tvati

მდინარე ბუბისწყლის ხეობაში სტიქიის გავრცელების არეალში (26 ჰა) დაუშვებელია რაიმე სახის ახალი ინფრასტრუქტურის მოწყობა და არსებული შენობა-ნაგებობების ფუნქციონირება. ამის შესახებ გარემოს ეროვნული სააგენტოს მიერ 2023 წლის 3 აგვისტოს მდინარე ბუბისწყლის ხეობაში განვითარებული სტიქიური მოვლენების შეფასების ანგარიშშია ნათქვამი. „მდინარე ბუბისწყლის ხეობაში ღვარცოფების ფორმირებისა და ტრანზიტის ზონის არეალში რაიმე სახის კაპიტალური დამცავი ღონისძიებების გატარება, მდინარის ხეობის ჰიდრომორფოლოგიური პარამეტრების გათვალისწინებით, რეკომენდებული არ არის. უკანასკნელ წლებში კლიმატის ცვლილებით გამოწვეული გლაციალური და გეოდინამიკური კასკადური მოვლენების სიხშირისა და ინტენსივობის ზრდის გამო, კავკასიონის სამხრეთი ფერდის ზონაში არსებულ ტერიტორიებზე ნარჩუნდება სხვადასხვა მასშტაბის ბუნებრივი საფრთხეები. შესაბამისად, არსებული საშიშროების ხარისხის შეფასების მიზნით საჭიროა გაგრძელდეს კომპლექსური კვლევები. მდინარე ბუბისწყლის ხეობაში სტიქიის გავრცელების არეალში (26 ჰა) დაუშვებელია რაიმე სახის ახალი ინფრასტრუქტურის მოწყობა და არსებული შენობა-ნაგებობების ფუნქციონირება; მდინარე ბუბისწყლის ხეობაში და კურორტ შოვის სტიქიის გავრცელების არეალისათვის უნდა შემუშავდეს გადაადგილების წესები და მოეწყოს შესაბამისი გამაფრთხილებელი ნიშნები. იმისათვის, რომ მაქსიმალურად იქნას თავიდან აცილებული მყინვარული ხეობებიდან მომდინარე საფრთხის შედეგად შესაძლო ადამიანთა მსხვერპლი და მინიმუმამდე იქნას დაყვანილი ეკონომიკური ზარალი, საჭიროა საქართველოს ტერიტორიაზე მყინვარული ხეობების ქვემო წელში არსებული დასახლებული პუნქტების და ინფრასტრუქტურის საფრთხეების/რისკების შეფასება (რისკების ზონირება), რისკის ზონაში არსებული დასახლებული პუნქტების იდენტიფიცირება და შესაბამისი პირველადი რეკომენდაციების მომზადება. მსგავსი მასშტაბის კომპლექსური გენეზისის სტიქიის შესახებ განგაშის სისტემის მოწყობა სტიქიის სწრაფად განვითარებადობის და მისი ჩასახვის ზონიდან დასახლებულ პუნქტამდე მცირე მანძილის გათვალისწინებით, ვერ იქნებოდა ეფექტური დამდგარი შედეგების თავიდან ასაცილებლად; ზოგადად მსგავსი ტიპის ხეობებში, ტექნიკურად, კაპიტალური დამცავი ღონისძიებების გატარება ანალოგიური მასშტაბის პროცესებზე პრაქტიკულად შეუძლებელია. ამ დროისთვის საუკეთესო და ყველაზე ეფექტურ გზას, ადამიანთა და ინფრასტრუქტურის დასაცავად, ტერიტორიის სივრცითი დაგეგმარება წარმოადგენს”,- ნათქვამია ანგარიშში. იპნ

საქართველოს ზოგიერთ რაიონში, ასევე, დედაქალაქში, ატმოსფერულ ჰაერში მყარი ნაწილაკების (PM10, PM2.5) მატება ფიქსირდება, რაც, ძირითადად, ტრანსსასაზღვრო დაბინძურებას უკავშირდება. ამის შესახებ ინფორმაციას გარემოს ეროვნული სააგენტო ავრცელებს. მათივე ცნობით, აღსანიშნავია, რომ ტრანსსასაზღვრო დაბინძურება ანალოგიური სინოპტიკური სიტუაციის დროს წლის განმავლობაში გარკვეულ დღეებში ფიქსირდება, მეტეოროლოგიური მოვლენაა და პანიკის მიზეზს არ იძლევა. „საქართველოს გარემოს დაცვისა და სოფლის მეურნეობის სამინისტროს სსიპ გარემოს ეროვნული სააგენტო ავტომატური სადგურების საშუალებით ატმოსფერული ჰაერის ხარისხის უწყვეტ მონიტორინგს აგრძელებს. ნებისმიერ დაინტერესებულ პირს ატმოსფერული ჰაერის ხარისხის პორტალზე შესაძლებლობა აქვს, ჰაერის ხარისხის მდგომარეობის შესახებ ინფორმაციას გაეცნოს და ჯანდაცვითი რეკომენდაციები მიიღოს“, - ნათქვამია ინფორმაციაში. იპნ

"გახარიას გუნდისგან განსხვავებით, ღარიბაშვილს განკარგულებების გამოქვეყნება არ მოუთხოვია." ანა ბუჩუკური, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/742243524294498/

ევროკავშირის ელჩი საქართველოში, პაველ ჰერჩინსკი ამბობს, რომ EU-ის წევრობისთვის საჭირო 9 ნაბიჯის შესასრულებლად ხელისუფლებამ სამოქალაქო სექტორთან ერთად უნდა იმუშაოს. მისი თქმით, სამუშაო ჯგუფებში უნდა მონაწილეობდნენ აღმოსავლეთ პარტნიორობის სამოქალაქო საზოგადოების პლატფორმიდან გასული არასამთავრობო ორგანიზაციებიც. 2024 წლის 29 იანვარს პარლამენტში, ევროკავშირის რეკომენდაციების შესასრულებლად სამუშაო ჯგუფების შეხვედრაში არ მიიწვეს საქართველოში მომუშავე მსხვილი არასამთავრობო ორგანიზაციები: „საერთაშორისო გამჭვირვალობა საქართველო“, „საქართველოს ახალგაზრდა იურისტთა ასოციაცია“, „სამართლიანი არჩევნები“, „სოციალური სამართლიანობის ცენტრი“ და სხვები. ამის შემდეგ მათ „აღმოსავლეთ პარტნიორობის საქართველოს ეროვნული პლატფორმა” დატოვეს. ჯგუფში მხოლოდ 3 ორგანიზაცია დარჩა. პარლამენტის თავმჯდომარემ, შალვა პაპუაშვილმა განაცხადა, რომ ხელისუფლება ორგანიზაციებთან თანამშრომლობას NGO-ების კოალიციის ფორმატში განიხილავს, ამიტომაც, მათ „ცალ-ცალკე ვერ გამოეკიდებიან”. ამასთან, შალვა პაპუაშვილი ამ ორგანიზაციებს თავს დაესხა და თქვა, რომ „ეროვნულ პლატფორმაში“ ყოფნისას მათი ერთადერთი მიზანი „ პარტნიორობის ინდექსის“ მომზადების პროცესში სიმართლის დამახინჯება იყო. „მათი მხრიდან პლატფორმის წევრობის ბოროტად გამოყენება და შემდეგ მისი დატოვება, უბრალოდ, არასწორი იყო, ვინაიდან „ეროვნული პლატფორმა“ ევროკავშირის მიერ აღიარებულ სამოქალაქო საზოგადოებრივ კავშირს წარმოადგენს და ხელისუფლებასთან სამოქალაქო საზოგადოების ურთიერთობის მნიშვნელოვანი არხია“. – თქვა პარლამენტის თავმჯდომარემ. პუბლიკა

