tvati

პარტია „გახარია საქართველოსთვის“ თავმჯდომარე, გიორგი გახარია, გერმანიის იუსტიციის მინისტრს, შტეფანი ჰუბიგს შეხვდა. ამის შესახებ ინფორმაცია მის სოციალურ ქსელში ვრცელდება. „შეხვედრის მთავარი თემა იყო თუ როგორ უნდა გათავისუფლდნენ პოლიტპატიმრები დროულად და როგორ უნდა მივაღწიოთ ახალგაზრდა აქტივისტებისა და ოპოზიციური ლიდერების მიზანმიმართული პოლიტიკური დევნის შეწყვეტას“, - ნათქვამია გავრცელებულ ინფორმაციაში. იპნ

გიორგი გახარია გერმანიის სოციალ-დემოკრატიული (SPD) პარტიის კონგრესს ესწრება - ამის შესახებ "საქართველოსთვის" ლიდერი სოციაურ ქსელ X-ზე წერს. როგორც გახარია აცხადებს, კონგრესის ფარგლებში, ევროპელ კოლეგებთან „ქართული ოცნების“ მიერ ოპოზიციური ლიდერების პოლიტიკურად მოტივირებული დევნის, დამოუკიდებელ მედიისა და სამოქალაქო საზოგადოებაზე ზეწოლის, ასევე პოლიტიკური პატიმრების გათავისუფლების სასწრაფო აუცილებლობის შესახებ ისაუბარა. მისივე თქმით, საუბარი აგრეთვე ჰქონდა პარტია „საქართველოსთვის“ გეგმებზეც. ცნობისთვის, გიორგი გახარია თეა წულუკიანის კომისიაზე 2 ივლისს ხელმეორედ არი დაბარებული. გახარიას გუნდში ამბობენ, რომ ექსპრემიერი სხდომას დისტანციურად ჩაერთვება, თუმცა "ქართული ოცნება" გიორგი გახარიას უფლებას არ აძლევს, საგამოძიებო კომისიას დისტანციურად დაესწროს. ტვ პირველი

სოლიდარობა მამუკა ხაზარაძეს და ბადრი ჯაფარიძეს, “ოცნების” რეჟიმის ყველა პოლიტიკურ პატიმარს , - ამის შესახებ პარტიის “გახარია-საქართველოსთვის“ განცხადებაშია ნათქვამი. „არაადეკვატურობის ზღვარზე მყოფი “ოცნება” ოპონენტებს მხოლოდ საკუთარი ძალაუფლების შენარჩუნების მიზნით უსწორდება და ამით, კიდევ უფრო იმძიმებს საკუთარ მდგომარეობას და აზიანებს ქვეყნის ეროვნულ ინტერესებს. ქართველი ხალხის ბრძოლა არ გაჩერდება. "ოცნების” რეჟიმის ყველა პოლიტიკური პატიმარი მალე იქნება თავისუფალი!“, - ნათქვამია განცხადებაში. იპნ

გიორგი გახარია მზაობას აცხადებს, კომისიაზე ისაუბროს ჩორჩანას საკითხზე 2 ივლისსაც დისტანციურად, - ამის შესახებ პარტიის „გახარია საქართველოსთვის“ აღმასრულებელმა მდივანმა, ბერდია სიჭინავამ ბრიფინგზე განაცხადა. ბერდია სიჭინავა გამოეხმაურა დროებითი საგამოძიებო კომისიის დღევანდელ განცხადებას, რომლის მიხედვითაც, კომისია გიორგი გახარიას 2 ივლისამდე აძლევს დროს, რომ ფიზიკურად გამოცხადდეს კომისიაზე და ჩორჩანას საგუშაგოს საკითხზე კითხვებს მხოლოდ ამგვარად უპასუხოს და არა, დისტანციური ჩართვით. „ოცნების“ რეჟიმი ჩორჩანაში ქართული მიწის მშვიდობიანი დაცვისთვის, მცოცავი ოკუპაციის მშვიდობიანი შეჩერებისთვის და სეპარატისტების მხრიდან კიდევ უფრო დიდ ტერიტორიებზე პრეტენზიებისგან დაცვისთვის გიორგი გახარიას უკერავს ბინძურ საქმეს, რომელიც 15 წლიან პატიმრობას ითვალისწინებს, რაც იქნება საქართველოს ეროვნული ინტერესების, სუვერენიტეტის და ტერიტორიული მთლიანობის წინააღმდეგ მიმართული უმძიმესი დანაშაული და რისთვისაც აუცილებლად დადგება ყველა მასში მონაწილე პირის სამართლებრივი და ისტორიული პასუხისმგებლობის საკითხი. დღეს ცხადია, რომ სეპარატისტული რეჟიმი და „ოცნება“ ერთი და იგივე ნარატივით საუბრობს ჩორჩანაზე. როგორც ბიბილოვი აცხადებს, ჩორჩანა არის მტკივნეული ხიჭვი სეპარატისტული რეჟიმისთვის, ახლა როგორც ირკვევა, თურმე ასეა „ოცნებისთვისაც“. როგორც ჩანს ისინი დღეს ერთი და იგივე „დიფსთეითიდან" იღებენ ინსტრუქციებს. გიორგი გახარია ერთხელ უკვე იყო კომისიაზე, სადაც ისაუბრა ჩორჩანაზე, ამის შემდეგ არაერთხელ გამოხატა მზაობა, ე.წ. კომისიის სხდომაში დისტანციურად მიეღო მონაწილეობა, რისი შესაძლებლობაც გათვალისწინებულია კომისიის დებულებით და ზუსტად ასეთი შემოთავაზება თავად კომისიისგან ერთხელ უკვე მიიღო პირველი მიწვევის დროს. ე.წ. კომისიამ მისი მუშაობის მანძილზე პირველად, თავად განაცხადა უარი მოესმინა გიორგი გახარიასთვის, როცა სხვებს ამის შესაძლებლობას აძლევს. ცხადი ხდება, რომ შეშინებული და არაადეკვატურობის ზღვარზე მყოფი „ოცნება“ თავად გაურბის ჩორჩანაზე საჯაროდ საუბარს, რადგან ცხადი გახდება ვინ ღალატობს ქართულ, ეროვნულ ინტერესებს და ჩვენი ქვეყნის ტერიტორიულ მთლიანობას. კომისიის დღევანდელი გადაწყვეტილებაც დასტურია, რომ მათ არ სურთ ჩორჩანას საქმეზე გიორგი გახარიას მოუსმინონ. 2 ივლისსაც მზაობას ვაცხადებთ დისტანციურად ვისაუბროთ ჩორჩანაზე. გიორგი გახარია და ჩვენი გუნდი ამაყობს ჩორჩანას საქმით. ეს არ არის მხოლოდ გიორგი გახარიას წინააღმდეგ პოლიტიკური ვენდეტა, ეს არის სახელმწიფოს ეროვნული ინტერესების წინააღმდეგ მიმართული უმძიმესი დანაშაული და რა დროც არ უნდა გავიდეს, საზოგადოებას ვპირდებით, რომ ამ საგამოძიებო კომისიის შემსწავლელი საგამოძიებო კომისია შეიქმნება და ვერავინ შეძლებს ჩორჩანას საქმიდან გაქცევას და დამალვას, ვერცერთი კომისია, ცრუ მოწმე თუ სამართალდამცავი“, - განაცხადა ბერდია სიჭინავამ. პარლამენტის დროებითი საგამოძიებო კომისია პარტია „გახარია საქართველოსთვის“ ლიდერ გიორგი გახარიას 2 ივლისამდე აძლევს ვადას, იმისათვის, რომ პარლამენტის საგამოძიებო კომისიაზე გამოცხადდეს. კომისიის თავმჯდომარის თქმით, 2 ივლისი არის უკიდურესი ვადა, იმისთვის, რომ გახარია გამოცხადდეს სხდომაზე. ipn

