ქართული პრესის მიმოხილვა 31.12.2009 · ცესკოს თავმჯდომარის თანამდებობაზე თარხნიშვილი შესაძლოა ვაშაძემ ჩაანაცვლოს?! · როგორ “ჩაუშხამა ოპოზიციამ სააკაშვილს ახალი წელი” · მოგროვდება თუ არა პრაიმერში სამ პარტიაზე მეტი მონაწილე ცესკოს თავმჯდომარის თანამდებობაზე თარხნიშვილი შესაძლოა ვაშაძემ ჩაანაცვლოს?! “ცესკოს უფლებამოსილება ამოწურულია და უახლოეს დღეებში პრეზიდენტი ვალდებულია ცესკოს თავმჯდომარის თანამდებობაზე ორი ამ სამი კანდიდატი წარმოადგინოს. სამთავრობო კულუარებში კი უკვე იმაზე საუბრობენ, რომ თარხნიშვილის შემცვლელად სააკაშვილი გრიგოლ ვაშაძის წარდგენას გეგმავს”, - წერს გაზეთი “რეზონანსი” სტატიაში სათაურით თარხნიშვილი შესაძლოა ვაშაძემ ჩაანაცვლოს / ცენტრალურ საარჩევნო კომისიას უფლებამოსილება ამოეწურა. “ცესკოს შემადგენლობის და განსაკუთრებით ცესკოს თავმჯდომარის საკითხი იმდენად ყბადაღებული თემაა, რომ საზოგადოებისთვის არჩევნების გაყალბება ლამის პირდაპირ უკავშირდება ამ ორგანოს. შესაბამისად, იმ საკითხთა შორის, რისი გათვალისწინებაც საარჩევნო რეფორმისთვის აუცილებელ პირობად სახელდებოდა, პირველი ამ სტრუქტურის და მისი ხელმძღვანელის შეცვლა იყო. სწორედ ამიტომ, პოლიტიკური შეთანხმების საგნად ჩაითვალა ის, რომ პრეზიდენტმა თარხნიშვილის მოხსნის შესახებ გადაწყვეტილება ჯერ კიდევ რამდენიმე თვის წინ გაახმოვანა. ამ დროს საარჩევნო რეფორმაზე მომუშავე ჯგუფს არანაირი გადაწყვეტილება არ ჰქონდა მიღებული. სწორედ მაშინ ითქვა, რომ პრეზიდენტი ოპოზიციას წარუდგენდა სამ კანდიდატურას და ოპოზიცია არჩევანს ამ სამ კანდიდატს შორის გააკეთებდა”, -აღნიშნავს გამოცემა. “ამ პრინციპმა, ცხადია, მაშინვე გამოიწვია უკმაყოფილება, ვინაიდან, როგორც ამბობდნენ მთელი პასუხისმგებლობა ოპოზიციაზე გადავიდოდა და ამით რეალურად არაფერი შეიცვლებოდა. “დარწმუნებული ვარ, ერთი თარხნიშვილის ნაცვლად სამთავიან თარხნიშვილს წარმოგვიდგენენ. ეს არის ერთგვარი ხაფანგი ოპოზიციისთვის, რათა პრეზიდენტის სასურველი კანდიდატი ისე დანიშნონ, თითქოს ოპოზიციის შერჩეული იყოს და მერე ოპოზიციას შემოუტრიალონ. ამაში მონაწილეობას არ მივიღებ. ეს რომ ასე არ იყოს, მაშინ ოპოზიციას შეერჩია სამი კანდიდატი და აქედან აერჩია პრეზიდენტს, ცუდი იქნებოდა?” - კითხულობს პარლამენტარი გია ცაგარეიშვილი. მაგრამ ფაქტია, რომ კანონი უკვე მიღებულია და ცესკოს ახალი თავმჯდომარის დანიშვნის პრინციპიც გარკვეულია”, - დასძენს გამოცემა. “ცენტრალური საარჩევნო კომისიის კონკურსის წესით შერჩეულ წევრებს უფლებამოსილება პარლამენტის მიერ 28 დეკემბერს დამტკიცებული საარჩევნო კოდექსში ცვლილების პროექტის ამოქმედებისთანავე შეუწყდებათ. კანონის მიხედვით პრეზიდენტმა არა უგვიანეს 2009 წლის 30 დეკემბრისა უნდა გამოსცეს განკარგულება ცესკოს წევრების შესარჩევი კონკურსის ჩატარებისა და საკონკურსო კომისიის შექმნის შესახებ. საკონკურსო საბუთების წარდგენის ვადა კი 2010 წლის 4 იანვრიდან 8 იანვრამდე განისაზღვრება. 