ბელგოროდში სავაჭრო ცენტრი დაბომბეს – ვრცელდება ცნობები დაღუპულთა შესახებ. როგორც გამოცემა Meduza სასწრაფო დახმარების სამსახურზე დაყრდნობით წერს, პირველადი ინფორმაციით, დაღუპულია 4 ადამიანი, ხოლო დაშავებულთა რაოდენობა 7-ს აჭარბებს. რუსული მხარე მომხდარში უკრაინას ადანაშაულებს, თუმცა უკრაინის ოფიციალურ პირებს ბრალდებებთან დაკავშირებით კომენტარი არ გაუვრცელებიათ. როგორც რუსეთის თავდაცვის სამინისტრო დღის განმავლობაში წერდა, ბელგოროდის ოლქში უკრაინის შეიარაღებული ძალების მიერ ნასროლი 14 რაკეტა გაანადგურეს, თუმცა აქ საუბარი არ ყოფილა დაშავებულებსა თუ შესაძლო გარდაცვლილებზე. პარალელურად, რუსული სამთავრობო მედიები დაშავებულთა შესახებ სხვადასხვა ინფორმაციას ავრცელებენ – TASS წერს, რომ დაჭრილია, სულ მცირე, 18 ადამიანი, ხოლო დაღუპულია – 5. ამასთან, მედია ბელგოროდის ოლქის გუბერნატორზე დაყრდნობით აცხადებს, რომ რეგიონის მასშტაბით საჰაერო განგაში ადგილობრივი დროით 12:21 საათზე ამოქმედდა. პუბლიკა

ცენტრალური საარჩევნო კომისიის თავმჯდომარის გიორგი კალანდარიშვილის განცხადებით, დიდი ალბათობით, ის ცესკო-ს თავმჯდომარის პოსტზე საკუთარ კანდიდატურას კვლავ წარადგენს. როგორც კალანდარიშვილმა ჟურნალისტებთან აღნიშნა, ეს საბოლოო გადაწყვეტილება არ არის, რადგან ელოდება, თუ რა სახეს მიიღებს საკანონმდებლო ცვლილებები, რომლითაც ცესკო-ს თავმჯდომარისა და ე.წ. პროფესიული წევრების არჩევის წესი იცვლება. „საკანონმდებლო მოწესრიგება როგორიც არ უნდა იყოს, მისი შეფასება პოლიტიკოსების და სხვადასხვა ჩართული მხარის საგანია. ჩვენი ადმინისტრაცია მხოლოდ და მხოლოდ მის აღსრულებას უზრუნველყოფს. შესაბამისად, დღეის მდგომარეობით, ჩემი გადაწყვეტილება საბოლოო არ არის. ველოდები მოვლენების განვითარებას, თუ რა სახეს მიიღებს საკანონმდებლო ცვლილებები მას შემდეგ, რაც მიღებული იქნება გადაწყვეტილება, გამოქვეყნდება და მის საფუძველზე კონკურსი გამოცხადდება, თუმცა ერთი რამ შეიძლება აუცილებლად ითქვას - ჩვენ ვხედავთ, რომ საარჩევნო ინსტიტუცია დიდი გამოწვევების წინაშეა, წინ 26 ოქტომბრის არჩევნებია, სადაც ფართომასშტაბიანი ტექნოლოგიური ინტერვენცია იქნება პირველად ჩვენი ქვეყნის ისტორიაში“, -განაცხადა კალანდარიშვილმა. როგორც ცესკო-ს თავმჯდომარე განმარტავს, მისი მიზანია, ცესკო-ს მიერ დაწყებული სამუშაოები ბოლომდე მივიდეს და მოხარული იქნება, თუ ამის შესაძლებლობა ექნება. კითხვაზე, არის თუ არა ის ისეთი ფიგურა, რომელიც 2024 წლის არჩევნების სამართლიან და კონკურენტუნარიან გარემოში ჩატარებას შეძლებს, კალანდარიშვილმა უპასუხა, რომ ამას მისი თავმჯდომარეობით ჩატარებული არჩევნების შედეგები ადასტურებს. „სპეკულაციურია ის საკითხი, თითქოს მხოლოდ მმართველი პარტიის ხმებით მოხდა ჩემი არჩევა. შეგახსენებთ მრავალპარტიული მხარდაჭერა ჰქონდა ჩემს კანდიდატურას მეორე არჩევისას და როგორც მმართველი პარტია, ასევე სხვა პოლიტიკური ჯგუფები და გაერთიანებები იღებდნენ მონაწილეობას ჩემს არჩევაში. რაც შეეხება იმას, რამდენად ეფექტიანი იქნება ჩემი არჩევა, ალბათ, სჯობს შევაფასოთ ჩემი მმართველობის პერიოდში ჩატარებული არჩევნები. უნდა აღინიშნოს ის, რომ რამდენიმე არჩევნების ჩატარების შესახლებლობა მომეცა, მათ შორის საერთო მუნიციპალური არჩევნების, სადაც ეუთო-ოდირი დადებითად აფასებს საარჩევნო ადმინისტრაციის ფუნქციონირებას და არჩევნების ადმინისტრირებას, განსაკუთრებით გაზრდილი გამჭვირვალობის პირობებში. დღეს ინსტიტუციის მიერ განხორციელებული საქმიანობის მნიშვნელოვანი პროგრესი შეინიშნება. ჩვენ ყოველ ჯერზე რამდენი ასეთი თვალსაჩინო მომსწრენი ვხდებით, იქვე იწყება რიგი მადისკრედიტებელი კამპანიები ზუსტად იმისთვის, რომ საარჩევნო ადმინისტრაციის მთელი ეს პოზიტიური რეპუტაცია და გამჭვირვალე საქმიანობა დაზიანდეს, რათა გარკვეულწილად კვლავ მოხდეს ინსტიტუციის მიმართ ნდობის შელახვა და მისი შემცირება“, -განაცხადა კალანდარიშვილმა. ცნობისთვის, მმართველი უმრავლესობის საკანონმდებლო ინიციატივის გათვალისწინებით, ცესკოს თავმჯდომარისა და ე.წ. პროფესიული წევრების არჩევის წესი და კვორუმი კიდევ ერთხელ იცვლება - მათი არჩევის პროცესში ხმათა 3/5-იანი კვორუმი შემოდის. კანონპროექტი ცესკო-ს თავმჯდომარისა და წევრების არჩევის 3-ეტაპიან პროცესს ითვალისწინებს. პროექტით, პირველ კენჭისყრაზე 90 ხმა იქნება საჭირო. იმ შემთხვევაში, თუკი 90 ხმა ვერ იქნება უზრუნველყოფილი, არჩევა 76 ხმით მოხდება. კონკრეტული კანდიდატებისთვის 76 ხმით მხარდაჭერის მიღება ორჯერ იქნება შესაძლებელი და 76 ხმით არჩეული კანდიდატები უფლებამოსილების განხორციელებას 5 წლის ვადით დაიწყებენ.

