ყველა აქტივობა

უკრაინის მოქალაქეებს საქართველოში უვიზოდ ყოფნა 3 წლის ნაცვლად 1 წლით შეეძლებათ. შესაბამისი დადგენილება პრემიერ-მინისტრმა, ირაკლი კობახიძემ გამოსცა. „უკრაინის მოქალაქეებს აქვთ საქართველოში უვიზოდ შემოსვლისა და სრული 1 წლის ვადით ყოფნის უფლება. უკრაინის იმ მოქალაქეებს, რომლებიც 2025 წლის 24 თებერვლამდე შემოვიდნენ და იმყოფებოდნენ საქართველოში, ყოფნის უფლება გაუგრძელდეთ 2026 წლის 24 თებერვლამდე,“ - აღნიშნულია დადგენილებაში. ცნობისთვის, 2024 წლის 23 აპრილის პრემიერ-მინისტრის დადგენილების მიხედვით, უკრაინის მოქალაქეებისთვის საქართველოში უვიზოდ შემოსვლის და ყოფნის ვადები 3 წლამდე გაიზარდა. რუსეთის მიერ უკრაინაში ომის დაწყებამდე, უკრაინელებს საქართველოში უვიზოდ ყოფნა ერთი წლის ვადით შეეძლოთ. იპნ

სურსათის ეროვნული სააგენტოს ინფორმაციით, რძის ნიმუშებში აფლატოქსინი გამოვლინდა. სააგენტოს ინფორმაციით, სააგენტოს თბილისის საქალაქო სამსახურის ინსპექტორებმა, 28 მარტს, შპს „ვიმ-ბილ-დან საქართველოში" (ს/კ 204546553 (სოფლის ნობათი) სახელმწიფო კონტროლი განახორციელეს. მათივე ცნობით, ინსპექტირების შედეგად საწარმოში კრიტიკული შეუსაბამობა არ გამოვლენილა, თუმცა, დაფიქსირდა სურსათის შესახებ ინფორმაციის მიწოდების წესის დარღვევა, რის გამოც ბიზნესოპერატორი დაჯარიმდა სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის შესაბამისად. სააგენტოს ინფორმაციით, გარდა ამისა, შპს „ვიმ-ბილ-დან საქართველოს“ დაევალა აზერბაიჯანში წარმოებული რძის 5 ნიმუშის აღება (რომლიდანაც ერთი არის ბავშვთა კვებისთვის განკუთვნილი) და აფლატოქსინ M1-ზე გამოკვლევა; ასევე არასწორად ეტიკეტირებული სურსათის ბაზრიდან გამოთხოვა. „სააგენტოს ზედამხედველობით აღებული ნიმუშები გაიგზავნა აკრედიტებულ ლაბორატორიაში. ლაბორატორიული კვლევის შედეგად აფლატოქსინ M1-ის გადაჭარბებული ოდენობა დაფიქსირდა ხუთ ნიმუშში. კერძოდ, სასმელი რძე საბავშვო, ულტრაპასტერიზებული - 2,5% ცხიმიანობით - დამზადების თარიღი: 04.02.2025, ვარგისიანობის ვადა: 03.08.2025; სასმელი რძე რჩეული ულტრაპასტერიზებული, 1,5% ცხიმიანობით - დამზადების თარიღი: 12.02.2025, ვარგისიანობის ვადა: 11.08.2025; სასმელი რძე რჩეული ულტრაპასტერიზებული, 1,5% ცხიმიანობით - დამზადების თარიღი: 10.02.2025, ვარგისიანობის ვადა: 09.08.2025; სასმელი რძე რჩეული ულტრაპასტერიზებული, 2,5% ცხიმიანობით - დამზადების თარიღი: 09.02.2025, ვარგისიანობის ვადა: 08.08.2025; სასმელი რძე რჩეული ულტრაპასტერიზებული, 3,2% ცხიმიანობით - დამზადების თარიღი: 02.02.2025, ვარგისიანობის ვადა: 01.08.2025. შპს „ვიმ-ბილ-დან საქართველოს“ დაევალა დასახელებული სურსათის პარტიების სარეალიზაციო ქსელიდან ამოღება/გამოთხოვა. სურსათის ეროვნული სააგენტო მოუწოდებს მომხმარებელს, არ გამოიყენოს აღნიშნული რძე. აფლატოქსინი წარმოიქმნება ობის სოკოებისაგან. აფლატოქსინ B1-ით დაბინძურებული საკვები ხვდება ცხოველის ორგანიზმში, საიდანაც გადადის რძეში და გარდაიქმნება M1 აფლატოქსინად, რაც საფრთხეს უქმნის ადამიანის ჯანმრთელობას“, - ნათქვამია ინფორმაციაში. იპნ

კომისია რომ ფარსია და არ აპირებს წინა ხელისუფლების დანაშაულები სრულად გამოიძიოს, ადასტურებს ის ფაქტი, რომ კომისიის თავმჯდომარე ვერ ბედავს კითხვები დაუსვას დაზარალებულებს იმ პოლიციელების, პროკურორების, გამომძიებლების, მოსამართლეების და ცუდი ადამიანების შესახებ, რომლებმაც საქართველოს მოქალაქეები გააუბედურეს, - ამის შესახებ პარტია „გახარია საქართველოსთვის“ ერთ-ერთმა ლიდერმა ლევან გოგიჩაიშვილმა განაცხადა. როგორც გოგიჩაიშვილმა ბრიფინგზე განაცხადა, „ნახევარი სიმართლის დრო დამთავრებულია“. „ბოლო დღეებია, თვალს ვადევნებთ „ოცნების“ მორიგ ფარსს, მორიგ სიყალბეს, კარიკატურული ე.წ საგამოძიებო კომისიის მონაწილეობით. აღნიშნული კომისია არალეგიტიმურმა პარლამენტმა კონსტიტუციის 42-ე მუხლის უხეში დარღვევით შექმნა. ცინიკურია ფაქტი, რომ „ოცნებამ” კომისიაში შეიყვანა სამი ყოფილი „ნაცი“, კონკრეტულად: ალექსანდრე ტაბატაძე, რომელიც წლების განმავლობაში ვანო მერაბიშვილის რეპრესიული პოლიციის ნაწილი იყო. ალუდა ღუდუშაური, რომელიც იყო ახალაიას კუდ-ის ადვოკატი; თენგიზ შარმანაშვილი, რომელიც სააკაშვილმა 2011 წელს დანიშნა ელჩად სომხეთის რესპუბლიკაში და ტრაგიკულია ფაქტი, რომ კომისიის თავმჯდომარეა თეა წულუკიანი, რომელიც სამარცხვინოდ დამარცხდა სააკაშვილის მოძალადე სისტემის მოსამართლეებთან. 13 წლით დაგვიანებული კომისიის რეალური მიზანია არა „ნაცების“ დანაშაულებზე სამართლიანობის აღდგენა, არამედ ეს არის გაყალბებული არჩევნების, პოლიტპატიმრებით გავსებული ციხეების, კორუფციის, ძალადობის, ქვეყნის ევროინტეგრაციის გზიდან გადახვევის, სააკაშვილის მოსამართლეების უვადოდ განწესების და ივანიშვილის მხრიდან სახელმწიფო ინსტიტუტების მიტაცების გადაფარვა. ივანიშვილი ცდილობს ხელახლა გახსნას ძველი იარები და თქვას, რომ მე კი ვარ სასტიკი მოძალადე, მაგრამ წარსულში ჩემზე უარესი მოძალადეებიც არსებობდნენ. კომისია რომ ფარსია და არ აპირებს სრულად გამოიძიოს წინა ხელისუფლების დანაშაულები, ადასტურებს ის ფაქტი, რომ კომისიის თავმჯდომარე ვერ ბედავს კითხვები დაუსვას დაზარალებულებს იმ პოლიცილების, პროკურორების, გამომძიებლების, მოსამართლეების და ცუდი ადამიანების შესახებ, რომლებმაც გააუბედურეს საქართველოს მოქალაქეები და რომლებიც დღეს ემსახურებიან ივანიშვილის ძალადობრივ რეჟიმს. დიახ, ამ ქვეყანაში ხალხმა უნდა იპოვოს სამართალი, დიახ, ამ ქვეყანაში დაზარალებულებმა უნდა აღიდგინონ საკუთარი უფლებები და დაიბრუნონ საკუთარი ქონებები, დიახ, ყველამ უნდა აგოს პასუხი, მათ შორის, იმ პროკურორებმა და მოსამართლეებმა, რომლებიც დღეს ივანიშვილის რეჟიმს სამსახურში არიან. ჩვენ არ მივცემთ კომისიას შესაძლებლობას, საზოგადოებას უთხრას ნახევარი სიმართლე და ხელი დააფაროს ბიძინას „ნაცებს“. რისი თქმაც ვერ გაბედა და რის თქმასაც ვერ გაბედავს კომისია, ამ სრულ სიმართლესაც ჩვენ ვეტყვით საზოგადოებას. ჩვენ ვეტყვით იმას, რომ ბესო ხარძიანის მოსამართლე, რომელმაც უდანაშაულო ადამიანი ჩასვა ციხეში არის ლელა ნოზაძე და ის ივანიშვილმა გააწესა უვადო მოსამართლედ. ჩვენ ვეტყვით იმას, რომ ჯემალ ლეონიძის მოსამართლე, რომელმაც ის გააკოტრა არის ლაშა ქოჩიაშვილი და ივანიშვილმა უვადოდ დანიშნა უზენაესს სასამართლოში. ჩვენ ვეტყვით იმას, რომ ჯემალ ლეონიძის მოსამართლე, რომელმაც ის ციხეში გაუშვა არის მზია ლომთათიძე და ის ბიძინამ დანიშნა უვადო მოსამართლედ. ჩვენ ვეტყვით მოსახლეობას იმ სიმართლეს, რომ ფინანსური პოლიციის ადმინისტრაციის ხელმძღვანელი ქეთევან კვინიკაძე, რომელიც არეკეტებდა ქართველ ბიზნესმენებს, დღეს არის ე.წ. პრეზიდენტის ადმინისტრაციის ხელმძღვანელი. დამთავრდა ნახევარი სიმართლის დრო, სრული სიმართლის დრო დადგა”, - განაცხადა გოგიჩაიშვილმა. ipn

