პატიმრობა შეეფარდა კაცს, რომელსაც ბრალად  ედება პირადი ცხოვრების საიდუმლოს ხელყოფა. სპეციალური საგამოძიებო სამსახურის ინფორმაციით, 45 წლის კაცმა ფარულად გადაიღო მისი და მისი პარტნიორი ქალის სქესობრივი კავშირის ამსახველი კადრები. ურთიერთობის შეწყვეტის შემდეგ იგი ქალს ემუქრებოდა ამ კადრების ნათესავებში გავრცელებით.

“საქმეზე ჩატარებული გამოძიებით დადგინდა, რომ ბრალდებულს 2023 წელს გათხოვილ ქალთან სასიყვარულო ურთიერთობა ჰქონდა, რომელსაც სასტუმროში სქესობრივი კავშირის დროს მობილური ტელეფონით ფარულად ვიდეო გადაუღო.

ურთიერთობის შეწყვეტის შემდეგ, 2024 წლის იანვარში, ბრალდებული დაზარალებულ ქალს ურთიერთობის აღდგენას სთხოვდა, წინააღმდეგ შემთხვევაში ფარულად გადაღებული მათი სქესობრივი კავშირის ამსახველი კადრების ნათესავებში გავრცელებით ემუქრებოდა”, – ვკითხულობთ უწყების მიერ გავრცელებულ განცხადებაში.

გარდა ამისა, უწყების ცნობით, კაცმა დაზარალებულ ქალს ღამით სახლში მიაკითხა და ბავშვების და ოჯახის სხვა წევრების სახლში ყოფნის დროს შესვლას ცდილობდა.

სპეციალურმა საგამოძიებო სამსახურმა ბრალდებული კაცის მობილური ტელეფონიდან ამოიღო ინტიმური შინაარსის ამსახველი ვიდეომასალა.

ნეტგაზეთი