საქართველოს პრეზიდენტი ვიზიტით გერმანიის ფედერაციულ რესპუბლიკაში გაემგზავრა, სადაც მონაწილეობას მიიღებს მიუნხენის უსაფრთხოების კონფერენციაში. პრეზიდენტის ადმინისტრაციის ინფორმაციით, 16-18 თებერვალს საქართველოს პრეზიდენტი მიუნხენის კონფერენციაზე მსოფლიო ლიდერებთან, სახელმწიფოს მეთაურებთან და საერთაშორისო ორგანიზაციების წამყვან წარმომადგენლებთან ერთად, მონაწილეობას მიიღებს საერთაშორისო უსაფრთხოების საკითხებზე დისკუსიებში. მიუნხენის უსაფრთხოების კონფერენციაზე, რომელიც მსოფლიოში წამყვანი ფორუმია საერთაშორისო უსაფრთხოების თემებზე სასაუბროდ, საქართველოს პრეზიდენტი სიტყვით გამოვა პანელზე: „უფრო ღრმა, ფართო და უნარიანი ევროკავშირი“ და მონაწილეობას მიიღებს დისკუსიაში: ნატოს აღმოსავლეთ ფლანგის მზადყოფნის უზრუნველყოფა (Better Safe Than Sorry: Securing NATO’S Easters Flank Readiness). იპნ

ევროკავშირის მიერ განსაზღვრულ 9 რეკომენდაციასთან დაკავშირებით, 16 თებერვალს, პარლამენტში რიგით მეორე შეხვედრა გაიმართება. სამუშაო შეხვედრას დაესწრებიან საპარლამენტო უმრავლესობისა და ოპოზიციის წარმომადგენლები. არასამთავრობო სექტორიდან კი მასში მხოლოდ აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის წევრი ორგანიზაციების წარმომადგენლები მონაწილეობენ. შეხვედრა პარლამენტში 11:00 საათზეა ჩანიშნული. 9 რეკომენდაციასთან დაკავშირებით პირველი ასეთი შეხვედრა პარლამენტში 29 იანვარს გაიმართა. საპარლამენტო ოპოზიციიდან შეხვედრას არ ესწრებოდნენ „ლელოს“ დეპუტატები, რადგან მათივე შეფასებით, ეს პროცესი არის „იმიტაცია“ და „ქართულ ოცნებას“ არ სურს რეფორმების განხორციელება. შეგახსენებთ, ევროკავშირმა კანდიდატის სტატუსთან ერთად, საქართველოს 9 რეკომენდაცია მისცა შესასრულებლად იმისათვის, რომ გაწევრიანების შემდგომ ნაბიჯზე - მოლაპარაკების გახსნის ეტაპზე გადავიდეს. რეკომენდაციები მოიცავს: ევროკავშირისა და მისი ღირებულებების შესახებ დეზინფორმაციასთან ბრძოლას; ევროკავშირის საგარეო და უსაფრთხოების პოლიტიკასთან საქართველოს საგარეო პოლიტიკის თანხვედრის მაჩვენებლის გაუმჯობესებას; პოლიტიკური პოლარიზაციის წინააღმდეგ ბრძოლას - მათ შორის პარლამენტში ოპოზიციურ პარტიებთან უფრო ინკლუზიურად მუშაობის გზით, განსაკუთრებით საქართველოს ევროინტეგრაციასთან დაკავშირებულ კანონმდებლობაზე; თავისუფალი, სამართლიანი და კონკურენტუნარიანი საარჩევნო პროცესის უზრუნველყოფას, განსაკუთრებით 2024 წელს და ეუთოს დემოკრატიული ინსტიტუტებისა და ადამიანის უფლებების ოფისის რეკომენდაციების სრულად გათვალისწინებას, ასევე საარჩევნო რეფორმების დასრულებას; საპარლამენტო ზედამხედვლობის შემდგომ გაუმჯობესებას უსაფრთხოების სამსახურებზე, საკვანძო ინსტიტუტების, განსაკუთრებით საარჩევნო ადმინისტრაციის, ეროვნული ბანკისა და კომუნიკაციების მარეგულირებელი კომისიის ინსტიტუციური დამოუკიდებლობის და მიუკერძოებლობის უზრუნველყოფას; ყოვლისმომცველი და ეფექტური სასამართლო რეფორმის დასრულებას და განხორციელებას, მათ შორის, იუსტიციის უმაღლესი საბჭოსა და პროკურატურის ყოვლისმომცველ რეფორმას, ვენეციის კომისიის რეკომენდაციების სრულად შესრულებას გამჭვირვალე და ინკლუზიური პროცესის გზით; ანტიკორუფციული ბოუროს, სპეციალური საგამოძიებო სამსახურისა და პერსონალურ მონაცემთა დაცვის სამსახურის ეფექტურობისა და ინსტიტუციური დამოუკიდებლობისა და მიუკერძოებლობის უზრუნველყოფას, ამ ორგანოებთან დაკავშირებით ვენეციის კომისიის რეკომენდაციების გათვალისწინებას ინკლუზიური პროცესით; დეოლიგარქიზაციის შესახებ არსებული სამოქმედო გეგმის გაუმჯობესებას, რათა დეოლიგარქიზაცია განხორციელდეს მრავალსექტორული, სისტემური მიდგომით, ვენეციის კომისიის რეკომენდაციების შესაბამისად და გამჭვირვალე და ინკლუზიური პროცესის შედეგად, ოპოზიციური პარტიებისა და სამოქალაქო საზოგადოების ჩართულობით; ადამიანის უფლებების დაცვის გაუმჯობესებას მათ შორის, ადამიანის უფლებების ამბიციური სტრატეგიის განხორციელებით და შეკრებისა და გამოხატვის თავისუფლების უზრუნველყოფით. მიუკერძოებელი, ეფექტური და დროული გამოძიების დაწყებას მოწყვლადი ჯგუფების, მედიის წარმომადგენლებისა და სამოქალაქო საზოგადოების აქტივისტების მიმართ მუქარის შემთხვევებში და ძალადობაში მონაწილეებისა და მის ორგანიზატორების პასუხისმგებლობის უზრუნველყოფას. სამოქალაქო საზოგადოების ჩართულობას საკანონმდებლო და პოლიტიკის კეთების პროცესებში, მათი თავისუფალი მუშაობის უზრუნველყოფას. იპნ

