ყველა აქტივობა

ბრიუსელში, ხვალ, ევროკავშირის საგარეო საქმეთა საბჭოს შეხვედრა გაიმართება, რომელზეც, სხვა საკითხებთან ერთად, საქართველოში ბოლო დროს განვითარებულ მოვლენებზეც ისაუბრებენ, - ინფორმაციას ევროპული საბჭო ავრცელებს. მათივე ინფორმაციით, ევროკავშირის საგარეო საქმეთა მინისტრები უკრაინის საგარეო საქმეთა მინისტრთან, ანდრეი სიბიგასთან ვიდეოკონფერენციის საშუალებით აზრთა არაფორმალური გაცვლის შემდეგ, უკრაინის წინააღმდეგ რუსეთის აგრესიას განიხილავენ. ამასთან, საგარეო საქმეთა საბჭო ევროკავშირისა და აშშ-ს ურთიერთობების შესახებაც იმსჯელებს. მინისტრები ახლო აღმოსავლეთში, მათ შორის სირიაში, ბოლო დროს განვითარებულ მოვლენებსაც განიხილავენ. „საგარეო საქმეთა საბჭო განიხილავს მიმდინარე საკითხებს, ყურადღებას გაამახვილებს ბოლოდროინდელ მოვლენებზე და უსაფრთხოებისა და თავდაცვის სფეროში სწრაფად ცვლად ვითარებაზე. ამ პუნქტის ფარგლებში მინისტრები მოლდოვასა და საქართველოში განვითარებულ მოვლენებს შეეხებიან”, - აღნიშნულია ინფორმაციაში. საგარეო საქმეთა საბჭოს შეხვედრას ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, კაია კალასი უხელმძღვანელებს. იპნ

მხარს ვუჭერ მთავრობისთვის დახმარების შეწყვეტას, ვემხრობი სანქციებს, რომლებიც დაწესდა და შეიძლება მეტი მაღალჩინოსნის წინააღმდეგაც უნდა დაწესებულიყო - მხარს ვუჭერ სალომე ზურაბიშვილსაც, რომელსაც აქვს მტკიცე პოლიტიკური პოზიცია, რომ მას, მისი ე.წ. მემკვიდრისგან განსხვავებით, ლეგიტიმაცია აქვს, - ამის შესახებ „ატლანტიკური საბჭოს“ უფროსი მკვლევარმა, დენიელ ფრიდმა „ამერიკის ხმასთან“ ინტერვიუში განაცხადა. მისი თქმით, ესმის ის არგუმენტები, რომელიც ქართველ დემოკრატებს და დემოკრატიის მომხრე ქართველებს აქვთ იმის თაობაზე, რომ ახლანდელი მთავრობა არალეგიტიმურია. „მე მხარს ვუჭერ მთავრობისთვის დახმარების შეწყვეტას, ვემხრობი სანქციებს, რომლებიც დაწესდა და შეიძლება მეტი მაღალჩინოსნის წინააღმდეგაც უნდა დაწესებულიყო. და ნამდვილად მესმის ის არგუმენტები, რომელიც ქართველ დემოკრატებს, დემოკრატიის მომხრე ქართველებს აქვთ იმის თაობაზე, რომ ახლანდელი მთავრობა არალეგიტიმურია. მხარს ვუჭერ სალომე ზურაბიშვილსაც, რომელსაც აქვს მტკიცე პოლიტიკური პოზიცია, რომ მას, მისი ე.წ. მემკვიდრისგან განსხვავებით, ლეგიტიმაცია აქვს. ეს მესმის. მაგრამ მინდა მაყურებელს მოვუწოდო, რომ არ იფიქრონ აღიარების საკითხზე, როგორც გარე მხარდაჭერის ერთადერთ ზომასა და ინსტრუმენტზე“, - აღნიშნა დენ ფრიდმა. როგორც ფრიდი განმარტავს, საქართველოს მომავალი არაა დამოკიდებული იმაზე, რას გააკეთებენ დასავლეთში, არამედ ეს დამოკიდებულია იმაზე, რას გააკეთებს ქართველი ხალხი. „არსებობს საქართველოს დემოკრატიული მოძრაობის მხარდაჭერის სხვა გზებიც, და ამერიკასა და ევროპას ამის დიდი გამოცდილება აქვთ. საქართველოს მომავალი არაა დამოკიდებული იმაზე, რას გავაკეთებთ ჩვენ, დასავლეთში, ეს დამოკიდებულია იმაზე, რას გააკეთებს ქართველი ხალხი. ქართველმა ხალხმა კი ამ დრომდე, უკვე ამდენი კვირის განმავლობაში, აჩვენა ისეთი თავდადება და სიმამაცე, რამაც დარწმუნებული ვარ გააკვირვა „ქართული ოცნება“ და ალბათ მოსკოვიც", - განაცხადა დენიელ ფრიდმა. ფრიდის თქმით, საქართველოში ლეგიტიმაციის კრიზისია. „საქართველოში ლეგიტიმაციის კრიზისია, „ქართული ოცნების“ მთავრობა როგორც ჩანს, დამახინჯებულად მოწადინებულია, რომ გააღრმაოს საქართველოს იზოლაცია და ეს შეიძლება მათი მიზანიც კი იყოს. ეს ნამდვილად იქნება მოსკოვის მიზანი, რომ საქართველოს მთავრობის იზოლირება მოახდინონ და ამით საქართველო კიდევ უფრო მეტად მოექცეს მოსკოვის კონტროლის ქვეშ, [გახდეს] მასზე დამოკიდებული“, - განმარტა დენ ფრიდმა. იპნ

