"ხელისუფლება ცდილობს მისი ინიციატივა ჟურნალისტების არაეთიკური ქცევით ახსნას, რაც ლეგიტიმური იქნებოდა (ოღონდ აქაც პროპორციული ზომებით) რომ არა კ ო ნ ტ ე ქ ს ტ ი, რაც ყოველთვის უნდა გვახსოვდეს, როცა ავტორიტარულ სისტემაზე ვსაუბრობთ. ყველა ჯერზე, როცა რაიმე შეზღუდვის დაწესების ახსნას კეთილშობილური მიზნებით შეეცდებიან, უნდა შევხედოთ კონტექსტს. სხვაგვარად უბრალოდ პროპაგანდის მსხვერპლი ვიქნებით. კონტექსტი კი შემდეგია:

დღეს პარლამენტი პრაქტიკულად ერთადერთი ადგილია, სადაც ხალხის მიერ არჩეული დეპუტატების - ხელისუფლების წარმომადგენლების მიმართ ისმის კრიტიკული კითხვები კრიტიკული მედიასაშუალებებისგან, ვინაიდან სახელისუფლებო დეპუტატები კრიტიკულ მედიაში არ დადიან, დებატებს და შინაარსობრივ დისკუსიას ოპონენტებთან საკუთარ ტელევიზიებშიც გაურბიან და არ ასრულებენ ხალხის წინაშე ანგარიშვალდებულების ფუნქციას.

ბოლო 2 წლის განმავლობაში ადგილი ჰქონდა ჟურნალისტებზე არაერთ თავდასხმას, ჟურნალისტების მიმართ ყველაზე მასშტაბური ძალადობის (05-06 ივლისის მოვლენები) ორგანიზატორები დღემდე არავის დაუსჯია. ყოველდღიურად ხელისუფლების წარმომადგენლები თავს ესხმიან მედიის წარმომადგენლებს სხვადასხვა ფორმით.

დღეს დაიწყება პარლამენტით და ხვალ შეიძლება ასეთივე წარმატებით შეიზღუდოს ჟურნალისტების საქმიანობა პარლამენტს გარეთ, რაც ნიშნავს იმას, რომ ხალხი ინფორმაციას მიიღებს მხოლოდ სამთავრობო მედიასაშუალებებიდან, რომელიც მოდელირებულ რეალობას გადმოსცემს და პროპაგანდას ეწევა ზუსტად ისე, როგორც ეს ხდება რუსეთში.

არათუ ეს საშიში ინიციატივა, ნებისმიერი ჯანსაღი ინიციატივა ასეთი ხელისუფლების ხელში, უდიდესი საფრთხის მატარებელია. უკვე მრავლად ვნახეთ მსგავსი მაგალითები - რეფორმის სახელით გაუქმებული დამოუკიდებელი ინსტიტუტი, მართლმსაჯულების სახელით დაკავებული მედიასაშუალების მფლობელი, ქვეყნის ინტერესების დაცვის სახელით ხელიდან გაშვებული კანდიდატის სტატუსი და ა.შ.

ამიტომ, უნდა ვიცოდეთ კონტექსტი.", - წერს სოციალურ სოციალურ ქსელში ნათია მეზვრიშვილი.