ყველა აქტივობა

რუსეთის საოკუპაციო ძალების მიერ ქარელის მუნიციპალიტეტის სოფელ დირბის მიმდებარედ დაკავებული საქართველოს ორი მოქალაქე თავისუფალია. სუს-ის ცნობით, ტრისტან მუშკიაშვილი და ვალერი თეთრუაშვილი ცენტრალური ხელისუფლების მიერ კონტროლირებად ტერიტორიაზე იმყოფებიან. ამ ეტაპზე უკანონო პატიმრობაში რჩება მათთან ერთად დაკავებული კიდევ ერთი პირი. „აღნიშნული პირების უკანონო პატიმრობიდან გათავისუფლების პროცესში აქტიურად გამოიყენებოდა როგორც საქართველოში ევროკავშირის მონიტორინგის მისიის (EUMM) უშუალო ჩართულობით მოქმედი „ცხელი ხაზის“ მექანიზმი, ისე ცენტრალური ხელისუფლების ხელთ არსებული ყველა რელევანტური ინსტრუმენტი. საქართველოს ცენტრალური ხელისუფლება ინფორმაციას მუდმივ რეჟიმში აწვდიდა საერთაშორისო პარტნიორებს. საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას“, — აცხადებს სუსი.

"ოცნება" განაგრძობს ეროვნული უსაფრთხოებისთვის ძირგამომთხრელ საქმიანობას და სუს-ის გამოყენებით სამოქალაქო დაპირისპირების წაქეზებას. განსხვავებული აზრის მქონე ახალგაზრდების და საზოგადო მოქალაქეების წინააღმდეგ განხორციელებულ ფიზიკურ თავდასხმებს კიდევ ერთი უკანონო ინიციატივა დაემატა. პარლამენტის თავმჯდომარემ გაურკვეველი და სრულიად არაკონსტიტუციური რეგისტრის შექმნა დააანონსა, რომლის საშუალებით ოცნება მისი მოწინააღმდეგე მოქალაქეების მტრებად გამოცხადებას გეგმავს. მსგავსი აბსურდული, რუსული მეთოდები ხაზს უსვამს ოცნების არაადეკვატურობას და მძიმე ზიანს აყენებს საქართველოს ეროვნულ უსაფრთხოებას. ცდილობს რა ძალაუფლების შენარჩუნებას, საქართველოს უსუსური და კორუმპირებული ხელისუფლება იქცა მოსკოვის სასარგებლო იდიოტად. ივანიშვილი ღიად ებრძვის ახალგაზრდებს, საკუთარ მოსახლეობას. ყველა, ვინც ამ უკანონო ქმედებებში მონაწილეობს, პასუხს აგებს კანონის წინაშე! მოვუწოდებ საჯარო მოხელეებს, იმოქმედონ გონივრულად და საკუთარი ხალხის ინტერესებიდან გამომდინარე. კონსტიტუციური წესრიგის არარსებობის პირობებში, საჯარო მოხელეებს განსაკუთრებული პასუხისმგებლობა ეკისრებათ, რადგან ხალხი სწორედ მათ იმედზეა." გიორგი გახარია, პარტია "გახარია საქართველოსთვის" თავმჯდომარე.

