ახალი ამბები, მხოლოდ info და სტატიები

ლ ი ც ი · January 11, 2010

ქართული პრესის მიმოხილვა 11.01.2010

11 / 01, 2010 11:28

· იაგო კაჭკაჭიშვილი - “როცა სხვა ოპოზიციური პოლიტიკური ძალები ირაკლი ალასანიას “ჩაძირვას” ცდილობენ, უგულავას დამარცხება არარეალური ხდება”

· სოზარ სუბარი - “არჩევნების გაყალბებას მძიმე შედეგები მოჰყვება. აბსოლუტურად არაფერს გამოვრიცხავ”

· ლევან თარხნიშვილი - “სამიდან თუ ერთ-ერთი ჩემი კანდიდატურაც დასახელდება, დავთანხმდები”

· გუბაზ სანიკიძე - “სააკაშვილი არ არის მიზეზი, სააკაშვილი არის შედეგი! მიზეზი ვართ თითოეული ჩვენგანი, სუყველა!”

იაგო კაჭკაჭიშვილი - “როცა სხვა ოპოზიციური პოლიტიკური ძალები ირაკლი ალასანიას “ჩაძირვას” ცდილობენ, უგულავას დამარცხება არარეალური ხდება”

“რამდენადაც ვიცი, საქართველოს საპატრიარქოს ინფორმაცია პატრიარქ კირილის საქართველოში ვიზიტის შესახებ, ჯერჯერობით, არ დაუდასტურებია. საერთოდ, არ მგონია, რუსეთ-საქართველოს შორის ურთიერთობის ნორმალიზებაში ორი ქვეყნის ეკლესიების პოზიციებმა გადამწყვეტი როლი ითამაშოს. ჩვენ არ ვცხოვრობთ რელიგიური ფუნდამენტალიზმის გარემოში, როცა ქვეყნის პოლიტიკური ლიდერები და ინსტიტუტები უფრო ნაკლებ ინსტიტუციურ ძალაუფლებას ფლობენ, ვიდრე ქვეყნის სულიერი წინამძღვრები. საბედნიეროდ, საქართველო იმით მაინც ჰგავს ცივილიზებულ ქვეყნებს, რომ პოლიტიკაში გადაწყვეტილების მიმღებნი საჯარო ფიგურები არიან და არა სასულიერო პირები”, - აცხადებს სოციოლოგიის პროფესორი, იაგო კაჭკაჭიშვილი, გაზეთ “კვირის პალიტრისთვის” მიცემულ ინტერვიუში, სათაურით “რის შეცვლას შეძლებს სენატორი მაკკეინი?! / “არჩევნები ერთი დიდი ბაზარია” / “ორი დაპირისპირებული ქვეყნის ეკლესიათა შორის ჯანსაღი ურთიერთობა წარმატებული “სახალხო დიპლომატიის” ნაწილად მიმაჩნია”.

“თუმცა, მეორე მხრივ, უთუოდ გასათვალისწინებელია ის ვითარება, რომ საქართველოში (და მსგავსი მდგომარეობაა რუსეთშიც) მორალური ავტორიტეტისა და ინსტიტუციური ნდობის თვალსაზრისით, ეკლესია და პატრიარქი უალტერნატივო ლიდერები არიან. ამის გამოუყენებლობა ქვეყნისთვის მწვავე პრობლემების მოგვარების ხელშესაწყობად არ იქნებოდა სწორი. ორი დაპირისპირებული ქვეყნის ეკლესიათა შორის ჯანსაღი ურთიერთობა, როცა ეკლესია მოქმედებს, როგორც ნდობით აღჭურვილი არასამთავრობო ორგანიზაცია, წარმატებული “სახალხო დიპლომატიის” ნაწილად მიმაჩნია. უბრალოდ, არ ვარგა, როცა ამ ტიპის აქტივობების მიმართ საზოგადოებას არაადეკვატური მოლოდინი გაუჩნდება ხოლმე და ასეთ კომუნიკაციებში პანაცეას ხედავს”, - აღნიშნავს გამოცემის კორესპონდენტთან საუბრისას იაგო კაჭკაჭიშვილი.

“დემოკრატიულ საზოგადოებებში საჯარო პოლიტიკას ვერასოდეს ჩაანაცვლებს მისიონერული მოღვაწეობა და ეს მართებულია. სხვა საკითხია, რომ საქართველოს საჯარო პოლიტიკა კონფლიქტურ რეგიონებთან (აფხაზეთსა და სამხრეთ ოსეთთან) და რუსეთთან ურთიერთობის თვალსაზრისით სუსტია და უფრო და უფრო დრამატულად ვითარდება. ჩვენმა საზოგადოებამ ასეთი საჯარო პოლიტიკის გამოსწორებაზე უნდა იზრუნოს და არა მის ჩანაცვლებაზე საეკლესიო არხებით”, - განაგრძობს გამოცემის რესპონდენტი.

“საარჩევნო გარემოს გაუმჯობესებისკენ მიმართულმა ბოლოდროინდელმა აქტიურობამ (პოლიტიკურ სპექტრს ვგულისხმობ) პოზიტიური შედეგი გამოიღო. თუმცა ხაზგასმით უნდა აღვნიშნო, რომ საარჩევნო გარემო სისტემური მთლიანობაა, რომლის ცალკეული რგოლები ურთიერთგანმაპირობებელი და არა თვითკმარი მოცემულობებია. ანუ, თუ ამ სისტემაში ერთი რგოლი მაინც ჩავარდნილია, ეს მხოლოდ ამ რგოლს კი არ ვნებს, არამედ - მთელ სისტემას. ეს ვითარება ძალიან ჰგავს სოციოლოგიურ გამოკითხვებს, სადაც შეიძლება ემპირიული მონაცემების კარგი სტატისტიკური დამუშავება მოახდინო, მაგრამ ამან ვერაფერი მოიტანოს. მეორე მხრივ, შეიძლება საკვლევი ველი არ გააყალბო, მაგრამ კვლევის ინსტრუმენტი - კითხვარი იყოს არაპროფესიულად შედგენილი, რაც მთელ კვლევას გააფუჭებს”, - დასძენს იაგო კაჭკაჭიშვილი.

“მოკლედ, იმის თქმა მინდა, რომ საარჩევნო გარემო დღეს კვლავ ითხოვს სხვადასხვა მიმართულებით სერიოზულ ცვლილებებს, რომელთა გატარების გარეშე ის კარგიც გაცუდდება, რისი ინიცირებაც აქამდე მოხდა. მაგალითად, დღეს ისევ “აქილევსის ქუსლად” რჩება რეალური საარჩევნო სიების ფორმირება, არადა, ამის მოგვარების გარეშე სამართლიან არჩევნებზე ლაპარაკი ილუზიაა... მერობის კანდიდატთა სპექტრის მრავალფეროვნება სხვადასხვა ფაქტორით შეიძლება აიხსნას: ჯერ ერთი, როგორც გამოკითხვის შედეგებიც ადასტურებს, თბილისელი ამომრჩეველი მერს უფრო მეტად სოციალურ პრობლემებზე მზრუნველი მეურნის იმიჯს მიაწერს, ვიდრე პოლიტიკოსის. ეს ფაქტორი პოლიტიკის მიღმა მყოფი ადამიანებისთვის საკმარისად მაპროვოცირებელი აღმოჩნდა არჩევნებში კენჭის საყრელად. მეორეც, ნებისმიერი არჩევნები არის საზოგადოებისთვის თავის შეხსენების ან სულაც თავის გაცნობის ერთ-ერთი ყველაზე ეფექტური ინსტრუმენტი. მაშასადამე, მეორე მაპროვოცირებელი ფაქტორი პოპულარობის ხიბლია, რომლისგანაც თავის დაღწევა ბევრს უჭირს”, - ამბობს გამოცემის რესპონდენტი.

“არცთუ უმნიშვნელოა (შეიძლება ყველაზე მნიშვნელოვანიც კი) არჩევნებში მიზნობრივი ან ანგაჟირებული მონაწილეობა, როგორც დაგეგმილ პოლიტიკურ თამაშში განსაზღვრული როლის შესრულება. არჩევნებში ზოგი კანდიდატი ხელისუფლების თამაშს თამაშობს, ზოგს სურს კონკრეტული კანდიდატის დასუსტება, ანუ სხვის სასარგებლოდ ვიღაცისთვის ხმების წართმევა და სხვ. არჩევნები ერთი დიდი ბაზარია, სადაც ყველა კანდიდატს სურს, რაღაც მიჰყიდოს ამომრჩეველს და ამით გარკვეული სარგებელი მიიღოს. ცხადია, არც მომავალი არჩევნებია გამონაკლისი. დღესდღეობით, თბილისის მერის არჩევნებში უგულავას დამარცხების შესაძლებლობები არსებობს, მაგრამ ოპოზიციისთვის ამ შესაძლებლობების გამოყენება ძალზე რთულია”, - აღნიშნავს იაგო კაჭკაჭიშვილი.

“რა მაქვს მხედველობაში? იმ შემთხვევაში, თუ ოპოზიციის რომელიმე რეიტინგული კანდიდატი შეძლებს საპროტესტოდ განწყობილი ამომრჩევლის თავის სასარგებლოდ ტოტალურ მობილიზებას, უგულავას დამარცხების შანსი გაიზრდება. მაგრამ თუ გავითვალისწინებთ დღევანდელ ვითარებას, როცა ყველაზე რეიტინგულ ოპოზიციურ კანდიდატს, ირაკლი ალასანიას მხარდაჭერას ღიად არ უცხადებენ სხვა შედარებით “წონიანი” ოპოზიციური პოლიტიკური ძალები, როგორებიც არიან ლეიბორისტები, ეროვნული ფორუმი, ქრისტიან-დემოკრატები და სხვ. - მეტიც, ცდილობენ ამ კანდიდატის “ჩაძირვას” - ცხადია, უგულავას დამარცხება რეალურ კი არა, ვირტუალურ კონტურებს იძენს. დღეს არც ერთ ოპოზიციურ პოლიტიკურ პარტიას დამოუკიდებლად, სხვა პარტიათა მხრიდან ლოიალობის გარეშე, არ შეუძლია ოპოზიციის ნიშის ტოტალური დაკავება. ფაქტია, რომ პრაიმერმა, როგორც ამ ლოიალობის მაპროვოცირებელმა ინსტრუმენტმა, მხარდაჭერა ვერ მოიპოვა. ვნახოთ, მოიტანს თუ არა რაიმე წარმატებას რეიტინგულ ოპოზიციურ პოლიტიკურ პარტიებს შორის დაწყებული მოლაპარაკებები და კონსულტაციები”, - აცხადებს გამოცემის რესპონდენტი.

“ფაქტია, რომ დღეს ხელისუფლების თუნდაც ადგილობრივ არჩევნებში და თუნდაც თბილისის მასშტაბით დამარცხებას აუცილებლად სჭირდება ოპოზიციის, უფრო ზუსტად, “რეიტინგული ოპოზიციის” ერთიანობა. ქართულ პოლიტიკურ სივრცეში უკვე მოხდა თავსებადი პოლიტიკური პარტიებისა და ლიდერების ინსტიტუციური და რაციონალური გაერთიანება “ალიანსის” სახით, რამაც თავისი პოზიტიური შედეგი გამოიღო (დღეს ეს პოლიტიკური ბლოკი, ყველა გამოკითხვით, წამყვან პოზიციებზეა ოპოზიციურ სპექტრში). თუმცა ისიც ფაქტია, რომ დღესდღეობით ამ ბლოკის სხვა დონორებით როგორც ინსტიტუციური (მასში სხვა პარტიების გაერთიანების სახით), ისე სიმბოლური (სხვა პარტიების მხრიდან მხარდაჭერის გამოხატვის სახით) გაძლიერების რესურსი არ ჩანს. ეს კი ხელისუფლების წისქვილზე ასხამს წყალს, რომელსაც ამომრჩევლის მნიშვნელოვანი ნაწილის მხარდაჭერის გარდა, ზურგს როგორც უზარმაზარი ფინანსური და მედიარესურსი, ასევე არჩევნების შედეგების ხელოვნური კორექციის უზარმაზარი გამოცდილება უმაგრებს”, - დაასკვნის იაგო კაჭკაჭიშვილი.

სოზარ სუბარი - “არჩევნების გაყალბებას მძიმე შედეგები მოჰყვება. აბსოლუტურად არაფერს გამოვრიცხავ”

“გაერთიანებაზე ზოგადად კონსულტაციები გვაქვს არა მხოლოდ “დაიცავი საქართველოსა” და ლევან გაჩეჩილაძესთან, არამედ გაცილებით უფრო ფართოდაც. მათ შორის იმ პარტიებთან, რომლებიც არ მონაწილეობენ არჩევნებში, მაგრამ რომელთათვის მნიშვნელოვანია, ქვეყანაში შეიცვალოს ხელისუფლება და დავადგეთ მრავალპარტიული დემოკრატიული განვითარების გზას. რა შედეგს მივაღწევთ, ამაზე ჯერ საუბარი ძნელია. კონსულტაციები ნამდვილად მიმდინარეობს, ჯერჯერობით მეტის თქმას აზრი არ აქვს... თუ რომელიმე პარტია მიიჩნევს, რომ ამ კონკრეტულ არჩევნებში მონაწილეობის მიღებას აზრი არ აქვს, ეს მათი გადასაწყვეტია. მაგრამ ერთმანეთს ხელი არ უნდა შევუშალოთ”, - აცხადებს “ალიანსი საქართველოსთვის” ერთ-ერთი ლიდერი სოზარ სუბარი გაზეთ “მთელი კვირისთვის” მიცემულ ინტერვიუში სათაურით სოზარ სუბარი: “არჩევნების გაყალბებას მძიმე შედეგები მოჰყვება” / “ალიანსი” გაერთიანების თაობაზე ლევან გაჩეჩილაძეთან მართავს კონსულტაციებს.