უნგრეთი სისხლის სამართლის საერთაშორისო სასამართლოს ტოვებს, - ამის შესახებ ინფორმაციას უნგრეთის მთავრობის პრესსპიკერი, ზოლტან კოვაჩი სოციალურ პლატფორმა X-ზე ავრცელებს. მისი თქმით, უნგრეთის პრემიერ-მინისტრის, ვიქტორ ორბანის აპარატის ხელმძღვანელმა, გერგელი გულიაშმა გამოაცხადა, რომ მთავრობამ სისხლის სამართლის საერთაშორისო სასამართლოდან (ICC) გასვლის შესახებ გადაწყვეტილება მიიღო. „გასვლის პროცესი ხუთშაბათს, უნგრეთის კონსტიტუციური და საერთაშორისო სამართლებრივი ვალდებულებების შესაბამისად დაიწყება“, - წერს ზოლტან კოვაჩი. ცნობისთვის, დღეს უნგრეთში ისრაელის პრემიერ-მინისტრი, ბენიამინ ნეთანიაჰუ ჩავიდა, რომლის წინააღმდეგაც 2024 წლის ნოემბერში სისხლის სამართლის საერთაშორისო სასამართლომ ომის დანაშაულებისა და კაცობრიობის წინააღმდეგ ჩადენილი დანაშაულებისთვის დაპატიმრების ორდერი გამოსცა. უნგრეთი, როგორც სისხლის სამართლის საერთაშორისო სასამართლოს წევრი, ვალდებულია, სასამართლოს მიერ გაცემული ორდერის მიხედვით იმოქმედოს, თუმცა უნგრეთის პრემიერ-მინისტრმა, ვიქტორ ორბანმა განაცხადა, რომ უნგრეთი ნეთანიაჰუს დაკავების შესახებჰააგის სასამართლოს ბრძანებას არ შეასრულებს. ipn

საქართველოში ამერიკის შეერთებული შტატების საელჩო ადასტურებს, რომ აშშ-ს სახელმწიფო დეპარტამენტის კომენტარი, რომელსაც სააგენტო­ globalnews.ge აქვეყნებს, ავთენტურია. ამის შესახებ „ინტერპრესნიუსს“ საელჩოს პრესსამსახურში განუცხადეს. შეგახსენებთ: სახელმწიფო დეპარტამენტმა globalnews.ge-ს შეკითხვას, თუ როგორია საქართველოში არსებულ ვითარებასთან დაკავშირებით შეერთებული შტატების პოზიცია, წერილობით უპასუხა. კერძოდ, www.globalnews.ge-მ სახელმწიფო დეპარტამენტის სპიკერს, ტემი ბრუსს, ბრიფინგზე შემდეგი შეკითხვა დაუსვა: „გქონდათ თუ არა რაიმე კომუნიკაცია საქართველოში მმართველ პარტიასთან? და თუ ასეა, შეგიძლიათ გაგვიზიაროთ, რა ტიპის კომუნიკაცია არსებობს ახლა თქვენ შორის? როგორც იცით, საქართველოში ძალიან მძიმე ვითარებაა, ქართველი ხალხი და საერთაშორისო საზოგადოება არჩევნების შედეგებს არ აღიარებს. დაკავებულები არიან აქციების მშვიდობიანი მონაწილეები, ასევე, ამჟამად ციხეში დამოუკიდებელი ჟურნალისტი იმყოფება. სწორედ ამ გარემოებების გათვალისწინებით, როგორია თქვენი ხედვა საქართველოში არსებულ ვითარებასთან დაკავშირებით?" სახელმწიფო დეპარტამენტისგან მიღებულ ოფიციალურ პასუხს უცვლელად გთავაზობთ: "ჩვენ განვაგრძობთ ჩვენი მიდგომის შეფასებას საქართველოს მიმართ ამერიკული ინტერესების წინსვლისთვის. აშშ-მა ნათლად დააფიქსირა ის ნაბიჯები, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-თან ურთიერთობის გაუმჯობესებისთვის. რაც შეეხება “ქართული ოცნების” მთავრობის მიერ განხორციელებულ განგრძობით ანტიდემოკრატიულ ქმედებებს - როგორც ვიცე-პრეზიდენტმა ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას, ძირითადი ელექტორატის პოზიციის უგულებელყოფით, თუ ვინ უნდა გახდეს ჩვენი საერთო საზოგადოების ნაწილი. შეერთებული შტატები, 33 წლის განმავლობაში, საქართველოსა და ქართველი ხალხის პარტნიორია და ამ ხნის განმავლობაში ძლიერი მხარდამჭერი საქართველოს დამოუკიდებლობის, სუვერენიტეტისა და ტერიტორიული მთლიანობის საკითხებში“, - ნათქვამია სახელმწიფო დეპარტამენტისგან მიღებულ წერილში, რომელსაც გამოცემა აქვეყნებს. ipn