ბიძინა ივანიშვილის მმართველობის პერიოდში ვაშინგტონსა და თბილისს შორის ურთიერთობის გაუმჯობესება არ იქნება, - ამის შესახებ „ატლანტიკური საბჭოს“ ევრაზიის ცენტრის დირექტორი ჯონ ჰერბსტმა „ამერიკის ხმასთან“ ინტერვიუში განაცხადა, რითაც გამოეხმაურა ამერიკის კონგრესში დაინიცირებულ ორ საკანონმდებლო აქტს, რომელიც „ქართული ოცნების“ წევრების დასანქცირების და ხელისუფლების ლეგიტიმურობის არაღიარების შეეხება. როგორც ჰერბსტმა აღნიშნა, მნიშვნელოვანი მსოფლიო ძალა მის მთავრობას საკმარისად ლეგიტიმურად არ აღიარებს”. მისივე შეფასებით, „ეს კიდევ უფრო დაასუსტებდა ბიძინა ივანიშვილს, რომელიც უკვე საკმაოდ სუსტია, განგრძობითი, გამუდმებული დემონსტრაციების ფონზე“. „ძნელია ვარაუდი ზუსტად რამდენად, მაგრამ ეს საქართველოს მთავრობის პოზიციებს, მის მიერ პოლიტიკის წარმოებას ქვეყნის შიგნითაც და მის გარეთაც სავარაუდოდ მნიშვნელოვნად შეასუსტებს", - განაცხადა ჯონ ჰერბსტიმ. როგორც ჰერბსტი განმარტავს, „კობახიძის მიერ მათ მტრებთან ირანში მეგობრულად ყოფნა, აჩვენებს, რომ ის მათი მეგობარი არაა“. „ტრამპის გუნდს არ მოსწონს ირანი, მათ შენიშნეს, რომ კობახიძე ირანში იყო და ირანელ ლიდერებს ხვდებოდა. ჩემი აზრით, ეს იმას ნიშნავს, რომ [ვიქტორ] ორბანმა რომც სცადოს, წარმატებას ვერ მიაღწევს ტრამპის იმაში დარწმუნებაში, რომ ივანიშვილს დაუმეგობრდეს... ბევრი რამის თქმა…. ახალი ადმინისტრაციის ამ ეტაპზე ძალიან ძნელია. მაგრამ შემიძლია ის ვთქვა, რომ ვაშინგტონსა და თბილისს შორის ურთიერთობის გაუმჯობესება არ იქნება. ბიძინა ივანიშვილის მმართველობის ქვეშ მყოფ თბილისს და ახალი ადმინისტრაციის ურთიერთობას ვგულისხმობ. კობახიძის მიერ ჩვენს მტრებთან ირანში მეგობრულად ყოფნა, აჩვენებს, რომ ის ჩვენი მეგობარი არაა", - აღნიშნა ჯონ ჰერბსტმა. იპნ

ლევან იოსელიანი ამბობს, რომ მის განცხადებაზე „აჟიოტაჟი აბსოლუტურად ხელოვნურადაა ატეხილი”. მან „პირველ არხთან” განცხადება გააკეთა იმ კრიტიკაზე, რომელიც მისსავე განცხადებებს მოჰყვა ამავე არხის ეთერში. კერძოდ, ლევან იოსელიანმა გათქვა ძალადობის მსხვერპლთა თავშესაფრის მისამართი, რაც სენსიტიური ინფორმაციაა და მსხვერპლების უსაფრთხოებიდან გამომდინარე, საიდუმლოა. სახალხო დამცველის ყოფილმა მოადგილე ეკატერინე სხილაძემ და სხვა მოქალაქეებმა ამის გამო მწვავედ გააკრიტიკეს ლევან იოსელიანი და როგორც საზოგადოებრივ მაუწყებელს, ისე თავად სახალხო დამცველს ინტერვიუების წაშლა მოსთხოვეს. რამდენიმესაათიანი მოთხოვნის შემდეგ ინტერვიუები წაიშალა, თუმცა, დღეს ლევან იოსელიანი არ აღიარებს, რომ მის განცხადებას ზიანი მოჰყვა. პუბლიკა

ჩვენთან ბრძოლაში ივანიშვილმა დაკარგა ღირსება, შემდეგში დაკარგავს ფულსაც და ძალაუფლებასაც. ივანიშვილისთვის სამშობლო არის ფული. ფულის გარდა არავის და არაფერს არ ცნობს. ლევან გოგიჩაიშვილი, პარტია "გახარია საქართველოსთვის" წევრი. ვიდეო: https://www.facebook.com/ForGeoGe/videos/927040442882965

ბელარუსში საპრეზიდენტო არჩევნები მიმდინარეობს, საარჩევნო უბნები ადგილობრივი დროით 08:00 საათზე გაიხსნა, - ინფორმაციას „ფრანს-პრესი“ ავრცელებს. გამოცემა წერს, რომ ეს არის პირველი საპრეზიდენტო არჩევნები 2020 წლის საპრეზიდენტო არჩევნების შემდეგ, რომელიც, ქვეყნის ოპოზიციისა და დასავლეთის შეფასებით, ლუკაშენკომ გააყალბა, 2020 წლის საპრეზიდენტო არჩევნების შემდეგ დაწყებული მასობრივი საპროტესტო აქციები კი ბელარუსის ხელისუფლებამ ჩაახშო და ათასობით ადამიანი დააპატიმრა. „ჩვენმა ყველა მოწინააღმდეგემ და მტერმა უნდა გაიგოს: არ გქონდეთ იმედი, ჩვენ არასოდეს გავიმეორებთ იმას, რაც გვქონდა 2020 წელს“, - განაცხადა ლუკაშენკომ პარასკევს. „ფრანს-პრესი“ წერს, რომ მოსალოდნელია, რომ ლუკაშენკო, რომელიც 1994 წლიდან ხელისუფლებაშია, გამარჯვებულად გამოცხადდება და ქვეყნის პრეზიდენტის თანამდებობას მეშვიდე ვადით დაიკავებს. ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა გუშინ განაცხადა, რომ ბელარუსში დაგეგმილი საპრეზიდენტო არჩევნები არის სიყალბე და რომ ლუკაშენკოს არანაირი ლეგიტიმაცია არ აქვს. იპნ

სეისმური მონიტორინგის ეროვნული ცენტრის დირექტორმა, თეა გოდოლაძემ საქართველო დატოვა. მასთან ინტერვიუ „მთის ამბებმა“ გამოაქვეყნა. ინტერვიუ გამგზავრებამდე რამდენიმე საათით ადრეა ჩაწერილი. თეა გოდოლაძეს სისხლის სამართლის კოდექსის 126-ე, ძალადობის მუხლით აქვს აქვს ბრალი წარდგენილი. პროკურატურის მტკიცებით, გოდოლაძე ოჯახის წევრზე ძალადობდა. საგამოძიებო უწყებებს გოდოლაძის წინააღმდეგ მისმა ყოფილმა პარტნიორმა მიმართა. ბრალი თეა გოდოლაძეს 2023 წლის ივლისში წარუდგინეს, შოვის მეწყერამდე რამდენიმე კვირით ადრე. სეისმოლოგი ამბობდა, რომ რეალურად თავად არის ფიზიკური ძალადობის მსხვერპლი და რომ როგორც წარდგენილი ბრალი, ისე სამთავრობო ტელეარხ „რუსთავი 2″-ის მიერ გავრცელებული სიუჟეტი “შავი კამპანია” და “პროფესიონალი ქალის რეპუტაციის შელახვა და მისი გაჩუმების მცდელობაა”. ქალთა უფლებადამცველი ორგანიზაცია „საფარის” ცნობით, თეა გოდოლაძის ყოფილი პარტნიორი თავად იყო სისხლის სამართლის კოდექსით ბრალდებული მასზე ძალადობის გამო და თბილისის საქალაქო სასამართლომ ის გაამტყუნა კიდეც. განაჩენი 2024 წლის 7 ივნისს გამოვიდა. ხოლო 2024 წლის დეკემბერში გოდოლაძის ყოფილი პარტნიორის გამამტყუნებელი განაჩენი თბილისის სააპელაციო სასამართლომ გააუქმა. „მთის ამბებთან” თეა გოდოლაძე ამბობს, რომ ამ გადაწყვეტილებით სააპელაციომ მწვანე შუქი აუნთო ის საქმეს, სადაც თავად არის ბრალდებული. შესაბამისად, მისი დაპატიმრება ამ გადაწყვეტილების შემდეგ გახდა რეალური. თეა გოდოლაძე წლების განმავლობაში აკრიტიკებდა „ქართული ოცნების” გადაწყვეტილებებს გარემოს დაცვისა და ურბანული განვითარების კუთხით. პუბლიკა