საპარლამენტო ოპოზიციის წევრები „დაგროვებითი პენსიის შესახებ“ კანონში შესატანი ცვლილებებს აკრიტიკებენ და ცვლილებების უკან საპენსიო დანაზოგების დაკარგვის რისკს ხედავენ. საუბარია პარლამენტში მთავრობის მიერ ინიციირებულ საკანონმდებლო ცვლილებათა პაკეტზე, რომლის ავტორიც ეკონომიკისა და მდგრადი განვითარების სამინისტროა. იცვლება საპენსიო სააგენტოს მართვის სტრუქტურა და საინვესტიციო და სამეთვალყურეო საბჭოების ნაცვლად გაჩნდება ერთი მმართველობითი ორგანო – „მმართველობითი საბჭო“, რომელიც განახორციელებს დაგროვებითი საპენსიო სქემის ერთიან მართვას და შეასრულებს როგორც საინვესტიციო, ისე ადმინისტრაციულ/საოპერაციო და სხვა ფუნქციებს. მმართველობითი სტრუქტურის დანიშვნის საკითხი კი მთავრობის დაქვემდებარებაში გადადის. ამასთან, ცვლილებები შეეხება საინვესტიციო აქტივების მართვასაც და შესაძლებელი გახდება სხვადასხვა პროექტის პირდაპირი დაფინანსება. გარდა ამისა, მოქალაქეებს აღარ შეეძლებათ, რომ საკუთარი საპენსიო აქტივები კერძო მმართველ კომპანიებში გადაიტანონ. ბოლო მონაცემებით, დაგროვებით საპენსიო სქემაში 1 503 000 ადამიანია ჩართული, რომელთა საპენსიო დანაზოგი, ჯამურად, 4.8 მილიარდი ლარია. როგორც საპარლამენტო პოლიტიკური ჯგუფის „ევროოპტიმისტების“ წევრი, რომან გოცირიძე აცხადებს, „დაგროვებითი პენსიის შესახებ“ კანონში შესატანი ცვლილები მთავრობის ახალი ავანტიურაა. „მთავრობა ახალ ავანტიურას იწყებს — საპენსიო სააგენტოს მართვის სტრუქტურას ცვლის, საიდანაც პარლამენტის ნაცვლად მთავრობა აკომპლექტებს საბჭოს. ცვლილებები შედის ასევე საპენსიო თანხების ინვესტირების წესში. ეს გამოიწვევს რისკიან და არამომგებიან ბიზნესში თანხების განთავსებას. ამას თან ახლავს კორუფციის რისკის ზრდაც, რადგან ფული სახელისუფლებო ბიზნესების ( მაგ. სამშენებლო კომპანიების) დასაფინანსებლადაც შეიძლება წარიმართოს. ეს კანონი ეხება თითოეული ჩვენგანის მომავლის უზრუნველყოფას და არ უნდა მივცეთ ხელისუფლებას ამ ცვლილებების პარლამენტში გატანის შესაძლებლობა“ ,— წერს რომან გოცირიძე სოციალურ ქსელში და დასძენს, რომ ყველა კანონი, რასაც ბოლო პერიოდში ხელისუფლება იღებს, მმართველი პარტიის პოლიტიკურ და ფინანსურ მიზნებს ემსახურება. პარტიის „გახარია – საქართველოსთვის“ წევრის, ბექა ლილუაშვილის თქმით, საპენსიო სააგენტოს ინსტიტუციური გადაწყობის არანაირი საჭიროება არ არსებობდა. ამიტომ, როგორც ის ნეტგაზეთთან ამბობს, მთავრობის მიერ დაგეგმილ ცვლილებებს „ძალიან მძიმე პოლიტიკური სუნი ასდის“. „სააგენტოს დამოუკიდებლობის ერთ-ერთი მნიშვნელოვანი გარანტია იყო საერთაშორისო საინვესტიციო საბჭო, საერთაშორისო ექსპერტებით დაკომპლექტებული, რომელიც, ფაქტობრივად, დამოუკიდებელ გადაწყვეტილებას იღებდა საინვესტიციო პოლიტიკის შემუშავების პროცესში. ე.წ. ორბორდიანი სისტემა იმიტომ იყო, რომ საინვესტიციო საქმიანობა საოპერაციო საქმიანობისგან გამიჯნულიყო. დამოუკიდებლობის სპეციალური დამცავები იყო ჩადებული, რადგან ყველა ხელისუფალს აქვს ცდუნება“ ,— აცხადებს ბექა ლილუაშვილი. როგორც ლილუაშვილი ამბობს, წარმატებული საპენსიო რეფორმები ქვეყნებში მაშინ მთავრდება, როგორც კი ხელისუფლებას ამ ფინანსური რესურსის გამოყენების სურვილი უჩნდება. მისი თქმით, როგორც ჩანს, მთავრობამ ვერ მოითმინა ასეთი ტიპის დანაზოგების დამოუკიდებლად მართვა და, ფაქტობრივად, საერთაშორისო საინვესტიციო ბორდის გაუქმება გადაწყვიტა. „მნიშვნელოვანია ისიც, რომ ამ ბორდში პარლამენტი ნიშნავდა წევრებს. ახლა პირდაპირ დაუქვემდებარებენ პრემიერ-მინისტრს. საერთოდ, როგორ შეიძლება, ფინანსური თვალსაზრისით ამხელა სააგენტოს დამოუკიდებლობის ხარისხი გაუმჯობესების ნაცვლად გააუარესო?! რა საჭირო იყო, პარლამენტი ვერ ნიშნავდა საპენსიო სააგენტოს ბორდის წევრებს?! მე გეტყვით, რაშია საქმე — მხოლოდ იმ ადამიანებს დანიშნავენ, რომლებიც მათი გავლენის ქვეშ იქნებიან. ახლაც ხომ ხორციელდება ცვლილებები, გაიზარდა ისეთ აქტივებში ინვესტიციების შესაძლებლობა, რასაც აქამდე კანონი კრძალავდა და ამის ლიმიტები იზრდება. მე დარწმუნებული ვარ, შემდეგი ცვლილება იქნება ისეთი, რომ ამ დანაზოგების გამოყენება ისეთ პროექტებში გახდება შესაძლებელი, რომელიც კარგი პრაქტიკის შესაბამისად არ უნდა მოხდეს. არაერთხელ გაგვიგონია ხელისუფლებისგან, რომ რატომ არ ფინანსდება, მაგალითად, ჰესები და ასეთი ტიპის პირდაპირი პროექტები, რომელიც არ არის კარგი პრაქტიკა. არცერთ ნორმალურ საპენსიო ფონდის ქვეყანაში პირდაპირი ინვესტიცია კაპიტალურ პროექტებში არ ხორციელდება, რადგან ამას აქვს ბევრი რისკი — საბაზრო რისკი, საოპერაციო რისკი, სამშენებლო რისკი და ა.შ. ჩვენ გვახსოვს ისეთი შემთხვევებიც, როცა ჰესის მშენებლობისთვის ერთი თანხა იყო დათვლილი და შემდეგ ისეთი კატასტროფა მოხდა უხარისხო მშენებლობის გამო, რომ, ფაქტობრივად, ინვესტიციის გასამმაგება გახდა საჭირო“, — აცხადებს ბექა ლილუაშვილი. გარდა ამისა, ბექა ლილუაშვილი ყურადღებას ამახვილებს იმაზეც, რომ საპენსიო დანაზოგებით სხვადასხვა პროექტის პირდაპირი დაფინანსება კორუფციის მაღალ რისკებს შეიცავს. „დღევანდელი საინვესტიციო პოლიტიკის პირობებში საპენსიო სააგენტოს შეუძლია, დანაზოგების ძირითადი ნაწილი დააბანდოს ისეთი კორპორაციების ფინანსურ ქაღალდებში, ობლიგაციებსა და აქციებში, როგორიცაა: Apple, Microsoft, Google და სხვა მსოფლიო გიგანტები, მეორე მხრივ კი, ბანკებში განათავსონ დეპოზიტებზე. ბუნებრივია, აქ კორუფციის სივრცე არ არსებობს, მაგრამ როგორც კი საპენსიო ფონდი დაიწყებს ინვესტირებას პირდაპირი სახით, იქნება ეს ინფრასტრუქტურული პროექტი, პორტი თუ ჰესი, ამ ქვეყანაში კორუფციის ერთ-ერთი უზარმაზარი წყაროს დამფინანსებელი ხდება. შესაბამისად, გამოდის, რომ როგორც დღეს გამოიყენება სახელმწიფო ინფრასტრუქტურული ინვესტიციები კორუფციის დასაფინანსებლად, ზუსტად იმავე კალათაში ექცევა საპენსიო ფონდში არსებული აქტივებიც“, — აცხადებს ბექა ლილუაშვილი. როგორც ბექა ლილუაშვილი ამბობს, იმ პირობებში, როცა ინსტიტუციაც და მისი ზედამხედველიც, დამოუკიდებლობის დაცვის ორი მექანიზმი, პრაქტიკულად მორღვეულია, არავინ იცის, ეს თანხები სად წავა და რაში დაიხარჯება. მისი თქმით, ეს ზრდის რისკებს, რომ მოქალაქეების საპენსიო დანაზოგები საერთოდ დაიკარგოს. ის პარალელს ავლებს 1990-იან წლებთან, როცა მოქალაქეებმა საბჭოთა კავშირის დროს დაგროვებული ანაბრები დაკარგეს. „ყველას კარგად ახსოვს, რომ ამ [საპენსიო] რეფორმის განხორციელებას ვერავინ ბედავდა იმ განწყობის გამო, რაც არსებობდა ხალხში ასეთი ტიპის ფონდებთან დაკავშირებით. აქ პრინციპული საკითხი იყო სწორედ დამოუკიდებლობა, რადგან სახელმწიფო ინტერესების შემთხვევაში უზარმაზარი რისკები ჩნდება. 90-იან წლებში დანაზოგების დაკარგვაც მაგას მოჰყვა, როცა სწორედ ე.წ. სახელმწიფო ბანკებში მოხდა ფულის განთავსება. ამიტომ ახლა რისკი დიდია, განსაკუთრებით, როცა ხელისუფლება პირდაპირ არის კონტროლის გამტარებელი საპენსიო სააგენტოში, ვგულისხმობ საინვესტიციო ნაწილს. ბუნებრივია, რისკი დიდია, რადგან საით გაისვრის ამ თანხას, სად წაიღებს და როგორ დააბანდებს, დამზღვევიც არავინ არ არის“, — აცხადებს ბექა ლილუაშვილი. ამასთან, ბექა ლილუაშვილის თქმით, ცვლილებებით, რომლითაც მოქალაქეებს აღარ შეეძლებათ, რომ საკუთარი საპენსიო აქტივები კერძო მმართველ კომპანიებში გადაიტანონ, მთავრობა მათ გასაქცევ კარს უქოლავს. რადგან მისი თქმით, იმ პირობებში, როცა საპენსიო ფონდის სანდოობა შეერყევა, მოქალაქეებს ბუნებრივად გაუჩნდებათ სურვილი, რომ თავიანთი აქტივები კერძო სექტორში წაიღონ. „როცა ხელისუფლება ხარ და დამოუკიდებლობის დაკარგვის უზარმაზარ რისკს აჩენ, ამ უზარმაზარი კითხვის ნიშნების პირობებში ადამიანებს შეუძლიათ, ეს ფული მარტივად გამოიტანონ და გადაიტანონ და საერთოდ მოგაშორონ შენ და შენს მენეჯმენტს. ბუნებრივია, ამ კარის დატოვებას არანაირი პრაგმატული აზრი არ რჩებოდა. ამიტომ ეს კარი უბრალოდ ამოქოლეს, რომ ადამიანები არსად არ გაიქცნენ და ეს თანხები პირდაპირ მოაქციეს თავიანთი ეფექტური კონტროლის ქვეშ. ეს დამზღვევიც იმიტომ იყო ჩადებული, რომ ფონდის ზრდასთან ერთად ჩვენ გვჭირდებოდა რაღაც პერიოდი რეფორმიდან, რომ ადამიანები შეჩვეოდნენ ამ პროცესს და თავის თვალით ენახათ, რომ ეს დანაზოგები ინვესტირდება, სარგებელს წერს და უსაფრთხოა, მაგრამ რაღაც ეტაპზე, დიდი ეკონომიკური ბერკეტის სახელმწიფო მმართველობაში მოქცევა არასწორია ეფექტიანობის და კონკურენციის კუთხით. შეიძლება ადამიანმა ნაწილი კერძო ფონდში გადაიტანოს, ნაწილი სახელმწიფო ფონდში დატოვოს ან კერძო ფონდში გადაიტანოს ყველა და სამ სხვადასხვა ფონდში გადაანაწილოს. ამით თავის აქტივების დივერსიფიცირებას ახდენს და უფრო იცავს“, – აცხადებს ბექა ლილუაშვილი და დასძენს, რომ მთავრობამ ეს „ჯანსაღი პროცესიც მოშალა“. როგორც ბექა ლილუაშვილი ამბობს, „დაგროვებითი პენსიის შესახებ“ კანონში შესატანი ცვლილებები ერთი დიდი სტრატეგიის ნაწილია, რომლის მიზანიც ხელისუფლების გახანგრძლივების ფინანსურ საფუძვლის მომზადებაა. მისი თქმით, რუსული კანონის მიღებით „ქართული ოცნების“ დამფუძნებელი და საპატიო თავმჯდომარე ბიძინა ივანიშვილი, ერთი მხრივ, საგარეო დაფინანსების წყაროების შეზღუდვას, „დაგროვებითი პენსიის შესახებ“ ცვლილებებით კი შიდა რესურსების გამოყენებასაც თავის კონტროლს დაუქვემდებარებს. „ჩვენ ვნახეთ, ეროვნულ ბანკზე და ბიუჯეტზე პირდაპირ კონტროლს მოჰყვა ქვეყნის გამოყენება ოფშორული ფულის მომსახურების ინტერესებისთვის. ახლა უკვე საპენსიო დანაზოგს მიადგნენ და ამასაც ცდილობენ, რომ ხელისუფლების გახანგრძლივების ფინანსურ საფუძვლად და ბერკეტად გამოიყენონ. ამიტომ ეს ძალიან მძიმე ცვლილებებია სინამდვილეში“, — აცხადებს ბექა ლილუაშვილი. პუბლიკა