“დღეს სხვადასხვა სოციოლოგიური გამოკითხვებით ხელისუფლებას აქვს მაღალი რეიტინგი და ამის მეტ-ნაკლებად მჯერა - ეს რეიტინგი გამოიწვია იმ იმედგაცრუებამ, რომელიც საზოგადოების აქტიურობას მოჰყვა. მაგრამ ეს იმედგაცრუება ზუსტად ისევე შეიძლება შეიცვალოს სხვა განწყობით ძალიან მცირე ხანში, როგორც ეს მრავალჯერ მომხდარა. ერთ მარტივ რამეს გეტყვით - თუ საზოგადოებამ ოდნავ მაინც ირწმუნა, რომ ამ ქვეყანაში ბრძოლას კიდევ აქვს აზრი, მაშინ ის, რაც მოხდა შარშან 26 მაისს, როცა სტადიონი ხალხით გავსო, განმეორდება. ეს ძალისხმევა საკმარისია, რომ ხელისუფლებამ წააგოს თბილისი და ძალიან ბევრი რეგიონი. მიხეილ სააკაშვილს შარშან აპრილ-მაისში ჰქონდა 20%-ზე ბევრად დაბალი ნდობა, რაც მართლაც კატასტროფული შედეგია ქვეყნის პრეზიდენტისთვის. ამ ხალხს განწყობა არ შეცვლია, მაგრამ რაღაც იმედგაცრუების გამო დახუჭეს თვალი ყველაფერზე და დღეს თითქოსდა პრეზიდენტს გამოუცხადეს ნდობა”, - აღნიშნავს გამოცემის კორესპონდენტთან საუბრისას სოზარ სუბარი.

“ამაზე იმუშავა ძალიან კარგად გათვლილმა 24-საათიანმა პიარმა. მაგრამ ეს ყველაფერი ისევ ერთ დღეში შეიცვლება. ზოგადად ქვეყანაში მხოლოდ სამი ადამიანია, ვისაც დადებითი რეიტინგი აქვს, მიხეილ სააკაშვილი მათ შორის მესამეა, ორი მათგანი კი “ალიანსის” ლიდერია - არ მიყვარს ხოლმე ასეთი რამის თქმა, მაგრამ ამ შემთხვევაში მე ვლაპარაკობ სოციალურ კვლევებზე და არა ჩემს პირად მოსაზრებაზე. ჩვენ გვჭირდებოდა რეალური კვლევა, რომ ვიცოდეთ, სად ვართ. შესაბამისად, ამ კვლევის გაყალბება არაფერში გვჭირდებოდა. შეიძლება ვიღაც ფიქრობს, რომ საზოგადოებას სხვა მონაცემები მივაწოდეთ და ჩვენთვის სხვა მონაცემები გვაქვს. გარწმუნებთ, ასე არ არის. მაგრამ ამ შემთხვევაში მე ვეყრდნობი არა ჩვენს მიერ მოწყობილ გამოკვლევას, არამედ ორი ამერიკული საერთაშორისო ინსტიტუტის მიერ ჩატარებულ კვლევას. რა თქმა უნდა, შეიძლება ამ კვლევების მიმართაც განსაზღვრული უნდობლობა არსებობდეს, მაგრამ დამერწმუნებით, რომ მათ ჩვენ არ ვუხდით ფულს და არ ვუკვეთთ მუსიკას”, - განაგრძობს გამოცემის რესპონდენტი.

“უგულავას აქვს რეიტინგი 30%-ის ფარგლებში - ზოგი გამოკითხვით ოდნავ მეტი, ზოგი გამოკითხვით ოდნავ ნაკლები. ეს იმ ფონზე, როცა მას კვირაში 200-ზე მეტჯერ აჩვენებენ სხვადასხვა სახის მედიაში. ეს არის წარმოუდგენელი შედეგი საქართველოსნაირ ქვეყანაში. უთო რომ ჩართო, უთოდანაც გიგი უგულავა ლაპარაკობს და ამ ფონზე მისთვის 30%-იანი რეიტინგი წარმატებად კი არ უნდა ჩაითვალოს, არამედ - კატასტროფად. გამოდის, მოსახლეობის 70%-ს ეზიზღება, ვერ მოიპოვა მათი ელემენტარული ნდობა, მიუხედავად იმისა, რომ ასეთ 24-აათიან რეჟიმში მუშაობს. მისთვის სრულიად უცნობ ადამიანებთან მიდის დაბადების დღეებზე, შედის პირდაპირ ოჯახში და ისინი პირღია რჩებიან - ასეთ დონეზე აქვს პიარი, რასაც აქამდე არ აკეთებდა. “ალიანსს” მიგვაჩნია, რომ გამარჯვება ნამდვილად შეგვიძლია, ოღონდი ამისთვის ოპოზიციაში უფრო მეტი ერთიანობაა საჭირო”, - დასძენს სოზარ სუბარი.

“შანსები არის ძალიან მაღალი. უგულავამ გამოიყენა თავის ყველა რესურსი და 30%-იან ზღვარს ვერ გასცდა. ცხადია, დანარჩენი 70% შეიძლება გაიბნეს სხვადასხვა კანდიდატებს შორის , მაგრამ მათი ხმების უმრავლესობა შეიძლება მიიღოს იმან, ვინც იქნება გამოკვეთილი ალტერნატივა. ხელისუფლების გამოკვეთილი ალტერნატივა ჯერჯერობით არის “ალიანსი” - სხვა ალტერნატივა ხელისუფლება არ ჰყავს და სწორედ ამაში უნდა დავარწმუნოთ საზოგადოება”, - აცხადებს სოზარ სუბარი და შეკითხვას - “იმ შემთხვევაში, თუკი ხელისუფლება გამოაცხადებს, რომ ადგილობრივ არჩევნებში გაიმარჯვა უგულავამ, შეეგუებით ამას?” - პასუხობს:

“თუ ეს მოხდა იმიტომ, რომ გაყალბდა არჩევნები - ჩვენ ყველა მეთოდით უნდა ვიბრძოლოთ იმისთვის, რომ ხალხმა დაიბრუნოს თავისი არჩევანი. არჩევნების გაყალბებას მძიმე შედეგები მოჰყვება. აბსოლუტურად არაფერს გამოვრიცხავ”.

ლევან თარხნიშვილი - “სამიდან თუ ერთ-ერთი ჩემი კანდიდატურაც დასახელდება, დავთანხმდები”

“ეს ხალხი ძალიან სასაცილო ვითარებაში იგდებს თავს. მოთხოვნებსა და მესიჯებს ყოველთვე იმის მიხედვით ცვლიან, როგორი პოლიტიკური ვითარებაა. აქამდე ყველა უბედურების სათავე ცესკო-ს თავმჯდომარე იყო, მაგრამ როცა მისი არჩევის წესი შეიცვალა და ოპოზიციურ პარტიებს მიეცათ უფლება თავად გადაწყვიტონ, ვინ უნდა იყოს ახალი თავმჯდომარე, აღმოჩნდა, რომ ეს არაფერ შუაშია და სხვა პრობლემებია”, - აცხადებს გამოცემის კორეპონდენტთან საუბრისას ცესკო-ს თავმჯდომარის მოვალეობის შემსრულებელი ლევან თარხნიშვილი გაზეთ “ვერსიისთვის” მიცემულ ინტერვიუში, სათაურით მერისა და ადგილობრივი თვითმმართველობის არჩევნები ვენეციის კომისიის დასკვნის გარეშე ჩატარდება! / “არ ვნანობ, რომ ცესკო-ს თავმჯდომარე ვიყავი, რადგან ძალიან ბევრი რამ გაკეთდა”.

“ის სხვაც რომ გამოვასწორეთ - მაგალითად, ადმინისტრაციული რესურსის გამოყენების შეზღუდვასთან დაკავშირებით - სიტყვა-სიტყვით ის რომ ჩავწერეთ, რასაც ითხოვდნენ, თქვეს, უფრო მნიშვნელოვანი სიებიაო. როცა სიების შემოწმების საშუალებაც მიეცათ, გვითხრეს თანხები არ გვაქვსო. სახელმწიფო თანხებს მაინც გამოუყოფს, მაგრამ ახლა თურმე დრო აღარ არის. ატეხეს ერთი ამბავი, თბილისში ხალხს წერენო და რეგისტრაცია გავაჩერეთ. რაც არაა კონსტიტუციური ნაბიჯი - მაგრამ ამაზეც წავედით და გვითხრეს, კი, მნიშვნელოვანია ეს, მაგრამ აქ კიდევ სხვა ამბებიაო. ხვდებით, რომ ეს დაუსრულებელი პროცესია? სამწუხაროდ, ჩვენთან ასეთი ტენდენციაა - საკუთარი წარუმატებლობების სხვისთვის გადაბრალება ყველაზე მარტივია. ახლაც ამას აკეთებენ, ამბობენ - ჩვენ ვერ ვთანხმდებით ერთ კანდიდატზე, ცუდია ხელისუფლება, რომელმაც 50%-იანი ბარიერს ნაცვლად 30% გააკეთაო”, - აღნიშნავს გამოცემის კორესპონდენტთან საუბრისას ლევან თარხნიშვილი.

“პრინციპში, რაზეც საუბარი იყო, ყველაფერი გაკეთდა. ოპოზიციის როლი მნიშვნელოვნად გაზრდილია - ისინი ირჩევენ ცესკო-ს თავმჯდომარესაც და ყველა საარჩევნო უბანზეც მდივნები ჰყავთ. არავინ ამბობს, რომ კოდექსი იდეალურია, რადგან ჩვენ არ შევხებივართ საპრეზიდენტო და საპარლამენტო ნაწილს. თუმცა, როგორც კი საკონსტიტუციო კომისია პროექტს დადებს, მუშაობა ისევ გაგრძელდება. საბოლო ჯამში, კოდექსი საკმაოდ ნორმალურია. უბედურება ისაა, რომ კონსენსუსი ოპოზიციასა და არასამთავრობო სექტორს ასე ესმის - ისინი აყენებენ წინადადებას, რომლის გათვალისწინებაც 100%-ით თუ არ მოხდა, - კონსენსუსი არ შედგა. თუ ალიანსის 15 წინადადება მივიღეთ და არ დავეთანხმეთ არგუმენტირებულად ბარიერის საკითხს, კონსენსუსი არ შედგა? ის, რაც ოპოზიციას დაწყებული აქვს - მცდელობაა, რომ მომავალში წარუმატებლობა ისევ სხვას გადააბრალონ. რეიტინგები არსებობს და დამალული არაა”, - განაგრძობს გამოცემის რესპონდენტი.

“ყველამ მშვენივრად იცის, რა მდგომარეობაც აქვს. გაერო-ს ეგიდით არჩევნების ჩატარება საერთოდ კომიკური რამაა. როგორც წესი, საერთაშორისო ორგანიზაციები არჩევნებს ან ახლადშექმნილ ან არშემდგარ ქვეყნებში ატარებენ. ჩვენ თუ ამას ვითხოვთ, ე.ი. ვამბობთ, რომ საქართველო არშემდგარი ქვეყანაა, რასაც არ ვეთანხმები. ოპოზიცია ამ მოთხოვნით წინასწარ მიიჩნევს, რომ შემდეგ სათქმელი ჰქონდეს - რადგან გაერო-მ არ ჩაატარა არჩევნები, ასე იმიტომ მოხდა და ყველაფერში საარჩევნო ადმინისტრაციაა დამნაშავე. სასაცილოა, სატირალი რომ არ იყოს, როცა სერიოზული სახით ამბობენ, რომ ადგილებზე პროცესის კონტროლის საშუალება არ გვქონდაო. კი მაგრამ, კომისიაში თითო წევრი ყველას ჰყავს. მაგრამ მერე აღმოჩნდება, რომ ყველა წევრი თურმე დააშინეს, მოისყიდეს ან დაყრუვდა და დაბრმავდა - გამოდის, რომ 45 ათასი ადამიანი და დამკვირვებლებიც მატყუარები ან მამაძაღლები არიან და ყველამ იმ ერთს უნდა დაუჯეროს, ამდენ ხალხს არჩევნების გაყალბებაში რომ სდებს ბრალს”, - დასძენს ლევან თარხნიშვილი.

“არჩევნები არ ჩაიშლება. ვენეციის კომისიაში კოდექსის გადაგზავნა ესწრება, მაგრამ მეეჭვება, პასუხის მიღება მოესწროს. განსაზღვრული შეთანხმებები მიღწეულია. კარგი იქნებოდა, ვენეციის კომისიის დასკვნის მიღება მოსწრებოდა, მაგრამ, მოდით, ასე ვთქვათ - არსად წერია, რომ მაინცდამაინც ყველა არჩევნების წინ აუცილებელია ვენეციის კომისიის დასკვნა. პოლიტიკური შეთანხმება, რომ მაისში უნდა გაიმართოს არჩევნები, ამ ეტაპზე უფრო მნიშვნელოვნად ჩაითვალა, ვიდრე ვენეციის კომისიის დასკვნა”, - აცხადებს ლევან თარხნიშვილი და შეკითხვას - “ცნობილია, რომ თქვენც ისევ გსურთ ცესკო-ს თამჯდომარეობა...” - პასუხობს:

“პროცედურიდან გამომდინარე, შემიძლია მხოლოდ დავეთანხმო ან არა პრეზიდენტის გადაწყვეტილებას, თუკი ჩემს კანდიდატურას წარადგენს. ჩემი როლი აქ მთავრდება. რაც შეეხება ამბიციებს, მიმაჩნია, რომ 2 წლის განმავლობაში საკმაოდ ბევრი რამ გაკეთდა და რომ არა საარჩევნო კოდექსში შეტანილი ცვლილებები, დარჩენილი მქონდა კიდევ 2 წელზე მეტი. ამიტომ, არავისთვის უნდა იყოს მოულოდნელი, ეს ამბიცია მქონდეს. მაგრამ ეს, პირველ რიგში, პრეზიდენტის გადასაწყვეტია. სამიდან თუ ერთ-ერთი ჩემი კანდიდატურაც დასახელდება, ალბათ, დავთანხმდები. დაველოდოთ შედეგებს, ვიცი, რომ რამდენიმე არასამთავრობო ორგანიზაცია ჩემი სახელის გახმიანებას აპირებს. რა მოხდება ვნახოთ, დრო არც ისე ბევრია. როგორც უნდა იყოს, არ ვნანობ, რომ ცესკო-ს თავმჯდომარე ვიყავი, რადგან ძალიან ბევრი რამ გაკეთდა”.

