთვის ცნობილი იყო, რომ ევროპულ საბჭოს არ ჰქონდა რეზოლუცია გაზიარებული. აშკარა იყო, რომ ტრასტი ცდილობდა, არ შეესრულებია ნაკისრი ვალდებულება. აღნიშნულის გამო მოსარჩელეთა მხრიდან მიღებული იქნა გადაწყვეტილების ტრასტის ლიკვიდაციასთან დაკავშირებით, სასამართლოსთვის მიმართვის გზით. საქმის განხილვა დაინიშნა 2022 წლის სექტემბერში. სხდომები გადაიდო არაერთხელ (ოქტომბერი, ნოემბერი, დეკემბერი და 2023 წლის მარტი). საქმის არსებითი განხილვა დასრულდა 2023 წლის 20 მარტს. საერთაშორისო პრაქტიკის მიხედვით, ტრასტის ლიკვიდაცია ხდება მხარეთა შორის შეთანხმებით, გამონაკლისი შემთხვევების გარდა. გამონაკლისი კი არის მხოლოდ ორი შემთხვევა: (1) როდესაც არის აზრთა სხვადასხვაობა ტრასტის მართვის ხარჯების ანაზღაურებასთან მიმართებით ან/და (2) როდესაც არის შეუთანხმებლობა ტრასტის ბენეფიციარებს შორის ტრასტის ლიკვიდაციასთან და აქტივების განაწილების წესთან მიმართებით. მოცემულ შემთხვევაში, არ არსებობდა არც აზრთა სხვადასხვაობა ხარჯებთან მიმართებით (არსებობდა თანხმობა ტრასტის მიერ შემოთავაზებულ დაანგარიშების ფორმულასთან დაკავშირებით) და არც უთანხმოება ბენეფიაციარებს შორის ტრასტის ლიკვიდაციასთან მიმართებით. პირიქით, არსებობდა ბენეფიაციართა ერთობრილივი სურვილიც და მოთხოვნაც. მიუხედავად იმისა, რომ ტრასტის ლიკვიდაცია უნდა განხორციელებულიყო მხარეთა შეთანხმების საფუძველზე, ტრასტმა უარი განაცხადა აღნიშნულ შეთანხმებაზე და მიუთითა, რომ ტრასტის ლიკვიდაციისთვის საჭირო იყო სასამართლოსთვის მიმართვა. როგორც წესი, ერთდღიან სასამართლო პროცესებს აქვს ადგილი, საერთაშორისო პრაქტიკის მიხედვით. მიუხედავად აღნიშნულისა, ტრასტი მაქსიმალურად შეეცადა და შეიძლება ითქვას, რომ თავისი უსაფუძვლო და ხელოვნური სტრატეგიული ნაბიჯებით მიაღწია საქმის განხილვის გაჭიანურებას. ჩვენი ადგილობრივი ადვოკატები (გენზის კუნძული) ფიქრობდნენ, რომ საქმის განხილვა ტრასტის ლიკვიდაციასთან დაკავშირებით დასრულდებოდა ერთ დღეში, თუმცა მათი იმედები არ გამართლდა. შემდეგ ელოდებოდნენ, რომ სასამართლო გადაწყვეტილება წერილობითი ფორმით ხელმისაწვდომი იქნებოდა რამდენიმე დღის განმავლობაში, თუმცა მოლოდინი ამ მიმართულებითაც გაუცრუვდათ. შეიძლება ითქვას, რომ რჩებათ შთაბეჭდილება, რომ როგორც ხდებოდა ხელოვნურად საქმის განხილვის გაჭიანურება, ისე ხდება პროცედურების დაბრკოლება გადაწყვეტილების წერილობითი ფორმით ჩამოყალიბების მიმართულებითაც. ფაქტიურად, გამოდის, რომ სასამართლო გადაწყვეტილებით აღსდგა წვდომა აქტივების, მათ შორის, ფულადი სახსრების დიდ ნაწილზე, თუმცა იმის გამო, რომ გადაწყვეტილება ჯერ კიდევ არ არის წერილობითი ფორმით ჩამოყალიბებული, ვერ ხერხდება სასამართლო გადაწყვეტილებით მინიჭებული უფლების, აქტივებზე წვდომის, პრაქტიკული რეალიზება. ამდენად, ბიძინა ივანიშვილი, მიუხედავად იმისა, რომ სასამართლოს გადაწყვეტილება გამოცხადებული აქვს, 2023 წლის 20 მარტიდან დღემდე ვერ ახერხებს აქტივებზე წვდომას. და ბოლოს, გაცნობებთ, რომ მაქსიმალურად შევეცდებით მოვახდინოთ საზოგადოების ინფორმირება მიმდინარე საქმეებთან მიმართებით“, - აცხადებს ადვოკატი. იპნ

სამხრეთმა კორეამ 11 აპრილს განაცხადა, რომ აშშ-ის გაჟონილი სადაზვერვო დოკუმენტების „მნიშვნელოვანი ნაწილი“, რომელშიც საუბარია სეულის შეშფოთებაზე უკრაინისთვის იარაღის მიწოდების თაობაზე, ყალბია. ეს დოკუმენტები ნაწილია უფრო ფართო მასშტაბის გაჟონვისა, რომელიც პენტაგონმა შეაფასა როგორც „ძალიან სერიოზული“ მუქარა ეროვნული უსაფრთხოებისთვის. როგორც იტყობინებიან, ზოგიერთი ფაილი შეიცავს სამხრეთ კორეის უსაფრთხოების სფეროს წარმომადგენელთა შეშფოთებას, რომ სამხრეთ კორეაში ნაწარმოები იარაღი საბოლოოდ შეიძლება მოხვდეს უკრაინაში, რაც ეწინააღმდეგება სეულის პოლიტიკას, იარაღი არ მიაწოდოს მეომარ ქვეყნებს. აშშ-ისა და ნატოს საიდუმლო დოკუმენტები, რომლებიც ეხება უკრაინის კონტრიერიშს, იარაღის მიწოდებას, ჯარების რაოდენობას, ასევე ახლო აღმოსავლეთსა და ჩინეთს, მარტში გამოჩნდა ინტერნეტში. როგორც გამოცემა Politico წერს, გაჟონვას მოჰყვა კრიზისი აშშ-სა და მის მოკავშირეებს შორის ურთიერთობებში. წყაროებმა გამოცემას უთხრეს, რომ აშშ-ის დაზვერვის, სახელმწიფო დეპარტამენტისა და პენტაგონის მაღალი რანგის თანამშრომლები დაუკავშირდნენ თავიანთ კოლეგებს სხვა ქვეყნებში, რათა გაექარწ####ბინათ სადაზვერვო მასალების გამოქვეყნების თაობაზე გაჩენილი შეშფოთება. პენტაგონმა განაცხადა, რომ აშშ-ის თავდაცვის სამინისტრო ამოწმებს გაჟონილი დოკუმენტების ნამდვილობას, რათა შეაფასოს, რა გავლენა შეიძლება იქონიოს ამან აშშ-ის, მისი მოკავშირეებისა და პარტნიორების უსაფრთხოებაზე. გამოძიებას აწარმოებს აშშ-ის იუსტიციის სამინისტრო. აღძრულია სისხლის სამართლის საქმე. სამხრეთ კორეის პრეზიდენტის ოფისმა სამშაბათს განაცხადა, რომ სამხრეთ კორეისა და აშშ-ის თავდაცვის მინისტრები შეთანხმდნენ, რომ „დოკუმენტების მნიშვნელოვანი ნაწილი ფაბრიკაციაა“. დოკუმენტების გაჟონვის შემდეგ სამხრეთ კორეაში გაისმა კრიტიკა მგრძნობიარე დოკუმენტების არასაკმარისი უსაფრთხოების თაობაზე. ამის პასუხად სამხრეთ კორეის პრეზიდენტ იუნ სოკ იოლის ოფისმა 11 აპრილს განაცხადა, რომ დოკუმენტების უსაფრთხოება უმაღლეს დონეზეა. რადიო თავისუფლება

