დაღესტანში ბენზინგასამართ სადგურზე მომხდარ აფეთქებას, სულ მცირე, 30 ადამიანის, მათ შორის 3 ბავშვის სიცოცხლე ემსხვერპლა. როგორც BBC წერს, შემთხვევა მახაჩკალაში მოხდა.

გამოცემა წერს, რომ შემთხვევის შედეგად დაშავდა 100-ზე მეტი ადამიანი, მათი ნაწილი მძიმედ არის. რუსული მედიის ინფორმაციით, ცეცხლი 600 კვადრატულ მეტრზე იყო გავრცელებული. თვითმხილველის თქმით, რომლის სახელიც არ გასაჯაროებულა, ხანძარი ბენზინგასამართი სადგურის მოპირდაპირე მხარეს ავტომობილების სადგომზე გაჩნდა.

რუსეთის ჯანდაცვის მინისტრის განცხადებით, სამაშველო ოპერაციაში 260-მდე მეხანძრე-მაშველი და ექიმი მონაწილეობს. მისი თქმით, მძიმედ დაშავებულები მოსკოვში ვერტმფრენებით გადაიყვანეს.

რუსეთის საგამოძიებო კომიტეტის განცხადებით, ცეცხლი ავტომობილის შეკეთებისას გაჩნდა, რასაც აფეთქების ხმა მოჰყვა. მომხდართან დაკავშირებით დაწყებულია გამოძიება.

ნეტგაზეთი