„გახარია საქართველოსთვის“ პარლამენტის საგამოძიებო კომისიაზე განცხადებას ავრცელებს. განცხადებაში აღინიშნება, რომ გიორგი გახარია ადასტურებს მზაობას, ესაუბროს კომისიას ჩორჩანას საგუშაგოს საკითხზე, დისტანციურად, სანამ საქართველოში დაბრუნდება, თუმცა კომისიისგან ეცნობათ, რომ კომისია უარს აცხადებს გიორგი გახარიას დისტანციურად გამოკითხვაზე და „დაჟინებით ითხოვს“ ორშაბათს, 23 ივნისს სხდომაზე მის ფიზიკურ გამოცხადებას, რასაც პარტიის შეფასებით, „არ აქვს არავითარი ობიექტური ახსნა“, თუ საგამოძიებო კომისია „რეალურად ჩორჩანას საკითხზე მისი მოსმენით არის დაინტერესებული“. „გვსურს, საზოგადოებას მივაწოდოთ ინფორმაცია გიორგი გახარიას ე.წ. საპარლამენტო საგამოძიებო კომისიაზე მეორედ, 2025 წლის 23 ივნისის სხდომაზე დაბარებასთან დაკავშირებით, ჩორჩანას საკითხზე. როგორც იცით, გიორგი გახარია ერთხელ უკვე წარსდგა კომისიის წინაშე 2025 წლის 14 აპრილის სხდომაზე, რომელიც 6 საათის განმავლობაში მიმდინარეობდა. კომისიას ორჯერ წერილობით ეცნობა, რომ გიორგი გახარია ამჯერადაც მზადაა, მონაწილეობა მიიღოს სხდომაში, თუმცა იმის გათვალისწინებით, რომ ის იმყოფება საზღვარგარეთ, წინასწარ დაგეგმილი ვიზიტით, გამოთქვა მზაობა, სხდომაში მონაწილეობა მიიღოს დისტანციურ, ე.წ. „ონლაინ” რეჟიმში, რასაც ერთი მხრივ, კომისიის დებულება ითვალისწინებს, მეორე მხრივ - ერთხელ უკვე თავად კომისიის მიერ იყო შემოთავაზებული აპრილში, პირველი მიწვევის ფარგლებში. მიუხედავად ამისა, კომისიისგან 22 ივნისს ოფიციალურად გვეცნობა, რომ კომისია უარს აცხადებს გიორგი გახარიას დისტანციურად გამოკითხვაზე და დაჟინებით ითხოვს ორშაბათს, 23 ივნისს სხდომაზე მის ფიზიკურ გამოცხადებას, რასაც არ აქვს არავითარი ობიექტური ახსნა, თუ საგამოძიებო კომისია რეალურად ჩორჩანას საკითხზე მისი მოსმენით არის დაინტერესებული. გიორგი გახარია, კიდევ ერთხელ, ადასტურებს მზაობას, ესაუბროს კომისიას ჩორჩანას საგუშაგოს საკითხზე, დისტანციურად, სანამ საქართველოში დაბრუნდება”, - აღნიშნულია ინფორმაციაში. იპნ