იტალიის უდინეს პროვინციაში ყალბი პირადობის დამადასტურებელი დოკუმენტების ფლობისა და დამზადებისთვის 19 ქართველი ქალი დააკავეს. ამის შესახებ ინფორმაციას ადგილობრივი მედია ავრცელებს. მათივე ინფორმაციით, სახელმწიფო პოლიციამ, უდინეს პროკურატურის მიერ ჩატარებული გამოძიების შემდეგ, არალეგალური მიგრაციის წინააღმდეგ ფართომასშტაბიანი ოპერაციის ფარგლებში 12 სხვადასხვა პროვინციაში 52 ლოკაციაზე ჩხრეკა ჩაატარა. უდინეს პროვინციის შემოსავლების სააგენტოს ტერიტორიულმა სამსახურებმა სასამართლო უწყებებს შეატყობინეს, რომ ქართველი ქალების მნიშვნელოვანი რაოდენობა საგადასახადო კოდის მოსაპოვებლად თავს ევროკავშირის მოქალაქეებად წარადგენდნენ ევროკავშირის წევრი ქვეყნების პირადობის მოწმობებით (სლოვაკეთის, პოლონეთის, ლიეტუვის). ამგვარად, მათ შეეძლოთ მუშაობის უფლების მიღება და ასევე ესარგებლათ იმ იურიდიული, საგადასახადო და ჯანმრთელობის შეღავათებით, რითაც ევროკავშირის მოქალაქეები სარგებლობენ. შემდეგ ისინი სხვა პროვინციებში გადადიოდნენ, სადაც სამუშაოებს უფრო ადვილად პოულობდნენ. გამომძიებლები ვარაუდობენ კარგად სტრუქტურირებული ორგანიზაციის არსებობას, რომელიც დოკუმენტებს საზღვარგარეთ აწარმოებს და დაახლოებით, 600 ევროს გადახდის შემდეგ მყიდველებს აწვდის. გამოძიება გრძელდება იმის დასადგენად, თუ ვინ შეიძინა ყალბი დოკუმენტები. იტალიური მედიის ცნობით, თუ დადასტურდება, რომ დაკავებულები იტალიაში რეგულარული ბინადრობის მოთხოვნებს ვერ აკმაყოფილებენ, მათ ქვეყნიდან გააძევებენ. იპნ

ახალგაზრდა იურისტთა ასოციაციის დირექტორი ნონა ქურდოვანიძე „ბათუმელები/ნეტგაზეთის” დამფუძნებელისა და ხელმძღვანელის, მზია ამაღლობელის შესახებ სოციალურ ქსელში პოსტს აქვეყნებს. როგორც ის წერს, მზია ამაღლობელი უკვე მე-14 დღეა შიმშილობს, იღებს მხოლოდ წყალს და არ იღებს არავითარ საკვებს ან რაიმე დანამატს. 20 იანვარს გავრცელდა მზია ამაღლობელის წერილი ციხიდან, რომელშიც ის ამბობს, რომ შიმშილობს და „სიცოცხლეზე ღირებული თავისუფლებაა“. მზია ამაღლობელი ბათუმში აქციაზე 11 იანვარს დაწყებულ აქციაზე, უკვე 12 იანვარს დააკავეს. მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს. 14 იანვარს ბათუმის საქალაქო სასამართლომ, მოსამართლემ ნინო სახელაშვილმა, პროკურატურის შუამდგომლობა გაიზიარა და მზია ამაღლობელი პატიმრობაში დატოვა. წინასასამართლო სხდომის თარიღად 4 მარტი, 11:00 საათი განისაზღვრა. იპნ

ადვოკატ ელგუჯა ავსაჯანიშვილის განცხადებით, 20 წლის ნიკოლოზ ჯავახიშვილი, რომელიც ჯგუფურ ძალადობაში მონაწილეობის ბრალდებითაა დაკავებული, სამარტოო საკანში გადაიყვანეს. როგორც „ინტერპრესნიუსთან“ საუბარში ავსაჯანიშვილი აცხადებს, ჯავახიშვილის სამარტოო საკანში გადაყვანა მიზნად მის დასჯას ისახავს. „წერილი გავრცელდა კიდეც, ქალბატონ მზია ამაღლობელის მხარდაჭერის და სოლიდარობის ნიშნად მან და რევაზ კიკნაძემ შიმშილობა გამოაცხადეს. ჯავახიშვილი წერილში თავადაც ამბობს, რადგან სოლიდარობის ნიშნად შიმშილობა დაიწყო, 20 წლის ბიჭი საკანში მარტო გადაიყვანეს, ჩაკეტილი ჰყავთ, იზოლირებულია, არც ტელევიზორი და არც სხვა რამე ბენეფიტი აქვს. სამარტოო საკანში გადაყვანა დამსჯელობითი მიზნით გადაყვანას უტოლდება. როგორ ფიქრობთ, გლდანის ციხეში ვინმე ვინმეს რამეს განუმარტავს? ბიჭმა შიმშილობა გამოაცხადა და მარტო ჩასვეს, როცა იმავე ციხეში სხვა მოშიმშილეებიც არიან და შეეძლოთ, თუ მოშიმშილეების იზოლირებას ახდენდნენ, ერთად ჩაესვათ, რევაზ კიკნაძეც შიმშილობს. შესაბამისად, ეს განზრახ არის გაკეთებული, რომ ზეწოლა მოახდინონ, შენ თუ ასე მოიქცევი, ჩაგსვამთ თეთრ კედლებში მარტო და გაგაგიჟებთო. შიმშილობის შეწყვეტას არ აპირებს, ამ ბიჭს ისედაც კარგი ჯანმრთელობის მდგომარეობა არ ჰქონდა და ეს შიმშილობა მასზე რა თქმა უნდა, აისახება. მნიშვნელოვანი გარემოება არის ის, რომ მხოლოდ წყალს იღებს“, - აცხადებს ავსაჯანიშვილი. ცნობისთვის, ნიკოლოზ ჯავახიშვილი სხვა პირებთან ერთად რუსთაველის გამზირზე მიმდინარე საპროტესტო აქციებზე ჯგუფურ ძალადობაში მონაწილეობის ბრალდებით დააკავეს. მას აღკვეთის ღონისძიების სახით პატიმრობა აქვს შეფარდებული. იპნ