გუბაზ სანიკიძე - “სააკაშვილი არ არის მიზეზი, სააკაშვილი არის შედეგი! მიზეზი ვართ თითოეული ჩვენგანი, სუყველა!”

“ხმები ოპოზიციის გარდაცვალების შესახებ გადაჭარბებულია, მაგრამ ხმებს ოპოზიციის მძიმე ავადმყოფობის შესახებ გიდასტურებთ. პრობლემა სააკაშვილში არ არის. პრობლემა არის ოპოზიციაში. მე ვლაპარაკობ ყველაზე და მათ შორის “ეროვნულ ფორუმზეც”. რაც უნდა ვიმართლოთ თავი, ამას აზრი არ აქვს”, - აცხადებს “ეროვნული ფორუმის” ერთ-ერთი ლიდერი გუბაზ სანიკიძე გაზეთ “ასავალ-დასავალისთვის” მიცემულ ინტერვიუში, სათაურით გუბაზ სანიკიძე: ქართველებო, გამოუტყდით საკუთარ თავს, ღმერთის უფრო გეშინიათ თუ მერაბიშვილის? თუ მერაბიშვილის გეშინიათ - მაშინ ნუღარ ქართველობთ, მაპატიეთ და ნუღარ იბრიქებით.

“გააჩნია, რა იგულისხმება ამ მესამე ტალღაში და როგორ შევხვდებით ამ მესამე ტალღას - ისევ ისე უაზროდ, დაქსაქსულად თუ უფრო სერიოზულად დავგეგმავთ ამ საქმეს. მე გარწმუნებთ, რომ რამდენიმე სერიოზულ პოლიტიკურ პარტიასთან ერთად ჩვენ ძალიან სერიოზულ საკითხებს დავგეგმავთ და განვახორციელებთ. ხაზს ვუსვამ, სერიოზულ პოლიტიკურ ძალებთან ერთად! სულ რამდენიმე დღეში საზოგადოება დაინახავს ამ კონსულტაციების შედეგს”, - აღნიშნავს გამოცემის კორესპონდენტთან საუბრისას გუბაზ სანიკიძე.

“ბოლო ოცი წლის განმავლობაში ქართველობა როგორ ცხოვრობს? სხვისი ჭირი ღობეს ჩხირი! მთელ ქვეყანაში ასი ოჯახი თუ არის ფინანსურად წარმატებული და ისიც იმიტომ, რომ გაძარცვეს ეს ქვეყანა, მაგრამ არ შერჩებათ არაფერი. ეს არ არის ფეოდალიზმი, რომ საგვარეულოებად იყოს დაყოფილი ქვეყანა. მერაბიშვილები არ არიან ჯაყელები, რომ მესხეთი მათ ეკუთვნოდეთ, გოროზია არ არის დადიანი, რომ მის შვილზე გადავიდეს სამეგრელოს გუბერნატორობა! დადგება დრო და ძალიან შეგვეცოდება ჩვენ ეს ხალხი, ეს ხელისუფლება. საცოდავები იქნებიან, რადგან ძალიან მძიმე დღეში ჩააგდებს მათ ცხოვრება. უნდა შეგვეცოდოს კიდეც”, - განაგძობს გამოცემის რესპონდენტი.

“ისტორიაში, სააკაშვილი, რა თქმა უნდა დარჩება. ყველა ისტორიის ლუკმაა, ოღონდა გააჩნია როგორი - ტკბილი თუ შხამიანი? მე ჩემი ქვეყნის გაშვებულ შანსებს დავტირი პირველ რიგში! მე ძალიან ვწუხვარ, რომ სააკაშვილმა ვერ ივარგა. მას ჰქონდა მონაცემები, რომ საქართველო მართლა ექცია სანიმუშო ქვეყნად კავკასიის რეგიონში თუ აღმოსავლეთ ევროპაში! კარგად დავფიქრდეთ ამ ფორმულაზე: სააკაშვილი არ არის მიზეზი, სააკაშვილი არის შედეგი! მიზეზი ვართ თითოეული ჩვენგანი, სუყველა! გაივლის დრო და დაიწერება, რომ ის თაობა, რომელიც XX საუკუნისა და XXI საუკუნის მიჯნაზე ცხოვრობდა აღმოჩნდა სუსტი, უსუსური, უპრინციპო, უზნეო, მშიშარა, ნაცარქექია. აღარ გამოარჩევენ იქ გუბაზ სანიკიძესა და ჯაბა ხუბუას, ჩვენ მიგვაყოლებენ ზედ - დაუნდობელია ისტორია!” - დაასკვნის გამოცემის კორესპონდენტთან საუბრისას გუბაზ სანიკიძე.

http://www.interpressnews.ge/ge/index.php/...ink/122271.html

ლ ი ც ი · January 13, 2010

·

დავით უსუფაშვილი: “თარხნიშვილს ყველა იცნობს, სიჭინავას არავინ იცნობს, ხარატიშვილს - ვანო მერაბიშვილი...”

“ოპოზიცია შოკშია, ოღონდ აღარ იცის, ეს შოკი უფრო მეტად პრეზიდენტის ქმედებამ გამოიწვია ცესკო-ს თავმჯდომარეობის კანდიდატების დასახელებით თუ მისმა უმრავლესობამ, როცა პრეზიდენტის მიერ კანონის დარღვევა ლამის ოპოზიციას გადააბრალა, აშკარად კანონდამრღვევი სააკაშვილი კი ქვეყნის უსაფრთხოებაზე ზრუნვით მოუცლელ პრეზიდენტად გამოაცხადა”, - წერს გაზეთი “რეზონანსი” სტატიაში სათაურით “სამი თარხნიშვილი” ცესკოს თავმჯდომარეობაზე / ოპოზიცია პრეზიდენტის არჩევანს არ იწონებს.

“სააკაშვილმა 14 კანდიდატიდან არჩევანი თარხნიშვილზე, ზურაბ ხარატიშვილსა და ოთარ სიჭინავაზე შეაჩერა. პრეზიდენტის ამ არჩევანს ოპოზიცია უკვე სკეპტიკურად უყურებს... პოლიტოლოგ რამაზ საყვარელიძის შეფასებით, პრეზიდენტის მხრიდან ამ კანდიდატების დასახელება იმას ნიშნავს, რომ ხელისუფლება არჩევნებში პასიურ მდგომარეობაში ყოფნას არ აპირებს. საყვარელიძის აზრით, ხელისუფლება კი ეცდება, საარჩევნო პროცესი მის სასარგებლოდ წარიმართოს, მაგრამ იგი ასევე შეეცდება, ლეგიტიმურობის ფარგლებს არ გასცდეს. ის დარწმუნებულია, რომ თავად ხელისუფლება არ მოინდომებს ცესკო-ს თავმჯდომარედ კვლავ ლევან თარხნიშვილის დანიშვნას, მაგრამ მისი კანდიდატურის კვლავ წამოყენება იმას ნიშნავს, რომ ხელისუფლება წინა არჩევნებზე დაშვებულ შეცდომებს არ აღიარებს”, - აღნიშნავს გამოცემა.

“ოპოზიციის შეფასებით, პრეზიდენტმა სააკაშვილმა არასამთავრობოებს სრული იგნორირება გაუკეთა და ცესკო-ს თავმჯდომარეობის კანდიდატებად სამი საჯარო პირი მორჩილების ნიშნით შეარჩია... “ალიანსის” წარმომადგენელმა დავით უსუფაშვილმა პრეზიდენტის მიერ შერჩეულ კანდიდატებზე ამგვარი კომენტარი გააკეთა: “თარხნიშვილზე არაფერს ვიტყვი, რადგან ყველა იცნობს... სიჭინავას არავინ იცნობს, ხარატიშვილს - ვანო მერაბიშვილი...” - წერს გაზეთი “24 საათი” სტატიაში სათაურით კანდიდატებით უკმაყოფილო ოპოზიციამ რევოლუცია გაიხსენა.

“კონსერვატიული პარტიის” წარმომადგენელმა კახა კუკავამ გამოცემას განუცხადა, რომ 12 იანვრის პრეზიდენტის გადაწყვეტილების შედეგად გაქრა ყოველგვარი იმედი და ილუზია, რომ საქართველოში სამართლიანი არჩევნები გაიმართებოდა. “აშკარაა, რომ ეს ადამიანი არჩევნების გზით ხელისუფლების დატოვებას არ აპირებს” - ასკვნის კონსერვატორთა ერთ-ერთი ლიდერი, რომელმაც “24 საათისთვის” მიცემული კომენტარი სააკაშვილის მიმართ მუქარის ტექსტით დაასრულა: “თუ სააკაშვილს უნდა, რომ რევოლუცია მიიღოს, ის მიიღებს რევოლუციას 31 მაისს!” - აღნიშნავს სტატიის ავტორი.

“ლოგიკურად ჩნდება ეჭვი - სამეულში თარხნიშვილის შეყვანით, პრეზიდენტი სააკაშვილი ღიად ხომ არ მიდის კონფრონტაციაზე? ექსპერტებმა უკვე არაერთხელ გაახმიანეს, რომ ადგილობრივი თვითმმართველობის არჩევნების გამართვა, რეალურად, არც ხელისუფლებას უნდა და არც ოპოზიციას. შესაბამისად, არჩევნების ჩასაშლელად, შესაძლოა სააკაშვილმა კარგი გათვლაც გააკეთა - თარხნიშვილის ცესკო-ს თავმჯდომარედ დამტკიცების შემთხვევაში ოპოზიციის განსაზღვრულ ნაწილს ექნება მიზეზი, გაყინულ-დამყაყებული პროცესი დაძრას - გამოვლენ, ხალხს ეტყვიან, დაგვცინის სააკაშვილი, არჩევნების გაყალბებას ისევ აპირებს, არჩევნებზე წასვლას აზრი აღარ აქვსო და მოუწოდებენ ქუჩაში გამოსვლისკენ”, - წერს გაზეთი “ვერსია” სტატიაში სათაურით სააკაშვილი კანონს არღვევს - თარხნიშვილი თანამდებობას ინარჩუნებს?

“შესაბამისად, ფუნქცია გაუჩნდება ოპოზიციის იმ ნაწილს, რომელიც ბოლო პერიოდში, ეროვნული კრების გამართვასა და კომბლებისა თუ ცოცხების რევოლუციის მოწყობის აუცილებლობაზე საუბრობს და როგორც კულუარებში ამბობენ, მათ მხარს “კონსერვატორები” და ბურჯანაძის პარტიაც უჭერს. ან სხვა სქემა გათამაშდება - არჩევნები გაიმართება თარხნიშვილით, გაიმარჯვებს უგულავა და როგორც ლევან გაჩეჩილაძე იტყოდა, “მთავარი ჯახიც” დაიწყება. ისე, რეიტინგდაკარგულ და უფულო ოპოზიციას მიზნის მისაღწევად, ალბათ, ეს ვარიანტიც აწყობს. სხვაგვარად, ვერაფრით ავხსნით იმ ფაქტს, რომ საარჩევნო კოდექსზე ცვლილებებზე მუშაობის დროს, სპეციალური ჯგუფის არც ერთ წევრს “აზრად არ მოსვლია”, მოეთხოვა უგულავას გადადგომა მისი კანდიდატად დასახელების შემთხვევაში, დასახელებისთანავე”, - ვარაუდობს სტატიის ავტორი.

http://www.interpressnews.ge/ge/index.php/...ink/122458.html

Edited January 13, 2010 by ლ ი ც ი

ლ ი ც ი · January 14, 2010

ქართული პრესის მიმოხილვა 14.01.2010

http://www.interpressnews.ge/ge/index.php/...ink/122539.html

ლ ი ც ი · January 15, 2010

რუსი ძალოვნები კვლავ საქართველოში "ტერორისტების" მომზადებაზე საუბრობენ

15 / 01, 2010 11:10

რუსი ძალოვნები კვლავ საქართველოში "ტერორისტების" მომზადებაზე საუბრობენ.

საქართველოს სამხედრო ბაზებზე უცხოელი ინსტრუქტორები ტერორისტებს ამზადებენ, რათა რუსეთში ტერორისტული აქტები გახორციელდეს, - ასეთი ბრალდებით ამჯერად რუსეთის შს მინისტრის მოადგილე, გენერალ-პოლკოვნიკი არკადი ედელევი გამოვიდა.

განცხადება ედელევმა ვლადიკავკაზში გამართულ კოლეგიაზე გააკეთა, სადაც ჩრდილოეთ ოსეთის შს სამინისტროს მუშაობის შედეგები განიხილეს.

მისივე თქმით, “საქართველოში მომზადებული ტერორისტები ჩრდილოეთ კავკასიის რესპუბლიკებს განიხილავენ, როგორც რუსეთის სამხრეთში დესტაბილიზაციის საშუალებას”.

“ტერორისტული დაჯგუფებები საფრთხეს წარმოადგენენ ჩრდილოეთ ოსეთისთვის, ინგუშეთისთვის, ჩეჩნეთისთვის, ყაბარდო-ბალყარეთისა და ყარაჩეი-ჩერქეზეთისთვის”, - აღნიშნა მან.

ანალოგიური ბრალდებებით, როგორც ცნობილია, ადრე რუსეთის უსაფრთხოების ფედერალური ბიუროს ხელმძღვანელი ალექსამდრე ბორტნიკოვიც გამოვიდა.

http://www.interpressnews.ge/ge/index.php/...l&hd_line=1

ლ ი ც ი · January 15, 2010

ქართული პრესის მიმოხილვა 15.01.2010

15 / 01, 2010 11:04

ცესკო-ს თავმჯდომარეს პარლამენტი დღეს დანიშნავს?!