შსს-ს ყფილი თანამშრომელი გოგა რაზმაძე წერს, რომ სააპელაციო სასამართლომ გააუქმა საქალაქო სასამართლოს განჩინება, რომლითაც შსს-ს ეკრძალებოდა რაზმაძის პოზიციაზე სხვა პირის უვადოდ დანიშვნა. „სააპელაციო სასამართლოს მოსამართლის გადაწყვეტილების შემდეგ, უახლოვეს პერიოდში გამოჩნდება, აღნიშნულს რა ,,მსუსხავი” ეფექტი შეიძლება ჰქონდეს. მე რა თქმა უნდა, ვაგრძელებ ჩემი უფლებების დაცვას კანონმდებლობით გათვალისწინებული ყველა ეროვნული და საერთაშორისო მექანიზმების გამოყენებით“, – წერს ის. საქალაქო სასამართლომ 2023 წლის დეკემბერში გამოიტანა განჩინება და შინაგან საქმეთა სამინისტროს სასამართლოს დავის გადაწყვეტამდე გოგა რაზმაძის პოზიციაზე სხვა პირის დანიშვნა აუკრძალა. შინაგან საქმეთა სამინისტროს ადამიანის უფლებათა დეპარტამენტის რეგიონული სამმართველოს ყოფილმა ხელმძღვანელმა, გოგა რაზმაძემ სასამართლოს მას შემდეგ მიმართა, რაც სამინისტრომ ის თანამდებობიდან გაათავისუფლა. ამას წინ უძღოდა სახალხო დამცველის გადაწყვეტილება, შეეწყვიტა შინაგან საქმეთა სამინისტროს მხრიდან შესაძლო დისკრიმინაციის საქმის წარმოება. 2023 წლის ივლისში რაზმაძემ სამინისტროში არსებულ პრობლემებსა და ღირსების შემლახველ დამოკიდებულებაზე ვრცელი პოსტი Facebook-ზე გამოაქვეყნა. გოგა რაზმაძე წერდა, რომ შსს-ს ადამიანის უფლებათა დეპარტამენტში მუშაობს და ამ დეპარტამენტში ყველაფერი შეიცვალა მას შემდეგ, რაც კურატორად მინისტრის მოადგილე ალექსანდრე დარახველიძე დაინიშნა. მისი ინფორმაციით, როდესაც მან თავისი მოსაზრებები დეპარტამენტში არსებულ პრობლემებზე ელექტრონული ფოსტის საშუალებით გაუგზავნა მინისტრის მოადგილესა და დეპარტამენტის მენეჯმენტს, 11 ივლისს შსს-ს გენერალურ ინსპექციაში დაიბარეს. გოგა რაზმაძე ჰყვება, რომ მას სამი საათის განმავლობაში დამამცირებელ და შეურაცხმყოფელ პირობებში „საქმეს ურჩევდა“ შსს-ს გენერალური ინსპექციის უფროსის მოადგილე, დავით მინდიაშვილი. რაზმაძის თქმით, 4 ივლისს, საგამოძიებო სამსახურს მიმართა და განცხადებაში აღნიშნა, რომ საქმის გამოძიების დროულად დაწყებას ჰქონდა გადამწყვეტი მნიშვნელობა მტკიცებულებების განადგურების თავიდან ასაცილებლად. 28 ივლისს კი, გოგა რაზმაძემ Facebook-ზე დაწერა, რომ სპეციალურმა საგამოძიებო სამსახურმა მისი საქმის გამოძიებაზე უარი თქვა. 30 ოქტომბერს გახდა ცნობილი ომბუდსმენის გადაწყვეტილება. 10 ნოემბერს გოგა რაზმაძე სამსახურიდან გაათავისუფლეს. პუბლიკა

აბასთუმნის ობსერვატორიის თანამშომლების და მათი ოჯახის წევრების თქმით, მათ და/ან მათი ოჯახის წევრებს საკუთარ სახლებში არ უშვებენ, მიზეზად კი „მასშტაბურ მშენებლობას” ასახელებენ. თუმცა, აქციის მონაწილეების თქმით, ადგილზე „არავითარი მასშტაბური მშენებლობა არ მიმდინარეობს”. როგორც ყვებიან, ისინი წლების განმავლობაში ცხოვრობდნენ აბასთუმანში, ე.წ. მთა ყანობილის ტერიტორიაზე. აქ რამდენიმე მრავალსართულიანი კორპუსი და კერძო ბინაა, სადაც ობსერვატორიაში მომუშავე ადამიანების ოჯახის წევრები პერიოდულად ცხოვრობენ, ნაწილი კი მუდმივად იქ იმყოფება. აქ მცხოვრებთა მშობლები, ბებიები და ბაბუები ობსერვატორიის თანამშრომლები იყვნენ და ობსერვატორიის დირექტორის გადაწყვეტილებით, იქვე სახლდებოდნენ. შესაბამისად, იქ ცხოვრობენ მათი შთამომავლებიც. თუმცა, 2023 წლის მაისიდან მათ ტერიტორიაზე შესვლას უზღუდავენ. პრობლემები კი 2020 წელს, კორონავირუსის პანდემიის და კარანტინის დროს დაიწყო. აბასთუმნის ობსერვატორიის ტერიტორიაზე მდებარე ერთ-ერთ ბინაში მცოვრები თეონა ტოროშელიძე ამბობს, რომ აკრძალვის დაწესებიდან რამდენიმე თვის შემდეგ, განათლების სამინისტროს დახმარებით, სახლებში შესვლის ნებართვა მოიპოვეს – აბასთუმნის ობსერვატორია სწორედ ამ უწყებას ექვემდებარება. თუმცა, ტოროშელიძის თქმით, 2024 წელს გამოიცა ხელახალი ბრძანება, რომლის თანახმადაც, ისევ აკრძალვა წესდება. ამასთან, შექმნილია ფორმა, რომლითაც ობსერვატორიის თანამშრომლების ოჯახის წევრები A, B, C, D, E კატეგორიებად არის დაყოფილი.