თუ იქნება ღია, გახსნილი სხდომა, პირადად მე მივესალმებოდი და დავეთანხმებოდი, რომ გიორგი გახარია მივიდეს კომისიაზე და მათივე მოედანზე ფარდა ახადოს სიმართლეს, პირდაპირ უთხრას პირში, ვინ არის ნამდვილი „ნაცი“, - ამის შესახებ პარტიის “გახარია საქართველოსთვის” პოლიტიკური საბჭოს წევრმა გიორგი შარაშიძემ "პალიტრანიუსის" გადაცემა “რეზიუმეში” განაცხადა, რითაც უპასუხა კითხვას, უნდა მივიდეს თუ არა გიორგი გახარია საგამოძიებო კომისიაზე დაბარების შემთხვევაში. გიორგი შარაშიძის განმარტებით, საგამოძიებო კომისიაზე გამოცხადება საერთოდ არანაირ კავშირში არ არის არც პარლამენტის და არც კომისიის ლეგიტიმაციასთან. „ძალიან სასაცილოა, რომ ბიძინას „ნაცები“ აპირებენ გახარიას კომისიაზე დაბარებას. ჯერ კიდევ არ ვიცით, დაიბარებენ თუ არა, მაგრამ მაინტერესებს, გაბედავენ თუ არა. საერთოდ, ჩემი აზრით, ეს [კომისიაზე მისვლა] ძალიან ინდივიდუალური საკითხია. მართალია არალეგიტიმური პარლამენტია და არალეგიტიმური კომისიაა, რა თქმა უნდა, მაგრამ ეს მაინც ინდივიდუალურად მისაღები გადაწყვეტილებაა. მე პირადად დავეთანხმებოდი მისვლას, მაგრამ რა თქმა უნდა, ეს საერთოდ არანაირ კავშირში არ არის არც პარლამენტის და არც კომისიის ლეგიტიმაციასთან. დავეთანხმებოდი მისვლას სწორედაც იმიტომ, რომ გახარიამ სიმართლე უთხრას პირში იმ ადამიანებს თავად „განაცებულებს", არა მარტო შემადგენლობით, არამედ ქცევით. „ოცნება“ ბოლო პერიოდში არაფრით არ ჩამოუვარდება „ნაციონალურ მოძრაობას“. შეიძლება სწორიც იყოს მისვლა, მაგრამ თუ დაიბარებენ, ეს არსებულ მომენტზეა დამოკიდებული, მაგრამ არ უნდა გამოვრიცხოთ იქ მისვლა და მათ მოედანზე ფარდის ახდა და მხილება დღევანდელი „ოცნების“, რომ თუ ვინმე დღეს „ნაციონალური მოძრაობის“ იდეოლოგიის გამგრძელებელია, ეს სწორედ დღევანდელი „ოცნებაა“. მეცამეტე წელია უკვე ხელისუფლებაში არიან და მათ რომ მართლა ჰქონოდათ სურვილი „ნაციონალური მოძრაობის“ გასამართლებისა, ამას აქამდე გააკეთებდნენ“, - განაცხადა გიორგი შარაშიძემ. იპნ

ეუთოს დემოკრატიული ინსტიტუტებისა და ადამიანის უფლებების ოფისი (ODIHR) „ქართული ოცნების” მიერ „FARA-ს ქართული თარგმანის” მიღებას ეხმაურება და აცხადებს, რომ ეს კანონი ზრდის შეშფოთებას იმ ნეგატიური გავლენის შესახებ, რაც მას სამოქალაქო საზოგადოებაზე ექნება. განცხადებაში აღნიშნულია, რომ „ოცნების” ახალი კანონი მიზნად ისახავს რუსული კანონის ჩანაცვლებას, თუმცა აქვე აღნიშნულია, რომ ეს კანონიც, სხვა ახლად მიღებულ ინიციატივებთან ერთად, შეზღუდავს სამოქალაქო და ადამიანის უფლებადამცველი ორგანიზაციების საქმიანობას, რადგან მათ წაართმევს იმ გარანტიებს, რაც საქმიანობის გასაგრძელებლად ესაჭიროებათ. განცხადებაში ოდირი იხმობს შარშან FARA-ს ამერიკული ვერსიის შესახებ გაკეთებულ ანალიზს და იმეორებს, რომ ამერიკულ FARA-ს გააჩნია სამართლებრივი მექანიზმები, რაც იცავს სამოქალაქო ორგანიზაციებს, რომ უცხოური გავლენის იარლიყი მხოლოდ უცხოური დაფინანსების მიღების გამო არ ატარონ. ODIHR მოუწოდებს საქართველოს ხელისუფლებას, რომ გადახედოს ამ საკანონმდებლო ინიციატივის აღსრულებას და ხაზს უსვამს, რომ საჭიროა კანონმდებლობის საფუძვლიანი და ხელახალი შეფასება. პუბლიკა

იმ ქვეყნების სიაში, რომელთა სტუდენტებსაც ლიეტუვაში 2025-2026 აკადემიური წლისთვის მოკლევადიან აკადემიურ პროგრამებზე სტიპენდიებით სარგებლობა შეუძლიათ, საქართველო არ არის. ამის შესახებ ინფორმაციას პორტალი studyin.lt-ი ავრცელებს. გავრცელებული ინფორმაციით, გამოყოფილი სტიპენდიების რაოდენობა 35-მდეა და ლიეტუვაში სწავლის ერთ სემესტრს ფარავს, თუმცა, იმ ქვეყნების სიაში, რომელთა სტუდენტებსაც აღნიშნული სტიპენდიებით სარგებლობა შეუძლიათ, საქართველო არ არის. პორტალზე განთავსებული ინფორმაციის მიხედვით, ლიეტუვა მოკლევადიან სტიპენდიებს შემდეგი ქვეყნების სტუდენტებს სთავაზობს: სომხეთის, ავსტრალიის, აზერბაიჯანის, კანადის, ჩინეთის (ჩინეთის სახალხო რესპუბლიკა და ტაივანი), ინდოეთის, ინდონეზიის, ისრაელის, იაპონიის, ყაზახეთის, მოლდოვის, ახალი ზელანდიის, სამხრეთ კორეის, უკრაინის, გაერთიანებული სამეფოს, უზბეკეთის, ამერიკის შეერთებული შტატების, ვიეტნამისა და ლიეტუვის უცხო ქვეყნების მოქალაქეებს. ამასთან, ვებ-გვერდზე ინფორმაცია დევს, რომ ლიეტუვაში სრულ სამაგისტრო პროგრამებზე ქართველ სტუდენტებს განაცხადის გაკეთება კვლავ შეუძლიათ. როგორც ცნობილია, 2024-2025 წლის პროგრამების ჩამონათვალში საქართველო შედიოდა. იპნ

ჩვენ ეკონომიკურ თანამშრომლობას ჩინეთთან ვერავინ ვერ გვასწავლის, ნებისმიერ სარგებელს, რომელსაც მივიღებთ ჩინეთიდან მხარს დავუჭერთ. თუმცა, ეს თანამშრომლობა არ უნდა ხდებოდეს ჩვენი და ჩვენი დასავლელი პარტნიორების ინტერესების ხარჯზე. ბექა ლილუაშვილი, პარტია "გახარია საქართველოსთვის" წევრი. ვიდეო: https://www.facebook.com/ForGeoGe/videos/965802748955280/

დიდმა ბრიტანეთმა ლევან მურუსიძეს და მიხეილ ჩინჩალაძეს ფინანსური სანქციები დაუწესა გლობალური ანტიკორუფციული რეგულაციების ფარგლებში. სანქცირებულ პირებს გაეყინებათ საბანკო ანგარიშები და ყველა სახის ქონება, რაც მათ ბრიტანეთის ტერიტორიაზე აქვთ. მიხეილ ჩინჩალაძე ახლა თბილისის სააპელაციო სასამართლოს მოსამართლეა, ლევან მურუსიძე კი – ამავე სასამართლოს მოსამართლე. ორივე მათგანი გავლენიანი პირია ქართულ სასამართლო სისტემაში. არასამთავრობო ორგანიზაციები უკვე მრავალი წელია, აცხადებენ, რომ ისინი ე.წ. მოსამართლეთა კლანს ლიდერობენ. დოკუმენტში, სადაც 13 სანქცირებული პირის სია გამოქვეყნდა, მიხეილ ჩინჩალაძის შესახებ წერია, რომ ის არის ან იყო ჩართული სერიოზულ კორუფციაში. „როგორც თბილისის სააპელაციო სასამართლოს მოსამართლემ, საჯარო მოხელემ, რომელიც ასრულებდა აღმასრულებელ ან სასამართლო ფუნქციას, მიიღო ფინანსური სარგებელი თავისი ფუნქციების არაჯეროვნად შესრულებისთვის, კერძოდ, მან თბილისის სააპელაციო სასამართლოს თავმჯდომარის გავლენა არასათანადოდ გამოიყენა, რათა უზრუნველეყო, რომ სასამართლოში დანიშვნები და გადაწყვეტილებები მმართველი პარტია „ქართული ოცნების” სასარგებლო ყოფილიყო“, – წერია დოკუმენტში. ბრიტანეთის მთავრობა ასევე მიუთითებს, რომ მიხეილ ჩინჩალაძემ, როგორც სააპელაციო სასამართლოს თავმჯდომარემ, რომელიც ასრულებდა აღმასრულებელ ან სასამართლო ფუნქციას, სარგებელი მიიღო ამავე სასამართლოში უვადოდ განწესებით, განზრახვით, განაგრძოს თავისი საჯარო ფუნქციების არაჯეროვანი შესრულება იმის უზრუნველსაყოფად, რომ თბილისის სააპელაციო სასამართლოში მიღებული გადაწყვეტილებები „ქართული ოცნების“ სასარგებლოდ იქნება გამოტანილი. რაც შეეხება ლევან მურუსიძეს – დოკუმენტში წერია, რომ ისიც ასევე ჩართულია სერიოზულ კორუფციაში: როგორც იუსტიციის უმაღლესი საბჭოს წევრმა, საჯარო მოხელემ, რომელიც ასრულებდა აღმასრულებელ ან სასამართლო ფუნქციებს, მიიღო ფინანსური სარგებელი თავისი ფუნქციების არაჯეროვნად შესრულებისთვის, კერძოდ, ამ თანამდებობაზე ყოფნისას თავისი გავლენა არასათანადოდ გამოიყენა იმის უზრუნველსაყოფად, რომ საბჭოში სხვა წევრები „ქართული ოცნების“ ინტერესების შესაბამისად დანიშნულიყვნენ. ბრიტანეთის მთავრობა ასევე წერს, რომ ლევან მურუსიძემ სარგებელი მიიღო სააპელაციო სასამართლოში უვადოდ დანიშვნით, განზრახვით, გააგრძელოს თავისი საჯარო ფუნქციების არასათანადოდ შესრულება, რათა უზრუნველყოს, რომ სასამართლო დანიშვნები და გადაწყვეტილებები „ქართული ოცნების“ სასარგებლოდ მიიღება. ლევან მურუსიძესა და მიხეილ ჩინჩალაძეს 2023 წლის აპრილში აშშ-მ დაუწესა ფინანსური სანქციები. მათ ასევე აქვთ არაერთი ევროპული ქვეყნის სავიზო სანქციები. პუბლიკა