რეგიონული განვითარებისა და ინფრასტრუქტურის ყოფილი მინისტრის მაია ცქიტიშვილის განცხადებით, მინისტრობის პერიოდში მას ჰქონდა ინფორმაცია როგორც ჩორჩანას საგუშაგოს განთავსების, ასევე გზის გაყვანის საჭიროების შესახებ. შესაბამისი განცხადება ცქიტიშვილმა გენერალურ პროკურატურაში გამოკითხვის დასრულების შემდეგ მედიასთან გააკეთა. ცქიტიშვილის თქმით, ჯერ კიდევ 2019 წლის დასაწყისიდან დაწყებული იყო მსჯელობა ჩორჩანაში ბორდერიზაციის გააქტიურებასთან დაკავშირებით, ამიტომ ხელისუფლებას იმ დროისთვის არსებული საფრთხეები უკვე შეფასებული ჰქონდა, ხოლო კონკრეტული ნაბიჯები შინაგან საქმეთა სამინისტროს კოორდინაციით განხორციელდა. „ჩორჩანასთან დაკავშირებით ჰქონდათ კითხვები. ბუნებრივია, ამ საკითხთან დაკავშირებით ვალდებული ვიყავი გამეცა პასუხები. მე მაშინ ვიყავი ინფრასტრუქტურისა და რეგიონალური განვითარების მინისტრი, ჩემთვის ცნობილი იყო საგუშაგოს განთავსებასთან დაკავშირებული ინფორმაცია. ასევე გზის გაყვანის საჭიროებასთან დაკავშირებით, რადგან არსებობდა როგორც ტერიტორიების მიტაცების რისკი, ასევე ბორდერიზაციის გააქტიურებული პროცესები. ვისთან რა ფორით იყო შეთანხმებული არ ვიცი, მაგრამ ჩემთვის, როგორც ინფრასტრუქტურის მინისტრისთვის ცნობილი იყო ჯერ კიდევ მაშინ, როდესაც გზის გაყვანის პროცედურები დაიწყო. ჩორჩანაში მიმდინარე ბორდერიზაციის პროცესის ფარგლებში მსჯელობა დაიწყო ჯერ კიდევ 2019 წლის დასაწყისში. ჩვენ ყველანი ვხედავდით, რომ ბორდერიზაციის საფრთხე არსებობდა, შესაბამისად, მე ვვარაუდობ, რომ სწორედ ეს იყო საფრთხედ შეფასებული. ამის შემდეგ კი შინაგან საქმეთა სამინისტროს მიერ იყო განხორციელებული ის ღონისძიებები, რომელიც იყო“,- განაცხადა ცქიტიშვილმა. საქართველოს გენერალურ პროკურატურაში მიმდინარე გამოძიების ფარგლებში უკვე გამოიკითხნენ: საქართველოს სახელმწიფო უსაფრთხოების სამსახურის ყოფილი უფროსი ვახტანგ გომელაური; სახელმწიფო უსაფრთხოების სამსახურის უფროსის ყოფილი მოადგილე ალექსანდრე ტაბატაძე; მთავრობის ადმინისტრაციის ყოფილი უფროსი კახა კახიშვილი; ჩორჩანას მკვიდრი ალექსანდრე ლომიძე და რეგიონული განვითარების და ინფრასტრუქტურის ყოფილი მინისტრი მაია ცქიტიშვილი. ცნობისთვის, საქართველოს პროკურატურაში მიმდინარეობს გამოძიება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე, საქართველოს სისხლის სამართლის კოდექსის 318-ე მუხლის პირველი ნაწილით, 19, 318-ე მუხლის მეორე ნაწილით, 319-ე და 321 პრიმა მუხლის მე-2 ნაწილის ,,ა“ ქვეპუნქტით. როგორც პროკურატურაში განმარტავენ, მიმდინარე გამოძიების ფარგლებში სხვა საკითხებთან ერთად შესწავლის საგანს წარმოადგენს 2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ საქართველოს შინაგან საქმეთა ყოფილი მინისტრის, გიორგი გახარიას მიერ განხორციელებული ქმედება. „საზოგადოებას შევახსენებთ, რომ ჩორჩანას საგუშაგოსთან დაკავშირებული საეჭვო გარემოებების შესწავლა ასევე მიმდინარეობს საქართველოს პარლამენტის დროებითი საგამოძიებო კომისიის ფორმატში, სადაც განმარტების მისაცემად იმყოფებოდა საქართველოს ყოფილი პრემიერ-მინისტრი გიორგი გახარია“, - აცხადებენ პროკურატურაში. იპნ

ეს არის გამოცხადებული ღალატის ქრონიკა საკუთარი სახელმწიფოს წინააღმდეგ, მაშინ, როდესაც ყოფილ პრემიერ-მინისტრს მცოცავი ოკუპაციის შეჩერებისთვის ედავებიან. ბერდია სიჭინავა. სრული ეთერის ლინკი: https://youtu.be/hIX3LaPm1NY

ყველაზე მნიშვნელოვანია, "ქართული ოცნების" დღის წესრიგს კი არ გავყვეთ, ჩვენი შევინარჩუნოთ. სოფო ხორგუანი, პარტია "გახარია საქართველოსთვის" პოლიტსაბჭოს წევრი. ვიდეო: https://www.facebook.com/reel/574570038757093

თვითმმართველობის არჩევნებში მონაწილეობის საკითხთან დაკავშირებული ეტაპი, დიდი ხანია, გადავლახეთ, დიდი ხანია, ვმუშაობთ პარტიულად ნეიტრალურ კანდიდატებთან დაკავშირებით და ამაზე ვესაუბრებით „ლელოს“, დიდი ხანია, – ამის შესახებ პარტიის „გახარია საქართველოსთვის“ წევრმა, ბექა ლილუაშვილმა განაცხადა. ლილუაშვილსასევე კითხვა დაუსვეს სოციოლოგიურ გამოკითხვაზე, რომლის მიხედვითაც, კითხვაზე, ოპოზიციურმა პარტიებმა უნდა მიიღონ თუ არა მონაწილეობა 2025 წლის ადგილობრივ არჩევნებში, გამოკითხულთა 54 პროცენტის პასუხია „დიახ“. „რაც შეეხება კვლევას, ამ კვლევას რა მხრიდანაც არ უნდა შევხედოთ, ჩვენთვის, როგორც პოლიტიკური სუბიექტისთვის მთავარი საკითხია, რომ ეს კვლევა ჩატარდა მაშინ, როდესაც ჯერ კიდევ არსებობდა „კოალიციები”, რომელიც დღეს, ფაქტობრივად, აღარ არსებობს; მეორე, ჩვენ ვართ ერთადერთი პარტია, რომელსაც აქვს მზარდი მხარდაჭერა მოსახლეობაში. ჩვენ ვართ ერთადერთი პარტია, რომელიც ძალიან ეფექტურია. ვგულისხმობ იმას, რომ ჩვენ არც ოლიგარქები გვყავს, ვინც გვაფინანსებს, არც ბანკირები გვყავს. არანაირი ფინანსური სერიოზული რესურსი ჩვენ უკან არ დგას. ამის მიუხედავად, შევძელით, რომ ყველაზე ეფექტურად, მინიმალური შესაძლებლობების ფარგლებში მიგვეღწია იმ შედეგისთვის, რასაც მივაღწიეთ და გვქონოდა მეტი პერსპექტივა. ეს ხომ ნიშნავს, რომ ჩვენს უკან მდგომი ამომრჩევლები ჩვენგან რაიმე ფინანსურ მხარდაჭერას კი არ ელოდებიან, ჩვენთან არიან, რადგან სჯერათ იმ იდეის, რაც ჩვენ გვაქვს. ძალიან დიდი ინტერპრეტაციის სივრცეებია და ამ სივრცეებში არ გვინდა შესვლა“, – განაცხადა ლილუაშვილმა. ავტორი - თეონა მაჭარაშვილი