ევროპარლამენტარი მირიამ ლექსმანი მონაცემთა ბაზის შექმნის შესახებ „ქართული ოცნების” ახალ ინიციატივას ეხმაურება და გადაწყვეტილებას „ავტორიტარიზმად” აფასებს. ამის შესახებ ის სოციალურ ქსელ X-ში წერს. შალვა პაპუაშვილმა დააანონსა მონაცემთა ბაზის შექმნა, სადაც მმართველი პარტია განათავსებს ინფორმაციას იმ ადამიანებს შესახებ, ვინც მათი შეფასებით, ჩართული არიან „ძალადობაში, კანონსაწინააღმდეგო ქმედებაში, მუქარასა და შანტაჟში” ან ამგვარ ქმედებებს საჯაროდ იწონებენ. პაპუაშვილის განცხადებით, ბაზაში შეიძლება იყოს სისხლისსამართლებრივი ან სხვა განზომილება, რომელიც არ ჯდება სისხლისსამართლებრივ კატეგორიაში, მაგრამ საჭიროა „ამის მორალური შეფასება“. პუბლიკა

შინაგან საქმეთა სამინისტროს ცენტრალური კრიმინალური პოლიციის უფროსმა, თეიმურაზ კუპატაძემ ბრიფინგი გამართა. მისი თქმით, ბოლო პერიოდში, სხვადასხვა პოლიტიკური ლიდერისა და აქციის ორგანიზატორების მხრიდან, მედიასაშუალებებსა და სოციალურ ქსელებში გავრცელდა არაერთი დეზინფორმაცია იმის შესახებ, თითქოს სამართალდამცველებმა დემონსტრანტების წინააღმდეგ ძალას გადაამეტეს და განახორციელეს კანონსაწინააღმდეგო ქმედებები. კუპატაძის განცხადებით, „იმ დროს, როდესაც პოლიცია კანონის შესაბამისად დაიწყებს აქციის მონაწილეთა ძალადობრივი ქმედებების აღკვეთას, გამოყენებული იქნება მკაცრი ზომები, ისევე როგორც ამერიკის და ევროპის წამყვან ქვეყნებშია მიღებული“. სამსახურის განცხადება სრულად იხილეთ ბმულზე. პუბლიკა

„რეგიონულ მაუწყებელთა ალიანსის“ დირექტორის, ნათია კუპრაშვილის განცხადებით, უცხო ნომრიდან უკვე მეოთხედ დაურეკეს და დაემუქრნენ. ნათია კუპრაშვილის განმარტებით, უცნობმა პირმა, რომელიც ნომერზე ურეკავდა, მისი სახლის მისამართი დაუსახელა და უთხრა, რომ ბინასთან ელოდებოდა. მისივე თქმით, მომხდართან დაკავშირებით უახლოეს მომავალში შინაგან საქმეთა სამინისტროს მიმართავს. „დაასახელეს ჩემი მისამართი და მითხრეს, რომ მოვედი უკვე ბინასთან და ქვემოთ გელოდებითო. ცხადია [აქციას] უკავშირდება. მანამდე კიდევ სამი ზარი განხორციელდა. პირველი ზარი იყო უკრაინული ნომრიდან, შემდეგ უკვე დაახლოებით ათსაათიანი შუალედებით იყო ორი ზარი, გერმანიიდან. მე ვფიქრობ, რომ ჩემი საჯარო განცხადებაც საკმარისი უნდა იყოს, რომ გამოძიება დაიწყონ. ამდენი ადამიანი საუბრობს ამაზე და მე ვფიქრობ, უკვე უნდა ჰქონდეთ გამოძიება დაწყებული და თვითონ უნდა მირეკავდნენ, მაგრამ ვაპირებ მე თვითონ დავუკავშირდე, შევიტან განცხადებას. როცა მისამართს გიცხადებენ და გეუბნებიან, რომ ქვემოთ გელოდებიან, ეს უკვე ჩვეულებრივი ზარი აღარ არის. პერსონალური ინფორმაციის გამოყენებით პირდაპირი მუქარაა“, - განაცხადა ნათია კუპრაშვილმა. იპნ