“ცესკოს თავმჯდომარის საარჩევნო პროცესისადმი ბოიკოტის გამოცხადების მომხრე პარტიებმა გაიმარჯვეს და სამმა პარტიამ გადაწყვეტილების მიღება ვერ შეძლო. ამის გამო პარლამენტს კიდევ ერთი საკითხი დაემატა და ცესკო-ს თავმჯდომარეს სესიაზე დაამტკიცებენ. წინასწარი ინფორმაციით კი, თარხნიშვილს სიჭინავათი ჩაანაცვლებენ”, - წერს გაზეთი “რეზონანსი” სტატიაში სათაურით ცესკო-ს თავმჯდომარეს დღეს პარლამენტი დანიშნავს.

“იმ შემთხვევაში თუკი ცესკო-ს ოპოზიციური ნაწილი თავმჯდომარის დამტკციცებას ვერ შეძლებდა, პროცესი უკვე პარლამენტში გადაინაცვლებდა და ამისთვის პარლამენტს ვადა 21 იანვრამდე აქვს. თუმცა, უკვე არსებობს მოლოდინი, რომ პარლამენტი ცესკო-ს თავმჯდომარეს დღევანდელ რიგგარეშე სესიაზე დაამტკიცებს. დღევანდელ სესიაზე უნდა დამტკიცდეს ცესკო-ს სამ ვაკანტურ თანამდებობაზე კანადიდატურებიც და როგორც ჩანს, ცესკო-ს თავმჯდომარესაც დღეს დაამტკიცებენ. პრინციპში, ამის მოლოდინი არსებობდა კიდეც, რომ საბოლოო გადაწყვეტილების მიღება პარლამენტს მოუწევდა. თუმცა, ბოლო მომენტამდე “ქრისტიან-დემოკრატები” ცდილობდნენ, რომ ოპოზიციისთვის ეს გადაწყვეტილება გადაეფიქრებინათ”, - აღნიშნავს გამოცემა.

“თუმცა გუშინ ცესკო-ში კომისიის თავმჯდომარის არჩევა არ შედგა, რის გამოც პროცესი პარლამენტში გადაინაცვლებს. სხდომას ესწრებოდა ოპოზიციის 4 წარმომადგენელი: “ქრისტიან-დემოკრატები”, “ჩვენ თვითონ”, “მრეწველები” და “რესპუბლიკელები”. კენჭისყრაში მონაწილეობა კი სამმა მათგანმა მიიღო. კენჭისყრაზე უარი განაცხადა “ქრისტიან-დემოკრატების” წარმომადგენელმა გოჩა ჯოჯუამ. მისი განცხადებით, ცესკო-ს ოპოზიციური პარტიებს არჩევანის გაკეთების მინიმალური შანსი ჰქონდათ. მისივე თქმით, თავიდანვე იყო მცდელობა, რომ სიტუაცია ჩიხში შესულიყო და ასეც მოხდა... შედეგების მიხედვით სამივე ბიულეტენი გაბათილდა. ოპოზიციის წევრებმა პრეზიდენტის მიერ წარმოდგენილი სამი კანდიდატიდან არც ერთს არ დაუჭირეს მხარი, რაც იმას ნიშნავს, რომ ცესკო-ს თავმჯდომარეს წარდგენილი სამი კანდიდატიდან პარლამენტი ერთს დაამტკიცებს”, - დასძენს გამოცემა.

“საპარლამენტო კულუარებში უკვე იმაზე საუბრობენ, რომ პარლამენტი გადაწყვეტილებას ოთარ სიჭინავას სასარგებლოდ მიიღებს. როგორც ამბობენ, იგი სააკაშვილის ბავშვობის მეგობარია და ცესკო-ს თავმჯდომარეობის კანდიდატადაც ამ ნიშნით იქნა შერჩეული. ამ ვითარებაში კი ცხადია, გადაწყვეტილების პარლამენტში მიღება საკმაოდ ბევრ პრობლემას მოხსნის და სიჭინავას დამტკიცება უპრობლემოდ მოხდება. მაგრამ საინტერესო ის არის, რომ პროცესის პარლამენტში გადატანა თავმჯდომარეობის ერთ-ერთმა კანდიდატმა ლევან თარხნიშვილმა სამწუხაროდაც კი მიიჩნია. მისი თქმით, “ძალიან სამწუხაროა, რომ ცესკო-ს ოპოზიციურმა წევრებმა არ გამოიყენეს შანსი - თავად გაეკეთებინათ არჩევანი”. მისივე ვარაუდით, ოპოზიციის ეს წევრები, რომლებიც უნდა გამოირჩეოდენ ყველაზე მეტად დამოუკიდებლობით, მოექცნენ პარტიული კონტროლისა და დიქტატის ქვეშ”, - წერს სტატიის ავტორი.

“უკვე ყველა ამბობს, რომ ლევან თარხნიშვილი მეორედაც იქნება ცესკო-ს თავმჯდომარე. ტესტად მონათლულ ადგილობრივ არჩევნებსაც ის ჩაატარებს. უკვე ისიც გარკვეულია, რომ ცესკო-ს ახალ თავმჯდომარეს არა ოპოზიციის წარმომადგენლები, არამედ პარლამენტის უმრავლესობა დაამტკიცებს”, - წერს გაზეთი “ახალი თაობა” სტატიაში სათაურით არჩევნები უკვე გაყალბებულია.

“ოპოზიცია სამივე კანდიდატს სახელისუფლოს უწოდებს. “კონსერვატორი” კახა კუკავა ოთარ სიჭინავას და ზურაბ ხარატიშვილს, ლევან პირველად და ლევან მეორედ მოიხსენიებს. კუკავა მიიჩნევს, რა მნიშვნელობა აქვს მათ გვარ-სახელებს - ცესკო-ს თავმჯდომარე ტელეფონით იმართება ხელისუფლების მიერ და რა დაკვეთასაც მიიღებს, იმას გააკეთებს. მიუხედავად ამისა, ოპოზიციის ნაწილი მზად არის, რომ არჩევნებში მიიღოს მონაწილეობა. “კონსერვატორები” პრეზიდენტის ამ ნაბიჯს გამოწვევად იღებენ და არჩევნების გაყალბების შემთხვევაში მზად არიან რევოლუციისთვის. როგორ განვითარდება მოვლენები, ეს რთული საქმელი არ არის. ოპოზიცია კიდევ ერთხელ შეეცდება ქუჩაში თავისი მომხრეების მობილიზებას”, - აღნიშნავს გამოცემა.

“პროგნოზები გამართლდა. ცესკო-ში კომისიის თავმჯდომარე ვერ აირჩიეს. პროცესმა პარლამენტში გადაინაცვლა - თავმჯდომარის კანდიდატურას საკანონმდებლო ორგანო დღეს უყრის კენჭის. ცესკო-ს გუშინდელ სხდომაზე არ მისულან “ლეიბორისტები” და “კონსერვატორები”. კენჭიყრაში სამმა ოპოზიციონერმა მიიღო მონაწილეობა. კენჭისყარაზე უარი განაცხადა “ქრისტიან-დემოკრატების ”წარმომადგენელმა. შედეგების მიხედვით, სამივე ბიულეტენი გაბათილდა - ოპოზიციის წევრებმა პრეზიდენტის მიერ წარდგენილი 3 კანდიდატიდან არც ერთს არ დაუჭირეს მხარი”, - წერს გაზეთი “24 საათი” სტატიაში სათაურით პოლიტიკური სიურპრიზი არ შედგა.

“გუშინ ცესკოში არმყოფმა ოპოზიციურმა პარტიებმა საკუთარი აზრი გამოთქვეს თავმჯდომარის თაობაზე. “კონსერვატიული პარტია” ვერავითარ განსხვავებას ვერ ხედავს თავისუფლების ინსტიტუტის მიერ დასახელებელ ლევან თარხნიშვილს, გაერო-ს ასოციაციის მიერ დასახელებულ ოთარ სიჭინავასა და ფონდ “ალპეს” მიერ დასახელებულ ზურაბ ხარატიშვილს შორის”, - წერს გაზეთი “24 საათი” სტატიაში სათაურით არჩევანი ხელისუფლებას.

”ხელისუფლება ისევ აპირებს არჩევნების შედეგებით მანიპულირებას. ეს პასუხისმგებლობა ხელისუფლებისა და საპარლამენტო უმრავლესობის კისერზე იყოს. ვფიქრობთ, რომ მთავრობის სატელიტ პერსონებზე ჩვენი მხრიდან პასუხისმგებლობის აღება პოლიტიკურად სწორი არ იქნებოდა. ვინც უნდა იყოს ცესკო-ს თავმჯდომარე, ოპოზიცია გაიმარჯვებს და რაც მთავარია, ბოლომდე დაიცავს თავის გამარჯვებას”, - განაცხადეს კონსერვატორებმა. “ალიანსი საქართელოსთვის” წარმომადგენელ ზურაბ აბაშიძის თქმით, “ერთი თარხნიშვილის ნაცვლად მივიღეთ სამი თარხნიშვილი. ეს არის თვალებში ნაცრის შეყრა”. პარტიის “ჩვენ თვითონ” ლიდერმა პაატა დავითაიამ კი განაცხადა, რომ პრეზიდენტის მიერ წარმოდგენილი კანდიდატებით, რომლებიც კითხვის ნიშნებს ბადებენ, ხდება “პოლიტიკური პარტიების შანტაჟი... ხოლო კანდიდატი, რომელსაც პარლამენტი დაამკიცებს, დიდი ალბათობით თარხნიშვილი იქნება, რომელიც ყოვლად მიუღებელია”, - აღნიშნავს გამოცემა.

http://www.interpressnews.ge/ge/index.php/...ink/122623.html

Edited January 15, 2010 by ლ ი ც ი

ლ ი ც ი · January 16, 2010

ქართული პრესის მიმოხილვა 16.01.2010

16 / 01, 2010 10:38

• “ინტერპრესნიუსმა” ეროვნულ არქივს საკუთარი ფოტოარქივი გადასცა

• დავით გამყრელიძე - “ჩემი და ალასანიას დაპირისპირება არის აბსურდი... ბიზნესში კი არა, ხელისუფლებაში მოსვლას ვაპირებ და ვფიქრობ, ძალიან მალე”

• ცესკო-ს თავმჯდომარე მერაბიშვილის ფავორიტად დასახელებული კანდიდატი ზურაბ ხარატიშვილი გახდა

• რა როლი ეკისრებათ “გივის” და მასთან ერთად გაგზავნილ “ბრძოლისუნარიან” ხალხს უკრაინის არჩევნებში?

“ინტერპრესნიუსმა” ეროვნულ არქივს საკუთარი ფოტოარქივი გადასცა

“საინფორმაციო სააგენტო “ინტერპრესინიუსმა” გუშინ საქართველოს ეროვნულ არქივთან მემორანდუმი გააფორმა და საკუთარი ფოტოარქივი გადასცა, რომელიც 10 წლის განმავლობაში დაგროვდა. ეროვნული არქივის შენობაში ასევე მოეწყო ფოტოგამოფენა, სადაც წარმოდგენილი იყო მიმდინარე მოვლენების ამსახველი ფოტოგამოფენა. სააგენტოს ხელმძღვანელის ბაია ცანავას თქმით, ეს არ არის მხოლოდ ფოტოგამოფენა. ის არქივი, რომელიც “ინტერპრესნიუსს” დაუგროვდა, შეინახება ეროვნული არქივის საცავში, ხოლო საავტორო უფლება კი მათ დარჩებათ”, - წერს გაზეთ “რეზონანსი” სტატიაში სათაურით “ინტერპრესნიუსმა” ეროვნულ არქივს საკუთარი ფოტოარქივი გადასცა / გამოფენაზე ოპოზიციონერი პოლიტიკოსები სჭარბობდნენ.

“ეს იქნება იმის გარანტი, რომ არ განადგურდება ეს ფოტოები და შემორჩება მომავალ თაობას. სწორედ ამ იდეამ გვიბიძგა გამოფენაც მოგვეწყო და ამიტომ გავბედეთ ამ ნაბიჯის გადადგმა. ძალიან გაგვიჭირდა ფოტოების შერჩევა, მაგრამ შეირჩა სამოცდაათამდე ფოტო, რომელიც კარგ განწყობაზე დააყენებდა დამთვალიერებელს”, - ამბობს ცანავა. ეროვნული არქივის გენერალური დირექტორი თეონა იაშვილი ამბობს, რომ ეროვნული არქივისთვის ძალიან მნიშვნელოვანია ეს ფაქტი, რადგან წლების განმავლობაში შექმნილი ვაკუუმის შევსება მოხდება”, - აღნიშნავს გამოცემა.

“ძალიან დიდი პრობლემას წარმოადგენდა ჩვენთვის, რადგან არ შემოდიოდა ფოტომასალა, სადაც ასახული იქნებოდა ბოლო წლების მანძილზე მომხდარი საზოგადოებრივ-პოლიტიკური თუ კულტურული მოვლენები. მკვლევარები, რომლებიც ჩვენთან ძალიან ხშირად მოდიან და ინტერესდებიან საქართველოს უახლესი ისტორიით, აქამდე ვერ სარგებლობდნენ აღნიშნული მომსახურებით. ამიერიდან “ინტერპრესნიუსის” მხარდაჭერით გვექნება უმაღლესი ხარისხისა და საინტერესო შინაარსის ფოტოები და ნებისმიერ მკვლევარს ექნება საშუალება გაეცნოს ამ დოკუმენტებს და გადაიღოს ასლები”, - ამბობს იაშვილი. გამოფენაზე იყვნენ როგორც საზოგადოებისთვის ცნობადი სახეები, პრეზიდენტის პრესსპიკერი მანანა მანჯგალაძე, ასევე პოლიტიკოსები, თუმცა ოპოზიციის წარმომადგენლები აშკარად სჭარბობდნენ”, - დასძენს გამოცემა.

“ახალი მემარჯვენეების” წევრის მანანა ნაჭყებიას თქმით, ძალიან საინტერესო და მნიშვნელოვანია, რომ ეროვნულ არქივს ექნება შესაძლებლობა ბოლო ათწლეულის ისტორიის ფოტოვერსია ჰქონდეს, რომელიც მაღალი ოსტატობითაა ასახული. “მე ოპოზიციონერი ვარ და ყველამ იცის ჩემი დამოკიდებულება პრეზიდენტ მიხეილ სააკაშვილის მიმართ, მაგრამ ამ კადრების ნახვამ კეთილი ღიმილი მომგვარა. ვფიქრობ, მნიშვნელოვანი დღე იყო”, - განაცხადა ნაჭყებიამ. მოძრაობა “ერთიანი საქართველოსთვის” ლიდერმა ეკა ბესელიამ განაცხადა, რომ ეს ფოტომატიანე მომავალ თაობას სრულად შეუქმნის წარმოდგენას მიმდინარე პროცესებზე”, - წერს სტატიის ავტორი.

