1. ღმერთს არაფერი არ სჭირდება რაც კი ამ სამყაროში არსებობს, მათ შორის ადამიანი. მაგრამ ვინაიდან ღმერთმა თავისი უკიდეგანო სიყვარულით, მოისურვა თავისი ნეტარება და დიდება გაეზიარებინა ვინმესთვის, ამიტომაც ქმნის ადამიანს. შესაწირის ნებისმიერი სახე როგორც ძველ, ისე ახალ აღთქმაში, ისევ ადამიანის კეთილდღეობას ემსახურება. შესაწიირების მეშვეობით ადამიანი იაზრებს რომ არსებობს ღმერთი და მას ემსახურება. შესაწირი ისევ ადამიანს სჭირდება, რადგან სიკეთე ისწავლოს და ამით თავი გადაირჩინოს. 2. ყოვლისშემძლემ ადამიანი სრულყოფილ არსებად შექმნა, მაგრამ ის არ ნდომია რობოტად ქცეულიყო მის ხელში და ამიტომ თავისუფალი ნებით დააჯილდოვა, რომელიც ადამიანმა ბოროტად გამოიყენა, რაც ღვთისადმი ურჩობაში გამოვლინდა. ეს იგივეა მოგცენ ბრილიანტი, შენ კი ის ტალახში ამოსვარო. თუ შენ ამას გააკეთებ, ვინც ბრილიანტი მოგცა, იმას ვერ დაადანაშაულებ რომ ამ წუთას ბრილიანტი ტალახიანია, რადგან მისი თავდაპირველი სახე სილამაზითა და სიძვირფასითაა აღსავსე, ისევე როგორც ადამიანი იყო თავდაპირველ მდგომარეობაში 3.ამხელა სამყაროს შექმნა იმიტომ გადაწყვიტა შემოქმედმა, რომ ადამიანი დაედგინა ამ ყველაფრის, ამ თვალუწვდენელი სამყაროს მეფედ და მბრძანებლად. და შენ ადამიანო - ვერ იაზრებ შენს ამ სიდიადეს და ისევ შემოქმედთან ეძებ საკამათოს. სამყარო რომ მხოლოდ მზის სისტემა ყოფილიყო, ძალიან მარტივი, ამოწურვადი და მომაბვეზრებელი იქნებოდა, მაგრამ ის სწორედ იმიტომაა ასეთი დიადი და დიდებული, რომ ამოუწურავია. 4.ნებისმიერი სახის იარაღი ადამიანმა თვითონ გამოიგონა, საკუთარი შესაძლებლობებით შექმნა. ვინაიდან ადამიანის პოტენციები დაუსრულებელია, რადგან შემოქმედის ხატებაა, ამიტომ მას საოცრებების ქმნა შეუძლია თავისი გონების გამოყენებით. ღმერთმა მისცა მას ეს გონება და არჩევანი მას მიანდო, ისევე, როგორც ნორმალური მშობელი არ ზღუდავს სრულწლოვან შვილს თავისუფალ არჩევანში. და თუ ადამიანი ამ არჩევანსა და ნებას ბოროტად იყენებს, პრობლემა სწორედ მასშია და არა ღმერთში. იარაღით შეგიძლია ან ოჯახი დაიცვა, ან ტირანად იქცე. არჩევანი შენზეა