ოზურგეთის მერია: ბაღებიდან თანამშრომლების მასიური გათავისუფლება არ მომხდარა და არც იგეგმება, მოვუწოდებთ „ტვ პირველს”, შეასწოროს გადაუმოწმებლად გავრცელებული ინფორმაცია

[planeta.ge]

მოვუწოდებთ „ტვ პირველს”, შეასწოროს გადაუმოწმებლად გავრცელებული ინფორმაცია“, – ნათქვამია ოზურგეთის მერიის მიერ სოციალურ ქსელში გავრცელებულ განცხადებაში.

ოზურგეთის მერია „ტვ პირველს” „ნაციონალური მოძრაობასთან” ერთად ორკესტრირებულ დეზინფორმაციულ კამპანიაში ადანაშაულებს, რომელიც ბაღების თანამშრომლების ხელფასებს უკავშირდება.

„ბოლო 2 დღის განმავლობაში საზოგადოება ოზურგეთში თვალს ადევნებს მპგ „ნაციონალური მოძრაობის” და „ტვ პირველის“ ორკესტრირებულ კამპანიასა და პოლიტიკურ სპეკულაციებს ბაღების თანამშრომლების ხელფასებთან დაკავშირებით.

დასახელებული რიცხვები მინიმალურ ხელფასთან დაკავშირებით, ბრალდებები თანამშრომლების მასიური გათავისუფლების შესახებ, გადაუმოწმებელი ცნობებია და გახლავთ სრული სიცრუე.

სიმართლე გახლავთ შემდეგი: ბაღების თანამშრომლებს 2022 წლის 1 ივნისიდან ხელფასები 20%-ით გაეზრდებათ – ამის შესახებ, ოზურგეთის მერმა ავთანდილ თალაკვაძემ საკრებულოს ჯერ კიდევ, წინა წლის 28 დეკემბერს მიმართა და საკრებულოს უმრავლესობამ აღნიშნულს მხარი დაუჭირა.

ბიუჯეტის პროექტს, რომელშიც ბაღის თანამშრომლებისთვის ხელფასების ზრდა იყო ასახული, საკრებულოს სხდომაზე მხარი არ დაუჭირეს „ნაციონალური მოძრაობის” წარმომადგენლებმა. „ტვ პირველის” მხრიდან გავრცელებული ცნობა, თითქოს, ბაღის აღმზრდელის ხელფასი 150 ლარს შეადგენს, გახლავთ დეზინფორმაცია.

სინამდვილეში, ხელფასები რომელიც დაგვხვდა წინა ადმინისტრაციისგან, პირველი ცვლის შემთხვევაში 450 ლარს, მეორე ცვლის კი 370 ლარს შეადგენს, ძიძის ანაზღაურება 410 ლარია. ბაღებიდან თანამშრომლების მასიური გათავისუფლება არ მომხდარა და არც იგეგმება.

მოვუწოდებთ „ტვ პირველს”, შეასწოროს გადაუმოწმებლად გავრცელებული ინფორმაცია“, – ნათქვამია ოზურგეთის მერიის განცხადებაში.

The post ოზურგეთის მერია: ბაღებიდან თანამშრომლების მასიური გათავისუფლება არ მომხდარა და არც იგეგმება, მოვუწოდებთ „ტვ პირველს”, შეასწოროს გადაუმოწმებლად გავრცელებული ინფორმაცია appeared first on [/url].

 

ALIA.GE