ტერორისტული დაჯგუფება ჰამასის ტყვეობიდან, ჰამასსა და ისრაელს შორის დადებული ცეცხლის შეწყვეტისა და მძევლების გათავისუფლების შეთანხმების საფუძველზე, შემდეგი 4 ისრაელელი მძევალი გათავისუფლდა. კარინა არიევი, დანიელა გილბოა, ნაამა ლევი და ლირი ალბაგი, რომელთა ასაკი 19-დან 20 წლამდეა, ჰამასმა ღაზის ცენტრში სპეციალურად დადგმულ "ცერემონიაზე" გამოიყვანა. საბოლოოდ კი, გათავისუფლებულები წითელ ჯვარს გადასცა. აღნიშნული 4 ისრაელელი ახალგაზრდა ქალი ჰამასის ტყვეობაში 2023 წლის 7 ოქტომბრიდან, 477 დღის განმავლობაში იმყოფებოდა. ისრაელის თავდაცვის ძალების სათვალთვალო დანაყოფის ჯარისკაცები არიან. თავის მხრივ, ისრაელმა 200 პალესტინელი პატიმარი გაათავისუფლა, თუმცა ჰამასი შეთანხმების პირობების დარღვევაში დაადანაშაულა, ვინაიდან შეთანხმების მიხედვით, თავდაპირველად ჩვეულებრივი მოქალაქე ქალები უნდა გათავისუფლდნენ, ჯარისკაცი ქალები კი მხოლოდ ამის შემდგომ. ჰამასს 25 იანვარს გასათავისუფლებელი მძევლების სიაში მოქალაქე არბელ იეჰუდი უნდა შეეყვანა, რაც ტერორისტულმა დაჯგუფებამ არ გააკეთა, თუმცა განაცხადა, რომ იეჰუდს მომდევნო კვირას დაგეგმილი გაცვლის ფარგლებში გაათავისუფლებს. აქამდე, მძევალთა გაცვლის პირველი რაუნდის ფარგლებში, ისრაელმა ჰამასის ტერორისტული ორგანიზაციის 471-დღიანი ტყვეობიდან სამი ისრაელელი ახალგაზრდა ქალი, რომი გონენი, ემილი დამარი და დორონ შტეინბრეხერი დაიბრუნა. ტაბულა

პრაქტიკულად, [აშშ-ის] ახალი კაბინეტის ყველა მინისტრს შევხვდი - საშუალება მქონდა, მეთქვა, რამდენად მნიშვნელოვანია ის, რაც ხდება დღეს საქართველოში, - ამის შესახებ საქართველოს მეხუთე პრეზიდენტმა სალომე ზურაბიშვილმა „ამერიკის ხმის“ ქართულ რედაქციასთან ინტერვიუში განაცხადა, სადაც ვაშინგტონში ვიზიტი შეაჯამა. ზურაბიშვილის თქმით, შეხვედრებისას მისი გზავნილი იყო, რომ საქართველოში არსებული სიტუაციის მიმართ ყურადღება ძალიან მალე და სწრაფადაა საჭირო. „პრაქტიკულად, ახალი კაბინეტის ყველა მინისტრს შევხვდი. ძალიან ხანმოკლე შეხვედრები იყო, იმიტომ რომ ეს იყო შეხვედრები იმ ღონისძიებების ფარგლებში, სადაც არ არის დიდი დრო იმისთვის, რომ ხანგრძლივად გაშალო გზავნილები, რაც ძალიან მნიშვნელოვანია დღეს. მაგრამ მაინც, იმის საშუალება მქონდა, რომ მეთქვა რამდენად მნიშვნელოვანია ის, რაც ხდება დღეს საქართველოში, რამდენად საგანგაშოა ეს იმ რეგიონში, რომელიც ამერიკისთვის მნიშვნელოვანია, რადგან იქვეა შავი ზღვა, სტრატეგიული ახალი პროექტები, ქვეყანაში, რომელიც ამერიკის დახმარების ობიექტია ბოლო 30 წლის განმავლობაში. საქართველო არის ის ქვეყანა, რომელმაც პერ კაპიტა, ანუ თითო ადამიანზე, მიიღო ყველაზე დიდი დახმარება [ამერიკისგან], ისრაელის შემდეგ, რაც არ არის ცოტა. ეს იმიტომ მოხდა, რომ ამერიკას ჰქონდა ინტერესები და სტრატეგიული ინტერესები საქართველოში. მე დარწმუნებული ვარ, რომ ეს ინტერესი დღესაც არსებობს. ეს იყო ჩემი გზავნილი, რომ საჭიროა, რომ ძალიან სწრაფად, ძალიან მალე, ყურადღება იყოს იმ სიტუაციის მიმართ, რაც არსებობს საქართველოში- ერთი მხრივ რეპრესიები, რომლებიც მიმდინარეობს, დიქტატურის ჩამოყალიბება და ასევე ახალი გეოპოლიტიკური მიმართულებები ამ რეჟიმის, რომელიც რეჟიმია და მიჰყვება რუსეთის მოდელს. არა მხოლოდ რუსეთის მოდელს, ასევე მეგობრულ ურთიერთობებს ამყარებს ჩინეთთან და უთმობს საქართველოში სტრატეგიულ ინტერესებს, რაც, ალბათ, ძალიან სერიოზულად უნდა აინტერესებდეს და აშფოთებდეს ამერიკას“,- განაცხადა ზურაბიშვილმა. სალომე ზურაბიშვილის თქმით, ახლა მისი როლია პარტნიორებს სთხოვოს, რომ იზოლაცია ქართულ საზოგადოებას არ შეეხოს. „იზოლაცია არის დღევანდელი რეჟიმის მიმართულება და მათი ერთგვარი ახალი ოცნება. ამაზე მუშაობენ, რომ საქართველო დარჩეს მარტო, დარჩეს მარტო რუსეთის წინაშე პოლიტიკურად თუ უსაფრთხოების კუთხით და ჩინეთის წინაშე ეკონომიკურად. ეს არ არის ის, რაც საქართველოს მოსახლეობის ოცნება იყო რეალურად ამ მთელი 30 წლის მანძილზე, რაც მოჰყვება დამოუკიდებლობის შემდგომ. ამდენად, ჩემი როლი, როგორც ხმა ამ სახელმწიფოსი, რომელსაც სხვა ლეგიტიმური ხმა აღარ აქვს, არის ის, რომ ჩვენს პარტნიორებს ვთხოვოთ დახმარება იმისთვის, რომ ეს იზოლაცია თუ ეხება ლიდერებს, რომლებიც დიქტატურას ირჩევენ დღეს, არ უნდა ეხებოდეს ქვეყანას, არ უნდა ეხებოდეს საზოგადოებას, არ უნდა ეხებოდეს ჩვენს ხვალინდელ ეკონომიკას. ეს არის ჩემი მთავარი გზავნილი ჩვენს ყველა პარტნიორთან, რომ დღეს დაგვეხმარონ იმისთვის, რომ ხვალ კიდევ უფრო დაეხმარონ საქართველოს“,- განაცხადა სალომე ზურაბიშვილმა. მისივე თქმით, საქართველო ამერიკასთან სტრატეგიულ პარტნიორობას უნდა დაუბრუნდეს. „ჩემი მიზანი აქ არ იყო რაიმეს გადალაგება და არ ვთვლი, რომ რაიმეს გადალაგება საჭირო იყოს. ჩვენ უნდა დავალაგოთ ჩვენი ურთიერთობები ჩვენ ამერიკელ პარტნიორთან და გავაგრძელოთ ის 30-წლიანი პოლიტიკა, რაც იყო. სტრატეგიულ პარტნიორობას უნდა დავუბრუნდეთ. მე ძალიან მიხარია, რომ სომხეთმაც ხელი მოაწერა სტრატეგიულ პარტნიორობას. ეს იმას ნიშნავს რომ კავკასია რჩება ამერიკისთვის ძალიან მნიშვნელოვან რეგიონად. ამ რეგიონში ჩვენ ვართ ცენტრი და ჩვენი პარტნიორობა ამერიკასთან არის ქვაკუთხედი ამ რეგიონისთვის და ჩვენი მომავლისთვის“,- განაცხადა ზურაბიშვილმა. რაც შეეხება მის გეგმებს, ზურაბიშვილი ამბობს, რომ გეგმაა, „არჩევნები შედგეს“. „გეგმებზე არასდროს არ ვპასუხობ, იმიტომ, რომ ეს კითხვა არაფერს არ მოიცვას. გეგმა არის, რომ არჩევნები შედგეს, ეს ყველას მოთხოვნაა. ჩვენ ვმუშაობთ ამ არჩევნების პირობებზე. თუკი ისე მოხდება, რომ რეჟიმი დათანხმდება არჩევნებზე, იმიტომ რომ სხვა გზა არ ექნება. თუ არადა თვითონ ჩამოიშლება და ყოველი შემთხვევისთვის უნდა ვიყოთ მზად ორივე მხრივ არჩევნებისთვის. ეს არის პირველ რიგში უფრო პარტიების მოვალეობა, ვიდრე პრეზიდენტის. მე ვარ სახელმწიფოს გარანტი და მომავალი სტაბილურობის, ამ არჩევნების დროს და ამ არჩევნების შემდეგ“,- განაცხადა ზურაბიშვილმა. იპნ