ამ ქვეყანაში ძალაუფლების ერთადერთი პატრონი, რომელიც საჭადრაკო დაფას მართავს, არის ბიძინა ივანიშვილი. ახლა ვიღაცას მინისტრს დაარქმევენ თუ „მინისტრობანას“ ითამაშებენ, მნიშვნელობა არ აქვს, - ამის შესახებ პარტია „გახარია საქართველოსთვის“ ერთ-ერთმა ლიდერმა ბერდია სიჭინავამ „პალიტრანიუსის“ გადაცემა „დღის ნიუსრუმში“ განაცხადა. მან მთავრობაში განხორციელებული საკადრო ცვლილებები შეაფასა და აღნიშნა,რომ ამ ქვეყნის მთავარი გამოწვევა და პრობლემა არის ბიძინა ივანიშვილი, რომელსაც ყველა უწყება „ჯიბეში უდევს“. „ამ ქვეყანაში მინისტრი, დეპუტატი არ არსებობს. ამ ქვეყანაში არ არსებობს უწყების ხელმძღვანელი, რომელიც დამოუკიდებლობის ნიშნებს ატარებს. ამ ქვეყანაში ძალაუფლების ერთადერთი პატრონი, რომელიც საჭადრაკო დაფას მართავს, არის ბიძინა ივანიშვილი. ახლა ვიღაცას მინისტრს დაარქმევენ თუ „მინისტრობანას“ ითამაშებენ, მნიშვნელობა არ აქვს. ამაზე არ უნდა ვკონცენტრირდეთ. ეს არ არის ფუნდამენტური საკითხები, რომელიც ჩვენ შეიძლება გვაღელვებდეს. ამ ქვეყნის მთავარი გამოწვევა და პრობლემა არის ივანიშვილი, რომელიც არის ამ სისტემის არქიტექტორი. ეს ყველაფერი ჯიბეში უდევს ბიძინა ივანიშვილს“, - განაცხადა სიჭინავამ. მისი შეფასებით, ანრი ოხანაშვილის დანიშვნით სახელმწიფო უსაფრთხოების სამსახურში არაფერი შეიცვლება. „ეს ორგანიზაცია წლების განმავლობაში უკვე პოლიტიკური ინსტრუმენტია და გრიგოლ ლილუაშვილის ხელში როგორი პოლიტიკური ინსტრუმენტიც იყო, იგივე პოლიტიკური ინსტრუმენტი იქნება ანრი ოხანაშვილის ხელში. უბრალოდ, ანრი ოხანაშვილს ბევრად ნაკლები წარმოდგენა აქვს სახელმწიფო უსაფრთხოების სისტემაზე და მის არქიტექტურაზე, ვიდრე პირობითად, გრიგოლ ლილუაშვილს ჰქონდა. ფუნდამენტურად, ჩვენი საზოგადოებისთვის არაფერი იცვლება. ზუსტად ის უსაფრთხოების სამსახურია, რომელიც ჩვენ გვდევნის. ანრი ოხანაშვილის პირობებში, რა თქმა უნდა, არაფერი გაუმჯობესდება, თუ უფრო არ გაუარესდა. ჩვენი ფუნდამენტური პრობლემა არის „ოცნების“ ხელისუფლებაში ყოფნა, რომელიც არის ამ ქვეყნის უსაფრთხოების მთავარი გამოწვევა. ამიტომ, სუს-ის ფორმალური უფროსი, ანრი ოხანაშვილი იქნება თუ გრიგოლ ლილუაშვილი, ამით არაფერი იცვლება, რადგან ამ ქვეყანაში ერთადერთი სუვერენი არის ბიძინა ივანიშვილი, რომელსაც ჯიბეში უდევს ყველა პორტფელი, სუს-იდან დაწყებული და რეგიონული სამინისტროდან დამთავრებული, რომელიც ლილუაშვილს შეუქმნეს“, - განაცხადა სიჭინავამ. მისი თქმით, „ანრი ოხანაშვილის დანიშვნა სუს-ის უფროსის თანამდებობაზე ცოტა კურიოზული არის, თუმცა ეს პირდაპირ მიანიშნებს იმაზე, რომ კობახიძე თავის მანდატს მთავრობის მიღმაც აფართოებს“. „დიდი მნიშვნელობის მატარებელი არ არის საზოგადოებისთვის ანრი ოხანაშვილი იქნება თუ გრიგოლ ლილუაშვილი სახელმწიფო უსაფრთხოების სამსახურის უფროსი, ამით ფუნდამენტური გამოწვევები არ იცვლება“, - განაცხადა სიჭინავამ. გარდა მთავრობაში საკადრო ცვლილებებისა, ბერდია სიჭინავამ სხვა აქტუალური საკითხებიც შეაფასა, მათ შორის სალომე ზურაბიშვილთან შექმნილ „წინააღმდეგობის კომიტეტზეც“ ისაუბრა. „ვიღაც ცდილობს, ამ ორ საკითხს დაამატოს სააკაშვილის, თვითმმართველობის საკითხი, ვიღაც ვიღაცას ამ კოორდინაციაში ებუტება, ვიღაც კომისიას აკრიტიკებს ომთან დაკავშირებით და 31 მარტს, რეფერენდუმის დღეს ქვემოთ იდგნენ და ომი ვინ დაიწყო? თვითონ ყვიროდნენ ზუსტად ისე, როგორც ამას წულუკიანი და ის ადამიანები აკეთებენ, ვინც ამ კომისიაში არიან. ამ იარების და ტკივილების გახსნა ჩვენ არ გვაინტერესებს“, - განაცხადა სიჭინავამ. მისი თქმით, „ნაციონალური მოძრაობისთვის“ სააკაშვილის საკითხი არის ბევრად უფრო პრიორიტეტული, ვიდრე ქვეყანაში დღეს არსებული რეალური პრობლემები. როგორც სიჭინავა აღნიშნავს, აღნიშნული პარტია „ვიღაც ბელადების და კერპების ტყვეობაშია“, რაც პარტია „გახარია საქართველოსთვის“ არ აინტერესებს. „ამიტომ, ამ ბელადომანიით შეპყრობილ პარტიას რა დღის წესრიგი ექნება, ამაზე საუბარი მნიშვნელოვანი არ არის. ამ 2 საკითხის ირგვლივ ვართ ახლა კონცენტრირებული და ვიღაცას თუ მიხეილ სააკაშვილის მთავარ თემად ქცევა უნდა, მივიდნენ და „ვივამედთან“ ჩაატარონ აქცია, აიყოლიონ თავიანთი ათასობით მხარდამჭერი, ვიღაც ხომ შევარდნას და ტყვეობიდან დახსნას აპირებდა“, - განაცხადა სიჭინავამ და აღნიშნა: „ვინ აზიანებს პოლიტიკურ პროცესს, ამას საზოგადოება თავად შეაფასებს“. ამასთან, ბერდია სიჭინავა პარლამენტის საგამოძიებო კომისიის სხდომაზე გიორგი გახარიას შესაძლო დაბარებასაც გამოეხმაურა. „ჯერ გაბედონ და დაგვიბარონ, მერე ვისაუბრებ. ხომ ენები აჭარტალეს ამ კომისიასთან დაკავშირებით, აბა გაბედონ, დაგვიბარონ და მერე შესაბამის, ადეკვატურ პასუხს მიიღებენ. მერე ისე არ აღმოჩნდეს, თავად „ოცნებაში“ პორტირებული ბიძინას თუ მიშას „ნაცები“ გახდეს ასაკრძალი“, - განაცხადა სიჭინავამ. იპნ