დღეს „ოცნება“ ცდილობს „ორი კურდღლის“ დაჭერას. ერთი, მხრივ გიორგი გახარიაზე პერსონალურ შურისძიებას და მეორეს მხრივ კრემლისთვის საამებელი პოლიტიკის გაგრძელებას - ეს საქმე უნდა შევაფასოთ, როგორც პერსონალური შურისძიების მორიგი მცდელობა, - ამის შესახებ „გახარია საქართველოსთვის“ ერთ-ერთმა ლიდერმა, გიორგი შარაშიძემ „პალიტრანიუსის“ გადაცემა „დღის ნიუსრუმში“ სტუმრობისას განაცხადა, რითაც ჩორჩანას ეპიზოდზე პროკურატურაში მიმდინარე გამოძიებას გამოეხმაურა. რაც შეეხება იმას, რომ საგამოძიებო კომისიის სხდომაზე გიორგი გახარია განმეორებით დაიბარეს, შარაშიძე ვარაუდობს, რომ პარტიის ლიდერი კომისიის სხდომაზე ისევ მივა. „როდესაც პირველ დაბარებაზე იყო საუბარი, მაშინაც ვამბობდით, რომ ეს იყო მისი პერსონალურად მისაღები გადაწყვეტილება, მიუხედავად იმისა, რომ გუნდში პოზიციები და აზრები იყო გაყოფილი. ნაწილი ემხრობოდა მისვლას, ნაწილი არ მისვლას. საბოლოოდ, გახარია მივიდა და რეალურად მისი იქ მისვლა იყო გარდამტეხი მომენტი იმ ნაწილში, როდესაც მან სწორედ „ოცნების“ მოედანზე უთხრა სათქმელი მათ. გახარიას დასამალი არაფერი აქვს, მას ახლა ისინი მეორედ დაიბარებენ თუ მესამედ, ამით ვერ შეაშინებენ. ჩვენი პოზიცია არის ის, რომ მივიდეთ და ვუთხრათ სიმართლე იქ, სადაც საჭიროა, მათსავე მოედანზე. თქვენ რა გგონიათ, რომ გახარია იმიტომ მივიდა კომისიაზე, რომ თავი დაეხსნა პატიმრობისგან? ამ დონეზე ჩვენ ამ საკითხს ვერ ჩამოვწევთ. მისთვის კომისიაზე მისვლის მთავარი მოტივაცია იყო სიმართლის თქმა, რომელსაც „ოცნება“ ჩვენს მოქალაქეებს უმალავს. ვერ გეტყვით, საბოლოოდ და დასტურებით რა გადაწყვეტილებას მიიღებს, ამჯერად, მეორე დაბარების შემთხვევაში, მაგრამ ლოგიკურად რომ გავყვეთ, მისი გადაწყვეტილება იქნება მისვლა. ამ კომისიაზე მისვლით ძალიან დიდი ანგარიშით წააგო „ოცნებამ“. რეალურად მათთვის მორიგი ანგარიშსწორების და შურისძიების ნაბიჯიცაა. სიმართლე გიორგი გახარიას მხარესაა. ეს საქმე რამდენიმე ნაწილისგან შედგება: 1. „ოცნების“ პერსონალური შურისძიება გიორგი გახარიას მიმართ. ეს, პირველ რიგში, არის შურისძიება იმიტომ, რომ მათთვის არასასურველი გზა აირჩია გახარიამ და დღეს ის არის ოპოზიციაში. კვლევებითაც ჩანს, და ჩვენი გაზრდილი რეიტინგიც აჩვენებს, რომ მთავარი პრობლემა და თავის ტკივილი დღეს „ოცნებისთვის“ არის სწორედ გახარია და მისი გუნდი. ამიტომ ეს საქმე უნდა შევაფასოთ, როგორც პერსონალური შურისძიების მორიგი მცდელობა და 2. რა თქმა უნდა, ეს საქმე არის „ოცნების“ მიერ არჩეული კაპიტულანტური პოლიტიკის მორიგი გაგრძელება. ეს ხომ არ არის ცალკე ამოგლეჯილი ეპიზოდი. კარგად გვახსოვს ივანიშვილის ცალმხრივი ბოდიშები ოკუპანტების მიმართ. საქართველო დატოვეს იზოლაციაში ჩვენი მთავარი მტრის, რუსეთის წინააღმდეგ. ეს ამ პოლიტიკის გაგრძელებაა. დღეს „ოცნება“ ცდილობს „ორი კურდღლის“ დაჭერას. ერთი მხრივ, გიორგი გახარიაზე პერსონალურ შურისძიებას და მეორე მხრივ, კრემლისთვის საამებელი პოლიტიკის გაგრძელებას“, - განაცხადა შარაშიძემ. სოფელ ჩორჩანაში, 2019 წლის აგვისტოში, გიორგი გახარიას შინაგან საქმეთა მინისტრობის დროს საგუშაგოს განთავსების საკითხზე საუბრისას შარაშაძემ ასევე აღნიშნა, რომ ყველა შესაბამისი უწყება საქმის კურსში იყო და გადაწყვეტილებას მხარს უჭერდა. „რაც შეეხება იმას, რომ სუს-ი თურმე არ იყო საქმის კურსში. არათუ სუს-ი, არამედ ყველა შესაბამისი სახელმწიფო უწყება, ყველა აქტორი, ვინც უნდა ყოფილიყო ინფორმირებული და ამ პროცესში ჩართული, ამ პროცესში იყო ჩართული. ამ პერიოდში გახარია პრემიერ-მინისტრი კი არ იყო, იყო შს მინისტრი. ამ ინციდენტიდან რამდენიმე დღეში მოხდა მისი წარდგენა პრემიერ-მინისტრად. მისი მთავარი მოვალეობა იყო გაეკეთებინა ის, რაც გააკეთა. უკლებლივ ყველა სახელმწიფო უწყება, რამდენიმე სტრუქტურა, ადგილობრივი თვითმმართველობები, გუბერნატორები, ინფრასტრუქტურის სამინისტრო, ბიუჯეტი ამას ყველაფერს ხომ დაფინანსება და ორგანიზება სჭირდებოდა? - რა თქმა უნდა, ეს გაცილებით აღემატებოდა შსს -ს კომპეტენციას. ეს ადამიანები არათუ მიესალმებოდნენ ამ გადაწყვეტილებას, არამედ პირიქით, ამ გადაწყვეტილებით ამაყობდნენ. არის კომენტარი, იმ დღეს სამთავრობო მედიის მიერ მომზადებულ სიუჟეტში, სადაც გახარია საუბრობს მშვიდობიან პოლიტიკაზე, იმაზე, რომ ომით დაკარგული მშვიდობით უნდა დავიბრუნოთ და გომელაური ცეცხლის გახსნაზე საუბრობს. იმასაც კი ამაყად და ბაქიბუქით ამბობს, რომ თუ იქიდან ვინმე ცეცხლს გახსნის, მზად ვართ და ჩვენც ვაჟკაცურად დავდგებითო. აქ არის თეა წულუკიანის, სხვა პარლამენტარების კომენტარები. ყველა მიესალმებოდა ამ გადაწყვეტილებას. გაუგებარია, თუ მაშინ, რამდენიმე წლის წინ, ეს მათთვის იყო მისასალმებელი გადაწყვეტილება და ამაზე საჯაროდ საუბრობდნენ, დღეს გახდა ეს მოღალატეობრივი საქციელი?!“ - აღნიშნა მან. რაც შეეხება ადგილობრივ თვითმმართველობის არჩევნებში პარტიის „გახარია საქართველოსთვის“ მონაწილეობას, შარაშიძე ადასტურებს, რომ პარტიამ არჩევნებში მონაწილეობა საბოლოოდ გადაწყვიტა. „გახარია საქართველოსთვის“ ორ თვეზე მეტია გამოდის და ამბობს, რომ „დიახ, ჩვენ ვემზადებით ყველა მომდევნო არჩევნებისთვის, მათ შორის ადგილობრივი თვითმმართველობის არჩევნებისთვის“. ჩვენ ეს ეტაპი გავლილი გვაქვს, სამსჯელოც არაფერი დაგვრჩა... გადაწყვეტით შეგვიძლია ვითქვათ, რომ „გახარია საქართველოსთვის“ ერთვება არჩევნებში. ზოგადად ყველაფერი შეიძლება მოხდეს, იმდენად სწრაფად იცვლება სიტუაცია ქვეყანასა და რეგიონში, ამის გათვალისწინებით შეიძლება გადაწყვეტილებაც შეიცვალოს, თუმცა ჩვენ ეს გადაწყვეტილება გვაქვს მიღებული. სხვა პარტიებსაც მოვუწოდებთ, რომ ანალოგიურად წავიდნენ. განსაკუთრებით საინტერესოა ჩვენთვის „ლელოს“ პოზიცია“, - განაცხადა შარაშიძემ. რაც შეეხება იმას, ხომ არ მოახდენს არჩევნებში მონაწილეობის საკითხზე პარტიის პოზიციაზე გავლენას ჩორჩანას ეპიზოდზე პროკურატურაში დაწყებული გამოძიება და იღებს თუ არა მათი პოლიტიკური ძალა აღნიშნულს, როგორც „ქართული ოცნების“ ულტიმატუმს, შარაშიძის თქმით, მათზე გავლენის მოხდენა შეუძლებელია. გარდა ამისა, მისი აზრით, „ქართული ოცნების“ ინტერებში, პირიქით, ის შედის, რომ გახარიას პარტიამ ადგილობრივ არჩევნებში მონაწილეობა არ მიიღოს. „ჩვენ გადაწყვეტილებებს ასე არ ვცვლით. ჩვენს გადაწყვეტილებაზე გავლენას ვერ მოახდენს ვერანაირი გადაწყვეტილება, ვერც „ოცნება“ და ვერც „ნაციონალური მოძრაობა“ და მათი განაყოფები. ჩვენ ეს არაერთხელ დაგვიმტკიცებია. დღესაც ამ გზით მივდივართ. და მოდი, ვინც დაუშინებიათ, ვისთანაც გასვლიათ აქამდე, მომავალშიც მათთან სცადონ ანალოგიური მეთოდებით დაპირისპირება, მათი დაშინება, დაშანტაჟება და გაჩერება. ჩვენ ვერ გაგვაჩერებენ. ჩვენს გადაწყვეტილებაზე ისინი გავლენას ვერ მოახდენენ. [რაც შეეხება გახარიას დაპატიმრების ალბათობას], „ოცნების“ პირობებში გასაკვირი არაფერია, თუმცა ჩვენ ყველაფრისთვის მზად ვართ. ჩვენს გადაწყვეტილებაზე, პირდაპირ გეუბნებით, რომ ვერ იქონიებენ გავლენას, ვერც „ოცნება“ და ვერც „ნაციონალური მოძრაობა“. სწორედ „ნაციონალური მოძრაობა“ იყო, რომელიც გამოვიდა და თქვა, რომ თურმე ამას ივანიშვილი და „ოცნება“ იმიტომ აკეთებს, რომ გვაიძულოს მივიღოთ მონაწილეობა ადგილობრივი თვითმმართველობის არჩევნებში. ეს იძულება ვის ვის და ჩვენ არ გვჭირდება. ჩვენ ვართ ერთადერთი პოლიტიკური ძალა, რომელიც ამ ნაწილში ჩამოყალიბებულია. ჩვენ გადასული ვართ მეორე ეტაპზე, როდესაც მთავარია შევარჩიოთ პოლიტიკურად და პარტიულად ნეიტრალური კანდიდატები. საკუთარი ქვეყნის ინტერესების, ტერიტორიების, მიწის, მოსახლეობის დაცვისთვის უსამართლო რეჟიმის მხრიდან დაჭერა, ეს არავისთვის შემაშინებელი და შემაჩერებელი ფაქტორი არ იქნება. მით უფრო ისეთი პრინციპული, გამბედავი და პატრიოტი პოლიტიკოსისთვის, როგორიც არის გიორგი გახარია“, - აღნიშნა გიორგი შარაშიძემ. იპნ