გამოფენაზე მოსულ საპარლამენტო უმრავლესობის წევრ გიგი წერეთელსა და “ახალი მემარჯვენეების” წევრებს შორის მიმდინარე პოლიტიკური მოვლენებთან, კერძოდ, საარჩევნო კომისიის თავმჯდომარის არჩევასთან დაკავშირებით მცირე დისკუსიაც გაიმართა... წერეთელი ფოტოგამოფენის შეფასებისას ამბობს, რომ ექსპოზიციამ უახლესი ისტორიის ბევრი საინტერესო მომენტი გაახსენა და დააფიქრა. “ნებისმიერ შემთხვევაში ეს არის ისტორიის ნაწილი და არის ძალიან ბევრი არაჩვეულებრივი ფოტო, აქ ყველაფერია აღბეჭდილი. ზოგადად მომეწონა, მაგრამ ჩემი ფოტო უკეთესი შეიძლებოდა”, - ამბობს გამოცემის კორესპონდენტთან საუბრისას გიგი წერეთელი.

დავით გამყრელიძე - “ჩემი და ალასანიას დაპირისპირება არის აბსურდი... ბიზნესში კი არა, ხელისუფლებაში მოსვლას ვაპირებ და ვფიქრობ, ძალიან მალე”

“ეს არის ყოველ საფუძველს მოკლებული - ბიზნესში წასვლა არც თავში გამივლია, არც ამ ტიპის საუბარი მქონია ვინმესთან და არც პოლიტიკისა და ბიზნესის შეთავსებაზე ვფიქრობ. ბიზნესში კი არა, ხელისუფლებაში მოსვლას ვაპირებ და ვფიქრობ, რომ ძალიან მალე მოხდება ეს ყველაფერი. ნამდვილად ვერ მივანიჭებ მაგ სიამოვნებას ვერც მიხეილ სააკაშვილს და ვერც “ნაციონალებს”, რომ ახლა, როცა ასე ახლოს არის ხელისუფლების ცვლილება, თავი დავანებო ამ ბრძოლას. არავითარ შემითხვევაში, პირიქით, ძალიან სერიოზულად ვემზადები ჩემს თანაალიანსელ მეგობრებთან ერთად ხელისუფლებაში მოსასვლელად”, - აცხადებს “ახალი მემარჯვენეების” ლიდერი დავით გამყრელიძე გაზეთ “ალიასთვის” მიცემულ ინტერვიუში, სათაურით რა უთხრა დავით გამყრელიძემ “ალიას” პოლიტიკიდან ბიზნესში წასვლაზე?

“ეტყობა, ხელისუფლებას ისე აშინებს ჩემი და ალასანიას მჭიდრო ტანდემი, რომ ახალი წლის შემდეგ პრესა არ წყვეტს საუბარს ჩვენს ე.წ. დაპირისპირებაზე, რაც არის აბსურდი. ხან ვითომ კოკა გუნცაძისა და საარჩევნო შტაბის გამო ვიკამათეთ, ხან შუალედური არჩევნების გამო, რას აღარ იგნებენ, ამ თემის განხილვაც არ ყოფილა. არათუ დაპირისპირება, აზრთა სხვადასხვაობაც კი არ ყოფილა ჩემსა და ირაკლი ალასანიას შორის. სანიმუშო პარტნიორობა გვაქვს”, - აღნიშნავს გამოცემის კორესპონდენტთან საუბრისას დავით გამყრელიძე.

“ძალიან კარგად ვიცით თბილისელების დამოკიდებულება ხელისუფლებისადმი ვიცით ის პერსპექტივა, რაც აქვს ირაკლი ალასანიას და სოზარ სუბარის კანდიდატურას. სამუშაო ბევრია, მაგრამ ჩვენ არ გვინდა, რომ ნაადრევად ჩავერთოთ ისეთ კამპანიაში, რასაც ფინანსურად ვეღარ გავწვდებით, თორემ დანარჩენი ყველაფერი გამოჩნდება ძალიან მალე და ნახავთ, ვინ გაიმარჯვებს თბილისში - გნებავთ თარხნიშვილი დანიშნონ, გნებავთ მერაბიშვილის ბუღალტერი. თუ ამომრჩეველი იქნება აქტიური და გამოვა არჩევნებზე, ჩვენ გავიმარჯვებთ. 2008 წლის 5 იანვრის არჩევნებზე ცესკოს თავმჯდომარე თარხნიშვილი იყო, მაგრამ თბილისი პირწმინდად წააგო სააკაშვილმა, ასე პირწმინდად წააგებს უგულავა ალასანიასთან”, - აცხადებს დავით გამყრელიძე და შეკითხვას - “ნოღაიდელმა განაცხადა, რომ არჩევნების გაყალბების შემთხვევაში რევოლუცია გარდაუვალი იქნება. ასეთ შემთხვევაში, დადგებით ნოღაიდელის და რევოლუციის გვერდით?” - პასუხობს:

“მე რევოლუციის წინააღმდეგი ვიყავი ყოველთვის. მიმაჩნია, რომ რევოლუციებმა საქართველო დაღუპა, საქართველოს სჭირდება არჩევნების გზით ხელისუფლების შეცვლა და ჩვენ ამას მივაღწევთ - გარწმუნებთ, რომ სააკაშვილის რეჟიმი არის გამოფიტული. სააკაშვილმა დაკარგა ყოველგვარი დასაყრდენი და ამის დასტური იყო ბათუმის ე.წ. ენერგეტიკული სამიტი, რომელიც სამარცხვინოდ ჩაიშალა. სააკაშვილმა ვერ უზრუნველყო, რომ რომელიმე პრეზიდენტი მაინც ჩამოსულიყო ამ სამიტზე. ეს რეჟიმი დასრულებულია, ჩვენი ამოცანაა რომ ამ რეჟიმის დემონტაჟი უზრუნველვყოთ უსაფრთხოდ და მშვიდად. ისე არ მოხდეს, რომ ერთი ბელადი მეორეთი იქნას ჩანაცვლებული - ვინც რევოლუციას აწყობს, ის ამ თემაზე ბევრს არ ლაპარაკობს. ნოღაიდელს შეურაცხყოფას არ ვაყენებ. მაგრამ მისი რეიტინგი არ არის სათანადო”.

ცესკო-ს თავმჯდომარე მერაბიშვილის ფავორიტად დასახელებული კანდიდატი ზურაბ ხარატიშვილი გახდა

“ცესკო-ს ახალი თავმჯდომარე პირველ რიგში სახალხო დამცველის იმ დასკვნას წაიკითხავს, სადაც საარჩევნო პროცესში აღმოჩენილ დარღვევებზეა საუბარი, - ყოველ შემთხვევაში ამის პირობა ზურაბ ხარატიშვილმა გუშინ პარლამენტის იურიდიული კომიტეტის სხდომაზე დადო. ძნელი სათქმელიასაპარლამენტო უმრავლესობამ ამ პირობის გამო გააკეთა თუ არა, მაგრამ ფაქტია, რომ მერაბიშვილის ფავორიტად დასახელებული კანდიდატი ცესკო-ს თავმჯდომარე გახდა”, - წერს გაზეთი “რეზონანსი” სტატიაში სათაურით უმრავლესობის არჩევანი / პარლამენტმა თარხნიშვილი ადგილზე ხარატიშვილი დაამტკიცა.

“ზურაბ ხარატიშვილს მხარი 98 დეპუტატმა დაუჭირა, არც ერთის წინააღმდეგ. ყველაზე მოულოდნელი პარლამენტში გამართული კენჭისყრის წინ ლევან თარხნიშვილს განცხადება აღმოჩნდა, რომელმაც განაცხადა, რომ მას ცესკო-ს თავმჯდომარეობა აღარ სურდა. იმისთვის კი, რომ პროცედურა არ გაწელილიყო და პრეზიდენტს მის ნაცვლად სხვა კანდიდატის წარმოდგენა არ დასჭირვებოდა, ოფიციალურად საკუთარი კანდიდატურა არ მოხსნა, თუმცა განაცხადა, რომ არაფორმალურად საკუთარ კანდიდატურას ხსნიდა და უმრავლესობის წევრებს მოუწოდა არჩევანი დანარჩენ ორ კანდიდატს შორის გაეკეთებინათ. თარხნიშვილს მაჭავარიანმა მადლობა გადაუხადა საარჩევნო სისტემის განვითარებაში შეტანილი წვლილისთვის”, - აღნიშნავს გამოცემა.

“არადა, უმრავლესობა ბოლო წუთამდე ყოყმანობდა, ვისთვის დაეჭირა მხარი. კანდიდატების გამოცხადებიდან არაოფიციალურად ვრცელდებოდა ინფორმაცია, რომ სააკაშვილს ცესკო-ს თავმჯდომარედ მისი ბავშვობის მეგობრის ოთარ სიჭინავას დანიშვნა სურდა და ვარაუდობდნენ, არჩევანი სწორედ მის სასარგებლოდ გაკეთდებოდა. ზურაბ ხარატიშვილი კი მერაბიშვილის ფავორიტად სახელდებოდა და შესაძლოა, ამის გამოც უმრავლესობა ბოლო წუთამდე ცვლიდა ვარიანტებს, თუ ვის სასარგებლოდ გააკეთებდნენ არჩევანს. საკითხის სესიაზე გატანამდე კი დეპუტატებმა ცესკო-ს თავმჯდომარეობის კანდიდატებთან გაარკვიეს, ამ თანამდებობაზე დანიშვნა რატომ სურდათ და რა საარჩევნო გამოცდილება გააჩნდათ”, - დასძენს გამოცემა.

“აღსანიშნავია, რომ ხარატიშვილი საარჩევნო პროცესისადმი დემოკრატიული მიდგომებით და პროცესის გამჭვირვალობის დაპირებით უფრო მეტად გამოირჭეოდა, ვიდრე სიჭინავა, მაგრმ ძნელი სათქმელია, უმრავლესობამ გადაწყვეტილება მის სასარგებლოდ ამის გამო მიიღო თუ იმიტომ, რომ მერაბიშვილის კადრად ითვლება. მაგრამ უკვე საუბრობენ იმაზე, რომ თავისთავად მერაბიშვილის კადრის გამარჯვება, გარკვეულწილად უგულავას შანსებს ამცირებს. თუმცა, ხარატიშვილი იმის პირობასაც დებს, რომ პოლიტიკური ფიგურა არ იქნება და მხოლოდ სამართლებრივად გადაწყვეტის საკითხებს. საბოლოოდ, ხარატიშვილს მხარი 98-მა დეპუტატმა დაუჭირა - ეს იმას ნიშნავს, რომ მას ოპოზიციის ერთადერთმა წარმომადგენელმაც მხარი დაუჭირა: განსხვავებული პოზიცია სესიაზე მხოლოდ თორთლაძემ დაფიქსირა და მაშინ, როცა ოპოზიციამ კენჭისყრის პროცესში განაცხადა, მონაწილეობა არ მიეღოთ, დემონსტრაციულად განაცხადა, რომ მონაწილეობას მიიღებდა”, - წერს სტატიის ავტორი.

რა როლი ეკისრებათ “გივის” და მასთან ერთად გაგზავნილ “ბრძოლისუნარიან” ხალხს უკრაინის არჩევნებში?

“უკრაინის პრეზიდენტობის კანდიდატმა მიხაილ ბროდსკიმ გუშინ კიევში გამართულ პრესკონფერენციაზე საქართველოს პრეზიდენტის მიხეილ სააკაშვილის და უკრაინის პრემიერისა და პრეზიდენტობის კანდიდატის იულია ტიმოშენკოს სატელეფონო საუბრის აუდიოჩანაწერი გამოაქვეყნა, რომლის ხანგრძლივობა 1 წუთი და 45 წამია და საუბრის თემა არჩევნებზე დამკვირვებლების დაუშვებლობაა. საუბრისას სააკაშვილი ტიმოშენკოს ახსენებს, რომ “იქ გივია”, - წერს გაზეთი “რეზონანსი” სტატიაში სათაურით რა როლი აქვს გივი თარგამაძეს უკრაინის არჩევნებში?! / სააკაშვილი-ტიმოშენკოს სატელეფონო ჩანაწერის ნამდვილობაზე პრეზიდენტის ადმინისტრაცია არ საუბრობს.

“როგორც შემდეგ პოლიტიკოსებმა განაცხადეს, საუბარია გივი თარგამაძეზე, რომელიც უკრაინაში საპრეზიდენტო არჩევნებზე თავის როლის შესრულებას ეცდება, თუმცა, კონკრეტულად რა როლი ეკისრება თარგამაძეს, უცნობია. ბროდსკის თქმით, ის ზონდერ-ბრიგადების მეშვეობით არჩევნების გაყალბებას შეეცდება. უმრავლესობის ლიდერი აკაკი მინაშვილი ამ ბრალდებას აბსურდს უწოდებს. საქართველოს პრეზიდენტის ადმინისტრაცია უცხოურ საიტებზე გამოქვეყნებულ სატელეფონო საუბართან დაკავშირებით კომენტარს არ აკეთებს - პრეს-სპიკერ მანანა მანჯგალაძის განცხადებით, ამ თემასთან დაკავშირებით ადმინისტრაცია კომენტარის გაკეთებას მიზანშეწონილად არ მიიჩნევს. როგორც მან განაცხადა, ამ ეტაპზე ადმინისტრაციის მიერ გაკეთებულ კომენტარს შესაძლოა უკუშედეგი მოჰყვეს და ყველამ სხვანაირად გაიგოს, ამიტომ დუმილს ამჯობინებენ. აღნიშნულზე კომენტარი არც იული ტიმოშენკოს პრესსამსახურმა გააკეთა. ამ თემაზე კომენტარს არ აკეთებს არც შსს-ს ანალიტიკური დეპარტამენტის უფროსი შოთა უტიაშვილი”, - აღნიშნავს გამოცემა.

