ახალი ამბები, მხოლოდ info და სტატიები

archi · December 12, 2009

ამ წუთებში ქუთაისში "გამარჯვების მემორიალის" ნგრევა მიმდინარეობს

ამ წუთებში ქუთაისში "გამარჯვების მემორიალის" ნგრევა და დემონტაჟი მიმდინარეობს. ავტოქარხნის დასახლებაში, ირაკლი აბაშიძის ქუჩაზე, სადაც ეს მემორიალი იყო განთავსებული, მობილიზებულია სპეციალური ტექნიკა. ამი შესახებ “ექსპრესნიუსის” კორესპონდენტი ქუთაისიდან იტყობინება

ძეგლის დემონტაჟს კომპანია "ლიტოკონსტრუქცია" ახორციელებს. ამ დროისთვის უკვე აღებულია მემორიალის წინ მდებარე ცხენოსანი "მზეჭაბუკი", რომელსაც ახალგაზრდობის გამზირზე, სპორტის სასახლის შენობასთან უპირებენ გადატანას. ხოლო უშუალოდ მემორიალი, განადგურდება.

ძეგლის დემონტაჟის თაობაზე ავტორმა - მერაბ ბერძენიშვილმა პირველად ქუთაისში გამომავალი "ახალი გაზეთის" საშუალებით შეიტყო: "რას მეუბნებით? კი, მაგრამ მე არაფერს მეკითხებიან? ქუთაისში, მე მეგონა, იყო ხალხი, რომლებიც მე მიყვარდა და რომლებსაც მე ეს ძეგლი მივუძღვენი, მაგრამ, თურმე, მათთვის მთავარი კუჭი ყოფილა. არამი იყოს, ალბათ, ჩემი შრომა მაგ ქალაქისთვის, აი, ეს მათქმევინეს ბოლოს და ბოლოს," - განაცხადა მერაბ ბერძენიშვილმა

ამარჯვების მემორიალი ქუთაისში 1980-ანი წლების დასაწყისში დაიდგა და იგი ფაშიზმის წინააღმდეგ ბრძოლის დიდებას მიეძღვნა. ძეგლის ავტორი ცნობილი ქართველი მოქანდაკე მერაბ ბერძენიშვილია.

http://expressnews.ge/?lang=geo&id=991&nid=613

ლ ი ც ი · December 13, 2009

ინფექციურ საავადმყოფოში H1N1 ვირუსით დაინფიცირებული სამი პაციენტის მდგომარეობა ისევ კრიტიკულია

13 / 12, 2009 10:45

თბილისის ინფექციურ საავადმყოფოში H1N1 ვირუსით დაინფიცირებული სამი პაციენტის მდგომარეობა ისევ კრიტიკულია, - ამის შესახებ "ინტერპრესნიუსს" ინფექციურ საავადმყოფოში განუცხადეს.

ერთ ახალგაზრდა მამაკაცს, 48 წლის ქალბატონს და 55 წლის მამაკაცს ორმხრივი ტოტალური პნევმონია აღენიშნებათ და ისინი სასუნქთ აპარატზე არიან შეერთებულნი. მდგომარეობის გართულების მიზეზად ექიმები დაგვიანებულ ჰოსპიტალიზაციას ასახელებენ.

როგორც ჯანდაცვის მინისტრმა სანდრო კვიტაშვილმა გუშინ გამართულ საგანგებო პრესკონფერენციაზე განაცხადა, ნოემბერ-დეკემბერში H1N1 ვირუსის სულ 40 ათასი შემთხვევა დაფიქსირდა, აქედან 1500 პაციენტი ჰოსპიტალიზებულია. "ჯერჯერობით ისევ ეპიდემიის ზღვარზე ვართ. ეპიდემიის გამოსაცხადებლად 100 ათას მოსახლეზე დაავადებული უნდა იყოს 1100 ადამიანი. ჩვენს შემთხვევაში კი 100 ათას მოსახლეზე მხოლოდ 850 პაციენტი ფიქსირდება", - აღნიშნა ჯანდაცვის მინისტრმა და მოსახლეობას მოუწოდა, გრიპის პირველივე სიმპტომების გამოვლენისას აუცილებლად მიაკითხონ ექიმს და მის რეკომენდაციებს დაემორჩილონ.

http://www.interpressnews.ge/ge/index.php/...l&hd_line=1

ლ ი ც ი · December 13, 2009

ირაკლი ალასანია არჩევნებში ოპოზიციის ერთიანი სიით მონაწილეობის მნიშვნელობაზე საუბრობს

სიახლე !!! ”ინტერპრესნიუსი” უკვე თქვენს მობილურში

13 / 12, 2009 15:52

„ალიანსი საქართველოსთვის“ ლიდერს, თბილისის მერობის კანდიდატს ირაკლი ალასანიას მიაჩნია, რომ ძირითადი ოპოზიციური ძალები უნდა გაერთიანდნენ და ადგილობრივ არჩევნებში ერთიანი სიით მიიღონ მონაწილეობა.

ამის შესახებ, ირაკლი ალასანიამ დიდი დიღმის მოსახლეობასთან შეხვედრისას განაცხადა. „ჩვენ 30%–იანი ბარიერის არ გვეშინია. ოპოზიციური ძალები ერთად უნდა დავდგეთ. 50%–იანი ბარიერის ხელისუფლებას ეშინია“,-აღნიშნა მან.

ირაკლი ალასანია დარწმუნებულია, რომ ძირითად ოპოზიციურ ძალებს გაერთიანების დიდი შანსი აქვთ. მისი თქმით, იმართება საინტერესო შეხვედრები ზოგიერთ ოპოზიციურ პარტიასთან, მათ შორის „ეროვნულ ფორუმთან“ და ისეთებთან, რომელთაც ხალხის დიდი ნდობა აქვთ.

http://www.interpressnews.ge/ge/index.php/...l&hd_line=1

ლ ი ც ი · December 13, 2009

ქართული ინტერნეტფორუმების მიმოხილვა - დიდები და პატარები

12:33 13.12.2009

ინტერნეტფორუმებზე ასეთი დიდი არეულობა საპრეზიდენტო არჩევნების დროსაც კი არ ყოფილა. მოკლედ, პატარა საქართველოს პატარა პოლიტიკაში და პატარა ფორუმებზე დიდი ამბებია.

ასტროლოგთა, ასტროფიზიკოსთა და მათთა მსგავსთა განმარტებით:ნსაქართველოში მოსალოდნელია ფანატიზმის, დაბოღმილობის, ამბიციურობისა და აგრესიულობის მასიური შემოტევა. ფანატიკოსები ლაღად გაიჭრებიან “სიბნელის ველზე” და იქნება დიდი ორომტრიალი.

არ წყდება მსჯელობა იმასთან დაკავშირებით, არის თუ არა ოპოზიცია რუსეთის მიერ მართული. ანდა რატომ უნდა შეწყდეს, თუკი ქართველი ასტროლოგები ამბობენ, რომ არ შეწყდებაო...

archilcheghe (forum.ge): “ჩემის აზრით საკმაოდ სავარაუდოა, რამ არჩევნების შემდეგ (როგორც უნდა ჩატარდეს არჩევნები) თბილისში ისევ იწყება არეულობა, ხალხო გასაგებია “გრეჩიხას” ვალი აქვს ძალიან დიდი (რამოდენიმე მილიონი), მაგრამ ამის გამო შეიძლება ყველაფერზე ხაზის გადასმა?”

გასაგებია, რომ ამ ფორუმელს ოპოზიცია არ ეპიტნავება, მაგრამ იარლიყების ასე ადვილად მიწეპება ალბათ მხოლოდ ჩვენთან თუ შეიძლება. ყველაფერი ადვილია, ყველაფერი იოლია... მაგრამ გენიალურად მაინც არაა ყველაფერი...

ქართველები ნელ-ნელა ვხვდებით რა უნდა მოვითხოვოთ და რა უნდა გვაინტერესებდეს. ამის მაგალითი გახლავთ ფორუმელი Mesaplave თავისი სულ ცინცხალი აზრებით.

“კაროჩე პოლიტიკა მაგრად არ მაინტერესებს. ასეა თუ ისეა, ეხლა მაგათ მემუარების წაკითხვა არ შემიძლია და პროგრამაში ვის აქვს მოგების გადასახადის 12% -მდე შემცირება და ბიზნესის ხელშეწყობა და კონკრეტულად რა საკითხებში (დასაქმება არ მაინტერესებს) ყველა პარტია რას პირდება ბიზნესს უფრო მოგების გადასახადი დაწერეთ”

აი კაცი! პოლიტიკურ აბდა-უბდაზე მეტად ის აინტერსებს, მას რამდენად აწყობს ესა თუ ის პარტია. არა ბიჭო და...

რუსეთი-საქართველო-სომხეთი-ამერიკა. აი ნამდვილი «სიამის ოთხეული». აი ნამდვილი სიყვარულის ნიმუში!

“ბაბუაგიორგი” (planeta.ge): «რა განსხვავებაა მონობასა და გავლენის სფეროს შორის? ის პოლიტიკა რაც დღეს საქართველოს მთავრობა ეწევა ერთი მონობიდან მეორეში გადასვლის მეტი არაფერია. არ ვირბენ ეხლა “ტუდა ბეგომ” და ჩვენი მოგენოციდე მეზობლების მდგომარეობიდან გამომდინარე გავაკეთოთ შედარება. რუსებთან დარჩნენ? კი. რუსებთან არიან? არა. აზერბაჯანს ომი მოუგეს? კი. მაშინ ამიხსნის ვინმე რა წააგეს? ჩემი აზრით რუსები გამოიყენეს ბოლო ამოსუნთქვამდე. მოვა დრო და რუსებსაც გადააფურთხებენ და ალბათ ნატოშიც ჩვენზე ადრე შევლენ მთელი მათი “ნაგორნი კარაბახით”. რა გავქვს ჩვენ? ბუში.

მოვიგეთ რამე? არა. გვიჩმახებენ? კი. ტერიტორიებს გვართმევენ? კი. ევროსტრუკტურებს ვუახლოვდებით? არა. მაშინ სად ვართ ჩვენ? დავიჯერო არ მოვა ისეთი დრო, როდესაც პოლიტიკას შეძრომაში არ ავურევთ?”

სამწუხაროდ, ბევრმა ჯერ კიდევ არ იცის, რომ მთავარი გაგებაა! სადაც გაგებაა, იქ “გაჩმახება” გამორიცხულია!

თუ ფორუმელი shaxtiora და დავით აქუბარდია სიმართლეს ღაღადებენ, მაშინ მართლაც ძალიან ცუდი რაღაც მომხდარა.

- “დავიწყოთ იმით, რომ საქართველოში სიტყვის თავისუფლება არის 99% ით შეზღუდული, ჰოდა იმ ერთი პროცენტის მეშვეობით, (“კავკასია” მაქვს მხედველობაში) გავიგე, რომ “არტ-ჯგუფი” დახურეს, ყოველგვარი განმარტებისა და დოკუმენტების გარეშე მიუცვივდნენ და ყადაღა დაადეს, ხალხი გაყარეს. არცერთ ამ მონა ტელევიზიას ხმა არ ამოუღია, მერე უკვირთ რომ აგინებენ და ყველაფერ ცუდს უშვრებიან, მონები და მეტი არაფერი, თფუ ამათ ტფუ... აი ნამდვილი საქმე ლაპარაკის ნაცვლად!”

“არტ-ჯგუფის” დახურვა და იქ მომუშავე ხალხისთვის სამსახურის დაკარგვა, მართლა ვერაა კარგი, მაგრამ თუ მართლა ასეა, ამოიღონს ხმა იმ დალოცვილებმა, ფორუმელს რატომ გვინერვიულებენ ტყუილად...