"ქართული ოცნების" მმართველობის ისტორიაში "ჩორჩანა" არის ერთადერთი შემთხვევა, როდესაც საგუშაგოს ჩადგმით შეჩერდა მცოცავი ოკუპაცია სამხედრო ესკალაციის გარეშე. თეონა აქუბარდია სრული ეთერის ლინკი: https://youtu.be/ax3lj-biJw8

უდიდესი ტერიტორიული სეგმენტის დაკარგვის რისკი არსებობდა, რომელიც გახარიამ აღკვეთა თავისი პოლიტიკური გამბედაობით და ცოდნით. "ჩორჩანას" ისტორიას გახარიას ედავებიან ის ადამიანები, რომლებსაც ერთი ნაბიჯი არ გადაუდგამთ სახელმწიფო ტერიტორიების დაცვისთვის კახაბერ ქემოკლიძე სრული ეთერის ლინკი: https://youtu.be/DdiyMJ66Jp0

პარტია „გახარია საქართველოსთვის“ ლიდერი გიორგი გახარია „ქართული ოცნების“ პარლამენტში შექმნილი საგამოძიებო კომისიის სხდომაზე ხელმეორედ დაიბარეს. კომისიის თავმჯდომარის, თეა წულუკიანის განცხადებით, გახარიას შეტყობინება უკვე გაეგზავნა და ის 23 ივნისსაა დაბარებული. წულუკიანის თქმით, საკითხი შეეხება ჩორჩანას საგუშაგოს და გახარიას ოპოზიციაში ყოფნის პერიოდს. „იმედი მაქვს, რომ გიორგი გახარია დამატებით გამოკითხვაზე გამოცხადდება, იმისთვის, რომ ჩვენ გავაგრძელოთ ჩორჩანის, წაღვლის და სხვა სოფლების თემაზე საუბარი, სადაც მან გვითხრა, რომ ტერიტორიის არცერთი სანტიმეტრი, მისი ამ გადაწყვეტილებით, რომელიც საგუშაგოს განთავსებას შეეხებოდა, ოკუპირებული არ ყოფილაო, თბილისის ცენტრალურ ხელისუფლებას არ დაუკარგავს კონტროლიო. ჩვენ მოვისმინეთ წაღვლის მცხოვრებლის განმარტება, სადაც მან თქვა, რომ მთელი ტყე დაკარგა ქვეყანამ, ოკუპანტმა სახელმწიფომ დაიკავა და რუსეთი უფრო მეტად შემოვიდა ქართულ ტერიტორიაზე, ვიდრე მანამდე ჰქონდა ოკუპირებულიო. შეკითხვები დაისმება (და ეს შეტყობინების წერილში მას ეცნობა) 2012-2025 წლების იმ მონაკვეთთან, როდესაც ის უკვე ოპოზიციაში იყო. ეს არის მისი გადადგომიდან დღემდე პერიოდი, მათ შორის, მისი და მისი პარტიის საქმიანობა საერთაშორისო ასპარეზზე და საერთაშორისო პარტნიორებთან“, – განაცხადა თეა წულუკიანმა. 14 ივნისს ცნობილი გახდა, რომ პროკურატურა შეისწავლის „გიორგი გახარიას ქმედებას 2019 წლის 24 აგვისტოს სოფელ ჩორჩანასთან“ დაკავშირებით. გამოძიების ფარგლებში დაიბარეს ვახტანგ გომელაურიც, რომელიც 2019 წელს სუს-ის უფროსის პოზიციას იკავებდა. დღეს უწყებაში ელოდებიან ალექსანდრე ტაბატაძესა და კახა კახიშვილს. „საქართველოს პროკურატურაში მიმდინარეობს გამოძიება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე, საქართველოს სისხლის სამართლის კოდექსის 318-ე მუხლის პირველი ნაწილით, 19, 318-ე მუხლის მეორე ნაწილით, 319-ე და 321პრიმა მუხლის მე-2 ნაწილის ,,ა“ ქვეპუნქტით“, – აცხადებს უწყება. პუბლიკა

როგორც თემურ ქათამაძე გახდა ამ ბრძოლის სიმბოლო, ისე გახდება გამარჯვების სიმბოლო, მაშინ, როდესაც ქვეყანაში დავაბრუნებთ ქართველი ადამიანის საქართველოდან გაძევება არის სირცხვილიც და დანაშაულიც სრული ეთერის ლინკი: https://youtu.be/6d6XD3PDEm8 აკაკი გვიანიძე, პარტია "გახარია საქართველოსთვის" - ბათუმი

