პარტია „საქართველოსთვის“ წევრის მიხეილ დაუშვილის განცხადებით, გიორგი გახარია აშშ-ს სენატის საგარეო ურთიერთობათა კომიტეტის მრჩეველ კრის სოჩასთან იმ შეხვედრაზე, სადაც ბიძინა ივანიშვილის სანქცირებას ითხოვდნენ, არ ყოფილა.

მისი თქმით, სანქცირების პროცესი არა სურვილებზე, არამედ ფაქტებსა და მტკიცებულებებზეა აწყობილი.

„რაღაცას რომ ამბობ, მოქალაქეები შეცდომაში არ უნდა შეიყვანო, მანდ რეალობა რა იყო, გიორგი გახარია მისული იყო იმ სასტუმროში, უნდა გამართულიყო შეხვედრა, თან ეს შეხვედრა არ იყო „ნაციონალური მოძრაობის“ წევრებთან ერთად ან სხვა პარტიის წევრებთან, თვითონ შეხვდა, დამოუკიდებლად უნდა შეხვედროდა და როგორ წარმოგიდგენიათ... რომელი ჟანრიდან არის იცით ეს? აშშ-ში სასტუმროში თითქოს მიხეილ სააკაშვილს რომ შეხვდა, „კოკაინშინკი“ რომ არის, ამ ჟანრიდან არის ეს იაფფასიანი ტყუილი“, - განაცხადა დაუშვილმა.

კითხვაზე: დააზუსტოს რა არის კონკრეტულად ტყუილი, იყო თუ არა გახარია იმ შეხვედრაზე, სადაც ივანიშვილის სანქცირებას ითხოვდნენ და ივანიშვილის სანქცირება მოითხოვა თუ არა? - დაუშვილი პასუხობს: „არა, რა თქმა უნდა“.

„გახარიამ რაზე ისაუბრა, ამაზე ხომ არ ვსაუბრობთ?! შესაბამისად, ფაქტი, რომ „ნაციონალური მოძრაობის" წევრებთან ერთად შეხვდა და ითხოვდა ქვეყნის სანქცირებას, კარგით რა, ტყუილსაც ხომ საზღვარი უნდა გააჩნდეს?! ტყუილს რომ ამბობ, საზღვრები და საფუძველი უნდა ჰქონდეს, ასეთი იაფფასიანი ტყუილები წარმოუდგენელი და მიუღებელია. ვინც ეს ტყუილი გაავრცელა მათ ადგილზე, გახარიას ეთერში მივიწვევდი და დაველაპარაკებოდი, რას ხედავს, ქვეყნის განვითარებას როგორ ხედავს, მისი პოზიციონირება რა არის, იმას მაინც ვკითხავდი რაზე შეხვდა. ჩვენი პოზიცია დიდი ხანია ყველასთვის ცნობილია ამ თემაზე, უნდა გვესმოდეს, რომ ნებისმიერ სანქციას, რომელიც ეხება ქვეყანას ან მის მოქალაქეს, ჩვენი პარტნიორები ასეთ სანქციებს გამოიყენებენ მხოლოდ იმ შემთხვევაში, თუ მათ ექნებათ კონკრეტული საფუძველი, რომ სანქციები გამოიყენონ. ეს საფუძველი რა შეიძლება იყოს - მაგალითად, ის, რომ რუსეთს ეხმარება სანქციების თავის არიდებაში, ომის წარმოებაში და ბევრი სხვა რამ, რომელზეც იარსებებს კონკრეტული მტკიცებულებები, რომ გამოიყენონ სანქციები სახელმწიფოს ან კონკრეტული პირის წინააღმდეგ. შესაბამისად, თუ ასეთი საფუძვლები იარსებებს, მნიშვნელობა არ აქვს იქნება, ეს ივანიშვილი, თუ ნებისმიერი სხვა. თუ ასეთი საფუძვლები ექნებათ ნებისმიერი პირის წინააღმდეგ, რა თქმა უნდა, ისინი გამოიყენებენ სანქციებს, მაგრამ თუ ასეთი მტკიცებულებები არ არსებობს, როგორც წარმოგიდგენიათ... ჩვენ არ უნდა გავასწროთ მოვლენებს, სურვილებზე ხომ არ არის ეს პროცესი აწყობილი, ფაქტებზე და მტკიცებულებებზეა აწყობილი“, - განაცხადა დაუშვილმა.

ინტერპრესნიუსი