ვატიკანის იუბილის დროს სიტყვით გამოსვლისას მშვიდობის დარგში ნობელის პრემიის ლაურეატმა, ფილიპინელმა ჟურნალისტმა მარია რესამ საქართველოში მიმდინარე პროტესტსა და მზია ამაღლობელზე ისაუბრა. მარია რესას წიგნი “როგორ დავამარცხოთ დიქტატორი” ქართულ ენაზე გამომცემლობა არტანუჯი • Artanuji Publishingმა გამოსცა. პუბლიკა

თავისუფალი და აგრარული უნივერსიტეტების სტუდენტები და ლექტორები საპროტესტო მარშს მართავენ. აქციის მთავარი ლოზუნგია „გააშუქე სიმართლე". მათ ადგილზე საქართველოსა და ევროკავშირის დროშები აქვთ მიტანილი. ასევე სხვადასხვა შინაარსის ბანერები: „თუ არ არის პური, უნდა იყოს სანახაობა", „გააშუქე სიმართლე" და ა.შ. ისინი აღმაშენებლის ხეივნიდან მსვლელობით ჯერ „პოსტივისთან“ მივლენ, შემდეგ „იმედთან“ და ბოლოს საზოგადოებრივი მაუწყებელთან გადაინაცვლებენ. მარშის მონაწილეების განცხადებით, ტელეკომპანიებთან მისვლის მიზანია, რომ მათ სიმართლე გააშუქონ. ასევე, ისინი მიმდინარე აქციების დროს დაკავებული პირების გათავისუფლებასაც ითხოვენ. აქციის მონაწილეები საპატრულო პოლიციის თანამშრომლებმა გააფრთხილეს, რომ იმ შემთხვევაში, თუ მსვლელობის მონაწილეები სრულად გადაკეტავენ აღმაშენებლის ხეივანს, ისინი დაჯარიმდებიან. იპნ

„ბიძინა ივანიშვილი იყო ის ადამიანი, რომელმაც პრაქტიკულად შექმნა სააკაშვილის რეჟიმი. იმიტომ, რომ რეჟიმს სჭირდება ფული და ის იყო სააკაშვილის რეჟიმის ფინანსები და ზურგი. კი, ვიცოდი ეს 2012 წელს, მინდოდა ეს რეჟიმი წასულიყო და იმასაც ვხვდებოდი, რომ მას პირადად რომ შეეხო, სწორედ იმიტომ დაიწყო რეჟიმის წინააღმდეგ ბრძოლა, მაგრამ მე დავიჯერე, რომ მოინანია და უნდა ვალი დაგვიბრუნოს ქართველებს...“ - ვრცელი ინტერვიუ სოფო ხორგუანთან | გადაცემაში „სანაია“ ვიდეო: https://www.facebook.com/SophiaKhorguaniofficial/videos/542640835481111

„ახლა ახალციხეში ვარ და მიუხედავად იმისა, რომ არ არის ეს რეგიონი პოლიტიკურად აქტიური, აქაც კი, რამდენიმე დღეა დგანან ჟურნალისტები/სამოქალაქო აქტივისტები და სოლიდარობას უცხადებენ მზია ამაღლობელს...“ - ვრცელი ინტერვიუ სოფო ხორგუანთან | რადიო „ფორტუნას“ ეთერში გადაცემის მოსმენას შეძლებთ შემდეგ ბმულზე: https://www.facebook.com/SophiaKhorguaniofficial/videos/581178771429970