2010 წლის 8 იანვრიდან, არა უგვიანეს 11 იანვრისა საკონკურსო კომისიამ პრეზიდენტს ცესკოს ერთ ვაკანტურ თანამდებობაზე არანაკლებ ორი და არაუმეტეს სამი კანდიდატი უნდა წარუდგინოს. პრეზიდენტმაც ამავე ვადაში პარლამენტს ერთ ვაკანტურ თანამდებობაზე ორი კანდიდატი უნდა წარუდგინოს. პარლამენტმა კი სახელობითი კენჭისყრით ცესკოს წევრები 11 იანვირდან 7 დღის ვადაში უნდა აირჩიოს. რაც შეეხება ცესკოს თავმჯდომარეს, პრეზიდენტმა 15 იანვრამდე არასამთავრობო ორგანიზაციებთან კონსულტაციის შედეგად უნდა შეარჩიოს ცესკოს თავმჯდომარეობის სამი კანდიდატი და კომისიაში პარტიების მიერ დანიშნულ წევრებს წარუდგინოს”, - წერს სტატიის ავტორი. “წინასწარი ინფორმაციით, საარჩევნო კოდექსში ცვლილებების პროექტი 11 იანვრამდე ამოქმედდება. რაც შეეხება იმას, თუ ვის კანდიდატურას წარადგენს პრეზიდენტი, სამთავრობო კულუარებში იმაზე საუბრობენ, რომ ამ თანამდებობაზე პრეზიდენტს საგარეო საქმეთა მინისტრის დანიშვნა სურს. ცხადია, თავად გრიგოლ ვაშაძეს თანამდებობის შეცვლა ასე არ სურს, მაგრამ როგორც ამბობენ, პრეზიდენტი სწორედ მის კანდიდატურას განიხილავს. ოფიციალურად ამ საკითხან დაკავშირებით კომენტარს არავინ აკეთებს და როგორც უმრავლესობის წევრები აცხადებენ, ეს პრეზიდენტის გადასაწყვეტია და ჯერჯერობით მათ არანაირი ინფორმაცია არ გააჩნიათ. მაგრამ საქმე ის არის, რომ გრიგოლ ვაშაძის საგარეო საქმეთა მინისტრის თანამდებობიდან მოხსნის საკითხი აქამდეც აქტიურად განიხილებოდა და როგორც უმრავლესობაში ამბობენ, უახლოეს სამთავრობო ცვლილებებში საგარეო საქმეთა მინისტრის შეცვლაც იგეგმება. სამთავრობო კულუარებში გავრცელებული ეს ინფორმაცია მალე გაცხადდება, ვინაიდან პრეზიდენტს ცესკოს თავმჯდომარეობისთვის კანდიდატების წარდგენის ვადა 11 დღეში ეწურება”, - მიიჩნევს სტატიის ავტორი. როგორ “ჩაუშხამა ოპოზიციამ სააკაშვილს ახალი წელი” “გუშინ “თბილისი მარიოტში” მთელმა ქართულმა ოპოზიციამ მოიყარა თავი. რათა მხარი დაეჭირა ლაიბორისტული პარტიის ინიციატვისთვის - ეთხოვოს გაეროს, მომავალ არჩევნებში იყოს საარჩევნო პროცესის მთავარი მეთვალყურე და ლიდერი. მიმართვას ხელი მოაწერა ქართული ოპოზიციური სპექტრის უმრავლესობამ: ახალმა მემარჯვენეებმა, ბურჯანაძის დემკრატიულმა მოძრაობამ, ლევან გაჩეჩილაძის “დაიცავი საქართველომ”, ბესელიას მოძრაობამ “ერთიანი საქართველოსთვის”, ნოღაიდელის მოძრაობამ “სამართლიანი საქართველოსთვის”, მრეწველებმა, პარტია თავისუფლებამ, სალომე ზურაბიშვილის “საქართველოს გზამ”, ერთონულმა ფორუმმა, კონსერვატორებმა, ლეიბორისტებმა, მწვანეებმა, რესპუბლიკელებმა, დორდოლიანის სოციალ-დემოკრატებმა, ქალთა პარტიამ, ქართულმა