პროგრამის – „სპორტი უფროსი თაობისთვის“ აქტუალობიდან გამომდინარე, ასევე გეოგრაფიული ხელმისაწვდომობის გაზრდის მიზნით, თბილისის მერიის ინიციატივით, დაგეგმილია პროგრამის გაფართოება და მასში სხვადასხვა კერძო და საჯარო სამართლის იურიდიული პირის (სპორტული ორგანიზაციები) ჩართვა, რისთვისაც მუნიციპალიტეტი ობიექტების რეგისტრაციას იწყებს. დედაქალაქის მერია, 60 წლის და ამავე ასაკს გადაცილებული მოქალაქეების ფიზიკური აქტივობისა და ჯანმრთელობის ხელშეწყობის მიზნით, მუნიციპალიტეტის დაქვემდებარებაში არსებულ სპორტულ ცენტრებში აღნიშნულ პროგრამას გასული წლის ოქტომბრიდან ახორციელებს. თბილისის მერიის ინფორმაციით, პროგრამაში ჩართვა შეუძლია ნებისმიერ სპორტულ ობიექტს, რომელიც აკმაყოფილებს შემდეგ მოთხოვნებს: ა) ერთ სივრცეში ფუნქციონირებადი საცურაო აუზი და ფიტნესდარბაზი, აღჭურვილი დასწრების ელექტრონული აღრიცხვის მოწყობილობით; ბ) ჰიგიენის ნორმების დაცვა და ფუნქციონირებადი საშხაპეების არსებობა; გ) უნდა ჰყავდეს სერტიფიცირებული ექიმი, ფიტნესინსტრუქტორი და მაშველი ან ინსტრუქტორი; დ) ერთდროულად არანაკლებ 20 მოსარგებლის მომსახურებაზე გათვლილი საცურაო აუზი (სიგრძე არანაკლებ – 15 მ, სიგანე არანაკლებ – 10 მ, სიღრმე არანაკლებ – 1,20 მ); ე) ერთდროულად არანაკლებ 15 მოსარგებლის მომსახურებაზე გათვლილი ფიტნესდარბაზი (სავარჯიშო სივრცე არანაკლებ – 150 კვ. მ). მომსახურების მიმწოდებელმა ქვეპროგრამაში ჩართვის შესახებ განცხადებას უნდა დაურთოს: ა) ექიმის უმაღლესი სამედიცინო განათლების დამადასტურებელი დოკუმენტი (დიპლომი) ან/და ლიცენზია; ბ) მაშველის/ინსტრუქტორის და ფიტნესინსტრუქტორის სერტიფიცირების დამადასტურებელი დოკუმენტი; გ) საცურაო აუზის, ფიტნესდარბაზის, საშხაპეებისა და სველი წერტილების ამსახველი ფოტომასალა. მომსახურების მიწოდების მსურველებმა ქვეპროგრამაში ჩართვის მოთხოვნით უნდა მიმართონ თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურს და წარადგინონ სამსახურის უფროსის ბრძანებით განსაზღვრული განაცხადის ფორმა. მომსახურების მიმწოდებლების განცხადებების მიღება განხორციელდება თბილისის მერიის მისამართზე: შარტავას ქ. N7, მერიის კანცელარია. დაინტერესებულ პირებს განცხადებების შეტანა ასევე შეუძლიათ თბილისის რაიონული გამგეობების სერვისცენტრებში ან ელექტრონულ პლატფორმაზე: www.ms.gov.ge (ელექტრონული ხელმოწერისთვის აუცილებელია სპეციალური მოწყობილობა).

უკრაინის შეიარაღებული ძალების მიერ კონტრშეტევის დაწყების გადაწყვეტილების მიღება ბოლო მომენტში მოხდება, - ამის შესახებ უკრაინის ეროვნული უსაფრთხოებისა და თავდაცვის საბჭოს მდივანმა ოლექსი დანილოვმა განაცხადა. "თუ ვინმე ფიქრობს, რომ მხოლოდ ერთი ვარიანტი გვაქვს, ეს ასე არ არის. სამი ვარიანტიც კი ცოტაა", - აღნიშნა დანილოვმა. მისი განმარტებით, ოპერაციის დაწყების გადაწყვეტილებას უკრაინის შეიარაღებული ძალების მთავარსარდალი, ვალერი ზალუჟნი მიიღებს. დანილოვი პენტაგონის საიდუმლო დოკუმენტების გაჟონვის ფაქტსაც გამოეხმაურა და აღნიშნა, „სპეციალური სამსახურები უფრო ფხიზლად უნდა იყვნენ, როცა საქმე საიდუმლო დოკუმენტებს ეხება“. ამასთან, მისი თქმით, დოკუმენტების გაჟონვა კონტრშეტევასთან დაკავშირებულ გეგმებზე არ იმოქმედებს. იპნ

იაშვილის სახელობის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე განმარტავს, რა წესები უნდა დავიცვათ აღდგომის დღეებში კვერცხით ინტოქსიკაციის თავიდან ასარიდებლად. როგორც ივანე ჩხაიძე აცხადებს, კვერცხის მიღების შემთხვევაში სალმონელოზის ინფექციის რისკია, რის გამოც, მისი შენახვის პირობების დაცვა აუცილებელია. რაც შეეხება უშუალოდ რეკომენდაციებს, ივანე ჩხაიძის ინფორმაციით, აუცილებელია კვერცხი განთავსდეს მაცივრის სიღრმეში და არა მისთვის გამოყოფილ თაროზე, ამასთან, დასძენს, რომ კვერცხის შენახვისთვის იდეალური ადგილია პლასტიკის, ან მუყაოს ჩარჩო, რა მდგომარეობაშიც სასურსათო ქსელებშია წარმოდგენილი. „გარდა იმისა, რომ კვერცხი გამორჩეული ალერგენია, არის მეორე საშიშროება, ინტოქსიკაცია. პირველ რიგში, სასურველია, კვერცხი შეინახოთ არა მაცივარში კვერცხისთვის გამოყოფილ თაროში, არამედ მაცივრის სიღრმეში, იქ ტემპერატურა გაცილებით დაბალია. ამასთან, უმჯობესია კვერცხი შეინახოთ პლასტიკის, ან მუყაოს ჩარჩოში, როგორც მაღაზიაში იყიდება. ეს არის იდეალური ადგილი შენახვისთვის. მარტივი რჩევაა, რომ კვერცხი მაგრად იყოს მოხარშული, სასურველია იხარშებოდეს არანაკლებ 10 წუთისა. კვერცხის შემთხვევაში გვაქვს ისეთი ინფექციის რისკი, როგორიც არის სალმონელოზი. ეს შეიძლება იყოს კვერცხის ნაჭუჭშიც და კვერცხშიც. მისი მოხარშვის პირობები და ყველა ეს რჩევა ამ ინფექციას თავიდან აგვაცილებს. თუ კვერცხი გარედან არის დაბინძურებული, კარგად გარეცხეთ თბილი წლით და საპნით. შეღებილი კვერცხის მაცივარში შენახვის ხანგრძლივობა არ უნდა აღემატებოდეს 1 კვირას. ამასთან, კვერცხი ოთახის ტემპერატურაზე არ უნდა იყოს არაუმეტეს 2 საათისა. დეკორატიული ფუნქციის მქონე კვერცხი ცალკე დაალაგეთ“, - აღნიშნა ჩხაიძემ მედიაცენტრ „მთავარში“.

რვა ოპოზიციონერი დეპუტატი შინაგან საქმეთა მინისტრს, ვახტანგ გომელაურს ინტერპელაციის ფორმატში პარლამენტში იბარებს. როგორც დღეს გამართულ პრესკონფერენციაზე ოპოზიციონერმა დეპუტატმა, ხატია დეკანოიძემ განაცხადა, მათი კითხვა ეხება იმას, რამდენად პროპორციული იყო ძალა, რომელიც სამართალდამცავებმა მიმდინარე წლის 7-8 მარტს დემონსტრანტების წინააღმდეგ გამოიყენეს და წარმოადგენდა თუ არა ის შეკრებისა და გამოხატვის თავისუფლებაში უკანონო ჩარევას. „ასევე, მოხდა თუ არა შესაბამისი წესის დაცვით სპეციალური საშუალებების (წყლის ჭავლის, ე.წ.წიწაკის სპრეის და ცრემლმდენი გაზის) გამოყენება?“ – აღნიშნავს დეკანოიძე. ავტორი - თეონა მანაგაძე