ამერიკის ცხენის ფლოქვებისაგან დაბეკნილ მიწაზე გარდაცვლილა აჰია კაზანი – რუსეთის მოძულე აფხაზი კაცი. ამ საკითხს ერთ-ერთმა ფორუმელმა სპეციალური თემა მიუძღვნა.

kavkazski_lev (FORUM.GE): “აჰია კაზანი არის ნორმალური აფსუა! ეს კაცი იყო აფსუა. იგი თავადური გვარის წარმომადგენელი იყო და დიდი ავტორიტეტით სარგებლობს აფსუებში. ომის დროს აქტიურად ეხმარებოდა აშშ-დან ფინანსურად აფსუებს, მაგრამ როცა მან დაინახა რასაც უპირებენ აფსუებს რუსები, იგი გახდა ფართო ავტონომიის მომხრე. ამ მოსაზრების გამო მას არძინბა დაუპირისპირდა და ქვეყნის მოღალატედ აღიარა. აჰია კაზანი სულ ცოტა ხნის წინ აშშ-ში გარდაიცვალა. მის საქმეს მისი ვაჟი ასრულებს. თუ ვინმეს გაქვთ რაიმე ინფორმაცია ამ კაცზე დამიწერეთ”

ასეთი რამეები პაატა ზაქარეიშვილმა იცის. საერთოდ, პაატა ზაქარეიშვილმა ბევრი რამე იცის. ზაქარეიშვილმა ყველაფერი იცის რაც საჭირო არ არის.

რაკი სულხან-საბას ელჩობის პერიოდს არ მოვსწრებივართ და მისი დარდ-ვარამი არ მოგვისმენია, ფორუმელი “საბუნიას” მონაყოლით უნდა დავკმაყოფილდეთ.

- “ევროპაც ბანძია და ამერიკაც! თუ არ დაგვეხმარებიან. დღეს ერთმა ამერიკელმა მითხრა იმედი გაგიცრუვდებათო, ჩვენგან ნუ ელოდებითო დახმარებასო. ჰოდა მე ვუთხარი 20 საუკუნეზე მეტია მასე ვართ მარტო და აქამდე მოვაღწიეთ და თუ არც დაგვეხმარებით მეთქი და ჭიქა მივუჭახუნე! აი ეგრე!”

ყველაფერი იმის ბრალია, რომ ბოლო დროს ციმბირული გრძელბეწვიანი კატების ფასმა მსოფლიოს ცხოველთა ბაზარზე ძალიან მოიმატა. პუტინი კი საფრანგეთის პრეზიდენტს “ციცებს” მოსაფერებლად სულ უფასოდ უგზავნის.

რა კავშირი აქვთ ლევან ბერძენიშვილსა და მაჰათმა განდის, ამას მხოლოდ ფორუმელები თუ დაადგენენ და აკი დაადგინეს კიდეც...

licemer (PLANETA.GE): “ინდოელთა ლევან ბერძენიშვილი” - მოჰანდას კარამჩანდ პორბანდალი - იგივე მაჰათმა განდი ამბობდა: “არ ითანამშრომლოთ ინგლისელებთან, უარი თქვით მათ მიერ შემოთავაზებულ პრივილეგიებზე, არ ჩადგეთ მათ სამსახურში, თუ გინდათ, რომ ინდოეთი დამოუკიდებელი სახელმწიფო იყოს” აფრთხილებდა მაჰათმა ინდოელებს.

გჯეროდეთ ედუარდის, გჯეროდეთ მიშას, გჯეროდეთ ამერიკელების. რაც შეიძლება მეტი გრანტი სტომაქის გასავსებათ. კურკური რუსებთან, საქართველო აფხაზეთის გარეშე-გვმოძღვრავს ქართველი მაჰათმა. სატიაგრაჰა! (წინააღმდეგობა არაძალადობრივი გზით) მოუწოდებდა მაჰათმა ინდოელებს. “ჩავბარდეთ” ნატოს და შტატებს”, ისინი იფიქრებენ ჩვენს მაგივრად-მოგვიწოდებს “ქართველი მაჰათმა!”

როგორც ამბობენ, ქართულ ინტერნეტფორუმებს ლევან ბერძენიშვილი ძალიან ხშირად ათვალიერებსო. ძველი რესუპუბლიკელი, ამ კომენტარის წაკითხვის შემდეგ, ალბათ საკუთარ წარსულსა და აწმყოზე დაფიქრდებოდა.

მარინა მუსხელიშვილისა და გია ჟორჟოლიანის ინიციატივით, მოქალაქეებმა ხელისუფლების წევრთა ახლობლების და ნათესავებს ბოიკოტი უნდა გამოუცხადონ.

THRaKaTTaK (forum.ge): “ბოიკოტში იგულისხმება გამარჯობის ართქმა, ყოველგვარი ურთიერთობის შეწყვეტა და ა.შ. დანარჩენი ალბათ ინდივიდუალური ფანტაზიის მიხედვით. ავღნიშნავ, რომ მუსხელიშვილიცა და ჟორჟოლიანიც თსუ-ში მუშაობენ (თითქოს და პოლიტიკური ნიშნით დაწმენდილში) ამასთანავე აქვთ საკუთარი “ენჟიო”. ამასთანავე არიან გაერთიანებული ოპოზიციის ერთერთი იდეოლოგები. განსაკუთრებით დაახლოებულნი არიან პარიზელ ქალბატონთან.

მარინას შვილი კი პარიზელი ქალბატონის ახალგაზრდულ ორგანიზაციას მეთაურობს. იმასაც ავღნიშნავ, რომ ვიცნობ ხალხს, ვინც მათ ამ იდეას უკვე ატარებს რეალობაში. მაგრამ საჯაროდ გაცხადებული გუშინ პირველად მოვისმინე კავკასიის ეთერში”

“კავკასიაზე” მართლა მაგარ რამეებს მოისმენს კაცი. მიყვარს ეს აქუბარდია და მესროლეთ თუ გინდათ! ანდა, როგორ შეიძლება აქუბარდია არ გიყვარდეს...

http://presa.ge/index.php?text=news&i=11331

ლ ი ც ი · December 13, 2009

საშობაოდ პრეზიდენტი შეწყალების მორიგ აქტს ამზადებს

13 / 12, 2009 16:44

საშობაოდ პრეზიდენტი შეწყალების მორიგ აქტს ამზადებს.

ამის შესახებ, "ინტერპრესნიუსისთვის" გახდა ცნობილი. თუმცა, შესაწყალებელ პატიმართა რაოდენობა და მათი შერჩევის კრიტერიუმებიც ჯერჯერობით უცნობია. ასევე უცნობია, შეიწყალებენ თუ არა საშობაოდ ქალებსა და არასრულწლოვანებს.

ამ ეტაპზე მხოლოდ ის კონკრეტდება, რომ საშობაოდ შესაწყალებელი პატიმრების საქმეები, სავარაუდოდ, შეწყალების კომისიას არ გაივლის.

უკანასკნელი შეწყალება 23 ნოემბერს, გიორგობას განხორციელდა. მაშინ პრეზიდენტმა 156 პატიმარი შეიწყალა. მათ შორის მხოლოდ 20-მდე პატიმარია ისეთი, რომელთა საქმეებიც შეწყალების კომისიის მიერ იყო განხილული.

http://www.interpressnews.ge/ge/index.php/...l&hd_line=1

ლ ი ც ი · December 14, 2009

სერგეი ბაღაფში - აფხაზეთი აღარასოდეს იქნება საქართველოს შემადგენლობაში

14 / 12, 2009 10:54

სოხუმის რეჟიმის ლიდერმა სერგეი ბაღაფშმა, რომელმაც გუშინდელ ე.წ. საპრეზიდენტო არჩევნებში 59,4%-ით გაიმარჯვა, კიდევ ერთხელ განაცხადა, რომ აფხაზეთი აღარასოდეს იქნება საქართველოს შემადგენლობაში.

როგორც საინფორმაციო სააგენტო “აპსნი პრესი” იუწყება, აღნიშნული განცხადება ბაღაფშმა ე.წ. საპრეზიდენტო არჩევნების შედეგების გამოცხადების შემდეგ გამართულ პრესკონფერენციაზე გააკეთა.

”მშვენივრად მესმის, რომ აფხაზეთის დამოუკიდებელ სახელმწიფოდ აღიარება რთული პროცესია. მოსწონს თუ არა ეს ევროკავშირს ან შეერთებულ შტატებს, ჩვენ ჩვენი გზა ავირჩიეთ. აფხაზეთი აღარასოდეს იქნება საქართველოს შემადგენლობაში. ჩვენ ურთიერთობების ასაგებად საკმარის მეგობრებს ვიპოვით”, - განაცხადა ბაღაფშმა.

http://www.interpressnews.ge/ge/index.php/...l&hd_line=1

ლ ი ც ი · December 14, 2009

10:39 / 14-12-2009

რუსეთმა საქართველოს და სომხეთს ბუნებრივი აირის მიწოდება შეუწყვიტა

http://www.ambebi.ge/semtxveva/14280-gazsa...heutsyvita.html

ლ ი ც ი · December 14, 2009

10:20 / 14-12-2009

არც მოღალატეები არც გმირები

მოსკოვის საერთაშორისო ჟურნალისტური ფორუმის მონაწილე ქართველი ჟურნალისტები თბილისელი კოლეგების ნაწილმა "თითქმის მოღალატეებად" შერაცხა, მოსკოველი ქართველები კი მათი საქციელის გმირობად მონათვლას ცდილობდნენ...

ამ წერილის დაწერას არ ვაპირებდი, რადგან მკითხველისათვის ნაკლებად საინტერესოა, თუ სტატიაზე მუშაობისას რომელ კონფერენციაში მონაწილეობს ავტორი, მაგრამ ქართველი ჟურნალისტების მოსკოვში რამდენიმე დღით ყოფნის გამო თბილისში ატეხილმა აჟიოტაჟმა მაიძულა, ჩემი მოსაზრება გამეზიარებინა მკითხველისათვის, რადგან ფორუმის მონაწილეთა შორის მეც გახლდით და ჩემი თვალით ვნახე, რაც იქ ხდებოდა.

9-10 დეკემბერს მოსკოვში გაიმართა საერთაშორისო ფორუმი ევროპული და აზიური მასმედიისთვის, რომელშიც პოსტსაბჭოური 15 ქვეყნის გარდა (მათ შორის ლიტვის, ლატვიის, ესტონეთის, უკრაინის და ა.შ.), ჩინეთისა და იტალიის მასმედიის 150 მთავარი რედაქტორი მონაწილეობდა. მათ შორის 12 ქართველი ჟურნალისტიც ვიყავით (მე, როგორც სამხედრო-ანალიტიკური ჟურნალის, "არსენალის" მთავარი რედაქტორი).

თბილისში დაბრუნებულს აეროპორტშივე ერთმა ცნობილმა დეპუტატმა ნიშნის მოგებით მკითხა, - ხომ გაგიხარდათ, მედვედევს რომ შეხვდითო...

თბილისში ჟურნალისტთა ერთი ჯგუფის (რომლებიც არც მალავენ ხელისუფლებასთან მჭიდრო ურთიერთობას, რაც ჟურნალისტის პროფესიისთვის დიდად მისასალმებელი არ არის) მიერ ატეხილი აჟიოტაჟის არსი ეს იყო - რატომ წახვედით ჩვენი მტრის, რუსეთის, დედაქალაქში და შეხვდით მის პრეზიდენტს, რომელმაც საქართველოს დაბომბვის ბრძანება გასცაო... არავისთან თავის მართლებას არ ვაპირებ, მაგრამ მკითხველმა სიმართლე უნდა იცოდეს: ფორუმის ორგანიზატორებმაც კი წინადღეს გაიგეს პრეზიდენტ მედვედევის სურვილი, მისალმებოდა ევროპული და აზიური მასმედიის წარმომადგენლებს; ასე რომ, ქართველი ჟურნალისტები ამ ფორუმზე მედვედევთან შესახვედრად კი არა, უცხოელ კოლეგებთან სასაუბროდ ჩავიდნენ.