„ოცნება“ ცდილობს სტრასბურგის გუშინდელი გადაწყვეტილება 2019 წლის 20 ივნისთან დაკავშირებით დღევანდელი მშვიდობიანი მომიტინგეების, ახალგაზრდების მიმართ ძალადობის ლეგიტიმაციისთვის გამოიყენოს. ხელისუფლება იტყუება, როცა პარალელებს ავლებს 20 ივნისის ძალადობრივ შტურმსა და დღეს მიმდინარე მშვიდობიან აქციებს შორის. სტრასბურგის სასამართლომ მკაფიო ზღვარი გაავლო ძალადობრივ პროტესტსა და მშვიდობიან პროტესტს შორის. დაუშვებელია, „ოცნებამ“ სტრასბურგის გადაწყვეტილება მშვიდობიანი მომიტინგეების, ახალგაზრდების მიმართ არალეგიტიმური ძალის გამოყენების გასამართლებლად გამოიყენოს. ამასთან, ხელისუფლება აპროვოცირებს სამოქალაქო დაპირისპირებას და თავს ესხმის საქართველოს მოქალაქეებს - ძალადობს მათზე, როგორც ფიზიკურად, ისე ფსიქოლოგიურად. მოვუწოდებთ ყველა პოლიტიკოსს, მედია საშუალებას და სხვა აქტორებს, მშვიდი, გონივრული რეაგირება გვქონდეს ოცნების პროვოკაციებზე, არ დავუშვათ რადიკალიზაციის კიდევ უფრო გაღრმავება და ქვეყანა მშვიდობიანად მივიყვანოთ არჩევნებამდე. პარტია "გახარია საქართველოსთვის"

„რადიო თავისუფლების“ ევროპის ბიუროს რედაქტორი, რიკარდ იოზვიაკი წერს, რომ ბრიუსელში საქართველოს შესახებ დებატები გაიმართა. მისი ინფორმაციით, შესაძლოა მალე გავრცელდეს ევროკავშირის განცხადება, ასევე, იყოს ევროკომისიის განახლებული შეფასება რუსული კანონის EU-ის კრიტერიუმებთან მიმართებაში. დღეს შალვა პაპუაშვილმა „ქართული ოცნების” ოფისში გამართულ ბრიფინგზე ისაუბრა, რომ პარტიის პოლიტსაბჭოს გადაწყვეტილებით, შეიქმნება მონაცემთა ბაზა იმ პირთა შესახებ, რომლებიც „ძალადობაში, მუქარასა და შანტაჟია ჩართული“ ან ამ ქმედებებს „საჯაროდ იწონებს“. პუბლიკა

შალვა პაპუაშვილმა „ქართული ოცნების” ოფისში გამართულ ბრიფინგზე ისაუბრა, რომ პარტიის პოლიტსაბჭოს გადაწყვეტილებით, შეიქმნება მონაცემთა ბაზა იმ პირთა შესახებ, რომლებიც „ძალადობაში, მუქარასა და შანტაჟია ჩართული“ ან ამ ქმედებებს „საჯაროდ იწონებს“. პაპუაშვილმა ამ გადაწყვეტილების გამოცხადებამდე შეაფასა სახელმწიფო უსაფრთხოების განცხადება, სადაც უწყება ისევ „რევოლუციურ სცენარზე” საუბრობს. პუბლიკა

სახელმწიფო უსაფრთხოების სამსახურის განცხადებით, გარკვეული ჯგუფები ცდილობენ პარლამენტთან აქციების დროს მოაწყონ პროვოკაციები, "რაც მიზნად ისახავს დესტრუქციული და ძალადობრივი სცენარების განვითარებას და რომელიც იმართება უცხო ქვეყნებიდან მომდინარე დაფინანსებით". როგორც მათ მიერ გავრცელებულ განცხადებაშია ნათქვამი, „აღნიშნულ დანაშაულებრივ გეგმებში აქტიურად არიან ჩართული ქვეყნის გარეთ მყოფი საქართველოს მოქალაქეები, კერძოდ, უკრაინაში მებრძოლი ქართველების კონკრეტული ნაწილი, რომლებიც აცხადებენ მზადყოფნას, ჩამოვიდნენ საქართველოში და აქტიური მონაწილეობა მიიღონ პოლიციის წინააღმდეგ დაგეგმილ ძალადობაში". როგორც სუს-ის განცხადებაშია ნათქვამი, "აქციის ორგანიზატორებისთვის სასურველია საპროტესტო აქციებს მოჰყვეს ადამიანური მსხვერპლი". მათივე განცხადებით, აღნიშნული სავალალო შედეგები გაზრდის საპროტესტო მუხტს და რადიკალიზმს. უწყების ცნობითვე, საპროტესტო აქციის ორგანიზატორების აგრესიის განსაკუთრებულ სამიზნეს სამართალდამცავი ორგანოს თანამშრომლები წარმოადგენენ. „სახელმწიფო უსაფრთხოებისა და მოქალაქეთა მშვიდობიანი თანაცხოვრების ინტერესებიდან გამომდინარე, გვსურს საზოგადოებას ვაცნობოთ, რომ მიღებული ინფორმაციით, პირთა გარკვეული ჯგუფები ცდილობენ საქართველოს პარლამენტთან მიმდინარე აქციების დროს მოაწყონ პროვოკაციები, რაც მიზნად ისახავს დესტრუქციული და ძალადობრივი სცენარების განვითარებას და რომელიც იმართება უცხო ქვეყნებიდან მომდინარე დაფინანსებით, საპარლამენტო და არასაპარლამენტო კონკრეტული პოლიტიკური პარტიების ლიდერების და არასამთავრობო ორგანიზაციათა ხელმძღვანელების მიერ. აღნიშნულ დანაშაულებრივ გეგმებში აქტიურად არიან ჩართული ქვეყნის გარეთ მყოფი საქართველოს მოქალაქეები, კერძოდ, უკრაინაში მებრძოლი ქართველების კონკრეტული ნაწილი, რომლებიც აცხადებენ მზადყოფნას, ჩამოვიდნენ საქართველოში და აქტიური მონაწილეობა მიიღონ პოლიციის წინააღმდეგ დაგეგმილ ძალადობაში. ზემოთ აღნიშნული პირები აქტიურ კომუნიკაციაში არიან საქართველოში მყოფ თავის თანამოაზრეებთან და განიხილავენ პარლამენტის, მთავრობის ადმინისტრაციისა და სხვა სამთავრობო შენობების ბლოკირების და პარალიზების გეგმებს. კონკრეტული პირები აქტიურად განიხილავენ საჭიროების შემთხვევაში სპეციალური დანიშნულების რაზმზე იერიშის მიტანის გეგმებს, რასაც მოჰყვება სიტუაციის სრული დაძაბვა. სპეციალური დანიშნულების რაზმის და პოლიციის განეიტრალების მიზნით, დანაშაულებრივი ქმედების ორგანიზატორები, ხშირ შემთხვევაში რეალური მიზეზების გამხელის გარეშე, საპროტესტო მუხტის მატარებელ ახალგაზრდებს ავალებენ, პარლამენტის წინ მიიტანონ ადვილად აალებადი ნივთიერებები, რაც შემდგომში გამოყენებული იქნება ე.წ. „მოლოტოვის კოქტეილების“ დამზადების მიზნით, აგრეთვე, სამართალდამცავებთან დაპირისპირებისთვის გამოსაყენებლად გაცემული აქვთ აქციაზე ქვების და რკინის ხელკეტების ფარულად მიტანის დავალება. მიმდინარე საპროტესტო აქციების მსვლელობისას მისი ორგანიზატორები მასობრივი არეულობის, ქაოსის და სამართალდამცავი ორგანოების პროვოცირების მიზნით, იმართებიან უცხოეთის ინსტრუქტორების მიერ გაცემული დავალებებით და აქტიურად იყენებენ ორგანიზაცია „CANVAS“-ის და პიტერ აკერმანის მიერ ჩატარებული ძალადობრივი სწავლებების მეთოდებს, რომლის მიზანია მიმდინარე პროცესების ე.წ. „მაიდანიზაცია“ და ქვეყანაში 90-იანი წლების სამოქალაქო დაპირისპირების მსგავსი მოვლენების პროვოცირება. აღნიშნული დესტრუქციული გეგმის ნაწილად, ცალკეული პოლიტიკოსები და აქციის რადიკალი ორგანიზატორები აუცილებლად მიიჩნევენ თბილისის სატრანსპორტო კვანძების პარალიზებას, სამთავრობო დაწესებულებებთან მისასვლელი და სტრატეგიული ობიექტების გზების ბლოკირება-ბარიკადირებას, რკინიგზის ბლოკირებას, ცენტრალურ გამზირებზე ე.წ. კარვების ქალაქების მოწყობას, სამართალდამცავი ორგანოების დისლოკაციის ბაზების ბლოკირებას. აღნიშნული დანაშაულებრივი გეგმების რეალიზებისთვის გამოიყენება უცხოეთიდან შემოსული ფინანსები, ხოლო მათი აზრით, კვალის დაფარვის მიზნით ხშირ შემთხვევაში იყენებენ კრიპტოვალუტას. კრიპტოვალუტასთან დაკავშირებული ტრანზაქციების შესახებ, უცხოელი ინსტრუქტორების მიერ, საქართველოში მიმდინარე წლის აპრილის ბოლოს ჩატარდა ტრენინგები, სადაც აქციის ორგანიზატორებმა მიიღეს ინსტრუქციები რადიკალური ქმედებების დაფინანსების ფარულად მიღების თაობაზე. აღნიშნული დანაშაულებრივი ქმედების ხელშესაწყობად და წარმატების მისაღწევად მიიჩნევენ, რომ უნდა მოხდეს სამართალდამცავი ორგანოების თანამშრომელთა პროვოცირება. უფრო მეტიც, დაინტერესებული მხარის მხრიდან ერთი გასროლაც კი გამოიწვევს პანიკას, ჭ####ტას და შესაბამისად დემონსტრანტთა შორის მძიმედ დაშავებულ პირებსა და მსხვერპლს. აქციის ორგანიზატორებისთვის სასურველია საპროტესტო აქციებს მოჰყვეს ადამიანური მსხვერპლი. მათი აზრით, აღნიშნული სავალალო შედეგები გაზრდის საპროტესტო მუხტს და რადიკალიზმს. საპროტესტო აქციის ორგანიზატორების აგრესიის განსაკუთრებულ სამიზნეს წარმოადგენენ სამართალდამცავი ორგანოს თანამშრომლები. მათი დემორალიზების და პროვოცირების მიზნით გამოიყენება ე.წ. „ფერადი რევოლუციების“ მოწყობასთან დაკავშირებული ისეთი მეთოდები, როგორიც არის მათ მიმართ მუქარა, მოსყიდვა, საპროტესტო აქციის მონაწილეთა მხარეს მათი გადასვლის ინსცენირება, რაც საბოლოო ჯამში მიზნად ისახავს სახელმწიფო სტრუქტურების ჩამოშლას და ხელისუფლების ძალადობრივი გზით დამხობას. მოვუწოდებთ საპროტესტო აქციებში მონაწილე ახალგაზრდებს, არ აჰყვნენ პროვოკაციებს, ხოლო ორგანიზატორებს მივმართავთ, რომ მათი დესტრუქციული გეგმების განხორციელების შემთხვევაში, სამართალდამცავი უწყებების მიერ, გატარდება მყისიერი სამართლებრივი ღონისძიებები, რათა არ მოხდეს მოვლენათა ესკალაცია, გამოირიცხოს ქვეყანაში არეულობა, სამოქალაქო დაპირისპირება და შენარჩუნებული იქნეს მშვიდობა“, - ნათქვამია სუს-ის მიერ გავრცელებულ განცხადებაში.