მინდა, როგორც იუსტიციის ყოფილმა მინისტრმა და სტრასბურგის სასამართლოს იურისტმა, მკაცრად და პრინციპულად დავგმო მოსამართლეების შესახებ აშშ-ის გადაწყვეტილება, ეს იყო მიუღებელი, მით უმეტეს, რომ ამას ჰქონდა სიურპრიზის ფორმა, – ამის შესახებ საქართველოს ვიცე-პრემიერმა, კულტურის, სპორტისა და ახალგაზრდობის მინისტრმა, თეა წულუკიანმა განაცხადა. წულუკიანის თქმით, პარტნიორები, მეგობრები ასე ალბათ არ იქცევიან, თუმცა მეგობრობაშიც, პარტნიორობაშიც ხდება ხოლმე გარკვეული გაუგებრობა. ამასთან, მისივე თქმით, გაუგებარია აშშ-ის გადაწყვეტილება იმის ფონზე, რომ სწორედ დასავლეთი იყო მომხრე, ეს მოსამართლეები უვადო მოსამართლეები გამხდარიყვნენ. „მინდა, როგორც იუსტიციის ყოფილმა მინისტრმა და ადამიანის უფლებათა ევროპული სასამართლოს იურისტმა, რაც გულისხმობს, დაახლოებით 20-წლიან გამოცდილებას, მკაცრად, ხმამაღლა და პრინციპულად დავგმო ჩვენი მეგობრის, აშშ-ის ეს გადაწყვეტილება. ეს იყო მიუღებელი, მით უმეტეს, რომ ამას ჰქონდა, როგორც ირკვევა, სიურპრიზის ფორმა. პარტნიორები, მეგობრები ასე ალბათ არ იქცევიან, თუმცა მეგობრობაშიც, პარტნიორობაშიც ხდება ხოლმე, როდესაც არის გარკვეული გაუგებრობა. ამ მეგობრობას და პარტნიორობას იმდენად დიდი ფესვები და ტრადიცია აქვს, რომ ამგვარი ტიპის გაუგებრობები მას ვერაფერს დააკლებს, თუმცა, რასაკვირველია, ჩვენ ვალდებული ვართ, ვინც წარმოვადგენთ ქართველ ერს ხელისუფლებაში, დავგმოთ ის, რაც არის ჩვენი ქვეყნის ისტორიისთვის, სუვერენიტეტისა და დამოუკიდებლობითვის დაუშვებელი აქტი სანქცირების სახით. ჩვენ ვითხოვთ წესებით თამაშს, განსაკუთრებით, როდესაც მეგობრებს და პარტნიორებს ეხება საქმე. მაგალითისთვის, ვითხოვთ, რომ ევროკავშირი მოგვექცეს სამართლიანად, ვინაიდან უსამართლო იყო ქართველი ერისთვის – და არა რომელიმე ხელისუფლებისთვის – ის გადაწყვეტილება, რაც ბრიუსელმა მიიღო. მოლდოვა და უკრაინა როდესაც წინ დააყენა და უთხრა, გაიარეთ და საქართველო არ გაატარა იმ გზაზე, რომელზეც საქართველო არის ამ ორ ქვეყანაზე უფრო მეტად წარმატებული. ასევე, მე დაუშვებლად მიმაჩნია სანქცირებაზე აშშ-ის მიერ მიღებული გადაწყვეტილება, ვინაიდან არ არის წარმოდგენილი მტკიცებულებები. გაუგებარია ეს გადაწყვეტილება იმის ფონზე, რომ სწორედ დასავლეთი იყო იმის მომხრე, რომ ეს მოსამართლეები უვადო მოსამართლეები გამხდარიყვნენ“, – აღნიშნა წულუკიანმა. თეა წულუკიანის თქმით, ჩვენი ქვეყნის მართლმსაჯულება განვითარების სწორ გზას ადგას და ძალიან დიდი წარმატებები აქვს როგორც მიუკერძოებლობის, ასევე დამოუკიდებლობის კუთხით. „მე, რა თქმა უნდა, ბევრი რამ ვიცი, ბევრი რამ მახსოვს, მაგრამ ისიც მახსოვს, სად ვმუშაობ. მე პოლიტიკური თანამდებობის პირი ვარ და ყველაფერზე საჯაროდ საუბრის უფლება არ მაქვს. უბრალოდ, შევახსენებ ყველას, რომ ჩემს, „ქართული ოცნების“ პოლიტიკურ გუნდთან ერთად, მე ვედექი სათავეში მართლმსაჯულების რეფორმის პირველ ტალღას, მეორე ტალღას, მესამე ტალღას და საქართველოში არასწრულწლოვანთა მართლმსაჯულების კოდექსის შემოღებას, რამაც, მეოთხე ტალღასთან ერთად, რომელიც საქართველოს პარლამენტმა განახორციელა წინა მოწვევისას, მოიტანა საქართველოსთვის დიდი ნახტომები მართლმსაჯულებაში. იმდენად, რომ დღეს ჩვენ ვართ ევროპული ქვეყნების საუკეთესო ჯგუფში, მოწინავე პოზიციებზე და არა მხოლოდ ევროპაში, არამედ ნატო-ს წევრ ქვეყნებშიც და ჩვენი მართლმსაჯულება ადგას განვითარების სწორ გზას. მიუკერძოებლობის, ასევე დამოუკიდებლობის კუთხით ძალიან დიდი წარმატებები აქვს. ეს პროცესი გრძელდება და ქართველ ხალხს, როცა ჩვენ აღარ ვიქნებით ხელისუფლებაში, ეს დღე როდესაც დადგება, ჩვენ დავუტოვებთ არა იმას, რაც დაუტოვა ადეიშვილმა, რომელსაც ჩექმის ქვეშ ჰყავდა ხელისუფლების ეს შტო, სასამართლო, არამედ დამოუკიდებელ და მოუკერძოებელ სასამართლოს. შესაბამისად, მე ყველას ვთხოვდი, როგორც ამ ქვეყნის ერთი რიგითი შვილი, მოეპყარით საქართველოს ისე, როგორც ამას იმსახურებს. ჩვენ დამოუკიდებელი და ძალიან ბევრ ჭირგამოვლილი ხალხი ვართ. შესაბამისად, ჩვენ ვიდგებით ერთად, ყოველთვის ერთ მუშტად შეკრული, რათა დავიცვათ ჩვენი სუვერენიტეტი, მშვიდობა, დამოუკიდებლობა და სტაბილურობა“, – განაცხადა თეა წულუკიანმა. 1ტვ

რიგგარეშე სხდომაზე კენჭისყრა რომ არ შედგა, ამის საფუძველი შემიძლია, ერთი სიტყვით აღვწერო, ეს არის უპასუხისმგებლობა. როცა გაიგზავნა წერილი პრეზიდენტთან, ამ წერილს ხელმოწერა აქვს ორივე დეპუტატის – წითლიძისა და ხაბეიშვილისაც, მათ იციან, რომ ხელმოწერის შემდეგ პრეზიდენტს 48 საათი აქვს, რომ სხდომა ჩანიშნოს, – ამის შესახებ ოპოზიციონერმა დეპუტატმა, ხათუნა სამნიძემ განაცხადა. სამნიძის თქმით, ხაბეიშვილისა და წითლიძის ხელმოწერით დასტურდება, რომ იცოდნენ სხდომის სავარაუდო თარიღი და ამის მიუხედავად დატოვეს ქვეყანა. „იმდენად მნიშვნელოვანი მგონია საგამოძიებო კომისიის შექმნა, რომ ვიზიტის გაუქმებაც ნორმალური იქნებოდა. იყვნენ დეპუტატებიც, ვინც გააუქმა. ახლა არსებითია ორივე მათგანმა და თითოეულმა დეპუტატმა პარლამენტში განაცხადოს, რომ მორიგ სხდომაზე, როცა ჩაინიშნება კენჭისყრა, ყველა იქნება დარბაზში, რადგან ეს არის ინდივიდუალური პასუხისმგებლობა. ახლა უფრო მნიშვნელოვანია თითოეული დეპუტატისგან კონკრეტული განცხადება, რომ ისინი იქნებიან მომავალ კვირას სასესიო დარბაზში. ვიცი, რომ არიან დეპუტატები, ვინც საკუთარი ვიზიტები გადადო, დღის წესრიგი შეცვალა, გადაანაცვლა, რადგან საგამოძიებო კომისიის შექმნა ახლა, განსაკუთრებით, სანქციების შემდეგ არის ძალიან მნიშვნელოვანი. როდესაც რომელიმე დეპუტატი ამბობს, რომ მათ არ იცოდნენ ან კომუნიკაციის პრობლემა იყო, მათ თუ შეიძლება, ჰკითხეთ, იქნებიან თუ არა აუცილებლად მომავალ კვირას პარლამენტში სასესიო დარბაზში კენჭისყრის დღეს“, – განაცხადა სამნიძემ. ოპოზიციამ პრეზიდენტს 11 აპრილს პარლამენტის რიგგარეშე სხდომის მოწვევის მოთხოვნით 10 აპრილს, დღის პირველ ნახევარში მიმართა. მოგვიანებით კი ოპოზიციის წარმომადგენლებმა პრეზიდენტ სალომე ზურაბიშვილს მიმართეს, რომ, ანა წითლიძისა და ლევან ხაბეიშვილის მიერ ქვეყნის დატოვების გამო, 11 აპრილს მათ მიერ მოთხოვნილი რიგგარეშე სხდომა არ დაენიშნა. ავტორი - თეო ბარბაქაძე

შინაგან საქმეთა სამინისტროს ინფორმაციით, დააკავეს კაცი, რომელიც მოქალაქეებს მოტყუებით ჰპირდებოდა მექსიკის გავლით აშშ-ში არალეგალურად გადაყვანას. როგორც სამინისტრო აცხადებს, გამოძიებამ დაადგინა, რომ ბრალდებული 7000 აშშ დოლარის სანაცვლოდ, საქართველოს მოქალაქეებს მექსიკის გავლით ამერიკის შეერთებული შტატების ტერიტორიაზე არალეგალურად გადაყვანას ჰპირდებოდა, მათ თანხას წინასწარ ართმევდა, დანაპირებს კი აღარ ასრულებდა. ეს მუხლი თავისუფლების აღკვეთას 6-დან 9 წლამდე ვადითი ითვალისწინებს. ნეტგაზეთი