სინამდვილეში, სუს-ი ფუნქციონირებას რეგიონული სამინისტროს სახელით გააგრძელებს, სუს-ის რეალური უფროსიც ისევ ლილუაშვილია,- ამის შესახებ პარტია „გახარია საქართველოსთვის“ თავმჯდომარის მოადგილე, ნათია მეზვრიშვილი სოციალურ ქსელში წერს, რითაც საქართველოს მთავრობის სისტემაში განხორციელებულ ცვლილებებს ეხმაურება. როგორც მეზვრიშვილი აცხადებს, აღნიშნული გადაწყვეტილებით, „ქართული ოცნება“ადგილობრივი თვითმმართველობის არჩევნებისთვის ემზადება. „სინამდვილეში, სუს-ი ფუნქციონირებას რეგიონული სამინისტროს სახელით გააგრძელებს. სუს-ის რეალური უფროსიც ისევ ლილუაშვილია. ვადა გაუვიდა, გადაალაგეს, სუს-იც თან გაატანეს არჩევნების გაყალბების უმთავრესი ფუნქციით. „ოცნება“ადგილობრივი არჩევნებისთვის ემზადება. სუს-ს მთავარი როლი ჰქონდა 26 ოქტომბრის არჩევნების გაყალბებაში. ახალი არჩევნებისთვის გარემოს გაუმჯობესების ნაცვლად, გაყალბების პრაქტიკები ახალ მწვერვალებს მიაღწევს“,- წერს მეზვრიშვილი. ამასთან, როგორც ის აცხადებს, აღნიშნული გადაწყვეტილება, „პირდაპირ კავშირშია ორი დღის წინ დაანონსებული თითქოსდა, მთავრობის ეფექტიანობის დეპარტამენტის შექმნა, რომლის მიზანი კორუფციის ცენტრალიზებაა“. „ოცნების“ ამ გადაწყვეტილებასთან პირდაპირ კავშირშია ასევე, ორი დღის წინ დაანონსებული თითქოსდა, მთავრობის ეფექტიანობის დეპარტამენტის შექმნა, რომლის მიზანი კორუფციის ცენტრალიზებაა და არა ეფექტიანობის უზრუნველყოფა ან კორუფციის წინააღმდეგ ბრძოლა. მთავრობის ადმინისტრაციაში გვქონდა შიდა აუდიტის დეპარტამენტი, რომელიც გენერალური ინსპექციის ფუნქციას ასრულებდა ადმინისტრაციის მასშტაბით. ეს დეპარტამენტი გადაკეთება ე.წ. მთავრობის ეფექტიანობის დეპარტამენტად. ამ ნაბიჯით ივანიშვილი ახდენს კორუფციული გარიგებების (როგორც მისი ძალაუფლების წყაროს) სრულ მონოპოლიზებას“, - წერს მეზვრიშვილი სოციალურ ქსელში. ცნობისთვის, გრიგოლ ლილუაშვილი სახელმწიფო უსაფრთხოების სამსახურის უფროსის თანამდებობას ტოვებს. რეგიონული განვითარების სამინისტრო დამოუკიდებელ სამინისტროდ ჩამოყალიბდება და გრიგოლ ლილუაშვილი რეგიონული განვითარების მინისტრის თანამდებობას დაიკავებს. სუს-ის უფროსის თანამდებობაზე ანრი ოხანაშვილია წარდგენილი, რომელიც იუსტიციის მინისტრის პოსტს იკავებდა. იუსტიციის მინისტრის პოსტზე კი ოხანაშვილს „ქართული ოცნების“ დეპუტატი პაატა სალია შეცვლის. იპნ

კიდევ ერთხელ დასტურდება რამხელა დარტყმას აყენებს “ოცნება” საქართველოს ეროვნულ ინტერესებს, უპირველეს ყოვლისა - ქვეყნის ტერიტორიულ მთლიანობასა და სუვერენიტეტს, - ამის შესახებ პარტია „გახარია საქართველოსთვის“ განცხადებაშია ნათქვამი. განცხადებაში პარტია ხაზს უსვამს, რომ „საკუთარი სამშობლოსთვის ომის დაწყების გადაბრალება მაშინ, როცა საქართველოს რუსეთის წინააღმდეგ ყველა საერთაშორისო სამართლებრივი დავა მოგებული აქვს, უმძიმეს დარტყმას აყენებს საქართველოს ტერიტორიულ მთლიანობასა და სუვერენიტეტს“. „კერძოდ: - ⁠ამართლებს რუსეთის აგრესიას, ოკუპაციას და ეთნიკურ წმენდას, ხოლო ოკუპანტ სახელმწიფოს პასუხისმგებლობას უხსნის; - აზიანებს მშვიდობიანად საქართველოს ტერიტორიული მთლიანობის აღდგენის პერსპექტივას; - კიდევ უფრო ართულებს დევნილების საკუთარ სახლებში დაბრუნების შესაძლებლობას; - აზიანებს ოკუპირებული ტერიტორიების არაღიარების პოლიტიკას; - წინააღმდეგობაშია 2008 წლის აგვისტოს ომთან დაკავშირებით სტრასბურგის სასამართლოს მიერ საქართველოს სასარგებლოდ მიღებულ გადაწყვეტილებებთან; ახალისებს რუსეთის აგრესიული პოლიტიკის გაგრძელებას და ზრდის განმეორებითი აგრესიის საფრთხეს; - შეურაცხყოფს რუსეთის აგრესიასთან ბრძოლისას დაღუპული გმირების ხსოვნას და მათ თავდადებას სამშობლოს დაცვისთვის წარმოებულ ბრძოლაში; - ლახავს ქართული ჯარის ღირსებას და ხელს უწყობს თავდაცვის ძალებში მორალისა და მოტივაციის შესუსტებას, რაც ჯარის თავდაცვისუნარიანობის აუცილებელი კომპონენტია. ოცნების ე.წ. დეპუტატების საგამოძიებო კომისიის დასკვნამდე გაკეთებულ სამარცხვინო განცხადებებს უკვე მოჰყვა გამოხმაურება ოკუპირებული ცხინვალის ე.წ. საგარეო უწყებისგან, რომელიც მოითხოვს “სამხედრო აგრესიის" გაჩაღებაში "დამნაშავე" პირების დასჯას. იმ პირების, რომლებმაც, მათი თქმით, "სამხრეთ ოსეთში" შეჭრის ბრძანება გასცეს. ამას ემატება ჟენევის დისკუსიების ფორმატში რუსეთის საგარეო უწყების მისალმება “ოცნების” სამარცხვინო ბოდიშისადმი. კიდევ ერთხელ დასტურდება რამხელა დარტყმას აყენებს “ოცნება” საქართველოს ეროვნულ ინტერესებს, უპირველეს ყოვლისა - ქვეყნის ტერიტორიულ მთლიანობასა და სუვერენიტეტს”, - აღნიშნულია განცხადებაში. იპნ