პირადად ჩემთვის ეს ფორუმი იმითაც იყო მნიშვნელოვანი, რომ ჩემს უცხოელ კოლეგებს ვუხსნიდი, თუ რა ხდება დღეს ოკუპირებულ ქართულ მიწებზე, რა დღეშია კონფლიქტური ზონების საზღვრებთან მცხოვრები ქართველი მოსახლეობა, როგორ აძლიერებს რუსეთი საოკუპაციო ძალებს ცხინვალის რეგიონსა და აფხაზეთში და ა.შ. მაგრამ დავუბრუნდეთ ფორუმის იმ დღეს, როდესაც დარბაზში შემოვიდა რუსეთის პრეზიდენტი.

მისალმების შემდეგ მედვედევი ჟურნალისტების კითხვებს პასუხობდა. მალხაზ გულაშვილმა მედვედევს რამდენიმე შეკითხვა დაუსვა, რომელიც ეხებოდა პირდაპირი ავიარეისების აღდგენას, ზემო ლარსის სასაზღვრო საგუშაგოს გახსნას, საქართველოს მოქალაქეებისთვის სავიზო რეჟიმის გამარტივებას და ქართული პროდუქტის რუსეთის ბაზარზე დაბრუნებას.

მედვედევის პასუხები მკითხველისთვის უკვე ცნობილია, ისევე როგორც საქართველოს პრეზიდენტის, სააკაშვილის მეორე დღესვე გაკეთებული ზომიერი კომენტარი.

მედვედევი უკვე წასვლას აპირებდა, როდესაც ჩვენი ჯგუფის წევრმა, თენგიზ პაჭკორიამ, ფორუმის ორგანიზატორების მკაცრი წინააღმდეგობის მიუხედავად, უმიკროფონოდ ხმამაღლა დასმული კითხვით (უფრო სწორად, რჩევით) უკან შემოაბრუნა...ქართული ტელეარხების მოსკოველი კორესპონდენტები იმ დროს ფორუმზე არ იმყოფებოდნენ და ცხადია, რეალურად ვერ ნახავდნენ, თუ რა ხდებოდა იმ მომენტში დარბაზში; ამიტომაც შეიძლება ამ ტელევიზიების მიერ გადაცემული სიუჟეტებიდან ვინმეს დარჩენოდა შთაბეჭდილება, თითქოს ქართველი ჟურნალისტები რუსეთის პრეზიდენტს ეახლნენ...

ჟურნალისტი ვალდებულია, ინფორმაცია ყველა დაშვებული, კანონიერი (ზოგჯერ კი უკანონო) გზით მოიპოვოს და როგორ შეიძლებოდა ასეთი შემთხვევის ხელიდან გაშვება - ქართველ ჟურნალისტებს არ დაესვათ ის კითხვები, რომელიც რუსეთში მცხოვრები მილიონზე მეტი საქართველოს მოქალაქისა და საქართველოში დარჩენილი მათი ახლობლებისთვისაც სასიცოცხლოა?!.

შეუძლებელია, გულისტკივილით არ ვთქვა: 1992 წლიდან მოყოლებული, შვიდი ომის გაშუქებამ მომიწია წინა ხაზიდან და იქ არც ერთი ის ჟურნალისტი არ მინახავს, ვინც დღეს აქეთ გვასწავლის ჭკუას. ჩემთვის პირადად მოსკოვში ჩასვლა ბევრი საინტერესო ინფორმაციის მოპოვების მშვენიერი შესაძლებლობა იყო, მათ შორის აგვისტოს ომთან დაკავშირებით, რასაც "კვირის პალიტრის" და "არსენალის" მკითხველს მალე მოვახსენებ.

თუკი თბილისში ზოგიერთი (ხელისუფლებასთან დაახლოებული) ჟურნალისტი მოსკოვში წასულ ჩვენს ჯგუფს აკრიტიკებდა და ცდილობდა, საზოგადოების თვალში ჩვენთვის "თითქმის მოღალატეების" იარლიყიც მოეკერებინა, მოსკოველი ქართველების ნაწილი (ჩვეულებრივი ადამიანები, რომლებიც ბაზრობებზე მუშაობენ, თუმცა საღამოთი ქართულ ტელეარხებს უყურებენ) ქუჩაში გვცნობდა და ლამის გმირებად წარმოგვიდგენდა.

მაგრამ ჩვენ არც მოღალატეები ვიყავით და არც გმირები, უბრალოდ, ჟურნალისტები გახლდით, რომლებსაც მოგვეცა საშუალება, საქართველოსადმი არა მეგობრულად განწყობილი ქვეყნის პირველი პირისთვის რამდენიმე კითხვა დაგვესვა.

ხვალ მედვედევმა და სააკაშვილმა ერთმანეთს ხელი რომ ჩამოართვან (რაც დღეს ნაკლებად შესაძლებელია, თუმცა გამორიცხული არაფერია), ზოგიერთი დღევანდელი კრიტიკოსი ჟურნალისტი ალბათ პირველი გაიქცევა მოსკოვში და იქიდან საქართველოს საზოგადოების დარწმუნებას დაიწყებს, - ნახეთ, რა დიდი საქმე კეთდებაო...

ირაკლი ალადაშვილი

”კვირის პალიტრა”

ლ ი ც ი · December 14, 2009

ქართული პრესის მიმოხილვა 14.12.2009

• ზურაბ აბაშიძე - “რუსეთთან პოლიტიკური ურთიერთობები ვერანაირად ვერ აღდგება, მაგრამ ყოფით საკითხებს პრაგმატულად უნდა მივუდგეთ”

• რა სთხოვა პარიზში ვიზიტად მყოფმა კიწმარიშვილმა ოქრუაშვილს

• ლადო პაპავა - “ქართული ბანკები გაკოტრებას რუსეთის აგრესიამ გადაარჩინა!”

ზურაბ აბაშიძე - “რუსეთთან პოლიტიკური ურთიერთობები ვერანაირად ვერ აღდგება, მაგრამ ყოფით საკითხებს პრაგმატულად უნდა მივუდგეთ”

“მედვედევის წინადადებებს სხვადასხვა მხრიდან შეიძლება შევხედოთ, მაგრამ მე ერთ მომენტზე შევჩერდები - როგორც ჩანს, მედვედევს აშკარად აქვს რეალური ცვლილებების განხორციელების სურვილი, აშკარად აქვს სწრაფვა ქვეყნის მოდერნიზაციისკენ. დღეს ეს მისი მთავარი ამოცანა და გამოწვევაა”, - აცხადებს პოლიტიკის მეცნიერებათა დოქტორი, ყოფილი ელჩი ევროკავშირში, ნატოსა და რუსეთში ზურაბ აბაშიძე გაზეთ “კვირის პალიტრისთვის” მიცემულ ინტერვიუში, სათაურით “რუსეთის იგნორირება შეცდომაა” / “ერთ მშვენიერ დღეს ოპოზიცია რომ მოვა ხელისუფლებაში, რუსეთი ხომ მოჰკითხავს - თავის დროზე, შენ არ აღიარებდი საქართველოს ბრალეულობას ამ ომშიო?”

“რუსეთის მოაზროვნე საზოგადოებაში ძალიან დიდი უკმაყოფილება იგრძნობა იმის გამო, რომ საუკეთესო ათი წელი რუსეთმა ფაქტობრივად დაკარგა. მათ შესაბამისად ვერ გამოიყენეს გაზიდან და ნავთობიდან მიღებული კოლოსალური შემოსავლები, ამ რესურსებს მაშინ მსოფლიოში ძალზე მაღალი ფასი ჰქონდა. ეს ფული არ მოხმარდა რუსეთის ტექნოლოგიურ მოდერნიზაციას - უამრავი ფული ჰაერიდან შემოვიდა და ჰაერშივე გაუჩინარდა. ახლა უკვე რთული ვითარებაა. ისეთივე შემოსავლები აღარ აქვთ და რუსეთის წინაშე უფრო და უფრო დიდი სირთულეები იკვეთება. როგორც აღმოჩნდა, ის კრიზისი რომელიც ახლა რუსეთშია, მხოლოდ საერთაშორისო კრიზისის გამოძახილი არ ყოფილა, მას უფრო მეტად შიდარუსული საფუძველი აქვს. ამ კრიზისის მოგვარებას რუსეთში ახლო მომავალში არც ელიან”, - აღნიშნავს გამოცემის კორესპონდენტთან საუბრისას ზურაბ აბაშიძე.

“რუსეთის ეკონომიკური პოტენციალი უიმედოდ არის მოძველებული. რუსეთის მოდერნიზაცია შეუძლებელია, თუ არ მოხდება სერიოზული ცვლილებები საგარეო პოლიტიკაში. ეს მედვედევს და მის გარემოცვას კარგად უნდა ესმოდეთ. ამიტომ, ხანდახან, მედვედევი და პუტინი სხვადასხვა ენაზე ლაპარაკობენ. თუმცა, როგორც ჩანს, მედვედევს ძალა არ ჰყოფნის საიმისოდ, რომ თავისი სურვილები და იდეები რეალურად განახორციელოს. საქართველო ამ შემთხვევაში მხოლოდ ერთი ფრაგმენტია იმ დიდი და ზოგადი პრობლემისა, რაც დღევანდელი რუსეთის წინაშე დგას. რაც შეეხება მედვედევის განცხადებას და საქართველოს პრეზიდენტის პასუხს, ვფიქრობ, რომ ჩვენი მხრიდან სწორი ნაბიჯები გადაიდგა, როდესაც ითქვა, რომ საჰაერო მიმოსვლის აღდგენა შესაძლებელია, რომ ლარსის სასაზღვრო პუნქტის გახსნაზეც შეიძლება იყოს ლაპარაკი. მეც ამ აზრის ვარ, რომ პოლიტიკური ურთიერთობები ვერანაირად ვერ აღდგება, სანამ რუსეთის მხრიდან საერთაშორისო ასპარეზზე შესაბამისი ნაბიჯები არ გადაიდგმება”, - განაგრძობს გამოცემის რესპონდენტი.

“რაც შეეხება ყოფით საკითხებს, მათ პრაგმატულად უნდა მივუდგეთ და ისე გადავწყვიტოთ. ახლა არ არის პირდაპირი საჰაერო მიმოსვლა, მაგრამ ჩვენი თანამემამულეები მაინც მიემგზავრებიან, ოღონდ ხან ერევნის, ხან კიევის და ხან მინსკის გავლით. ამ საკითხის გადაჭრით მხოლოდ ხალხს გაუადვილდება ცხოვრება და ფინანსები არა სხვა კომპანიებსა და ქვეყნებში, არამედ ჩვენკენ წამოვა. იგივეა ლარსის შემთხვევაშიც - ამასაც პრაგმატული და ეკონომიკური დატვირთვა უფრო აქვს - მეზობელი სომხეთიდან წამოვა ტვირთები საქართველოს გავლით. ასე რომ, საჰაერო, საგზაო მიმოსვლა, თუნდაც ვაჭრობა - ყველაფერი ის, რაც საქართველოს გააძლიერებს, ჩვენს სასარგებლოდ უნდა გადაიჭრას. მსოფლიოში არის ქვეყნები, რომელთაც ისეთივე დილემა აქვთ, როგორიც ჩვენ, მაგალითად, ჩინეთსა და ტაივანს. მათ შორის ურთიერთობა გაცილებით რთულია, ვიდრე ჩვენსა და რუსეთს შორის. ის ხალხი, ტაივანზე რომ არის, თავის დროზე ჩინეთის ხელისუფლება იყო და კომუნისტებმა ამ კუნძულზე გაყარეს. რაღაც მომენტში ისინიც კი მივიდნენ დასკვნამდე, რომ თვითმფრინავებმაც უნდა იფრინონ, ვაჭრობაც უნდა აღდგეს, მაგრამ ვიმეორებ, რაც ჩვენთვის პრინციპულ საკითხს წარმოადგენს, იქ უკან დახევა ან თვალის დახუჭვა არავითარ შემთხვევაში არ შეიძლება. ასეთი საკითხია ქვეყნის ტერიტორიული მთლიანობა და დამოუკიდებლობა”, - დასძენს ზურაბ აბაშიძე.