მსახიობი ბესო მეგრელიშვილი 59 წლის ასაკში გარდაიცვალა - ინფორმაციას მოზარდ მაყურებელთა თეატრის პროდიუსერი ავრცელებს. როგორც მისი ახლობლები წერენ მან 1 აპრილს სპექტაკლი ითამაშა. „პირველ აპრილს სპექტაკლი ითამაშა“; „ჩემთვის სულ ნელიკოს ავთოდ დარჩება“ ;„ოხ გული როგორ მეტკინა“ - წერენ კომენტარებში. გთავაზობთ ინტერვიუს არქივიდან, რომელიც მასთან ჟურნალ „სარკის“ ჟურნალისტმა ჩაწერა. მსახიობ ბესო მეგრელიშვილის ცხოვრებაში ტაძრისკენ სავალი გზა მაშინ გამოჩნდა, როცა განსაცდელების წინაშე დადგა. მაშინ პირადი ცხოვრება აერია, უმუშევარიც დარჩა და დეპრესიაში ჩავარდა. ერთადერთი ხსნა კი ეკლესია აღმოჩნდა. ბესო მეგრელიშვილი: ტაძარში სიარული წლების წინ დავიწყე. მაშინ პირველად ჩავაბარე აღსარება, ვეზიარე. თბილისში, ჩიტაძის ქუჩაზე მდებარე წმინდა ნინოს სახელობის ეკლესიაში მივედი, სადაც მამა დავით (ქვლივიძე) მსახურობდა. ის ყოველთვის გვერდით მედგა და სულიერად მეხმარებოდა. ერთი-ორმა მოძღვარმა დახმარებაზე უარი იმის გამო მითხრა, რომ მსახიობი ვარ. ხომ იცით, ზოგიერთი სასულიერო პირი ძალიან მკაცრია ასეთ საკითხებში და ეს მათი საქმეა. მე, როგორც ერთი ჩვეულებრივი ადამიანი, ყველას ვურჩევ, ღმერთთან იმდენად ახლოს მივიდნენ, რამდენადაც შეძლებენ. მომწონს, როდესაც ადამიანები ეკლესიურად ცხოვრობენ“,- ამბობდა ერთ-ერთ ინტერვიუში. primetime.ge

„ნაცების“ დროინდელ სასამართლოს ხელისუფლება „აპრავებს“, ჩვენ „ნაცების“ დროინდელის „გაპრავება“ რომ არ გვინდა, ზუსტად ამიტომ ვაკრიტიკებთ ამ სასამართლოს, - ამის შესახებ თბილისის ყოფილმა პროკურორმა მაია მწარიაშვილმა „პალიტრანიუსის“ გადაცემა „ნიუსრუმში“ განაცხადა. მისი თქმით, სასამართლოს რეალური დანიშნულება ის არის, რომ ხელისუფლება დისკომფორტში ამყოფოს და არა პირიქით. „ქართული მართლმსაჯულება არის იქ, სადაც არის მისდამი ნდობა ქართულ საზოგადოებაში. მე და თქვენ რა დამოკიდებულებაც გვაქვს სასამართლოსადმი, იქ არის ჩვენი სასამართლოც და არა იქ, რა დამოკიდებულება აქვს მისდამი ჩვენს ხელისუფლებას. ჩვენი სასამართლო განა ხელისუფლებისთვის უნდა იყოს კომფორტული და ხელისუფლებას კი არ უნდა მოსწონდეს, სასამართლო დისკომფორტში უნდა ამყოფებდეს ხელისუფლებას, ეს არის მისი მთავარი დანიშნულება, ამიტომ არის ის დამაბალანსებელი ხელისუფლება, ის დაუკრეფავში არ უშვებს აღმასრულებელ და საკანონმდებლო ხელისუფლებას“,- განაცხადა მაია მწარიაშვილმა. ამასთან, ყოფილი პროკურორი განმარტავს, რომ ხელისუფლება სტატისტიკებით მანიპულირებს, როდესაც აცხადებს, რომ ქართული სასამართლოსადმი ნდობა გაიზარდა. „რა შეეხება რეიტინგებს, უწესო ხელისუფლებას ყოველთვის შეუძლია ციფრებით მანიპულირება და საზოგადოების შეცდომაში შეყვანა. სტატისტიკებით მანიპულირება არახალი თემაა და ძალოვან სტრუქტურებს ყოველთვის უყვარდათ ამ სტატისტიკებით მანიპულირება და ყოველთვის ყველა ხელისუფლების პირობებში იყო საზოგადოების მოტყუების იარაღი. წარმატებით ასრულებს ამას ეს ხელისუფლებაც, უნდა სდიო ნაბიჯ-ნაბიჯ შენც და სულ ოპონირების რეჟიმში იყო. მართლმსაჯულებისა და სამართლის უზენაესობის ინდექსს რაც შეეხება და მოწინავე პოზიციებზე ვართო - 2015 წლის შემდეგ, ყველა პარამეტრში გვაქვს დრამატული ვარდნა სამოქალაქო, სისხლის სამართლის მართლმსაჯულებაში. რაც შეეხება სტრასბურგს, ამ ბოლო დროს დაიხვიეს ხელზე, რომ საჩივრებმა სტრასბურგში 11-ჯერ იკლო და ეს არის ინდიკატორი, რომ ქართული სასამართლოების მიმართ ნდობა მაღალიაო. ესეც ერთ-ერთი თაღლითური „მანევრია“. იუსტიციის საბჭო თვითონ აწვდის ხოლმე ხელისუფლებას ასეთ მარგალიტებს, მერე ხელისუფლება - მოლაპარაკე თავებს და ა.შ. რა ციფრებზეც მანიპულირებენ, ის ციფრები აღებულია არა შესული საჩივრებიდან, არამედ განხილვაში დატოვებული საქმეებიდან, ეს ორი დიამეტრულად სხვადასხვა ციფრია, იმიტომ, რომ სტრასბურგი ცხრილავს ძალიან დიდი დოზით. 2013-2014 წლიდან იქ ძალიან შეიცვალა მიდგომები, რეგულაციები, იმიტომ, რომ სასამართლო არანორმალურად გადაიტვირთა და გაცხრილვის მექანიზმები ამუშავდა და საქმეები იცხრილება ძალიან დიდი დოზით. ასევე, ხელისუფლება ითვლის 2012 წლამდე რიცხვებს და ამბობს ვითომ 2012 წლის შემდეგ კლება წამოვიდაო, ნახეთ რა ციფრს უმატებენ, რაც როგორი არაკეთილსინდისიერებაა -2008 წელს ძალიან გაიზარდა საქართველოს წინააღმდეგ საჩივრები, სადღაც 3300 იყო მარტო 2008-ში და ეს იყო სულ რუსეთიდან რუსეთ-საქართველოს ომთან დაკავშირებით საქართველოს წინააღმდეგ საჩივრები, რუსეთის მოქალაქეების. ეს ამ ომთან დაკავშირებული ორკესტრირებული კამპანია იყო საქართველოს წინააღმდეგ და ამან გაზარდა ასე დრამატულად. ამას ითვლიან და გვეუბნებიან, რომ მაშინ 11-ჯერ მეტი იყოო. ეს არანაირი ინდიკატორი არ არის სასამართლოებისთვის ნდობის გასაზომად. ეს არის სრული მანიპულირება და უხერხულია!“- განაცხადა მწარიაშვილმა.

