„ქართული ოცნების“ თავმჯდომარე ირაკლი კობახიძე, რომელმაც 2 დღის წინ ეჭვი შეიტანა შოვის სტიქიას გადარჩენილი ადამიანების მონაყოლში, დღეს აცხადებს, რომ თავის განცხადებას ნანობს.

მმართველი პარტიის ლიდერმა ამის შესახებ დღეს, 16 აგვისტოს, რაჭაში ყოფნისას განაცხადა. როგორც კობახიძე ამბობს, ის პირადად შეხვდა შოვის სტიქიას გადარჩენილ დავით ჯელაძეს, რომელიც კობახიძის განცხადების გამო თავს შეურაცხყოფილად გრძნობდა.

„ჯერ მქონდა სატელეფონო საუბარი დათო ჯელაძესთან და შემდეგ შევხვდი. პირველ რიგში მინდა ჩემი ადამიანური შთაბეჭდილება გაგიზიაროთ – დათო არის გულიანი ვაჟკაცი, რაჭველი კაცი. მან დეტალურად გაიხსენა ის ისტორია, რომელიც მას გადახდა. წარმოუდგენელი, საოცარი ისტორიაა. რეალურად მან ყველაფერი გააკეთა იმისათვის, რომ მისი დისშვილი გაეყვანა მაქსიმალურად უსფრთხო ტერიტორიაზე. თავის თავს აჯობა, ისეთი გზა აქვს თავის პატარა დისშვილთან ერთად გამოვლილი. წარმოუდგენელი რაღაც აქვს გაკეთებული“, – განაცხადა კობახიძემ.

კობახიძის თქმით, დათო ჯელაძესთან კითხვები აღარ აქვს, რადგან მასთან შეხვედრისას სტქიისგან გადარჩენის ისტორია პირადად მოისმინა.

„რაც შეეხება შეკითხვებს, მინდა განვმარტო, რომ იყო ბრიფინგი და ერთ-ერთმა ჟურნალისტმა მაჩვენა ფოტო, რომელიც პირველად ვნახე მაშინ. ძალიან ხშირად ვრცელდება სოციალურ მედიაში ყალბი ფოტოები და მე არც ვიცოდი, ვის მიერ იყო ეს ფოტო დადებული და ზუსტად რა იყო ასახული, აქედან გამომდინარე კითხვა დავსვი იმასთან დაკავშირებით, თუ რამდენად შეესაბამებოდა სინამდვილეს ეს ფოტო და იქ აღწერილი მოცემულობა. ამის შემდეგ გავერკვიე ყველაფერში, რომ ეს ფოტო დათო ჯელაძის მიერ იყო დადებული და დეტალურად მომიყვა მან მე ისტორია, თუ რა გადახდა.

მე მინდა სინანული გამოვხატო, რომ დათო ჯელაძეს გული ვატკინე. რა თქმა უნდა, ეს არის ძალიან დასანანი. თუმცა ჩვენ გვქონდა შეხვედრა, მანაც განმარტა მისი ისტორია და მეც განვმარტე ყველაფერი. მთავარია, რომ ის ძალიან მძიმე ვითარებიდან გამოვიდა და გადარჩა მისი ოჯახი. ამაში არის მისი ძალიან დიდი დამსახურება“, – განაცხადა ირაკლი კობახიძემ.

14 აგვისტოს ირაკლი კობახიძემ ბრიფინგზე განაცხადა, რომ ეეჭვება, ნამდვილად გაიარეს თუ არა დავით ჯელაძემ და მისმა 6 წლის დისშვილმა ის მანძილი ღვარცოფში, რომელიც ფოტოზეა მოცემული. მისი შეფასებით, ამ ტერიტორიაზე გადასვლა “პრაქტიკულად წარმოუდგენელია” და “ეს ყველაფერი გადასამოწმებელია”.

გარდა ამისა, მან “წარმოუდგენელი ტყუილი” უწოდა გადარჩენილების მონათხრობს, რომ “ერთ-ერთი ბავშვი 3 საათის ებრძოდა ღვარცოფს”.

ირაკლი კობახიძის 14 აგვისტოს ბრიფინგს მალევე მოჰყვა„ოცნების“ სხვა წევრთა მსგავსი შინაარსის განცხადებები, რასაც ასევე იმეორებდნენ ხელისუფლებასთან დაახლოებული ადამიანებიც.

ჯელაძეების ოჯახი ღვარცოფის მოვარდნისას შოვში იმყოფებოდნენ. დავით ჯელაძე იხსენებს, რომ უკვე სახლში დაბრუნებისას, შოვში, მინერალურ წ####ბთან გაჩერდნენ, რა დროსაც ხიდზე მყოფმა ოჯახის სხვა წევრმა ღვარცოფული მასა დაინახა და დანარჩენებს დაუძახა, ჩქარა წამოსულიყვნენ. ისინი ხიდზე ავიდნენ, თუმცა ღვარცოფმა იქამდეც მიაღწია და, როგორც დავით ჯელაძე ამბობს, “ყველა მხრიდან მეწყერში აღმოჩნდნენ”. საბოლოოდ მან გადაწყვიტა, 6 წლის დისშვილთან ერთად ღვარცოფული მასის მეორე მხარეს გადასულიყო, რადგან დაინახა, რომ სასტუმრო “სანსეტ შოვის” ნაწილი არ ჰქონდა დაფარული ღვარცოფს და იქ ხალხიც დადიოდა. დავით ჯელაძის მონათხრობის თანახმად, აღნიშნული ტერიტორიის გავლას დაახლოებით 2 საათი დასჭირდა.

დავით ჯელაძის მონათხრობი ნახეთ ვრცლად:

მიწა უხმოდ მოდიოდა, რამდენიმე ადამიანი ჩემს თვალწინ წაიღო – რას ჰყვება დავით ჯელაძე

ნეტგაზეთი