რესპუბლიკელები: ახმეტაში მე-12 კლასელებს „ნაცმოძრაობის“ მხარდაჭერას აიძულებენ

[planetanews]

„ალიანსი საქართველოსთვის“ ახმეტის რაიონული ორგანიზაცია „ნაციონალური მოძრაობის“ სოფელ ზემო ალვანის მაჟორიტარი დეპუტატობის კანდიდატს ბესო ყიზილაშვილს საარჩევნო ხმის უფლების მქონე მე-12 კლასელებზე ზეწოლაში ადანაშაულებს. როგორც კახეთის საინფორმაციო ცენტრს ალიანსის წარმომადგენელმა ზაზა ლაგაზიძემ განუცხადა, ბესო ყიზილაშვილი ახმეტის სამხედრო გაწვევისა და აღრიცხვის სამსახურის სპეციალისტია. „მართალია ის ამ დროისთვის შვებულებაში იმყოფება, თუმცა თავის თანამდებობრივ მდგომარეობას იყენებს და ბავშვებზე ზეწოლას ახდენს. მათ ემუქრება, რომ თუ არჩევნებში ხმას „ნაციონალურ მოძრაობას“ არ მისცემენ, ჯარში გაიწვევს და უმაღლეს სასწავლებელში ჩაბარებას ვეღარ შეძლებენ“, - განაცხადა ლაგაზიძემ.

 

 

ყიზილაშვილის მხრიდან მე-12 კლასელებზე ზეწოლის ფაქტი კახეთის საინფორმაციო ცენტრს ზემო ალვანის საჯარო სკოლის მე-12 კლასის რამდენიმე მოსწავლემაც დაუდასტურა.

 

 

თავად ყიზილაშვილი საარჩევნო ხმის უფლების მქონე მოსწავლეებზე ზეწოლას არ ადასტურებს. „ჩემთან ერთად გადაამოწმეთ ეგ ამბავი და არცერთი მოსწავლე მაგას არ იტყვის. ჩემს გარეშე რას გეუბნებიან, არ მაინტერესებს“, - აღნიშნა ყიზილაშვილმა.

 

 

კახეთის საინფორმაციო ცენტრი

 

 

 

View the full article