"ქართული ოცნების" "კარდაკარის" მონაწილემ მდუმარე აქცია დაიწყო

[lasha_alo]

ლანჩხუთის რაიონში "ქართული ოცნების" პროგრამა "კარდაკარის" მონაწილემ შოთა ფირცხალაიშვილმა "საქართველოს ბანკის" ლანჩხუთის ფილიალის წინ მდუმარე აქცია დაიწყო.

როგორც "ინტერპრესნიუსის" კორესპონდენტი იუწყება, ფირცხალაიშვილმა მოქალაქეებს ფულადი შემწეობა სთხოვა. მან ერთი საათის განმავლობაში შეგროვებული სიმბოლური 99 თეთრი "საქართველოს ბანკში" პირად ანგარიშზე შეიტანა.

ფირცხალაიშვილის თქმით, ის "საქართველოს ბანკთან" აქციას მანამდე გააგრძელებს, ვიდრე ბანკის წარმომადგენლები არ აუხსნიან, თუ რატომ დააჯარიმეს 999 ათას 999 ლარით და რატომ არის მისი პირადი ანგარიშები დაყადაღებული.

შესაბამისი პასუხის მიუღებლობის შემთხვევაში, შოთა ფირცხალაიშვილი ხვალ შიმშილობის დაწყებას გეგმავს. ხვალ მას პროგრამა კარდაკარის 11 დაჯარიმებულიც შეუერთდება.

კოალიცია "ქართული ოცნების" ლანჩხუთის საარჩევნო შტაბის წევრების განცხადებით, მათ და პროგრამა კარდაკარის 11 მონაწილეს 4 დღის წინ "საქართველოს ბანკში" გახსნილი პირადი ანგარიშები დაუყადაღეს. თითოეულ მათგანს ბანკმა 999 ათას 999 ლარის ოდენობის ჯარიმა დააკისრა.

თუმცა "საქართველოს ბანკის" განცხადებით, "ქართული ოცნების" ლანჩხუთელი წევრების ანგარიშებს ყადაღა არ ადევს და არც რაიმე სახის დავალიანება ერიცხებათ.

როგორც "ინტერპრესნიუსს" "საქართველოს ბანკის" საზოგადოებასთან ურთიერთობის სამსახურის ხელმძღვანელმა, სოფო ბალავაძემ 28 ივლისს განუცხადა, დავალიანების მაჩვენებელი, რომელიც "ქართული ოცნების" ლანჩხუთელ წევრებს ქვითარმა აჩვენა, ტექნიკური ხარვეზის შედეგია.

"ბანკომატის ქვითარზე რაც დაიბეჭდა, ვითომ ნაშთი, ეს არ არის ჯარიმა, ეს არის ტექნიკური შეცდომა. შეცდომას აგდებს სისტემა, რადგან ტექნიკური ხარვეზია თვითონ ანგარიშზე. რაც შეეხება ანგარიშებზე არსებულ მდგომარეობას, ლანჩხუთის სერვისცენტში გუშინ ჩვენ წერილობით მოგვმართა ოთხმა მოქალაქემ, ჯანგულ ქინქლაძემ, შოთა ფირცხალაიშვილმა, ლილი ებრალიძემ და რომან ბიწაძემ. ეს პირები წერილობით ითხოვდნენ მათ ანგარიშებზე არსებული მდგომარეობის შესახებ ახსნა-განმარტებას. ჩვენ წერილობითვე ვუპასუხეთ, რომ მათ ანგარიშებზე ყადაღა არ არის", - განაცხადა სოფო ბალავაძემ.