ივანიშვილს „მესიჯი“ აქვს ჩაშლილი რეგიონებში, რომ თითქოს გახარიაზე თავდასხმის საქმეში სუფთაა და ეს ვიღაცის­ თვითშემოქმედებაა - მტკიცებულებები ადასტურებს, რომ ეს იყო შეკვეთილი, წინასწარ ორგანიზებული, ჩასაფრებით მოწყობილი ჯგუფური თავდასხმა,- ამის შესახებ პარტიის, „გახარია საქართველოსთვის“, ერთ-ერთი ლიდერი ნათია მეზვრიშვილი „ფეისბუქზე“ წერს. მეზვრიშვილი იმ გარემოებებზე საუბრობს, რაც, მისი თქმით, ადასტურებს, რომ გახარიაზე თავდასხმა წინასწარ ორგანიზებული იყო. „როგორც ჩვენამდე მოვიდა ინფორმაცია, ივანიშვილს „მესიჯი“ აქვს ჩაშლილი რეგიონებში, რომ თითქოს გახარიაზე თავდასხმის საქმეში სუფთაა და ეს ვიღაცის თვითშემოქმედებაა. „ოცნების“ ბოლო დღეების პოზიციონირებაც ამას ადასტურებს. კარგია, რომ აცნობიერებს ამ თავდასხმის პოლიტიკურ, სამართლებრივ და საერთაშორისო შედეგებს. თუმცა, გაძრომის საშუალებას არ მოგცემთ! თავდასხმის დღიდან ინტენსიურ გამოძიებას ვაწარმოებთ. მტკიცებულებები ადასტურებს, რომ ეს იყო შეკვეთილი, წინასწარ ორგანიზებული, ჩასაფრებით მოწყობილი ჯგუფური თავდასხმა. დაკვეთა - ივანიშვილის, აღსრულება - თავდამსხმელებთან ერთად სუს-ის და პოლიციის, „შერატონ ბათუმის“ დახმარებით. გახარიას მთელი დღის განმავლობაში სუს-ი და პოლიცია აკონტროლებდა. თავდამსხმელები წინასწარ იყვნენ განლაგებულები „შერატონ ბათუმის“ ლობიში, ბარის მხარეს და ელოდებოდნენ, გახარია როდის შემოვიდოდა. შემოსვლის ზუსტი დროის შესახებ ინფორმაცია ჰქონდათ. მეტიც, ჩვენმა გამოძიებამ გაარკვია, რომ „ოცნება“ წინასწარ იყო დალაგებული „შერატონთან“ 5 - ვარსკვლავიან სასტუმროში თავდასხმის დროს არც „რისეფშენი“ იყო და არც დაცვა. ამ წინასწარი გარიგების შედეგი იყო მათ შორის ის, რომ ბატონი ქორიძის ეპიზოდზე „შერატონს“ პოლიციაში არ დაურეკავს. უამრავი დეტალი გვაქვს დადგენილი, როგორ და რატომ დააგვიანა პოლიციამ, როგორ ანადგურებდა მტკიცებულებებს „შერატონი“, სუს-ის წარმომადგენელი, გაწმენდის მიზნით, როგორ უმოწმებდა ტელეფონებს „შერატონის“ დაცვას, პოლიციამ იმავე ღამეს როგორ გაიტაცა უსაფრთხოების უფროსი (რომელიც კამერებზეა პასუხისმგებელი) და როგორ კოორდინირებულად მუშაობდა პროკურატურა და „შერატონი“ კამერების ჩანაწერების მძევლად ასაყვანად. არც ის დაგვრჩენია ყურადღების მიღმა აჭარის მთავრობა როგორ მუშაობს „შერატონის“ გენერალურ დირექტორთან და პროკურატურაში დალაგებულ ტექსტებს როგორ გვწერენ. კიდევ უამრავი მნიშვნელოვანი დეტალია, რაც აუცილებლად იხილავს დღის სინათლეს და საზოგადოება დარწმუნდება, რომ ეს იყო შეკვეთილი, წინასწარ ორგანიზებული, ჩასაფრებით მოწყობილი ჯგუფური თავდასხმა“,- წერს მეზვრიშვილი. ipn

პარტია "გახარია საქართველოსთვის გუნდის წევრებმა აჭარის პროკურატურასთან აქცია გამართეს, ვიდეო მტკიცებულების გადაცემისა და გიორგი გახარიაზე ორგანიზებული თავდასხმის დროულად გამოძიების მოთხოვნით.

დიახ, დღეს ივანიშვილის ფულს ახალგაზრდების სისხლის სუნი ასდის! ანა ბუჩუკური, პარტია "გახარია საქართველოსთვის" წევრი. ვიდეო: https://www.facebook.com/ForGeoGe/videos/1667679114126002

ივანიშვილი სრულად მოუმზადებელი შეხვდა ბრიტანულ სანქციებს. ჩვენ ძალიან ახლო და აქტიური კავშირები გვაქვს დიდ ბრიტანეთთან და აუცილებლად ვიმუშავებთ მათთან, გამოვიყენებთ ყველა შესაძლებლობას რეჟიმის დასასრულებლად დიმიტრი ცქიტიშვილი, პარტია "გახარია საქართველოსთვის" წევრი. ვიდეო: https://www.facebook.com/ForGeoGe/videos/1348274043290012

დღეს, თბილისსა და რეგიონებში 15 აქცია-მსვლელობა გაიმართება. კერძოდ, დედაქალაქში, 14:30 საათზე, კამპუსის შენობიდან (დავით აღმაშენებლის 240) გაიმართება კახა ბენდუქიძის კამპუსის მარში; 15:00 საათზე, მზიური, ამფითეატრში, შეხვედრა მაისის სტუდენტურ მოძრაობასთან 16:00 საათზე, იპოდრომზე, აქცია-კონცერტი „მუსიკალური აქცენტები - მიტაცება“. ასევე, 17:00 საათზე - მეტრო „დელისიდან“ საბურთალოელების მარში გაიმართება. 18:00 საათზე- რესპუბლიკის მოედანზე მიხა ხელაშვილის სახელობის მარში იგეგმება. 19:00 საათზე გაიმართება ფსიქოლოგების მარში თსუ-ს პირველი კორპუსიდან; 19:00 საათზე - პროტესტი საზოგადოებრივ მაუწყებელთან; 19:00 – აქცია საქართველოს პარლამენტთან 20:30 საათზე - რესპუბლიკის მოედანზე გაიმართება ფასებით უკმაყოფილოთა მარში. 23:00 - იპოდრომიდან პარლამენტისკენ გაიმართება მსვლელობა „მუსიკალური აქცენტები“. რაც შეეხება რეგიონებს, ხვალინდელი აქციების გეგმა ასეთია: ახალციხე - 18:00 საათზე - არა რუსულ რეჟიმს! -შოთა რუსთაველის ძეგლთან ბათუმში, 19:00 საათზე საკონსტიტუციო სასამართლოსთან აქცია - სამშობლოს სამსახურში! ზუგდიდში, 18:00 საათზე სამხარეო ადმინისტრაციის წინ აქცია - ბრძოლა გამარჯვებამდე; თელავში, 15:00 და 18:00 საათამდე, მერიის წინ - უწყვეტი პროტესტი თელავში! ქუთაისში - 19:00 საათზე, მერიის წინ აქცია სახელწოდებით - კი ევროპას, არა რუსეთს! იპნ