ამერიკის შეერთებული შტატების ელჩი რობინ დანიგანი და USAID-ის მისიის დირექტორი, ჯონ პენელი ISFED-ის წარმომადგენლებს შეხვდნენ. საქართველოში ამერიკის შეერთებული შტატების საელჩოს ინფორმაციით, შეხვედრაზე საქართველოში საარჩევნო პროცესის მონიტორინგში ISFED-ის მნიშვნელოვან საქმიანობაზე ისაუბრეს. „ნებისმიერ დემოკრატიაში სამოქალაქო საზოგადოება მნიშვნელოვან როლს ასრულებს თავისუფალი, სამართლიანი და გამჭვირვალე არჩევნების მხარდასაჭერად. არჩევნების პატიოსნად ჩატარება სასიცოცხლოდ მნიშვნელოვანია საქართველოს ევროატლანტიკურ გზაზე“,- ნათქვამია განცხადებაში. იპნ

8 მაისს მსოფლიო, 9 მაისს კი – 12 ყოფილი საბჭოთა რესპუბლიკა ნაციზმზე გამარჯვების 79-ე წლისთავს აღნიშნავს. ამავდროულად, 8 მაისს, ევროპის დღეც აღინიშნება. წელს, საქართველო ამ თარიღის ევროკავშირის კანდიდატის სტატუსით ხვდება – ჩვენი სამშობლო არასდროს ყოფილა ევროკავშირის წევრობასთან ისე ახლოს, როგორც დღესაა. კოალიცია ინფორმაციის სანდოობის წევრი ორგანიზაციები ხაზს უსვამენ, რომ ევროკავშირი არის მშვიდობის პროექტი, რომელიც მეორე მსოფლიო ომის შემდგომ, მშვიდობისა და ეკონომიკური სტაბილურობისთვის შეიქმნა – შესაბამისად, საქართველო თავის ისტორიულ ოჯახში დაბრუნებით შეძლებს უზრუნველყოს მშვიდობა და სოციალური დაცულობა მისი მოქალაქეებისთვის. „8 მაისი, როგორც ფაშიზმზე გამარჯვების დღე გამარჯვების, ერთიანობისა და მშვიდობის სიმბოლოა. სწორედ ევროპისა და ევროკავშირის იდეის, მშვიდობის იდეის, ირგვლივ უნდა გაერთიანდეს საქართველო და უარი უნდა უთხრას ყველაფერს, რასაც დაყოფა და კონფლიქტი შემოაქვს ქართულ საზოგადოებაში – პირველ რიგში, კი რუსულ კანონს“ – განმარტავს გიორგი მელაშვილი, კოალიცია ინფორმაციის სანდოობის თავმჯდომარე ორგანიზაციის, ევროპულ–ქართულ ინსტიტუტის, ხელმძღვანელი მისივე თქმით, დღეს ქართული საზოგადოება ერთიანია თავის სულისკვეთებაში, გახდეს ევროკავშირის წევრი და ეს ნათლად ჩანს მოსახლეობის გამოკითხვებში, სადაც 80%-ზე მეტი ნათლად აფიქსირებს საკუთარ სურვილს, დაუბრუნდეს ევროპულ ოჯახს. კოალიციის კიდევ ერთი წევრი ორგანიზაციის, „საბჭოთა კვლევის ლაბორატორიის“ ისტორიკოსის ირაკლი ხვადაგიანის განმარტებით, „რუსული კანონის“ მიღება საქართველოსთვის ხურავს ევროკავშირის კარს, რაც ეწინააღმდეგება საქართველოს ისტორიულ არჩევანს და დამოუკიდებლობის იდეას. „საქართველოს ისტორია სავსეა სამშობლოს დამოუკიდებლობისთვის თავგანწირული გმირებით, იქნებიან ყიზილბაშებთან მებრძოლი გმირები, მეორე მსოფლიო ომსა თუ აგვისტოს ომში დაღუპული გმირები. ყველაფერი, რაც ეწინააღმდეგება საქართველოს დამოუკიდებლობის იდეას, ამ გმირების ხსოვნის შეურაცხყოფაა“, – ამბობს ხვადაგიანი. მისივე თქმით, ქართველმა ხალხმა ამ გამოწვევას, ერთიანობით უნდა უპასუხოს. კოალიცია მოითხოვს, საქართველოს მთავრობამ უარი თქვას რუსულ კანონზე, შეასრულოს ევროკავშირის 9-ვე რეკომენდაცია და უზრუნველყოფს საქართველოს ინტეგრაცია ევროპულ სტრუქტურებში. პუბლიკა