დასმა, ქრისტიან-დემოკრატებმა ალასანიას თავისუფლამ დემოკრატებმადა ხალხის პარტიამ”, - წერს გაზეთი “ახალი თაობა” სტატიაში სათაურით ოპოზიციამ სააკაშვილს ახალი წელი ჩაუშხამა. “2009 წლის ბოლოს ოპოზიციამ მაინც შეძლო ეჩვენებინა საზოგადოებისთვის, რომ მას შეუძლია გაერთიანება ქვეყნისთვის მნიშვნელოვან პრინციპებზე. რაც თავისთავად დადებითი სტიმულია ბოლო დროს იმედგაცრუებული საზოგადოებისთვის. განსაკუთრებით მნიშვნელოვანია ის ფაქტი, რომ საპარლამენტო ოპოზიციამ - ქრისტიან დემოკრატებმა და ქრთულმა დასმა ასევე მოაწერეს ხელი მიმართვას გაეროსადმი, რაც მათ ოპოზიციურ იმიჯს მხოლოდ დადებითად წაადგება და უფრო მკვეთრად გამოაჩენს დანარჩენ ფსევდოოპოზიციონერებს გიორგი ცაგარეიშვილისა და კარლო კოპალიანის გარდა, რომლებმაც ასევე ხელი მოაწერეს მიმართვას. ძალიან დიდი ალბათობაა, რომ გაერო დაეთანხმება ამ მიმართვას და გაზაფხული ადგილობრივ არჩევნებს ეს ორგანიზაცია წარუძღვება. ამ ალბათობას ამყარებს ის ფაქტიც, რომ ლეიბორისტებს მიმართვის მომზადებამდე გავლილი ჰქონდათ კონსულტაციები გაეროში”, - მიიჩნევს სტატიის ავტორი. “მეტიც, მიმართვაზე ხელმოწერა ჩატარდა გაეროს მიერ რეკომენდებული ფორმატით. თუ გაერო ითავებს არჩევნების სამართლიან ჩატარებას, ხელისუფლებამ გაუჭირდება გაყალბების ტრადიციული მექანიზმების ჩართვა, თუმცა, ამავდროულად იზრდება ოპოზიციის პასუხისმგებლობაც. ამ მიმართვაზე ხელმოწერით ქართული ოპოზიცია თანხმდება მიიღოს გაეროს საბოლოო ვერდიქტი, ანუ როგორუ სოციალ-დემოურატების ლიდერმა ჟორჟოლიანმა თქვა - წაგებულიც და მოგებულიც დაეთანხმება შედეგებს. ოპოზიციაში არის ჯგუფები, რომლებიც არსებული რეჟიმის შეცვლა მხოლოდ ჯანყის საშუალებით ხედავენ, თუმცა, გუშინდელი ხელმოწერით ეს ჯგუღებიც იზღუდებიან მოქმედებაში, თუ, რა თქმა უნდა, გაერო დათანხმდება მიმართვას. ეს ფაქტი კი უდავოდ წინგადადგმული ნაბიჯია არა მარტო დიქტატურასთან დემოკრატიულ ბრძოლაში, არამედ ქართულ ქართულ ისტორიაშიც”, - წერს სტატიის ავტორი. “ოპოზიციამ პრეზიდენტს არცთუ სასიხარულო საჩუქარი გაუკეთა. ჯერ ერთი, მთელმა ოპოზიციურმა ძალამ მხარი დაუჭირა ლეიბორისტების ინიციატივას, რითაც დაანახა პრეზიდენტს, რომ ის არც ისე დაქსაქსულია, როგოცრ რეჟიმს უნდა. მეორე, ოპოზიციამ დაანახა საზოგადოებას, რომ ძირითად საკითხებში ის ერთიანია, მესამე - ოპოზიციამ დაუმტკიცა გაეროს, რომ ის, საპარლამენტოც და არასაპარლამენტოც არ ენდობა რეჟიმის მიერ ჩატარებულ არჩევნებს და მეოთხე - თავად ოპოზიცია კმაყოფილი დარჩა იმ ფაქტით, რომ მრავალფეროვნების მიუხედავად, მას აქვს საერთო საბრძოლველი. მიუხედავად იმისა, რომ რომ ეს ინიციატივა ეკუთვნის ლეიბორისტებს, დოკუმენტზე ხელმომწერ ყველა პარტიის დამსახურებაა გუშინდელი მიღწევა. ამ პარტიების მონდომებით სააკაშვილს ბედნიერი ახალი წელი