epn.ge - საქართველო უახლოეს მომავალში ჭურვებისა და რაკეტების გამოშვებას დაიწყებს

[planetanews]

http://www.epn.ge/wp-content/uploads/2012/03/saakashvili-chaafurtxet11-300x2351111.jpgმიხეილ სააკაშვილის თქმით, საქართველო უახლოეს მომავალში ჭურვებისა და რაკეტების გამოშვებას დაიწყებს.

ამის შესახებ განცხადება, საქართველოს პრეზიდენტმა, მიხეილ სააკაშვილმა ვაზიანის სამხედრო პოლიგონზე, ქართული წარმოების ახალი ზალპური რეაქტიული სისტემის პრეზენტაციაზე განაცხადა.

პრეზიდენტის თქმით, მთავარ პრობლემას, რის გამოც ვერ ხერხდებოდა ტექნიკის წარმოება  თხევადი საწვავი წარმოადგენდა და ეს პრობლემა უკვე აღმოფხვრილია.

“ჩვენ ახლა ვერთვებით ძალიან ბევრ საერთაშორისო თანამშრომლობაში. ძალიან ბევრი ახალი პერსპექტივა გაჩნდა ჩვენი თავდაცვის ძალების განვითარების და აღჭურვის თვალსაზრისით, მაგრამ რაც არ უნდა პესრპექტივები გაჩნდეს, არასოდეს საკუთარზე არ უნდა ვთქვათ უარი”, _ განაცხადა მიხეილ სააკაშვილმა.

მისივე თქმით, საკუთარი წარმოება ქვეყანას სამ-ოთხჯერ უფრო იაფი უჯდება და ის გაცილებით მეტად ეფექტურია.

“ჩვენი ქვეითთა მუხლუხოიანი მანქანა 3-4ჯერ  უფრო იაფია ვიდრე საზღვარგარეთიდან შემოტანილი.მეორეც, აღარ ხარ დამოკიდებული იმაზე, რომ ვიღაცამ არ მოგატყუოს, ინფორმაცია სხვას არ გაუზიაროს ან გადამწყვეტ მომენტში უარი არ გითხრას და შეგიჩეროს ამის მოწოდება. ეს ასევე არის დიდი საექსპორტო პროდუქტი. ეს შენია, შენ აკეთებ, ამიტომ ეს უფრო დაცულია, მით უმეტეს, ჩვენისთანა ქვეყნისთვის”, _ განაცხადა მიხეილ სააკაშვილმა.

მსივე თქმით, ეს არის უკვე მაღალტექნოლოგიური ქართული წარმოება, რომლის წარმოებაშიც რამდენიმე ათასი ადამიანი მუდმივად დასაქმებულია.

ვაზიანის სამხედრო პოლიგონზე ქართული წარმოების ახალი ზალპური რეაქტიული სისტემის პრეზენტაცია გაიმართა, რომელსაც პრეზიდენტი, მიხეილ სააკაშვილი და თავდაცვის მინისტრი, ბაჩო ახალაია ესწრებოდნენ.

საბრძოლო მანქანას ცეცხლის წარმოება, პოზიციის წინასწარი მომზადების გარეშე და გათვლის კაბინიდან გადმოუსვლელად შეუძლია, რაც ზალპის განსახორციელებლად საჭირო დროს მინიმუმამდე ამცირებს. მანქანას გააჩნია დაჯავშნული კაბინა, რომელიც მასში მყოფ ხუთკაციან გათვლის დაცვას, ტყვიებისა და ნამსხვრევებისგან უზრუნველყოფს.

 

 

იხილეთ epn.ge