სახალხო დამცველის აპარატის შეფასებით, 2023 წლის 15 იანვარს შსს-ს წარმომადგენლებმა არ შეასრულეს თავიანთი ვალდებულება და არ უზრუნველყეს ლევან ბერძენიშვილის ლექციის უსაფრთხოება.

ამის შესახებ ლევან იოსელიანი შს მინისტრის, ვახტანგ გომელაურის სახელზე დაწერილ წერილში წერს. იოსელიანი განმარტავს, რომ აპარატი აქტიურად ადევნებს თვალს გამოხატვის თავისუფლებით სარგებლობის კუთხით არსებულ მდგომარეობას:

„მსგავსი მონიტორინგის ფარგლებში, სახალხო დამცველის აპარატისთვის ცნობილი გახდა, რომ 2023 წლის 15 იანვარს ყვარელში ლევან ბერძენიშვილს მოქალაქეთა ჯგუფმა არ მისცა ლექციის ჩატარების შესაძლებლობა. წინამდებარე საქმისთვის არსებითი მნიშვნელობის მქონე გარემოებების შესწავლის შედეგად, გამოიკვეთა, რომ აღნიშნული ინციდენტის მართვისას საქართველოს შინაგან საქმეთა სამინისტროს წარმომადგენლებს არ შეუსრულებიათ მათი პოზიტიური ვალდებულება, ხელი შეეწყოთ ლევან ბერძენიშვილის მხრიდან გამოხატვის თავისუფლებით სრულფასოვნად სარგებლობისთვის.“

აპარატი მიმართავს წინადადებით სამინისტროს, მომავალში გაატაროს ყველა აუცილებელი ღონისძიება უფლებით სრულფასოვნად სარგებლობის უზრუნველსაყოფად.

15 იანვარს ყვარლის „ევრო კლუბში“, სადაც ფუნქციონირებს „ამერიკული კუთხე“, ლევან ბერძენიშვილის ლექცია ძალადობრივმა ჯგუფებმა ჩაშალეს.

სრულად ეს წერილი იხილეთ ამ ბმულზე.