საქართველოს მოქალაქეობის მისაღებ ტესტებში აღარ არის კითხვები მიხეილ სააკაშვილის, ვარდების რევოლუციისა და ოკუპაციის შესახებ. ინფორმაცია თავდაპირველად „რადიო თავისუფლების” რუსულენოვანმა გამოცემამ, Ekho Kavkaza-მ გაავრცელა. საუბარია საქართველოს ისტორიის ტესტებზე, რომლის ახალი წესები 2024 წლის პირველი მაისიდან ამოქმედდა. სახელმწიფო სერვისების განვითარების სააგენტოს ვებგვერდზე გამოქვეყნებულ ძველ ტესტში იძებნება კითხვები შემდეგი ფორმულირებით: – დღეს რომელი სახელმწიფოს მიერაა საქართველოს ტერიტორიის 20% ოკუპირებული?; – რომელ წელს მოხდა „ვარდების რევოლუცია“ საქართველოში?; – ვინ იყო საქართველოს მესამე პრეზიდენტი?; – „ვარდების რევოლუციის“ შემდეგ საქართველოს ხელისუფლების სათავეში მოვიდა?; – ჩამოთვლილთაგან რომელი სახელმწიფო არ აღიარებს საქართველოს ოკუპირებული ტერიტორიების, აფხაზეთისა და ცხინვალის რეგიონის, დამოუკიდებლობას?. თუმცა, 2024 წლის პირველი მაისიდან გამოქვეყნებულ ვერსიაში ეს კითხვები აღარ იძებნება. პუბლიკა

ადამიანის უფლებათა ევროპული სასამართლო უკვე მეორედ ამბობს, რომ 20 ივნისს იყო ძალადობრივი შტურმი სახელმწიფო ინსტიტუტზე. მიშა დაუშვილი. ვიდეო: https://www.facebook.com/ForGeoGe/videos/438148995648601/

მკაფიოდ უნდა გვესმოდეს ერთი რამ, ადამიანები, რომლებიც ფაქტობრივად ხელმოცარულები დარჩნენ სამართლებრივი, პოლიტიკური არგუმენტებით, ადამიანურ ტრაგედიებს იყენებენ, რა თქმა უნდა ჩვენ ასეთ ადამიანებს პასუხს გავცემთ. ოთხწელიწად ნახევარია გასული, სამწელიწად ნახევარია ჩვენ ხელისუფლებას აღარ წარმოვადგენთ და ამნისტიის პროცესი კარგა ხნით მერე მოხდა, როდესაც ხელისუფლებაში აღარ ვიყავით, ამიტომ ძალიან მკაფიოა ჩვენი პოზიცია- მათ ამის გამოძიებაზე თვითონვე თქვეს უარი ამნისტიის გაკეთებით. ბექა ლილუაშვილი, საპარლამენტო პოლიტიკური ჯგუფი “საქართველოსთვის” თავმჯდომარე. ვიდეო: https://www.facebook.com/ForGeoGe/videos/25133913092919000/

“ნაციონალური მოძრაობა” ოპოზიციაში გავუშვით ზუსტად ამ მეთოდების გამო, რაზეც გადასულია “ოცნება”, როდესაც ქუჩებში ახალგაზრდებს გვახვედრებდნენ ზონდერებს, მათ უქსევდნენ ოპონენტებს, ყველას ვინც არ ეთანხმებოდა “ნაც.მოძრაობის” რეჟიმს გვეძახდნენ რუსეთის აგენტებს, მოღალატეებს და ა.შ. ხელისუფლებები, რომლებსაც უკვე აღარ აქვთ პოლიტიკური ლეგიტიმაციის რესურსი, გადადიან ძალადობაზე, როგორც თავის დროზე გადავიდა სააკაშვილის რეჟიმი და ახლა ივანიშვილი. ანა ბუჩუკური, საპარლამენტო პოლიტიკური ჯგუფი “საქართველოსთვის” წევრი. ვიდეო: https://www.facebook.com/ForGeoGe/videos/796619885416269/

ჩვენ ვიყავით ერთადერთი პოლიტიკური პარტია, ერთადერთი პოლიტიკური ლიდერი იყო გიორგი გახარია, რომლებიც 20 ივნისის ამნისტიას არ ვემხრობოდით, შესაბამისად ვემხრობოდით იმას, რომ გამოძიება მისულიყო ბოლომდე. როდესაც 20 ივნისის ამნისტიის თემა განიხილებოდა პარლამენტში, ადამიანის უფლებათა დაცვის კომიტეტის სხდოკაზე, მე ვიყავი ის ადამიანი, რომელმაც ჩვენი გუნდის მოსაზრება პირველად გავაჟღერე. ვთქვი, რომ ამნისტია არ შევახოთ ყოფილ თუ ამჟამინდელ პოლიტიკურ თანამდებობის პირებს. ანა ბუჩუკური, საპარლამენტო პოლიტიკური ჯგუფი “საქართველოსთვის” წევრი.. ვიდეო: https://www.facebook.com/ForGeoGe/videos/1387871215245993/

სახალხო დამცველი ეხმაურება დღეს, 7 აპრილს, ინფორმაციის თავისუფლების განვითარების ინსტიტუტის (IDFI) აღმასრულებელ დირექტორზე, გიორგი კლდიაშვილზე და გასულ კვირას, 5 აპრილს, პედაგოგ ლადო აფხაზავაზე თავდასხმებს. კლდიაშვილთან ერთად თავს დაესხნენ “ფორმულას” გადამღები ჯგუფის წევრებსაც. “სახალხო დამცველი ხაზგასმით აღნიშნავს, რომ დაუშვებელია და მიუღებელი განსხვავებული ან კრიტიკული მოსაზრებების ქონის გამო ადამიანებზე თავდასხმა. მნიშვნელოვანია, თითოეულ დასახელებულ შემთხვევაში საგამოძიებო უწყებებმა დაადგინონ ძალადობრივი ქმედებების მოტივი და მისი შესაძლო კავშირი თავდასხმების მსხვერპლების პროფესიულ საქმიანობასთან და კრიტიკული მოსაზრებების ქონასთან, რის დადასტურების შემთხვევაშიც ძალადობრივ ქმედებებს უნდა მიეცეს შესაბამისი სამართლებრივი შეფასება”, – ვკითხულობთ ომბუდსმენის მიერ გავრცელებულ განცხადებაში. სახალხო დამცველი შინაგან საქმეთა სამინისტროსა და სპეციალურ საგამოძიებო სამსახურს მოუწოდებს, დროულად და ეფექტიანად გამოიძოს თითოეული ეს შემთხვევა. ნეტგაზეთი ამავე თემაზე: IDFI-ს დირექტორს და „ფორმულას“ გადამღებ ჯგუფს თავს დაესხნენ – ფორმულა პოლიციამ ლადო აფხაზავას საქმეზე გამოძიება დაიწყო