სამოქალაქო საზოგადოება ხელისუფლებას მიმართავს. როგორც გავრცელებულ მიმართვაშია ნათქვამი, ნებისმიერი საკანონმდებლო ინიციატივა ან მოქმედება, რომელიც ევროკავშირის ძირეულ ფასეულობებს დაუპირისპირდება, იქნება სტატუსის მიღების საბოტაჟი და კონსტიტუციის 78-ე მუხლის საწინააღმდეგო ქმედება. ამასთან, განმარტავენ, რომ სამოქალაქო საზოგადოების ორგანიზაციების, საქმიანობის მთავარი მიზანი კანდიდატის სტატუსის მოპოვებისთვის მაქსიმალური ძალისხმევის გაწევა იქნება. „გასულ თვეში საქართველოს მოქალაქეებმა კიდევ ერთხელ დავამტკიცეთ, რომ ვართ ევროპული ფასეულობების ერთგული და არ ვაპირებთ ევროკავშირში მიმავალი გზიდან გადახვევას. ევროკავშირში გაწევრიანების, როგორც ეროვნული იდეის ირგვლივ ფართო საზოგადოებრივი კონსოლიდაციით ვაჩვენეთ, რომ ქართველი ხალხი ვიმსახურებთ კანდიდატის სტატუსს. სხვადასხვა ინფორმაციით, ევროკომისიამ შესაძლოა 2023 წლის ოქტომბერში გასცეს საქართველოსთვის ევროკავშირის წევრობის კანდიდატის სტატუსის მინიჭების რეკომენდაცია, თუ საქართველო მომდევნო პერიოდში გააგრძელებს რეფორმებზე მუშაობას და არ გააუარესებს ქვეყანაში ადამიანის უფლებებისა და დემოკრატიის მდგომარეობას. კანდიდატის სტატუსის მიღებაზე პასუხისმგებლობა სრულად ეკისრება ხელისუფლებას. აუცილებელია, ხელისუფლებამ გადახედოს და გააძლიეროს ძალისხმევა ისტორიული შესაძლებლობის მისაღწევად. ნებისმიერი საკანონმდებლო ინიციატივა ან მოქმედება, რომელიც ევროკავშირის ძირეულ ფასეულობებს დაუპირისპირდება, იქნება სტატუსის მიღების საბოტაჟი და კონსტიტუციის 78-ე მუხლის საწინააღმდეგო ქმედება. ვაცხადებთ, რომ ჩვენი, სამოქალაქო საზოგადოების ორგანიზაციების, საქმიანობის მთავარი მიზანი კანდიდატის სტატუსის მოპოვებისთვის მაქსიმალური ძალისხმევის გაწევა იქნება. ჩვენ, მთელმა საზოგადოებამ, 2023 წლის ბოლოს, სიამაყით უნდა განვაცხადოთ, რომ საქართველო ევროკავშირის წევრობის კანდიდატი ქვეყანაა!“,- აღნიშნულია მიმართვაში, რომლის ხელმომწერი ორგანიზაციები არიან : 4710 Contemporary Art Gallery CENN - კავკასიის გარემოსდაცვითი ორგანიზაციების ქსელი Center for Social Sciences Equality 17 Femina GWAction Group Populus Rei ა(ა) იპ ქართული მედია ჯგუფი ა(ა)იპ "ტოლერანტობის სამყარო" ა(ა)იპ ახალგაზრდული ორგანიზაცია ცვლილებები თანაბარი უფლებებისათვის ა(ა)იპ ნეო ტვ ა/ო "ვიმეგობროთ"; მოძრაობა "ინკლუზიური საზოგადოება - საქართველო" ააიპ „მთის თემი“ ააიპ მშობლები განათლებისთვის ადამიანის უფლებათა და სოციალური სამართლიანობის დაცვის კვლევის ცენტრი ადამიანის უფლებების განვითარების ფონდი აიპ პროფესიო - პიროვნული და პროფესიული განვითარების ცენტრი ალტერნატივა ჯორჯია სამოქალაქო აქტივობების ცენტრი არ გადადო არასამთავრობო ორგანიზაცია "უფლებებისა და განათლებისათვის" ასოციაცია "ევროპის დროით" ასოციაცია "სოციალური ქოლგა" აღმოსავლეთ ევროპის ცენტრი მრავალპარტიული დემოკრატიისთვის (EECMD) ახალგაზრდა მწვანეები ახალგაზრდული ალტერნატივა ახალგაზრდული ინიციატივების რეგიონალური ასოციაცია - აირა ახალქალაქის ბიზნეს ცენტრი ახლგაზრდები დემოკრატიული ცვლილებებისთვის ბავშვთა მენტალური ჯანმრთელობის საქართველოს ასოციაცია ბრიჯ-ინოვაცია და განვითარება გამომძიებელ ჟურნალისტთა გაერთიანება "აი, ფაქტი" განათლების განვითარების და დასაქმების ცენტრი განათლების პოლიტიკის, დაგეგმვისა და მართვის საერთაშორისო ინსტიტუტი განათლებისა და განვითარების სივრცე განვითარებისა და დემოკრატიის ცენტრი (CDD) გარემოსდაცვითი სათემო ორგანიზაცია ეკო გორელ ფოტოგრაფთა კლუბი გურიის სამოქალაქო ცენტრი დასაქმების და გადამზადების ცენტრი დემოკრატ მესხთა კავშირი დემოკრატიის კვლევის ინსტიტუტი დემოკრატიის მცველები დემოკრატიული ჩართულობის ცენტრების ქსელი დოკუმენტური კინოს ასოციაცია (DOCA Georgia) ევროპულ-ქართული ინსტიტუტი (EGI) ეკო ცენტრი ზემო სვანეთის ადგილობრივი განვითარების ჯგუფი ზემო სვანეთის სათემო ორგანიზაცია ზუგდიდის დემოკრატიული ჩართულობის ცენტრი თავისუფალ ჟურნალისტთა სახლი თანაბარი ჩართულობის შესაძლებლობის ცენტრი EPC თანასწორობის მოძრაობა თბილისი პრაიდი იგპ ქალთა ასოციაცია "თანხმობა" ილიას სახელმწიფო უნივერსიტეტი ინოვაციებისა და ცვლილებების ინსტიტუტი ინფორმაციის თავისუფლების განვითარების ინსტიტუტი (IDFI) კავკასიური დიალოგი კანონის უზენაესობის ცენტრი კაქტუს მედია კეთილდღეობის და განვითარების ცენტრი კომლი კონსულტაციისა და ტრენინგის ცენტრი CTC ლომეკი მარნეულის დემოკრატ ქალთა საზოგადოება მედია ცენტრი კახეთი მედიაომბუდსმენი მედიის განვითარების ფონდი მედიის ინსტიტუტი მედიის, ინფორმაციის და სოციალური კვლევების ცენტრი მიშგოვ ლარდა (ზემო სვანეთი) მსოფლიო გამოცდილება საქართველოსთვის მშვიდობისა და ინტეგრაციის საერთაშორისო ცენტრი მწვანე ალტერნატივა ნინოწმინდის სათემო რადიო-ტვ «ნორი» ოზურგეთის დემოკრტიული ჩართულობის ცენტრი ორბელიანი საქართველო ორგანიზაციული, სტრატეგიული და დემოკრატიული პრიორიტეტების ცენტრი პრევენცია პროგრესისთვის პროაქტივ ჯგუფი ჯორჯია / ProActive Group Georgia რაჭის სათემო ორგანიზაცია რეგიონული პარტნიორობის ცენტრი (RPC) რეპროდუქციული განათლების ჰაბი საბჭოთა წარსულის კვლევის ლაბორატორია საერთაშორისო- გამჭვირვალობა საქართველო საზოგადოებრივი მოძრაობა "მომავლის ჭიათურა" საზოგადოებრივი ხელოვნების პლატფორმა სათემო რადიო მარნეული საინფორმაციო სამედიცინო-ფსიქოლოგიური ცენტრი თანადგომა სალამ სამართლიანი არჩევნებისა და დემოკრატიის საერთაშორისო საზოგადოება სამოქალაქო აქტივობის ცენტრი ,, ლაკმუსი " სამოქალაქო იდეა სამოქალაქო ინიციატივა - Civic Initiative სამოქალაქო მოძრაობა თავისუფლებისთვის სამოქალაქო საზოგადოების ინსტიტუტი CSI სამოქალაქო ჩართულობისა და აქტივიზმის ცენტრი (CEAC) საორსა საფარი საქართველო - დემოკრატია და სამოქალაქო საზოგადოება საქართველოს ახალგაზრდა იურისტთა ასოციაცია საქართველოს დემოკრატიული ინიციატივა საქართველოს მედია-კლუბი საქართველოს პოლიტიკის ინსტიტუტი (GIP) საქართველოს რეფორმების ასოციაცია (GRASS) საქართველოს სამოქალაქო განვითარების ასოციაცია საქართველოს სასამართლოს გუშაგი საქართველოს ფსიქოსოციალური დახმარების ასოციაცია ნდობა საქართველოს ფსიქოტრავმის საზოგადოება საქართველოს ქალთა დემოკრატიის ქსელი საქართველოს ღია საზოგადოების ფონდი სექტორი 3 სიქა - საგანმანათლებლო ინიციატივების ქართული ასოციაცია სიღნაღის რეგიონის სოციალურად უმწეოთა თერაპიის კავშირი. თემი ქედელი სოლიდარობის თემი სოციალური სამართლიანობის ცენტრი სოციალური საწარმო გუმბათი სუფთა ამბავი ტელეკომპანია "ლტვ" ტყიბულის რაიონის განვითარების ფონდი უფლებები საქართველო ფენიქსი 2009 ფრანკლინის კლუბი ქალები საერთო მომავლისთვის (WECF) - საქართველო ქალთა ინიციატივების მხარდამჭერი ჯგუფი, WISG ქალთა პოლიტიკური რესურს ცენტრი ქალთა საინფორმაციო ცენტრი ქალთა ფონდი საქართველოში ქვემო ქართლის ქალთა ასოციაცია "ქალი და სამყარო" ქვიარ ასოციაცია - თემიდა ქობულეთის სამოქალაქო საზოგადოება ღია სივრცე კავკასია ყვარლის ევროკლუბი შავი ზღვის ეკო აკადემია შპს "ქართული კენკრა" ჩემი იმერეთი ცვლილებებისა და კონფლიქტების მართვის ცენტრი "პარტნიორები-საქართველო" ციხის საერთაშორისო რეფორმა წამების მსხვერპლთა ფსიქოსოციალური და სამედიცინო რეაბილიტაციის ცენტრი GCRT წითელი ხიდი ჰეპა პლიუსი

საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, თბილისი-სენაკი-ლესელიძის საავტომობილო გზის 147-ე კმ-ზე მცირე ქვათაცვენის გამო, დადგა გზის გაწმენდის საჭიროება, რის გამოც, აღნიშნული გზის კმ114-კმ194 მონაკვეთზე (ახალსოფლის სატრანსპორტო კვანძი-ზესტაფონი) ყველა სახის ავტოტრანსპორტის მოძრაობა დროებით აკრძალულია. მათივე ცნობით, გზის სავალი ნაწილის გაწმენდამდე, დროის აღნიშნულ პერიოდში, მსუბუქი ავტოტრანსპორტის მოძრაობა განხორციელდება შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზის გავლით, ხოლო მისაბმელიანი და ნახევრადმისაბმელიანი ავტოტრანსპორტის მოძრაობა აკრძალულია. „თბილისი-სენაკი-ლესელიძის საავტომობილო გზის 147-ე კმ-ზე საავტომობილო გზის გაწმენდითი სამუშაოების დასრულებისთანავე, რიკოთის მიმართულებით მოძრაობა აღდგება დაწესებული სპეციალური რეჟიმით“, - ნათქვამია ინფორმაციაში. იპნ

„ჭიაკოკონობის ღამეს“ ნარჩენის დაწვაზე კონტროლი გამკაცრდება, კანონდამრღვევი კი დაჯარიმდება. ამის შესახებ გარემოსა დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის მიერ გავრცელებულ ინფორმაციაშია ნათქვამი. „აღდგომის ბრწყინვალე დღესასწაულის წინა ოთხშაბათს ტრადიციული რიტუალი - „ჭიაკოკონობა“ იმართება. რიტუალის დროს ცეცხლის დასანთებად, მოსახლეობა სხვადასხვა ტიპის მუნიციპალურ ნარჩენს იყენებს. აღნიშნული ნარჩენების დაწვისას, გამოიყოფა გარემოსა და ადამიანთა ჯანმრთელობისათვის საშიში ტოქსიკური, კანცეროგენური ნივთიერებები და აირები. საფრთხე ექმნება მოსახლეობის, განსაკუთრებით კი, ბავშვების ჯანმრთელობას, რომლებიც აქტიურად მონაწილეობენ ტრადიციულ რიტუალში. გარემოსა დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტი მოსახლეობას აფრთხილებს, რომ ნარჩენების მართვის კოდექსის შესაბამისად, ნებისმიერი ტიპის ნარჩენის (მათ შორის, საბურავების, პლასტიკის მასალის, ფოთლების) ღია წესით დაწვა აკრძალულია. ნარჩენების მართვის კოდექსის თანახმად, მუნიციპალური არასახიფათო ნარჩენების - ფოთლების, ბაღის/პარკის ნარჩენების, საყოფაცხოვრებო ნარჩენების ღია წესით დაწვა გამოიწვევს დაჯარიმებას 500 ლარის ოდენობით, ხოლო საბურავის, რეზინისა და სხვა ელასტომერული მასალის ღია წესით დაწვის შემთხვევაში, სამართალდამრღვევს 1 500 ლარის ოდენობის ჯარიმის გადახდა მოუწევს. გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლები, „ჭიაკოკონობის ღამეს“ კონტროლს გაამკაცრებენ და თითოეულ სამართალდარღვევაზე შესაბამის რეაგირებას მოახდენენ“, - ნათქვამია ინფორმაციაში.

უკრაინაში დაბრუნდა 24 ბავშვი, რომლებიც ოკუპირებული ხერსონიდან რუსეთში გაიტაცეს. ხერსონის საოლქო ადმინისტრაციის ხელმძღვანელის, ოლქესანდრ პროკუდინის განცხადებით, ბავშვები სამშობლოში 10 აპრილს დაბრუნდნენ. უკრაინის ეროვნული საინფორმაციო ბიუროს განცხადებით, 2022 წლის 24 თებერვლიდან მოყოლებული ოკუპირებული ტერიტორიებიდან რუსეთში ცხრამეტ ათასზე მეტი არასრულწლოვნის დეპორტაციის ფაქტია დაფიქსირებული. უკრაინაში ამ ეტაპზე მხოლოდ 361 დაბრუნდა. ჰააგის სისხლის სამართლის საერთაშორისო სასამართლოს მიერ რუსეთის პრეზიდენტ ვლადიმერ პუტინზე და ბავშვთა უფლებების კომისრის მარია ლვოვა-ბელოვაზე დაკავების ორდერის გამოცემა სწორედ ბავშვების დეპორტაციას უკავშირდება – ეს საერთაშორისო სამართლით ომის დანაშაულად მიიჩნევა. ნეტგაზეთი

ბოლო 2 კვირა ორი ვირუსის სიჭარბით არის გამორჩეული - ქვეყანაში ძირითადად ის ვირუსი ცირკულირებს, რომელიც გაციებას იწვევს, - ამის შესახებ იაშვილის სახელობის ბავშვთა ცენტრალური საავადმყოფოს სამედიცინო დირექტორმა, თსსუ-ის პროფესორმა ივანე ჩხაიძემ განაცხადა. როგორც ივანე ჩხაიძე განმარტავს, შეგვიძლია ვთქვათ, რომ გრიპის სეზონი საქართველოში დასრულდა. „ეს კვირა გამორჩეულია. პირველად, ბოლო 6 თვის განმავლობაში, ლაბორატორიულად დადასტურებულ შემთხვევებში გრიპის არსებობა არ დაფიქსირდა. იმედია, ასეთი სტატისტიკა გაგრძელდება. ჩვენ შეგვიძლია ვთქვათ, რომ გრიპის სეზონი საქართველოში დასრულდა. რაც შეეხება კორონავირუსს, შემთხვევები კვლავ ფიქსირდება, გრიპისგან განსხვავებით კი კორონავირუსი მთელი წელი იქნება. ბოლო 2 კვირა ორი ვირუსის სიჭარბით არის გამორჩეული, ეს არის რინოვირუსი, რომელიც ვირუსების განაწილებაში 50%-ზე მეტია. დღეს ქვეყანაში წამყვანი ვირუსია რინოვირუსი და ადენოვირუსი. რინო და ადენოვირუსი განეკუთვნება გაციების გამომწვევი ვირუსების კატეგორიას, მათ მძიმე მიმდინარეობა არ ახასიათებთ. შეგვიძლია ვთქვათ, რომ ქვეყანაში ძირითადად ის ვირუსი ცირკულირებს, რომელიც გაციებას იწვევს და არა ფილტვების ანთებას. რინოვირუსს და ადენოვირუსს უმრავლეს შემთხვევაში არ სჭირდება ჰოსპიტალიზაცია“, - აღნიშნა ჩხაიძემ მედიაცენტრ „მთავარში“. იპნ

მაინტერესებს სად, როდის და რა სიტყვებით ოდესმე შემიდარებია როდიონოვის ჩექმა და საქართველოს პოლიცია!!!! ან ასეთი შედარება რომელ ავადმყოფ ტვინში უნდა დაბადებულიყო? - ამის შესახებ საქართველოს პრეზიდენტი სოციალურ ქსელში წერს. მისი თქმით, ვინც მსგავს ინფორმაციას ავრცელებს, შეურაცხყოფს სახელმწიფოს, მის ინსტიტუტებს და საკუთარ თავს. "არცერთ ჭორს და ცილისწამებას როგორც წესი არ ვპასუხობ, რასაც ალბათ ამ 4 წლის მანძილზე თქვენც შეამჩნევდით… მაგრამ ყველაფერს ზღვარი აქვს! და მაინტერესებს სად, როდის და რა სიტყვებით ოდესმე შემიდარებია როდიონოვის ჩექმა და საქართველოს პოლიცია!!!! ან ასეთი შედარება რომელ ავადმყოფ ტვინში უნდა დაბადებულიყო? ვინც ამას ავრცელებს, ის შეურაცხყოფს სახელმწიფოს, მის ინსტიტუტებს და… საკუთარ თავს. საერთოდ ტვინში, სულში და გულში რა უნდა ჰქონდეს ადამიანს, რომ ასეთი რამ მოიფიქროს და ჭორად ჩამოაყალიბოს!", - წერს პრეზიდენტი სოციალურ ქსელ "ფეისბუქის" პირად გვერდზე. IPN