პარტია „საქართველოსთვის“ წარმომადგენლები საქართველოს თითოეულ მუსლიმ მოქალაქეს რამაზან-ბაირამის დღესასწაულს ულოცავენ. როგორც პარტიის მიერ გავრცელებულ განცხადებაშია აღნიშნული, რამაზან-ბაირამი შერიგების, სითბოს, სიყვარულის და ერთმანეთზე ზრუნვის დღესასწაულია. „ჩვენს თითოეულ მუსლიმ მოქალაქეს ვულოცავთ რამაზან-ბაირამის დღესასწაულს. ეს შერიგების, სითბოს, სიყვარულის და ერთმანეთზე ზრუნვის დღესასწაულია. ჩვენ ამ ქვეყნის ერთობლივი მსახურების უნიკალური, მრავალსაუკუნოვანი, სამაგალითო ისტორია გვაქვს. გისურვებთ მშვიდობას, ჯანმრთელობას და სიხარულს თქვენ, თქვენს ოჯახებსა და სრულიად საქართველოს!“, - აღნიშნულია პარტია „საქართველოსთვის“ მიერ გავრცელებულ ინფორმაციაში. იპნ

ხარძიანის საქმეზე რატომ არ დაიბარეს მოსამართლე, ქალბატონი ნოზაძე? მისმა გადაწყვეტილებამ არ აქცია ხარძიანი სისტემის მსხვერპლად? რატომ არ იყო ასეთი მკაცრი ქალბატონი წულუკიანი? თითს მოსამართლეს რატომ ვერ უქნევდა? ვერ ბედავს ადეიშვილის მოსამართლის მიყვანას სხდომაზე, რომ კითხვა დაუსვას - „შე უნამუსო ადამიანო, ეს პატიოსანი ადამიანი ციხეში რატომ ჩააგდე?“ ქალბატონო თეა, ამის გამბედაობა არ გაქვთ? - ეს საგამოძიებო კომისია ფარსია,- ამის შესახებ პარტია „გახარია საქართველოსთვის“ ერთ-ერთმა ლიდერმა, ლევან გოგიჩაიშვილმა „პალიტრანიუსის“ გადაცემა „დღის ნიუსრუმში“ „ნაციონალური მოძრაობის” საქმიანობის შემსწავლელ დროებით საგამოძიებო კომისიაზე საუბრისას განაცხადა. რაც შეეხება საგამოძიებო კომისიის მანდატის გაფართოებას და „ქართული ოცნების“ წარმომდგენლების განცხადებებს, რომ კომისიის კითხვებზე პასუხის გაცემა გიორგი გახარიასაც მოუწევს, გოგიჩაიშვილის თქმით, „გაბედონ და იმ დღესვე მიიღებენ პასუხს ჩვენს პოზიციასთან დაკავშირებით“. „ძალიან სასაცილოა! კომისიის სხდომაზე ზის შარმანაშვილი, რომელიც მიშას საკონსტიტუციო კომისიის თავმჯდომარის მოადგილე იყო, მერე წარადგინა ელჩად. იქ ზის ალეკო ტაბატაძე, ძალიან ოდიოზური პოლიციელი, ყველაფრის მკადრებელი თავისი ცხოვრებისა და კარიერის განმავლობაში, შევარდნაძის დროსაც. მერე მუშაობდა ვანო მერაბიშვილის პოლიციის უფროსად ქობულეთში. იყო აჭარაში სამმართველოს მოადგილე. [ვიცით] რა ხდებოდა ვანო მერაბიშვილის პოლიციაში, განსაკუთრებით 2008-2009 წლებში, რა რეპრესიები იყო, რა ნარკოტიკებისა და იარაღის ჩადება იყო, რა კონვეიერი მუშაობდა უდანაშაულო ადამიანების ციხეში გასამგზავრებლად. იქ არის ადამიანი, რომელიც კუდ-ის ადვოკატი იყო, ალუდა ღუდუშაური. ის თავის დროზე ადეიშვილმა იმიტომ არ გახადა [მოსამართლე], რომ კუდ-ის ადვოკატია და ახალაიას კადრიაო. იმდენად მიუღებელი იყო სააკაშვილის სისტემაშიც კი, რომ მოსამართლე ვერ გახდა. იქ ზის ვიღაც ინჯია, გაურკვეველი ადამიანი. ხან მიშასთან არიან, ხან შევარდნაძესთან, ხან ბიძინასთან. ეს ხალხი არის ამ კომისიაში, რომელიც არასერიოზულია. მარტივად გეტყვით, ხარძიანის საქმეს იხილავენ. ძალიან მძიმე ტრაგედია მოხდა ამ ოჯახში. წინა ხელისუფლებამ გადაუარა მათ. ადვოკატი ჰყავდათ მოყვანილი, მოსამართლე არ მოუყვანიათ. მოსამართლემ ხარძიანი ციხეში არ გაუშვა? მისმა გადაწყვეტილებამ არ აქცია ეს ადამიანი სისტემის მსხვერპლად? მოსამართლეებს რატომ არ იხილავენ? რატომ არ დაიბარეს ქალბატონი ნოზაძე? რატომ არ იყო ასეთი მკაცრი ქალბატონი წულუკიანი? თითს მოსამართლეს რატომ ვერ უქნევდა? ეშინია მიშას მოსამართლეების? მათთან ბრძოლა წააგო? ვერ ბედავს ვიღაც ადეიშვილის მოსამართლის მიყვანას საგამოძიებო სხდომაზე, რომ კითხვა დაუსვას - „შე უნამუსო ადამიანო, ეს პატიოსანი ადამიანი ციხეში რატომ ჩააგდე?“ ქალბატონო თეა, ამის გამბედაობა არ გაქვთ? თუ გგონიათ, რომ პროკურატურის ყოფილ ადვოკატს და ახლანდელ გადმობარებულ ადვოკატს რომ მიიყვან და თითს დაუქნევთ, ამაში იზომება თქვენი გამბედაობა? მიიყვანეთ ის მოსამართლეები, თუნდაც, „მაგნატის“ საქმეზე ვინც იყო, ვინც წინასწარი პატიმრობა მიუსაჯა. გაბედე და მიიყვანე ის მოსამართლე. აქ გამბედაობა არ გაქვს, თქვენთვის აქ წითელი ხაზია. ამიტომ, ვამბობთ, ფარსია ეს საგამოძიებო კომისია“,- განაცხადა გოგიჩაიშვილმა. რაც შეეხება კომისიის მიერ აგვისტოს ომთან დაკავშირებული საკითხის შესწავლას, როგორც გოგიჩაიშვილმა აღნიშნა, საგამოძიებო კომისიაზე აგვისტოს ომის განხილვა „დისკრედიტაციას უწევს და ქართული არმიის მორალზე ცუდად მოქმედებს“. გარდა ამისა, გოგიჩაიშვილი გამოეხმაურა ცხინვალის ე.წ. საგარეო უწყების განცხადებასაც. მისი თქმით, ეს „ჩვენს სახელმწიფოსა სუვერენიტეტს ასუსტებს“. „განცხადებები, რომლებმაც სეპარატისტული ანკლავები აიძულა, ასეთი განცხადებები აკეთოს, რა თქმა უნდა, ჩვენს სახელმწიფოს, სუვერენიტეტს ასუსტებს. ქართულ პატივმოყვარეობაზე, თავმოყვარეობაზე და ღირსებაზე მოქმედებს. ამ პროცესს თავის ზურგზე იწვნევს „ქართული ოცნება“. ის ძალიან დიდ ზიანს მიიღებს ამასთან მიმართებით. ეს ზიანი, შეიძლება, მათი სისხლის სამართლებრივი პასუხისმგებლობის საფუძველიც კი გახდეს მომავალში. მათი უპასუხისმგებლო ქმედებებიდან გამომდინარე, ჩვენ მაქსიმალურად უნდა შევამციროთ ეს ზიანი, როგორც ქვეყნის შიგნით, ასევე მის გარეთ. ეს განსაკუთრებით ჩვენს პარტნიორებთან. ადამიანთან რომ ჩახვალ და დახმარებაზე საუბარს დაუწყებ, შემოგიტრიალდება და გეტყვის - აგერ, სოზარ სუბარს სხვა ამოცანა აქვს და ჩვენგან რა გინდათო. ამიტომ ვამბობ, ჩვენი გამოსასწორებელი იქნება ის ზიანი, რომელსაც ახლა ეს კომისია, თუნდაც ამ საკითხთან მიმართებით აყენებს. ბიძინა ივანიშვილს ძალიან მარტივი ამოცანა აქვს. ის სისტემური ძალადობა, რაც მან არჩევნების შემდგომ დაიწყო, ასეთი პროცესები დაგეგმილი არ ჰქონდა. ეგონა, რომ ყველაფერი მარტივად შერჩებოდა, გადააგორებდა და გააგრძელებდა გზას. მას სისტემური ძალადობა მოუწია. ბიძინა ივანიშვილი ადამიანებმა სხვა თვალით დაინახეს. როგორც თავად აშინებს მიშათი, თვითონაც საშიში გახდა. მან გააფუჭა ურთიერთობა ევროპასთან, აშშ-სთან, მან პოლიცია ქართველი ახალგაზრდების საცემად გამოყენება და ამას დღემდე აგრძელებენ. მან ციხეები სინდისის პატიმრებით გაავსო, ხალხის ტყვედ აყვანა დაიწყო. ახლა მარტივი ამოცანა აქვს - გახსნას ეს იარები და თქვას, რომ მე კი ვარ ნაძირალა, არაადამიანი და ცუდი, მაგრამ ესენი ჩემზე უარესები არიან. ამ პრაქტიკული ამოცანის განხორციელების საშუალებასაც არ მივცემთ, ჩვენ ყოველთვის გვექნება რეაქცია ამ ე.წ. კომისიის საქმიანობასთან დაკავშირებით“,- აღნიშნა გოგიჩაიშვილმა. გარდა აღნიშნული თემისა, გოგიჩაიშვილი გამოეხმაურა „ქართული ოცნების“ აღმასრულებელი მდივნის, მამუკა მდინარაძის განცხადებას, კანონპროექტთან დაკავშირებით, რომელიც „კოლექტიური ნაციონალური მოძრაობის“ და მისი მემკვიდრე პარტიების არაკონსტიტუციურად გამოცხადებას ეხება. გოგიჩაიშვილის თქმით, „სასაცილოა, როგორ უნდა მოხდეს ეს პროცესი“. „მივმართავ „ქართული ოცნების“ ჯერ კიდევ შემორჩენილ ამომრჩეველს - ჩემო ძვირფასებო, ჩემთვის ძალიან სასაცილოა ხოლმე, როდესაც „მიშას ნაცი“ გამოდის 2025 წელს და ჩვენ გაუქმებით გვემუქრება. „მიშას ნაცი“, მდინარაძე, ადეიშვილის პროკურატურის ხელის ბიჭი და ყველაზე დისკრედიტებული, ბინძური ადვოკატი იყო. ყველაფერს ეგ აკეთებდა, ყველაფერს მას ავალებდნენ. ქვეკონტრაქტორი იყო ადვოკატების. უბინძურესი როლი ჰქონდა მიშას რეჟიმში. ეს „მიშას ნაცი“ 2025 წელს მე მეუბნება, რომ მან უნდა მიმართოს იმ კომისიის საფუძველზე, სადაც უმრავლესობაში არიან დეპუტატები, რომლებიც ასევე, პირდაპირი მნიშვნელობით „მიშას ნაცები“ იყვნენ. მან უნდა მიმართოს როინიშვილს, რომელიც საკონსტიტუციო მოსამართლეა და რომელიც თავის დროზე, ადეიშვილისა და შავაძის პროკურორი იყო, რათა გამაუქმოს. ამ ტრაგედიაზე, სისულელეზე, სიბრიყვეზე ძალიან გვეცინება და ძალიან არასერიოზულია. არაფრის თავი არ აქვთ მათ. რისი ამკრძალავები არიან? „ქართული ოცნების“ საპარლამენტო შემადგენლობა რომ აიღოთ, 30%-ზე მეტი ყოფილი „მიშას ნაცები“ არიან. ამ ორსახეობას, უნამუსობასაც თავის საზღვარი აქვს. მათ ბობოქრობას, ჭიქაში ქარიშხლის გამოწვევის არანაირი რესურსი [არ აქვთ]. როგორ უნდა მოხდეს ეს პროცესი, უბრალოდ, ძალიან სასაცილოა“,- აღნიშნა გოგიჩაიშვილმა. რაც შეეხება დღეს დაგეგმილ აქციას, გოგიჩაიშვილმა აღნიშნა, რომ „დღეს მნიშვნელოვანი დღეა, მაგრამ ის, რომ ხვალ სხვა რეალობა დადგება, ამ მოლოდინების შექმნა საჭირო არ არის“. „პოლიტიკური პროცესი დინამიკური პროცესია. დღევანდელი აქცია და ხალხის რაოდენობა მნიშვნელოვანია. ამ აქციას გარეთაც უყურებს ხალხი. ჩვენი პარტნიორები, ჩვენი მეგობრები, ეს ბევრ გადაწყვეტილებას ტონს აძლევს. ეს ემოციას აძლევს, თუნდაც იმ სენატორებს, რომლებმაც ცივი შხაპი და ცივი წყალი გადაასხეს „ქართულო ოცნებაში“. გვახსოვს ამ აქტის მიღების შემდგომ ყოფილი პორტირებული ნაცის ბრიფინგი, სადაც მან ფაქტობრივად, ყველას განადგურებით დაგვემუქრა“,- განაცხადა გოგიჩაიშვილმა. ამასთან, როგორც გოგიჩაიშვილმა აღნიშნა, „კობახიძეს 34 წლის წინ რომ მიეღო რეფერენდუმში მონაწილეობა, „არას“ შემოხაზავდა“. იპნ