“შვედეთის საგარეო საქმეთა მინისტრმა საკმაოდ საინტერესო და სარკასტული განცხადება გააკეთა - რუსეთის მიერ აფხაზეთისა და სამხრეთ ოსეთის აღიარება უფრო და უფრო ემსგავსება ცუდ ხუმრობასო... კარლ ბილდტი ძალზე გამოცდილი დიპლომატია. სხვათა შორის, ჩვენ ყოველთვის მხარს გვიჭერდა და გვიჭერს ძალიან ხაზგასმულად. გუშინ ევროპელ კოლეგებთან მქონდა საუბარი და იცით, მათაც ისეთივე განცდა აქვთ - მათი დაკვირვებით, რუსეთში გამარჯვების ეიფორიამ უკვე გადაიარა. შარშან სხვაგვარი აღტყინება ჰქონდათ. თვლიდნენ, რომ დიდ გამარჯვებას მიაღწიეს. მაგრამ დღეს, როდესაც ცივი გონებით პლუსებს და მინუსებს ითვლიან, აღმოაჩინეს, რომ ბევრი არაფერი მოუგიათ - წაგებით კი ბევრი წააგეს. საერთაშორისო იმიჯი შელახული აქვთ. ეკონომიკური კრიზისის არა ერთადერთი, მაგრამ ერთ-ერთი მიზეზი აგვისტოს ომიცაა, ჩრდილო კავკასიაში ვითარება ძალიან გაურთულდათ”, - ამბობს გამოცემის რესპონდენტი.

“სხვათა შორის, აქამდე რუსი ექსპერტები ამბობდნენ, ჩრდილო კავკასიაში მიმდინარე მოვლენებს არავითარი კავშირი არ აქვს ქართული ავტონომიების დამოუკიდებლობის აღიარებასთანო, მაგრამ დღეს უკვე სხვაგვარი დამოკიდებულებაა. ახლა უკვე თვითონ ჩრდილო კავკასიის ავტონომიური რესპუბლიკების ლიდერები აღიარებენ, რომ აგვისტოს მოვლენების შემდეგ მათ რეგიონში ძალადობის უპრეცედენტო ესკალაცია რუსულ-ქართული ომის გამოძახილიცაა. ეს რუსეთის სხვა ტერიტორიაზეც იგრძნობა - კერძოდ თათრეთში... ასე რომ, ეს “ცუდი ხუმრობა” მართლაც ძალიან ცუდად მოუტრიალდათ. რა თქმა უნდა, ამაზეც ფიქრობენ მოსკოვში, მაგრამ ჯერ ჩვენთვის სასიკეთო დასკვნები გამოაქვთ-მეთქი, ვერ ვიტყვით. თუმცა მოსკოვის ელიტაშიც არის ხალხი, ვინც ფიქრობს, რომ დამოუკიდებლობის აღიარების ნაბიჯი არ უნდა გადაედგათ”, - აცხადებს ზურაბ აბაშიძე და შეკითხვას - “გასულ კვირას მერის არჩევნებში მონაწილეობის სურვილი გამოთქვა მოძრაობა “ნეიტრალურმა საქართველომ” (თავმჯდომარე ვალერი კვარაცხელია). ამ მოძრაობის ლოიალური დამოკიდებულება რუსეთის მმართველ წრეებთან კარგადაა ცნობილი. მოსკოვში ვიზიტებს სხვა პოლიტიკოსებმაც მოუხშირეს. ხომ არ ნიშნავს ეს, რომ რუსეთმა გადაწყვიტა, უფრო აქტიურად ჩაერთოს საქართველოს შიდაპოლიტიკურ პროცესებში და ამ გზით მიაღწიოს თავისი სურვილების განხორციელებას?- პასუხობს:

“თავისთავად, არჩევნებში მონაწილეობას ვერავის დაუშლი, ისევე როგორც მოსკოვში წასვლას (პოლიტიკოსებს ვგულისხმობ). აქაც გააჩნია, რისთვის მიდიან. მე ვამბობ ხოლმე, რომ რუსეთის გარკვეული წრეები ჩვენ გვთავაზობენ თანამშრომლობის იმიტაციას - რაც იყო, იყო, მოდი, ახალი ფურცლიდან დავიწყოთ და მომავალზე ვისაუბროთო. ეს არ უნდა მივიღოთ და არ უნდა დავთანხმდეთ. ჩვენი პრინციპი ერთადერთი უნდა იყოს - რა საერთაშორისო ვალდებულებებიც აქვს რუსეთს (მედვედევი-სარკოზის შეთანხმება), ჯერ ის უნდა შეასრულოს. თუ მარტო იმაზე სალაპარაკოდ ჩადიან, საქართველოს ხელისუფლებამ დაიწყო ცხინვალთან ომიო, ეს უკვე სხვა ამბავია. მე არ ვურჩევდი არც ერთ ოპოზიციურ ძალას, რუსულ-ქართულ ომში ყველაფერი ოფიციალურ თბილისს გადააბრალონ. ჯერ ერთი, ეს ასე არ იყო და მეორე - თუნდაც მარტივი და პრაგმატული მოსაზრების გამო. ხელისუფლება შეიძლება წავიდეს და მოვიდეს, ოფიციალური თბილისი კი დარჩება. ერთ მშვენიერ დღეს ოპოზიცია რომ მოვა ხელისუფლებაში, რუსეთი ხომ მოჰკითხავს - თავის დროზე, შენ არ აღიარებდი საქართველოს ბრალეულობას ამ ომშიო? ასე რომ, ამ თვალსაზრისით ბევრი სიფრთხილე და წინდახედულობაა საჭირო. არ მესმის, როდესაც ზოგიერთი ჩემი კოლეგა ლაპარაკობს იმაზე, რომ რუსეთს ყურადღება არ უნდა მივაქციოთ, საჭიროა მისი იგნორირება და სხვ, რუსეთი ჩვენს მეზობლად არსებობს, მისი ჯარი კი 40 კილომეტრში დგას და ამგვარად ამ ფაქტორის იგნორირება შეუძლებელია”.

რა სთხოვა პარიზში ვიზიტად მყოფმა კიწმარიშვილმა ოქრუაშვილს

“პარიზში საუბარი მქონდა ქიბარ ხალვაშის მეგობარ ირაკლი ოქრუაშვილთან, რომელთანაც ორი თემა მაკავშირებს. ეს არის “რუსთავი 2”თან დაკავშირებული დავა, რომელზეც მქონდა გარკვეული შეთავაზებები, რომ ერთად გვემუშავა ამ არხის დასაბრუნებლად და მეორე, ქიბარ ხალვაშის ფინანსური რესურსების გამოყენებაზე “მაესტროს” დასახმარებლად”, - აცხადებს “მაესტროს” მთავარი მენეჯერი ეროსი კიწმარიშვილი გაზეთ “მთელი კვირისთვის” მიცემულ ინტერვიუში, სათაურით გზა “მაესტროდან” სახალხო ტელევიზიამდე / რა სთხოვა პარიზში ვიზიტად მყოფმა კიწმარიშვილმა ოქრუაშვილს.

“ახლა ვართ გადართული ტექნიკურ საკითხებზე, ასევე ვამზადებთ დაფინანსების რამდენიმე სქემას, რომელიც დაკავშირებულია რამდენიმე საკითხთან. უნდა მოხდეს ინვესტორების მოზიდვა კონკრეტულ პროექტებზე, ასევე ფონდების. ტექნიკური ბაზა “მაესტროს” მწირი აქვს. გვაქვს მოლაპარაკებები საქართველოში არსებულ მედიაჯგუფებთან, რომ მათი ბაზები იქნას რაღაც ფორმით გამოყენებული.... ვიზიტები ლონდონშიც, პარიზშიც და ვენაშიც უკავშირდებოდა იმას, რომ მოვლაპარაკებოდი ისეთ ადამიანებს, რომელთან აქვთ საშუალება, რომ ამ და შემდგომ ეტაპზე იყვნენ ჩვენი პარტნიორები. ჯერჯერობით მე პასუხი არ მიმიღია. საუბარი შედგა ირაკლისთან და მე ველოდები დადასტურებას, არის თუ არა მზად ხალვაში დასახმარებლად. ლონდონში ისევე, როგორც პარიზში საუბარი მქონდა ის პოლიტიკოსებთან, რომლებიც თავიანთი წარსულით დაკავშირებუი არიან საქართველოსთფან და ასევე განხილა, იმის, თუ შეიძლება როგორ დავაკაომპლექტოთ საერთაშორისო ბორდი და მივიღე რამდენიმე ადამიანის თანხმობა ბორდის წევრობაზე”, - აღნიშნავს გამოცემის კორესპონდენტთან საუბრისას ეროსი კიწმარიშვილი.

“მე პოლიტიკური ძალებისგან დაფინანსება არ მიმიღია. თუ დაფინანსება არის გამჭვირვალე, ნებისმიერ ძალას აქვს უფლება, დააფინანსოს მისთვის მისაღები აქტივობა. რაც შეეხება ოპონენტებს, ამაზე თუ რამე დისკომფორტი ექმნებათ და მე კანონს ვარღვევ, არსებობს სასამართლო. ასევე ძალიან მაინტერესებს ყველა სხვა დანარჩენი ტელევიზიების დაფინანსების წყაროები, რომელზეც მედიას არ უჩნდება კითხვები, განსაკუთრებით იმ ტელეარხებს ვგულისხმობ, რომელსაც ლიცენზიაც კი არ ჰქონდა და რამდენიმე წელია, მაუწყებლობს. “ალანია” არავინ იცის საიდან ფინანსდება, გაუგებარია, რით ირჩენს თავს “რეალ-ტვ”, ასევე “რუსთავი 2”-ის დაფინანსების ზოგიერთი მექანიზმი, “იმედის” ფინანსური მდგომარეობა”, - განაგრძობს გამოცემის რესპონდენტი.

“არავისთან არ მაქვს დაპირისპირება. ძალიან საქმიანი მოლოდინი არსებობს იმ ჯგუფთან, რომელთანაც ვიწყებ მუშაობას, რაც შეეხება გაჩეჩილაძის გადაცემას, მას ვთხოვე, რომ დაეხურა, რადგან მიდიოდა რეორგანიზაცია. შემდგომ პერსპექტივებს რაც შეეხება, ჩართავთ ტელევიზორს და გაიგებთ. თუ იქნება ამ გადაცემის მიმართ ინტერესი, მივიღებთ ერთობლივ გადაწყვეტილებას და თუ არ იქნება სურვილი, საწინააღმდეგო გადაწყვეტილებას. არ ფვიქრობ, რომ ამ თვალსაზრისით რამე დისკომფორტი შემეტმნება ან მე ან გია გაჩეჩილაძეს”, - დასძენს გამოცემის რესპონდენტი.