ოპოზიციის წარმომადგენლები საქართველოს პრეზიდენტს მიმართავენ, რიგგარეშე სხდომა, რომელიც მათ მოითხოვეს, 11 აპრილს არმოიწვიოს. ამის შესახებ ოპოზიციონერმა დეპუტატმა თამარ კორძაიამ პარლამენტში ბრიფინგზე განაცხადა. თამარ კორძაიას განცხადებით, გადაწყვეტილების შეცვლის მიზეზი გახდა ის, რომ ორმა ოპოზიციონერმა დეპუტატმა - ლევან ხაბეიშვილმა, ანა წითლიძემ დაუგეგმავად დატოვა საქართველო და ოპოზიციას არ ჰყოფნის ხმები იმისათვის, რომ მიიღოს გადაწყვეტილება საგამოძიებო კომისიის შექმნასთან დაკავშირებით. „დღეს მეორედ მივმართავთ საქართველოს პრეზიდენტს. სამწუხაროდ ჩვენს მიერ გაგზავნილი მიმართვის შემდეგ, რომელიც ეხებოდა ხვალ, 11 აპრილს რიგგარეშე სესიის მოწვევას, მოულოდნელად ორმა დეპუტატმა, დაუგეგმავად დატოვა საქართველო, ამიტომ ხვალ ოპოზიციას არ ჰყოფნის ხმები იმისათვის, რომ მიიღოს გადაწყვეტილება საგამოძიებო კომისიის შექმნასთან დაკავშირებით. იმისათვის, რომ აღმოვფხვრათ ზედმეტი ინტერპრეტაციები, კიდევ ერთხელ ვუსვამ ხაზს, რომ ამ თხოვნის მზიანი პრეზიდენტისადმი არის ის, რომ საქართველოს პარლამენტში მყოფი ოპოზიცია შეთანხმებულია საგამოძიებო კომისიის განსაკუთრებულ მნიშვნელობაზე და ამიტომ გვსურს, რომ კენჭისყრა ჩატარდეს სწორედ მაშინ, როდესაც ოპოზიცია იქნება სრულად წარმოდგენილი პარლამენტში. კიდევ ერთხელ ბოდიშს ვუხდით საქართველოს პრეზიდენტს იმისათვის, რომ ეს დაუგეგმავი ვითარება შეიქმნა, მაგრამ საკითხის ჩავარდნას, ჯობია საკითხის გადაწყვეტის გადადება, ამიტომ, მივმართავთ კვლავ პრეზიდენტს, რომ ხვალინდელი სხდომა არ მოიწვიოს“, - განაცხადა თამარ კორძაიამ. ინფორმაციისთვის, ოპოზიციონერმა დეპუტატებმა პრეზიდენტს 11 აპრილს პარლამენტის რიგგარეშე სხდომის მოწვევის მოთხოვნით დღეს მიმართეს. სალომე ზურაბიშვილთან გაგზავნილ მოთხოვნას 46 დეპუტატი აწერს ხელს. პარლამენტის რიგგარეშე სხდომის დღის წესრიგის ერთადერთი საკითხი „რეფორმების ჯგუფის" მიერ ინიცირებული დადგენილების პროექტის მიღება უნდა ყოფილიყო, რომელიც სასამართლოს სისტემაში კორუფციულ და სხვა კანონსაწინააღმდეგო ქმედებათა შემსწავლელი დროებითი საგამოძიებო კომისიის შექმნას ითვალისწინებს. პარლამენტის დროებითი საგამოძიებო კომისიის გამოსაკვლევი საკითხები უნდა იყოს: სასამართლო სისტემაში მოსამართლეთა გავლენიანი ჯგუფის არსებობა, რომელიც უკანონოდ ერევა მართლმსაჯულების განხორციელებასა და მოსამართლეთა შერჩევა-დაწინაურებაში, მოსამართლეებზე უკანონო ზემოქმედების, კორუფციისა და ნეპოტიზმის სავარაუდო ფაქტები. იპნ

აშშ-ის პრეზიდენტმა ჯო ბაიდენმა განაცხადა, რომ ის 2024 წლის საპრეზიდენტო არჩევნებში მონაწილეობას მიიღებს. ინფორმაციას ამერიკული მედიასაშუალება NBC-ი ავრცელებს. „ვაპირებ არჩევნებში მონაწილეობის მიღებას. მაგრამ ჩვენ ჯერ მზად არ ვართ, ამის გამოსაცხადებლად“, - აღნიშნა ბაიდენმა NBC-ის გადაცემა „Today“-სთვის მიცემულ ინტერვიუში. როგორც ბაიდენმა განაცხადა, ის გეგმავს დემოკრატიული პარტიის კანდიდატი იყოს 2024 წლის არჩევნებში. ამასთან, ბაიდენმა და ვიცე-პრეზიდენტმა კამალა ჰარისმა განაცხადეს, რომ ისინი ერთად იყრიან კენჭს. იპნ

მთავრობა დგას სანქცირებული მოსამართლეების გვერდით. ჩვენ ვართ მომსწრე პარტიასა და სასამართლო ხელისუფლებას შორის ზღვარის წაშლის საშიში პრეცედენტის, - ამის შესახებ ყოფილი პრემიერ-მინისტრი, პარტია „საქართველოსთვის“ ლიდერი გიორგი გახარია „ტვიტერში“ წერს. „ორივე - პარტია და სასამართლოს „გავლენის ჯგუფი“ პოლიტიკური კორუფციის და შესაბამისად, ივანიშვილის უკანონო ძალაუფლების წყაროა და გამიზნულად აზიანებს საქართველოს ევროინტეგრაციის ინტერესს“, - აღნიშნავს გახარია.

მივესალმები ირაკლი შენგელიას პოზიციას, ჩვენთან მიმართებაში კორუფციული ბრალდებების წამოყენება აბსურდია, ეს უნდა გასაჩივრდეს ამერიკის შეერთებული შტატების სასამართლოში, ბუნებრივია, ამასთან დაკავშირებით ჩვენ დაგვჭირდება გარკვეულ პროცედურებში გარკვევა და ჩახედვა, – ამის შესახებ სააპელაციო სასამართლოს უვადო მოსამართლემ, ლევან მურუსიძემ განაცხადა. მურუსიძის განცხადებით, მნიშვნელოვანია, რომ ქართულმა საზოგადოებამ გაიგოს, რა ხდება სინამდვილეში. „პირველ რიგში, ჩემთვის მნიშვნელოვანია, რომ ქართულ საზოგადოებას გავაგებინოთ, რეალურად რაც ხდება ჩვენთან მიმართებაში, ზოგადად სასამართლო სისტემაში. ეს არის პირდაპირი თავდასხმა მართლმსაჯულების სისტემაზე, საუბარია მოსამართლეებისთვის მესიჯის გაგზავნაზე, რომ თუ მოსამართლეები არ მივიღებთ იმ გადაწყვეტილებას, რომელიც ამერიკის ელჩისთვის, საელჩოსთვის არის მისაღები, ბუნებრივია, მათი მხრიდან იქნება განხორციელებული ამგვარი ზეწოლა. ამის აშკარა და მკვეთრი მაგალითი არის ერთ-ერთ გახმაურებულ საქმეზე მოსამართლე ლაშა ჩხიკვაძის შემთხვევა. როდესაც მთლიანად საელჩოს წარმომადგენლები და ზოგადად მათ დაქვემდებარებაში მყოფი არასამთავრობო სექტორი, ზოგიერთი პოლიტიკური პარტია, რომელთაც, მიმაჩნია, რომ საერთოდ არ აქვთ დამოუკიდებლობის არავითარი ხარისხი, იყურებიან საელჩოსკენ. მათ განაცხადეს მოცემულ საქმეზე, ისე რომ დაწერილი არ იყო და წაკითხულიც არ ჰქონდათ, რომ ეს კანონი იყო უკანონო და დაუსაბუთებელი. მოსამართლის მიერ გადაწყვეტილება ჯერ არ იყო დაწერილი და საელჩოს წარმომადგენლებმა, მათ დაქვემდებარებაში მყოფმა არასამთავრობო სექტორმა, პოლიტიკურმა პარტიებმა განაცხადეს, რომ მათ მიაჩნიათ, რომ ეს კანონი იყო უკანონო და დაუსაბუთებელი. ეს ერთი პრობლემაა. შემდეგ, ამას მოჰყვა ის, რომ კონკრეტულ მოსამართლეს მოსთხოვეს ანგარიში, შემდგომ უარი უთხრეს აშშ-ში წაყვანაზე. რა მიზეზი უნდა ყოფილიყო, მითხარით. გვარამიას საქმეზე პარლამენტში ერთ-ერთი დეპუტატი გამოდიოდა, იურისტი იყო სხვათა შორის და ამბობდა, რომ რაშიც ნიკა გვარამიას დასდეს მსჯავრი, რომ მივყვეთ, ყველა დეპუტატები არიან პასუხისგებაში მისაცემიო. მე სრული პასუხისმგებლობით მინდა, გითხრათ, რომ აღნიშნულ პიროვნებას საერთოდ წარმოდგენა არ აქვს იმ თემაზე, რაზეც იყო მოცემული საქმე. რომ ვუსმენდი პროკურორს, რომელიც გამოდიოდა ტელევიზიით, აბსოლუტურად სხვა ბრალდებაზე არის საუბარი და სხვა ბრალდებასთან დაკავშირებით საუბრობენ შემდგომ არასამთავრობო ორგანიზაციები და ა.შ“, – განაცხადა მურუსიძემ. ამასთან, ჟურნალისტებმა მოსამართლეს კითხვა დაუსვეს „რუსთავი 2“-ის საქმესთან დაკავშირებით. მურუსიძის განცხადებით, საქმის მოსამართლეებზე აშშ-ის საელჩოს, არასამთავრობო ორგანიზაციების წარმომადგენლები, ევროპარლამენტარები ამბობდნენ, რომ არაკომპეტენტურები იყვნენ. „ამ საქმეზე წაკითხული მაქვს საერთაშორისო გამოხმაურებები, რომელთან დაკავშირებითაც საელჩოს წარმომადგენლები, მათ შორის არასამთავრობო ორგანიზაციები, ევროსაბჭოს სხვადასხვა სტრუქტურა, ევროპარლამენტარები ამბობდნენ, რომ ეს მოსამართლეები, რომლებიც იხილავენ საქმეს, არიან არაკომპეტენტურები და პირდაპირ მიდიოდა სასამართლო სისტემის ბულინგი. ამაში ჩართული იყო საელჩოებიც, ევროპარლამენტარებიც. ამასთან დაკავშირებით იღებებდნენ რეზოლუციებს, რომ იზღუდება სიტყვის თავისუფლება და ა.შ. სტრასბურგის სასამართლომ, რომელიც მოცემულ შემთხვევაში არის ყველაზე კომპეტენტური ორგანო, დაადასტურა, რომ გადაწყვეტილება, რომელიც მიღებულ იქნა „რუსთავი 2“-ის საქმეზე შიდა სასამართლოების მხრიდან, იყო აბსოლუტურად სწორი. აქედან გამომდინარე, ეს მაძლევს იმის თქმის საფუძველს, რომ აღვნიშნო, ის ევროპარლამენტარები, საელჩოები, არასამთავრობო ორგანიზაციები, რომლებიც პირდაპირ ლანძღავდნენ მოსამართლეებს, კი არ აკრიტიკებდნენ, შეიძლება გააკრიტიკო, მაგრამ ისინი ლანძღავდნენ, აბულინგებდნენ, ტალახს ესროდნენ. მე მაძლევს ეს საფუძველს, ვთქვა, რომ ისინი სჩადიოდნენ ისეთ ქმედებას, რომელიც არ შეესაბამება არც კანონმდებლობას, არც ზნეობას და ასე შემდეგ“, – განაცხადა ლევან მურუსიძემ. ავტორი - კესო ქაფიანიძე