ჩაუშხამდა”, - დასძენს სტატიის ავტორი. “3 თვეში გაერომ უნდა მიიღოს გადაწყვეტილება - ან ის სათავეში ჩაუდგება არჩევნებს და აპირებს პასუხისმგებლობას მათ სამართლიანობაზე, ამნ უარს ეტყვის ოპოზიციას, მაგრამ მეორე ალბათობიჩს შემთხვევაში გაერომ უნდა გშაითვალისწინოს, რომ ქართული პოლიტიკური სპექტრი ამ უარყოფით გადაწყვეტილებას მშვიდად არ შეხვდება, რადიკალიზმი გაიზრდება და ხელისუფლებას მოუწევს მზადება არჩევნების შემდგომი ვითარების ძალიან არაორდინარული განვითარებისთვის”, - დაასკვნის სტატიის ავტორი. “გუშინ სპეციალურ შეკრებაზე ოპოზიციურმა პარტიებმა გაეროს გენერალური მდივნისთვის მიმართვა შეადგინეს, რომელიც ნიუ იორკში 3 იანვრამდე გადაიგზავნება. ოპოზიცია დედაქალაქის მერის არჩევნებთან დაკავშირებით ხელისუფლებას უნდობლობას უცხადებს და საქართველოში არჩევნების ჩატარებას გაეროს ეგიდით ითხოვს”, - წერს გაზეთი “რეზონანსი” სტატიაში სათაურით ოპოზიციის წერილი პან გი მუნს / რამდენად რეალურია თბილისში ადგილობრივი არჩევნების გაეროს ეგიდით ჩატარება. “პოლიტოლოგი რამაზ საყვარელიძე უკვე გასაგზავნად გამზადებულ მიმართვას არასერიოზულს უწოდებს. “გაეროს პრინციპია ქვეყნის შიდა საქმეებში ჩაურევლობაა და რა მოტივით უნდა ჩაერიოს გაერო საქართველოს საქმეებში, რა მოტივით უნდა დაელაპარაკოს ის ხელისუფლებას? რა უნდა უთხრას - შენი ოპოზიცია არ გაღიარებსო? ოპოზიცია ხელისუფლებას არც ერთ ქვეყანაში არ აღიარებს. სხვა არგუმენტი კი ჯერჯერობით ძნელი საპოვნელია”, - აცხადებს გამოცემის კორესპონდენტთან საუბრისას რამაზ საყვარელიძე. მისივე მტკიცებით, ასეთი ნაბიჯებით ოპოზიცია გაეროს ყურადღების ნაცვლად მაქსიმუმ საქართველოს მოსახლეობის ყურადღება მიიპყროს. თუმცა, ესეც იმაში გამოიხატება, რომ მოსახლეობა ამ პოლიტიკური ძალების მიმართ საბოლოოდ დაკარგავს სერიოზულ დამოკიდებულებას”, - აღნიშნავს გამოცემა. მოგროვდება თუ არა პრაიმერში სამ პარტიაზე მეტი მონაწილე “ალიანსი საქართველოსთვის” პრაიმერში მონაწილეობას არ მიღებს და სხვა ოპოზიციურ პარტიებს პრაიმერის ნაცვლად, შეთანხმების საფუძველზე ერთი კანდიდატის ირგვლივ გაერთიანებას სთავაზობს. პრაიმერის ინიციატორი პარტიები კი ერთ კანდიდატზე შეთანხმების იდეას არარეალურს უწოდებენ და ამბობენ, რომ პრაიმერის აუცილებლობაში “ალიანსიც” მალე დარწმუნდება. ამის პარალელურად ინტერპარტიულმა ჯგუფმა უახლოეს მომავალში, შესაძლოა, საზოაგდოებას წინასწარი არჩევნების მოდერნიზებული ვარიანტი შესთავაზოს”, - წერს გაზეთი “რეზონანსი” სტატიაში სათაურით “ალიანსის” უარი და პრაიმერის ინტერპრეტირებული გეგმა. “საუბარია პრაიმერის ჩატარებს წესზე - კერძოდ, მრეწველებთან გუშინდელ საკონსულტაციო შეხვედრაზე ზურაბ ტყემალაძემ პრაიმერის ინიციატორი პარტიის ლიდერებს წინადადებით მიმართა, რომლის მიხედვითაც სთავაზობს