“ხოლო “მაესტროს” სარედატციო დამოუკიდებლობას რაც შეეხაბ, მთავარი გარანტი არის სამეთვალყურეო საბჭო, რომლის შექმნაზეც საუბარი მქონდა და რომელიც იქნება უცხოელებისგან დაკომპლექტებული. ასევე ადგილობრივი საბჭო, რომლის დაკომპლექტებაც სამოქალაქო სექტორს შევთავაზე და ის მოახდენს ფინანსური გამჭვირვალობის ზედამხედველობას. თავაზობთ იმ ადამიანებს, რომლების სახოგადოებრივ მაუწყებელში კენჭს იყრიან, თუ მათ არ დაამტკიცებენ, იყვნენ “მაესტროს” სამეთვალყურეო საბჭოს წევრები. ეს იქნება სახალხლ ტელევიზია, რომელიც ხალხის ფულით კეთდება”, - აცხადებს ეროსი კაწმარიშვილი და შეკითხვას - “რეგიონულ მაუწყებლებთან მიდის მოლაპარაკება?” - პასუხობს:

“რეგიონული მაუწყებლობის მდგომარეობა მოგეხსენებათ. მათ მიმართ ხელისუფლების წნეხი და დაშანტაჟების მცდელობა გახშირებულია. მე მაქვს რამდენიმე მაუწყებლისგან თანხმობა, მაგრამ ეს არ იქნება ცალმხრივი ურთიერთობა. ასევე გვინდა ჩამოყალიბდეს კომერციული ქსელი, რომლის ერთ-ერთი მონაწილე იქნება “მაესტრო”, მაგრამ ამ პროდუქციის პარალელურად “რუსთავი 2” იწყებს შექმნას ანალოგიური ქსელი და ჩვენ გვაქვს საქმე უთანასწორო ბრძოლასთან”.

ლადო პაპავა - “ქართული ბანკები გაკოტრებას რუსეთის აგრესიამ გადაარჩინა!”

“დიახ, ამ კრიზისს აქვს ეროვნული წარმომავლობა. 2004 წლიდან მოყოლებული ქვეყანაში შემოედინებოდა დიდძალი ოდენობით ფინანსური რესურსი, ძირითდად, პრივატიზაციების გზით. არადა, თუ ეს ფული მხოლოდ საკუთრების უფლების გადაფორმებაში იდება და არ შემოდის ახალი ტექნოლოგიები, რ იხსნება ახალი წარმოებები, მაშინ აღნიშნული ფინანსები არაფრის მაქნისი და უარყოფითი ეფექტის მატარებელია”, - აცხადებს ექსპერტი, ეკონომიკურ მეცნიერებთა დოქტორი, პროფესორი ლადო პაპავა გაზეთ “ასავალ-დასავალისთვის” მიცემულ ინტერვიუში, სათაურით ლადო პაპავა: რუსეთის აგრესია რომ არა, ლარის სტაბილურ კურსს ვერ შევინარჩუნებდით!

“მეორეც: კრიზისის საფუძველი იყო სამშენებლო სექტორში ჩადეული ფული. აღარაფერს ვამბობ იმ უხარისხო მშენებლობებზე, რომლითან თბილისი დაამახინჯა არაერთმა სამშენებლო კომპანიამ. საუბარი სხვა რამეზეა - ბანკები აძლევდნენ სესხებს, როგორც სამშენებლო კომპანიებს, ასევე კერძო პირებს და ეს სესხები ხმარდებოდა ჰაერის შეძენას. იყიდებოდა მშენებარე სახლის მე-1 სართული, მაშინ როცა საძირკველიც არ იყო ჩაყრილი. შეიქმნა ფინანსური პირამიდები, რაც იყო კრიზისის ერთ-ერთი საფუძველი. უნდა ითქვას, რომ ჩვენთან საკრედიტო რესურსის ძირითადი წყარო იყო არარ დაგროვება, არამედ ევროპული ფინანსური ბაზრებიდან საკრედიტო რესურსის მოზიდვა. ანუ ჩვენი ბანკები იღებდნენ სესხებს ევროპული ბანკებიდან და უფრო მაღალ ფასად აძლევდნენ მას ჩვენს მოქალაქეებს”, - აღნიშნავს გამოცემის კორესპონდენტთან საუბრისას ლადო პაპავა.

“ამ საკრედიტო რესურსს ჩვენი ბანკები განათავსებდნენ ორ სექტორში. ერთია მშენებლობა, სადაც შეიქმნა ფინანსური პირამიდები და მეორე, ეს გახლდათ სამომხმარებლო კრედიტი. ჩვენი ბანკები აკრედიტებდნან ტელევიზორების, მაცივრების, მობილურების განვადებით შესყიდვას. არც მობილური, არც ტელევიზორი, არც მაცივარი საქართველოში არ იწარმოება - ანუ, პრაქტიკულად ბანკები საკრედიტო რესურსით აკრედიტებდნენ იმპორტს... ამ ომმა ჩვენ უარყოფითის გარდა პოზიტივიც მოგვა, რასაც მე ვეძახი ომის პარადოქსს. რუსეთის აგრესია რომ არა, გლობალური ფინანსური კრიზისის პირობებში, როცა თავისუფალი ფინანსური რესურსები ძალიან მცირეა და ძალიან ძვირი ღირს, საქართველოს დახმარებას არავინ გაუწევდა. თანაც იმ 4 მილიარდიდან, რომელიც ჩვენს ქვეყანას, როგორც დაზარალებულს გამოეყო, 2 მილიარდი არის გრანტი ანუ საჩუქარი”, - აცხადებს ლადო პაპავა და შეკითხვას - “კონკრეტულად რაში დაგვეხმარა ეს 4-მილიარდიანი დახმარება? ხალხს უკვირს, რომ ეს დახმარებები მოსახლეობის ჯიბეებზე არ აისახება...” - პასუხობს:

“არაერთხელ მითქვამს, თუ როგორ აყალბებს ინფორმაციას სტატისტიკის დეპარტამენტი პოლიტიკური მიზნებიდან გამომდინარე. ამ გაყალბების მიუხედავად, 6 თვის მონაცემების მიხედვით, საქართველოს მთლიანი შიდა პროდუქტის 10 პროცენტზე მეტი ვარდნაა. ამ ვარდნას ვიგრძნოდით ძალიან მძიმედ, ეს დახმარება რომ არ იყოს, სწორედ ამით არის შენარჩუნებული ლარის გაცვლითი კურსის სტაბილურობა და ამ თანხით გადაიხადეს ბანკებმა ის ვალები, რომელიც ევროპული ბანკებისთვის უნდა გადაეხადათ 2009 წლის აპრილში. ეს დახმარება რომ არა, ჩვენი ბანკები გაკოტრდებოდნენ. ჩვენმა ბანკებმა აიშორეს საბანკო კრიზისები, მაგრამ ეს მათი სწორი მენეჯმენტის დამსახურება კი არა არის, არამედ, რაოდენ საოცარიც უნდა იყოს, რუსეთის აგრესიის დამსახურებაა”.

http://www.interpressnews.ge/ge/index.php/...ink/119891.html

ლ ი ც ი · December 15, 2009

ირინა სარიშვილმა "სიმართლის დროს" მახე ამოხსნა

09:16 / 15-12-2009

გადაცემა "სიმართლის დროს" კვალდაკვალ კიდევ ერთი სკანდალი აგორდა. ირინა სარიშვილი ერთადერთი პოლიტიკოსი აღმოჩნდა, რომელმაც ამ გადაცემაში მონაწილეობა თავად ისურვა და ითამაშა კიდეც. გადაცემაში მისი მონაწილეობის მთავარი მიზანი იყო, დაესვათ შეკითხვა, რომელიც გაარკვევდა, შედგა თუ არა 4 მაისის ყბადაღებული შეთქმულება, რომელიც სახელმწიფო გადატრიალებას გეგმავდა და რომლის გამოც ირინას რამდენიმე თანამოაზრე დღეს სასჯელს იხდის, თუმცა მოვლენები სხვაგვარად განვითარდა, მეთერთმეტე კითხვამ, "თვლით თუ არა, რომ იგორ გიორგაძესთან ალიანსი სამშობლოს ღალატია", ირინა 400 ლარის ამარა დატოვა. მოთამაშემ ამ თანხაზეც უარი განაცხადა და გადაცემაშივე აღნიშნა, რომ ამ შეკითხვის პასუხი გაუყალბეს.

როცა ირინას ინტერვიუსთვის დავურეკე და მოვიკითხე, მიპასუხა, როგორ ვიქნები, "კაგებეს" აგენტი და მოღალატეო. თავად მიაჩნია, რომ ამ გადაცემამ მას მორალური გამარჯვება მოუტანა, მაგრამ ამდენი მორალური გამარჯვებით უკვე დაიღალა. ზემოთ ხსენებული გადაცემის ეთერში გასვლამდე პოლიტიკოსმა პრესკონფერენცია მოიწვია და საზოგადოებას დარღვევის შესახებ ამცნო. თავის მხრივ "იმედიც" არ დარჩა ვალში. როგორც აღმოჩნდა, ქალბატონმა ირინამ გადაცემის ეთერში გასვლამდე შეკითხვების გახმაურებით კონტრაქტის ერთ-ერთი პუნქტი დაარღვია და ამისთვის 50 ათასი ლარი ჯარიმა უნდა გადაიხადოს.

- გადაცემის ეთერში გასვლამდე გავახმაურე მისი შინაარსი, რის გამოც ტელეკომპანია "იმედი" ცდილობს, პასუხისმგებლობა და 50 ათასი ლარი ჯარიმის გადახდა დამაკისროს. საინტერესოა, ამას როგორ მოახერხებენ.

- თქვენ ალბათ გაეცანით კონტრაქტის პირობებს, სანამ გადაცემაში მონაწილეობას მიიღებდით...

- რასაკვირველია, გავეცანი და ამავე კონტრაქტში ეწერა ისიც, რომ ჩემ მიმართაც უნდა იყოს დაცული კონტრაქტის პირობები. ასე რომ, მათ პასუხის გაყალბების უფლება არ ჰქონდათ. და პასუხი რომ გაყალბებული იყო, ამას ნებისმიერ სასამართლოში დავამტკიცებ. ეს საქმე ძალიან შორს წავა, იმიტომ, რომ ლაპარაკია პოლიტიკურ შეკითხვაზე და რაც მთავარია, საკუთარი მოსაზრების საფუძველზე უნდა გამეცა პასუხი შეკითხვაზე, რომელშიც "ჩამჭრეს".

- ამ გადაცემაში ყველა შეკითხვაზე საკუთარ აზრს აფიქსირებ, ასე არ არის?

- მართალია და სწორედ ჩემს აზრს მეკითხებოდნენ პირველ შეკითხვაში, ვარ თუ არა პატრიოტი და გულწრფელად მიყვარს თუ არა საქართველო. საინტერესოა, თუ მე ერთი ქვეცნობიერი მაქვს და ქვეცნობიერი თირკმელი არ არის, ორ-ორი რომ გვქონდეს, რატომ გრძნობდა თავს მშვიდად ჩემი ქვეცნობიერი, როცა ვამბობდი, პატრიოტი ვარ-მეთქი და რატომ ანერვიულდა მაშინ, როცა მე, როგორც პატრიოტმა ჩავთვალე, რომ გიორგაძესთან ალიანსი არ არის საქართველოს ღალატი?.. სწორედ აქ გაირკვა დამკვეთთა უტვინობა. მე მივხვდი, რაც მოხდა, პირველი შეკითხვით მათ "მიყიდეს". ბავშვი ხომ აღარ ვარ.

- დამკვეთებში ვის გულისხმობთ?

- ადვილი წარმოსადგენია, რა მოხდებოდა იმ შემთხვევაში, ამ შეკითხვაზე დეტექტორის პასუხი დადებითი რომ ყოფილიყო. ეს იქნებოდა ამ ადამიანთან ურთიერთობის გარკვეული ნებართვა, ხალხი ჩათვლიდა, რომ ამ ადამიანთან ურთიერთობა არ არის სამშობლოს ღალატი. სწორედ ამის შეეშინდათ და ცუდია, რომ შეეშინდათ. მესმის, რომ ხელისუფლებას არ სურს იგორ გიორგაძის რეაბილიტაცია სიტყვიერ დონეზეც კი, მაგრამ ამით სწორედ მის წისქვილზე დაასხეს წყალი. გადაცემა საკმაოდ კარგად მიდიოდა.