უკრაინაში კიდევ ორი ქართველი მებრძოლი დაიღუპა. უკრაინაში მებრძოლი ქვედანაყოფის „შავი არწივის“ ცნობით, დაღუპულები არიან მათი მებრძოლები დავით გოგაძე და ბესო ლომიძე. ქვედანაყოფის ცნობით, ქართველი მებრძოლები ავდეევკის მიმართულებაზე საბძოლო მოქმედებების შედეგად დაიღუპნენ. უკრაინაში რუსეთის სრულმასშტაბიანი შეშჭრის შემდეგ, 2022 წლის 24 წლის თებერვლიდან დღემდე, 60-ზე მეტი ქართველი მებრძოლი დაიღუპა. netgazeti

ოცდაათზე მეტი ევროპარლამენტარი ევროკომისიის ვიცე-პრეზიდენტს, ჯოზეფ ბორელს ერთობლივი წერილით მიმართავს და საქართველოსთვის კანდიდატის სტატუსის შეჩერებისკენ მოუწოდებს. ევროპარლამენტარების განცხადებით, „ქართულმა ოცნებამ“ „რუსული სტილის“ კანონის გატარებით და მშვიდობიანი დემონსტრანტების წინააღმდეგ ძალის გამოყენებით ზღვარი გადაკვეთა. ამასთან, ევროპარლამენტარები ჯოზეფ ბორელს მოუწოდებენ, გადაიხედოს ევროკავშირის მიერ საქართველოს ბიუჯეტისა და სამთავრობო პროგრამების დაფინანსება. publika

„ადამიანის უფლებათა ცენტრი” ლაზარე გრიგორიადისის გამამტყუნებელ განაჩენს სააპელაციოში გაასაჩივრებს. ორგანიზაციის განცხადებით, მიუხედავად იმისა, რომ ლაზარე გრიგორიადისი საქართველოს პრეზიდენტმა შეიწყალა და პატიმრობიდან გათავისუფლდა, გამამტყუნებელი განაჩენის გასაჩივრება აუცილებელია, რათა სასამართლოს პოლიტიკურად მოტივირებული გადაწყვეტილება გადაიხედოს და მსჯავრდებულმა იდავოს როგორც ეროვნულ დონეზე, ისე ადამიანის უფლებათა ევროპულ სასამართლოში, თუ სააპელაციო და უზენაესი სასამართლოები ობიექტურ გადაწყვეტილებას არ მიიღებენ და არ გააუქმებენ თბილისის საქალაქო სასამართლოს პოლიტიკურად მოტივირებულ განაჩენს. „ადამიანის უფლებათა ცენტრის” წარმომადგენლები ლაზარე გრიგორიადისის და მისი ოჯახის წევრებს დღეს, 7 მაისს შეხვდნენ. მათი საუბარი შეეხო როგორც სისხლის სამართლის საქმეზე საერთო სასამართლოების ზედა ინსტანციებში განაჩენის გასაჩივრების შესაძლებლობას, ასევე, ლაზარე გრიგორიადისის სამოქალაქო სარჩელს „ქართული ოცნების“ ლიდერების, ყოფილი და ახლანდელი პრემიერ-მინისტრების, ირაკლი ღარიბაშვილისა და ირაკლი კობახიძის წინააღმდეგ, რომელთა საჯარო განცხადებებმა შელახეს ლაზარე გრიგორიადისის ღირსება. ამ სარჩელის მიღებაზე თბილისის საქალაქო სასამართლომ რამდენჯერმე უარი თქვა, რის გამოც ადამიანის უფლებათა ცენტრი გეგმავს, მიმართოს ადამიანის უფლებათა ევროპულ სასამართლოს. ლაზარე გრიგორიადისის განაჩენი – 9-წლიანი პატიმრობა სასამართლომ 12 აპრილს გამოაცხადა. იმავე დღეს პრეზიდენტმა თქვა, რომ მას შეიწყალებდა. შეწყალების აქტზე ხელმოწერა სალომე ზურაბიშვილმა მხოლოდ 24 აპრილს შეძლო – მანამდე სასამართლო მას განაჩენს არ უგზავნიდა. ლაზარე გრიგორიადისი 2023 წლის 29 მარტს დააკავეს. ის მარტში რუსული კანონის წინააღმდეგ აქციების დროს პოლიციელზე თავდასხმასა და პოლიციის მანქანის დაწვაში იყო ბრალდებული. მას 2023 წლის 25 სექტემბერს 1.5 წლით პატიმრობა მიუსაჯეს მამის დაჭრის საქმეზე, რომლის განხილვა სასამართლომ დაწყებიდან 2 წლის შემდეგ განაახლა. მარტის აქციების საქმეზე ლაზარეს დაკავებას წინ უძღოდა პრემიერ-მინისტრ ირაკლი ღარიბაშვილის ინტერვიუ, რომელშიც მან მარტის აქციებში მონაწილე ახალგაზრდებს „სატანისტები“ უწოდა. მოგვიანებით, მან ლაზარეს მიმართ გამოიყენა სიტყვა „ბინძური“ და განაცხადა, რომ მას „ვერავინ ვერ გამოიყვანს ციხიდან“. ხელისუფლების ლიდერებმა ლაზარეს არაერთხელ უწოდეს „ორიენტაციაარეული“. ირაკლი კობახიძე აცხადებდა, რომ მას „ყველანაირი ორიენტაცია აქვს არეული“. ლაზარე გრიგორიადისიზე თავდასხმას დღემდე აგრძელებენ მმართველი პარტიის წევრები. ღარიბაშვილსა და კობახიძეს ამ განცხადებებისთვის ლაზარემ თავის მხრივ, თავადაც უჩივლა. ის მორალური ზიანის ანაზღაურებას და ბოდიშის მოხდას ითხოვდა. მორალური ზიანი სიმბოლურად, 15-15 ლარის ოდენობით იყო შეფასებული. სარჩელი ლაზარეს ადვოკატებმა 3-ჯერ შეიტანეს. სასამართლომ სამივეჯერ დაახარვეზა. publika