„რუსთაველის პროსპექტზე, საქართველოს პარლამენტის შენობასთან მიმდინარე აქციებზე, სამოქალაქო პროტესტის საჯაროდ გამოხატვის გამო დაკავებულთა რიცხვი დღითი დღე იზრდება, თუმცა ფაქტი ოპოზიციის წინააღმდეგობას ვერ აჩერებს. მიუხედავად ამისა, ხელისუფლება დათმობაზე წასვლას და არჩეული გეზიდან გადახვევას არ აპირებს“ - ასეთ შემთხვევაში, როგორ შეიძლება განვითარდეს მოვლენები, სადამდე მიგვიყვანს ეს ვითარება, შესაძლოა, თუ არა მმართველი ძალისა და მათი ოპონენტების დასხდომა მოლაპარაკების მაგიდასთან და კომპრომისის მიღწევა? - ამ კითხვებზე მოსაზრებებს პარტია ,,გახარია საქართველოსთვის“ წევრი სოფიო ხორგუანი გაგვაცნობს. - როგორ ფიქრობთ, რა გზით შეიძლება არსებული პოლიტიკური დაძაბულობა განეიტრალდეს და არათუ პოლიტიკური სპექტრის, ქართული საზოგადოების პოლარიზაციაც საბოლოოდ დასრულდეს? - დარწმუნებული ვარ, რომ ამ პოლიტიკურ კრიზისსაც გადავლახავთ და აუცილებლად შეიცვლება ხელისუფლება. საქართველო არ არის ის ქვეყანა, რომელსაც რომელიმე ხელისუფლება 30 წელი გამოეკიდება. არც ამის ეკონომიკა გვაქვს, არც ტრადიცია. რა იქნება მერე? მერე როგორ ქვეყანას ვაშენებთ, ესენი როცა წავლენ? კოალიციური მმართველობა გვჭირდება. როდესაც ერთი ძალის ხელში ხდება ძალაუფლების კონცენტრაცია, მივდივართ იმ აბსურდამდე, როგორშიც დღეს ვართ. სწორედ ამიტომ მაქვს ეს კითხვა, მერე როგორ სახელმწიფოს ვაშენებთ? ჩვენ ვამბობთ ქართული სახელმწიფოს, ეს პირდაპირ ნიშნავს ევროპულ სახელმწიფოს. ჩვენ პირველი ევროპელები ვართ და ყველა იმ პროგრესულ იდეას, რომელიც ევროპაში ღვივდებოდა, თუ არ ვუსწრებდით, ფეხდაფეხ მივდევდით. გურიაში ჯერ კიდევ როდის იღებდნენ ქალები არჩევნებში მონაწილეობას? 170 წლის წინ ილია ჭავჭავაძე თარგმნიდა იმ ნააზრევებს, რასაც ევროპული პრესა წერდა. ეს ჩვენი ადგილია, ჩვენი ბუნებრივი მდგომარეობა, ჩვენი მახასიათებლებით, რაც კავკასიამ მოგვცა. ჩვენი ქართული ეროვნული სახელმწიფო როგორიც უნდა იყოს, ამაზე ჩამოყალიბებულები ვართ. ფულის და სიმდიდრის ისეთი ფეტიში, რასაც ახლა ვხედავთ, არც ქართულია და არც ქრისტიანული. ჩვენი ეკლესიები, ჩვენი კულტურა, ყოველთვის იყო დახვეწილი, მოკრძალებული. საქართველოში ოქროს მოვიპოვებდით, თუმცა წინაპრებს არასოდეს არ ჰქონიათ სიმდიდრის დემონსტრირების სურვილი. განათლების ზედმეტად დემონსტრირებაც კი სირცხვილად ითვლებოდა, საკუთარი განათლების ხაზგასმაც. ზომიერება, მოკრძალებულობა, მეორე ადამიანზე ზრუნვა და სიკეთის განაწილება, ეს არის ევროპა. ჩვენ ბუნებრივად ვართ ევროპელები. სახელმწიფო, სადაც ადამიანი და გარემო იქნება დაცული და ყველა სისტემა ისე იმუშავებს, რომ სახელმწიფო იყოს ხილული, ადამიანზე მზრუნველი და რომ ყოველდღიურად ადამიანების ცხოვრება უკეთესობისკენ იცვლებოდეს. ევროპული დემოკრატიაც არ არის სრულყოფილი, მაგრამ მუდმივად ცდილობენ დახვეწას, ერთ ადგილას არ დგანან და მოძრაობენ. - დღეს, როცა პოლიტიკური სპექტრის დიდი ნაწილი მარგინალიზებულია, იქნება თუ არა რიგგარეშე საპარლამენტო არჩევნების ჩატარება გამოსავალი? - კრიზისი შეიქმნა არა არჩევნების შედეგების გამო, არამედ როგორც ჩატარდა ის. შეიძლება, სამართლიან გარემოში სულაც ნაკლები ხმა ამეღო, მაგრამ მეცოდინებოდა, რომ ეს რეალური პროცენტია. ყველაზე მნიშვნელოვანი იქნება, რომ შემდეგმა არჩევნებმა სამართლიანობის მინიმალური სტანდარტი მაინც დააკმაყოფილოს და ეს არსებულ რთულ ვითარებას განმუხტავს. - რამდენად რეალურია დღევანდელ ვითარებაში სამართლიანი გარემოს მინიმალური სტანდარტის მოლოდინი? - რა თქმა უნდა, შიშები არსებობს, რომ ხელისუფლება არაფერს დათმობს. საზოგადოებაშიც მომისმენია ეს აზრი, რადგან “ქართული ოცნების” წევრებს ძალიან ბევრი აქვთ დასაკარგი, იმდენი მოიპარეს, ცუდი აკეთეს. ამიტომ არის მათი მთავარი მიზანი ძალაუფლების შენარჩუნება, მაგრამ ამისთვის რესურსი სჭირდებათ, ეს რესურსი კი აღარ აქვს. ნებისმიერ ხელისუფლებას, ავტოკრატიულსაც კი, ლეგიტიმაცია სჭირდება. ამბობდნენ, ტრამპი მოვა და დავლაგდებითო. მოვიდა ტრამპი, გავიდა დრო, სენატი ორპარტიულ გადაწყვეტილებას იღებს “მეგობარი აქტით” და საქართველოს მიმართ დამოკიდებულება არ იცვლება. ეს არ არის ის მოცემულობა, რომელსაც ბიძინა ივანიშვილი გაუმკლავდება. ჩვენ არ გვაქვს ნავთობი, არ გვაქვს ბელორუსიის ეკონომიკა, ნიორიც კი შემოგვაქვს საქართველოში. არაფერს ჩვენთვის სამყოფს არ ვაწარმოებთ. ღვინის ქვეყანას ბოთლიც და ბოთლის საცობიც გარედან შემოგვაქვს. ამ დროს ვრცელდება ინფორმაცია, არც ოცნება უარყოფს, რომ ბიძინა ივანიშვილის ფული ლეგალურად განთავსებული აღარ ჩანს, გადამალა, გადააფორმა. მისი გარემოცვისთვის ეს განგაშის ზარია. ჩვენ უკვე ვნახეთ სანქცირებულთა შთამბეჭდავი სია. ვიცით, რომ ევროსტრუქტურებს აწუხებენ, თავი რომ დაიძვრინონ. რესურსი, რაც შეიძლებოდა არალეგიტიმურ ხელისუფლებას ძალადობითა და პროპაგანდით მოეპოვებინა, ამოწურულია. - საკუთარი თავის გადასარჩენად, ხომ არ არის მოსალოდნელი ბიძინა ივანიშვილმა გარკვეული პირები გაწიროს? - ანტურაჟი რომ შემოეცლება, ეს არის მოცემულობა. არ ვგულისხმობ, ზარქუას, კობახიძეს და წილოსანს, იქ არის ხალხი, რომლებმაც ქონება ბიძინა ივანიშვილამდე შექმნეს. კარის ბიზნესმენების უმრავლესობამ სამ ხელისუფლებას გაუძლო, ვანო ჩხარტიშვილმა სამი ხელისუფლება გამოიცვალა და ახლა თავში რომ მოხვდა, არ იქნება კმაყოფილი და დარწმუნებული ვარ, ისიც ქონების გადაფორმებებით