epn.ge - IRI-მ გამოკითხვის შედეგები გამოაქვეყნა

[planetanews]

http://www.epn.ge/wp-content/uploads/IRI-150x150.gif“საერთაშორისო რესპუბლიკურმა ინსტიტუტმა” საზოგადოებრივი აზრის კვლევა დაასრულა. გამოკითხვა საქართველოს მასშტაბით 4-დან 13 მარტამდე ტარდებოდა.

 

 

გამოიკითხა 1800 რესპონდენტი, 1000 საქართველოს სხვადასხვა რეგიონიდან, 800 კი თბილისიდან. გამოკითხვის ცდომილება 2.3 პროცენტს არ აღემატება. კვლევა “აი-არ-აის”(IRI) დაკვეთითა და “იუესეიდის”(USAID) დაფინანსებით ჩატარდა.

 

 

“მერის არჩევნები ხვალ რომ ტარდებოდეს, მერობის რომელ კანდიდატს მისცემდით ხმას?” ამ კითხვაზე გამოკითხული მოსახლეობის 46-მა პროცენტმა მოქმედი მერის გიგი უგულავას კანდიდატურას დაუჭირა მხარი; 9% მხარს არავის უჭერს; 16%-ს კი გადაწყვეტილება ჯერ არ მიუღია.

 

 

კვლევაში პარტიების რეიტინგიცაა მოცემული. რეიტინგულ პარტიათა სამეულში ლიდერობს “ერთიანი ნაციონალური მოძრაობა”, რომელსაც ქვეყნის მასშტაბით გამოკითხულთა 36% უჭერს მხარს, თბილისში კი 32%. მეორე ადგილზეა “ქრისტიან-დემოკრატიული მოძრაობა” ქვეყნის მასშტაბით 10%-ით, თბილისში კი 7%-ით. რეიტინგში მესამეა “ლეიბორისტული პარტია”, რომელიც არჩევნებში მონაწილეობას საერთოდ არ იღებს. პარტიის რეიტინგი რეგიონებში 8%-ია, თბილისში კი 7%.

 

 

“ალიანსი საქართველოსთვის” რეიტინგის სამეულში ვერ მოხვდა. პარტიას ქვეყნის მასშტაბით 6%, თბილისში კი 7% უჭერს მხარს.

 

 

ნინო ბურჯანაძის “დემოკრატიული მოძრაობა – ერთიანი საქართველოს” რეიტინგი 1% შეადგენს.

 

 

“ვის შეუძლია რუსული აგრესიის პირობებში ქვეყნის მართვა ყველაზე უკეთ?”, – კვლევის მიხედვით გამოკითხული მოსახლეობის 34% მხარს პრეზიდენტ მიხეილ სააკაშვილს უჭერს, 8% – “ქრისტიან-დემოკრატიული მოძრაობის” ლიდერ გიორგი თარგამაძეს, 6% -”ალიანსი საქართველოსთვის” ლიდერ ირაკლი ალასანიას, 5% – “ლეიბორისტული პარტიის” ლიდერ შალვა ნათელაშვილს, 4% – “დემოკრატიული მოძრაობა – ერთიანი საქართველოს” ლიდერ ნინო ბურჯანაძეს, “მოძრაობა სამართლიანი საქართველოსთვის” ლიდერ ზურაბ ნოღაიდელს კი გამოკითხულთა 3% უჭერს მხარს.

 

 

“რომელ ლიდერს შეუძლია ქვეყნის მართვა ყველაზე უკეთ მსოფლიო ფინანსური კრიზისის დროს?” – ლიდერების რეიტინგი კვლევის ამ ნაწილში ასეთია: მიხეილ სააკაშვილს – 40%; გიორგი თარგამაძეს – 8%; ირაკლი ალასანიას – 5%; შალვა ნათელაშვილს – 5%; ნინო ბურჯანაძეს – 2%; ზურაბ ნოღაიდელს – 1%.

 

 

საზოგადოებრივი აზრის კვლევაში ისიც არის გამოკვლეული, თუ როგორია მოსახლეობის პოლიტიკური დაინტერესება. გამოკითხული მოსახლეობის 42%-ის პოლიტიკური დაინტერესება დაბალია, 33%-ის საშუალო, პოლიტიკით მაღალი დაინტერესება მოსახლეობის მხოლოდ 24% აქვს.

 

 

“საერთაშორისო რესპუბლიკური ინსტიტუტის” მიერ ჩატარებულ კვლევაში ეჭვის შეტანის საფუძველს ვერ ხედავენ საპარლამენტო ოპოზიციასა და უმრავლესობაში. ისინი კველვას დადებითად აფასებენ და აცხადებენ, რომ ეს მონაცემები მოსახლეობის რეალურ განწყობას ასახავს.

 

 

 

 

იხილეთ epn.ge