„ქართული ოცნების“ პარლამენტმა I მოსმენით, 85 ხმით მხარი დაუჭირა კანონპროექტს, რომლითაც სამოქალაქო ორგანიზაციებისთვის გრანტების გასაცემად სსიპ – სახელმწიფო გრანტის მართვის სააგენტო შეიქმნება.

სსიპ-ის მიზანი იქნება საქართველოში მოქმედი საზოგადოებრივი ორგანიზაციების მხარდაჭერა, გრანტების გაცემა.

„ოცნების“ მთავრობის ინიციატივით მომზადებული საკანონმდებლო ცვლილება პლენარულ სხდომაზე საპარლამენტო მდივანმა, ვახტანგ ბაჩიაშვილმა წარადგინა.

მისი თქმით, „სამოქალაქო ინიციატივების მხარდაჭერის მიზნით, მიმდინარე წელს, სახელმწიფო ბიუჯეტიდან 20 მილიონი ლარის გამოყოფაა გათვალისწინებული“.

კანონპროექტის მიხედვით, სახელმწიფო გრანტის მართვის სააგენტოს მიზანი იქნება:

• განათლების სფეროში სწავლა-სწავლების ხარისხის გასაუმჯობესებლად გრანტების გაცემა;
• სწავლასთან დაკავშირებული ხარჯების დასაფინანსებლად გრანტების გაცემა;
• სამეცნიერო გრანტების გაცემა;
• ეროვნული უმცირესობებით კომპაქტურად დასახლებულ და მაღალმთიან რეგიონებში მცხოვრები მოქალაქეების ინტეგრაციის ხელშეწყობისთვის გრანტების გაცემა;
• ახალგაზრდული და საზოგადოებრივი პროექტების დასაფინანსებლად გრანტების გაცემა;
• დასაქმების ხელშეწყობისთვის გრანტების გაცემა;
• იძულებით გადაადგილებულ პირთა – დევნილთა და სტიქიური მოვლენების შედეგად დაზარალებულ და გადაადგილებისადმი დაქვემდებარებულ ოჯახთა (ეკომიგრანტთა) სოციალურ-ეკონომიკური ინტეგრაციის მიზნით მათთვის საარსებო წყაროების ხელმისაწვდომობის უზრუნველსაყოფად გრანტების გაცემა;
• საქართველოში საერთაშორისო დაცვის მქონე პირთა, საქართველოში თავშესაფრის მაძიებელ უცხოელთა და საქართველოში სტატუსის მქონე მოქალაქეობის არმქონე პირთა ადგილობრივი ინტეგრაციის მიზნით და საქართველოში დაბრუნებულ მიგრანტთა სარეინტეგრაციო დახმარების უზრუნველსაყოფად გრანტების გაცემა;
• საქართველოში განხორციელებული რეფორმებისა და ინოვაციების პოპულარიზაცია და საერთაშორისო საზოგადოებაში მათი დამკვიდრების ხელშეწყობა;
• საქართველოს პარტნიორი ქვეყნების მთავრობებისთვის განათლების, ჯანმრთელობის დაცვის, სოციალური უზრუნველყოფისა და მდგრადი განვითარების სფეროებში, ბუნებრივი და ადამიანის ზემოქმედებით გამოწვეული კატასტროფების შედეგების აღმოფხვრაში დახმარების გაწევა;
• სასოფლო-სამეურნეო კოოპერატივების მიმართ სახელმწიფო ხელშემწყობი ღონისძიებების განხორციელება;
• საზოგადოებრივი ორგანიზაციის მხარდაჭერა;

ამასთან, კანონს ემატება ნორმა, რომლის მიხედვით, აღნიშნული საჯარო სამართლის იურიდიულ პირის ხელმძღვანელს, საზოგადოებრივი ორგანიზაციების მხარდაჭერის მიზნებისთვის, ექნება, როგორც ნორმატიული ხასიათის, ასევე, ინდივიდუალური ადმინისტრაციულ-სამართლებრივი აქტის გამოცემის უფლებამოსილება.

კანონპროექტის მიხედვით, სააგენტოში დასაქმდება, დაახლოებით, 10 პირი. სააგენტოს წლიური სახელფასო ფონდის ოდენობა სააგენტოს შექმნის შემდეგ შესაბამისი კანონქვემდებარე აქტით განისაზღვრება.

რაც შეეხება სააგენტოს დაფინანსებას, კანონპროექტში წერია, რომ 2025 წლის ბიუჯეტიდან „სამოქალაქო ინიციატივების მხარდაჭერისთვის“ გამოყოფილი 20 მილიონი ლარი მოხმარდება სააგენტოს შექმნას და მის ფუნქციონირებას, ასევე გრანტის სახით გასაცემი თანხების დაფინანსებას.

ინიციატორი კანონპროექტის დაჩქარებული წესით განხილვას მოითხოვს.

„ოცნება“ ირწმუნება, რომ არასამთავრობო ორგანიზაციების სახელმწიფო ფინანსებით განვითარების და წახალისების პროგრამა ევროპის არაერთ ქვეყანაში არსებობს.

განმარტებით ბარათში ასეთ ქვეყნებად დასახელებულია ესტონეთი, პოლონეთი, ბულგარეთი, ხორვატია, შვედეთი, ლატვია, ჩეხეთი, უნგრეთი.

„გრანტების შესახებ“ კანონში ცვლილება ერთ-ერთი იყო იმ საკანონმდებლო ინიციატივებს შორის, რომლის შესახებაც მამუკა მდინარაძემ გასულ კვირას ისაუბრა.

მანამდე, გასულ წელს, ირაკლი კობახიძემ განაცხადა, რომ მთავრობამ გადაწყვიტა, NGO-ები სახელმწიფო ბიუჯეტიდან დააფინანსოს.

ეს ინიციატივა „ქართულ ოცნებას“ ანტიდასავლური ნარატივების ფონზე რუსული კანონის მიღების შემდეგ გაუჩნდა.

„ოცნების“ ანტიდასავლური, კონსპირაციული ნარატივის მიხედვით, უცხოური ორგანიზაციების მიერ დაფინანსებული ქართული სამოქალაქო ორგანიზაციები დამფინანსებელი დონორების გავლენის ქვეშ ექცევიან და, საქართველოს ინტერესების საწინააღმდეგოდ, მათ ინტერესს ატარებენ.

პუბლიკა