ჩვენი კომენტარები და შეფასებები რესპუბლიკური საავადმყოფოს მყისიერად რეაბილიტაციას, ან დემონტაჟს არ ითვალისწინებდა - არ არსებობს სამსახურის დაკარგვის საშიშროება, ან იმის, რომ კლინიკა თავისით დაიშალოს და ყურადღება არ მივაქციოთ, პაციენტი ვერ მიიღონ, - ამის შესახებ ჯანდაცვის მინისტრმა, ზურაბ აზარაშვილმა რესპუბლიკური საავადმყოფოს მედპერსონალთან შეხვედრის შემდეგ განაცხადა, სადაც კლინიკასთან დაკავშირებულ საკითხებზე იმსჯელეს. მინისტრის თქმით, წლის ბოლომდე აუცილებლად გვეცოდინება, რესპუბლიკური საავადმყოფოს დემონტაჟი ჩატარდება თუ რეაბილიტაცია. „ჩვენი კომენტარები და შეფასებები ამ შენობის მყისიერად რეაბილიტაციას ან დემონტაჟს არ ითვალისწინებდა. ჩვენ ექსპერტების მხრიდან საბოლოო დასკვნებს ველოდებით. ჩვენი კომენტარები და შეფასებები პირველადი შეფასებებიდან გამომდინარე იყო, რომელიც ამ ეტაპზე გვაქვს და დიდი ალბათობით იგულისხმებოდა შენობის რეაბილიტაციის ნაცვლად, ხარჯთეფექტიანობიდან გამომდინარე შენობის დემონტაჟი და მის ნაცვლად თანამედროვე სტანდარტების ახალი კლინიკის აშენება. წლის ბოლომდე აუცილებლად გვეცოდინება, მოხდება დემონტაჟი, თუ რეაბილიტაცია. ზუსტი თარიღის თქმა გამიჭირდება, თუმცა მედპერსონალი ჩვეულებრივად გააგრძელებს საქმიანობას. პაციენტებს ჩვეულებრივ რეჟიმში მიიღებენ. რესპუბლიკური საავადმყოფო იმ სტანდარტებში იქნება მოქცეული, რისი მიღწევაც კლინიკებს 2025 წლისთვის მოუწევთ. აქედან გამომდინარეა დაჩქარებული ის პროცესები, რაც შესწავლას გულისხმობს. არ არსებობს სამსახურის დაკარგვის საშიშროება, ან იმის, რომ კლინიკა თავისით დაიშალოს და ყურადღება არ მივაქციოთ, პაციენტი ვერ მიიღონ“,- აღნიშნავს მინისტრი. იპნ

შევთანხმდით კომუნიკაციის ფორმებზე. შეიძლება გასული პერიოდის განმავლობაში ცუდი კომუნიკაციის ბრალიც იყო ის გარკვეული პროტესტი, - ამის შესახებ ჯანდაცვის მინისტრმა, ზურაბ აზარაშვილმა რესპუბლიკური საავადმყოფოს მედპერსონალთან შეხვედრის შემდეგ განაცხადა, სადაც კლინიკასთან დაკავშირებულ საკითხებზე იმსჯელეს. მისივე თქმით, რესპუბლიკური კლინიკის რეაბილიტაციის თაობაზე გადაწყვეტილება მაშინ იქნება მიღებული, როდესაც ექსპერტიზის დასკვნებს მიიღებენ. „შევთანხმდით კომუნიკაციის ფორმებზე, შეიძლება გასული პერიოდის განმავლობაში ცუდი კომუნიკაციის ბრალიც იყო ის გარკვეული პროტესტი. ეს ჩემთვის გასაგებია. გარკვეული ინფორმაციის მიღების შემდეგ, მათ გავაცნობთ და მათთან ერთად შევჯერდებით იმ გადაწყვეტილებაზე, რაც იქნება კლინიკის დემონტაჟი, რეაბილიტაცია, თუ სართულების ცვლილება. ხუთი სხვადასხვა ტიპის დასკვნას ველოდებით, ასევე, ქვეყნის გარეთ სხვადასხვა ექსპერტის ჩართულობით ვაკეთებთ. მინდა კარგად შეთანხმებულად დავრწმუნდეთ, რა არის საჭირო და აუცილებელი, რომელი გადაწყვეტილება იქნება სწორი. ვადასტურებ, მთავრობის გადაწყვეტილებაა, რომ სახელმწიფო წარმოდგენილი უნდა იყოს მძლავრი, 500 საწოლზე გათვლილი მაღალტექნოლოგიური, თანამედროვე კლინიკით“, - აღნიშნა მინისტრმა. ინტერპრესნიუსი

სანამ რესპუბლიკურ საავადმყოფოზე საექსპერტო დასკვნები არ დაიდება, იქამდე კლინიკა უწყვეტ რეჟიმში გააგრძელებს ფუნქციონირებას, - ამის შესახებ რესპუბლიკური საავადმყოფოს კრიტიკული მედიცინის და ინტენსიური თერაპიის განყოფილების ხელმძღვანელმა, გიორგი დუნდუამ ჯანდაცვის მინისტრთან შეხვედრის შემდეგ განაცხადა, სადაც რესპუბლიკურ საავადმყოფოსთან დაკავშირებულ საკითხებზე იმსჯელეს. როგორც მან აღნიშნა, მედიკოსების პროტესტმა შედეგი გამოიღო. “სანამ საექსპერტო დასკვნები არ დაიდება, სანამ კონკრეტული სამშენებლო საექსპერტო შეთანხმება არ იქნება, იქამდე კლინიკა უწყვეტ რეჟიმში გააგრძელებს ფუნქციონირებას. მინისტრმა ბრძანა, რომ ყველა გადაწყვეტილებაზე კომუნიკაცია იქნება და ჩართულები ვიქნებით. რაც შეეხება პროტესტს, ჩვენ ეს ინფორმაცია უნდა მივიტანოთ თანამშრომლებთან. პროტესტი არავის თვითმიზანი არ არის. მინდა გითხრათ, რომ ჩვენმა პროტესტმა საკმაოდ დიდი შედეგი გამოიღო, იმის მცდელობაა, რომ პროცესში ჩართული იყოს ის ხალხი, ვის კისერზეც უნდა გადავიდეს ეს ყველაფერი. ვერ ვიტყვი, რომ კრიზისი განმუხტულია. კრიზისის განმუხტვა 1 წუთში არ ხდება. დაიწყო ის ნაბიჯი, რომ კრიზისული სიტუაცია სამუშაო რეჟიმში გადავიდეს“, - აღნიშნავს გიორგი დუნდუა. ინტერპრესნიუსი