მსახიობი ხათუნა კოტრიკაძე გარდაიცვალა. ამის შესახებ ფეისბუკზე დეპუტატმა ეკა ხერხეულიძემ დაწერა. “ქართული კინოს მშვენება, ჩემი მეგობრის დედა და ბავშვობიდან ჩემთვის უსაყვარლესი ხათუნა კოტრიკაძე გარდაიცვალა. გამოსვენება კვირას, წინამძღვრიშვილის 112”, — წერს ხერხეულიძე. ხათუნა კოტრიკაძე ფართო საზოგადოებამ გაიცნო ეკა ბერიძის როლით ფილმიდან “მხიარული რომანი”. ის ასევე მონაწილეობდა ფილმებში — “მოიტაცეს თამარ ქალი” და “მეთხუთმეტე გაზაფხული”. ნეტგაზეთი

უკრაინის მთავარი სადაზვერვო სამმართველოს განცხადებით, 14 თებერვლის დილით ჩაძირული გემის, „ცეზარ კუნიკოვის“ ეკიპაჟის უმრავლესობა ვერ გადარჩა. „ყველაფერმა გეგმის მიხედვით ჩაიარა. შედეგი არის. მტრის გემი განადგურებულია და შეკეთებას არ ექვემდებარება. არსებული ინფორმაციით, ეკიპაჟის დიდი ნაწილი ვერ გადარჩა“, – ციტირებს უწყების პრესსპიკერ ანდრიი იუსოვს „უკრაინსკა პრავდა“. მისივე თქმით, დაღუპულთა ზუსტი რაოდენობა ზუსტდება. გემის ჩაძირვის შესახებ უკრაინამ 14 თებერვალს განაცხადა. არსებული ინფორმაციით, ხომალდის ეკიპაჟი მაქსიმუმ 87 ადამიანია. კიევის ცნობით, ჩაძირეს რუსული სამხედრო გემი, რომელიც 2008 წლის ომშიც მონაწილეობდა ნეტგაზეთი

უკრაინისთვის F-16 გამანადგურებლების მიწოდების საკითხი უკვე მოგვარებულია, ისინი მალე უკრაინის ცაზე უნდა გამოჩნდნენ, - ამის შესახებ უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა კირილ ბუდანოვმა განაცხადა. „რაც შეეხება F-16-ებს, საკითხი მოგვარებულია, ვფიქრობ, ეს ყველამ იცის. „რამშტაინზე“ საუბარი იყო დეტალებზე, მაგრამ ტექნიკურ საკითხებს ეხებოდა: გადაცემა, ინფრასტრუქტურის მზადყოფნა, ამ თვითმფრინავების მომსახურებისთვის მზადყოფნა, აეროდრომებისა და საავიაციო პერსონალის მომზადება“, - განაცხადა ბუდანოვმა. კითხვაზე, თუ როდის მიიღებს უკრაინა დასავლურ F-16-ის ტიპის საბრძოლო თვითმფრინავებს, ბუდანოვმა განაცხადა, რომ სწრაფად. „უკვე სწრაფად, ეს ბოლო ეტაპია. თქვენ იცით, რომ ჩვენი პილოტები გადიან სწავლებას. იმედი მაქვს, რომ ისინი ცაზე გაზაფხულზე გამოჩნდებიან", - აღნიშნა ბუდანოვმა. იპნ

15 თებერვალი ბავშვთა ონკოლოგიური დაავადებების საერთაშორისო დღეა. ჯანდაცვის სამინისტროს ინფორმაციით, 2023 წელს, სახელმწიფომ, ონკოლოგიური დიაგნოზის მქონე ბავშვების სამკურნალოდ უპრეცედენტო პროგრამა დაიწყო - ყველა ბენეფიციარს, მკურნალობა, როგორც საქართველოში, ისე - ესპანეთის, ისრაელისა და თურქეთის წამყვან, მაღალტექნოლოგიურ სამედიცინო დაწესებულებებში სრულად უფინანსდება. მათივე ცნობით, ახლახან, პროგრამა გაფართოვდა 3 ახალი კლინიკა დაემატა - ბენეფიციარებს, მაღალი ხარისხის სამედიცინო მომსახურებას „აჯიბადემის ჰოსპიტალი“, „ლივ ჰოსპიტალი“ და „ჰოსპიტალი მემორიალი“ უკვე აწვდიან. „ონკოლოგიური დიაგნოზის მქონე ბავშვების მკურნალობა უკვე 6 კლინიკაშია შესაძლებელი, მათ შორის ისრაელისა და ესპანეთის მაღალტექნოლოგიურ, მრავალპროფილურ სამედიცინო ცენტრებში. ჯანდაცვის სამინისტრო, აქტიურად მუშაობს ევროპის სხვა წამყვან სამედიცინო დაწესებულებებთანაც. ონკოლოგიური დიაგნოზის მქონე ბავშვების საზღვარგარეთ მკურნალობის პროგრამა 2023 წლის აგვისტოში ამოქმედდა. დღემდე, პროგრამაში, 50-ზე მეტი ბავშვია ჩართული. პროგრამის ფარგლებში ფინანსდება დიაგნოსტიკა და მკურნალობის კურსი- ქიმიოთერაპია, სხივურ თერაპია, ოპერაციული ჩარევა და პროტონოთერაპია. 18 წლამდე ონკოლოგიური დიაგნოზის მქონე პირების საზღვარგარეთ მკურნალობის პროგრამა გარდამავალი ეტაპია, საქართველოში თანამედროვე სტანდარტების, მაღალტექნოლოგიური აპარატურით აღჭურვილი ბავშვთა ონკოლოგიური სახელმწიფო ცენტრის გახსნამდე, რომელიც ჯანდაცვის მინისტრმა, ზურაბ აზარაშვილმა 2022 წლის დეკემბერში დააანონსა. აღნიშნულ ცენტრში ხელმისაწვდომი იქნება სამედიცინო სერვისების სრული სპექტრი, ერთ სივრცეში. ამ მიმართულებით, ჯანდაცვის სამინისტრო აქტიურ სამუშაოებს ახორციელებს“, - აღნიშნულია ინფორმაციაში. იპნ