“მიხაილ ბროდსკის მტკიცებით, გივი თარგამაძე, რომელიც უკრაინაში იმყოფება, თანამშრობლობს იულია ტიმოშენკოსთან და არჩევნების ჩაშლის გეგმას ამუშავებს. ბროდსკიმ უკრაინის პრეზიდენტს, უშიშროების სამსახურს და გენერალურ პროკურორს ზემოხსენებულ ფაქტზე რეაგირებისკენ მოუწოდა და საერთაშორისო კრიმინალურ სტრუქტურებთან იმ ადამიანების კავშირის გადამოწმებას მოითხოვს, რომელთაც მიხეილ სააკაშვილმა იულია ტიმოშენკოსთან საუბარში “ბრძოლისუნარიანი”უწოდა. ხსენებული სატელეფონო საუბრის აუდიოჩანაწერი უკრაინულ პორტალებზე განთავსდა. ჩანაწერის მიხედვით, ტიმოშენკო სააკაშვილს ეუბნება, რომ ყველაფერს გააკეთებს საერთაშორისო დამკვირვებლების არჩევნებზე დასაშვებად. საქართველოს პრეზიდენტი მას ახსენებს, რომ უკრაინაში “გივია” და ამბობს, რომ მან უკრაინაში ყველაზე “ბრძოლისუნარიანი” ხალხი გაგზავნა”, - დასძენს გამოცემა.

“გუშინვე უკრაინის საპრეზიდენტო არჩევნებში ქართველ დამკვირვებლებთან დაკავშირებით შექმნილ გაუგებრობას საქართველოს პრეზიდენტი გამოეხმაურა. მანანა მანჯგალაძის განცხადებით, პრეზიდენტი მიიჩნევს, რომ მეგობარი საქართველოს სურვილი არის მხოლოდ ძლიერი, დამოუკიდებელი უკრაინა. მანჯგალაძემ ასევე აღნიშნა, რომ ქართველი დამკვირვებლების რეგისტრაციის თემა უკრაინაშივე გახდა დიდი რეზონანსის საგანი. სააკაშვილის განმარტებით, საქართველოს გეგმებში არ შედის რომელიმე კანდიდატის მხარდაჭერა. საქართველო ამ არჩევნებში ვერც ჩაერევა და არც ჩაერევა. მანჯალაძის ინფორმაციით, პრეზიდენტი ხაზგასმით აღნიშნავს, რომ საქართველოს ხელისუფლების მხრიდან რომელიმე საპრეზიდენტო კანდიდატის მხარდაჭერა დაუშვებელი და გამორიცხულია. ამასთან, ქართული მხარე მზად არის, საქართველოში დაგეგმილ არჩევნებში ყოველგვარი დაბრკოლების გარეშე მიიღონ მონაწილეობა უკრაინელმა დამკვირვებლებმა”, - წერს სტატიის ავტორი.

“ეს არის სამწუხარო ფაქტი... ქვეყანა, რომლის არჩევნებმაც არაერთხელ გამოიწვია კითხვის ნიშნები, სხვას ჭკუას არ უნდა ასწავლიდეს. ამ დროს კი ქვეყნის სახელისუფლებო ჯგუფის წევრი მიდის სხვა ქვეყენაში არჩევნების ობიექტურად ჩასატარებლად. ცოტა საეჭვოა, რომ ის მართლაც დემოკრატიული არჩევნებისთვის იბრძოდეს. ასე რომ, ამ ჩანაწერის გახმაურებით საქართველოსთვის ფრიად არასასიამოვნო ფაქტი გახმოვანდა”, - აცხადებს გამოცემის კორესპონდენტთან საუბრისას პოლიტოლოგი რამაზ საყვარელიძე.

http://www.interpressnews.ge/ge/index.php/...ink/122702.html

maliari · January 17, 2010

აბაყურადღება ხალხო:

Германия призывает отказаться от Internet Explorer

K2Kapital 2 часа назад

Федеральная служба безопасности в сфере информации Германии рекомендовала гражданам страны не пользоваться программой Internet Explorer для выхода в интернет. Как сообщает Associated Press, поводом для данного предостережения стал скандал, связанный со взломом хакерами систем безопасности Google в Китае. Атака была проведена на компьютеры лиц, вышедших в глобальную сеть именно через Internet Explorer.

http://www.bbc.co.uk/russian/science/2010/..._explorer.shtml

ლ ი ც ი · January 18, 2010

ქართული პრესის მიმოხილვა 18.01.2010

18 / 01, 2010 11:48

· ანდრო ბარნოვი - “პრობლემა ისაა, რომ სამართლიანი არჩევნების გამართვა რეალურად თითქმის არავის სურს!”

· “მაესტროს” პირდაპირ ეთერში სასამართლოს - “ხალხი ასამართლებს ხელისუფლებას” - პირველი თემა ზურაბ ჟვანიას გარდაცვალება იქნება

· გია თორთლაძე - “სანამ ქვეყანაში სერიოზული პოლიტიკური ძალა არ გამოჩნდება, რომელსაც ბევრი კარგი ლიდერი ეყოლება, მანამდე არაფერი შეიცვლება”

· ლევან გაჩეჩილაძე - “იციან, ძალიან მძლავრი ტალღა მოვა ძალიან მალე გაზაფხულზე”

· კახა ბენდუქიძე: რუსეთის ბაზრის გახსნა - სატყუარა დოყლაპიებისთვის

ანდრო ბარნოვი - “პრობლემა ისაა, რომ სამართლიანი არჩევნების გამართვა რეალურად თითქმის არავის სურს!”

“რაც შეეხება რონალდ ასმუსის წიგნს “მცირე ომი, რომელმაც მსოფლიო შეძრა”, ზოგადად ყველაფერი რეალური ჩანს. არ უნდა გვიკვირდეს, რომ აშშ ინტერვენციის სცენარსაც განიხილავდა. სცენარი ალბათ ბევრი განიხილებოდა, მაგრამ მთავარი მაინც ისაა, რაც საბოლოოდ გაკეთდა ან არ გაკეთდა. ეს წიგნი კარგად უნდა წავიკითხოთ, ასე ამოგლეჯილი ფრაზებით მსჯელობა ძნელია. ზოგს ისე ესმის, თითქოს პუტინს ბუშმა უბიძგა საქართველოზე თავდასხმისაკენ. არ ვიცი, საიდან მოაქვთ ეს დასკვნები, მაგრამ წიგნი ნამდვილად საინტერესო ჩანს. ფაქტი ისაა, რომ ამ ომით საქართველოს გარდა, აშშ-ც საკმაოდ დაზარალდა. ჯერ ერთი, საგრძნობლად შეირყა მისი იმიჯი. ამას გარდა, აშშ რეალურად კარგავს გავლენას ცენტრალურ აზიაში, კავკასიასა და ახლო აღმოსავლეთშიც კი”, - აცხადებს პოლიტოლოგი ანდრო ბარნოვი გაზეთ “კვირის პალიტრისთვის” მიცემულ ინტერვიუში, სათაურით “ნუ დავიყვანთ ყველაფერს მხოლოდ ეჭვებამდე, ვეძებოთ პოზიტიურიც” / “სინამდვილეში რუსეთი ამერიკამ გააჩერა და ასევე ვეჭვობ, თურქეთის როლიც არ იყო ამ საქმეში უკანასკნელი”.

“ამ რეგიონებში პოზიციების დაკარგვის შემდეგ ამერიკას დიდი პერსპექტივა აღარც ევროპაში ექნება და ეს სწორედ ისაა, რისთვისაც იღვწის მოსკოვი. ახლა ვინმემ გამაგებინოს, რატომ უნდა სდომებოდა ბუშს პუტინის გალაშქრება პატარა საქართველოზე, სადაც ასე უნდათ ამერიკასთან ურთიერთობა? არ არის ეს აბსურდი? ერთი სიტყვით, ეს უსაფუძვლო სპეკულაციებია. სინამდვილეში, წიგნში ლაპარაკია იმაზე, რომ მოსკოვმა ისარგებლა აშშ-ევროპის უთანხმოებით, ამერიკის წინასაარჩევნო პერიპეტიებით და წამოიწყო აგრესია საქართველოს წინააღმდეგ, რადგან კარგად იცოდა, თუ აშშ ჩაერეოდა, რუსეთის უმნიშვნელო პასუხიც კი აშშ-ევროპას შორის უფსკრულს გააჩენდა და ვაშინგტონი იძულებული გახდებოდა, დაუყოვნებლივ დათმობებზე წასულიყო, ანუ მარტივად რომ ვთქვათ, ეცნო დამარცხება. ბუნებრივია, ვაშინგტონმა დამარცხებას გამარჯვება არჩია და სხვა გზა ალბათ არც იყო. მათ აცალეს რუსეთს, ცუდად მოქცეულიყო, რის შემდეგაც გაჩერება უბრძანეს”, - აღნიშნავს გამოცემის კორესპონდენტთან საუბრისას ანდრო ბარნოვი.

“აქ უკვე სიტუაცია სხვაგვარად შემოტრიალდა, რადგან რუსეთის შეჩერება ევროპის ინტერესებშიც შედიოდა და თურქეთისაც. მაგრამ ამერიკას რომ ადრევე განეხორციელებინა სამხედრო ინტერვენცია, მაშინ ყველა ყველაფერს ვაშინგტონს დააბრალებდა, ისე დახატავდნენ სიტუაციას, რომ ამერიკამ ომი დაუწყო რუსეთს. ეს რესპუბლიკელებისთვის საუკუნოვანი კატასტროფა იქნებოდა, იმაზე რომ აღარაფერი ვთქვათ, რომ ევროპასა და ამერიკას შორის ურთიერთობები სერიოზულად გაიყინებოდა. შედეგად კი იმას მივიღებდით, რომ რუსეთი უპირობო გამარჯვებას მოიპოვებდა და ამერიკას პრაქტიკულად გააძევებდა კონტინენტიდან. შორიდან ასე ჩანს და რამდენადაც მესმის, ასმუსის წიგნიც ამას ამტკიცებს”, - განაგრძობს გამოცემის რესპონდენტი.

“დარწმუნებული ვარ, წიგნში ბევრი ისეთი ფაქტი იქნება, რომელიც ამ მოსაზრებას გაამყარებს. რაც შეეხება ძველ ევროპას, როგორც ყოველთვის, მისთვის ახლაც სულ ერთი იყო ყველაფერი და სარკოზი სწორედ ამ პოზიციას გამოხატავდა: “ნუ იქნება მხოლოდ ბუნტი”! აი, ეს აინტერესებს ევროპას. მშვიდ ვითარებაში კი ყველაფერზე მოილაპარაკებენ. ჩვენში ბევრ აბსურდულ მტკიცებას მოვისმენთ: თითქოს ევროპა მოელაპარაკა რუსეთს, ევროპამ გააჩერა და ა.შ. სინამდვილეში კი რუსეთი ისევ ამერიკამ გააჩერა და, ასევე, ვეჭვობ, თურქეთის როლიც არ იყო ამ საქმეში უკანასკნელი. ერთი სიტყვით, ამ წიგნის წაკითხვით, იმედი მაქვს, არაერთი საინფორმაციო ვაკუუმის შევსებას შევძლებთ”, - დასძენს ანდრო ბარნოვი.

“ოპოზიციას საერთოდ არ უფიქრია ცესკოს თავმჯდომარის კანდიდატურაზე. რაც მათ გააკეთეს, ის იყო, რომ ბოლო მომენტში ხმამაღლა მხარი დაუჭირეს ეკა სირაძეს და მისი კანდიდატურა პოლიტიკური სპეკულაციის საგნად აქციეს. ჩანს, გათვლა ასეთი იყო, რომ ხელისუფლება ეკა სირაძეს მხარს არ დაუჭერდა და შემდეგ ოპოზიციას საფუძველი ექნებოდა, ეთქვა, ერთადერთ კარგ კანდიდატს მხარი არ დაუჭირა ხელისუფლებამ და ამიტომ ამ არჩევნებს არ ვენდობითო. ნამდვილად მინდოდა, ცესკოს თავმჯდომარე ეკა სირაძე გამხდარიყო - ნდობის ფაქტორის გარდა, ისიც მნიშვნელოვანი იყო, რომ ეკა აბსოლუტურად მიუმხრობელია და ესმის ამ მიუმხრობლობის უდიდესი სახელმწიფოებრივი მნიშვნელობა. ამიტომ, მიმაჩნია, რომ მისნაირი თავმჯდომარე ხელს შეუწყობდა არჩევნების პროცესის შედარებით მშვიდ ვითარებაში წარმართვას. რა თქმა უნდა, მინდოდა ცესკოს ასეთი თავმჯდომარე ჰყოლოდა და არა სრულიად უცნობი ხარატიშვილი. ამიტომ, ვწუხვარ, რომ ეკა სამ კანდიდატს შორისაც კი არ დასახელდა. ასევე ვწუხვარ, რომ ხელის შეწყობის მაგივრად, ოპოზიციამ ხელი შეუშალა ამ პროცესს თავისი განცხადებებით”, - აცხადებს გამოცემის რესპონდენტი.

“ახლა იტყვიან, რა ძალა ჰქონდა ოპოზიციას, რა უნდა ექნაო. მაგრამ გარწმუნებთ, სურვილის შემთხვევაში, ბევრი რამის გაკეთება შეიძლებოდა. მაგალითად, შეიძლებოდა დიდი ხნით ადრე დისკუსიის წამოწყება ამ თემაზე, შესაბამისი საინფორმაციო კამპანიის გაშლა, სამოქალაქო საზოგადოების გააქტიურება და რამდენიმე კანდიდატის წამოწევა. არ მინდა ისე გამიგოთ, თითქოს ხარატიშვილის კეთილსინდისიერებაში შემქონდეს ეჭვი. უბრალოდ, საზოგადოებამ თითქმის არაფერი იცის მის შესახებ და სწორედ ესაა მისი ძირითადი ნაკლი, რაც უმნიშვნელო ნაკლად ვერ ჩაითვლება, როცა ოპოზიციის ერთი ნაწილი სახელმწიფო გადატრიალებით იმუქრება... დაიჯერებს საზოგადოების კრიტიკულად განწყობილი ნაწილი, რომ არჩევნები სამართლიანად გაიმართება? რა კეთდება იმისათვის, რომ ასეთი ეჭვები არ გაჩნდეს? სამწუხაროდ, ეს პრეტენზიები ეხება როგორც ხელისუფლებას, ასევე ოპოზიციას. პრობლემა ისაა, რომ სამართლიანი არჩევნების გამართვა რეალურად თითქმის არავის უნდა! ყველა ხრიკებისა და ფანდების ძიებაშია და ბუნებრივია, ამ ასპარეზზე ხელისუფლების დამარცხება პრაქტიკულად შეუძლებელია” - მიიჩნევს ანდრო ბარნოვი.