ყველამ ნახა, რომ იმ შეკითხვებზე, რომლებიც ჩემს პირად ცხოვრებას ეხებოდა, გულწრფელად ვუპასუხე და გადაცემის მაყურებელს ისეთი შთაბეჭდილება დარჩა, თითქოს მე ღია ვაჭრობა გამიმართეს. ანუ, გინდა 4 ათასი ლარი? მაშინ გასწირე შენი თანამოაზრე, თქვი ის, რასაც რეალურად არ ფიქრობ. მართლაც რომ ასე მოვქცეულიყავი, როგორ მოვიდოდა ერთმანეთთან თანხვედრაში პირველი და მეთერთმეტე შეკითხვის პასუხები?! გული მწყდება იმაზე, რომ ძალიან გამოიდო თავი ვინმე ნოემ, რომელიც ამ გადაცემის პროდიუსერი ყოფილა. რა უნდა ამ ნოეს, ვერ ვხვდები. არავის არ ვეხები, არც ღრმად პატივცემულ ნოეს და არც არავის. ლაპარაკია პოლიტიკურ დაკვეთაზე. მისგანაც ისეთი რაღაცები მოვისმინე, ალბათ ვერც ხვდება, რას ამბობს. პოლიტიკურ შეფასებას აძლევს იქ განვითარებულ მოვლენებს. სარიშვილს პოლიტიკური შოუს გაკეთება მოუნდა და ამიტომ გააკეთა ესო.

მე არც ამ გადაცემით მომიხვეჭია სახელი და ვერც ეს გადაცემა დამაკარგვინებს ვერაფერს. პირიქით, ეს გადაცემა ჩემ სასარგებლოდ მუშაობს, მე ვატყობ ამას, ხალხის რეაქციების მიხედვით. უბრალოდ, სირცხვილია, როგორ შეიძლება, აბსოლუტურად არაპოლიტიკური შოუ პოლიტიკურ ანგარიშსწორებად გადააქციო. ამ გადაცემებს დიდი ხანია ვაკვირდები. ფაქტებზე ვერ გედავებიან, ფაქტზე ქვეცნობიერი ვერაფერს გახდება, ათი წლის მერეც რომ დადასტურდეს, რომ შენ მართალი იყავი, დიდი ჯარიმის გადახდა მოუწევთ ამ გადაცემის ქართველ ავტორებს. აქ დავა მიდის შეგრძნებებზე, რასაც ვერ დაამტკიცებ და ამ დავაშიც კი დარღვეულია კონტრაქტის პირობები.

მე არ ვიცი, რატომ არიან ჩუმად სხვები, შეიძლება 400 ლარის ან იმ საშიშროების გამო, რომ 50 ათასი ლარი ჯარიმა არ დააკისრონ და შემდეგ სასამართლოს წესით არ მოსთხოვონ. არ ვიცი, ვის რა უღირს სიმართლე. ოღონდ ის სიმართლე არა, რასაც ეს გადაცემა ემსახურება. მე კარგად ვიცი, რომ 100 ათასი ლარის წამოღება შემეძლო იქიდან. მე ამ გადაცემის მახე ამოვხსენი. ფსიქოლოგები რომ მესაუბრებოდნენ, თავადაც მიხვდნენ, რომ ჩემი გამოჭერა აბსოლუტურად შეუძლებელი იყო...

- ხომ არ ნანობთ ამ გადაცემაში მონაწილეობას?

- არა, არც ერთი ისეთ თემაზე არ მისაუბრია, რაც ჩემმა მეგობრებმა არ იციან ან საერთოდ სხვებმა არ იციან.

- პირადად ჩემთვისაც არაფერი იყო ახალი, თითქმის ყველა კითხვის პასუხი ვიცოდი თქვენთან ჩაწერილი გულახდილი ინტერვიუებიდან...

- და თან ჩვენ არ ვართ მეგობრები. ასე რომ, არც არავისთვის ყოფილა რამე ახალი. დეტექტორზე რომ ჩემთვის არასასიამოვნო კითხვა დაესვათ, არ მივიღებდი გადაცემაში მონაწილეობას. სხვათა შორის, გარკვეული პირობებით მივედი ამ გადაცემაში და ეს, მგონი, ყველას შეუძლია. ჩემი პირობა ასეთი იყო - არ შეეხოთ სხვა ადამიანების პირადულს, მაგრამ ჩემზე, რაც გინდათ, მკითხეთ.

- თუმცა ერთი სიახლე მაინც იყო, როცა აღიარეთ, რომ ზვიად თავაძეს სიყვარულით არ გაჰყოლიხართ...

- იმავეს გიპასუხებთ, რაც ნანკას ვუთხარი, ალბათ მაშინ ასეთ ხასიათზე ვიყავი. ჩვენ ოთხი წელი ვიყავით ერთად და ორწლიანი ურთიერთობის მერე შევუღლდით. როცა ცოლად გავყევი ზვიადს, სიყვარულს აღარ ვგრძნობდი.

- მაშ რატომ გაჰყევით?

- ამას მაინც დავიტოვებ ჩემთვის.

- კი გაამხნევეთ ტელეეკრანიდან: ხომ არ დაურეკავს გადაცემის შემდეგ?

- არა, როგორც პრესის ფურცლებიდან შევიტყვე, ზვიადს მიაჩნია, რომ ახლა იპოვა ნამდვილი სიყვარული. აქედან გამომდინარე, არა მგონია, სწყენოდა ეს ახალი ამბავი.

- თუ მოხდა ისე, რომ ვერ მოიგეთ სასამართლო პროცესი და დაგაკისრეს ზემოთ ხსენებული ჯარიმა, რას იზამთ?

- საინტერესოა, როგორ გადამახდევინებენ. ხელფასი არა მაქვს. საკუთრება, რომელიც 10 ლარსაც აღემატება, არ მაქვს. სიმართლის გამო ციხეში თუ ჩამსვამენ, არ ვიცი. მე პირიქით მგონია, მათ მოუწევთ თანხის გადახდა. იმაზე მეტს არ ვითხოვ, რაც უნდა მომეგო - 100 ათასი ლარი მეკუთვნის და უნდა გადამიხადონ. თვითონ არ ვაპირებ აქტიურობას, ამის დროც არ მაქვს. "ტელეიმედმა" უნდა აღძრას საქმე, რადგან მე მთვლიან დამრღვევად და როცა გარკვეულ პროცედურას გაივლის ეს ყველაფერი, მე მაქვს საკმაოდ საფუძვლიანი შემხვედრი პასუხი. ამ გადაცემის მესვეურებს არ ვურჩევ ამ საქმის გაღრმავებას, ვინაიდან ისეთ დარღვევებზე იქნება საუბარი, რაც მარტო ჩემ მიმართ არ განხორციელებულა.

- რას გულისხმობთ?

- მესამე პუნქტში წერია, რომ ექსპერტმა, რომელიც ტესტირებას გიტარებს, შენი პასუხები სამ კატეგორიად უნდა დაყოს: ტყუილი, სიმართლე და არადამაჯერებელი. ამ უკანასკნელ კატეგორიაში მოხვედრილი პასუხების შესაბამისი შეკითხვები გადაცემაში არ დაიშვება. ეს არ მეხება კონკრეტულად მე, მაგრამ ეხება შეკითხვას, "შეჭამდი თუ არა ადამიანის ხორცს". ვისაც უნდა დაუსვა ეს შეკითხვა, თუ ის კანიბალი არ არის, არანაირად არ შეიძლება, ადამიანის ხორცის ჭამის სურვილი გაუჩნდეს. ლენინგრადის ბლოკადაშიც იყო ხალხი, რომელმაც არ ჭამა ადამიანის ხორცი. იმის თქმა მინდა, რომ არის შეკითხვები, რომელზეც პასუხი თავადაც არ იცი. შენი მთავარი ვალდებულებაა, არ თქვა ტყუილი, ამ შემთხვევაში ტყუილს, ადამიანის ხორცს არ შევჭამდიო, იტყვის მხოლოდ კანიბალი, რომელიც გადაცემის შემდეგ წავა და ადამიანის ხორცით ივახშმებს.

- თქვენ ამ გადაცემას უყურებდით, იცოდით, რა ტიპის შეკითხვებს დაგისვამდნენ, მაგრამ მაინც მიხვედით...

- იმიტომ, რომ ვიცოდი, სად შეიძლებოდა დაეგოთ მახე, პოლიტიკურ მახეზე არ მიფიქრია. ის, რაც მათ გააკეთეს, პოლიტიკურად მაწყობს. ვინც ეს გადაცემა ნახა, ყველა მშვენივრად მიხვდა, რომ ჟარგონზე რომ ვთქვათ, "გამიჩალიჩეს". როცა პირად თემებს ეხებოდნენ, იქ კარგად ვიცოდი, რა უნდა მექნა. უარყოფითი პასუხები ამიტომაც გავეცი.

- კარგად "გამოძვერით" იმ კითხვიდან, როცა ახსენით, რატომ არ ფიქრობთ ყოველთვის საქართველოზე...

- არაფერი არ მქონდა "გამოსაძრომი". როცა ფსიქოლოგებმა ეს კითხვა დამისვეს, მათაც ვუთხარი, თუ გაინტერესებთ, ვემსახურები თუ არა სხვა ქვეყნის ინტერესებს, პირდაპირ მკითხეთ და გიპასუხებთ, რომ არა. ასეთ ზოგად კითხვაზე, სულ ვიცავ თუ არა საქართველოს, რა თქმა უნდა, უარყოფითი პასუხი მექნებოდა. არ ვფიქრობ საქართველოზე, როცა "ზაგარს" ვიღებ, როცა, უკაცრავად და ტუალეტში ვარ. ამ კითხვაზე დადებითი პასუხი რომ გამეცა, აუცილებლად გამომიჭერდნენ.

- იცით რა მაინტერესებს, თუ კონტრაქტის პირობები იცოდით, რას გიწყვეტდათ ის ერთი დღე, მეორე დღეს მოგეწვიათ პრესკონფერენცია...

- ვიცოდი, მაგრამ სპეციალურად მოვიქეცი ასე.

- რატომ, 50 ათასი ლარით რომ დაეჯარიმებინეთ?

- ვერავინ ვერ გადამახდევინებს მაგ თანხას. მე შევქმენი პრეცენდენტი, რომ არ შეიძლება გაჩუმება, როცა ასე უსინდისოდ გატყუებენ. არანაირ 400 ლარად არ უნდა გაყიდო თავი, რაც უნდა გიჭირდეს. ჩემთვის 400 ლარსაც დიდი მნიშვნელობა აქვს, დამიჯერეთ. ეს ყველაფერი მათ მშვენივრად იცოდნენ. თუ მაინც ამ შეკითხვით უნდოდათ ჩემი "ჩაგდება", ცოტა მერე დაესვათ, მე 100 ათასამდე გაჩერებას არ ვაპირებდი. შოუ მაინც ეჩვენებინათ ხალხისთვის. მგონი, შეეშინდათ, რომ 4 ათას ლარს ავიღებდი და დაუმარცხებელი წავიდოდი სტუდიიდან. სხვა დასკვნას ვერ ვაკეთებ.

- რა მოხდა გადაცემის შემდეგ?

- იყო სიტყვიერი შელაპარაკება, ოღონდ რბილად. ნანკას, ბუნებრივია, ვერ მოვთხოვდი პასუხს, ის ჩემზე მეტად იყო გაოგნებული ამ ყველაფრით. მას ჩემზე მეტად აინტერესებდა გადაცემის გაგრძელება. მგონი, ყველაზე მხიარული მონაწილე ვიყავი ამ თამაშში. თვალები არ მიტრიალებია, ცივი ოფლი არ მასხამდა და არც პულსს ვისინჯავდი წამდაუწუმ.

- რატომ ფიქრობთ, რომ არ იქნებოდით კარგი პრეზიდენტი?

- მე ასე ვფიქრობ, შეიძლება, ვინმე სხანაირად ფიქრობს, რაშიც ძალიან მეპარება ეჭვი (იცინის).

- მაშ, რატომღა მიიღეთ მონაწილეობა საპრეზიდენტო არჩევნებში?