მოვუწოდებ ყველას, სისხლის ფასად მიღებულ უმთავრეს მონაპოვარს - სამშობლოს დამოუკიდებლობასა და თავისუფლებას ნუ გადავაყოლებთ ძალაუფლებისთვის ბრძოლას - გავუფრთხილდეთ 31 მარტის მონაპოვარს და ერთად დავდგეთ ამ მონაპოვრის დასაცავად, - ამის შესახებ პარტია „გახარია საქართველოსთვის“ ლიდერი, გიორგი გახარია სოციალურ ქსელში წერს. მისი თქმით, დამოუკიდებლობის აღდგენის რეფერენდუმიდან 34-ე წლისთავს ყველა ერთად უნდა ვზეიმობდეთ, თუმცა „სამწუხაროდ, მტერმა მაინც შეძლო, გაგვხლიჩა და დაგვაპირისპირა ერთმანეთს“. „დღეს 31 მარტია. ზუსტად 34 წლის წინ ქართველმა ხალხმა გადაწყვიტა სახელმწიფოებრივი დამოუკიდებლობის აღდგენა. ეს დღე ყველაზე მნიშვნელოვანი თარიღია ჩვენი ქვეყნის უახლეს ისტორიაში. 31 მარტი რადიკალიზაციის დაძლევის, ჩვენი ერთიანობის სიმბოლოცაა. წესით, დღეს ყველანი ერთად უნდა ვზეიმობდეთ - განურჩევლად პოლიტიკური შეხედულებისა. ეს ჩვენი წინაპრების ანდერძია. თუმცა, სამწუხაროდ, მტერმა მაინც შეძლო, გაგვხლიჩა და დაგვაპირისპირა ერთმანეთს. მოვუწოდებ ყველას, სისხლის ფასად მიღებულ უმთავრეს მონაპოვარს - სამშობლოს დამოუკიდებლობასა და თავისუფლებას ნუ გადავაყოლებთ ძალაუფლებისთვის ბრძოლას. გავუფრთხილდეთ 31 მარტის მონაპოვარს და ერთად დავდგეთ ამ მონაპოვრის დასაცავად. გილოცავთ 31 მარტს!“ - წერს გახარია. იპნ

პარტიის „საქართველოსთვის“ ლიდერი გიორგი გახარია ექიმებს პროფესიულ დღეს ულოცავს. განცხადებას გახარია „ფეისბუქზე“ ავრცელებს და აცხადებს, რომ ექიმები ბევრი პერსონალური პრობლემისა და გამოწვევის მიუხედავად, დაუღალავად, ენთუზიაზმით და პასუხისმგებლობით იბრძვიან მოქალაქეების ჯანმრთელობისა და სიცოცხლისთვის. „ექიმებო, გილოცავთ პროფესიულ დღეს! ეს პროფესია ჩემთვის უცხო არასდროს ყოფილა, მაგრამ ერთმანეთი უფრო ახლოს გავიცანით გლობალური პანდემიის მართვის პროცესში, სადაც აღმოვაჩინე, რომ თქვენ, თქვენი ძალიან ბევრი პერსონალური პრობლემისა და გამოწვევის მიუხედავად, ხშირად დაუფასებლად, მაგრამ როგორ დაუღალავად, ენთუზიაზმით და პასუხისმგებლობით იბრძვით თითოეული ჩვენგანის ჯანმრთელობისა და სიცოცხლისთვის. ექიმობა სამოქალაქო გმირობაა, განსაკუთრებით იმ პირობებში როგორშიც გიწევთ მუშაობა და მე გპირდებით, ჩემი შესაძლებლობის ფარგლებში გავაკეთებ ყველაფერს, რომ ამ ქვეყანაში თქვენს პროფესიაში იყოთ დაფასებულები”, - წერს გახარია სოციალურ ქსელში. ipn