აშშ-ის წარმომადგენელთა პალატის დაზვერვის კომიტეტის ხელმძღვანელი მაიკ ტერნერი აცხადებს, რომ რუსეთი ავითარებს კოსმოსურ ბირთვულ იარაღს, რომელიც აშშ-ის თანამგზავრებზე დასამიზნებლად არის შექმნილი. მისი თქმით, ეს სერიოზული საფრთხეა აშშ-ის ეროვნული უშიშროებისთვის. ამასთან, ტერნერი ჯო ბაიდენისგან ითხოვს, რომ პრეზიდენტმა გრიფი „საიდუმლო“ მოხსნას ყველა ინფორმაციას, რომელიც ამ საფრთხეს უკავშირდება, რათა კონგრესმა ღიად შეძლოს საჭირო ნაბიჯების განხილვა. დაზვერვის კომიტეტის ხელმძღვანელის ინფორმაციით, რუსეთის ძალისხმევა მიმართული კოსმოსში ბირთვული იარაღის განთავსებაზე, რომელსაც იმის შესაძლებლობა ექნება, რომ აშშ-ს სამოქალაქო კომუნიკაციების, ნავიგაციის, სამხედრო ოპერაციების თანამგზავრები გაანადგუროს. Reuters-ი წერს, რომ აღნიშნული საფრთხის გამო აშშ-მა ევროპელი მოკავშირეები გააფრთხილა. იპნ

პარტია „საქართველოსთვის“ „ქართულ ოცნებას“ მიმართავს, დაიწყოს საკონსტიტუციო ცვლილებებზე მუშაობა მურუსიძე-ჩინჩალაძის და მათი გავლენის ჯგუფისგან სისტემის გასათავისუფლებლად, მათ შორის, დაიწყოს მუშაობა დამოუკიდებელი პოლიციის კონცეფციაზე და დაიწყოს გამოძიება ელიტური/პოლიტიკური კორუფციის თითოეულ ფაქტზე. როგორც „საქართველოსთვის“ წევრმა ნათია მეზვრიშვილმა განაცხადა, ამ კონკრეტული წინადადებების განხორციელებით, რითაც ისინი მმართველ პარტიას მიმართავენ, შესრულდება ევროკავშირის 9 რეკომენდაცია, საქართველო დაიბრუნებს ლიდერობას "ასოცირების ტრიოში" და ჩატარდება თავისუფალი და სამართლიანი არჩევნები. „ოცნებამ“ განაცხადა, რომ ოპოზიციას 9 პუნქტთან დაკავშირებით ინიციატივები არ წარუდგენია. მიუხედავად იმისა, რომ ჩვენ ჯერ კიდევ ნოემბერში პარლამენტის თავმჯდომარეს ინიციატივები ოფიციალურად გავუგზავნეთ, დღეს კიდევ ერთხელ წარვუდგენთ ჩვენს ინიციატივებს. ჩვენ არ გვაქვს პრეტენზია, რომ ეს არის ერთადერთი სწორი გზა, მაგრამ ეს არის ერთ-ერთი სწორი გზა და გთავაზობთ ამ წინადადებებზე მუშაობის დაწყებას. მივმართავთ „ოცნებას“: დაიწყოს საკონსტიტუციო ცვლილებებზე მუშაობა მურუსიძე-ჩინჩალაძის და მათი გავლენის ჯგუფისგან სისტემის გასათავისუფლებლად. გვესმის, რომ ეს პრობლემა ერთ დღეში არ მოგვარდება, ამიტომ, მზად ვართ, მონაწილეობა მივიღოთ სისტემის ფუნდამენტურად გარდაქმნის აუცილებლობაზე კონსენსუსის მიღწევის პროცესში; პირველ ეტაპზე რეფორმა შეეხოს იუსტიციის უმაღლეს საბჭოს, უზენაეს სასამართლოს და სასამართლოს თავმჯდომარეებს; დაიწყოს მუშაობა დამოუკიდებელი პოლიციის კონცეფციაზე, სადაც პოლიციის ხელმძღვანელი აღარ იქნება პოლიტიკური თანამდებობის პირი და აირჩევა პარლამენტის მიერ. ეს უზრუნველყოფს პოლიციის აპოლიტიკურობას; კორუფციის გამოძიების ფუნქცია ჩამოერთვას პროკურატურას, სუსს იუსტიციის სამინისტროს და დაიწყოს მუშაობა რეალურად დამოუკიდებელი ანტი-კორუფციული საგამოძიებო ბიუროს შექმნაზე, რომლის ხელმძღვანელი პარლამენტის მიერ პოლიტიკური კონსენსუსით აირჩევა; შეიცვალოს გენერალური პროკურორის არჩევის და საპროკურორო საბჭოს წევრების ნომინირების წესი - გენერალური პროკურორი პარლამენტმა აირჩიოს პოლიტიკური კონსენსუსით; შეიქმნას საბჭოს წევრებად დამოუკიდებელი რიგითი პროკურორების წარდგენის ქმედითი შესაძლებლობა, რაც გამორიცხავს მორჩილი წევრებით საბჭოს დაკომპლექტებას და უზრუნველყოფს პროკურატურის დამოუკიდებლობას; მომზადდეს საკანონმდებლო ცვლილებები კონსტიტუციით დამოუკიდებელი ინსტიტუტების ხელმძღვანელების პოლიტიკური კონსენსუსით ასარჩევად; მომზადდეს საკანონმდებლო ცვლილებები ემიგრანტებისთვის ელექტრონულად ხმის მიცემის უფლების მინიჭებაზე; დაიწყოს გამოძიება ელიტური/პოლიტიკური კორუფციის თითოეულ ფაქტზე, რაც საჯაროდ გახდა ცნობილი და რის შესახებაც არაერთი განცხადება შევიდა პროკურატურაში. შეიქმნას საგამოძიებო კომისია „ქოლ-ცენტრებზე“; საქართველო დაუბრუნდეს ეკონომიკური თანამშრომლობის და განვითარების ორგანიზაციის ანტი-კორუფციულ ქსელს, რომელიც შეამოწმებს ქვეყანაში ელიტური კორუფციის წინააღმდეგ ბრძოლის ეფექტიანობას. ეს არის კომპლექსური პროცესი. ვერც ხელისუფლება და ვერც ოპოზიცია ცალკე ამას ვერ გააკეთებს. ეს არის ჩვენი საერთო პასუხისმგებლობაა, რაც შეიძლება სწრაფად შევიყვანოთ საქართველო ევროკავშირში. 9 პუნქტის შესრულების დეტალური ხედვა დღესვე განმეორებით წარედგინება პარლამენტის თავმჯდომარეს“, - განაცხადა ნათია მეზვრიშვილმა. იპნ