“მაესტროს” პირდაპირ ეთერში სასამართლოს - “ხალხი ასამართლებს ხელისუფლებას” - პირველი თემა ზურაბ ჟვანიას გარდაცვალება იქნება

“თებერვლის ბოლოს ტელეკომპანია “მაესტროს” ეთერით გადაცემა “ხალხი ასამართლებს ხელისუფლებას” გავა. სასამართლოზე წარმოდგენილი იქნება 12 ნაფიცი მსაჯული, მოსამართლის როლს მინდია უნრეხელიძე შეითავსებს, ხოლო ბრალმდებელი ადვოკატი გელა ნიკოლეიშვილი იქნება. ამჯერად მიმდინარეობს მასალების დამუშავება და სავარაუდოდ, სასამართლოს პირველი თემა პრემიერ-მინისტრ ზურაბ ჟვანიას გარდაცვალების საკითხი იქნება”, - წერს გაზეთი “მთელი კვირა” სტატიაში სათაურით ვის გაასამართლებენ “მაესტროს” პირდაპირ ეთერში? / ოქრუაშვილი, ბურჯანაძე და გოგა ხაინდრავა ჩვენების მისაცემად მზად არიან.

“რაც შეეხება ზურაბ ჟვანიას საქმეს, ბატონ თემურ შაშიაშვილის მიერ ხსენებული აუდიოჩანაწერი სასამართლომდე არ მოსულა. როგორც კი მოვა, შევისწავლით. თუ არის იქ ისეთი მასალები, რომლითაც რამე დასკვნების გაკეთება შეიძლება, რა თქმა უნდა, სასამართლოზე განვიხილავთ. სასამართლო ვალდებულია, ზურაბ ადეიშვილსა და ვანო მერაბიშვილს, რომელთაც პირველებმა აცნობეს საზოგადოებას პრემიერის გაზით გაგუდვის ამბავი და საქმის ყველა ფიგურანტს, მოწვევა გაუგზავნოს. ჩვენ ვიცით, რომ ისინი აქ არ მოვლენ, ეს იქნება პასუხი და გამოცხადდება, რომ მოწვეული იქნა სასამართლოში და თავი აარიდა მოსვლას... სანამ ამ კასეტას თავად არ მოვუსმენ, ვერაფერს გეტყვით. როცა ეს კასეტა ჩვენამდე მოვა, თუ იქ გია ბარამიძის ხმა ისმის, მის ინტერესებში უნდა იყოს და იქ დაასაბუთოს, რომ ეს არის ტყუილი. თუ არ მოვა, ეს უკვე პასუხი იქნება”, - აღნიშნავს გამოცემის კორესპონდენტთან საუბრისას გელა ნიკოლეიშვილი.

“როგორც ადვოკატი და როგორც მოქალაქე, ვფიქრობ (ისევე როგორც საზოგადოების დიდი უმრავლესობა), რომ ეს იყო მკვლელობა. მაგრამ იმ ამპლუიდან გამომდინარე, რაც მე დამეკისრა სახალხო სასამართლოში, რომ ვიყო ბრალმდებელი - არა მხოლოდ ვარაუდის გამოთქმის მოვალეობა მაქვს, არამედ რაღაცები უნდა დავამტკიცო. სანამ ეს მტკიცებულებები არ მექნება, მანამდე, როგორც ბრალმდებელს, არ შემიძლია ეს ვთქვა. რაც შეეხება ოქრუაშვილს, მე პირადად მაქვს აზრი, რომ ის პირდაპირი ჩართვის საშუალებით დაიკითხოს არა მხოლოდ ჟვანიას, არამედ უამრავ სხვა საქმესთან დაკავშირებით, რომელთანაც მას შეხება ჰქონია... რამდენადაც მაქვს ინფორმაცია, არა მხოლოდ ოქრუაშვილი, ხელისუფლების ყოფილი მაღალჩინოსნები მზად არიან, ისაუბრონ ღიად და მათი დაკითხვა ძალიან საინტერესო იქნება”, - დასძენს გელა ნიკოლეიშვილი.

“მაგალითად, ხაინდრავა მზადაა არა მხოლოდ ჩვენება მისცეს, არამედ ოფიციალური დოკუმენტები წარმოადგინოს, რომლითაც თავის ჩვენებას დადასტურებს. არიან სხვა ადამიანებიც - როგორც ვიცი, ბურჯანაძეც მზადაა ამისთვის. რაც შეეხება ზურად ნოღაიდელს, მისი პოზიცია ჯერჯერობით უცნობია. რადგანაც ეს საზოგადოებრივ ინტერესს იწვევს, ჩვენ ვალდებული ვართ, საზოგადოების ინტერესების დაკმაყოფილება ვცადოთ. რა თქმა უნდა, უსაფრთხოება რისკის ქვეშ არის ყოველთვის, მით უმეტეს, ასეთი ხელისუფლების პირობებში. ხიფათი არის, მაგრამ თუ ხელისუფლება ამას გააანალიზებს, მიხვდება, რომ ეს მათ ინტერესებშიც შედის. როცა საზოგადოებას არ აქვს ნდობა ხელისუფლებისადმი, ვერ აღწევს სიმართლეს ოფიციალურ სასამართლოზე, ასეთ შემთხვევაში რჩება 2 გზა - ან უნდა დაემონოს, ან რევოლუციის, ლინჩის წესის გზით შეცვალოს ხელისუფლება”, - მიიჩნევს გამოცემის რესპონდენტი.

“ეს გზა, რომელიც ჩვენ შევთავაზეთ, ცივილიზებული გზით გაარჩიოს თავისი პრეტენზიები საზოგადოებამ პირდაპირ ეთერში, ხელისუფლების ინტერესებშიც უნდა იყოს, რომ ეს დაპირისპირება არ მივიდეს ლინჩის წესამდე და რევოლუციამდე, რაც საზოგადოების ნორმალურ წევრებს ხელს არ გვაძლევს. აქედან გამომდინარე, ვფიქრობ, ხელისუფლება უნდა შეეცადოს საკუთარი სიმართლის დამტკიცებას. ისინი ხომ ამტკიცებენ, მართლები ვართო - დაამტკიცონ საჯაროდ, ხალხის წინაშე და ჩვენ მათ ამის საშუალებას მივცემთ”, - აცხადებს გელა ნიკოლეიშვილი და შეკითხვას - “სხვათა შორის, ბევრს საუბრობენ ამ საქმეში თემურ ალასანიას როლზე, თუ მოიწვევთ მას?” - პასუხობს:

“ალასანია იქნება, სააკაშვილი თუ ნებისმიერი სხვა ადამიანი, ვიმეორებ, სასამართლო მოიწვევს ყველას, ვისაც საჭიროდ ჩათვლის. მეორე საკითხია, რამდენად მოვლენ ისინი. ალბათ, არ მოვლენ. ეს უკვე იქნება პასუხი საზოგადოებისთვის, რომ ეს ადამიანები უარს ამბობენ, მათთვის საინტერესო კითხვებზე პირდაპირ ეთერში გასცენ პასუხი”.

გია თორთლაძე - “სანამ ქვეყანაში სერიოზული პოლიტიკური ძალა არ გამოჩნდება, რომელსაც ბევრი კარგი ლიდერი ეყოლება, მანამდე არაფერი შეიცვლება”

“ოპოზიციის ის ნაწილი რასაც აცხადებს, პირდაპირ გეუბნებით - კარგად დამუშავებული რუსული გეგმაა. ხომ ხედავთ, უკვე ღიად დადიან რუსეთში. სამი თვის წინ რომ გეკითხათ, პრორუსულები ხართ თუ არაო, აღშფოთდებოდნენ და თავს შეურაცხყოფილად იგრძნობდნენ. დღეს კი ყველაფერი ნათელია. ასეთი კიდევ ბევრი გამოჩნდება. რუსეთი ყველანაირად ეცდება, აქ სიტუაცია არიოს. არ აქვს მნიშვნელობა, არჩევნებამდე თუ არჩევნების შემდეგ. რამდენად გამოუვათ, ეს მეორე საკითხია”- აცხადებს პარლამენტარი გია თორთლაძე გაზეთ “ვერსიისთვის” მიცემულ ინტერვიუში, სათაურით გია თორთლაძე: “პირდაპირ გეუბნებით, ეს რევანშისტული მოძრაობაა”.

“მათი კონსტიტუციური უფლებაა შექმნან საბჭოები და უხუცესთა დარბაზები, მაგრამ ისიც უნდა გაითვალისწინონ, რომ ამ უხუცესთა დარბაზებს საქართველოში არასდროს უმუშავია. როგორც კი ხელისუფლების დამხობის მოწოდებებს გააკეთებენ, იქნება ძალა, ვინც ამას წინ აღუდგება. აჯანყება და რევოლუცია ყველა ქვეყანაში დასჯადია და თუ რომელიმე ბრძენს თავში აზრად მოუვა, საკადრის პასუხს მიიღებენ. მაინტერესებს, აქამდე რომ ამბობდნენ, ამაზე არ წავალთო, ეს გადატრიალება ახლა გახდა კარგი? ისიც იციან, რომ შიდა ძალებით ამისი შანსი არ არსებობს. ახლა თუ რუსების ტანკებს ელოდებიან, დაელოდონ და ვნახოთ, რა იქნება. ეს არის რევანშისტული ჯგუფი. ხელისუფლება ცხრა დათმობაზე წავიდა. საარჩევნო კოდექსი ბევრად უკეთესია, ვიდრე წინა. ამიტომ ვეცადოთ სისტემური ცვლილებისკენ წასვლას და არა სისხლისა და არეულობისკენ. ისევ რომ სამოქალაქო დაპირისპირებისკენ გვექაჩებიან, ქვეყნის ღალატია”, - აღნიშნავს გამოცემის კორესპონდენტთან საუბრისას გია თორთლაძე.

“ეს ხალხი, სხვადასხვა დროს შევარდნაძის უზენაეს საბჭოში იჯდა. ჩვეულებრივი რევანშისტული მოძრაობაა, რომელსაც ისევ ხელისუფლებაში მოსვლა უნდა. მიეჩვია ნოღაიდელი და ბურჯანაძე ფულის შოვნას, სხვადასხვა მინისტრებიცა და ის პოლიტიკოსებიც, რომელთაც შევარდნაძის დროს ბიზნესი ჰქონდათ. ეს არის რეალობა. მე უკეთეს ქვეყანაში ცხოვრება მინდა. ეგენი უარესისკენ გვექაჩებიან - ეს “ფილმი” კი ჩემს ქუჩაზე თავიდან ბოლომდე ნანახი მაქვს. ვნახე, ვინ რისთვის იბრძოდა. ამიტომ ვამბობ - ეს რევანშისტული მოძრაობაა, რომელსაც რუსეთი ტაშს უკრავს. ეპატიჟება ნოღაიდელს, სადაც ლაპარაკობენ არა დევნილებსა და ჯარების გაყვანაზე, არამედ ხელისუფლების გადატრიალებაზე. მათ გვერდით არასოდეს ვიქნები - როცა ვიყავი, ვნახე, ვინც არიან. ისე უნდათ ხელისუფლებაში მოსვლა, მათთვის არა აქვს მნიშვნელობა, ეს რეფორმით მოხდება თუ ნგრევით”, - განაგრძობს გამოცემის რესპონდენტი.

“არჩევნები აუცილებლად გაიმართება. ის პარტიები, რომლებიც პრორუსული არიან, ეცდებიან მოვლენათა ინსპირირებას, მაგრამ მნიშვნელოვანია, ხელისუფლება რამდენად ძლიერი იქნება. რუსებსა და პრორუსულ ძალებს არეულობა სურთ. ეს ხალხი სიტყვის თავისუფლებასა და დემოკრატიაზე რომ გველაპარკება, მაინტერესებს, რუსეთში რომელი ერთია? არა დემოკრატია, არა თავისუფალი სასამართლო და მედია, არა ადამიანის უფლებების დაცვა - ესაა რუსული გეგმა და ასე ცხოვრობს თავადაც. რატომ ჰგონიათ, რუსეთს უკანალში თუ შეუძვრებიან, აქ თავისუფალ სასამართლოსა და მედიას მიიღებენ? რისთვის უხდიან პუტინსა და მედვედევს მადლობას - კარგად რომ დაგვბომბეს? ხელს ართმევენ და იქ ჩასვლას ერთმანეთს ასწრებენ! ეს არის სინდის-ნამუსგარეცხილი ხალხის ქმედება. მე თუნდაც დარღვევებით ჩატარებული არჩევნები მირჩევნია ზარბაზნებსა და რუსის ჩექმას, თუმცა ვიბრძოლებ, რომ არჩევნები სამართლიანად ჩატარდეს”, - დასძენს გია თორთლაძე.