სოციალური სამართლიანობის ცენტრი (SJC) თბილისის მუნიციპალური ინსპექციის მიერ თბილისის ზღვის ტერიტორიაზე ნაგებობების დანგრევას ეხმაურება. ორგანიზაციის შეფასებით, „ზამთარში სოციალურ-ეკონომიკურ მოწყვლადობაში მყოფი ადამიანებისთვის ერთადერთი თავშესაფრის დანგრევა და უსახლკაროდ დატოვება არა მხოლოდ სოციალური საჭიროებების მიმართ ხელისუფლების არასენსიტიურობას აჩვენებს, არამედ მკვეთრად არაჰუმანურია და აშკარად ეწინააღმდეგება ადამიანის უფლებებს”. როგორც განცხადებაშია აღნიშნული, წინა შემთხვევების მსგავსად, თბილისის მერიამ ამ შემთხვევაშიც ადამიანის უფლებების საერთაშორისო სტანდარტები, მათ შორის, ეკონომიკურ, სოციალურ და კულტურულ უფლებათა შესახებ საერთაშორისო პაქტის წესები უხეშად დაარღვია. ორგანიზაციის შეფასებით, საერთაშორისო ვალდებულებების საწინააღმდეგოდ, მერიამ ერთი მხრივ, არაფერი მოიმოქმედა დემონტაჟის შეჩერებისა და ადამიანების ღია ცის ქვეშ დატოვების პრევენციისათვის, ხოლო, მეორე მხრივ, ადამიანებს თავშესაფრები პროცედურული გარანტიების დარღვევით დაუნგრია. სოციალური სამართლიანობის ცენტრი განცხადებაში საბინაო პოლიტიკის არარსებობაზე საუბრობს. ორგანიზაცია აღნიშნავს, რომ „ქართულმა ოცნებამ” 12 წლის განმავლობაში არ შეიმუშავა სახელმწიფოს საბინაო პოლიტიკა, რომელიც სოციალურად მოწყვლადი ჯგუფებისთვის სათანადო საცხოვრებლის უფლებების რეალიზებას შეუწყობდა ხელს. ასევე, განცხადებაში ნათქვამია, რომ ეროვნული კანონმდებლობა „კვლავ უკიდურესად მწირი და ფრაგმენტულია”. ორგანიზაცია მიიჩნევს, რომ „თბილისის ზღვის მიმდებარე ტერიტორიაზე განვითარებული მოვლენები „ქართული ოცნების” მუშაობის კორუფციულ, ანტისოციალურ და უსამართლო ბუნებას კიდევ ერთხელ ავლენს – სახელისუფლებო პირამიდის თავში მოქცეული პირებისა და კომპანიებისთვის კანონი პრაქტიკულად არ მოქმედებს და ისინი თავისუფლად ახერხებენ საკუთარი კერძო ბიზნეს ინტერესების რეალიზებას, ხშირად ქალაქის მდგრადი განვითარებისა და აქ მცხოვრები ადამიანების ინტერესების საწინააღმდეგოდ, ღარიბი მოსახლეობისთვის კი სისტემა მხოლოდ რეპრესიული ლოგიკით მუშაობს და სრულად უგულებელყოფს მათ სოციალურ საჭიროებებს, ღირსებას და სხვა ფუნდამენტურ უფლებებს”. სოციალური სამართლიანობის ცენტრი მოუწოდებს თბილისის მერიას: დაუყოვნებლივ უზრუნველყოს თავშესაფრის გარეშე დარჩენილი ადამიანების ალტერნატიულ ღირსეულ საცხოვრებელში გადაყვანა; უარი თქვას ღარიბების, უსახლკაროების მიმართ რეპრესიულ პოლიტიკაზე და თვითნებური და დაუცველი გამოსახლებაზე და შეიმუშაოს, საბინაო პოლიტიკა, რომელიც მოწყვლადი სოციალური ჯგუფების საცხოვრებელ უფლებებს და საჭიროებებს უპასუხებს. დღეს მერიამ თბილისის ზღვის დასახლებაში რამდენიმე ნაგებობა დაანგრია. ადგილზე იმყოფებოდნენ ამ ნაგებობების მფლობელები, მუნიციპალური ინსპექცია და საპატრულო პოლიცია. მოქალაქეები აცხადებენ, რომ ზოგ ნაგებობაში ცხოვრობდნენ და მერიამ მათი დანგრევა ისე დაიწყო, რომ პირადი ნივთების გამოტანაც ვერ მოასწრეს. ეს კომენტარები მათ TV პირველთან გააკეთეს. საპატრულო პოლიციის წარმომადგენელი TV პირველთან ამბობს, რომ ამ ტერიტორიაზე უკანონო ნაგებობები იყო და იქ არავინ ცხოვრობდა. მისივე ინფორმაციით, მერიამ ნაგობობების მფლობელები წინასწარ გააფრთხილა. პატრულის წარმომადგენელს მოქალაქე იქვე, ამ კომენტარის მიცემის დროს უსწორებს, რომ ამ შენობებში ადამიანები ცხოვრობდნენ და მათ ინფორმაცია არ ჰქონდათ, რომ დემონტაჟი უნდა დაწყებულიყო. მერიის მუნიციპალური ინსპექციის განცხადებით, „ნაძალადევის რაიონში, თბილისის ზღვის მიმდებარე ტერიტორიაზე, სახელმწიფო მიწის უკანონოდ დაკავება-მიტაცების მასშტაბური ფაქტი გამოავლინა და აღკვეთის მიზნით, სპეციალური ღონისძიება განახორციელა.“ „აღნიშნულ ლოკაციაზე, რეკრეაციულ ზონაში, 2 ჰექტრამდე ტერიტორიაზე, სახელმწიფო და მუნიციპალიტეტის საკუთრებაში არსებულ მიწაზე უკანონოდ იყო განთავსებული 30-მდე დაუსრულებელი ხის, ასევე, სხვადასხვა მსუბუქი კონსტრუქციის ნაგებობა. თბილისის მუნიციპალურმა ინსპექციამ სახელმწიფო მიწაზე განთავსებული უკანონო შენობა-ნაგებობების დემონტაჟი განახორციელა. დემონტაჟი ჩაუტარდა ათულობით უკანონო შემოღობვასაც“, – აცხადებს მერია. პუბლიკა