- ყველაზე მხიარულად იმ საპრეზიდენტო არჩევნების დროს ორი კანდიდატი ვგრძნობდით თავს - მე და მიშა სააკაშვილი. ზუსტად ვიცოდით ორივემ, როგორ დამთავრდებოდა არჩევნები. მე მაშინ პოლიტიკური ეთერის პრობლემა მქონდა და ეს ორი თვე "ვიგრიალე" სატელევიზიო ეთერში, ვილაპარაკე, რასაც ვფიქრობდი, მაგრამ ერთი მოწოდებაც არ გამიკეთებია, ხმა მომეცით-მეთქი. ჩემი საარჩევნო კლიპიც დამდეგი შობა-ახალი წლის მილოცვა იყო და სხვა არაფერი.

- თქვენმა შვილებმა თუ გიყურეს ახლა, თუ განიცადეს ეს ყოველივე?

- განცდა ჰქონდათ იმ მხრივ, რომ ეგონათ, დედიკო ხელდამშვენებული დაბრუნდებოდა სახლში და საჩუქრებს მოუტანდა (იცინის). სხვათა შორის, ამ გადაცემით კიდევ ერთხელ დავინახე, რა არაჩვეულებრივი მეგობრები და არაჩვეულებრივი შვილები მყავს. დიდი ხანია ასეთი გვერდში დგომა არ მიგრძნია, ალბათ მსგავს სიტუაციაში არ ვყოფილვარ და იმიტომ. თითქოს მაკლდა სითბო და მივიღე. სიმართლე გითხრა, ყელში ამომივიდა ამდენი მორალური გამარჯვება, მაგრამ ალბათ მოვა დრო და მხოლოდ მორალური არ იქნება ჩემი გამარჯვება.

ჟურნალი "რეიტინგი"

ლ ი ც ი · December 15, 2009

ევროკავშირი აფხაზეთის ე.წ. საპრეზიდენტო არჩევნებს არ აღიარებს

15 / 12, 2009 10:42

ევროკავშირი აფხაზეთის ე.წ. საპრეზიდენტო არჩევნებს არ აღიარებს. ამის შესახებ ევროკავშირის ოფიციალურ ვებგვერდზე გამოქვეყნებულ განცხადებაშია ნათქვამი.

განცხადებაში აღნიშნულია, რომ ევროკავშირმა მიიღო ინფორმაცია 12 დეკემბერს საქართველოს ტერიტორიაზე - აფხაზეთში ჩატარებული “საპრეზიდენტო არჩევნების” შესახებ.

”ევროკავშირი არ აღიარებს საკონსტიტუციო და სამართლებრივ ჩარჩოებს, რომელთა ფარგლებშიც ეს არჩევნები ჩატარდა. ევროკავშირი კვლავ მხარს უჭერს საქართველოს ტერიტორიულ მთლიანობასა და სუვერენიტეტს, რომელიც საერთაშორისო სამართლით არის აღიარებული”, - ნათქვამია განცხადებაში.

http://www.interpressnews.ge/ge/index.php/...l&hd_line=1

აშშ აფხაზეთის ე.წ. საპრეზიდენტო არჩევნებს არ აღიარებს

15 / 12, 2009 10:54

ამერიკის შეერთებული შტატები აფხაზეთის ე.წ. საპრეზიდენტო არჩევნებს არ აღიარებს. ამის შესახებ სახელმწიფო დეპარტამენტის წარმომადგენლის იან კელის ოფიციალურ განცხადებაშია ნათქვამი, რომელიც დეპარტამენტის ოფიციალურ ვებგვერდზე გამოქვეყნდა.

“შეერთებული შტატები წუხს 12 დეკემბერს საქართველოს რეგიონში – აფხაზეთში “არჩევნების” ჩატარების გადაწყვეტილების გამო და არ აღიარებს ამ არჩევნების არც კანონიერებას და არც შედეგებს. შეერთებული შტატები ადასტურებს საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობისადმი მხარდაჭერას", - ნათქვამია კელის განცხადებაში.

სოხუმის რეჟიმმა ე.წ. საპრეზიდენტო არჩევნები 12 დეკემბერს ჩაატარა. დე-ფაქტო არჩვენებში 61,16%-ით სერგეი ბაღაფშმა გაიმარჯვა.

http://www.interpressnews.ge/ge/index.php/...l&hd_line=1

ლ ი ც ი · December 15, 2009

15 / 12, 2009 12:23

H1N1 ვირუსის შედეგად საქართველოში სამი ადამიანი გარდაიცვალა.

ე.წ. ~ღორის გრიპის~ ვირუსის შედეგად თბილისში ორი, ბათუმში კი ერთი ქალბატონი გარდაიცვალა.

თბილისელი ქალბატონებიდან ერთი ღუდუშაურის კლინიკაში მკურნალობდა. ფეხმძიმე ქალს საკეისრო კვეთა ჩაუტარდა. ბავშვის სიცოცხლეს საფრთხე არ ემუქრება, თუმცა დედა გარდაიცვალა.

42 წლის ირმა ბენაშვილი კი ინფექციურ საავადმყოფოში მიყვანიდან მეორე დღეს დაიღუპა. ექიმების განცხადებით, ორივე პაციენტმა დაგვიანებით მიმართა კლინიკას, რის შედეგადაც ორმაგი პნევმონია და დაავადების შემდგომი გართულებები განუვითარდათ.

ბათუმში გარდაცვლილმა ქალბატონმა ასევე რამდენიმე დღის დაგვიანებით მიმართა ექიმს. სამივე პაციენტი მართვით სუნთქვაზე იმყოფებოდა.

H1N1 ვირუსით საქართველოს სამი მოქალაქის გარდაცვალების შესახებ ჯანდაცვის სამინისტრო იუწყება.

http://www.interpressnews.ge/ge/index.php/...l&hd_line=1

ლ ი ც ი · December 15, 2009

ქართული პრესის მიმოხილვა 15.12.2009

15 / 12, 2009 11:37

• რა ურჩიეს ექსპერტებმა ხელისუფლებას კონფლიქტური რეგიონების მიმართ სტრატეგიასთან დაკავშირებით

• მერაბ ბერძენიშვილის “გამარჯვების მემორიალს”, რომლის დემონტაჟი ქუთაისში 12 დეკემბრიდან მიმდინარეობს, რამდენი დღეში ააფეთქებენ

რა ურჩიეს ექსპერტებმა ხელისუფლებას კონფლიქტური რეგიონების მიმართ სტრატეგიასთან დაკავშირებით

“ოკუპირებულ ტერიტორიებთან მიმართებაში სახელმწიფო სტრატეგიის განხილვის მეორე რაუნდი “თბილისი მარიოტში” გაიმართა, სადაც რეინტრეგრაციის საკითხებში სახელმწიფო მინისტრი თემურ იაკობაშვილი და მთავრობის სხვა წარმომადგენლები 20-მდე ექსპერტს შეხვდნენ: უარი ტერმინს “ოკუპირებული ტერიტორიები”, რადგან ასე არ თვლიან სოხხუმსა და ცხინვალში და ეს მათ აღიზიანებთ; საქართველომ უნდა აღიაროს, რომ ეს არის კონფლიქტი არა მარტო რუსეთთან, არამედ ოსებთან და აფხაზებთან, რადგან ისინი თვლიან, რომ მათი იგნორირება ხდება; უნდა გააქტიურდეს ინტერნეტსაშუალებებით საინფორმაციო ომის წარმოება და ბოლოს, საქართველომ უნდა გააუქმოს აკრძალვა არაქართველი ჟურნალისტებისთვის კონფლიქტურ რეგიონებში რუსეთის მხრიდან ჩასვლაზე - ეს იყო ძირითადი შენიშვნები დახურულ შეხვედრაზე შეკრებილი ექსპერტების მხრიდან”, - წერს გაზეთი “რეზონანსი” სტატიაში სათაურით ხელისუფლება ექსპერტებთან კონფლიქტებზე მსჯელობს / “მთავარია, რომ ჩვენ ჩვენი ვუთხარით”.

“კრიტიკა გამოიწვია ტერმინების არასწორმა გამოყენებამ - აფხაზები და ოსები არ თვლიან თავს ოკუპირებულებად და არასწორია დოკუმენტში რეგიონების მუდმივად ასე მოხსენიება. შიგნით ამ ოკუპაციაზე ძალიან კორექტულად წერია და სჯობს იყოს კონფლიქტური ტერიტორია, ან უბრალოდ აფხაზეთი და ოსეთი”, - ამბობს კონფლიქტოლოგი პაატა ზაღარეიშვილი. “გამოვთქვი შენიშვნა, რომ დოკუმენტში საინფორმაციო ომის პრინციპები უნდა იყოს მოცემული. განმიმარტეს, რომ ეს ზოგადად გათვალისწინებულია და ამასთან დაკავშირებით ცალკე დოკუმენტი შეიქმნება,” - ამბობს კავკასიის საკითხებში ექსპერტი მამუკა არეშიძე და დასძენს, რომ ასევე უნდა გამარტივდეს ჟურნალისტებისთვის კონფლიქტური რეგიონებიდან საქართველოს საზღვრის გადმოლახვის საკითხი”, - აღნიშნავს გამოცემა.

“შენიშვნები ბევრი იყო, სახელმწიფო მინისტრის აპარატი ამ შენიშვნებს იწერდა. არაკორექტული იქნება ვისაუბრო - აი, რა არ ჰქონდათ გათვალისწირებული და მე ჩავაწერინე. თუკი დაწერენ დოკუმენტს, სადაც არ იქნება ჩვენი არსებითი შენიშვნები, მერე შემიძლია გავაკრიტიკო. ერთ-ერთი მთავარი შენიშვნა იყო ის, რომ დოკუმენტში საუბარია მხოლოდ ქართულ-რუსულ კონფლიქტზე, მაგრამ ამავდროულად არ უნდა გავექცეთ შიდა კონფლიქტის აღიარებას. ეს აუცილებელია. აფხაზები ელოდებიან, რომ ჩვენ ვაღიარებთ შიდა კონფლიქტს და იმას, რომ ეს მათთან არის მოსაგვარებელი. თუკი აღიარებას არ გავაკეთებთ, გამოდის, რომ აფხაზებთან და ოსებთან არ ვაპირებთ რამეს მოგვარებას, მხოლოდ გარეთ, რუსეთისკენ ვიყურებით. შიდა კონფლიქტის აღიარებით შენ ცნობ, რომ ეს შენი ტერიტორიებია და ამ კონფლიქტების მოგვარებას შიდა რესურსებითაც აპირებ. გარდა ამისა იყო ისტორიული მიმოხილვა, სადაც ყველაფერი რუსეთს ბრალდებოდა. ვთქვი, რომ ან ეს თავი მთლიანად ამოვიღოთ, ან ქართული პასუხისმგებლობაც ჩავდოთ. საკითხის დასმაში დაგვეთანხმდნენ და თქვეს, რომ გაითვალისწინებენ”, - აცხადებს გამოცემის კორესპონდენტთან საუბრისას პაატა ზაქარეიშვილი.

“იყო საუბარი, რომ რუსეთის მხრიდან ჟურნალისტები ჩადიან კონფლიქტურ რეგიონებში, მათ შემდეგ საქართველოში შემოსვლის პრობლემები აქვთ. ჟურნალისტი ინფორმაციას აგროვებს და ავრცელებს და ჩვენი ინტერესი უნდა იყოს, რომ ასეთი ადამიანები შემოდიოდნენ. რაც უფრო მეტი ჟურნალისტი შევა სოხუმში, მათზე გავლენი მეტი იქნება. ბევრი უცხოელი ცხოვრობს და მუშაობს რუსეთში და უფრო იოლია და იაფიც, რუსეთიდან შევიდეს აფხაზეთსა და ოსეთში. რადგან საქართველოს ოფიციალურად აკრძალული აქვს რუსეთის მხრიდან შესვლა, ამის გამო ძალიან ბევრი შესვლას ვერ ახერხებს. ესეც ჩაინიშნეს და გავითვალისწირებთო”, - დასძენს გამოცემის რესპონდენტი.