ვგმობთ ქალი აქტივისტებისა და პოლიტიკოს ელენე ხოშტარიას მიმართ განხორციელებულ ძალადობრივ და დამამცირებელ ქმედებებს - მივმართავთ საგამოძიებო უწყებებს, დაუყოვნებლივ დაიწყონ გამოძიება, - ამის შესახებ განცხადებას ქალთა ორგანიზაცია "საქართველოსთვის" ავრცელებს. "ქალთა ორგანიზაცია "საქართველოსთვის" ვგმობთ ქალი აქტივისტებისა და პოლიტიკოს ელენე ხოშტარიას მიმართ ბოლო ორი დღის განმავლობაში განხორციელებულ ძალადობრივ და დამამცირებელ ქმედებებს, ასევე სამართალდამცავების მხრიდან მათ უკანონო დაკავებებს. ასეთი ძალადობრივი მოქმედებები ახალისებს ქალთა მიმართ ძალადობას ქვეყანაში და საფრთხეს უქმნის დემოკრატიულ პრინციპებს ჩვენს საზოგადოებაში. მოვუწოდებთ ყველას, განურჩევლად პოლიტიკური შეხედულებებისა, დაიცვან დემოკრატიული პრინციპები, პატივი სცენ ერთმანეთის უფლებებს და გამიჯნონ პოლიტიკური კრიტიკა ძალადობისა და შეურაცხყოფისგან. მივმართავთ საგამოძიებო უწყებებს, რათა დაუყოვნებლივ დაიწყონ ობიექტური და მიუკერძოებელი გამოძიება აღნიშნულ ფაქტებზე და უზრუნველყონ კანონის სრული ძალით აღსრულება", - წერია განცხადებაში.

არ შეიძლება შენს პოლიტიკურ ინტერესებს იმგვარად ალაგებდე, რომ სახელმწიფო ინტერესებს და რეპუტაციას ბღალავდე. ბერდია სიჭინავა, პარტია "გახარია საქართველოსთვის" აღმასრულებელი მდივანი. სრული ეთერის ლინკი https://youtu.be/ZLw-5jgs7OI

Ekho Kavkaza ოკუპირებული აფხაზეთის დე ფაქტო შინაგან საქმეთა მინისტრზე დაყრდნობით წერს, რომ 30 მარტს ოკუპირებულ აფხაზეთში უკანონო პატიმრობაში მყოფ ირაკლი ბებუას გათავისუფლებენ – ბებუას 9 წელი ჰქონდა მისჯილი. ე.წ. მინისტრი უარყოფს, რომ ის ვადაზე ადრე თავისუფლდება – როგორც Ekho Kavkaza წერს, ოკუპირებულ აფხაზეთში მოქმედებს მხოლოდ დროებითი მოთავსების იზოლატორები, რის გამოც სასჯელის ვადა „ერთი ორად“ აითვლება. ირაკლი ბებუა გალის რაიონში 2020 წლის 30 სექტემბერს დააკავეს, მას შემდეგ, რაც ოკუპირებული აფხაზეთის დროშა დაწვა. ამით მან სოხუმში აფხაზეთის ომის 27 წლის საზეიმო ღონისძიებები გააპროტესტა. დე ფაქტო მილიციამ ბებუას სახლი გაჩხრიკა და ბრალად ყუმბარის ფლობა დასდო, ე.წ. სასამართლომ კი და 9-წლიანი პატიმრობა და 10 ათასი რუბლის გადახდა მიუსაჯა. პუბლიკა

Thank you for sharing this! https://gayssingles.org It’s ever inviting to glimpse many perspectives on this topic. I rate the effort and charge rest into this list inform – it provides valuable insights and indubitably gives me something to dream about. Looking forward to more content like this! See also - https://bdsm-movie.info

ისე არ მოხდეს, რომ ამ საგამოძიებო კომისიის საქმიანობა ხელახლა გამოსაძიებელი იქნეს, ეს ადამიანები ამახინჯებენ ფაქტებს, მალავენ ადამიანებს, მურუსიძეს გირგვლიანის საქმიდან აქრობენ. ბერდია სიჭინავა, პარტია "გახარია საქართველოსთვის" აღმასრულებელი მდივანი. ვიდეო: https://www.facebook.com/ForGeoGe/videos/957912563202763

გაასამართლებს თუ არა საგამოძიებო კომისია ბიძინას ნაცებს მიშას ნაცებთან ერთად?… ანა ბუჩუკური, პარტია "გახარია საქართველოსთვის" წევრი. ვიდეო: https://www.facebook.com/ForGeoGe/videos/948033614167166

როდესაც მეგობრებს დაკარგავ, რუსეთთან ერთი ერთზე დარჩები - „ქართული ოცნების“ სიმხდალიდან გამომდინარე კი, ამ ქვეყანას, თუ რუსეთთან ერთი ერთზე აღმოვჩნდებით, არანაირი შანსი არ აქვს,- ამის შესახებ პარტია „გახარია საქართველოსთვის“ ერთ-ერთმა წევრმა, ლევან გოგიჩაიშვილმა გერმანიის მიერ საქართველოში საპროტესტო აქციების „ჩახშობაზე პასუხისმგებელი პირებისთვის“ ქვეყანაში შესვლაზე დამატებითი აკრძალვების დაწესებაზე საუბრისას განაცხადა. მისივე თქმით, ეს არის ევროპის დამოკიდებულება „ქართული ოცნების“ რეჟიმის მიმართ“. „ეს არის ევროპის დამოკიდებულება „ქართული ოცნების“ რეჟიმის მიმართ. სამწუხაროდ, „ქართულმა ოცნებამ“ უკვე დაგვაკარგვინა ძალიან ბევრი შემოსავალი, საუბარია 2 მილიარდ ევროზე მეტზე, რომელიც უნდა გამოეყო ევროკავშირს ასოცირების ხელშეკრულებასთან მიმართებით. სამწუხაროდ, „ქართული ოცნება“ დგას გზაზე, რომელსაც ავტორიტარიზმი ჰქვია. „მეგობარი აქტი“, რომელიც 27-ში განიხილება, მნიშვნელოვანია. „ქართული ოცნება“ რასაც აკეთებს, ეს არის საქართველოს სუვერენიტეტის დასუსტება. როდესაც დაკარგავ მეგობრებს, რუსეთთან დარჩები ერთი ერთზე. „ქართული ოცნების“ სიმხდალიდან გამომდინარე უბრალოდ, არანაირი შანსი არ აქვს ამ ქვეყანას, თუ ჩვენ რუსეთთან ერთი ერთზე აღმოვჩნდებით. ის ყველაფერს აკეთებს, რათა ერთი ერთზე დაგვტოვოს რუსეთთან და ჩვენი სუვერენიტეტი შესუსტდეს. ჩვენი სუვერენიტეტის სიძლიერეა მაშინ, როდესაც ჩვენი მეგობრები ჩვენ გვერდით დგანან“,- განაცხადა გოგიჩაიშვილმა. იპნ

“ოცნებას” დისკომფორტი აქვს, სტაბილურობის განცდა, რა იქნება ხვალ და ზეგ, ივანიშვილი მარცხნივ წავა თუ მარჯვნივ თვითონაც არ იციან, მათ შორის, არც კობახიძემ. ისინი დამოკიდებულები არიან ერთი ადამიანის ახირებებზე და ის ერთი ადამიანი როგორ გადაწყვეტილებას მიიღებს წარმოდგენა არ აქვთ, რაც უდიდესი პრობლემაა პოლიტიკაში. კახაბერ ქემოკლიძე, პარტია "გახარია საქართველოსთვის" პოლიტიკური მდივანი. ვიდეო: https://www.facebook.com/ForGeoGe/videos/686115997191778