აფხაზეთის დე ფაქტო რესპუბლიკის სოფლის მეურნეობის სამინისტრო ნერგებს საქართველოდან ყიდულობს. ამის შესახებ ინფორმაციას ოპოზიციური ვეტერანთა ორგანიზაცია “არუაა” ავრცელებს. ცნობილია, რომ შესყიდვების ღირებულებამ ორი წლის განმავლობაში 42 მილიონი რუბლი (430 ათასი დოლარი) შეადგინა . ორგანიზაციის განცხადებით, ეს ყველაფერი წარმოადგენს”ქართველი ფერმერების მხარდაჭერას აფხაზეთის სახელმწიფოს საბიუჯეტო სახსრების ხარჯზე”. ორგანიზაციის განცხადებით, 2023 წლის მაისში, მისი ბრძანებით, აფხაზეთის დე ფაქტო ლიდერმა ასლან ბჟანიამ “ცალმხრივად გახსნა აფხაზეთის საბაჟო საზღვრები ქართული საქონლის ფართო სპექტრისთვის”. “ეს გადაწყვეტილება ეწინააღმდეგება არა მხოლოდ აფხაზეთის ინტერესებს, არამედ ზიანს აყენებს ჩვენს ეკონომიკას, ძირს უთხრის საზოგადოების მორალურ და ეთიკურ საფუძვლებს და ეწინააღმდეგება მეგობრული აფხაზურ-რუსული ურთიერთობების სულისკვეთებას. რუსეთთან ვაჭრობა მცირდება, ხოლო საქართველოდან აფხაზეთში შემოსული საქონლის მოცულობა, მათ შორის, კონტრაბანდის გზით, ყოველდღიურად იზრდება”,- ნათქვამია განცხადებაში. ორგანიზაცია მოუწოდებს დე ფაქტო პრეზიდენტის მოვალეობის შემსრულებელ ვალერი ბგანბას, გააუქმოს ეს “ანტიხალხური გადაწყვეტილება”. ბგანბა დე ფაქტო პრემიერის პოსტზე აფხაზურმა ოპოზიციამ წარადგინა. ის ამჟამად აფხაზეთის ლიდერის მოვალეობის შემსრულებელია ბადრ გუნბას ოფიციალურად საპრეზიდენტო კანდიდატად დარეგისტრირების შემდეგ. ნეტგაზეთი

საზოგადოებრივ ტრანსპორტზე კიბერთავდასხმა ჰაკერულ ჯგუფ Anonymous-სთან აფილირებულმა ქართველმა ჰაკერებმა განახორციელეს. ამის შესახებ განცხადებას ჰაკერული ჯგუფი Anonymous პლატფორმა X-ის საკუთარ გვერდზე ავრცელებს. „კვირების წინ Anonymous-მა კიბერ ომი გამოუცხადა არალეგიტიმურ, რუსეთის მიერ მხარდაჭერის რეჟიმს საქართველოში მას შემდეგ, რაც წარმატებით მოხდა საქართველოს ყველა სამთავრობო სამინისტრო ვებ-გვერდზე შეღწევა და გატეხა. დღევანდელი კიბერთავდასხმა თბილისი საზოგადოებრივი ტრანსპორტის სისტემაზე, რომელიც Anonymous-თან აფილირებული ქართველი ჰაკერების მიერ განხორციელდა, მოიცავდა საგადასახადო აპარატებში შეღწევას, რაც პირდაპირი „მესიჯი“ იყო კორუმპირებული მთავრობისთვის, რომელმაც არჩევნები გააყალბა და ავტორიტარული რეჟიმი დაამყარა. ეს გაფრთხილებაა მჩაგვრელებისთვის: დემოკრატიისა და თქვენი ხალხის წინააღმდეგ ჩადენილი თქვენი დანაშაულები უპასუხოდ არ დარჩება. საქართველოს ხალხს: ადექით, წინააღმდეგობა გაწიეთ და თავისუფლება დაიბრუნეთ. მარტონი არ ხართ ამ ბრძოლაში. გაუმარჯოს საქართველოს,” - ნათქვამია განცხადებაში. შეგახსენებთ, რომ თავდაპირველად ინფორმაცია მოქალაქეებმა გაავრცელეს, რომლის თანახმად, თბილისში, ავტობუსებსა და მიკროავტობუსებში გადახდის აპარატებში საქართველოს და ევროკავშირის ჰიმნები, ასევე, პოლიტიკოსების სხვადასხვა შინაარსის ხმოვანი შეტყობინებები იყო ჩართული. აღნიშნულს მერია გამოეხმაურა და განმარტა, რომ პრობლემის აღმოსაფხვრელად, შესაბამისი კომპანიების წარმომადგენლები ოპერატიულად დაიწყებდნენ მუშაობას, აპარატები ხარვეზის გამოსწორებისთანავე ჩაირთვებოდა, გათიშვის პერიოდში კი ტრანსპორტი მგზავრებს გადახდის გარეშე მოემსახურებოდა. მოგვიანებით, საზოგადოებრივ ტრანსპორტში სამგზავრო გადახდის სისტემა აღდგა. ფაქტთან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 284-ე მუხლით დაიწყო, რაც კომპიუტერულ სისტემაში არამართლზომიერ შეღწევას გულისხმობს. იპნ

მზია ამაღლობელის წინასწარ დაკავებაში დატოვება გაუმართლებელია და ძალიან შეშფოთებული ვარ მის მდგომარეობაზე, - ამის შესახებ ევროსაბჭოს ადამიანის უფლებების საკითხებში კომისარმა, მაიკლ ო'ფლაერტიმ განაცხადა. შესაბამისი განცხადება ევროსაბჭოს ოფიციალურ ვებგვერდზეა გამოქვეყნებული. განცხადებაში აღნიშნულია, რომ ო'ფლაერტი საქართველოში ვიზიტით 21-23 იანვარს იმყოფებოდა და ვიზიტის ფარგლებში შეხვედრები გამართა ოფიციალურ პირებთან და სამოქალაქო საზოგადოებასთან. მან შეშფოთება გამოხატა 2024 წლის აპრილისა და 28 ნოემბრის შემდეგ გამართული პროტესტების კონტექსტში უკანონო დაკავებებისა და სამართალდამცავებისა და არაიდენტიფიცირებული შენიღბული პირების ("ტიტუშკების") მიერ გადამეტებული ძალის გამოყენების შესახებ ცნობებზე ანგარიშვალდებულების ნაკლებობაზე. „კრიტიკულად მნიშვნელოვანია უზრუნველყოფილ იქნას, რომ მშვიდობიანი შეკრების უფლებას ძირი არ გამოეთხრება ადმინისტრაციული ან საკანონმდებლო ზომებით. ვწუხვარ, რომ ადამიანის უფლებების მხრივ ეს სენსიტიური კანონები მიღებულ იქნა დაჩქარებულად, შინაარსიანი საკონსულტაციო პროცესის გარეშე“, - განაცხადა კომისარმა. ასევე აღნიშნულია, რომ ო'ფლაერტიმ ოფიციალურ პირებთან შეხვედრებზე ცნობილი ჟურნალისტის, მზია ამაღლობელის შემთხვევა წამოწია, რომელიც მან საპატიმროში მოინახულა. „მის წინააღმდეგ წამოყენებული ბრალდებების საფუძველზე რომელიმე სამომავლო გადაწყვეტილებისადმი წინასწარი განწყობის გარეშე, მჯერა, რომ მისი წინასწარი დაკავების გაგრძელება გაუმართლებელია და ძალიან შეშფოთებული ვარ მის მდგომარეობაზე",-განაცხადა კომისარმა. იპნ