ნატო-ს გენერალური მდივნის, იენს სტოლტენბერგის განცხადებით, მოსკოვსა და მინსკს გაეგზავნა მკაფიო გზავნილი, რომ ალიანსიდაიცავს ყველა მოკავშირეს, ნატო-ს ტერიტორიის ყოველ ინჩს.

„ჩვენ გავუგზავნეთ მკაფიო მესიჯი მოსკოვსა და მინსკს, რომ ნატო დაიცავს ყველა მოკავშირეს, ნატო-ს ტერიტორიის ყოველ ინჩს. ჩვენ უკვე გავზარდეთ ჩვენი სამხედრო ყოფნა ალიანსის აღმოსავლეთ ნაწილში და მივიღებთ შემდგომ გადაწყვეტილებებს, რათა კიდევ უფრო გავაძლიეროთ ჩვენი კოლექტიური თავდაცვის უფრო მაღალი მზადყოფნის ძალებითა და მეტი შესაძლებლობებით მომავალ სამიტზე“, – განაცხადა სტოლტენბერგმა ჰააგაში, ნატო-ს შვიდი ქვეყნის ლიდერებთან შეხვედრის შემდეგ გამართულ ერთობლივ პრესკონფერენციაზე.

მისი თქმით, ალიანსი მზადაა დაიცვას მოკავშირეები ბელარუსისა და რუსეთისგან და რომ „ვაგნერის“ ამბოხებასთან დაკავშირებული მოვლენები რუსეთის შიდა საქმეებია".

ნატო-ს გენერალური მდივანი, იენს სტოლტენბერგი ჰააგაში ნატო-ს შვიდი მოკავშირის ლიდერებს შეხვდა. მათ ალიანსის ვილნიუსში დაგეგმილი სამიტის მომზადების საკითხებზე იმსჯელეს. შეხვედრას ნიდერლანდების პრემიერ-მინისტრი მარკ რუტე, ალბანეთის პრემიერ-მინისტრი ედი რამა, ბელგიის პრემიერ- მინისტრი ალექსანდრე დე კროო, ლიეტუვის პრეზიდენტი გიტანას ნაუსედა, ნორვეგიის პრემიერ-მინისტრი იონას გარ შტორე, პოლონეთის პრეზიდენტი ანდჯეი დუდა და რუმინეთის პრეზიდენტი კლაუს იოჰანისი ესწრებოდნენ.

ამასთან, ნატო-ს გენერალური მდივნის განცხადებით, ამბოხებამ აჩვენა, რომ უკრაინის წინააღმდეგ პუტინის უკანონო ომმა რუსეთში განხეთქილება გააღრმავა.

„ამავდროულად, ჩვენ არასათანადოდ არ უნდა შევაფასოთ რუსეთი. ასე რომ, კიდევ უფრო მნიშვნელოვანია, გავაგრძელოთ უკრაინის მხარდაჭერა“, – აღნიშნა სტოლტენბერგმა.

ipn