“კანდიდატის დაყენება თვითმიზანი არ არის. ეს პოლიტიკური განაცხადია. მე ვიცი, ჩემს კანდიდატურას რატომაც ვაყენებ. რატომ უნდა დავუთმო პრორუსულ ზურაბ ნოღაიდელს და მასთან ერთდ პრაიმერი მოვაწყო, რომელსაც გვერდით ძიძიგური და დავითაშვილიც დაუდგნენ? პირიქით, არანაირი სურვილი არ მაქვს, მათგან ვინმე მერი გახდეს. ოპოზიცია ვერასოდეს შეთანხმდება ერთ კანდიდატზე, რადგან სრულიად სხვადასხვა აზროვნების ხალხია წარმოდგენილი. ან რატომ უნდა ჰყავდეთ პრორუსულ და პროდასავლურ ძალებს საერთო კანდიდატი? სანამ ქვეყანაში სერიოზული პოლიტიკური ძალა არ გამოჩნდება, რომელსაც ბევრი კარგი ლიდერი ეყოლება, მანამდე არაფერი შეიცვლება. გაერთიანებები იქნება ცოტა ხნით - ისიც ზიზღის გამო. ზიზღით გაკეთებული საქმე გინახავთ სადმე?” - მიიჩნევს გამოცემის რესპონდენტი.

ლევან გაჩეჩილაძე - “იციან, ძალიან მძლავრი ტალღა მოვა ძალიან მალე გაზაფხულზე”

“ეს სააკაშვილის ხასიათია, რომ მას ხალხი, სახელწიფო, სამშობლო, კანონი და კონსტიტუცია ფეხებზე ჰკიდია. მისი სურვილის მიხედვით იმართება ეს ქვეყანა და ახლა რა გასაკვირია, სააკაშვილმა საარჩევნო კომისიის თავმჯდომარის გამო კიდევ ერთხელ გააკეთოს ის, რაც ათასგზის გაუკეთებია - უკვე პრობლემის არსს იმაში ვხედავ, ვინც ამაზე კომენტარს იძლევა და არა იმაში, ვინც კანონს არღვევს. ვიცით, რომ სააკაშვილი კრიმინალია, კანონდამრღვევი, კაცთმოძულე პიროვნებაა”, - აცხადებს ”დაიცავი საქართველოს” ერთ-ერთი ლიდერი ლევან გაჩეჩილაძე გაზეთ “მთელი კვირისთვის” მიცემულ ინტერვიუში, სათაურით ლევან გაჩეჩილაძე: “ოპოზიციის ერთიანობისთვის კომპრომისებია საჭირო / “არჩევნების გაყალბებას მესამე საპროტესტო ტალღა მოჰყვება”.

“არ მაინტერესებს გიგი უგულავა და მიხეილ სააკაშვილი. ვადგავარ მათი იგნორირების პოლიტიკას. დარწმუნებული ვარ, არჩევნები უკვე ყალბდება. მთელმა მსოფლიომ უნდა დაინახოს, რომ აქ არჩევნების გზით შეუძლებელია ხელისუფლების გამოცვლა. ან უნდა შევძლოთ სიტუაციის შეცვლა, თუ არადა, მაშინ უნდა ითქვას, რომ საქართველოში დიქტატურაა. როცა ბრძოლაში ხარ, სულ იმედიანად უნდა იყო. სხვა შემთხვევაში დღეს არსებულ პოლიტიკურ სპექტრს სიცოცხლისუნარიანობა არ უწერია. არც მე, სხვათა შორის”, - აღნიშნავს გამოცემის კორესპონდენტთან საუბრისას ლევან გაჩეჩილაძე.

“ვახო სანაიას ადრე დიდ პატივს ვცემდი იმ პრინციპების გამო, რის გამოც ის წამოვიდა “რუსთავი 2”-დან. როგორ მოაჯადოვეს, არ ვიცი. დღეს მას, როგორც ჟურნალისტს, არ აღვიქვამ. ეს არის ჩვეულებრივი დაქირავებული მუშაკი. ამას სპეციალურად ვამბობ, რომ ვახო სანაიამ წაიკითხოს - მითვლის ხოლმე, რაღაც ეთერში მიიღე მონაწილეობაო. მაგრამ სანამ პირდაპირ ეთერს არ მომცემენ, უარს ვაცხადებ. ის 4-საათიანი გადაცემა რომ ჰქონდა, გაუქმებულია და ახლა თავს იტყუებს თუ ხალხს ატყუებს, უკვე ვეღარ გავიგე. რაც შეეხება რუსეთის აგენტობას, რაც 7 ნოემბრის შემდეგ სააკაშვილის რეჟიმი მოირყა, პროპაგანდისტულად მას სჭირდება სერიოზული მტრის ხატის შექმნა. იმაზე უფრო მეტის - ვიდრე არსებობს. ეს არის ჩვეულებრივი პოლიტტექნოლოგია, რომელსაც კარგი გასავალიც აქვს და სხვათა შორის. საფუძველიც - რუსეთი არის მართლა ისეთი ქვეყანა, რომელსაც აგრესიული ინტერესები აქვს საქართველოსთან მიმართ და არ უყვარს ასეთი ჩხიკინი”, - განაგრძობს გამოცემის რესპონდენტი.

“იციან, ძალიან მძლავრი ტალღა მოვა ძალიან მალე გაზაფხულზე. სააკაშვილის ამასწინანდელი პანიკა, რომ რუსეთი ამზადებს საქართველოში გადატრიალებას, მეცნობა. ხალხო, ეს იყო ზუსტად ის რიტორიკა და ტექსტი, რაც იყო ადრე, 6 იანვარს, თითქოსდა პატარკაციშვილი რუსეთთან ერთდ იარაღდებოდა და ამზადებდა სააკაშვილის გადატრიალებას. ეს არის ცრუ ბიჭის ამბავი. მგელი მოდის, მგელი მოდისო, იყვირა და ახლა უკვე ნამდვილად მოდის მგელი. რაც უნდა მაბრალონ, რომ დამიჭირონ, რომ მე ვარ რუსეთის აგენტი და რუსეთის დავალებებს ვასრულებ, მე გავაკეთებ იმას, რაც ჩემს ქვეყანას მოუტანს სტაბილურობას და გახდის ერთიანს... ოპოზიციისთვის სააკაშვილი მერის სავარძლის საბუთს არ გამოწერს. ამაში უკვე 100%-ით ვარ დარწმუნებული იმ რიტორიკიდან გამომდინარე, რომ რუსეთი საქართველოში გადატრიალებას ამზადებს. მოხარშულს ვიცნობ სააკაშვილს”, - დასძენს ლევან გაჩეჩილაძე.

კახა ბენდუქიძე: რუსეთის ბაზრის გახსნა - სატყუარა დოყლაპიებისთვის

“ცხადია, რუსეთის ბაზარი ჩვენთვის ისეთივე მნიშვნელოვანი არ არის. მნიშვნელოვანია განსაზღვრული სექტორებისთვის, ვინც ტრადიციული დასახელებების პროდუქციას აწარმოებს - “ბორჯომს”, “ხვანჭკარას”, იმიტომ, რომ რუსეთში იცნობენ... ჩვენ ეს ბაზარი შეიძლება დაგვიბრუნონ, გვიბოძონ, მაგრამ ამან შესაძლოა კიდევ უფრო დიდი საფრთხე შექმნას. ის ბაზარი უკანონოდ ჩაგვიკეტეს. კაცმა გამოაცხადა, ქართული ღვინო, რომელიც არ უნდა იყოს, ყველა მავნებელიაო. ასევე თქვეს ქართულ წყალზეც. მეორედ როდის გამოცხადდება - უცნობია. ამიტომ გონიერი ბიზნესმენისთვის რუსეთის ბაზარი უნდა იყოს მისი გაყიდვების არაუმეტეს ერთი მესამედისა, თუ სურს, სტაბილურად იმუშაოს”, - აცხადებს კახა ბენდუქიძე გაზეთ “კვირის პალიტრისთვის” მიცემულ ინტერვიუში, სათაურით რუსეთის ბაზრის გახსნა - სატყუარა დოყლაპიებისთვის / “რადიკალური რეფორმების გატარების გარდა, საქართველოს სხვა გზა არ აქვს”.

“უმნიშვნელოვანესი საკითხია, დღეს რატომ გააქტიურდა ამაზე ლაპარაკი. რუსეთმა ჩვენთან ბრძოლის ძალიან ბევრი ინსტრუმენტი მოსინჯა. ემბარგო, არჩევნებში თავისი ხალხის მხარდაჭერა, ომი... ეს ყველაფერი საქართველოს ნამდვილად არ წადგომია, მაგრამ ქვეყანა არ დაღუპულა. ამიტომ რუსეთმა რაღაც ახალი ინსტრუმენტი უნდა მოძებნოს. ჩემი აზრით, არსებობს ორი მიზეზი. რუსეთის ახალი მიდგომაა: მოდი, ახლა კარგი ბიჭები გავხდეთ და ქართველებს მოვეფეროთ - არა ხელისუფლებას, არამედ ხალხს. მაგალითად, შევხვდეთ ნოღაიდელს და ვუთხრათ, რომ “ჩვენ მზად ვართ მხარი დავუჭიროთ ქართული ღვინის იმპორტს რუსეთში” და ასე შემდეგ. ეს “კეთილი პოლიციელის” როლია, რადგან თუ რუსეთში შედის ჩემი წარმოებული ღვინო, ისე გაბრაზებული აღარ ვარ; კი, ომი იყო, მაგრამ ამდენი ფული გავაკეთე...” - აღნიშნავს გამოცემის კორესპონდენტთან საუბრისას კახა ბენდუქიძე.

“რუსეთის ახალი პოზიციის მეორე მიზეზი ძალიან კონკრეტულია. რუსეთმა, ყაზახეთმა და ბელორუსიამ შექმნეს საბაჟო კავშირი. 2011 წელს, ფაქტობრივად, ეს ერთიანი სივრცე იქნება. შიგნით საბაჟოები აღარ იარსებებს. უკვე დღეს შეგიძლია ბელორუსიაში შეტანილი პროდუქცია დაბეგვრის გარეშე გადაიტანო რუსეთში. ეს ნიშნავს, რომ რუსეთი ვერ აკრძალავს ვერც ღვინის, ვერც “ბორჯომისა” და ვერც ვერაფრის შეტანას! ბოლოს და ბოლოს, შეიტან ყაზახეთის ჩრდილოეთში და ორენბურგის ოლქში გადაიტან. პროდუქციას იქ მაღაზიაშიც გაყიდიან. ან ბელორუსიაში შეიტან და ბრიანსკის ოლქში გადაიტან. ვინაიდან ეს გარდაუვალია, ქართული პროდუქციის რაღაც ნაწილი რუსეთის ბაზარზე შეაღწევს. ამასთან ბრძოლა იქნება ძალიან რთული და მთელი საბაჟო კავშირის იდეას დაანგრევს. ჩემი ვარაუდით, რუსეთის ხელისუფლებამ იფიქრა - რადგან ეს “კეთილი პოლიციელობაც” კარგია, მოდი, ეს იდეები შევაჯვაროთ; ანუ იძულებული კი არ გავხდით, ქართული პროდუქცია შემოგვეშვა, არამედ ჩვენ ვართ კარგი ბიჭები და ამიტომ შემოვუშვითო”, - განაგრძობს გამოცემის რესპონდენტი.

“მაგიტომაც თქვა მედვედევმა, არ გამოვრიცხავ, ქართული პროდუქცია რუსეთში გაიყიდოსო. ამასთან, რუსეთი შეეცდება, ეს ბიზნესი იყოს მონოპოლიზებული, ვინმე ერთს ჩაუვარდეს ხელში საქართველოდან რუსეთში ღვინის შეტანა, ვინმე ისეთს, ვისაც საქართველოში რაღაც კავშირები აქვს. ებრალიძე იქნება, ძასოხოვი თუ ხუბუტია, არ ვიცი, მაგრამ ამგვარი კონსტრუქცია უნდა შეიქმნას. ეს ადამიანი კარგი კაცის სახელს დაიგდებს, რადგან მთელი რეგიონების პრობლემებს გადაწყვეტს; ქართველებს ეცოდინებათ, რომ ამ პირის დახმარებით შეუწყო ხელი რუსეთმა მათი პროდუქციის რუსეთის ბაზარზე შეტანას. რუსეთზეც გაბრაზებული ნაკლებად იქნებიან. ეს ადამიანი ხომ ფულსაც გააკეთებს და იმ ფულით შეეცდება საქართველოს ხელისუფლებასაც ნელ-ნელა ძირი გამოუთხაროს”, - დასძენს კახა ბენდუქიძე.

“ჩემი აზრით, საქართველო მნიშვნელოვნად გამოვიდა ამ კრიზისიდან. ვფიქრობ, რომ წლეულს გვექნება ეკონომიკური ზრდა. ჩემი შარშანდელი პროგნოზი გამართლდა, როცა ეკონომიკის ზრდის მინუს ხუთი პროცენტი ვივარაუდე. ვფიქრობ, წლეულს დაახლოებით 3%-იანი ზრდა გვექნება. ეს ცოტაა, მაგრამ ავადმყოფობიდან გამოსვლისას პაციენტი საკვების მიღებას რომ იწყებს, ქართულ ეკონომიკას ის ეტაპი უდგას. ჩვენ გვჭირდება ძალიან მაღალი ეკონომიკური ზრდა, რადიკალური ეკონომიკური პოლიტიკა. მაშინ გვექნება შანსი, დავეწიოთ ბულგარეთს, რუმინეთს, თურქეთს, აღმოსავლეთ ევროპას”, - აცხადებს კახა ბენდუქიძე და შეკითხვას - “დღევანდელ ხელისუფლებას აქვს კი რადიკალური რეფორმების გატარების სურვილი და შესაძლებლობა?” - პასუხობს:

“როცა რუსული ტანკები 40 კილომეტრში დგას, რადიკალური რეფორმების გარდა, სხვა გზა აღარც გვაქვს. თუ რეფორმები არ ჩავატარეთ და ქვეყანა არ გამდიდრდა და გაძლიერდა, მაშინ ის ტანკები იდგება არა 40 კილომეტრში, არამედ უფრო ახლოს. საქართველოს ხელისუფლება, რომელიც რეფორმებს არ ჩაატარებს, განწირული იქნება. დემოკრატია და თავისუფალი ეკონომიკა ფოჩიანი კამფეტი კი არ არის. დემოკრატია და თავისუფალი ეკონომიკა საქართველოს გადარჩენის, გამთლიანებისა და განვითარების გზაა”.

http://www.interpressnews.ge/ge/index.php/...ink/122795.html