Search the Community

დავით საგანელიძე თბილისის საკრებულოს თავმჯდომარის მოადგილის თანამდებობიდან გადააყენეს. კენჭისყრის დაწყებამდე მან სიტყვა ითხოვა. როგორც საგანელიძემ განაცხადა, მას კარგად ესმის, რომ ეს გადაწყვეტილება მიღებულია "ნაციონალური მოძრაობის" ლიდერების მიერ კოალიცია "ქართულ ოცნებაში" მისი გაწევრიანების გამო. "ამ გადაწყვეტილების აღსრულება დაგევალათ თქვენ, რის გამოც საკრებულოს სხდომაზე უნდა დააყენოთ ჩემი გათავისუფლების საკითხი და მოიგონოთ გათავისუფლების რაიმე სხვა მიზეზი", - აღნიშნა საგანელიძემ და დასძინა, რომ მან სცადა კოლეგებისთვის ეს უხერხულობა თავიდან აერიდებინა, ამიტომ თავადვე დაწერა განცხადება გადადგომის შესახებ. თუმცა, როგორც საკრებულოს უმრავლესობის წევრებმა აღნიშნეს, საკითხი პროცედურების გათვალისწინებით კენჭისყრაზე აუცილებლად უნდა გასულიყო და შედეგად დავით საგანელიძე, ფარული კენჭისკრის შედეგად, საკრებულოს თავმჯდომარეობიდან 33 ხმით, არც ერთის წინააღმდეგ, გადააყენეს. კენჭისყრაში მონაწილეობა არ მიუღია ოპოზიციას. დავით საგანელიძის გადაყენების მიზეზები საკრებულოს სხდომაზე განმარტა საკრებულოს თავმჯდომარის მოადგილე ზაალ სამადაშვილმა. მისი განცხადებით, ბოლო პერიოდში დავით საგანელიძის მხრიდან გახშირდა არაკორექტული გამონათქვამები. გარდა ამისა, სამადაშვილის თქმით, უმრავლესობამ მის მიმართ ნდობა დაკარგა. "ამ ადამიანმა მისთვის უკეთეს პირობებს მიაგნო და მოიპოვა ის, რისმა უკმარისობამაც ჩვენთან მოიყვანა. ამიტომ მან დაკარგა ნდობა, რაც ჩვენთან თანამშრომლობას შეუძლებელს ხდის", - განმარტა ზაალ სამადაშვილმა.