არის დაკავებული. ეს ანტურაჟი არ არის მზად იმისთვის, რომ ასეთ მდგომარეობაში ჩადგეს და ეს არ არის ის ხალხი, ვინც მმართველ პარტიას შეეწირება. მათ ფული აერთიანებთ და თუ ეს ფული საფრთხის ქვეშ დადგება, ეს იქნება დამოკლეს მახვილი. - შესაძლოა თუ არა, დადგეს ის მომენტი, როდესაც ოპოზიცია და ხელისუფლება კრიზისზე სალაპარაკოდ მაგიდასთან ერთად დასხდნენ? - მომლაპარაკებლის როლში ვყოფილვარ და არსებობს ასეთი სტრატეგია - მოითხოვე მაქსიმუმი, რომ მიიღო მინიმუმი. რა თქმა უნდა, შესაძლებელია მოლაპარაკების მაგიდასთან დაჯდომა. თუნდაც ინსტინქტის დონეზე, ნებისმიერი ჩვენგანი გრძნობს, რომ ჩვენ არ გვჭირდება სისხლიანი რევოლუცია ამ ქვეყანაში. ამ ტვირთის ტარება ბიძინა ივანიშვილსაც არ შეუძლია. ცემა და ძალადობა ვნახეთ, მაგრამ იქ არიან ადამიანები, რომლებიც პრაგმატულად უდგებიან საკითხს. მთელს ქვეყანაში, ნებისმიერ მხარეს, ამ ტვირთის ტარების მსურველი ცოტაა. ჩვენ ძალიან პატარა ქვეყანა ვართ, მოკლე სოციალური კავშირებით, ეს ძალიან რთული ამბავია, ამიტომ მოლაპარაკებები შედგება, ეს არ იქნება იოლი და არც სასიამოვნო პროცესი. ისეთი სიბინძურეები ტივტივებს და ისეთი ზღვარგადასული ბრალი წაგვიყენეს, როგორ შეიძლება ჩემთვის სასიამოვნო იყოს მამუკა მდინარაძესთან ლაპარაკი, მაგრამ ეს უნდა შევძლოთ. როდესაც ვამბობ, რომ მე აფხაზებთან ერთად უნდა ვიცხოვრო აფხაზეთში, შეიძლება ეს ძალიან მძიმე იყოს, რადგან ჩემს მეზობლად იცხოვრებს ადამიანი, რომელმაც ბავშვობის მეგობარი მომიკლა. თუმცა ეს სჭირდება ჩემს ქვეყანას და ჩემი ქვეყნის უკეთეს მომავალს. ეს მოლაპარაკება თუ შედგება, მეორე მხარეს იქნებიან ადამიანები, რომლის დანახვაც არ გინდა. თავად არ მიიჩნევს კობახიძე თავს ჩემს პრემიერად და მერე უკვირთ, რატომ არ არიან ლეგიტიმურები. არადა თავადვე ამბობს, რომ ჩემი პრემიერი არ არის. ბიძინა ივანიშვილმა ხომ გვითხრა არჩევნების წინ, ციხეში ჩაგსვამთ, ამისთვის მომზადებული მაქვს ყველაფერიო? რაც უფრო მალე შედგება შეთანხმება, მათთვისვე იქნება უკეთესი; პასუხისმგებლობა მათზეა. ძალის გამოყენების პრივილეგია აქვს მხოლოდ ხელისუფლებაში მყოფს, მე ვერ დამაკისრებენ მათთან თანაბარ პასუხისმგებლობას, ამიტომ მათთვისვე არის გამოსავალი ასეთი მოლაპარაკებები და თავად უნდა გვეხვეწებოდნენ, მოდით, დავსხდეთ და მოვილაპარაკოთო. მოლაპარაკების თემა უნდა იყოს სამართლიანი გარემო ნებისმიერი არჩევნებისთვის, რომელიც მოდის. შეიძლება ორივე ერთად ჩატარდეს, თვითმმართველობის და საპარლამენტო. ხშირად ლაპარაკობენ მძევლების გათავისუფლებასა და სამართლიან გარემოზე. მძევლების გათავისუფლება არ შეიძლება იყოს მოლაპარაკების თემა, ეს არის თემა, რომელიც არ უნდა მივიდეს მოლაპარაკების მაგიდასთან. მხოლოდ მათი გათავისუფლების შემდეგ უნდა დავსხდეთ მოლაპარაკების მაგიდასთან და ვილაპარაკოთ, როგორ მივიღოთ არჩევნებზე მინიმალური სტანდარტი. შეუძლებელია ორ თვეში სასამართლო შეცვალო, მინიმალურ სტანდარტზე ამიტომ ვლაპარაკობ. - თუ ხელისუფლება არანაირ დათმობაზე არ წამოვიდა? - ბრძოლა ისევ გაგრძელდება, წნეხი უნდა გაძლიერდეს, რომ ვაიძულოთ. არ უნდათ ნებითა მათითა და ამიტომ იქნება ძალითა ჩვენითა. ძალაში ვგულისხმობ, ხალხის ძალას. ასევე, დასავლეთის მძლავრ მხარდაჭერას, ევროპის დღეზე ელჩმა ქართულ ენაზე გამოაცხადა, ევროპის კარი ჩვენთვის ღიაა და ერთადერთი, ვინც ამას ხელს უშლის, “ქართული ოცნებაა”. ევროპის დღის წესრიგში ვრჩებით. ვიღაცას შეიძლება ეფიქრა, თუ დასავლეთი სხვა ავტოკრატებს ელაპარაკება, ჩვენც დაგველაპარაკებიან. აქ შეეშალა ბიძინა ივანიშვილს, იფიქრა, მე ვარ ერთადერთი, რომელსაც დამელაპარაკებიან, ოღონდ უნდა მიმიღონ ისეთი, როგორიც ვარ. თუმცა მან პარტნიორები იმდენჯერ მოატყუა და ის ზღვარიც გადალახა, რომლის მიღმაც არ გელაპარაკებიან, საკუთარი რესურსი გადააფასა და გადაჭარბებულად შეაფასა თავისი შესაძლებლობები. „კოკა ყოველთვის წყალს ვერ მოიტანსო“ და ახლა ის ძალიან დამძიმებული მიდის მოლაპარაკების მაგიდასთან. - რამდენად რეალურია, ბიძინა ივანიშვილმა დაითხოვოს არსებული გუნდი და მოიყვანოს ახალი ფიგურები? - ეს ფანდი აღარ იმუშავებს, უფრო შესაძლებელია, თქვას, ძალიან ნუ გამწეწავთ, ოღონდ გადავრჩე. “ქართული ოცნების” ღერძი დღესაც ბიძინა ივანიშვილია. ბრძოლა უნდა გაგრძელდეს. ძალისხმევა გვჭირდება, რომ მეტი მოქალაქე დავარწმუნოთ სასიკეთო ცვლილებების შესაძლებლობაში. მეტი მუშაობა გვჭირდება. მოქალაქეებმა უნდა დაიჯერონ, საქართველო არის მათი და ცვლილებები ყველასთვის სასარგებლო იქნება. გურიაშიც, ახალციხეში, სამტრედიაში და მესტიაშიც ერთდროულად შეიცვლება ადამიანების ცხოვრება. ახლა ხომ გვაქვს კორუფცია, წამოვიდა ზემოდან და გავრცელდა მთელს რეგიონებში. ზემოდან როცა წამოვა სამართლიანი მართვის პრინციპი და რეგიონებშიც იგივე განწყობა იქნება, შედეგიც დადგება. ამიტომ ყველაზე მნიშვნელოვანია კარდაკარ მუშაობა და ადამიანების დარწმუნება იმაში, რომ მათი ცხოვრება უკეთესობისკენ შეიცვლება. ევროპული ცხოვრების სიკეთე, ყველაზე კარგად იგრძნობა ევროპულ სოფელში, ამიტომ მჯერა, რომ ამ შემთხვევაში ევროპული სახელმწიფოს მშენებლობაში განსაკუთრებული მნიშვნელობა თვითმმართველობას აქვს. ყველა ხელისუფლების ერთ-ერთი მთავარი შეცდომა იყო ის, რომ ყველა მათგანს ეშინოდა ძლიერი თვითმმართველობის, იმიტომაც ვერ გადავლახეთ ჰიბრიდული დემოკრატიის ეტაპი. ეს შეცდომა აუცილებლად უნდა გამოვასწოროთ. ipn