აშშ-ის თავდაცვის მდივანმა, ლოიდ ოსტინმა რამშტაინის ფორმატის უკრაინის საკონტაქტო ჯგუფის რიგით მე-19 სხდომაზე განაცხადა, რომ აშშ გააგრძელებს უკრაინის გვერდით მტკიცედ დგომას და პუტინის იმპერიალისტური აგრესიის წინააღმდეგ უკრაინის პრინციპული ბრძოლის მხარდაჭერას. „კრემლი კვლავ დებს ფსონს იმაზე, რომ ჩვენ, ყველა დავკარგავთ ინტერესს უკრაინისადმი, რომ ჩვენი მხარდაჭერა შესუსტდება და შემცირდება, თუმცა მე მტკიცედ ვარ განწყობილი, როგორც არასდროს და ვიცი, რომ თქვენც. ეს საკონტაქტო ჯგუფი რჩება მტკიცე, შეუპოვარი და მყარი. ეჭვი არ შეგეპაროთ, შეერთებული შტატები გააგრძელებს უკრაინის გვერდით მტკიცედ დგომას და ამერიკა გააგრძელებს პუტინის იმპერიალისტური აგრესიის წინააღმდეგ უკრაინის ბრძოლის მხარდაჭერას“, – განაცხადა ლოიდ ოსტინმა. „რამშტაინის ფორმატი“, რომელიც მსოფლიოს 50-ზე მეტ ქვეყანას აერთიანებს, უკრაინის მხარდაჭერის მიზნით შეიქმნა. შეხვედრების მიზანია, დააკმაყოფილოს უკრაინის არმიის თავდაცვის საჭიროებები. საქართველოს თავდაცვის სამინისტროს ინფორმაციით, უკრაინის თავდაცვის საკონტაქტო ჯგუფის მე-19 შეხვედრაში მონაწილეობა მიიღო, საქართველოს თავდაცვის მინისტრმა, ირაკლი ჩიქოვანმა. პუბლიკა

დეკანოზი გიორგი მამალაძე თავისუფალია. როგორც „ინტერპრესნიუსს“ გიორგი მამალაძის ძმამ, თორნიკე მამალაძემ განუცხადა, გიორგი მამალაძემ საპატიმრო დაწესებულება დატოვა და ის ოჯახში იმყოფებოდა. ცნობისთვის, დეკანოზ გიორგი მამალაძე თბილისის აეროპორტში 2017 წლის 10 თებერვალს დააკავეს. ის სამივე ინსტანციის სასამართლომ შურისძიების მოტივით ციანიდის გამოყენებით შორენა თეთრუაშვილის მკვლელობის მომზადებაში ცნო დამნაშავედ და 9- წლით თავისუფლების აღკვეთა მიუსაჯა. იპნ

“ჩვენ იმდენად მყარად ვდგავართ სიმართლეზე, “ოცნება” კი არა, ათი “ოცნება” და ივანიშვილი რომ დაემატოს და დაგვიწყოს ბრძოლა, ვერ გაგვაჩერებენ! კორუფციასთან ბრძოლას და მის ამ ქვეყანაში დამარცხებას, ჩვენ ბოლომდე გავიყვანთ!” ბექა ლილუაშვილი, საპარლამენტო პოლიტიკური ჯგუფი “საქართველოსთვის” თავმჯდომარე. ვიდეო: https://www.facebook.com/ForGeoGe/videos/1594092931349717/

"ოცნებამ" ზუსტად იცის, რომ კორუფცია ჩვენი მოქალაქეებისთვის მიუღებელია, ამიტომ ცდილობს ყველანაირად ჩამოირეცხოს. რაც არ უნდა გვიმტკიცონ, რომ კობახიძე არ იყო კორუფციონერი, ტყუილია, რადგან ეს კობახიძე იყო იმ პარტიის თავმდჯომარე, რომელიც კორუფციულ სქემებშია ჩაფლული. მიშა დაუშვილი, პარტია "საქართველოსთვის" წევრი, დეპუტატი. ვიდეო: https://www.facebook.com/ForGeoGe/videos/774215501238228/

“რა საინტერესო თანხვედრაა, ტვ პირველმა გამოითხოვა ინფორმაცია და მთავარობა, რომელიც როგორც წესი ასეთ სენსიტიურ ინფორმაციებს არ გასცემს, ან თუ გასცემს, გასცემს ძალიან გვიან, მთავრობა, რომელიც პარლამენტარების სადეპუტატო კითხვას კონსტიტუციით დადგენილ ვადაში კი არა, საერთოდ არ პასუხობს, რამდენად სწრაფად და ოპერატიულად პასუხობს ტვ პირველს, როდესაც საქმე ეხება გახარიას და მისი გუნდის რაიმე ფორმით დისკრედიტირების ან დაზიანების მცდელობას.” მიშა დაუშვილი, საპარლამენტო პოლიტიკური ჯგუფი “საქართველოსთვის” წევრი. ვიდეო: https://www.facebook.com/ForGeoGe/videos/445208211163001/

“გიორგი გახარიას კორუფციასთან ბრძოლა, კორუფციასთან დამოკიდებულება რითი იზომება იცით? მისი და მისი გუნდის წევრების ქონებრივი დეკლარაციებით.” კახა ქემოკლიძე, პარტია “საქართველოსთვის” პოლიტიკური მდივანი. ვიდეო: https://www.facebook.com/ForGeoGe/videos/952146202919104/