სტრასბურგის სასამართლოს გადაწყვეტილებამ დაადასტურა ის, რასაც ყოველთვის ვამბობდით - 20 ივნისის აქცია დაიწყო მშვდობიანად და გახდა ძალადობრივი, ადგილი ჰქონდა პარლამენტზე ცალკეული პოლიტიკოსების მიერ ორგანიზებულ ძალადობრივ შტურმს და პარლამენტის შენობაში შეჭრის მცდელობას, პოლიციის მიერ გამოყენებული ძალა იყო ლეგიტიმური, მხოლოდ ცალკეულ შემთხვევებში ჰქონდა ადგილი უფლებამოსილების გადამეტებას, რასაც შედეგად მომიტინგეების ჯანმრთელობის დაზიანება მოჰყვა, - ეს განცხადება დღეს გამართულ ბრიფინგზე პარტია „საქართველოსთვის“ წევრმა ნათია მეზვრიშვილმა გააკეთა. მეზვრიშვილის განცხადებითვე, სასამართლომ დაადასტურა, რომ 300-დამ 1000-მდე პირი პოლიციის კორდონის გარღვევას და პარლამენტში შეჭრას ცდილობდა, რასაც მშვიდობიანი მომიტინგეების უკან მდგომი ნაწილი ვერ ხედავდა. მეზვრიშვილის თქმით, ბოლო ერთი წლის განმავლობაში ეს არის სტრასბურგის სასამართლოს მეორე გადაწყვეტილება, „რომელმაც აბსოლუტურად ობიექტურად შეაფასა 20 ივნისის მოვლენები და არ დატოვა სივრცე პოლიტიკური სპეკულაციისთვის“. „მოვუწოდებთ ყველას, გადაწყვეტილება გააშუქონ ობიექტურად და არა ტენდენციურად! სასამართლომ დაადგინა, რომ რეზინის ტყვიების გამოყენება მოხდა ცალკეულ შემთხვევებში ინდივიდუალურად და არა უშუალოდ მინისტრის ბრძანებით, რაც, რა თქმა უნდა, არ ნიშნავს იმას, რომ ზოგადად რეზინის ტყვიების გამოყენება უკანონო იყო და ყველა შემთხვევაში გადამეტებით მოხდა. სასამართლო ამ ნაწილში დაეყრდნო როგორც გამოძიების მასალებს, ისე სახალხო დამცველის დასკვნას. სასამართლოს არ დაუდგენია, რომ სახეზე იყო წამების, არაადამიანური და ღირსების შემლახავი მოპყრობა. სასამართლოს არ დაუდგენია, რომ სახეზე იყო გამოხატვის თავისუფლების ან შეკრების უფლების დარღვევა. სასამართლომ მხოლოდ ის თქვა, რომ ადგილი ჰქონდა პროცედურულ დარღვევას გამოძიების ეფექტიანობის ნაწილში. იქაც ყურადღება გაამახვილა გამოძიების გაჭიანურებაზე და საგამოძიებო ორგანოებს გამოძიების დროულად დასრულებისკენ მოუწოდა. ვუერთდებით სასამართლოს ამ მოწოდებას ზუსტად ისე, როგორც ჩვენ ვიყავით ამნისტიის წინააღმდეგი - დროა, ნათელი მოეფინოს რა ეტაპზეა გამოძიება! ვაფრთხილებთ ყველა პოლიტიკურ, მედია თუ სხვა აქტორს - გადაწყვეტილების ტენდენციურ განმარტებაზე აუცილებლად გვექნება რეაგირება ჩვენს ხელთ არსებული ყველა საშუალებით. აქვე, მოვუწოდებთ “ოცნებას“ - სტრასბურგის გადაწყვეტილება ეხება ძალადობრივი დემონსტრაციის აღკვეთას, როგორიც იყო შტურმი პარლამენტზე. ეს გადაწყვეტილება „ოცნებას“ ვერ მიანიჭებს მშვიდობიანი აქციის ძალადობით დაშლის ლეგიტიმაციას, რასაც მისი მხრიდან უკვე არაერთხელ ჰქონდა ადგილი”, - განაცხადა ნათია მეზვრიშვილმა.

ევროკავშირში საქართველოს მისიის ყოფილი ხელმძღვანელი ნატალია საბანაძე ბრიტანულ მედიასთან საქართველოში გავითარებულ მოვლენებთან დაკავშირეით საუბრობს და პირდაპირ ამბობს, რომ ხელისუფლებამ პრორურუსლი კურსი ღიად აიღო. მისი თქმით, "ქართული ოცნება" პროდასავლურ კურსს აგრძელებდა, თუმცა ბოლო 2-3 წლის განმავლობაში ცვლილება აშკარად რუსეთისკენ მოხდა.

რუსეთის დუმამ „საარჩევნო უფლებების ძირითადი გარანტიების შესახებ“ კანონში ცვლილებები შეიტანა, რომელიც „უცხოელ აგენტებს“ არჩევნებში კანდიდატად მონაწილეობას უკრძალავს, - ამის შესახებ ინფორმაციას რუსული სახელმწიფო საინფორმაციო სააგენტო TASS-ი ავრცელებს. რუსეთის ფედერაციის სახელმწიფო დუმამ პლენარულ სხდომაზე კანონში „საარჩევნო უფლებების ძირითადი გარანტიების შესახებ“ ცვლილებები მეორე და მესამე მოსმენით დაამტკიცა. კანონის მიხედვით, უცხოელი აგენტის სტატუსის მქონე პირებს კანდიდატად დარეგისტრირება არჩევნების ყველა დონეზე ეკრძალებათ. ცვლილებების მიხედვით, „უცხოური აგენტების“ რეესტრში შეყვანილი პირები, ასევე ექსტრემისტული ან ტერორისტული ორგანიზაციის საქმიანობაში ჩართული პირები კანდიდატები ან არჩევნების დამკვირვებლები ვერ იქნებიან. კანონში ცვლილებების შეტანას მხარი 450-დან 409 დეპუტატმა დაუჭირა. იპნ

„ახლა საქართველოში, თბილისში, ხდება რაღაც ძალიან მნიშვნელოვანი და ისტორიული, რამაც შეიძლება შეცვალოს საქართველოს ისტორია; რაღაც ძალიან დრამატული”, – ჰაიდელბერგის თეატრალურ ფესტივალზე სპექტაკლის „მედეა სეზონი 1, ეპიზოდი 6″ დასრულების შემდეგ, სპექტაკლის რეჟისორმა და პიესის ავტორმა პაატა ციკოლიამ მაყურებელს სიტყვით მიმართა: ასიათასობით ადამიანი ქუჩაში დგას და გამოხატავს პროტესტს, ეს სამი კვირაა გრძელდება. ყოველ ღამე საქართველოს ახალი თაობა ფეხზე დგას საქართველოსა და ევროკავშირის დროშებით ხელში და იცავს ევროპულ ღირებულებებს. როცა ჩვენმა მთავრობამ საპარლამენტო არჩევნების წინ (რომელიც ამ წლის ოქტომბერს უნდა ჩატარდეს) გადაწყვიტა შემოეტანა კანონები, რომლებიც არჩევნების მოპარვაში დაეხმარებოდა, დაეხმარებოდა კიდევ ერთხელ უარეყო ხალხის ნება და უკან შეეთრია საქართველო რუსეთში, ყველა გარეთ გამოვედით და ვცდილობთ დავიცვათ ჩვენი თავისუფლება. ვცდილობთ დავამტკიცოთ, რომ ვართ ევროპული სახელმწიფო. არა რუსულ კანონს! არა რუსეთს, მოძალადე სახელმწიფოს!”, – ასე დაასრულეს სიტყვა პაატა ციკოლიამ და სპექტაკლის მსახიობებმა, რომლებსაც სცენაზე საქართველოსა და ევროკავშირის დროშები ჰქონდათ გამოტანილი. ნეტგაზეთი