“ეს არის სამუშაო დოკუმენტი, ამ დოკუმენტს ფორმა აქვს მიცემული, მაგრამ შინაარსი დასახვეწია. პირველი შეხვედრა ბაზალეთზე იყო. მაშინ წინადადებები შევაჯერეთ, რომლის შეჯერების საფუძველზე შეიქმნა ეს დოკუმენტიც. ამ მეორე შეხვედრაზე უამრავი შენიშვნა ჩაიწერეს. პირველ რიგში შენიშვნა ეხებოდა ენას, რთული ენით იყო დაწერილი. ვითხოვე, რომ დეკლარაციის ნაწილი ყოფილიყო უფრო მოკლე. რაც შეეხება შინაარსს - ჩემთვის ძალიან მნიშვნელოვანი იყო ერთი თემა, რომელიც დოკუმენტში ვერ ვნახე, თუმცა მითხრეს, რომ დოკუმენტში ამის გადმოცემა არ იყო საჭირო - კერძოდ, ვთვლი, რომ სტრატეგია ვერ იქნება ეფექტური და თავის როლს ვერ შეასრულებს, თუკი სერიოზული საინფორმაციო უზრუნველყოფა არ იქნება. საინფორმაციო ომის პრინციპები უნდა იყოს მოცემული. აფხაზს და ოსს როგორ უნდა გააგებინო, შენ რა გინდა? მეორეც - აუცილებლად საჭიროა საინფორმაციო საშუალებებით გარკვეული ზემოქმედება გვქონდეს რუსულ საზოგადოებასთან. ვთვლი, რომ აქამდე შექმნილი ინტერნეტ და ბეჭდვითი საშუალებები არ იყო ეფექტური და უფრო ეფექტურად და გასაგებად უნდა გამოვიყენოთ ეს რესურსები”, - აღნიშნავს გამოცემის კორესპონდენთან საუბრისას მამუკა არეშიძე.

“რეინტეგრაციის საკითხებში სახელმწიფო მინისტრმა თემურ იაკობაშვილმა გუშინ, სასტუმრო “თბილისი მარიოტში” ექსპერტებთან ერთად განიხილა ოკუპირებული ტერიტორიების მიმართ საქართველოს სახელმწიფოს სტრატეგია. მინისტრი დაინტერესებულია, რომ ოკუპირებული რეგიონების მიმართ ახალ ხედვებზე საზოგადოებათში ფართო კონსენსუსი იყოს. დოკუმენტზე მუშაობა წლის ბოლოს დასრულდება. მანამდე იაკობაშვილს, ანალიტიკოსების შემდეგ, პოლიტიკურ პარტიებთან მოლაპარაკებების გამართვა აქვს დაგეგმილი”, - წერს გაზეთ “24 საათი” სტატიაში სათაურით სტრატეგია, რომლითაც ყველა უნდა დაინტერესდეს.

“გვქონდა შენიშვნები და წინადადებები. შეხვედრამ ძალიან კონსტრუქციულად ჩაიარა. თითოეული მონაწილე ამ დოკუმენტს სახელმწიფოებრივი აზროვნებით მიუდგა. მომავალში ალბათ დოკუმენტი დაიხვეწება და უფრო უკეთ ჩამოყალიბდება ის ხედვები, რომლებით წინა (ბაზალეთის) და ამ შეხვედრაზე წარმოადგინეს. გარკვეული ტერმინები დასახვეწია. გარდა ამისა, ვფიქრობ, არაპრაგმატულია ამ დოკუმენტში მგძნობიარე საკითხების აღნიშვნა... მქონდა ასევე განსაკუთრებული ყურადღების გამახვილება იმაზე, რომ ჩვენმა სახელმწიფომ, ჩემი აზრით, მხარი უნდა დაუჭიროს პროექტებს, რომელსაც ქართველები, აფხაზები და ოსები ერთობლივად განახორციებენ. ამ საკითხის მიმართ სახელმწიფო მინისტრის პოზიცია ჩემს მიდგომას ემთხვევა”, - აცხადებს გამოცემის კორესპონდენტთან საუბრისას ექსპერტი ირაკლი სესიაშვილი.

მერაბ ბერძენიშვილის “გამარჯვების მემორიალს”, რომლის დემონტაჟი ქუთაისში 12 დეკემბრიდან მიმდინარეობს, რამდენი დღეში ააფეთქებენ

“ქუთაისში საქართველოს პარლამენტის მშენებლობა უკვე დაიწყეს. მიხეილ სააკაშვილის მიერ გაგზავნილი მშენებლები პირველად რასაც მიადგნენ, ეს არის მერაბ ბერძენიშვილის მიერ შესრულებული მემორიალი, რომელიც სიმბოლურად ასახავს ქართველი კაცის ბრძოლას და მის კავშირს ღმერთთან, მომავალთან. გავრცელექული ინფორმაციით, მემორიალის აფეთქებას მიხეილ სააკაშვილიც დაესწრება. როგორც გუშინ “ალიასთვის” გახდა ცნობილი, ბატონმა მერაბმა იმდენად განიცადა ხელისუფლების თავხედობა, თითქოს გულის შეტევა დაემართა და საავადმყოფოში გადაიყვანეს”, - წერს გაზეთი “ალია” სტატიაში სათაურით რა რეაქცია ჰქონდა მერაბ ბერძენიშვილს ქუთაისში მისი შექმნილი მემორიალის აღებაზე?

“ტყუილია, ცუდად არ გამხდარა და ვაჟკაცურალ შეხვდა ყველაფერს, მაგრამ არ ვიცი, რა იქნებო ბოლოს. შეიძლება გული გაუსკდეს მერე. ჯერჯერობით ძალიან ვაჟკაცურად არის. უბრალოდ, გული ეტკინა - რას გადაეკიდნენ ამ ქანდაკებებს? ბულდოზერი მუშაობდა გუშინ და ანგრევდა საშინლად. ახლა მე ძალიან მაინტერესებს, ჯართად გაყიდიან თურქეთში? ის პატარა ბავშვები რომაა, ტონაა თითო. მერაბს ამ თემაზე ლაპარაკი სურს. არ დაგელაპარაკება, ნერვები ეშლება, გინდათ რომ მოკვდეს?” - აცხადებს გამოცემის კორესპონდენტთან საუბრისას მერაბ ბერძენიშვილის მეუღლე ქალბატონი კირა”, - აღნიშნავს გამოცემა.

“მოქანდაკე მერაბ ბერძენიშვილის მიერ შექმნილ გამარჯვების მემორიალს, რომლის დემონტაჟი ქუთაისში 12 დეკემბრიდან მიმდინარეობს, რამდენი დღეში ააფეთქებენ. ადგილობრივი “ახალი გაზეთი” ცნობით, ეს 21 დეკემბერს პრეზიდენტის დაბადების დღეზე მოხდება. არაოფიციალური ინფორმაციით, ამ დღეს სააკაშვილი ქუთაისში ჩასვლას გეგმავს. მონუმენტის ადგილას მალე პარლამენტის შენობის მშენებლობა უნდა დაიწყოს”, - წერს გაზეთი “რეზონანსი” სტატიაში სათაურით ბერძენიშვილის მემორიალს სააკაშვილის დაბადების დღეზე ააფეთქებენ / “არამი იყოს, ალბათ, ჩემი შრომა მაგ ქალაქისთვის”.

“გამარჯვების მემორიალის” ნგრევა და დემონტაჟი ქუთაისში უკვე რამდენიმე დღეა მიდის. ძეგლის დემონტაჟს კი კომპანია “ლიტოკონსტრუქცია” ახორციელებს. უკვე აღებულია მემორიალის წინ მდებარე ცხენოსან “მზეჭაბუკის” ქანდაკება, რომელსაც ახალგაზრდობის გამზირზე, სპორტის სასახლის შენობასთან უპირებენ გადატანას. ხოლო უშუალოდ მემორიალი განადგურდება. მემორიალი ქუთაისში 1980-იანი წლების დასაწყისში დაიდგა და იგი ფაშიზმის წინააღმდეგ ბრძოლის დიდებას მიეძღვნა”, - აღნიშნავს გამოცემა.

“საინტერესოა ის ფაქტი, რომ ძეგლის დემონტაჟს წინ უძღოდა მერაბ ბერძენიშვილის სატელევიზიო ინტერვიუ, რომელიც ერთი თვის წინ გადაიცა “კავკასიის” ეთერით და საგაზეთო მიმართვა, რომელიც “ახალ გაზეთში” გამოქვეყნდა: “მემორიალის რელიეფის ერთი ნაწილი გამოგლეჯილია! ის ჩემი გულის ნაწილია. ამიტომ ჩემი გულისტკივილი თუ მძაფრად გამოვხატე, მომიტევეთ ბატონებო... კომპოზიის ცენტრალურ ნაწილში დედის სიმბოლოა გამოსახული, რომელსაც მძარცველებმა მკერდი გამოფატრეს, გამარჯვებულ მზეჭაბუკს კი ხმალი მოახერხეს, ვაი სირცხვილო!” - ნათქვამი იყო მოქანდაკის მიმართვაში. ამ ტექსტის გავრცელების შემდეგ ქუთაისის ადგილობრივ თვითმმართველობაში ირწმუნებოდნენ, რომ ისინი ყველანაირად შეეცდებოდნენ ბერძენიშვილის ძეგლის აღდგენას, თუმცა ეს პირობა ეჭვქვეშ მას შემდეგ დადგა, რაც ქუთაისში პარლამენტის შენობის ადგილად სწორედ “გამარჯვების მემორიალის” ტერიტორია შეირჩა”, - დასძენს გამოცემა.

“ხელისუფლების წარმომადგენლები თავდაპირველად აცხადებდნენ, რომ პარლამენტის შენობა მემორიალის ტერიტორიაზე აშენდებოდა, ხოლო მოგვიანებით გაირკვა, რომ საკანონმდებლო ორგანოს ახალ საოფისე ფართს ბერძენიშვილის ძეგლი შეეწირა. ვინ მიიღო გადაწყვეტილება ძეგლის დემონტაჟის შესახებ, ამ ინფორმაციას არ ფლობენ ქუთაისის თვითმმართველობაში. ძეგლის დემონტაჟისთვის დაქირავებული მუშები “ახალ გაზეთთან” საუბრისას ამბობენ, რომ ისინი პრეზიდენტის დავალების შესაბამისად მოქმედებენ. შეგახსენებთ, რომ პრეზიდენტი 30 ნოემბერს იმყოფებოდა ქუთაისში, როდესაც ის ერთ-ერთი ოჯახში, სწორედ ავტოქარხნის დასახლებაში მივიდა. ქუთაისის მერის მოვალეობის შემსრულებელ ზაზა ნუცუბიძეს “რეზონანსის” კითხვებზე პასუხის გაცემა არ სურს და ტელეფონს თიშავს”, - წერს სტატიის ავტორი.

“რას მეუბნებით? კი მაგრამ, მე არაფერს მეკითხებიან? ქუთაისში, მეგონა იყო ხალხი, რომლებიც მე მიყვარდა და რომლებსაც ეს ძეგლი მივუძღვენი, მაგრამ თურმე მათთვის მთავარი კუჭი ყოფილა. არამი იყოს, ალბათ, ჩემი შრომა მაგ ქალაქისთვის - აი, ეს მათქმევინეს ბოლოს და ბოლოს”, - განაცხადა ბერძენიშვილმა “ახალ გაზეთთან” საუბარში. ქუთაისი კულტურის სამსახურის უფროსი გიზო თავაძე ამბობს, რომ საქმის კურსში არაა, რადგან რამდენიმე დღეა, ავად არის და რაც იქ ხდება, სხვისგან იცის...” - დასძენს სტატიის ავტორი.

http://www.interpressnews.ge/ge/index.php/...ink/120019.html