საკვები და სასმელი პროდუქტების იმპორტში რუსეთი პირველ ადგილზეა. სტატისტიკის ეროვნული სამსახურის მონაცემებით, გასულ წელს საქართველოში ჯამში 1,629 მლრდ აშშ დოლარის პროდუქცია (საკვები/სასმელი) შემოვიდა, საიდანაც 26,2% რუსეთზე მოდის, შესაბამისად, იმპორტიორ ქვეყნებს შორის ლიდერია. შარშან რუსეთიდან საქართველომ 427,451 მლნ აშშ დოლარის საკვები და სასმელი შეიძინა. ამასთან, აღსანიშნავია, რომ რუსეთი პირველ ადგილს 2012 წლიდან არ თმობს, მანამდე პირველ ადგილს უკრაინა იკავებდა. სტატისტიკის მიხედვით, თუ 2011 წელს საქართველოში ჯამში 1,016 მლრდ აშშ დოლარის საკვები /სასმელი შემოვიდა და აქედან 15,3%-ით (155,152 მლნ აშშ დოლარი) რუსეთი მეორე იმპორტიორი ქვეყნის ადგილს იკავებდა, უკვე 2012 წლიდან მისი წილი 18%-მდე გაიზარდა და მას შემდეგ, პირველ ადგილზეა. კერძოდ, 2012 წელს ქვეყანამ 1,086 მლრდ აშშ დოლარის საკვები და სასმელი შეიძინა, საიდანაც 200,424 მლნ აშშ დოლარის რუსეთიდან. უნდა ითქვას, რომ 2023 წელს, 2022 წელთან შედარებით, იმპორტირებული პროდუქციის წილი შემცირებული იყო. სტატისტიკის მიხედვით, 2022 წელს ჯამში 1,533 მლრდ აშშ დოლარის საკვები და სასმელი შემოვიდა, აქედან 490 942 მლნ აშშ დოლარის (32%) რუსული იყო . 2021 წელს 1,079 მლრდ აშშ დოლარის იმპორტირებული პროდუქციიდან რუსეთზე 319,895 მლნ აშშ დოლარი (29,6%) მოდიოდა, 2020 წელს კი 972,685 მლნ აშშ დოლარიდან - 306,674 მლნ აშშ დოლარი (31,5%). რაც შეეხება საკვებ და სასმელ პროდუქტებს, რომელიც 2023 წელს რუსეთისგან ყველაზე დიდი რაოდენობით შევიძინეთ, ათეული ასე გამოიყურება: ხორბალი და მესლინი - 56,239 მლნ აშშ დოლარი ზეთი მზესუმზირისა, ალისარჩულისა ან ბამბისა და მათი ფრაქციები - 39,174 მლნ აშშ დოლარი ფქვილი ხორბლის ან ხორბალ-ჭვავის - 35,922 მლნ აშშ დოლარი შოკოლადი და კაკაოს შემცველი კვების სხვა მზა პროდუქტები - 29,284 მლნ აშშ დოლარი პური, ფქვილოვანი საკონდიტრო ნაწარმი, შაქარლამა, ნამცხვარი და სხვა პურფუნთუშეული - 25,072 მლნ შშ დოლარი პროდუქტები საწებლების მოსამზადებლად და მზა საწებლები, მდოგვი - 16,210 მლნ აშშ დოლარი ყავის, ჩაის ან მატეს ექსტრაქტები, ესენციები და კონცენტრატები - 15,086 მლნ აშშ დოლარი შაქარი - 14,763 მლნ აშშ დოლარი საკონდიტრო ნაწარმი შაქრისაგან, რომლებიც არ შეიცავენ კაკაოს - 12,961 მლნ აშშ დოლარი ალაოს ექსტრაქტი - 11,898 მლნ აშშ დოლარი Bpn.ge

გურიაში ეროვნული პარკი შეიქმნება. აღნიშნულს გულისხმობს მთავრობის მიერ „გურიის ეროვნული პარკის შექმნისა და მართვის შესახებ“ მომზადებული კანონპროექტი. პროექტის წარდგენა პარლამენტში გასული წლის მიწურულს მოხდა და ახლა მისი საკომიტეტო განხილვები მიმდინარეობს. კანონპროექტის მიღების შედეგად, ჩოხატაურისა და ოზურგეთის მუნიციპალიტეტის ტერიტორიაზე 15 310 ჰა ფართობს მიენიჭება ეროვნული პარკის სტატუსი და შეიქმნება ახალი დაცული ტერიტორია გურიის ეროვნული პარკი. „გურიის ეროვნული პარკისთვის განკუთვნილი ტერიტორია წარმოადგენს მნიშვნელოვან ადგილს ბიომრავალფეროვნების კონსერვაციისათვის. ახასიათებს ფლორისა და ფაუნის სახეობების მრავალფეროვნება. ამ ტერიტორიაზე გავრცელებულია საქართველოს და IUCN წითელი ნუსხის და CITES კონვენციით დაცული, საქართველოს და კავკასიის ენდემურ მცენარეთა 74 სახეობის პოპულაციები. შესაბამისად, მნიშვნელოვანია დაცული ტერიტორიის შექმნა მათი დაცვის და შენარჩუნების მიზნით,“- ვკითხულობთ დოკუმენტში. როგორც პროექტის განმარტებით ბარათშია აღნიშნული, კანონპროექტის ძალაში შესვლა გათვალისწინებულია 2024 წლის 1-ლი ივლისიდან. ავტორი: თაია არდოტელი

რუსეთის პრეზიდენტმა, ვლადიმერ პუტინმა ამერიკულ მხარეს უკრაინაში ცეცხლის შეწყვეტა და ფრონტზე ამჟამინდელი ვითარების შენარჩუნება შესთავაზა, იტყობინება „როიტერსი“ წყაროებზე დაყრდნობით. გამოცემა წერს, რომ 2023 წლის ბოლოსთვის პუტინმა საჯაროდ, და ასევე საიდუმლოდ, ახლო აღმოსავლეთის ქვეყნებიდან შუამავლების მეშვეობით, გადასცა ვაშინგტონს შეტყობინება, რომ მზადაა უკრაინაში ცეცხლის შეწყვეტა განიხილოს, ოღონდ, მხოლოდ იმ პირობით, რომ რუსეთი უკვე ოკუპირებულ ტერიტორიებს შეინარჩუნებს. „როიტერსის“ ამერიკელი წყარო სულაც უარყოფს რაიმე ოფიციალურ კონტაქტს და ხაზს უსვამს, რომ ამერიკა არ ჩაერთვება მოლაპარაკებებში უკრაინის მონაწილეობის გარეშე. „კონტაქტებმა ამერიკელებთან არაფერი შედეგი გამოიღო“, – ამბობს „როიტერსის“ რუსული წყარო. მეორე წყაროს თანახმად კი, ვაშინგტონმა იმავე შუამავლებით შეუთვალა მოსკოვს, რომ არ განიხილავს ცეცხლის შეწყვეტას უკრაინელების გარეშე და კონტაქტებიც ამით დასრულდა. მესამე რუსული წყაროც აღნიშნავს, რომ აშშ-ს არ სურდა უკრაინაზე ზეწოლა. რუსეთის უმაღლესი თანამდებობის პირები ამბობენ, რომ მზად არიან მოლაპარაკებებისთვის უკრაინასთან, თუმცა, ოკუპირებული ტერიტორიების შენარჩუნების პირობით. უკრაინა, თავის მხრივ, რუსეთისგან ამ ტერიტორიებისა და ასევე, 2014 წელს ანექსირებული ყირიმის დაბრუნებას ითხოვს. ნეტგაზეთი