ხელისუფლებას არ უნდა ჰქონდეს იმის იმედი, რომ ოპოზიციას ერთიანი კანდიდატი არ ეყოლება, - ამის შესახებ, ჟურნალისტებს "კონსერვატიული პარტიის" ლიდერმა ზვიად ძიძიგურმა განუცხადა, რომელიც სასტუმრო "პრიმა ვერეში" არასაპარლამენტო ოპოზიციისა და სამოქალაქო საზოგადოების შეხვედრას ესწრებოდა. ძიძიგურის განმარტებით, სამოქალაქო საზოგადოების რჩევაა, რომ არჩევნებში მონაწილეობა იქნება თუ ბოიკოტი, ოპოზიცია იყოს ერთიანი. თუმცა, აქვე დასძინა, რომ ხელისუფლებას არ უნდა ჰქონდეს იმედი, რომ ოპოზიციას ერთიანი კანდიდატი არ ეყოლება. გარდა ამისა, დღევანდელ შეხვედრაზე განიხილება ქუთაისში გუშინ მომხდარი ტრაგიკული შემთხვევა, რომელსაც ოპოზიცია ბარბაროსულ აქტად აფასებს. ძიძიგურის თქმით, მიღებულია ერთიანი გადაწყვეტილება, რომ ხვალ ქუთაისში დაგეგმილ აქციას თბილისიდან ჩასული პოლიტიკური პარტიების წარმომადგენლებიც შეუერთდებიან. ქუთაისში ჩასვლას ძიძიგური თავადაც გეგმავს.