მხოლოდ თბილისის მერობის ერთიანი კანდიდატის გამოვლენას, ხოლო პარტიული სიებისა და პროგრამების დამოუკიდებლად წარდგენას. როგორც ტყემალაძემ განაცხადა, პარტიებს შორის იდეოლოგიურად განსხვავებული პოზიციებია, რაც ხელს უშლის ერთიან კანდიდატებზე და სიებზე შეთანხმებას. “მიუხედავად იმისა, რომ ზურაბ ნოღაიდელი დღეს ჩემი სტუმარი იყო, საზოგადოება გაქილიკებას დამიწყებს, მე და ის რომ ერთ სიაში აღმოჩნდეთ, რადგან ჩვენი პოზიციები მუდმივად განსხვავებულია”, - აღნიშნა ტყემალაძემ. ძიძიგურმა, დავითაშვილმა და ნოღაიდელმა აღნიშნეს, რომ ეს იყო პირველი კონკრეტული და საქმიანი შენიშვნა პრაიმერის ჩატარებასთან დაკავშირებით, რომელიც ოპოზიციური პარტიიდან მოისმინეს”, - აღნიშნავს გამოცემა. “ალიანსი საქართველოსთვის” ლიდერის ირაკლი ალასანიას განცხადებით, ოპოზიციური ერთობის შექმნის მიზნით პოლიტიკური კონსულტაციები უახლოეს ხანებში გაგრძელდება. “პრაიმერი ბევრ საფრთხეს შეიცავს. მისი მეშვეობით ხელისუფლებას შეუძლია ოპოზიციური დაპირისპირება გამოიყენოს. ამიტომ ვფიქრობ, საჭიროა ოპოზიციური ერთობის შექმნა, რასთან დაკავშირებითაც კონსულტაციები გაგრძელდება”, - განაცხადა ირაკლი ალასანიამ. არჩევნებს ბოიკოტს უცხადებენ “ეროვნული ფორუმი”, “ლეიბორისტები”, “მოძრაობა ერთიანი საქართველოსთვის” და “დემოკრატიული მოძრაობა - ერთიანი საქართველო”. ამ პარტიათა ლიდერები”რეზონანსთან” საუბრისას აცხადებენ, რომ არსებული გარემოს გათავალისწინებით, ვერც პრაიმერის ჩატარების აზრს ხედავენ და ვერც არჩევნებში მონაწილეობისას, თუმცა ოპოზიციური პარტიების კანდიდატებს მხარს დაუჭერენ”, - დასძენს გამოცემა. “ჩვენ 7 შეხვედრა გვქონდა უკვე პარტიებთვან და კვლავ გაგრძელდება ეს შეხვედრები და მხოლოდ ეს სამი პარტია არ დავრჩებით. დღეს ძალიან საინტერესო შეხვედრა გვქონდა “მრეწველებთან”. ზურაბ ტყემალაძემ შემოგვთავაზა პრაიმერის ინტერპრეტირებული გეგმა, რომელიც არის ძალიან მნიშნელოვანი. იმდენად მნიშვნელოვანი, რომ ჩვენ ვაპირებთ ამ გეგმაზე აქტიურ მუშაობას”, - აცხადებს გამოცემის კორესპონდენტთან საუბრისას ზვიად ძიძიგური და შეკითხვას - “კონკრეტულად რა ინტერპრეტირებული გეგმაზეა საუბარი?” - პასუხობს: “ეს არის პრაიმერის დიფერენცირების გეგმა, რომ ჩატარდეს მხოლოდ მერობის კანდიდატის პრაიმერი და დანარჩენ შემთხვევებში პარტიებს მივცეთ დამოუკიდებლად მოქმედების შესაძლებლობა. ეს მრავალასპექტიანი გეგმაა და ამას ასე უცებ ვერ მოგახსენებთ. რაც შეეხება თქვენს კიხთვას - პრაიმერთან დაკავშირებით მხოლოდ სამი პარტია ვრჩებით თუ არა, იანვრის ბოლოს გაეცემა მკაფიო პასუხი. დარწმუნებული ვარ, რომ პარტიათა რაოდენობა გაიზრდება”. http://www.interpressnews.ge/ge/index.php/...ink/121788.html
ოდითგან ასე არ მოგვდგამს ქართველებს,-ქალი და მუცელი, მუცელი და ქალი+ჩქარი ტაში